Udinese – Cagliari 0-1

L’Udin al torne a zuiâ, dopo trê setemanis cence partidis uficiâl, e al torne a pierdi. Dopo che tai ultins doi incuintris di campionât al veve rivât adore a puartâ a cjase sîs ponts, cuintri dal Cagliari, la formazion blancje e nere e torne a jessi masse segnade di chel che za di timp al ven clamât efiet Mer…Dacia Arena.

La scuadre di balon furlane e zuie in maniere flape, cence atenzion e cence continuitât. Di une bande no rive a fâ rindi chel pôc di bon che e imbastìs vie pal timp regolamentâr e di chê altre e fas masse erôrs e ju paie ducj. Il Cagliari, invezit, al zuie la sô partide ordenât e atent e cussì al concuiste un sucès impuartant pe classifiche e pal morâl.

Delneri al met in cjamp une scuadre che e somee in stât di fâ ben. Denant di Bizzarri, Angella al torne in cubie cun Danilo tal mieç, intant che Widmer e Samir a àn il compit di difindi e di sburtâ indenant dilunc des corsiis laterâls, te linie mediane si viôt pe prime volte Balic in posizion centrâl, dongje di lui a son Barak e Jankto, e plui indenant a son Perica, De Paul e Maxi Lopez, intune sorte di 4-3-2-1 cun gjeometrie variabile.

Dutis dôs lis formazions a partissin avonde ben. La prime ocasion e je dai ospits, cuntun tîr di Ionita dopo sîs minûts, ma l’Udin almancul tai prins trente minûts al è plui pericolôs, cuntune biele conclusion di Barak, che e cjate la rispueste pronte di Rafael, cul tentatîf seguitîf di tap-in di Maxi Lopez cul cjâf che al finìs fûr bersai, cuntune altre conclusion cul cjâf di Jankto suntun cross di Barak e ancjemò cuntun tîr dal boem che al ven parât di Rafael.

Il Cagliari al cres cul passâ dal timp e cul sghindâ i pericui. A rivin cussì i sugjeriments di Barella, lis conclusions di Pavoletti e di Faragò e lis paradis di Bizzarri, che a sierin il prin timp e a marchin che tra i blancs e neris al è alc che nol funzione par ordin.

Cheste situazion e cjate conferme sul imprin de seconde frazion, cuant che Barella al pronte un biel assist in profonditât par João Pedro, che il brasilian nol à fastidis a corezi in puarte, cun Danilo e Widmer che a durmin e cun Bizzarri che nol rive a meti un tacon.

Il gol cjapât al fâs sunâ la svearine tra i parons di cjase, intant che il gol fat i da fuarce al Cagliari.
I ospits si zovin ancjemò dai intervents dal so puartîr, prime suntun biel tîr di Perica e po suntun tentatîf di Maxi Lopez, e a mantegnin lis lôr posizions cence scomponisi. La reazion dal Udin e je intermitente e pôc produtive, no dome par merit di Rafael. I cambis fats di Delneri – Fofana al puest di Balic e Lasagna al puest di Maxi Lopez, cun Perica prime ponte – no mudin masse la situazion.

Al passe il timp e Jankto e De Paul si cjatin te posizion buine par tirâ iin puarte, ma no rivin a jessi pardabon pericolôs. Alc di plui lu fâs, te ultime part de partide, Baijc, metût dentri al puest di De Paul, cun cualchi bon sugjeriment par Perica e Lasagna, che a cjatin ancjemò Rafael tal puest just tal moment just. Di chê altre bande il Cagliari si svicine al doi a zero tai ultins minûts cun Farias – buine la rispueste di Bizzarri – e po cun Faragò, che al oblee il puartîr blanc e neri a fâ un fal che al paie cul cartelin ros, juste pôcs seconts prime de fin.

Advertisements

Felice e par furlan

Un piçul pas par un om o almancul un pas indenant simbolic pal Friûl.

