Bobby Sands e i siei compagns, il cjant de lodule e il ricuart di Radio Onde Furlane

This image has an empty alt attribute; its file name is bobby-sands.jpg

Tra i mês di Mai e di Avost dal 1981 dîs fantats irlandês a pierderin la vite inte preson di Long Kesh, pôc fûr di Belfast, intun siopar de fam inviât par domandâ che ur fos ricognossût il status di presonîrs politics. Tra di lôr al jere ancje Bobby Sands (Robert Gerard “Bobby” Sands – Roibeard Gearóid Ó Seachnasaigh), ricuardât inmò in dì di vuê ator pal mont tant che simbul de lote pe libertât e de resistence dai popui cuintri de opression nazionâl e sociâl.

A son passâts cuarante agns di in chê volte e in ocasion di chest inovâl “taront” Radio Onde Furlane e ricuarde chei fats cuntune serie di trasmissions di pueste dal titul Al jevâsi de lune.

Dopo de prime part dal progjet, screade ai 28 di Fevrâr cuntun speciâl che al contave lis lidrîs e il davuelzisi di chê vicende, e lade indenant dal prin ai 17 di Març cu la leture des pagjinis dal diari che Bobby Sands al scrivè di scuindon intant des primis disesiet zornadis dal siopar de fam, la seconde si invie vuê, ai 5 di Mai, juste cuarante agns dopo de muart di Bobby Sands, cuntune trasmission dedicade ae sô persone, a ce che al pensave e a ce che al faseve, e e larà dilunc fintremai tal mês di Avost.

This image has an empty alt attribute; its file name is logo_web.png

Cun di fat, intes zornadis là che al cole l’inovâl de muart di ognidun dai dîs militants republicans, si ur dedicarà une trasmission là che si conte cui che a jerin cu la zonte, là che al è pussibil, di cjançons o altris materiâi sonôrs che ju rivuardin. Se Bobby Sands al reste il plui innomenât, no si pues dismenteâ chei altris zovins che a àn pierdût la vite ta chê lote.

Dopo dal prin apontament, par ordin, si fevelarà di Francis Hughes miercus ai 12 di Mai, di Raymond McCreesh e di Patsy O’Hara vinars ai 21 di Mai, di Joe McDonnell joibe ai 8 di Lui, di Martin Hurson martars ai 13 di Lui, di Kevin Lynch domenie prin di Avost, di Kieran Doherty lunis ai 2 di Avost, di Thomas McElwee domenie ai 8 di Avost e, par finî, di Micky Devine vinars ai 20 di Avost.

Dutis lis pontadis a laran in onde tor 8.15, 14.40 e 18.10 dopo dal radiogjornâl, fûr che chês che a colin di domenie che a laran invezit in onde cun chescj oraris: 8.00, 13.30 e 17.30.

Radio Onde Furlane si pues scoltâle sui 90 Mhz inte plui part dal Friûl, sui 90.200 Mhz in Cjargne e in streaming in dut il mont. Dopo des trê emissions dtis lis pontadis di Al jevâsi de lune si podarà tornâ a scoltâlis in podcast sul Spreaker e sul Spotify di Radio Onde Furlane.

Lis trasmissions a son curadis di Carli Pup, che al jere za stât daûr de prime serie di programs e che vincj agns indaûr al veve fat la traduzion par furlan dal diari scrit di Bobby Sands vie pai prins dîs dal so siopar de fam.

This image has an empty alt attribute; its file name is diari-bobby-sands.jpg

Par Bobby Sands la lodule e jere un dai simbui de libertât. Si pues sierâle intune scjaipule, torturâle e fâi dut il mâl pussibil, ma no cjantarà mai par cui che le à impresonade. Se si vûl sintîle a cjantâ, bisugne lassâle libare.

