Vindotalé + Silent Woo Goore + Kortatu + Sagarroi + Llan de Cubel + Suns Europe = Babêl Europe 18/2019

De Udmurtie ae Bretagne, de Ocitanie al Paîs Basc, des Asturiis ae Basse Sassonie. La gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze, e sarà une vore siore di contignûts.

Si fevelarà di novitâts discografichis e in particolâr di Vindotalé, il gnûf progjet là che e je implicade la cjantante bretone Bleunwenn Mevel. Si fevelarà ancje di atualitât, ricuardant lis manifestazions pe Diada Nacional in Catalogne dai 11 di Setembar e chê cuintri de francesizazion dai nons di lûc in Bretagne di sabide ai 14. In cheste suaze si scugnarà frontâ ancje cualchi brute gnove.

Te Federazion Russe e va dilunc la politiche inviade di Putin doi agns indaûr cuintri des lenghis “altris”, de lôr presince inte societât e dal lôr insegnament intes scuelis: par protestâ cuintri di cheste situazion il linguist Al’bert Razin, innomenât studiôs de lenghe udmurte e militant a pro dai dirits linguistics de sô int, si à dât fûc e al è muart. Intal Stât spagnûl, vie pe prime part di Setembar, a son muarts doi impuartants musiciscj babelics: il basc Iñigo Muguruza e l’asturian Elías García. Par chel si scoltarà ancje la musiche di Silent Woo Goore, Kortatu, Sagarroi e Llan de Cubel.

Al sarà spazi ancje par une buine gnove. A tacâ dal apontament di chest setemane (vuê in direte, doman e sabide in repliche) si discuvierzarà alc de edizion 2019 di Suns Europe, il festival des arts tes lenghis minorizadis dal nestri continent. Lis primis anticipazions a tocjin la sezion musicâl e i siei partecipants: par esempli i ocitans Mauresca Fracas Dub e il cjantautôr de Basse Sassonie neerlandese Leon Moorman.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Advertisements

Africa Express + Familia Caamagno + Rodeo + DLH Posse + Claudia Aru = Babêl Europe 16/2019

Un viaç che al partìs dal Paîs Basc e che al rive fintremai a scjavaç tra Ream Unît e Afriche. Al è chel che al ven proponût inte gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât, che e cjate spazi inte programazion di Radio Onde Furlane vuê, martars ai 20 di Avost, doman, miercus ai 21, e po ancjemò sabide ai 24.

Inte pontade numar 16 dal 2019 di Babêl Europe  si larà a torzeon tal timp e tal spazi, tra discs publicâts intai ultins mês o intes ultimis setemanis e produzions plui o mancul “di anade”. Si podarà scoltâ la musiche ruspiose e desertiche dai bascs Rodeo, la cjançon par sart siore di contignûts musicâi e testuâi di Claudia Aru, une cerce de storie dal hip hop par furlan cui DLH Posse, un toc dal disc gnûf dai galizians Familia Caamagno e une cjançon gjavade fûr di Egoli, la produzion plui resinte firmade Africa Express, un dai progjets musicâi dal ex cjantant dai Blur, Damon Albarn, che cu la colaborazion di tancj di lôr al va dilunc a miscliça sunôrs, ritimis e lenghis de Afriche e in cheste ocasion al ponte la sôatenzion su Johannesburg e al zonte ancje la lenghe galese, in graciis de partecipazion di Gruff Rhys.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane (vuê a undis a buinore, doman a une dopo di misdì e sabide a une mieze dopo di misdì), ancje cheste pontade di Babêl Europe si podarà tornâ a scoltâle in podcast cun Spreaker e Spotify.

Yann Tiersen + Orka + Sŵnami + Jansky + Bumbe Orchestra + La Causa dei Popoli = Babêl Europe 15/2019

Babêl Europe no si ferme nancje vie pal mês di Avost. Vuê, martars ai 6, a undis a buinore – e po ancje tal dopo di misdì di doman, miercus ai 7, a une e di sabide ai 10, a une e mieze, intal palinsest di Radio Onde Furlane al torne il program cuindisinâl dedicât ae produzion musicâl intes lenghis minorizadis de Europe.

