Kurdistan + Irlande + Galizie + Scozie + Arpitanie = Babêl Europe 06/2018

Vuê al è martars e o sin ai 20 di Març e tal palinsest di Radio Onde Furlane a 11 a buinore in direte, al torne Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât.

La pontade numar 6 e larà daûr des sugjestions che a rivin de cronache e dal lunari. La atenzion e vignarà dedicade a Kurdistan, Galizie, Arpitanie, Scozie e Irlande. Tra la fieste di Sant Patrizi e il Nawroz, ma ancje cui voi pontants sul maçalici di Afrin, e sarà la ocasion par scoltâ i Seo Linn e Serhado. Cun di plui, al sarà spazi pai scozês americans Mill a h-Uile Rud, pai Blu l’Azard, che cu la lôr musiche a scjavacin lis Valadis ocitanis e chês francoprovençâls dal Piemont, e pal cjantautôr galizian Narf.

Vie pe trasmission si fevelarà ancje dal progjet Lingua + e des primis iniziativis che a son ator pal Friûl in ocasion de Fieste de Patrie.

Dopo de direte di vuê, cheste pontade di Babêl Europe e torne ‘in Onde’, in repliche, ancje doman a une dopo di misdì e po sabide a une e mieze su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

 

Advertisements

Udinese – Sassuolo 1-2

Ae vilie de partide di vuê mister Oddo al veve declarât che l’Udin al varès vût di vinci e soredut di no pierdi. No je lade cussì: dopo passe novante minûts di zûc là che l’element carateristic di fonde de scuadre furlane al è stât ancjemò une volte chel che si vin usâts a clamâlu efiet Mer…Dacia Arena, ancje cuintri dal Sassuolo il risultât finâl al è compagn di chel dai ultins cuatri incuintris.

Pe ocasion i blancs e neris si presentin cun Bizzarri in puarte, cun Danilo di gnûf tal mieç de difese adun cun Larsen e Samir, cun Behrami in mediane dongje di Fofana e Jankto e dai laterâi Adnan e Wildmer e cu la cubie di atac formade di De Paul e Maxi Lopez. La partide e tache avonde flape e smamide. Sei l’Udin che il Sassuolo a mostrin di vê soredut chê di no volê lâ a cirî gnot, ancje se i ospits al somee che a vedin un tic plui di fuarce ofensive.

I minûts a passin cence grandis emozions. Il prin tîr tal spieli de puarte al è dai verts e neris, sùù par jùù a metât dal prin timp, cunat che Mazzitelli i da di lavorâ a Bizzarri e dome te ultime part, prime de polse, al sucêt alc di significatîf: prime, suntun corner dai ospits Adnan al à la sfighe di tocjâ la bale e di butale te puarte dal Udin, e po dopo, tal zîr di mancul di cent e vincj seconts, Fofana al induvine la zuiade juste e la conclusion miôr par sbusâ Consigli e concuistâ la paritât.

Tal secont timp la musiche e torne chê de plui part de prime frazion. Al somee che dutis dôs lis formazions si contentin di un gol e di pont par om.
L’Udin al prove a dâsi un tic plui di dinamisim in atac cun Perica che al jentre al puest di Max Lopez, ma e je dome une buine intenzion, stant che nol rive a fâ alc e ce, intant che di chê altre bande Politano al imbastìs alc di plui.

Si rive cussì ae mieze ore de seconde frazion, cuant che al tocje segnâ su la agjende il gol decisîf di Sensi, che al dopre te maniere miôr un bon assist di Politano. De reazion dai blancs e neris nol burìs fûr nuie di particolâr, fale un colp cul cjâf di Jankto, in plen recupar, che però al va fûr bersai. Masse pôc e masse tart.

Dret & Ledrôs, su Onde Furlane si fevele dal rapuart tra Udin e dut il Friûl

In Friûl si torne a fevelâ dal rapuart tra Udin e il rest de Patrie. L’argoment al è stât tornât a tirâ fûr domenie stade inte suaze de Assemblee dai socis de Societât Filologjiche Furlane e po lu àn cjapât sù i media di chenti. Il pont de situazion su la cuistion al vignarà fat di Radio Onde Furlane, che e veve za frontât la cuistion timp indaûr, inte suaze de gnove pontade di Dret & Ledrôs, la rubrica setemanâl di aprofondiment gjormalistiche par cure dal diretôr de emitente, Mauro Missana, cu la colaborazion redazionâl di Enrico Turloni.
L’apontament al è in direte par doman, sabide ai 17 di Març, a tacâ di 9 e mieze a buinore, e po in repliche par domenie ai 18 a 8 e par miercus 21 a 3 dopo di misdì.