Bobby Sands al è muart cuarante agns indaûr. Cun lui a àn pierdût la vite ancje chei altris nûf volontaris republicans.
E je une feride che e bruse ancjemò.
Dut câs, la lodule e va dilunc a cjantâ e, se si le scolte ben, si visisi che e cjante propit la sô cjançon di libertât:

Tiocfaidh ár lá – La nestre dì e vignarà

Pordenone – Salernitana 1-2

This image has an empty alt attribute; its file name is pordenone-calcio.png

Il Pordenon al piert ancje a Lignan, cundut che al zuie miôr di sabide stade a Reggio Emilia. Prime al patìs la superioritât e la determinazion de Salernitana, po al cres e al segne l’un a un vie pal secont timp e juste tal ultin, ae fin dal recupar, al ven impirât di Tutino dal discut, in chel istès che la partide e someave indreçade viers dal un a un finâl.
Cu la vitorie inte sachete i ospits a concuistin la seconde posizion in graduatorie, intant che pai sborfs la classifiche e reste avonde clopadice.

Il Pordenon si presente tal prât dal Teghil cun chê di tignî ben il cjamp e di no permeti ae Salernitana di imponi il so zûc. I parons di cjase a partissin ben, no dome in fase di interdizion ma ancje in atac, stant che e je lôr la prime conclusion: une zirade di Zammarini che e ven parade di Belec.

Sghindât il pericul, la Salernitana e passe in vantaç cuntune parabule di Gondo che e scjavace Perisan fûr dai pâi e e finìs tal sac. Plui tart Falasco al ven tocjât inte aree aversarie, ma par Marini al è dut regolâr. Gondo e Casasola a provin ancjemò a passâ Perisan, però i lôr tentatîfs o a van fûr bersai o a vegnin fermât cence masse fastidis.

Passade la metât dal prin timp il Pordenon al lenç la pate cuntun tîr cul cjâf di Ciurria fûr di pôc. Plui indenant Perisan al fâs un bon intervent suntune conclusion di Casasola e i parons di cjase a rispuindin prime de polse ancjemò cun Ciurria, protagonist di un altri tîr che al va une vore dongje dal bersai e po di une colade inte aree aversarie che Marini le calcole regolâr.

Tal secont timp il Pordenon al prove a incressi il ritmi e a alçâ la linie dal zûc. Il risultât si lu viôt daurman cuntun tîr di Butic cu la bale che e va fûr. Di chê altre bande dal cjamp al è Di Tacchio che al tire cul cjâf di pôc parsore de travierse, intant che pal Pordenon Butic al impegne ancjemò Belec, che si salve in corner.

Domizzi al mande in cjamp Misuraca e Musiolik tal puest di Scavone e di Mallamo e la scuadre furlane a fuarce di dâi e cjate il gol cun Misuraca che di fûr aree al firme une conclusion di potence e di precision che e finìs inte rêt passant Belec dongje dal prin pâl.

Tal ultin cuart di ore Castori e Domizzi a fasin ducj i cambis che a coventin. Il Pordenon al à chê di tignî bot e la Salernitana e volarès jonzi il sucès. I neris e verts a vant di lunc a tignî di plui la bale e cun Camporese si svicin al vantaç, ma la sô conclusion e ven parade vie parsore de travierse di Belec.

Si rive tai cinc minûts di recupar, cuant che Kristoffersen, a pene jentrât tal puest di Gondo, al impegne daurman Perisan, e po Tutino al ven tocjât inte aree di Barison. In chest câs par Marini al è rigôr: al tire il stes Tutino, che al profite de ocasion e al segne.

Udinese – Juventus 1-2

This image has an empty alt attribute; its file name is udin_neri.png

Cuintri de Juve l’Udin al convinç, ma nol vinç. Anzit: al piert. Passade in vantaç dopo dîs minûts, la scuadre di balon furlane e manten il control de partide, e siere ducj i spazis e i lasse pocjis pussibilitâts di iniziative ae Juventus, che e stente a meti adun azions di sest. Chest al sucêt vie pal prin timp e vie pe plui part de seconde frazion, cuant che la formazion di Gotti e lenç ancje il secont gol. Tai ultins dîs minûts, però, doi episodis a dan il svolt ae partide a pro dai ospits. Un svolt che pal Udin e pai siei tifôs al è un ribalton: par talian si dîs «Dalle stelle alle stalle».

