Udinese – Roma 0-2

Nuie ce fâ. L’efiet Mer…Dacia Arena che al someave palesâsi domenie stade a Turin si à mostrât ancje îr tal Stadi Friûl. Cuintri di une Rome ecuilibrade e determinade la scuadre di balon furlane no rive a fâ alc e ce, e patìs inte maniere piês sei cualchi disatenzion di masse indaûr che la mancjance di fuarce in atac e cussì e cjape doi goi e e piert une altre partide.

I blancs e neris si presentin cun cualchi novitât. L’infortuni di Lasagna al oblee Oddo a meti in cjamp dal prin minût Perica, uniche ponte cun De Paul fantasist, cuntune linie mediane a cinc cui laterâi Widmer e Adnan e cun Barak, Behrami e Fofana tal mieç, cu la difese formade di Larsen, Danilo e Samir e cun Bizzarri tra pâi.
La Rome e rispuint cuntun 4-2-3-1, cun Nainggolan tal vertiç plui alt de mediane, cun Perotti e Kolarov in bancjine par polsâ prime dal incuintri di Champions League di miercus, e cun El Shaarawy, Dzeko, Ünder che si alternin tra impostazion, pression e conclusion.

I ospits a masanin plui zûc e a son plui pericolôs. L’Udin no si scompon, al ten bot, al prove a sburtâ cun cualchi cross di Widmer e Adnan, cun cualchi iniziative di De Paul e cun cualchi progression di Fofana e Barak, ma la ocasion miôr par Perica e rive suntun erôr di Juan Jesus. In chê ocasion Alisson si vuadagne il pagnut. Cun di plui l’unic altri sgrisul che i ven al puartîr brasilian al diven di un biel tîr di Fofana ator de metât de prime frazion.
Al à plui ce fâ Bizzarri sui tentatîfs di Ünder, El Sharawi e Dzeko. Il puartîr blanc e neri si cjate simpri tal puest just tal moment just e il prin timp si siere cence goi.

La seconde frazion si vierç cuntune biele ocasion pal Udin, che dopo siet minûts e viôt Perica che al sghiribice Fazio e si cjate di bessôl denant di Alisson, che però lu ipnotize e no i permet di tirâ in puarte. La ocasion pierdude e vierç la strade ae incressite dai atacs de Rome, che intune fase de partide là che lis dôs scuadris si slungjin si zove dal dinamisim di El Sharawi e Dzeko che in doi moments si svicine ae segnadure.

Oddo al prove a cambiâ alc te sô scuadre: al mande fûr Jankto par Behrami e al met Fofana in posizion centrâl. La situazion no cambie masse pal Udin. Salacor il spostament al zove ae Rome che e cjate ancjemò plui spazi pal so atac e al rive cussì il gol di Ünder.

La rispueste dal Udin si limite a un tîr telefonât di Widmer e a une conclusion di De Paul parade in doi timps. I cambis di Perica cun Maxi Lopez e di Adnan cun Balic no spostin nuie ni tal zûc ni tal risultât, intant che la scuadre di Di Francesco e frache il pedâl dal aceleradôr. Prime Defrel al impegne Bizzari e po Perotti al siere une biele iniziative di Defrel e Nainggolan cul secont gol che al garantìs il sucès dai zâi e ros e al certifiche il risultât finâl.

Te prossime partide l’Udin al larà a Gjenue par zuiâ cuintri de Sampdoria. Al coventarà fâ alc di plui e di miôr.

Advertisements

Torino – Udinese 2-0

Al cjante il Gjal e al vinç il Toro. L’Udin a Turin al piert la ocasion di fâ un pas indenant inte zone Europa League. I blancs e neris a segnin un gol che al ven scancelât dal Var e a fasin un prin timp discret, ancje se si cjatin in svantaç, però te seconde frazion si sfantin e i parons di cjase, cuntune dose piçule di «tremendismo granata» e cuntun biel scat di Bellotti a rivin a vuadagnâ i trê pont e a fâ un pas indenant viers de Europe, in spiete dal derby.

