Udinese – Torino 2-3

Chê di nossere e je stade une serade plene di «tremendismo» granata e furlan, tal ben e tal mâl. La partide di nossere tra Udin e Turin e à regalât emozions, spetacul e ancje aviliment.

Lis emozions – chês plui bielis – a tachin ancjemò prime de sivilade di Rocchi, cu la proiezion dal video di Revelli, la cjançon di Franco Giordani dedicade a Revelli Ruggero Grava, zuiadôr clautan dal ‘Grande Torino’.

Il «tremendismo» dal Toro si viôt di plui vie pal prin timp, cuant che si palesin ad in plen la fuarce ofensive dal ‘gjal’ Belotti, i sugjeriments di Ljajic, il sburt di Iago Falque su la corsie di çampe e lis gjeometriis disegnadis di Rincon. Chel dal Udin al da il miôr di se te seconde frazion, cu lis sostituzions di Danilo e Hallfredsson cun Angella e Jankto, che i dan une benzine gnove ae scuadre di balon furlane. Cun di plui, dutis dôs lis scuadris vie pe partide a fasin erôrs trements in difese.

L’Udin al mostre cualchi novitât te formazion rispiet aes ultimis partidis, cun Pezzella al puest di Samir, cun Fofana in cjamp dal prin minût, cun Hallfredsson al puest di Berhami e cun Jankto in bancjine, ma la sô partence e je lamie. Il Toro al tache cul pît just e dopo nûf minûts al cjate il gol: tîr di Ljajic, rispueste flape di Scuffet e Belotti che al segne cun snait e cun oportunisim.

La reazion dai blancs e neris no je alc e ce. Cundut achel a vegnin metudis dongje dôs ocasions par dreçâ la partide cun Lasagna e Maxi Lopez. Sirigu al sta in vuaite e nol cambie nuie, intant che daûr l’Udin al è ancjemò clopadiç e cussì al rive il dopli vantaç dai granatas (vistûts di zâl), cun Belotti che al jentre te aree di rigôr furlane, le bute tal mieç e al incrose lis gjambis di Hallfredsson che a mandin la bale te rêt daûr di Scuffet.

L’Udin al somee in zenoglon fintremai ae fin dal print timp. Dopo de polse al salte fûr alc di gnûf e di miôr, in graciis dai cambis fats di Delneri e probabilmentri di un invît coletîf a sgarfâ e a spudâ balins fat ai siei zuiadôrs de bande dal tecnic di Aquilee.

Cussì dopo trê minûts Jankto al vuadagne un penalty e De Paul lu segne e al smieze il svantaç. Lasagna e De Paul si fasin viodi ancjemò des bandis di Sirigu, ma no rivin a segnâ. Al passe il timp e il Toro al cjate il tierç bersai cuntune biele iniziative di Ljajic: sghiribiç e pinelade.

Però l’Udin nol mole e al rive il gol di Lasagna che al tocje cul pet une rispueste de difese aversarie.
Nol è avonde. I blancs e neris a provin ancjemò a sburtâ e a scombati, il Turin nol è cussì a plomp te sô tierce linie e l’Udin si svicine a chel trê a trê che nus varès plasût di plui, ancje se nol rive a gafâlu parcè che Ansaldi i met un blec sul ultin tîr di Jankto, ae fin di une buine combinazion cun Lasagna e Jankto.

Sabide trasfierte dal Udin a Rome e derby di Turin. Sperìn ben…

Advertisements

Milan – Udinese 2-1


Miôr des primis dôs partidis di campionât, ma piês dal incuintri di domenie stade cuintri dal Genoa. L’Udin a San Siro al mostre di vê avonde gjambis, cjâf e cûr, ma al palese ancjemò limits di continuitât, di caratar e di precision.

La partence e je buine. Delneri al conferme l’implant de scuadre metude in cjamp la setemane stade ai Riçs: difese a cuatri cun Danilo e Nuytinck tal mieç, Samir a çampe e Larsen a drete; Behran in mediane daûr di Barak, Jankto e De Paul; Lasagna a miezis tra trecuartist e ponte e Maxi Lopez denant a scombati. La pression de scuadre di balon furlane – cu la maie zale pes trasfiertis – e ven certificade di un gol di Lasagna dopo dîs minûts di zûc, che però al ven anulât au la fonde de rilevazion de VAR.