Gotti al mande in cjamp il 3-5-1-1 cun Okaka uniche ponte, cun Pereyra daûr di lui, cun Molina, De Paul, Walace, Arslan, Stryger Larsen, cun Becao, Bonifazi e Nuytinck in difese e – uniche novitât a pet de partide cul Benevento – cun Scuffet in puarte tal puest di Musso, scualificât. Pirlo al sielç il 4-4-2: Szczesny tra i pâi; Danilo, Di Ligt, Bonucci e Alex Sandro in difese; Cuadrado, Bentancur, McKennie e Bernardeschi in mediane; Dybala e Ronaldo in atac.

L’Udin al partìs cul pît just. I blancs e neris a metin cûr e polmons e a mostrin di vê snait e caratar. La Juve e je smamide e no rive a meti dongje une azion di sest. Dopo dîs minûts la scuadre furlane e passe in vantaç: De Paul al bat une punizion a sorprese e al servìs Molina che al profite de disatenzion de difese aversarie e al tire in puarte un diagonâl potent che al impire Szczesny.

La Juve e prove a imbastî une reazion, cun Alex Sandro che al sburte dilunc de corsie di çampe e cul dinamisim di Mc Kennie. L’Udin al neutralize la massime part des iniziativis de scuadre di Pirlo, che al rive a tirâ in puarte in trê ocasions, ma simpri fûr bersai, cun McKennie, cun Di Ligt e cun Ronaldo, intant che intun pâr di balons pericolôs Scuffet si fâs cjatât tal puest just tal moment just e po al pare in doi timps une conclusion di Dybala.

Il prin timp si siere cul vantaç de scuadre furlane, che si difint cun sintiment e cun spirt di sacrifici, vuidade indaûr di Nuytinck cun Walace tal mieç a recuperâ balons e Arslan e De Paul a fasin ancje un bon lavôr in cuvierzidure. In atac Okaka al ten il balon e al vuadagne teren a vantaç di Pereyra e de sô mobilitât. La seconde frazion si scree cun chê stesse musiche dai prins cuarantecinc minûts: Dybala e Ronaldo a son doi câs par “Chi l’ha visto?”, imberdeâts inte tele di ragn des liniis dal Udin.

I blancs e neris a van dilunc a blocâ cualsisedi tentatîf di azion dai aversaris. Cun di plui a lenzin il doi a zero cun Arslan che di une buine posizion al tire fûr di pôc. A passin i minûts e l’Udin al manten il control de partide. Pirlo al prove a dâ une scjassade ae sô scuadre e al clame fûr Bernardeschi e Dybala par Kulusevski e Morata. Lis ocasions miôr al va dilunc a vêlis l’Udin: dopo dal tîr di Arslan e rive une biele conclusion de distance di Stryger Larsen, ancje chê fûr di pôc.

La partide e somee indreçade ben, a pro dal Udin. La Juve e je in confusion e no rive a jessi pericolose des bandis di Scuffet. Tai ultins dîs minûts al sucêt alc che al cambie la ande dal incuintri. Il prin fat al è un contrast tra Stryger Larsen e Cuadrado fûr de aree di rigôr dal Udin: il zuiadôr juventin al scambie il prât bagnât dl Stadi Friûl par une pissine e si bute par tiere compagn che al ves di fâ un scjuc e Chiffi al sivile il fal. La punizion le tire Ronaldo e De Paul in bariere al salte e al tocje la bale cul braç, cussì la Juve e vuadagne il penalty: dal discut al bat CR7 e Scuffet nol pues fâ nuie altri che viodi la bale dentri tal sac.

L’un a un al dismôf i ospits e al see lis gjambis al Udin che dopo vê fat cetant al somee jessi daûr a pierdi energjiis. Ronaldo, che nol segnave di trê partidis, juste ae fin al à une altre bale golose, che i rive cuntun biel cross pinelât di Rabiot, e le bute dentri cul cjâf profitant ancje de incierte marcjadure di Samir.
La partide si siere inte maniere piês pal Udin che al reste cu la bocje garbe e no cjape nancje un pont, cundut che a’nt varès meretâts trê. Grande fieste pe Juve, che cui trê ponts no piert il contat cun chês altris scuadris che a pontin a vuadagnâ un puest in Champions League.