Inte gnove pontade de trasmission si fevelarà di atualitât sei in tiermins musicâi che “di contest”, tra concierts, discs, events, manifestazions e publicazions. E sarà la ocasion par scoltâ un altri toc par breton dal disc plui resint di Yann Tiersen, All, juste un mês dopo dal conciert che al à fat a Passarian, denant de Vile Manin.

swnami2

Il percors targât Babêl Europe al tocjarà ancje lis isulis Fær Øer, il Gales, là che e je in plen davuelziment la edizion 2019 dal Eisteddfod, i Paîs Catalans e la Sardegne, cu la musiche dai Orka, dai Sŵnami, dai Jansky e de Bumbe Orchestra. Cun di plui e vignarà dade in anteprime une voglade al gnûf numar dopli (7-8) de riviste taliane dedicade aes minorancis e aes nazionalitâts de Europe e dal mont dal titul La Causa dei Popoli.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane, ancje cheste gnove pontade si pues tornâ a scoltâle in rêt su Spreaker e su Spotify.

logo_web_ROF_new

Yann Tiersen + Alan Stivell + Wolfetones + Sustraia + Balentia + Dissociative TV = Babêl Europe 13/2019

Atualitât, ricuarts e concierts tra Irlande, Bretagne, Paîs Basc, Sardegne e Friûl. A son in contignûts di fonde de gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât, che e cjate spazi inte programazion di Radio Onde Furlane vuê, martars ai 9 di Lui, in direte a 11 a buinore, e po in repliche doman, miercus ai 10, a une dopo di misdì, e sabide ai 13 a une e mieze.

In particolâr, inte pontade numar 13 dal 2019 si scoltarà un toc dal repertori dal innomenât grup folk irlandês Wolfetones, une selezion di Human/Kelt, il disc plui resint di Alan Stivell, e une cerce di All, l’album gnûf di un altri musicist breton une vore innomenât,  Yann Tiersen, che nossere al jere in conciert a Collegno, dongje Turin, e usgnot, ai 9 di Lui, al sune dal vîf li de Vile Manin di Passarian. Cun di plui, cu la musiche babeliche, si fevelarà dal video gnûf dai sarts Balentia, de esperience live dai cjargnei Dissociative TV a Barolo e de sierade dal bant pe sezion musicâl di Suns Europe e si ricuardarà Jean Marc Beheretxe, il storic baterist dal grup basc Sustraia.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade di Babêl Europe si podarà tornâ a scoltâle in podcast cun Spreaker e Spotify.

Cine + leterature + politiche + Mounqup + Raud Ants + I Cantelli + Franca Masu + Gran Bal Dub = Babêl Europe 11/2019

Musiche, cine, leterature, politiche e atualitât. A son chescj i ingredients che e cirarà di meti dongje la gnove pontade di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze.

Inte trasmission che e va in onde vuê ai 28 di Mai e po in repliche tal dopo di misdì ancje doman, miercus ai 29, a une e sabide ai 2 di Jugn, a une e mieze si fevelarà dal Festival dal cine di Cannes, là che il prin premi de jurie inte sezion Un Certain Regard al è stât vinçût dal film galizian O que arde dal regjist Oliver Laxe, il prin cine par galego presentât inte suaze di chê innomenade manifestazion. Un altri argoment che al vignarà frontât al è chel de edizion 2019 dal Premio Ostana, manifestazion dedicade ae scriture e ae creativitât tes lenghis minorizadis de Europe e dal mont, che si davuelç a Ostana, piçul borc di mont tal cjanâl dal Po, tes Valadis ocitanis dal Piemont, dai 31 di Mai ai 2 di Jugn. Cun di plui si provarà a dâ un cuc ai risultâts tes elezions europeanis, davueltis dai 23 ai 26 di Mai, des fuarcis politichis espression di minorancis e nazions cence stât.

Lis selezions musicâls a compagnaran chel percors tematic. Si viazarà de Galizie, di dulà che e rive la cjantante e musiciste Mounqup, che l’an passât e veve dât fûr il disc Castro Verdi fintremai ae Estonie dai Raud Ants che a misclicin rock, folk e metal e a cjantin inte lenghe votiane, passant pe Ocitanie dal progjet Gran Bal Dub, metût adun za di cualchi an de bande di Sergio Berardo dai Lou Dalfin e di Madaski dai Africa Unite, e dal disc Benvenguts a bòrd, pe citât di L’Alguer/Alghero, la “Barceloneta de Sardenya”, cu la vôs di Franca Masu, e pe Corsiche, là che si fasarà un salt indaûr tal timp par recuperâ une cerce dal repertori dai Cantelli.