O cjapìn at cun plasê di ce che nus àn contât, ven a dî che lunis stât, inte suaze de cerimonie pe scree dal cuarantesim dal gnûf an academic, il Retôr di chê che ancje a nô nus plâs clamâle Universitât dal Friûl, Alberto Felice De Toni, al à vût saludât il il President de Republiche Taliane, Sergio Mattarella, ancje par furlan, par sloven e par todesc.

Cun di plui, daûr di ce che si lei ator, tra stampe e web, il Retôr al à dit ancjemò alc altri par furlan.

Denant di cheste forme di rispiet ancje tai siei confronts – e no dome viers dal Friûl – ancje Mattarella i à dit «Mandi» e cussì al à fat biele figure ancje lui.

Nus fâs pardabon plasê. No lu scrivìn par vie che o pensìn che a Palaç Florio a vedin let il nestri blog e il nestri articul, là che o domandavin che almancul cualchindun dai sorestants dal Friûl i des a Mattarella il benvignût in dutis lis cuatri lenghis dal Friûl, e a vedin cjapât sù il nestri sugjeriment. Nus fâs plasê parcè che o pensìn che e sedi stade fate une robe juste.

O sperìn che no sedi la uniche.

Lunis ai 13 Mattarella al sarà in Friûl. Cualchidun i daràjal il benvignût ancje par furlan, par sloven e par todesc?

Lunis ai 13 di Novembar si scree il cuarantesim an academic de Universitât dal Friûl e al sarà presint anche il President de Republiche Taliane, Sergio Mattarella.

Al sarès biel che cualchidun dai sorestants dal Friûl – il Retôr de Universitât, la Presidente de Regjon, il Sindic di Udin… – i des il benvignût tes cuatri lenghis dal Friûl e cussì i disès ancje: «Sâr President, benvignût in Friûl. Gospod Predsednik, dobrodošli v Furlaniji. Sehr geehrter Herr Präsident, willkommen in Friaul».

Cualchi an indaûr al jere sucedût. Cemût che si lei culì, il Sindic di Faedis di in chê volte, Cristiano Shaurli, jal veve dit al President de Republiche di in chê volte, Giorgio Napolitano, e i veve ancje consegnât un document, prontât dal Comitât/Odbor/Komitaat/Comitato 482, che al domandave propit l’intervent dal President, tant che “garant de Costituzion”, a pro de metude in vore ad in plen des leçs di tutele e duncje a pro de garanzie plene di chei dirits ricognossûts in tiermin formâi de Leç fondamentâl de Republiche e di ches altris normis specifichis, cemût che a domandin ancje in Europe.

Cumò Shaurli al è Assessôr regjonâl. Al podarès tornâ a fâ chel ‘beau geste’ lui o ben al podarès sugjerîjal a cualchidun dai siei coleghis.

Un intervent di chê fate al larès ben ancje cumò.

E larès ben ancje une gnove sugjestion a pro de metude in vore pardabon des leçs di tutele des minorancis linguistichis. Magari cussì no, al è ancjemò tant ce fâ in chest cjamp.

Cundut achel un salût di chê fate al sarès za alc di bon. Al sarès une forme di rispiet, no dome pe int dal Friûl ma pal stes President, te sô persone e te sô istituzion.

La Republiche taliane e je di ducj: ancje dai citadins dal Friûl che a son di lenghe furlane, di lenghe slovene e di lenghe todescje.

Nus covente almancul un biel segnâl, in linie cui principis di fonde de Costituzion e cun chei de Europe unide te diversitât.

La conclusion di Europa 57/17, students e esperts a domandin plui Europe e plui Friûl

La Europe e clame e il Friûl al rispuint. La sô rispueste e je chê di une comunitât teritoriâl multilengâl e multiculturâl che e à cussience di chestis sôs peculiaritâts e che su chestis fondis e marche il so jessi part de Europe: tant a dî un Friûl «unît te diversitât» che si ricognòs te Europe «unide te diversitât» e che par chel al domande ae Union Europeane di jessi plui Union e plui Europeane.