Il Milan i met pôc par fâ valê la sô superioritât teritoriâl. A rivin cussì une conclusion fûr bersai di Kessie e un cuasi gol di Bonucci, cul salvament su la linie di puarte de bande di De Paul. I ros e neris a mostrin di vê sostance e soredut di podê poiâsi su la fuarce ofensive di Kalinic e su la costance de pression fate di Calabria dilunc de corsie di çampe. Di une combinazion tra i doi al salte fûr il prin gol milanist, che al à la firme dal zuiadôr cravuat.

La rispueste dal Udin e rive daurman, cun Lasagna che al profite di une erôr di Romagnoli e al segne l’un a un. Però il Milan al torne di gnûf al atac: Kalinic al segne il doi a un e Kessie si svicine al tris, cuntune conclusion che e ven fermade di Scuffet e dal pâl.

Il prin timp si siere cul Milan in vantaç e cul Udin che nol rive a reagjî cemût che al covente, intant che la seconde frazion si vierç cu la scuadre di balon furlane che e mostre di volê e di podê fâ alc di miôr. Cundut achel in principi al è ancjemò il Milan a jessi plui pericolôs.

La jentrade tal cjamp di Fofana al puest di Berhami e di Baijc par Maxi Lopez i dan une marcje in plui ae scuadre di Delneri. Donnarumma si met in mostre propit suntune conclusion dal centrocampist francês e il Milan al patìs la ande gnove de scuadre furlane.

Te ultime mieze ore abondante di zûc lis scuadris si slungjin e in chestis cundizions Barak al rive a organizâ miôr la manovre dal Udin, che cussì si svicine al doi a doi cun Baijc e cun Lasagna.
Di chê altre bande dal cjamp al scuen lavorâ ancje Scuffet, che al ferme une punizion di Rodriguez.
A son erôrs, biei numars e emozions e si rinfuartìs la sperance che la scuadre di Delneri e puedi gafâ chel pontut.

L’Udin al mostre une convinzion gnove e plui fuarte, ma dut chest nol è avonde. Te ultime part de gare si zonte ancje Matos, jentrât al puest di Jankto, ma la sielte di zuiâ plui su lis corsiis laterâls e di crossâ tal mieç al puest di sburtâsi indenant dilunc de linie centrâl e rint lis ofensivis furlanis mancul pericolosis. E cussì il Milan, che cun Kalinic al sbuse une tierce volte la puarte di Scuffet, ma par dibant, stant che la VAR no permet la convalidazion dal gol, al rive a puartâ a cjase la vitorie e duncje i trê ponts.

Udinese – Genoa 1-0

Plui Friûl e mancul Mer…Dacia Arena. La tierce partide di campionât – che e je la prime, dopo de fin dal marcjât – e va par sigûr miôr pal Udin, che al scombat e che al vinç.
Cuintri dal Genoa la scuadre di balon furlane si presente cuntune muse gnove, di une bande par vie che in atac dongje di Lasagna al è Maxi Lopez, che tal mieç dal cjamp si viôt ancje la cubie formade di Behrami e Barak e che daûr, dilunc pe corsie di diestre, al cjate spazi Larsen di chê altre parcè che e mostre di vê almancul un pôc di chel cûr e di chel snait che a someavin pardabon disparîts.

La ploie e marche il caratar de partide, che no je masse tecniche e spetacolâr, ma e je scombatude, penze, dure e gnervose. L’Udin al interprete l’incuintri inte maniere juste a tacâ dal principi. Il Genoa tal imprin al ten bot e tal prin cuart di ore la gare e je avonde ecuilibrade, ancje se i parons di cjase a somein in stât di fâ alc di plui.