Si pues scoltâ Babêl Europe  su lis frecuencis di Radio Onde Furlane: sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

“La sfida catalana” e “I giorni della Catalogna”, vuê a Cividât e doman a Udin si fevele di libris e di Catalogne

Cui che al è a stâ in Friûl, vie par cheste setemane, al à almancul dôs ocasion par savê alc di plui su la Catalogne e su la situazion di chê comunitât, tra rivendicazions di autoguvier, repression de polizie, politics in preson e in esili, nazionalisim esasperât e contradizions europeanis. In particolâr la cuistion catalane e sarà al centri dal incuintri dal titul Catalogne, une cuistion europeane, in program doman, martars ai 14 di Mai, a 6 sot sere li de librarie Tarantola di Udin (vie Vittorio Veneto 20), cu la presentazion dal libri La sfida catalana. Cronaca di una rivoluzione incompiuta di Marco Santopadre.

Il volum, publicât l’an passât di PGreco, al propon une leture atente des vicendis catalanis e al marche la impuartance de cuistion nazionâl e de domande di sovranitât popolâr. Il test al partìs de croniche detaiade des mobilitazions de Sierade dal 2017, al propon i elements impuartants de storie catalane contemporanie, al ufrìs une panoramiche des formazions politichis e sociâls catalanis e al fronte i grops no ancjemò disfats de “transizion” dal regjim franchist al ordin politic e sociâl dal dì di vuê ancje midiant di une selezion di articui scrits intai ultins agns, di intervistis fatis cun rapresentants dal indipendentisim e de traduzion di materiâi produsûts dal moviment catalan.

A dialogâ cul autôr sui contignûts dal libri e sui disvilups plui resints de situazion in Catalogne a saran Carli Pup, responsabil dal blog Internazionalitari e redatôr di Radio Onde Furlane, e di Marco Stolfo, politolic de Università dal Friûl.
L’apontament al è promovût de cooperative Informazione Friulana, societât editore di Onde Furlane, cu la colaborazion de librarie Tarantola, dal setemanâl de comunitât slovene de provincie di Udin Novi Matajûr, dal progjet MuMuCEI (Multilingualism Multicultural Citizenship and European Integration) dal Ateneu furlan e de iniziative di informazion e documentazion su chescj temis Ethnos & Demos. Identità, Culture, Diritti e Integrazione in Europa.

L’incuintri al jentre intal program des ativitâts leadis ae edizion 2019 di Suns Europe, il festival des arts intes lenghis minorizadis dal continent.

Cun di plui, ancjemò prime che a Udin, un altri apontament interessant dedicât ae cuistion catalane al è chel in program vuê a 6 e mieze sot sere inte sale de Societât operarie di Cividât (place Giulio Cesare 14). Par iniziative dal Novi Matajûr, in colaborazion cun Onde Furlane, al sarà un dopli confront, tra doi libris e doi autôrs. Il pont di viste di Marco Santopadre e da La sfida catalana al cjatarà chel di Bojan Brezigar, gjornalist e politolic, par sedis agns diretôr dal cuotidian Primorski Dnevnik e espert di politiche europeane e internazionâl, e da I giorni della Catalogna, la edizion taliane, publicade cualchi mês indaûr de cjase editore Qudulibri, dal so instant book dedicât al referendum dal 1 di Otubar, za jessût par sloven cul titul Šest dni v Kataloniji.

La partecipazion ai doi events e je libare e gratuite.

Familia Caamagno + Une Patrie che e cjante + La Gossa Sorda + Maladecia + Galwad y Mydydd = Babêl Europe 8/2019

Une gnove pontade di Babêl Europe cuntune novitât discografiche frescje frescje de Galizie e cun selezions musicâls che ator pal spazi e pal timp a rivin ancje dal Gales, dai Paîs Catalans, de Ocitanie e dal Friûl, par ricuardâ la Resistence e la Fieste de Liberazion e par dâ cont, ancje se in struc, de iniziative Une Patrie che e cjante, che si à davuelte vinars stât a Tavagnà.
Il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane al torne inte setemane di Pasche – vuê, martars ai 16 di Avrîl, in direte a 11 a buinore e po in repliche doman, miercus ai 17, a une dopo di misdì e ancje sabide ai 20 a une e mieze – e al promet ancjemò une volte di frontâ argoments interessants e di proponi musiche babeliche di cualitât.