Dut chest al è saltât fûr a clâr inte suaze di Europa 57/17, iniziative metude adun de bande  dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, che e je stade screade ai 14 di Otubar, cu la prime di une serie di programs su Radio Onde Furlane, e che si à sierade vinars ai 3 di Novembar cuntune conference/taule taronde li dal centri economic e juridic dal Ateneu Furlan di Vie Tomadini 30/a.

Propit l’event conclusîf dal progjet, cu la partecipazion di cuatricent students dal convit Paolo Diacono di Cividât e dai istitûts Deganutti, Uccellis, Marinelli, Percoto e Stellini di Udin e cui intervents di une schirie di reladôrs che a àn frontât diviers aspiets de storie e de atualitât dal procès di integrazion continentâl, cuntune atenzion specifiche pontade su la «prossimitât» e su la «cuotidianitât» de dimension europeane, al à mostrât cetant che a son fuarts e positîfs, in teorie e in pratiche, i rapuarts tra Friûl e Europe e tra Europe e Friûl.

Une sensibilitât di cheste fate le a à palesade in particolâr il scritôr, insegnant e vicepresident de Cjase pe Europe  di Glemone, Angelo Floramo, che tal so intervent al à marcât cemût che di simpri il Friûl, unitari e plurâl, al sedi simpri stât part de Europe e che chestis sôs peculiaritâts, scjafoiadis tal ultin secul e mieç dal nazionalisim dominant, a resistin ancjemò in dì di vuê e ta chest gnûf contest a deventin un patrimoni e une risorse.

Par Floramo la alteritât dal Friûl plurâl, che e jere stade calcolade un probleme e salacor un pericul inte suaze dal Stât nazionâl talian, fat sù su la fonde de idee di nazion «una d’arme, di lingua e d’altare», cemût che al scriveve Alessandro Manzoni te sô poesie ‘Marzo 1821’, e devente une risorse impuartantone par metisi in relazion positive cun chei altris e duncje par jessi citadins europeans, cun cussience e cun cognossince.

Su chescj aspiets a àn tornât a bati ancje Carli Pup, president de cooperative Informazione Friulana, e Diego Navarria, president de Assemblee de Comunitât linguistiche furlane. In particolâr a àn fevelât di esperiencis di cooperazion cun altris entitâts des minorancis in Europe di caratar rivendicatîf e politic – par esempli il Protocol di Donostia pe garanzie dai dirits linguistics in Europe, fat indenant di 120 sogjets e tra chescj propit di Informazione Friulana, Radio Onde Furlane, La Patrie dal Friûl, CLAAP e Novi Matajur – o ben culturâl e promozionâl, a tacâ des colaborazions tra i media ai progjets in rêt e de realizazion dal festival Suns Europe, e di cemût che il disvilup de integrazion europeane si zovi de tutele des minorancis e al vedi zovât ae tutele des minorancis, massime tal Stât talian, là che lis «normis specifichis» proviodudis dal articul 6 de Costituzion a son rivadis dome a tacâ de fin dal secul stât.

Chest element al jere saltât fûr ancje te ultime trasmission radiofoniche di Europa 57/17, cu la testemoneance di Antonio Banchig, gjornalist dal Novi Matajur. Ta chês altris dôs pontadis de serie coordenade e condusude di Marco Stolfo, e jere stade presentade la storie dal procès di integrazion europeane e a jerin stâts frontâts diviers argoments leâts ae situazion dal dì di vuê, cui intervents dal responsabil sientific dal Centri di documentazion europeane ‘G. Comessatti’‘, Claudio Cressati, dal espert di politiche europeane e internazionâl Roberto Castaldi (Universitât eCampus e CESUE), e di Renato Damiani de Cjase pe Europe di Glemone.

