Cosenza – Pordenone 0-0

This image has an empty alt attribute; its file name is pordenone-calcio.png

Il Pordenon a Cosenza al scuen contentâsi dome di un pont. I parons di cjase a scombatin e a tegnin bot, i Sborfs no rivin a disfrutâ lis ocasions di gol che a metin dongje, un pôc par vie di une cierte dose di sfortune e in cualchi câs de scjarse precision e une vore par merit di Falcone che al siere la puarte calabrese cun snait e cun mistîr. Se si calcole il volum dal zûc produsût, i neris e verts a meretavin di vinci, ma la grinte dal Cosenza e lis paradis di Falcone a valin la spartizion dai ponts.

Lis dôs scuadris si presentin in cjamp cun cualchi novitât, motivade soredut de emergjence. Di une bande Occhiuzzi al scuen fâ di mancul dai scualificâts Petrucci, Sciaudone e Kone e di chê altre Tesser al à di fâ i conts cu lis assencis pesantis di Bassoli, Pasa, Gavazzi e Ciurria. Cundut achel, il Cosenza al à une voie mostre di vinci, stant che la sô ultime vitorie e rimonte ai 15 di Dicembar, e il Pordenon al à chê di zontâ un altri sucès a chei puartâts a cjase intes ultimis trê partidis.

La scuadre di balon furlane e ocupe cun plui determinazion il cjamp e e je protagoniste des primisi iniziativis ofensivis. Dopo siet minûts di zûc il Pordenon al rive a butâle dentri cun Butic che al devie in puarte un cross di Falasco, però Meraviglia nol fâs bon il gol parcè che al viôt che l’atacant dal Pordenon al partìs di une posizion di fûr zûc.
La pression ofensive dai Sborfs ju puarte a vuadagnâsi un rigôr pal contat in aree tra Vera e Diaw. Dai undis metris al tire il stes Diaw, ma la bale e va a sabati sul pâl e il risultât al reste fer sul zero a zero.

Prime de interval il Cosenza al reste in dîs oms par vie de espulsion di Corsi, che al fâs une brute jentrade su Scavone. In superioritât numeriche, inte seconde frazion il Pordenon al va dilun a tignî il comant de partide, obleant il Cosenza a sierâsi indaûr. La pression de scuadre furlane, però, no somee jessi masse produtive e a son i parons di cjase che si fasin viodi in atac, cuntune conclusion cul cjâf di Bittante, che Perisan al pare cence padins, e cuntun tîr centrâl di Baez che al ven controlât ancje chel cence dificoltâts de bande dal puartîr di San Vît dal Tiliment.

La scuadra di Occhiuzzi, dopo costruidis chês ocasions e prove a alçâ la linie dal so zûc, ma il Pordenon no si scompon e inte ultime part dal incuintri al torne al atac cun plui viamence di prime e al lenç il gol almacul intun pâr di ocasions, cun Musiolik e cun Camporese che a provin a segnâ cul cjâf, ma a cjatin Falcone che al fâs miracui. Il risultât al reste zero a zero e juste intal recupar si ristabilìs ancje la paritât numeriche par vie de espulsion di Berra par vie di un so fal cuintri di Baez.

Pordenone – Venezia 2-0

bandieris-friuul

Il Pordenon al vinç ancjemò. Dopo une setemane di polse, i Sborfs a continuin la rie di risultâts plens. A Lignan la scuadre dal Friûl Ocidentâl e bat il Vignesie cun chel stes risultât che e veve fat a Salerno cuintri di chê che e jere la prime in classifiche. I neris e verts a fasin valê la lôr buine organizazion di zûc e un ciert utilitarisim, profitant ancje de zornade no dal puartîr aversari Lezzerini, e fasin un salt indenant in classifiche rivant inte otave posizion in classifiche.

La partide e scomence ben. E je ecuilibrade e gjolidibile. Lis dôs scuadris a fasin zirâ la bale e tal prin cuart di ore nissune des dôs formazion e rive a tirâ in puarte. Cul passâ dai minûts il Vignesie al incrès il so possès de bale e al alce la linie dal sô zûc, intan che il Pordenon al siere ducj i spazis cun chê di rispuindi in cuintripît. Dopo di un scuintri zenoli cuintri zenoli tra Vacca e Ciurria il zuiadôr dal Vignesie al reste par tiere e al scuen lassâ il cjamp in barele, cussì tal so puest al jentre Taugourdeau. Propit il marsiliês al è un dai protagoniscj de prive vere bale gol de partide cul so cross par Ceccaroni che le passe a Forte, che la sô conclusion e ven parade vie di Perisan.