Dopo cuindis minûts di zûc l’Udin al cjate il gol: punizion di Lasagna, tîr cul cjâf di Nuytinck che al cjape un len e corezion decisive di Jankto dentri de rêt daûr di Perin.
Il vantaç ur da ancjemò plui fuarce ai blancs e neris. De Paul e Jankto a van dilunc a fâ moviment par lôr cont e a pro di Lasagna e Maxi Lopez, i doi atacants a son ponts di riferiment pai lôr compagns e Barak e Behrami a masanin zûc e a metin adun une buine baridure te zone mediane, intant che Larsen e Samir a garantissin un ciert sburt dilunc des corsiis laterâls.

Il Genoa nol rive a fâ alc e ce, al stente te costruzion des azions e al rive a sburtâ un tic dome cun Lazovic. La sô situazion e va in piês tal ultin cuart di ore dal prin timp, cuant che Bertolacci al fâs une jentrade di kung fu su Lasagna e Maresca lu punìs cu la espulsion, dopo de verifiche cul var, e po Lapadula al scuen jessi cambiât di Juric par vie di un fastidi al zenoli.

Il prin timp si siere cul Udin in superioritât numeriche e cun Perin che al salve la sô puarte suntune punizion di De Paul. La seconde frazion si vierç cul Genoa che al prove a imbastî une reazion, cul efiet di rivâ a jessi pericolôs des bandis di Scuffet: scat di Taarabt, che al schiribice Samir, e conclusion fermade dal puartîr furlan.

I minûts a passin, al va dilunc a plovi e il zûc al è dûr e ruspiôs. L’Udin si difint e al prove a rispuindi, par viodi di rinfuartî il vantaç, cun Jankto e Lasagna, che a un ciert pont si cjate tes cundizions miôr par segnâ, judât in maniere involontarie di Rossettini, ma Perin i dîs di no.

Pezzella, che al veve cjapât il puest di Samir, al fâs une jentrade brute su Omeonga, al ven butât fûr cul cartelin ros de bande di Maresca e in chê situazion di paritât numeriche Delneri al sielç di gjavâ vie Maxi Lopez e di cuvierzisi cun Adnan.

Al è il moment di sgarfâ tal pantan e di tignî bot denant dal Genoa che al prove ancjemò a jessi pericolôs. L’Udin al fâs ce che al covente par difindisi, massime denant des iniziativis di Taarabt, che al rive ae conclusion intun pâr di ocasions: te prime nol rive a segnâ in graciis di un salvament di Danilo, te seconde al tire fûr di pôc. E cussì l’Udin al manten il vantaç, lu puarte fint in som de partide e finalmentri al met te sachete i prins trê ponts de stagjon. Alc al è alc.

Spal – Udinese 3-2

L’efiet Mer…Dacia Arena si fâs sintî ancje in Emilie. La seconde partide di campionât dal Udin e va sù par jù te stesse maniere de prime: il risultât al è negatîf e ancje il zûc e la condizion atletiche no son alc e ce. Cuintri de Spal i blancs e neris a son flaps e smamîts pe plui part dal incuintri: a van sot di doi goi, a patissin la superioritât teritoriâl dai parons di cjase, a rivin a recuperâ il dopli svantaç ma tal ultin a cjapin il gol che ju lasse ancjemò a cuote zero in classifiche.

Delneri al conferme sù par jù chê stesse scuadre che e veve zuiât in cjase. Cun Scuffet in puarte, cu la cubie di atac formade di Thereau e Lasagna e cu la seconde linie cun Hallfredsson e Fofana in cuvierzidure e in impostazion e cun Jankto e De Paul in proiezion ofensive, i unics cambiaments a son in difese, là che a tornin Danilo tal mieç dongje di Nuytinck, Angella a man drete e Samir a man çampe.

L’Udin al partìs avonde ben: al fâs zirâ la bale, su lis corsiis laterâls si viodin bogns moviments e Thereau e Lasagna a sburtin indenant. La Spal però no si scompon, stant che la manovre imbastide de bande de scuadre di balon furlane no à ritmis avonde alts e par chel lis sôs iniziativis a son proviodibilis.

Cun di plui, cul passâ dai minûts i parons di cjase a cjatin cualchi combinazion ofensive plui svelte e plui pericolose. Scuffet al fâs un bon intervent suntun cross di Semplici, ma nol rive a sierâ la puarte denant di une conclusion di Borriello e cussì la Spal e passe in vantaç.