Reggiana – Pordenone 1-0

This image has an empty alt attribute; its file name is pordenone-calcio.png

Il Pordenon a Reggio Emilia al piert. I parons di cjase a àn une dibisugne mostre di pont e a’nt cjapin ducj chei a disposizion inte partide di vuê. La scuadre furlane e patìs la determinazion de Reggiana, che e rive a segnâ dome tal imprin dal secont timp e e manten il vantaç fint ae fin, cundut che inte ultime mieze ore si cjate cuntun om di mancul.
I sborfs a probin ancje a fâ alc par jonzi la pate ma a scugnin fâ i conts cu Venturi, che al pare dut chel che al è di parâ.

Vie pal prin timp i neris e verts a àn ancje cualchi ocason par passât i vantaç. Dopo disesiet minûts a lenzin il gol a ripetizion Misuraca, Zammarini e Ciurria, ma Ajeti e Venturi a disin di no. Sghindât il pericul, i parons di cjase a alcin la linie dal lôr zûc e, passade la prime mieze ore de partide, a cjapin il pâl cun Lunetta.

Il prin timp si siere cence goi, intant che la seconde frazion si scree cuntune buine conclusion di Musiolik e cuntune otime parade di Venturi. La regule no scrite dal gol no fat che al devente gol cjapât e cjate conferme a dam dal Pordenon cualchi minût plui indenant, cuant che Rozzio al cjape il pâl cuntun tîr cul cjâf e Ajeti al è il plui svelt di ducj tal recuperâ las bale e tal butâle intal sac.

La espulsion di Yao e lasse la Reggiana in dîs. La scuadre furlane e prove a cirî l’un a un cun Falasco e cun Butic, ma i parons di cjase a tegnin bot e soredut Venturi al è simpri puntuâl tai siei intervents, certificant la vitorie meretade de sô scuadre.


Mikel Laboa + Kenze Neke + L’Estorio Drolo + Fermin Muguruza & Manu Chao + Kortatu + Matteo Segrado = Babêl Europe 9/2021

Su Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât. Inte novesime pontade dal 2021, che e cjate spazi inte programazion de setemane tra i 25 di Avrîl e il 1n di Mai, si fevelarà di partigjans, di Resistence e di Liberazion, di storie e di atualitât.

Cjalant il lunari a vignaran memoreâts in musiche ancje l’inovâl dal bombardament de citât basche di Gernika de bande dai avions todescs e talians ai 26 di Avrîl dal 1937, aleâts di Francisco Franco inte Vuere di Spagne (1936-1939), chel de muart di Antonio Gramsci, ai 27 di Avrîl dal 1937, e la date dai 28 di Avrîl, Sa Die de sa Sardigna, e al sarà dât spazi aes gnovis in cont dal tornâ tal Paîs Basc dal scritôr Joseba Sarrionandia e dal ricors fat indenant cuintri de leç di promozion des lenghis minorizadis dal Stât francês fate buine ai 8 di Avrîl.

Il percors “babelic” si disviluparà dentri Ocitanie, Friûl, Sardegne e Paîs Basc, cu la musiche di L’Estorio Drolo, Matteo Segrado, Mikel Laboa, Kenze Neke, Kortatu e Manu Chao & Fermin Muguruza.

Cheste gnove pontade di Babêl Europe si si pues scoltâle vuê, martars ai 27 di Avrîl a 11 in direte, e po in repliche tal dopo di misdì di doman, miercus ai 28 (h. 13), e di sabide al 1n di Mai (h.13.30) sui 90 Mhz inte plui part dal Friûl, sui 90.200 Mhz in Cjargne e in streaming in dut il mont.

Dopo des trê emissions di cheste setemane, ancje cheste pontade di Babêl Europe si podarà tornâ a scoltâle in podcast sul Spreaker e sul Spotify di Radio Onde Furlane.