Nol mostre chel stes snait dal puartîr furlan Lezzerini, che al pastrocje zuiant la bale cui pîts, Diaw je puarte vie e lui lu bute jù: Meraviglia al sivile il penalty, il stes Diaw al tire e al segne. Sot di un gol, il Vignesie al prove a dreçâ la partide prime de polse, cun Forte e cun Taugoudreau, ma nol rive a jonzi l’obietîf. Inte seconde frazion i opsits a tornin al atac, cul Pordenon che al ten bot, si difint ben e al pues contâ sui riflès di Perisan, che al tire jù la sierande suntun tîr cul cjâf di Johnsen. Ancje Chrzanowski al fâs un intervent di salvament suntun corner di Taugourdeau, il Vignesie al va dilunc a insisti indenant, ma nol rive pardabon a jessi pericolôs. Tal ultin cuart di ore al rive il secont gol dal Pordenon, cun Ciurra che al siere la cuistion. Al è ancjemò timp par une conclusion di Di Mariano che e ven parade vie parsore de travierse di Perisan e par un tîr di Butic che al ven fermât ben di Lezzerini.

Salernitana – Pordenone 0-2

bandieris-friuul

Il Pordenon al vinç ancje la sô prime partide dal 2021 e al conferme la rie positive inviade ae fin dal an passât cu la pate cul Frosinone e cu la vitorie taronde cuintri de Reggiana. A Salerno la scuadre di balon furlane vuidade di Attilio Tesser e je compate e utilitariste, e ten bot denant di chê che e jere la prime in classifiche e e rive a vinci cun doi goi segnâts inte ultime part dal secont timp.

La Salernitana e prove a fâ valê la sô supremazie teritoriâl, ma il Pordenon no si scompon e ai tentatîfs dai parons di cjase i Sborfs a rispuindin cun cualchi conclusion. Vie pal prin timp la secuence des ocasions, inviade dopo il prin cuart di ore di zûc, e viôt un tîr fûr bersai di Cicerelli, une conclusion cul cjâf di Barison che e à un risultât compagn, un tîr centrâl di Tutino, un tentatîf par Capezzi cu la bale che e va fûr di pôc a bande, un altri par Casasola e dôs conclusions di Zammarini e Diaw. Cun di plui, un cuart di ore prime de polse, Capezzi si fâs butâ fûr di Rapuano par une brute jentrade su Barison e al cjape un cartelin ros ancje mister Castori, che al proteste cuintri dal arbitri.

La seconde frazion si vierç cul Pordenon che, cuntun om in plui dai aversaris, si mostre plui decîs in atac, cuntun pâr di conclusions di Ciurria. Plui indenant tal timp Belec al neutralize un tîr cul cjâf di Musiolik, intant che des bandis di Perisan si viôt Cicerelli che al prove a tirâ in puarte. Al somee che la partide e sedi destinade a sierâsi cence goi e cuntun pont par om, ma nol è cussì.

Cun di fat, al rive il gol di Barison che cul cjâf al rive a fâ ce che al veve za provât vie pal prin timp e Belec al scuen recuperâ la bale dentri dal sac. La Salernitana e prove a reagjî, ma no rive a combinâ alc e ce. Cun di plui, i parons di cjase intai ultins minûts a restin in nûf parcè che al ven butât fûr ancje Di Tacchio, par sume di amonizions. Il Pordenon al manten il control de partide e dal vantaç e juste tal recupar al torne a segnâ, cun Diaw, che si cjate di bessôl denant di Belec e lu impire.

Ai 15 di Zenâr i neris e verts a zuiaran a Lignan cuintri dal Vignesie.

Pordenone – Reggiana 3-0

bandieris-friuul

Il 2020 dal Pordenon si siere cuntune vitorie plene e taronde. A Lignan cu la Reggiana i verts e neris a cjapin sù il control de partide daurman, a imponin il lôr zûc e a metin il risultât in cassefuart za dentri dal prin timp.

La prime ocasion dal incuintri e rive dopo dîs minûts cuntune conclusion cul cjâf di Scavone parade vie di Cerofolini. I ospits a rispuindin cuntun dialic tra Radrezza e Kargbo, che al ven contrastât di Barison. I Sborfs a segnin dopo passâts i prins vincj minûts di zûc: iniziative di Mallamo su la diestre, che al bruse Pezzella e al crosse tal mieç de aree di rigôr, là che si cjate Diaw che cuntun tîr potent al impire Cerofolini.