Propit Damiani, adun cul president dal Comitât talian dal Moviment european, Pier Virgilio Dastoli, e cul ricercjadôr de Scuola Superiore Sant’Anna di Pisa, Giorgio Grimaldi, al è stât un dai reladôrs de prime part de buinore dai 3 di Novembar, che e jestade dedicade ai Tratâts di Rome e aes disfidis che a son denant de Europe dal dì di vuê.  Te seconde parte de zornade a son stâts ancje i intervents di Francesco Rossi di Zero Idee e di Sonia Bosaro e Jolita Ziauberyte de Universitât dal Friûl, che a àn fevelât des oportunitâts pai zovins inte suaze dai programs Europe Creative, Europe pai CitadinsZoventût e de mobilitât europeane e internazionâl dai students, a tacâ dal progjet Erasmus, che juste tal 2017 al finìs i siei prins trente agns.

La partecipazion dai students e je stade buine e vivarose e si à palesade cuntune schirie di domandis e osservazions che a àn tocjât diviers argoments: de situazion de Catalogne ai gnûfs slargjaments de UE, dal defict democratic ai dirits sociâi, de necessitât di plui competencis pes istituzions europeanis aes cuistions leadis ae sigurece e al terorisim.

Il progjet Europa 57/17 al è stât metût adun cun chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente. Su la fonde di cemût che e je lade la buinore di vinars stât e po ancje daûr dai contignûts des trasmissions su Onde Furlane, si pues dî che al à jonzût i siei obietîfs. Un pont di partence o un moment di passaç inte direzion di une Europe pardabon «unide te diversitât», cence pôris, cence prejudizis e magari ancje cence retoriche.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

 

Europa 57/17, doman ai 3 di Novembar la taule taronde finâl

La Europe e clame e il Friûl al rispuint, marcant il fat che, juste par vie des sôs peculiaritâts, al è european, al fâs part de Europe e te dimension di une Europe pardabon ‘unide te diversitât’ al pues jessi plui Friûl e duncje plui european. Dut chest al salte fûr a fuart de iniziative, metude adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, dal titul  Europa 57/17, che e je stade screade ai 14 di Otubar e che si siere doman cuntune conference/taule taronde che e viodarà la partecipazion di diviers esperts e di cuatricent students di un trop di scuelis superiôrs.

Chescj aspiets a son stâts marcâts za vie des trê trasmissions cun chel stes titul, trasmetudis di Radio Onde Furlane  tes setemanis passadis e che si pues tornâ a scoltâlis in rêt,  e a tornaran a jessi frontâts, cu la zonte di cualchi detai par esempli in cont des oportunitâts pai zovins, de citadinance europeane e de tutele des minorancis, intant dal incuintri di doman, che si davelç li de Aule 3 dal Pôl economic e juridic de Universitât dal Friûl, a tacâ di 9 a buinore. Il program complet si pues leilu ancje culì.

Europa 57/17 si insuaze intun progjet di rêt che al coinvolç ducj i centris di documentazion europeane dal Stât talian e che il so titul al è 60 anni di Unione europea: sfide e prospettive per l’Europa, e al à chê di memoreâ il 60esim inovâl dai Tratâts di Rome, di fcognossi il procès di integrazion europeane e lis istituzions de UE e di promovi cussì une citadinance europeane cussiente.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

Altris informazions in cont di dute la iniziative si cjatin achìachì, achì e achì.

 

 

Udinese – Atalanta 2-1

Dôs vitoriis une daûr di chê altre. Dopo de partide lade drete miercus a Reggio Emilia cul Sassuolo, vuê cuintri de Atalanta l’Udin al fâs ancjemò miôr: al zuie, al scombat e al torne a vinci. Al vignarès di pensâ che e sedi pardabon rivade la ore di parâ vie l’efiet Mer…Dacia Arena e di cambiâlu cuntun efiet Friûl. Se al sarà cussì lu viodarìn tes prossimis setemanis. Par intant o podìn gjoldisi il secont sucès in pôcs dîs e une posizion in classifiche che e je mancul pericolose.

I blancs e neris a frontin la scuadre di Gasperini ancjemò cun Bizzarri in puarte, di gnûf cun Nuytinck dongje di Danilo tal mieç de difese, cun Larsen e Alì Adnan laterâi difensîfs, cun Behrami median centrâl daûr di De Paul, Fofana, Barak e Ingelsson, la vere novitât de partide, e cun Maxi Lopez uniche ponte.