La scuadre di balon furlane si presente cun Bizzarri in puarte, cu la difese a trê formade di Nuytinck tal mieç, Larsen a drete e Samir a çampe, cu la linie mediane cun Behrami tal mieç dal cjamp dongje di Jankto e Barak e di Widmer e Zampano, impegnâts tes corsiis laterâls, e cun Maxi Lopez e Lasagna in atac. Il Toro al rispuint cul so classic 4-3-3, sburtât di Iago Falque, Burdisso e Belotti, e si fâs viodi daurman cul zuiadôr galizian, che al vuadagne une punizion, le tire e al cjape la travierse, intant che di chê altre bande al è Sirigu che al regale une bale golose a Lasagna, che po al devente protagonist te fase difensive cuntun salvament denant de puarte.

La partide e somee avonde ecuilibrade e divertente. La predominance relative dai parons di cjase e ven metude in crisi di une iniziative di Lasagna, che al cjape une travierse cuntune conclusion in acrobazie, e po di Barak che al bute dentri chê stesse bale. Magari cussì no, la fieste dai blancs e neris e dure pôcs minûts: al ven segnalât un fal di Maxi Lopez e Abisso nol convalide la segnadure.

Il Toro planc plancut al torne al atac, l’Udin si difint e al prove a rispuindi in cuintripît, ancje se Lasagna al somee masse isolât, ma cul passâ dal timp al rive il vantaç dai parons di cjase, che a segnin cun N’Koulou su corner di Iago Falque e che prime de polse a impegni ancjemò Bizzarri cun Belotti e cun Niang.

Te seconde frazion la partide e piert cualitât, cul Toro che si contente e cul Udin che nol rive a fâ alc e ce. I parons di cjase a recuperin cualchi iniziative ofensive intant che la scuadre di balon furlane e disparìs. Al profite de situazion Belotti che al fâs un scat di cincuante metros cu la bale tra i pîts, al salte Nuytinck e Samir, al tire in puarte a colp sigûr e al torne a segnâ dopo doi mês di dizun.

E dopo il cjant dal Gjal a son ancjemò i colps di Iago Falque che però nol cjate la puarte. Di chê altre bande nol è nuie e  il blanc e neri al devente grîs.

Efiet Mer…Dacia Arena ancje a Turin?

Udinese – Milan 1-1

Il Milan al rive in Friûl cun chê di puartâ a cjase la cuarte vitorie di file. L’Udin al patìs la iniziative e la determinazion dai aversaris, ma e ten bot e tal secont timp e rive a gafâ chê paritât che e covente e che e je il risultât plui just.

Cuintri de scuadre di Gattuso mister Oddo al presente un 3-5-2 che in cualchi moment al somee cuasit un 5-3-1-1, cun Bizzarri in puarte, cu la tierce linie formade di Danilo, Nuytinck e Larsen, cun Behrami ancjemò tal mieç, cun Barak e Jankto dongje di lui e cun Pezzella e il gnûf rivât Zampano tes corsiis laterâls,a sburtâ ma soredut a cuvierzi, cun Lasagna prime ponte e De Paul itune posizion ibride a miezis tra la mieze ponte e il secont atacant. Il Milan, cuntun 4-3-3 che al cjape sù avonde dispès la forme di un 4-1-4-1, al mostre daurman une vocazion ofensive plui marcade e za tal prin minût al va al tîr cun André Silva, ma Bizzarri nol à fastidis tal parâ.

A passin i minûts, il Milan al fâs zirâ di plui la bale, ma l’Udin si difint cun ordin e al prove a rispuindi in cuintri pît, ancje se cence masse intensitât. Cheste sorte di eculibri e va al mancul cuant che Suso al tire fûr pardabon un biel numar: al controle la bale a sù par jù trente metris de puarte, si zire e al mole une bombe che e va a incjastrâsi sot de travierse, là che Bizzarri nol rive a tocjâle.
L’Udin al prove a rispuindi, cundut che si cjate a patî, cun Pezzella, lis acelerazions di Suso, e al imbastìs cualchi cuintri pît cun Jankto e De Paul che a lavorin par Lasagna, che al prove a fâsi vîf des bandis di Donnarumma, intant che di chê altre bande André Silva nol rive a fâ rindi une buine ocasion.