La reazion de Reggiana si concretize intun tîr debil di Muratore, intune conclusion di Libutti che Perisan nol à fastidis a fermâ e intune punizion tirade alte di Pezzella. I parons di cjase a doplein il vantaç juste prime de polse: tal mieç dal cjamp Diaw al anticipe Gyamfi e i passe la bale a Ciurria, che al è libar di lâ in direzion de puarte, là che Cerofolini al prove a meti un blec, ma nol rive a fâ nuie sul tîr di Zammarini. La formazion emiliane no somee particolarmentri pericolose ancje se e lenç il gol cun Kargbo in dôs ocasions: prime al cjape il pâl e dopo Perisan al pare.

La seconde frazion si vierç cul Pordenon che al torne a cjapâ la iniziative e in curt al segne il trê a zero cun Ciurria, che al ricêf la bale di Zammarini, al salte cun facilitât Varone e al lasse partî un tîr fuart e precîs che di fûr de aree di rigôr al va finile sot de travierse là che Cerofolini nol pues rivâ.
Il gol al siere in maniere definitive la partide. Il Pordenon al manten il control des operazions, la Reggiana e prove a imbastî ancjemò cualchi azion ma no rive mai a jessi perivolose des bandis di Perisan. Cun di plui i ospits a restin cuntun om di mancul par vie de espulsion di Cerofolini.

Pe scuadre di balon dal Friûl Ocidentâl i trê goi fats e i trê ponts cjapâts a rapresentin un pas indenant in classifiche e une bocjade di aiar bon ancje pal spirt, dopo de sconfite cu la Cremonese e de pate cul Frosinone.

Frosinone – Pordenone 1-1

This image has an empty alt attribute; its file name is pordenone-calcio.png

Un gol par om e un pont par om, che a zovin a dutis dôs lis scuadris, che a rivavin di une sconfite. Il pont cjapât, di une bande, al pese ancjemò di plui pai parons di cjase, in cjamp cuntune formazion di emergjence e cu la bancjine curte par vie dal Covid-19, ma di chê altre al è une bocjade di aiar bon pal Pordenon, dopo dal risultât negatîf cuintri de Cremonese, e in chel istès al lasse un tic di marum in bocje par vie che i Sborfs ancje in cheste partide a van di lunc a cjapâ sù di mancul di ce che a semenin e il risultât al ven ridimensionât juste intai ultins minûts.

Il prin timp al è avonde ecuilibrât. I parons di cjase a tegnin di plui la bale e la fasin zirâ cun chê di jessi pericolôs des bandis di Perisan. La lôr supremazie teritoriâl si palese in concret dome intal possès de sfere, stant che i neris e verts a tegnin bot cence masse padins e a provin ancje lôr a masanâ zûc e a meti dongje azions ofensivis. Cundut achel vie pal prin timp i doi puartîrs no à masse ce fâ e si rive ae polse cence goi.

La seconde frazion si vierç cul Pordenon che al mostre di volê fâ alc di plui. La scuadre furlane e rive a jonzi l’obietîf dentri di vot minûts cul gol di Diaw. I parons di cjase a provin a reagjî cuntun tîr di Gori che al podarès jessi un bon cross par Parzyszek, ma l’atacant nol rive a tocjâlu. Il Frosinone al piert Ciano, che al cole malamentri intun scuintri di zûc e al ven cambiât cun Tabanelli, intant che la scuadre furlane e prove a dopleâ il vantaç ancjemò cun Diaw, ma cence sucès.

Il timp al passe e cuant che al somee che il Pordenon al puedi puartâsi a cjase dut il botin al rive il gol di Parzyszek. A mancjin sîs minûts ae fin e il Pordenon al prove a tornâ al atac, Pezzuto a’nt ordene ancjemò cuatr di recupar, i Sborfs a sburtin, i Canarins si difindin e cussì cuant che l’arbitri al sivile il risultât al reste chel: un a un.

Pordenone – Cremonese 1-2

This image has an empty alt attribute; its file name is pordenone-calcio.png

Prime sconfite in cjase pal Pordenon. A Lignan la scuadre di Tesser no rive a fâ rindi la sô supremazie teritoriâl. La Cremonese e ten bot e cul so zûc di rimesse al rive prime a vierzi lis segnaduris e po, dopo de paritât concuistade daurman dai Sborfs, juste tal ultin al cjate il gol de vitorie finâl.