Cjapât il gol, la reazion dal Udin no je alc e ce: il so zûc al è ancjemò masse lent e proviodibil e pe Spal nol è dificil ni difindi il vantaç ni cirî di jessi pericolôs cun Schiattarella e Lazzari. La musiche sunade te seconde part dal prin timp si conferme dopo de polse, cuant che i parons di cjase si svicinin daurman al doi a zero cuntune biele azion di Mora concludude di Borrielli e po a cjatin il gol cun Lazzari, che al siere cun sucès une azion che a voli e somee condizionade di une posizion di fûr zûc.

Delneri al prove a cambiâ alc tal mieç: Barak al cjape il puest di Hallfredsson, De Paul al ven spostât plui tal mieç e a Thereau i ven dât il compit di slargjâsi.
La inovazion tatiche no mude almancul pal moment i ecuilibris de partide. La Spal e manten il vantaç e si presente ancjemò des bandis di Scuffet cui siei zuiadôrs, che si zovin di cualchi disatenzion di masse de difese blancje e nere, e Viviani e Floccari a van dongje dal colp dal ko.

Intant che si svicine l’ultin cuart di ore de partide e che la vivarositât de Spal si ridûs, l’Udin al cjate il gol che al covente par provâ a dreçâ la serade, cun Nuytinck che al segne cul cjâf suntun cross di Jankto, e al da il la a une pussibile «remuntada».

I atacants blancs e neris a tornin a sburtâ, De Paul al impegne Gomis cuntun biel tîr, Lasagna al vuadagne un penalty e Thereau lu segne. Magari cussì no, la paritât concuistade no resist tai minûts di recupar, cuant che al rive, juste tal ultin, il golon di Rizzo, che al profite di une altre buse de difese blancje e nere e al invente une parabule che e mande la bale dongje dal pâl plui lontan.

Delneri al à reson a inrabiâsi pal risultât e pal ategjament flaput di diviers dai siei zuiadôrs. Al covente tornâ a «sgarfâ». Tant e daurman.

Udinese – Chievo 1-2

L’Udin al tache il campionât 2017/2018 cul pît sbaliât. Magari cussì no, la prime partide in cjase cul Chievo e ven marcade a fuart di chel che za l’an passât plui di cualchidun al veve clamât efiet Mer…Dacia Arena. I blancs e neris a patissin la organizazion di zûc dai aversaris, a palesin plui cualchi dificoltât di masse in ducj i reparts e cussì a pierdin.

Delneri al mande in cjamp une scuadre che e somee avonde a chê che e veve vinçût in Cope Italie, a part la mancjance di Danilo: Scuffet in puarte, Nuytinck e Angella difensôrs centrâi, Pezzella a çampe e Wague ancjemò a drete, mediane formade di Hallfredsson, Fofana, Jankto e De Paul e atac cun Thereau e Lasagna.

La partence no somee nancje mâl, cuntune conclusion di Nuytinck, cuntun tentatîf di De Paul e cuntun tîr di Lasagna che al ven parât cence fastidis de bande di Sorrentino. Cundut achel, il Chievo al mostre adaurman di jessi plui eculibrât e di vê une marcje in plui: no si scompon denant des iniziativis dal Udin, al fâs zirâ la bale miôr e al cjate il gol dopo il prin cuart di ore di zûc cun Inglese che suntun cross di Birsa al sbuse cul cjâf la puarte difindude di Scuffet.

A passin i minûts, il Chievo al manten il control de partide e al è ancje biel di viodi, ordenât e organizât, intant che l’Udin nol rive a fâ masse par dreçâ la partide. La sô reazion e je plui cul cûr che cul sintiment: al rive il gol di Thereau, autôr di un diagonâl potent e precîs che al bat Sorrentino, ma i ospits a tornin daurman a cjapâ in man il balin dal incuintri.

Il prin timp si siere cu la paritât, che e somee stâ strente ae scuadre di Rolando Maran. Cun di fat, te seconde frazion il Chievo al torne a palesâ determinazion e cualitât za tai prins minûts e in curt Birsa al profite de posizion falade di Scuffet par segnâ il gol dal doi a un.