This image has an empty alt attribute; its file name is logo_web.png

Benevento – Udinese 2-4

bandieris-friuul

Al torne in cjamp De Paul e l’Udin al torne a vinci. A Benevento la scuadre di balon furlane e segne cuatri goi e e cjape ducj i trê ponts a disposizion. I blancs e neris a rivin daurman a imponis sui parons di cjase, si complichin la vite inte ultime part dal prin timp, ma a mantegnin il vantaç fint ae fin de partide, intant che la scuadre di Pippo Inzaghi no rive a dreçâ la gare, e cussì e va dilunc a clopâ e a pierdi posizions in classifiche.

L’Udin si presente tal cjamp dal stadi Vigorito cun Musso in puarte, cun Becao, Bonifazi e Nuytinck in difese, cun Molina, De Paul, Walace, Arslan e Stryger Larsen in mediane, cun Okaka uniche ponte e cun Pereyra daûr di lui cun massime libertât di moviment tra centricjamp e atac: Gotti al torne al 3-5-1-1. Il Benevento al rispuint cul 3-5-2 che al viôt Montipó tra i pâi, la linie difensive cun Glik, Caldirola e Barbe, la mediane cun Depaoli, Dabo, Viola, Hetemaj e Improta, e Sau e Lapadula in atac.

I blancs e neris a partissin cul pît just e in mancul di cuatri minûts a rivin a segnâ, cun De Paul che al ispire in verticâl Molina, che al firme il so prin gol in serie A cuntun grant diagonâl. I parons di cjase a provin a reagjî ma Musso al dinee il gol a Glik cuntune biele parade. La scuadre furlane e va dilunc cu lis azions vuidadis dal talent di De Paul, che al prove ancje la conclusion di lontan, ma Montipò le bloche cence padins.

Passâts i prins vincj minûts di zûc Inzaghi al scuen clamâ fûr Sau, che al à problemis muscolârs, e tal so puest al met Gaich. I parons di cjase a àn di tornâ a organizâsi, intant che l’Udin al manten une cierte costance, che lu puarte a dopleâ il vantaç cun Arslan che al ricêf di Pereyra e al siere inte maniere miôr une azion inviade ancjemò une volte di De Paul.

Dopo segnât il gol Arslan al fâs une falope, dant indaûr a Musso une bale che e devente un assist par Lapadula che al ven tocjât dal puartîr in jessude: Mariani al sivile e Viola al tire e al segne. Scurtât il disvantaç, i zâi e ros a insistin par cirî la pate, ma l’Udin, dopo cualchi erorut di masse, al ten bot, la pression dal Benevento no à nissun efiet particolâr e il prin timp si siere cul doi a un pe formazion furlane.

Inte seconde frazion Inzaghi al mande in cjamp Schiattarella tal puest di Viola, ma la partence e je buine soredut pal Udin che al cjate daurman il gol dal trê a un cun Stryger Larsen che al rive inte aree di rigôr aversarie e al salte plui indalt di ducj par zirâ in puarte cul cjâf il cross pinelât par lui di De Paul.

La prime reazion dal Benevento si concretize intune punizion di Lapadula che e sbat cuintri de bariere e in pocjis conclusions in puarte che no crein problemis a Musso, a part une conclusion di dongje di Gaich che il puartîr al rive a parâ vie cun tempisim perfet.

Il timp al passe e i doi alenadôrs a fasin ducj i cambis che ur coventin: Inzaghi al mande dentri Insigne par rinfuarcî l’atac e Gotti al ponte a mantignî il vantaç e a no pierdi fuarce ofensive. Par chel al clame fûr un Okaka avonde smamît e al mande dentri Braaf, che juste dopo doi minûts al impire Montipò.

L’Udin al met la partide in cassefuart, cundut che il Benevento inte ultime part dal incuintri al prove ancjemò a cirî il gol. Lu cjate cun Lapadula, lu cîr ancjemò cun Gaich ma cence sucès, intun finâl di partide cun intensitât di emozions che nol mude il risultât finâl. L’Udin al vinç e ancje par efiet dai risultâts di chês altris scuadris vie pe zornade al vuadagne posizions in classifiche, passant ancje il Bologna, intant che il Benevento al sbrisse jù tal tierç ultim puest.