La gnove produzion che e vignarà presentade juste pôcs dîs dopo de sô scree uficiâl, fate sabide passade a Sant Jacum di Galizie / Santiago de Compostela, e je il disc gnûf de Familia Caamagno, Había que Intentalo, une racuelte di cjançons par galego che e conferme la capacitât dal grup di messedâ cun snait ritmis e melodiis, tra rock’n’roll, beat, pop e surf.
E sarà ancje la ocasion par scoltâ i valenzians La Gossa Sorda
, i pionîrs dal folk rock psichedelic par galês Galwad y Mynydd e i Maladecia, grup des Valadis Ocitanis dal Piemont che tal so repertori al à ancje une cover di un toc di une formazion storiche che e ven simpri di chês bandis, L’Estorio Drolo, dedicât a un partigjan de Val Maira.

Cun di plui al sarà spazi ancje par une cerce dal incuintri tra diviersis gjenerazions di musiciscj furlans, inmaneât la setemane stade inte suaze des manifestazions pe Fieste de Patrie dal Friûl.

Si pues scoltâ Radio Onde Furlane e duncje Babêl Europe sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

Gran Bal Dub + Alidé Sans + Perynn Bleunven + Musicos pola Oficialidá + Alan Stivell (interviste) = Babêl Europe 7/2019

Supergrups, manifestazions e mobilitazions, imnis nazionâi e fiestis nazionâls, novitâts discografichis e musiche dal vîf. La gnove pontade di Babêl Europe, la trasmission cuindisinâl dedicât a lenghis, musichis, minorancis e nazions cence stât, in programazion vuê, martars ai 2 di Avrîl, a 11 a buinore e po in repliche doman, miercus ai 3, a une dopo di misdì e sabide ai 6 a une e mieze tal palinsest di Radio Onde Furlane, e presente plui di un element di continuitât cun chê di cuindis dîs indaûr. Cun di fat, se in chê volte si veve fevelât de grande manifestazion in solidarietât cui presonîrs politics catalans e a pro dal dirit di decidi inmaneade ai 16 di Març a Madrid e si veve scoltât il coletîf Euskal Herria amb Catalunya, metût adun inte Sierade dal 2017 par pandi la solidarietât dal Paîs Basc pe Catalogne, in cheste ocasion si scoltarà la gnove cjançon dai Musicos pola Oficialidá, une sorte di rapresentative dai musiciscj asturians, che e compagnarà la manifestazion promovude de Xunta pola Defensa de la Llingua Asturiana che si fasarà sabide ai 6 di Avrîl a Xixon/Gijon a pro de uficialitât dal asturian e dal galizian asturian.

Si scoltarà ancje une altre selezion di Benvenguts a bòrd, la gnove produzion di Gran Bal Dub, progjet di contaminazion jenfri la musiche tradizionâl ocitane e la eletroniche là che si dan dongje Sergio Berardo dai Lou Dalfin e Madaski dai Africa Unite, che e je stade screade in maniere uficiâl vinars stât a Turin. Cun di plui, stant che o sin inte setemane de Fieste de Patrie dal Friûl, lant daûr de tradizion screade l’an passât, si fevelarà di fiestis nazionâls babelichis e si scoltaran lis versions speciâls dai imnis nazionâi de Ocitanie e de Bretagne interpretadis de cjantante aranese Alidé Sans, de cjantante, atore e youtuber bretone Perynn Bleunven e po ancje di une schirie di siei conazionâi: Alan Stivell, Gilles Servat, Tri Yann, Louis Capart, Soldat Louis, Renaud Detressan, Gwennyn, Clarisse Lavanant, Rozenn Talec e Cécile Corbel.

Dentri de pontade 7/2019 di Babêl Europe e sarà ancje la ocasion par fevelâ dal conciert di Alan Stivell di vinars ai 22 di Març stâts a Mestre e par scoltâ la interviste fate juste li dal Teatro Corso, là che il cjantant, arpist e polistrumentist di divignince bretone al à fevelât di musiche, di lenghis, di dirits, di Bretagne, di Catalogne e di Europe.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade di Babêl Europe e sarà disponibile in podcast su Spreaker e Spotify.