Risultati immagini per kebar krosse

Si’nt fevelarà cul scritôr Stiefin Morat, autôr dal romanç Kebar Krossé che al conte di Friûl apocalitic e di un Udin isolât e alienât, cun Pauli Cantarut, che al fevelarà di cemût che ancjemò tai agns Otante e Novante il Centri sociâl autogjestît al è stât un pont di incuintri tra la citât e il Friûl extraurban, cul president de SFF, Federico Vicario, cui gjornaliscj Paolo Medeossi e Toni Capuozzo, cul scritôr Roberto Meroi e cun Carlo Baldassi, espert di management e autôr di un studi sul disvilup di Udin dopo de fin de Seconde Vuere mondiâl.

Radio Onde Furlane si scolte in modulazion di frecuence (sui 90 Mhz pe plui part dal Friûl Friuli e sui 90.2 Mhz in Cjargne), in streaming (all’indirizzo http://www.ondefurlane.eu) e cui tablets, cui smartphone, cui iPad e cui Pod in graciis de aplicazion che si pues discjamâle de rêt.

Juventus – Udinese 2-0

L’Udin al piert ancjemò. La partide che par solit e je la plui dificile e che cuant che la scuadre furlane fâs un bon risultât nus da une sodisfazion particolâr e finìs ancje in cheste ocasion cul risultât plui proviodibil. E cussì pai blancs e neris di Oddo e je la cuarte sconfite une daûr di chê altre, che e conferme i lôr limits, soredut te fase ofensive.

L’Udin si presente a Turin simpri cun Bizzarri in puarte, cu la tierce linie formade di Angella, Nuytinck e Samir, cun Behrami tal mieç, cun Barak e Fofana dongje di lui, cun Widmer e Adnan su lis corsiis laterâls e cun Jankto e Maxi Lopez in atac. La formazion furlane e partìs cul pît just, e mostre di no vê pôre dai aversaris e tal prin cuart di ore di zûc, sburtât indenant di Barak e Jankto, al rive fintremai a jessi pericolôs des bandis di Szczesny cun Fofana che al tire fûr bersai e cun Adnan che al tire une biele punizion e al oblee il puartîr de Juve a parâle fûr in corner.

I parons di cjase no si scomponin denant dal bon dinamisim dal Udin e a fasin valê daurman la lôr predominance teritoriâl, cun ecuilibri, cun sostance e cu la cualitât dai siei zuiadôrs miôr. Higuain, Douglas Costa e Dybala a fasin i moviments juscj, a zuin lis balis justis e a mostrin la superioritât tecniche de lôr scuadre. L’Udin al va al mancul e in curt si palesin i siei limits in atac.

Il gol de Juve al rive cuntune punizion pinelade di Dybala e prime de fin dal prin timp la scuadre di Allegri e va dongje de seconde segnature cun Higuain: rigôr assegnât par un fal di Angella su Dybala, tîr dal discut dal Pipita e parade di Bizzarri.

Tal secont timp la musiche no cambie. L’Udin al è flaput, la Juve e je concrete e al rive il secont gol: sugjeriment in profonditât di Asamoah par Higuain che al controle e al servìs Dybala che le met dentri cun precision. I parons di cjase a gjestissin il dopli vantaç, la scuadre di balon furlane e cumbine pôc o nuie e cul passâ dai minûts si viôt ancjemò alc des bandis di Bizzarri, cul puartîr dal Udin che al fâs ancjemò une biele parade suntune altre conclusion (ancjemò…) di Dybala.
La Juve e passe denant dal Napoli e si cjape la prime posizion in classifiche. L’Udin al reste a mieze classifiche, a trê ponts dal Toro e a cuote 33 adun cul Bologna.

Babêl Europe 5/2018 tra novitâts e classics pe Zornade internazionâl des feminis 

Une gnove pontade di Babêl Europe e une altre zornade impuartante di memoreâ. Il cuint apontament dal 2018 cul program di Radio Onde Furlane dedicât a lenghis, musichis e nazions cence stât al cole te setemane de Zornade internazionâl des feminis e par chel e pontarà la sô atenzion su lis vôs, su lis musichis e su lis personalitâts di une schirie di ‘feminis babelichis fuartis’.

Intun percors che al va dal Gales e de Cornualie ae Ocitanie, de Ladinie al Paîs Basc e de Sardegne ae Macedonie al sarà spazi pes novitâts discografichis e par cualchi ‘classic’ cence timp.

E sarà la ocasion par scoltâ une gnove cerce di Le Kov, l’album gnûf dut par cornic di Gwenno, e par discuvierzi I ès?, il disc plui resint des ocitanis Cocanha. Si scoltaran ancje lis vôs di Claudia Aru, des Ganes e da La Basu. Cun di plui al sarà un omaç ae regjine dai rom Esma Redzepova.

L’apontament cun Babêl Europe (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al è in direte par vuê, martars ai 6 di Març, a 11 a buinore e tes dôs replichis dal dopodimisdì di doman, miercus ai 7, a une e di sabide ai 10 a une e mieze.