La Fieste de Liberazion di vuê, la Resistence di ducj i dîs. Ancje par chest an buine zornade dai 25 di Avrîl

Partigjans

Vuê e je la zornade dai 25 di Avrîl. Chest an al è ancjemò plui impuartant memoreâ la Fieste de Liberazion. Cul aiar che al tire, ator par Stât talian e ancje inaltrò, al è impuartantons jessi “plens” di memorie in cont di ce che al è stât, di cui che al à fat ce e parcè e cemût e duncje “plens” di cussience storiche, civiche e democratiche.

Resistence, Liberazion, Costituzion, Democrazie no son – e no àn di jessi – peraulis vuedis. No je dome une cuistion di memorie storiche, che magari cussì no e ven mistificade simpri plui ancje (e soredut) de bande dai rapresentants des istituzions republicanis. E je ancje une cuistion di cussience e di sensibilitât civiche, sociâl, politiche e umane.

Cognossi e ricuardâ al vûl dî savê, capî e stâ in vuaite, pronts a fâi cuintri al fassisim e al nazisim, in dutis lis lôr manifestazions, e duncje a dutis chês formis di bausie, di injustizie, di prevaricazion, di violence, di intolerance, di razisim, di fanatisim nazionalist che a tornin a fâsi indenant.

Fâ fieste pai 25 di Avrîl al vûl dî jessi pronts, ognidun, a puartâ indenant la nestre Resistence di ogni dì. Fâ fieste pe Resistence e pe Liberazion al è un dirit e salacor ancje un dovê. Un dovê di memorie e di ricognossince par cui che al à lotât cuintri dal fassisim e dal nazisim. Un dovê di atenzion e cussience in direzion di ce che al sucêt tal mont e ta chês piçulis parts di mont là che si cjatìn a vivi. Un dovê di solidarietât cun cui che achì o inaltrò al lote, al scombat e al resist.

Buine zornade dai 25 di Avrîl, fieste civiche taliane, fieste furlane, fieste europeane, fieste umane.

Buine Fieste de Liberazion. Buine Resistence. Ancje par chest an.

Pordenone – Pisa 2-2

This image has an empty alt attribute; its file name is pordenone-calcio.png

Un pont cjapât che al zove ae classifiche e une buine prove di caratar. Il Pordenon a Lignan al rive a dreçâ la partide cuintri dal Pisa, ancje se in inferioritât numeriche. La scuadre furlane e ten bot e cumò a son siet i ponts de cuartultime, il Cosenza.

Intal prin dai trê recupars di Serie B, Pordenon e Pise a impatin par doi a doi intune sfide che e je fondamentâl sei par slontanâ la zone playout (pe scuadre furlane) che par svicinâ i playoff (pai neris e blu).

La partence e je dai ospits che dopo trê minûts a passin in vantaç: suntun tîr di punizion, Vido al fâs la spuinde di cjâf par Caracciolo, che si coordene e al tire e la sô traietorie e ven deviade di Marconi che al bat Perisan. Il Pordenon al reagjìs daurman e al cjate il pâr a pene siet minûts plui tart. Mazzitelli al tocje la bale cuntun braç in aree e l’arbitri nol à dubis e al segne il discut: dai undis metris Ciurria al segne il so novesim gol stagjonâl, il tierç consecutîf dopo i doi cuintri dal Frnone.

La partide e va dilunc cuntun ecuilibri sostanziâl, cul Pordenon che si svicine al vantaç cuntun pâr di conclusions di Ciurria, che in particolâr inte seconde al cjate Gori protagonist di un intervent puntuâl e impuartanton e cul Pisa che, cuant che Perisan al pastroce cu la bale, cunVido nol rive a profitâ.