Il secont timp si vierç sù par jù cun chê stesse ande. L’episiodi plui significatîf par un pôcs di minûts al è un contat in aree tra Bonucci e Lasagna, ma arbitri e Var a son in cunvigne che al è dut in regule.
La musiche e cambie cuant che Oddo al cjate i cambis juscj: Widmer al puest di Pezzella, che al veve sufiert masse, Maxi Lopez par De Paul, che al veve lavorât ben, e po ancje Balic al puest di Berhami, cun chê di dâi ae scuadre plui ordin e plui vision.

A pro dal Udin al rive ancje un brut fal di Calabria su Jankto che i vâl la seconde amonizion e duncje la espulsion. Cuntun om di plui i blancs e neri a vuadagnin cjamp e a van al atac de puarte di Donnarumma, che al salve suntune biele conclusion di Maxi Lopez ma po si cjate incocalît e compliç disfortunât di un zûc di carambule suntun tîr cross di Lasagna, tocjât di Bonucci e po parât dentri de sô puarte dal puartîr milanist.

Dopo dal gol cjapât, il Milan al torne al atac, ancjemò cun Suso, che il so ultin tentatîf al è une punizion che si sfante su la bariere, ma la situazion no cambie e al va ben cussì, soredut pe scuadre di balon furlane.

Pal Udin al è un altri pont te scarsele, une altre partide in blanc e neri, cun alc che al funzione avonde ben e alc che nol convinç masse, e un altri passut indenant che i permet di restâ te prime colone de classifiche dal campionât di serie A. In spiete de nestre partide dal cûr, domenie che e ven li dal Olimpico di Turin.

Genoa – Udinese 0-1

Snait, cûr, fortune e oportunisim. L’Udin a Gjenue al tire fûr dut ce che al covente par rivâ a fâ il risultât miôr. Al fâs dome un tîr in puarte e al segne, al ten bot denant dai pôcs tentatîfs di dreçâ la partide de bande dal Genoa e al scombat e al resist par sù par jù mieze ore in dîs cuintri undis dopo de esplusion di Samir. E cussì al vinç e al reste te prime colone de classifiche.

I blancs e neris a rivin a Gjenue cun chê di tornâ a fâ ponts dopo dai trê patafs cjapâts a Rome miercus tal recupar cuintri de Lazio. I parons di cjase a àn ancje lôr chê di fâ alc di bon. Lis dôs scuadris a metin adun une partide avonde ecuilibrade, segnade de prudence di dutis dôs lis bandis e di un tic di pression ofensive in plui de bande de formazion di Ballardini.

La scuadre di balon furlane e viôt une altre volte in atac la cubie formade di De Paul e Lasagna, Behrami tal mieç denant de difese, cun Jankto e Fofana in mediane e Larsen e Pezzella laterâi e cu la tierce linie cun Danilo, Nuytinck e Samir, denant di Bizzarri. Il Genoa al tache cun plui grinte e cun plui fuarce ofensive, ispirât di Pandev, che dopo trê minûts al mande Lapadula ae conclusion e Bizzarri al pare vie. L’Udin al cres di un alc cul passâ dal timp, ma Lasagna al reste masse isolât, intant che Fofana e De Paul a cjapin sù cualchi biele iniziative e ancje la difese e cîr di tirâsi sùù par lassâ in fûr zûc i atacants aversaris.

La manovre dai blancs e neris e funzione avonde ben, massime in clâf difensive, però Pandev e Lapadula a rivin compagn a cjatâ la strade par jessi pericolôs almancul intune ocasion, tal ultin cuart di ore dal prin timp, ancje se Bizzarri al è tal puest just tal moment just.

Sierade la prime frazion cence goi, il secont timp al tache sù par jù te stesse maniere: prodence, ecuilibri e pocjis iniziativis ofensivis pardabon pericolosis. Dopo un cuart di ore abondant di zûc al rive il svolt, cul prin tîr in puarte dal Udin: balon parât fûr de difese gjenoane e colp decîs di prime intenzion di Berhami che al finîs tal sac daûr di Perin. Un a zero pai furlans.