La partence dal Pordenon e je buine. La scuadre furlane si fâs viodi des bandis di Volpe cun Mallamo e Butic. I ospits a rispuindin cuntun cross di Valeri par Ghisolfi, che però nol rive a disfrutâlu. Cul passâ dai minûts il zûc si colore simpri plui di neri e vert e Ciurria al impegne in dôs ocasions Il puartîr aversari. La Cremonese e resist e il prin timp si siere cence goi.

Tornâts dai camarins, i neris e verts a tornin a tacâ cun snait e cun decision e cussì a lenzin il vantaç par dôs voltis cun Mallamo. Volpe e compagns no si scomponin e dopo vincj minûts une iniziative di Pinato e oblee Perisan a parâ fûr la bale, cun Celar che al è il plui svelt di ducj a recuperâle e a metile tal sac.

Il vantaç de Cremonese al dure juste cuatri minûts, stant che Falasco al segne su punizion. La musiche de partide e torne chê di prime: Pordenon al atac cun chê di vinci e Cremonese atente e cuvierte cul intindiment di no pierdi. A fuarce di dâi la bale e va dentri – Butić al cjape un pâl su punizion e Musolik al recupare e al segne – ma par Robilotta il gol nol è bon par vie de posizion di fûr zûc dal polac. Cussì, cuant che al somee che la partide e vedi di sierâsi sul un a un, al rive il gol dei grîs e ros, firmât di Ciofani.

Entella – Pordenone 0-1

bandieris-friuul

Il Pordenon al torne a vinci. Dopo de sconfite di Pisa e de pate di sabide cul Brescia la scuadre nere e verde finalmentri e concuiste ducj i trê ponts a Chiavari cuintri dal Entella, che al reste tal ultin puest in classifiche. In Ligurie la scuadre furlane e rive a segnâ tai prins minûts, no si scompon denant dai tentatîfs gjenerôs dai aversaris e in plui ocasions si svicine al secont gol.

La partence de scuadre di Tesser e je buine. Dopo cuatri minûts Illuzzi al viôt une stratignude inte aree di rigôr di Paolucci su Scavone e al ordene il rigôr. Dal discut al tire Diaw e al segne.
La reazion dai parons di cjase si viôt daurman cuntun tîr di Paolucci e po cuntune conclusion di
Settembrini, ma Perisan al interven in ducj i doi câs cence problemis. E je plui impegnative la parade dal puartîr futrlan suntun tîr di Chiosa, tal ultin cuart di ore dal prin timp, che si siere di chê altre bande cuntun tîr di Ciurra fermât di Russo.

Inte seconde frazion par un cuart di ore nol sucêt alc e ce. Dopo e rive une gnove conclusion di Ciurria che e tocje il pâl e si stude tra i braçs dal puartîr dal Entella. Il timp al passe e si scombat tal mieç dal cjamp e a dîs minûts prime de fin de partide il Pordenon al à une altre ocasion golose cuntune biele azion di Magnino che al tire a colp sigûr, ma al scuen fâ i conts cuntun miracul di Russo che al ten in partide i siei. L’Entella cussì al prove ancjemò a puartâsi indenant cun chê di segnâ e vuadagnâ un pont, ma nol rive pardabon a impegnâ Perisan e la partide si siere cul sucès dal Pordenon, che cumò si gjolt ancje un salt indenant inte graduatorie.

Pordenone – Brescia 1-1

This image has an empty alt attribute; its file name is pordenone-calcio.png

Un gol par om e un pont par om. A Lignan, Pordenon e Brescia a scuegnin contentâsi de pate. Pai neris e verts al è un pas indenant dopo de sconfite e de partide deludente di sabide stade cul Pisa, ancje se, massime vie pal prin timp, a vevin bongs motîfs par pensâ di cjapâ ducj i trê pont a disposizion.

La partence dai parons di cjase e je buine. Dopo dîs minûts i sborfs a rivin ancje a segnâ cun Diaw, che al fâs valê la sô velocitât, al passe Mangraviti e al impire Joronen. Passâts in vantaç, i undis di Tesser a mantegnin il control de partide, vuidâts di Ciurria e Scavone. Il Brescia si fâs viodi des bandis di Perisan dome cuntune punizion di Martella e cuntun tîr di Spalek, ma il puartîr furlan al è tal puest just tal moment just.

Dopo vincj minûts Joronen al fâs une paradone suntune conclusion di Scavone: un intervent che al pesarà inte contabilitât finâl de partide. Scjampât il pericul, i ospits a alcin la linie dal lôr zûc e inte ultime part de prime frazion a provin a jessi pericolôs cun Sabelli, cun Torregrossa e cun Van De Looi, ma il Pordenon al manten il vantaç cence padins.