La Atalanta e partìs cun decision, sburtade di Ilicic, Castagne e Spinazzola. L’Udin al ten bot, cun Bizzarri che al interven inte maniere miôr suntun tîr di Spinazzola e po cun Danilo che cuntune sô conclusion i fâs fâ une biele parade ancje a Berisha, ancje se cuntune cierte soference. Al rive cussì il gol dai ospits, firmât di Kurtic, e a rivin ancje i cambiaments tatics di Delneri, che al scambie di posizion De Paul e Ingelsson e che al stramude il 4-1-4-1 di partence intun 4-4-1-1, cun Fofana che al ven metût in posizion di trecuartist par sapontâ Maxi Lopez in atac.

La manovre dal tecnic di Aquilee e je chê juste. La scuadre di balon furlane e vuadagne teren e si fâs viodi des bandis di Berisha cun De Paul e juste prime dal interval e cjate la strade dal gol: fal di man di Spinazzola te aree di rigôr, penalty sivilât di Rocchi e trasformazion di De Paul.

Dopo un prin timp dinamic e vivarôs, la seconde frazion e somee plui flape e smamide, cuasit che a dutis dôs lis scuadris ur les ben la paritât. In realtât si scombat une bataie continue di posizion e Udin e Atalanta a lotin su ducj i balons. Cul passâ dai minûts l’Udin al cambie ancjemò alc te sô struture par adatâsi ae gnove fase dal incuintri, cun Delneri che al met dentri Matos par Fofana e Hallfredsson par Ingelsson e che al disegne cussì un plui classic 4-4-2.

La sielte dal mister e je chê juste: l’Udin al sgarfe e Barak al cjate la strade par tirâ in puarte juste tal cjanton là che Berisha nol pues rivâ. Il vantaç concuistât al da energjie ai blancs e neris, che a resistin denant de reazion disperade dai ospits. Bizzarri al fâs un grant lavôr suntun pâr di ocasions di Cristante, Caldara al segne ma al è in fûr zûc e duncje la sô conclusion e je iregolâr, e a cuatri minûts dal novantesim Rocchi al sivile un rigôr a pro de Atalanta: Cristante al tire e Bizzarri al pare e al salve il risultât.

 

Sassuolo – Udinese 0-1

No savìn se trê dîs dopo dal ultin martueri cuintri de Juve si puedi pardabon fevelâ di resurezion. O savìn dome che cul Sassuolo l’Udin al zuie e soredut al scombat e cussì al rive a vinci e a puartâ a cjase trê ponts pesantons. Alc al è alc e nuie al è nuie, ma in chest câs alc al è dut, pe scuadre, pal so alenadôr e ancje pe int furlane che i ten ae scuadre blancje e nere, cundut che i siei sorestants e magari cussì no ancje i siei zuiadôrs masse dispès a fasin di dut par gjavâi vie braùre e passion.

A Reggio Emilia la scuadre di balon furlane si presente cuntune muse gnove par plui motîfs.
Prin di dut e je la formazion sielzude di Delneri, che e presente diviersis novitâts rispiet aes ultimis partidis. In puarte al è ancjemò Bizzarri, ma in difese Samir al è tal mieç dongje di Danilo, intant che a çampe al cjate spazi dal prin minût Alì Adnan e a drete al è Larsen. Ancje tal mieç dal cjamp e in atac al è alc di gnûf: te seconde linie si viodin Behrami, Barak e Jankto e te prime a son Lasagna, Perica e Matos, intune sorte di 4-3-3 che si stramude sei in 4-4-2, che in 4-5-1 e in 4-3-2-1.
Cun di plui i blancs e neris – usgnot cu la maie zale – a tirin fûr daurman chê grinte e chel snait che masse dispès a vevin lassât tai camarins. Intune partide là che dutis dôs lis scuadris a àn plui di un motîf par cirî di fâ il miôr pussibil e ancjemò di plui par stâ une vore atentis di no riscjâ di pierdi, l’Udin al mostre daurman di vê alc di plui dal Sassuolo. Alì Adnan e Larsen a sburtin par daûr, vie pes corsiis laterâls, e Matos e Jankto a fasin compagn tes lôr posizions, cun iniziativis personâls che a rivin a meti in crisi i parons di cjase, che plui in gjenerâl a patissin il pressing de formazion furlane.