Il Genoa al rinfuartìs l’atac, che cu la zonte di Taarabt e Galabinov, al devente a cuatri pontis, ma l’Udin si difint cun snait, ancje cuant che, par vie di un fal brut cuintri Pandev, Samir al cjape un cartelin ros e la scuadre di Oddo e reste in inferiroritât numeriche. A passin i minûts e lis bariduris furlanis a tegnin, ancje parcè che il Genoa al è lent e nol rive a sburtâ masse. Si svicine cussì la fin de partide, cuant che i parons di cjase a àn dôs ocasiononis, ma no rivin a cambiâ la partide. Sui disvilups di un corner Galabinov al cjape une travierse e tal ultin minût Rigoni nol rive a tocjâ une bale golose prontade di Taarabt: ancje la fortune i da une man al Udin.

Domenie che e ven i blancs e neris a spietin il Milan li dal Stadi Friûl.

Lazio – Udinese 3-0

No si pues simpri vinci e no si pues nancje lâ dilunc cul fâ dome risultâts positîfs. Par chel une sconfite a Rome cuintri de Lazio si pues ancje ametile. Però, dopo des partidis cul Chievo e cu la Spal, denant dal 3-0 dal stadi Olimpico, al è legjitim pandi ancje cualchi preocupazion e domandâsi se nol sedi daûr a tornâ chel che plui di cualchidun lu clame efiet Mer…Dacia Arena.

Te partide di recupar di nossere l’Udin al patìs un tic masse la superioritât – che obietivamentri e je … – dai parons di cjase. Cun di plui, la scuadre di balon furlane e jeancje un tic sfortunade, stant che e va sot di un gol dopo sù par jù vincj minûts, cuant che la Lazio no rive ancjemò a comandâ ad in plen la partide. Cussì l’autogol al vierç la strade pe afermazion de scuadre di Inzaghi.

I blancs e neris a presentin cualchi novitât te formazion: in atac si torne a viodi Perica dongje di Maxi Lopez e te mediane a son Fofana al puest di Jankto e Hallfredsson. Ancje la Lazio e à une muse divierse rispiet a chê di domenie cul Chievo, cun Radu in difese, Basta e Lukaku tes corsiis laterâls e la cubie Nani-Felipe Anderson in atac.

I parons di cjase a somein plui determinâts ancje se no rivin a jessi pardabon pericolôs. A pescjin il vantaç cuntun cross di Milinkovic, che al cjate Danilo fûr timp e che al ven tocjât malamentri di Samir: autogol. L’Udin al rispuint inte maniere miôr e si svicine daurman ae paritât cuntun biel tîr di Barak, parât vie di Strakosha, e cul tap-in di Perica, là che Radu al salve cun ducj i mieçs, ancje cuntune man, ma par Banti nol è sucedût nuie.

Il prin timp si siere cuntune biele ocasion par Parolo, che al conclût malamentri, intant che la seconde frazion e presente une Lazio plui determinade, che in mancul di doi minûts e segne il secont gol cuntune combinazion metude adun di Felipe Anderson e Nani.
L’Udin al proteste par un altri rigôr pussibil – par un contat suspiet tra Parolo e Larsen – che no i ven dât e dome tal ultin cuart di ore al rive a svicinâsi ae segnadure cuntune biel tîr di De Paul, che però al viôt Strakhosha protagonist di un intervent fenomenâl.
A son ancjemò pôcs minûts di zûc: al è avonde timp par che, dopo dal cuasigol furlan, al rivi il tierç gol laziâl cun Felipe Andreson.

Domenie la scuadre di Oddo e sarà a Gjenue. Sperìn ben…

Udinese – Spal 1-1

Seconde partide dal 2018 e secont risultât di paritât. Cuintri de Spal in cjase l’Udin al fâs sù par jù ce che al veve fat cuindis dîs indaûr cul Chievo. Al zuie dome par un timp, al segne un gol, a’nt cjape un e al puarte a cjase un altri pont. Di une bande la scuadre di balon furlane e va dilunc a no pierdi e a fâ ponts, cun cinc vitoriis e dôs patis, ma di chê altre e somee mancul determinade, costante e concrete di chel che e jere te ultime part dal an passât, cul efiet che la zone Europa League che e someave a puartade di man cumò si cjate a cuatri ponts di distance.