Delneri al mande in cjamp Samir, Perica e Behrami, cun chê di tornâ a meti a scuare il zûc e il risultât. I blancs e neris a fasin un pôc plui di moviment, soredut cun Thereau, ma no rivin a mudâ i ecuilibris dal incuintri. Lasagna al prove in plui ocasions, però Sorrentino al è simpri tal puest just tal moment just, e la prime zornade di campionât de scuadre di balon furlane si siere cun zero ponts in classifiche, un gol fat e doi cjapâts.

Ancje se in atac Lasagna al vuadagne la suficience plene e Thereau al fâs miôr che tes partidis cul Frosinone e cul Celta, a son masse robis di regolâ: la difese e somee clopadice e tal mieç a mancjin ordin e continuitât, cuntun Fofana invisibil e cun Jankto e De Paul cun masse pocje benzine. Vie pe setemane Delneri e i siei zuiadôrs a varan di spudâ balins.

Pordenone – Lecce 3-2

pordenon

Compagn dal Udin e salacor ancjemò miôr. Il tierç turni de Cope Italie 2017/2018 al viôt ancje une altre scuadre furlane tra i protagoniscj positîfs de serade dai 12 di Avost: al è il Pordenon, che al vinç la sô partide e lu fâs dopo vê scombatût, patît e ancjemò scombatût.

Tal stadi dedicât a Ottavio Bottecchia l’incuintri tra i sborfs neris e verts e il Lecce al è pardabon vivarôs e emozionant. La scuadre di balon dal Friûl ocidentâl e fâs valê dal principi la sô predominance teritoriâl. Cundut achel i salentins a cjatin daurman il gol cun Di Piazza, a mantegnin il vantaç vie par dut il prin timp, lu doplein in vierzidure de seconde frazion ancjemò cun Di Piazza e a van dongje de tierec segnadure cun Caturano.

Sot di doi goi, il Pordenon nol mole, al incrès la sô pression ofensive e prime al segne cun Raffini, che al bute dentri une biele bale pinelade cul tac di Gerardi, e po al rive al doi a doi cun Burrai che al tire ben il penalty concedût di Chiffi par un fal a dam di Ciurra.

bandieris

La paritât si manten fin tal ultin minût cuant che la pression dal Pordenon si sbroche cul gol decisîf di Parodi, che al vâl la tierce vitorie di Cope Italie te gnove stagjon – dopo chês cul Matelica (2-0) e cul Vignesie (2-1) – e duncje la cualificazion pal cuart turni di chê competizion, ai 29 di Novembar, cuant che i sborfs furlans a zuiaran cuintri dal Cagliari.

La scuadre dal Friûl ocidentâl, che e je in Serie C, no veve mai rivât a lâ cussì indenant te Cope Italie.

Udinese – Frosinone 3-2

L’Udin al scombat, al patìs e al vinç. La prime jessude pardabon competitive de scuadre di balon furlane, fate nossere in cjase tal stadi Friûl, si siere inte maniere miôr: cuntune partide discrete e cuntune vitorie. I blancs e neris a sghindin il pericul di fâ la stesse brute figure dal an passât cul Spezia e a van indenant in Cope Italie , a dam di un Frosinone che si conferme formazion compate e di buine cualitât.

Delneri al mande in cjamp une scuadre ecuilibrade, cun Scuffet in puarte, Danilo e Nuytinck difensôrs centrâi e Pezzella a çampe e Wague a drete al puest dal infortunât Widmer, cu la mediane formade di Hallfredsson, Fofana, Jankto e De Paul e cun Thereau e Lasagna.

Cundut che la prime conclusion e je dai ospits (tîr di Daniel Ciofani e parade di Scuffet dopo cinc minûts di zûc), al è l’Udin che al mostre plui fuarce ofensive, cul tîr telefonât di Thereau parât di Zappino, cuntune iniziative di Lasagna, cuntune acrobazie di Wague e cui tentatîfs di Jankto e De Paul. I blancs e neris a fasin zirâ la bale, a costruissin zûc e a mantegnin il control de partide, intant che il Frosinone al ten bot e al mostre di jessi ordenât e di vê snait.