Dopo doi minûts l’Udin al cjate il prin corner, tirât di Jankto, e la prime conclusion, un colp cul cjâf fûr bersai di Danilo .spizza di testa in mezzo all’area avversaria ma manda alto dopo il corner battuto da Jankto. Barak al reste in linie cun Behrami cuant che a àn di difindi e si puarte plui indenant tal moment de costruzion e dal atac e Lasagna e Matos a fasin bogns moviments cu la bale tra i pîts e cence di chê. Il Sassuolo al cîr di tignî bot e al stente tal rispuindi e cussì suntune punizion di Jankto al rive il gol di Samir cul cjâf, che però al ven anulât par vie di un fal di Perica.

Al passe il timp e l’Udin al va dilunc a imbastî cualchi buine triangolazion, ancje se al cjate plui dificoltâts tal moment di concludi in puarte. Il Sassuolo al à ancjemò plui fastidis e la sô prime ocasion e rive tal mieç dal prin timp cuntun tîf di Berardi che al mûr avonde lontan de puarte difindude di Bizzarri.

Passade la prime mieze ore al rive finalmentri il gol di Barak, che al siere une combinazion imbastide di Lasagna cu la complicitât di Perica. Il gol al rispiete i ecuilibris dal cjamp, là che il Sassuolo nol rive nancje a meti adun une vere reazion dopo vê cjapât il gol e anzit al riscje di cjapâ’nt un altri, cun Matos che al servìs Perica ma cul cravuat che al tire mâl. Dome ae fin dal prin timp i parons di cjase a deventin pericolôs cun Berardi, ma Bizzarri al pare.

Il secont timp si vierç cuntun Sassuolo plui decîs. L’Udin nol piert la sô determinazion, al manten la atenzion che e covente suntun pâr di iniziativis di Falcinelli e al rispuint cuntun tîr di di Berhami, che al ven fermât di Consigli. I emilians a provin a tirâ in puarte cun Missiroli, Samir al riscje di fâ un altri «autogollonzo», in atac a jentrin Maxi Lopez par Perica e De Paul par Lasagna e po ancje Matos al ven cambiât cun Hallfredsson cun chê di tirâ sù lis bariduris che a coventin par puartâ a cjase il risultât.

L’ultin cuart di ore si vierç cuntun tîr di Lopez e al regjistre un colp cul cjâf di Larsen su corner di Jankto, une punizion pericolose di Politano cuntune biele rispueste di Bizzarri, il pressing finâl dai parons di cjase e l’Udin che si difint, che al rispuint in cuintripît e che cussì al fâs zirâ la bale e al ten bot ancje tai cinc minûts finâi di recupar.

Domenie cheste, cuintri de Atalanta, l’Udin varà di fâ compagn e magari ancje alc di miôr.

Udinese – Juventus 2-6

Cuintri de Fiorentina l’Udin al veve zuiât dome te ultime mieze ore, cu la Juventus al fâs pardabon alc dome vie pal prin timp e par cualchi minût dal secont, in ducj i doi câs al piert malamentri e al conferme cetant tossic che al è, in cjase compagn che in trasfierte, chel che ancje nô za di timp o clamìn efiet Mer…Dacia Arena. Chê di vuê cuintri de Juve e je stade pardabon une partide mate, plene di spetacul, di erôrs e di orôrs, che e je tacade avonde ben e che, pal Udin, e je finude malonon.