Oddo al met dongje une formazion che e va daûr dal so modul solit, un 3-5-2 che si mude in 3-5-1-1: Bizzarri in puarte, la difese a trê cun Samir, Danilo e Nuytinck, la mediane là che si torne a viodi Balic dongje di Barak e di Jankto, cun Larsen e Pezzella tes corsiis laterâls, e la cubie di atac fate di De Paul e Lasagna.

I blancs e neris a partissin avonde ben e a cjatin il gol dopo undis minûts cun Samir che al tocje cul cjâf il corner batût di De Paul e al mande in tilt Gomis. Il gol al see lis gjambis ae Spal, che no rive a fâ nuie, cun Floccari che al somee une fantasime e Kurtic che al predicje tal desert. L’Udin nol à masse ce fâ, ni in difese e nancje in atac, e al manten il vantaç fintremai ae polse cence padins.

Tal secont timp la musiche e cambie e si viôt daurman une altre Spal. Semplici al à di vê fat sunâ la svearine par Floccari, che al met la çate juste suntun tîr di Antenucci e al segne l’un a un dopo cuatri minût. L’Udin al patìs il colp e i ospits a sburtin cun plui decision. Bizzarri al fâs il so, cuntun salvament suntune conclusion cul cjâf di Vicari e cuntune parade su Grassi, ma di chê altre bande dal cjamp par cirî i blancs e neris al covente clamât ‘Chi l’ha visto’.

Oddo al met dentri ancje Maxi Lopez, cun chê di dâi plui fuarce ofensive ae sô scuadre, però la iniziative e reste patrimoni dai ospits. La partide e finìs un a un e in som al è il risultât plui just. Miercus l’Udin al varà di zuiâ il recupar de partide cuintri de Lazio: in chê ocasion al coventarà vê plui grinte e plui snait.

In spiete di viodi ce che al nassarà te partide di Rome, ve chi ancjemò dôs osservazions in cont dal in cuintri di vuê tal Stadi Friûl. La prime e tocje il bon acet che il public furlan i a dât al ex blanc e neri Felipe. La seconde e je chê dal câs dai tifôs de Spal che prime de partide a àn mostrât diviersis fotos di Federico Aldovrandi e che za di cualchi timp, tra burocrazie e ipocrisie, ur ven improibît di puartâ tal stadi la bandiere cu la muse di chel zovin ferarês muart ai 25 di Setembar dal 2005.

 

Chievo – Udinese 1-1

Sixtum non datur. Dopo cinc vitoriis une daûr di chê altre l’Udin a Verone al rive dome a fâ un gol e a cjapâ un pont. Il Chievo, che tes ultimis cinc partidis al veve rivât a meti dongje dome un pontut, al à fat di dut par dreçâ il so percors, intant che l’Udin al à tacât un tic flaput, i à lassât il balin de partide almancul pe plui part dal prin timp ai aversaris e dome te seconde frazion al à mostrât, almancul in part, chel snait che al veve segnât lis sôs performances plui resintis. Ae fin il risultât di paritât al è just e ur va ben a dutis dôs lis formazions: ai parons di cjase, che si tegnin avonde lontans de zone pericolose e ae scuadre di balon furlane che e manten une buine posizion in graduatorie e che par cuindis dîs e podarà tirâ il flât e cjariâ lis batariis par lâ ancjemò dilunc a zuiâ e a fâ ponts.

I blancs e neris si presentin cun cualchi mudament di formazion: il scheme al è il classic 3-5-2, ma Oddo al met Nuytinck dongje di Danilo e Samir, al scugne tignî fûr Alì Adnan e al place tal sô puest Pezzella, che però le à grivie tal confront cun Cacciatore, che no i permet di sburtâ su la fasse, lu oblee a stâ indaûr e lu met ancje avonde in dificoltât. Propit di chê bande a rivin lis azions plui pericolosis dal Chievo, che al cjate il gol dopo nûf minûts cuntune biele tonade di Radovanovic.