Si passe la miezore e al rive il gol di Thereau, che al fâs rindi inte maniere miôr un sugjeriment di Hallfredsson. Il gol al certifiche la predominance, in ducj i reparts, de scuadre di balon furlane, che però viers la fin dal prin timp e cale un tic il ritmi e la concentrazion. Il Frosinone al profite de situazion, al segne l’un a un cuntune bombe di Gori e al prove a sburtâ ancjemò prime de polse.

Il secont timp si vierç in continuitât cu lis batudis finâls de prime frazion: l’Udin al è pôc atent e masse lent e il Frosinone al vuadagne spazis e al imbastìs azions ofensivis.
Une biele parade di Scuffet suntune conclusion di Soddimo e sune la svearine pai blancs e neris, che a recuperin gjambis, cjâf e cûr e a rispuindin prime cuntun tîr cence storie di Hallfredsson e po cuntune biele combinazion tra De Paul, Fofana e Jankto.

La scuadre di balon furlane e torne a vê il control dal cjamp e de partide, e sburte indenant cu la conduzion di Fofana e De Paul e cussì e torne a fâsi viodi des bandis di Zappino cun Thereau e Lasagna. Al rive ancje il gnûf vantaç: tîr dal atacant di Privas, rispueste dal puartîr dai canarins e tap-in decisîf di chê altre ponte blancje e nere.

La partide e somee zaromai di rive jù pal Udin, cun Delneri che al clame fûr Thereau e al met dentri Bajic e cun Jankto che al segne il tierç gol, ma tal zîr di pôcs minûts a tornin a mudâ i ecuilibris. Il Frosinone al nase che te atenzion e te tignude dai parons di cjase e pues saltâ fûr cualchi buse e si impegne a fuart propit par chel.

E rive cussì la segnadure di Crivello, che si zove di une durmide coletive de difese furlane, e a rivin altris pericui par Scuffet, che però al rispuint par ordin, in particolâr ai doi tîrs fats di Paganini. Delneri al rinfuartìs la seconde e la tierce linie cun Balic al puest di Hallfredsson e soredut cun Alì Adnan al puest di Jankto, l’Udin al scombat e al resist, ancje se al somee un tic sfladât, e il Frosinone al prove ancjemò a viodi se al rive a dreçâ la situazion, ma ae fin il risultât nol cambie. Mancul mal…

L’Udin al vinç ai rigôrs (4-3) cul Celta Vigo e al puarte a cjase il trofeu Quinocho

La ultime amichevule dal Udin, prime dal esordi in Cope Italie di sabide cuintri dal Frosinone, si siere cuntun risultât positîf.
In cjase dal Celta Vigo i blancs e neris a zuin une partide discrete e ecuilibrade, là che mister Delneri al à la pussibilitât di provâ diviersis soluzions tatichis e di verificâ lis cundizions dai siei zuiadôrs.

L’alenadôr di Aquilee al partìs cun Scuffet in puarte, cu la linie di difese formade di Danilo e Nuytinck tal mieç e di Widmer e Pezzella tes corsiis laterâls, cun Balic, Halfredsson, De Paul e Matos te mediane e cun Thereau e Lasagna in atac.

Vie pal prin timp lis dôs scuadris si studiin e si controlin e a cirin soredut di fâ zirâ la bale cence sburtâ masse indenant, ancje par vie des bugadis di svint che a dan un tic di fastidi. I parons di cjase a fasin valê une cierte predominance teritoriâl e a mantegnin une intensitât di zûc plui alte di chê de scuadre furlane. Cundut achel par passe miezore la formazion galiziane no rive mai a jessi pardabon pericolose, intant che la prime vere ocasion di gol e je dal Udin, cuntun biel tîr di Halfredsson che al finìs pôc in bande de puarte di Ivan Vllar.