Juste ae fin dal prin timp, Scavone al tocje Marconi inte aree nere e verde e par Di Martino al è rigôr: l’atacant dal Pisa al tire e Perisan nol pues fâ nuie di plui che recuperâ la puarte tal sac. Sierade la prime frazion in vantaç, il Pisa al vierç il secont timp cun chê di controlâ il vantaç. Si scombat tal mieç dal cjamp e Barison, che al veve za cjapade une amonizion, al ven parât fûr, cuntun secont cartelin zâl, par un fal su Marin.

Mazzitelli al prove a incressi il vantaç dai opsits sun punizion, ma la bale e passe juste un tic plui ad alt de travierse. Plui tart Gucher al pinele une buine bale par Marconi, ma l’atacant al piert l’apontament cul balon. Sghindât il pericul di cjapâ il tierç, cundut de inferioritât numeriche i sborfs a cjatin il pâr al minût numar 65: Mallamo al partìs in cuintripît, suntun erôr di Belli, e i da la bale a Ciurria che le met tal mieç de aree par Zammarini che cul cjâf, di doi pas, al segne il gol dal doi a doi.

Intal finâl Ciurria al à ancjemò une buine ocasion, ma su la sô strade al cjate ancjemò Gori, e il Pisa al prove a passâ Perisan cun Beghetto, ma il puartîr furlan no si fâs ingjanâ. E il risultât de partide al reste chel.

Udinese – Cagliari 0-1

This image has an empty alt attribute; its file name is udin_neri.png

L’Udin al torne a zuiâ in cjase e al torne a pierdi. La partide cul Cagliari e va a finîle cul stes risultât di chê cuintri dal Toro. La scuadre sarde e segne un gol e si puarte a cjase trê ponts impuartantons che si zontin a chei vuadagnâts sabide stade cuintri dal Parma. La formazion di mister Semplici e scombat di plui dai blancs e neris, prime par cirî di segnâ e po par difindi il vantaç, denant de reazion de scuadre furlane che no je nancje masse fortunade, stant che intal ultin e cjape une travierse. Cun di plui l’Udin al patìs la mancjance di De Paul, scualificât, e lis buinis paradis dal puartîr dai ros e blu, Vicario, furlan e cressût tal Udin, che al è deventât titulâr pe positivitât al coronavirus di Cragno.

Gotti al sielç ancjemò il 3-5-2, confermant la cubie di atac Okaka-Forestieri, intant che in puarte al è Musso, in difese a son Becao, Bonifazi e Nuytinck e in mediane a scomencin Molina, Pereyra, Walace, Arslan e Stryger Larsen. Al fâs compagn Semplici cun Vicario tra i pâi, cun Ceppitelli, Godin e Carboni in difese, cun Nandez, Marin, Nainggolan, Deiola e Asamoah inte seconde linie e cun Pavoletti e Joao Pedro indeant.

I ospits a partissin cul aceleradôr ben fracât e dopo cinc minûts a lenzin il vantaç, cun Pavoletti che a al cjape pâl sui disvilups di une punizion tirade di Marin tal mieç de aree. Di chê altre bande dal cjamp Molina i da une buine bale a Forestieri che al tire in puarte cun masse pocje fuarce e Vicario al blocche cence padins.

La partide e va dilunc intune situazion di ecuilibri sostanziâl, cuntun pâr di tentatîfs di Arslan e di Molina, fermâts di Vicario, e cui ros e blu che a tirin in puarte cun Nainggolan, che al fâs un slalom tra i blancs e neris ma il so diagonâl al è fûr bersai, e po cun Joao Pedro, che si dilibare di Bonifazi e le bute dentri, ma Guida al consulte il Var, al viôt un contat a centricjamp tra Marin e Forescj e nol fâs bon il gol.

Sierade la prime frazion cence altris grandis emozions, tal principi dal secont timp la musiche e je sù par jù compagne e chel stes Var che al veve indreçât Guida viers de mancjade convalide dal gol di Joao Pedro al met in cundizions l’arbitri di sivilâ un penalty a pro dai ospits par un contat tra Molina e Carboni. Dal discut al tire Joao Pedro, Musso si slungje par fermâle, ma al rive dome a tocjâle cu la ponte dai dêts e la bale e finìs intal sac.