La scuadre di Maran e à il control di dutis lis zonis dal cjamp e lis iniziativis dai blancs e neris a son pocjis e pôc significativis, intant che di chê altre bande Cacciatore al tocje cul cjâf une punizion di Birsa e le bute dentri te puarte di Bizzarri. Par fortune dal Udin, daûr de verifiche fate cul Var che al ricognòs une posizion di fûr zûc, Chiffi nol convalide la segnature e i zâi e blu a viodin sfantâ la pussibilitât di dopleâ il vantaç.

Al è un segn dal destin pai blancs e neris, che planc a planc a tachin a recuperâ cjamp e balons, e ancje pai parons di cjase, che a scomencin a dâi la prioritât ae difese dal un a zero rispiet ae ricercje de seconde segnature. E rive cussì une buine iniziative di Pezzella, che par passe mieze ore al veve patît la pression di Cacciatore ma finalmentri al rive a puartâsi indenant dilunc de sô corsie laterâl: cross tal mieç e deviazion disfortunade di Tomovic dentri de puarte di Sorrentino.

La paritât concuistade prime de polse e la svearine che par sigûr al à di vêur dât Oddo a sburtin i blancs e neris a jessi plui decîs tes sôs azions vie pal secont timp. Cussì, intant che il Chievo al cale, la scuadre furlane e cres, cu lis combinazions imbastidis di De Paul, Jankto e Lasagna.
Lis ocasions miôr pai blancs e neris a rivin te ultime part dal incuintri, ancje se il Chievo si salve cun onôr. Pôc prime di jentrâ tal ultin cuart di ore zûc Bani al met un blec suntune conclusion dal argjentin e cualchi minût plui indenant al è Tomovic che al siere ben su Lasagna e si riscate dal autogol dal prin timp.

L’incuintri al finìs un a un. Al va ben cussì, ancje pai tifôs furlans che a jerin usâts a vinci cun continuitât.

Bologna – Udinese 1-2

Il 2017 si siere cun doi biei tons furlans, tal zûc dal balon e te bale tal zei. Vuê a Bologne la scuadre blancje e nere e à vinçût la sô cuinte partide consecutive, intant che îr ai Riçs si à zuiât Udin – Triest di basket A2 e i parons di cjase a àn vinçût cuintri dai triestins prins in classifiche 73 a 69.

Il sucès de scuadre di mister Oddo si insuaze intun moment positîf pe plui part dal sport furlan e al da motîf di otimisim pal 2018 ancje in altris cjamps, là che pal Friûl al somee che al salti fûr alc altri di interessant. L’Udin si conferme tant che une scuadre ecuilibrade, in stât di scombati, di resisti e di fâ risultât, e par chel si vuadagne ancje une biele posizion in classifiche.

Cuintri dal Bologna di Donadoni no je une partide facile. I parons di cjase a cirin di fâ valê la lôr supremazie teritoriâl, ma l’Udin al rispuint cun snait e cun caratar. I ros e blu a cjatin daurman une biele ocasion cun Verdi, ma par fortune al è Jankto che al cuvierç e i met un blec.

La struture de scuadre furlane e je simpri chê: Bizzari in puarte, difese a trê cun Samir dongje di Danilo e Larsen, mediane a cinc cun Widmer e Alì Adnan tes corsiis laterâls e cun Barak, Berhami e Jankto tal mieç e atac cun Lasagna e Maxi Lopez. L’Udin al resist denant dai atacs aversaris e al rispuint cun Behrami e Barak che a masanin zûc, cun Widmer e Alì Adnan che a garantissin riforniments e pression dilunc des fassis e cun Lasagna che al è un pont di riferiment costant, dinamic e precîs.

Ator de prime mieze ore di zûc al rive il gol dai parons di cjase. Magari cussì no, lu segne Danilo, che al tocje in maniere determinante il tîr cross di Verdi par Destro e al mande la bale te puarte di Bizzarri e che al conferme che il Dall’Ara al è un cjamp che i puarte sfighe, stant che ancje l’an passât al veve fat un autogol. La reazion dal Udin e je imediade e tal zîr di dîs minûts e rive une combinazion tra Alì Adnan e Widmer che e cjate la difese bolognese in dificoltât e che e met il zuiadôr svuizar tes cundizions di segnâ l’un a un.