Prime de polse a son ancjemò doi episodis interessants. Prime al è Matos che al ven tocjât in maniere suspiete te aree di rigôr, cul Udin che al domande il penalty e l’arbitri che no jal da e dopo, juste al minût 45, al rive il gol di Maxi Gomez, che si cjate tal puest just tal moment just e al met in puarte une bale facile facile.

Tal secont timp a tachin lis sperimentazions di Delneri. Al puest di Scuffet, Danilo, Hallfredsson, De Paul e Lasagna a jentrin daurman Bizzarri, Angella, Fofana, Ingelsson e Adnan e siet minûts plui indenant ancje Widmer al scuen lassâ il puest a Wague par vie di un fastidi ae gjambe diestre. La scuadre, rivoluzionade e sot di un gol, e stente a produsi ocasions pal un a un, stant che il Celta al manten il control dal zûc e de partide e no i permet al Udin di passâ masse dispès la linie mediane.

Cul passâ dal timp i blancs e neris a somein tornâ in stât di imbastî gjeometriis e acelerazions, intant che cul passâ dal timp Bochniewicz al cjape il puest di Pezzella, Ewandro chel di Thereau e Germandia chel di Matos.
Ewandro, in particolâr, si met in mostre daurman cun cualchi scat in profonditât. Cinc minûts prime de fin dal timp regolamentâr al rive ancje a cjatâ la strade dal gol e al secont tentatîf al sbuse la puarte difindude di Ruben Blanco.

Stant che e je in bal le atribuzion dal trofeu ‘Quinocho’, dedicât ae memorie dal innomenât difensôr e po dirigjent dal Celta, Joaquín Fernández Santomé, il risultât de partide al ven decidût dai tîrs dal discut.
Pal Celta Hernandez sal fâs parâ, a segnin Costas e Wass, al tire fûr Cabral e al cjape la travierse Guidetti. Pal Udin al va a bersai daurman Alì Adnan, al cjape la travierse Balic, al segne Ewandro, sal fâs parâ Angella e al firme il penalty decisîf Fofana.

Il belanç de partide al è positîf pe vitorie – la prime de bande di une scuadre dal Stât talian – e pe prove di caratar dai zuiadôrs. Sabide a Udin, però, la scuadre furlane e scugnarà fâ ancjemò alc di plui, par tacâ ben la Cope Italie cence brutis sorpresis.

L’Udin al scree la gnove stagjon cuntune sconfite. Miercus amichevule in Galizie e sabide la Cope Italie cul Frosinone

Sabide stade l’Udin al à screât in maniere uficiâl la sô stagjon 2017/2018. Tal cjamp dal stadi Friûl la scuadre di balon furlane si à presentade e e à zuiât une amichevule cuintri de scuadre olandese dal Az Alkmaar.

La partide, che e je finude cul sucès dai ospits 2-1, e à mostrât un Udin avonde dinamic e determinât in atac, cundut che la sô pression ofensive no je stade cussì produtive sot puarte, ancje par merit dal puartîr dai olandês, Bizot.
Vie pal prin timp i blancs e neris no àn rivât a butâle dentri ni cun Thereau e nancje cun De Paul, intant che in difese a àn palesât cualchi dificoltât, che di chês al à profitât l’Az Alkmaar.
La prime frazion si à sierade cul dopli vantaç dai osipts, in graciis dai goi di Vejinovic e Van Overeem, che tal ultin cuart di ore prime de polse a cjatavin la strade par sbusâ la puarte difindude di Simone Scuffet.

Tal secont timp la scuadre di mister Delneri e tornave a fracâ sul aceleradôr, poiantsi sul dinamisim di Perica e su la iniziative di De Paul, ma il gnûf tentatîf di Lasagna nol cjatave la strade dal gol, che impen al rivave dîs minûts dopo dal interval cuntun rigôr di Perica.

L’atacant cravuat al è stât un dai miôr de formazion furlane e al è stât protagonist ancjemò di altris azions ofensivis, di bessôl e adun cun Lasagna e Fofana. Magari cussì no, nissun dai lôr tentatîfs di bati Bizot al jonzeve il risultât e la partide si sierave cul sucès dai olandês.
Te ultime part dal incuintri si à viodût in cjamp ancje l’ultin gnûf rivât Bajic.