Il vantaç de scuadre sarde al da la scjassade al incuintri, cul Udin che al reagjìs cun braùre e al cjape sùù il comant dal zûc. Gotti al mande in cjamp Nestorovski, che al è protagonist daurman di un pâr di buinis ocasions: prime al cjape la travierse cuntun biel tîr cul cjâf ben indreçât, dopo nol disfrute inte maniere miôr un bale golose che i rive di un assist involontari di Asamoah e di bessôl denant di Vicario al tire fûr. Semplici al domande ai siei di alçâ la lôr linie dal zûc, ma il pressing dal Udin al è costant e il Cagliari al scuen dome che sierâsi indaûr, zovantsi de frescjece di Simeone e Duncan, che a jentrin tal puest di Joao Pedro e Deiola. Gotti al incres la pression ofensive clamant fûr Nuytinck par Braaf.

Tal ultin cuart di ore di zûc – comprendût ancje il recupa – chel dal Udin si pues clamâlu pardabon assedi: prime Arslan al da un bon balon a Okaka, che però al tire fûr e po, un minût plui tart, al prove Braaf, che di cuant che al è jentrât al à zontât energjie e dinamisim, ma Vicario al tire jù la sierande, e Gotti al clame fûr Pereyra e al zuie la cjarte Llorente, che però nol rive a cumbinâ alc e ce. Vicario al sta in vuaite e il Cagliari al streç in dincj fint ae fin, puartant a cjase une vitorie pardabon impuartante.

Pordenone – Frosinone 2-0

bandieris-friuul

E je une sabide buine pes scuadris di balon furlanis. Dopo dal sucès dal Udin a Crotone in Serie A, ancje il Pordenon in Serie B al vinç in cjase cuintri da Frosinone.
Ancje in chest câs la partide si siere cul unic risultât bon, sei pe classifiche, stant che a jonzin cuote cuarante e si svicin ae salvece garantide, sei – salacor, soredut – pal spirt dai Sborfs. A son pardabon trê ponts che a valin dopli, stant che a son stâts cjapâts cuintri di une scuadre che si cjate sù par jù inte stesse situazion de scuadre furlane.

La prime ocasion dal incuintri le àn i ospits, cun Kastanos che al prove il tîr di lontan, ma Perisan nol à fastidis a fermâlu. Si scombat tal mieç dal cjamp, cul Pordenon che cul passâ dal timp al vuadagne in zûc e in determinazion.
Il 4-3-1-2 disegnât di Domizzi al funzione, sburtât de zornade buine di diviers di lôr, tancant di Misuraca, Zammarini, Musiolik e Ciurra.

Passât il prin cuart di ore di zûc al è propit Ciurra a firmâ il gol dal vantaç: spuinde di Musiolik e tîr che al impire Bardi. Trê minûts plui tart l’atacant al segne ancje il secont gol cuntun diagonâl precîs su assist di Zammarini, che al è svelt tal anticipâ Salvi e tal inviâ la azion che si siere cul doi a zero.

I ospits si viodin dome tal ultin cuart di ore prime de polse, cuntune conclusion di Rohden dongje dal limit de aree, cu la bale che e va a finîle masse adalt, e il prin timp sis siere cuntune altre biele zuaide de cubie Zammarini-Ciurria cul atacant neri e vert che al tire cul cjâf ma nol cjate la puarte.

La seconde frazion si vierç ancjemò cun Ciurria al tîr e cun Bardi che al è atent e al ferme la bale. Plui indenant il Pordenon al bade soredut a difindi il dopli vantaç, i lasse il possès dal balon al Frosinone, che però nol rive pardabon a jessi pericolôs, fale che cuntune conclusion di Novakovich, jentrât tal puest di Rohden, che e va fûr bersai.

I parons di cjase a tegnin bot cence masse padins, il Frosinone al sburte ma cence grancj risultâts e dongje dal finâl Butic al prove a segnâ il tierç, ma la sô parabule e je masse debile e Bardi al bloche.