I blancs e neris a mantegnin chê stesse ande ancje tal imprin dal secont timp e anzit a vuadagnin alc in velocitât, stant che dongje di Lasagna al jentre De Paul al puest di Maxi Lopez. Al rive daurman il vantaç di Lasagna e po l’atacant di San Benedetto Po al torne a fâi pôre a Mirante intun pâr di ocasions.

A passin i minûts e il Bologna nol rive a fâ alc e ce, nancje dopo de jentrade in cjamp di Palacio. L’Udin si difint cun sintiment e al continue a jessi vivarôs indenant, in graciis dal dinamisim di Lasagna e De Paul e de buine intese tra i doi. Ancje Bizzarri al à il so moment di glorie cuntun bon intervent suntune conclusion di Destro, intant che la partide e somee no finî plui, cuntun lunc recupar là che al prove a fâ l’atacant ancje Mirante, ma par di bant, e cuant che Gavillucci al sivile la fin, e je finalmentri ore di fâ fieste.

Ancjemò augurons blancs e neris e furlans!

La ultime pontade dal an di Babêl Europe. Novitâts discografichis di vuê e di doman

Al è passât Nadâl, al rive Sant Stiefin e al torne Babêl Europe, il program cuindisinâl dedicât a lenghis, musichis e nazions cence stât. Vuê al è martars e l’apontament babelic su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al è a undis a buinore. Cun di plui si podarà tornâ a scoltâ la trasmission ancje tal dopodimisdì di doman ai 27, a une, e di sabide ai 30, a une e mieze.

Te ultime pontade dal 2017 si fevelarà di discs jessûts vie par chest an e ancje di cualchi produzion che e saltarà fûr tal 2018. E sarà la ocasion par tornâ a scoltâ alc di Cabudanni di Dr. Drer e CRC Posse e par une dople cerce di Amb l’esperança entre les dents, il disc solist di Xavi Sarrià, innomenât cjantant, musicist e scritôr dai Paîs Catalans, par passe vincjecinc agns vôs e ghitare dai Obrint Pas.

Si tornaran a memoreâ ancje i trente agns di ativitât dai Dixebra e si fevelarà dai Lou Seriol che a son daûr a prontâ un album gnûf: cun chê scuse si scoltaran ancje dôs covers babelichis dai Sex Pistols gjavadis fûr dal repertori dal grup storic asturian e di chel dai sghirats des Valadis Ocitanis dal Piemont, che nus ricuardin che «anarquista» al fâs rime cun «occitanista».

 

Udinese – Verona 4-0

L’Udin al torne a zuiâ in campionât e al torne a vinci. Cuintri dal Verone la scuadre di balon furlane e onore il Stadi dai Riçs inte maniere miôr cuntune partide caraterizade di chel che nus plasarès clamâlu efiet Friûl.

La formazion di Oddo e conferme il so mement bon cuntune prestazion positive, in continuitât tatiche e agonistiche cu la vitorie di Milan. L’implant de scuadre al è chel di San Sio cu lis inovazions di Behrani te mediane e di Maxi Lopez in atac dongje di Lasagna.

Tal zîr di dîs minûts i blanc e neris a rivin daurman a imponi la lôr superioritât te fasse centrâl e tes corsiis laterâls. Ator de prime mieze ore di zûc la intese tra Widmer e Jankto, il dinamisim di Lasagna e il sens de posizion di Barak a produsin la prime segnature: assist dal svuizar e gol dal boem, che si zove ancje di une deviazion di Caracciolo.

I ospits no rivin a imbastî nissune reazion, l’Udin al mante il comant de partide e al è ancjemò pericolôs des bandis di Nicolas, che al fâs une biel numar suntune conclusion di Lasagna ma po al ven superât di Widmer prime de polse.

Tal secont timp la musiche e reste chê: une biele sinfonie blancje e nere. A rivin cussì il tierç gol di Barak, che al siere une combinazion preseose tra Widmar e Lasagna, il poker dal atacant di San Benedetto Po e almancul altris trê conclusions in puarte dai blancs e neris che a viodin Nicolas salvâsi intune maniere o in chê altre.

Auguris blancs e neris e furlans.