La agjende dai blancs e neris cumò e proviôt une trasfierte in Galizie, là che miercus a zuiaran cuintri dal Celta Vigo, intant che sabide ai 12 di Avost al sarà il prin impegn ad in plen uficiâl cu la partide di Cope Italie, a Udin, cuintri dal Frosinone.

A part il risultât e cualchi disatenzion di masse in difese, la scuadre di balon furlane e somee jessi za in condizions atletichis buinis e cuntune buine dose di snait e di mentalitât.

Sperìn in ben e che e ledi simpri miôr. E soredut sperìn che lis prestazions e ancje i risultâts dal Udin a sedin miôr di chel sproc pardabon lami e flap che la societât e à sielzût pe campagne abonaments di chest an.

Inter – Udinese 5-2

Si distudin lis lûs di San Siro e si distude ancjemò prin la lum dal Udin, che a Milan cuintri dal Inter al zuie une partide smamide. La ultime di campionât e je une delusion pal zûc e pal risultât: tancj goi cjapâts e nuie diesim puest in classifiche. Anzit, ae fin te graduatorie la scuadre di balon furlane e sbrisse al puest diesim tierç.

E sì che la partide no tache nancje mâl. Lis gnovis che a rivin di Marassi, là che il Napoli al à vinçût cu la Sampdoria, a sono une motivazion in plui pai blancs e neris par sierâ las stagjon in bielece e tentâ di jonzi chel plaçament in graduatorie che al somee ancjemò a puartade di man, cuntune vitorie cul Inter. Di chê altre bande però e je une scuadre che e à un grum di robis (ancjemò di plui de nestre…) di fâsi perdonâ dai siei tifôs e no pues permetisi di fâ brutis figuris. Cussì, denant di un Udin ordenât ma cui zîrs dal motôr bassuts, l’Inter al prove daurman a sburtâ in verticâl e dopo cinc minûts al rive il gol di Eder: acelerazion di Santon e cross pal atacant di divignince brasiliane, che al bat Scuffet.

La reazion dal Udin no si fâs spietâ e si viôt tes conclusions di Angella e di Zapata, che però a son fûr bersai. L’Inter al zonte une ponte di cinisim e salcor ancje di tristerie e al torne a segnâ. Eder al lasse par tiere Heurteaux – ma l’arbitri Di Paolo dulà isal e dulà cjalial? – e al servìs Perišić, che le bute dentri. Delneri si inrabie cul diretôr di gare e al prove a mudâ la muse tatiche de scuadre, cun di plui che al scugne clamâ fûr propit Heurteaux, intant che l’Inter al sburte ancjemò cun Perišić e po cun Brozovič, che al segne il tierç.

Sierât il prin timp cuntun tentatîf di Matos e une altre conclusion fûr bersai di Perišić, la seconde frazion si vierç cuntune gnove par bande: Nagatomo par Medel e Badu al puest di Jankto. Dentri di mancul di dîs minûts al rive il poker dai interiscj, ancjemò cun Eder su assist di Perišić, che i van daûr une iniziative pôc precise di Zapata e un pâl di Palacio.

Il ritmi al cale, l’Inter si contente e si rive tal ultin cuart di ore, cuant che finalmentri ancje l’Udin al rive a segnâ. Il gol de bandiere lu segne Balić, par sigûr il miôr dai blancs e neris, che al vuadagne un balon parât fûr de difese interiste e lu tire in ouarte cun fuarce e cun precision. Il gol furlan al torne a meti in vore la gjostre des segnaduris. A rivin cussì l’autogol involontari di Angella, che i sbat intor e po e va in puarte un cross di Kondogbia par Nagatomo, e il cinc a doi firmât di Zapata.

La stagjon e finìs achì. E podeve lâ miôr, ma sul imprin dal campionât al someave che e podès jessi piês ancjemò. Par chel, in cualchi maniere, o podaressin ancje stâ contents.

L’impuartant al è che pal an che al ven lis robis a ledin miôr, a tacâ de conferme di Delneri in bancjine e de disponibilitât di une scuadre competitive in ducji i reparts.