 

Alan Stivell + Claudia Aru + Fermin Muguruza & Chalart58 + Euskal Herria amb Catalunya +Yann Fañch Kemener = Babêl Europe 6/2019

Discs in circolazion di un pôc di timp, concierts e atualitât, tra musiche, cronache e politiche. Vuê, martars ai 19 di Març, a 11 a buinore e po in repliche doman, miercus ai 20, a une dopo di misdì e sabide ai 23 a une e mieze te programazion di Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât e al presente un menù di cheste fate.

In particolâr, inte pontade numar 6 dal 2019 si scoltarà une gnove cerce di Human/Kelt, il disc plui resint di Alan Stivell, che di passe cincuante agns al è un personaç di ponte de gnove musiche bretone e de world music in gjenerâl e che il so tour leât ae gnove produzion al tocje il Stât talian cun trê datis juste in chescj dîs: joibe ai 21 a Rome li dal Auditorium Parco della Musica, vinars ai 22 a Mestre li dal Teatro Corso e sabide ai 23 a Morbegno li dal Auditorium Sant’Antonio.

Lant daûr des presentazions dal so cine di animazion Black is Beltza inte suaze di diviers festivals ator pal mont, si tornarà a scoltâ ancje alc dal repertori di Fermin Muguruza e in particolâr di chel disc metût adun tal 2017 cul dj e produtôr catalan Chalart58.
E sarà ancje la ocasion par scoltâ la cjantante sarde Claudia Aru e la version bilengâl basc/catalan dal supergrup Euskal Herria amb Catalunya de cjançon di Lluis Llach ‘L’Estaca’, che te sô version origjinâl e à marcât la grande manifestazion in solidarietât cui presonîrs politics catalans e a pro dal dirit di decidi che si à davuelte sabide stade a Madrid, e par ricuardâ il cjantant breton Yann Fañch Kemener, che impen juste sabide stade al è muart.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade di Babêl Europe si podarà tornâ a scoltâle in podcast cun Spreaker e Spotify.

Gran Bal Dub + Malasorti + Mounqup + Mario Muñoz + Gacha Empega + Zornade des Feminis = Babêl Europe 5/2019

La atualitât, lis novitâts discografichis, lis tradizions babelichis dal Carnevâl e la Zornade internazionâl des feminis. La cuinte pontade dal 2019 di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze, e cirarà di meti dongje ducj cuancj chescj ingredients.

Inte trasmission che e va in onde vuê ai 5 di Març e po ancje doman, miercus ai 6, e sabide ai 9 al sarà spazi par une novitât frescje frescje che e rive dal progjet Gran Bal Dub, metût adun za di cualchi an de bande di Sergio Berardo dai Lou Dalfin e di Madaski dai Africa Unite: une anticipazion dal disc gnûf Benvenguts a bòrd, che al vignarà metût in distribuzion (ancje in free download) ai 8 di Març. Si scoltarà une cerce ancje di altris trê discs che a son saltâts fûr vie pai ultins mês, ven a dî S’Ardicity dal supergrup sart Malasorti, batiât ator de fin dal 2018, Start dal cjantant di Barcelone Mario Muñoz, screât ai 22 di Fevrâr stâts, e Castro Verdi de cjantante e musiciste galiziane di divignince francese Mounqup, che impen al è jessût ancjemò te Vierte passade.

Stant che Mounqup e je par sigûr un biel esempli di femine babeliche fuarte e che juste ai 9 di Març te capitâl galiziane, A Coruña, e sarà une des protagonistis di un conciert dal titul Mulleres que transforman realidades, la sô presince te scjalute di  Babêl Europe e sarà ancje la ocasion par memoreâ la Zornade internazionâl des feminis. Ancje la presince di Mario Muñoz e à un valôr che al va plui innà de musiche. Cun di fat si scoltarà Als teus ulls, il so adatament par catalan di In your eyes, une cjançon che e fâs part dal repertori di Peter Gabriel. La sielte no je casuâl par vie che juste pôcs dîs indaûr l’innomenât musicist britanic al à tornât a palesâ la sô solidarietât cui indipendentiscj catalans.

Cun di plui, lant daûr des sugjestions dal lunari, al vignarà dât spazi al Carnevâl, cun sclesis di ritmis e bâi des tradizions di chescj dîs de Sardegne, de Galizie e dal Paîs Basc e cuntun toc tradizionâl ocitan che juste vincj agns indaûr al vignive tornât a cjantâ de bande di chel grup innomenât des bandis di Marsilie/Marselha che il so non al jere Gacha Empega.  

Si pues scoltâ Babêl Europe  sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.