Tal secont timp i blanc e celescj a rivin a gafâ l’un a un cun Spalek che al tire in puarte e zovantsi de deviazion di Bassoli al impire Perisan. Doi minûts plui tart il Brescia al reste in dîs, par vie che Van De Looi si intope intal secont zâl e al ven mandât fûr de bande di Gariglio.

I neris e verts a cirin di profitâ de superioritât numeriche, ma la lôr pression ofensive no prodûs alc e ce, parcè che il Brescia si difint cun ordin e cun sintiment. La ocasion par tornâ in vantaç il Pordenon le cjate jueste ae fin de partide, ancjemò cun Diaw che al tire e al lenç il pâl. In plen recupar Joronen si fâs mâl, ma al reste tal so puest e i ospits, strenzint i dincj, a puedin tornâ a cjase cuntune pate di rilêf sigûr.

Pisa – Pordenone 1-0

This image has an empty alt attribute; its file name is pordenone-calcio.png

Une partide scombatude, di bon nivel agonistic e cun tantis imprecisions, che si siere cu la vitorie dai parons di cjase. Il Pordenon a Pisa al romp la rie di risultâts positîfs dal ultin mês e mieç e i lasse ae scuadre toscane ducj i trê ponts a disposizion.

La prime mieze ore di zûc e je segnade di un ecuilibri sostanziâl cu lis dôs formazions che a scombatin tal mieç dal cjamp. Cheste situazion e ven crevade di une iniziative di Sibilli che al robe la bale a Chrzanowski, al jentre inte aree nere e verde e le passe a Palombi che, di bessôl e in buine posizion, al tire fûr bersai. I parons di cjase a insisitin, ma il Pordenon al ten bot e prime de polse al lenç il vantaç cuntun tîr di Calò che al ven parât di Perilli.

Sierât il prin timp cence goi, il vantaç dal Pisa al rive juste sul imprin de seconde frazion: erôr di Vogliacco, cun Sibilli che al recupare il balon e lu zire in direzion di Palombi che in cheste ocasion al è plui precîs e al impire Perisan. I sborfs a provin a reagjî cun Diaw e cun Vogliacco, ma no combinin alc e ce.
Cun di plui a cjatin su la lôr strade la difese pisane che e je ben organizade e cussì e siere ducj i trois, ancje cuant che la scuadre furlane e rive a tirâ in puarte, cemût che al sucêt tal câs di une conclusion di Zammarini, fermade di Benedetti.

Inte ultime part de partide, dopo de espulsion di Marin par un so brut intervent su Ciurria, il Pordenon al prove ancjemò a puartâsi al atac, ancje se i siei atacants no rivin a cjatâ il spieli de puarte. Cussì, dopo cuatri minûts di recupar, l’arbitri al sivile la fin e il Pisa al fâs fieste pe vitorie.

Pordenone – Empoli 0-0

This image has an empty alt attribute; its file name is pordenone-calcio.png

Une biele partide, diviersis ocasions, nissun gol e un pont par om. Cuintri dal Empoli il Pordenon al met dongje il sest risultât util consecutîf e vie pal incuintri si svicine ancje ae vitorie.

La scuadre di balon furlane e scomence cul pas just e dopo cuindis seconts di zûc e impegne il puartîr aversari cuntune biele iniziative di Diaw. Cul passâ dal timp ancje i ospits si fasin vîfs des bandis di Perisan cun Matos e cu La Mantia. Il Pordenon al ten bot, ma cul svicinâsi de fin dal prin timp in gjenerâl il ritmi al cale e plui in detai e cres la pression dai ospits. Perisan al è protagonist di un intervent bielonon suntun tîr cul cjâf di Casale e l’Empoli al prove ancjemò a cirî la strade dal gol cun altris dôs conclusions di La Mantia.

La seconde frazion si vierç di gnûf cul Pordenon al atac e cun Diaw che al à plui di une bale buine par segnâ, ma al paie la pocje precision e un tic di egoisim di masse. I neris e verts a tegnin alte la linie dal zûc e a mantegnin la iniziative e a lenzin il vantaç cun Calò.
L’Empoli si svee dome tal ultin cun Zurkowski che si fâs parâ un biel tîr di Perisan. E cussì la partide si siere cuntun risultât che di une bande ur sta strent a dutis dôs lis scuadris e di chê altre ur va avonde ben.