In principi la scuadre di balon furlane e mostre di podê tignî bot denant dai campions di Italie e di jessi ancje in stât di fâ alc di plui dai innomenâts aversaris. I juventins a partissin flaps e cun pocje luciditât, intant che l’Udin al mostre determinazion e sintiment.
Delneri al mande in cjamp ancjemò Bizzarri in puarte, Samir e Alì Adnan laterâi difensîfs, Nuytinck e Danilo tal mieç de tierce linie, Hallfredsson e Fofana tal centri de linie mediane, cun Jankto e De Paul larcs, e Maxi Lopez e Perica in atac. La scuadre di balon furlane e somee compate e dinamiche, i ospits a stentin a ingranâ la marcje juste e cussì dopo vot minûts al rive il gol di Perica, che zi zove di un erorat di Rugani e al va dret te aree di rigôr par segnâ.

La reazion de Juve e rive daurman, cui tîrs fûr bersai di Mandzukic e di Pjanic, ma l’Udin al somee in stât di difindi il vantaç e di no pierdi teren, lant a fâ pressing cu la linie mediane cuintri dai aversaris. Là che no rivin i juventins, però, al rive Samir, che al segne un autogol clamorôs cul cjâf suntun corner dai ospits. La paritât i da la svearine ae scuadre di Allegri, che e cjate spazis dilunc des corsiis laterâls, in particolâr cun Cuadrado e Khedira. A son propit lôr i protagoniscj dal vantaç parziâl de Juve: il colombian al pinele un biel cross e l’ex dal Real Madrid al sbuse la puarte di Bizzarri.

Il ribalton al tache a meti in crisi l’Udin, che al palese cualchi limit di tignude juste tes corsiis laterâls. Tal atac juventin si viôt ancje Higuain, che al cjape un pâl, intant che Mandzukic al à un scuintri cun Alì Adnan, al domande il rigôr e al proteste cun Doveri, che lu mande sot de doce cul cartelin ros.
La espulsion dal atacant cravuat e lasse la Juventus in inferioritât numeriche e duncje l’Udin si cjate cuntun om in plui e al prove a profitâ. A vegnin imbastidis un pâr di buinis azions che a puartin i zuiadôr blancs e neris a impegnâ ben e no mâl Buffon, che al rive a meti almancul lis pontis dai dêts su lis conclusions di Jankto, De Paul e Maxi Lopez.

Il prin timp si siere cul Udin sot di un gol, ma cuntun om in plui e cun chê di dreçâ la partide. Sul imprin de seconde frazion la situazion e somee sùù par jùù compagne e al rive fintremai il gol di cjâf di Danilo che al vuadagne la paritât temporanie.
Magari cussì no, la partide no pues finî in chel moment. La Juve si sburte daurman indenant e in curt e cjate il tierç gol cun Rugani, che al è tal puest just tal moment just par tocjâ la bale in rêt suntune punizion di Dybala.

Il gnûf ribalton al met in crisi l’Udin, che sù par jù di chel moment nol rive plui a fâ nuie. I blancs e neris furlans a scugnin metisi in zenoglon, denant di une Juve che cul passâ dai minûts e manten e po e rinfuartìs il so zûc e la sô fuarce.

La Juve e à un om di mancul, ma al Udin al somee che i mancji la scuadre interie e si fâs viodi des bandis di Buffon dome cuntun tîr di Maxi Lopez, intant che Khedira al firme ancje doi goi e a rivin ancje i tîrs a bersai di Dybala – anulât par fûr zûc – e di Pjanic, che i da al risultât une conotazion tenistiche.

Se nol rive a fâ alc di miôr te prossime partide cul Sassuolo, l’Udin al è pardabon malamentri.

Doman su Onde Furlane la seconde pontade de trasmission ‘Europa 57/17’

Doman ai 21 di Otubar su Radio Onde Furlane e torne Europa 57/17, trasmission dedicade ae storie e ae atualitât dal procès di integrazion europeane.

L’apontament al è – pe prime emission – a 8 e mieze a buinore sui 90 Mhz pe plui part dal Friûl, sui 90.2 Mhz pe Cjargne e su www.ondefurlane.eu par dut il mont. Chê stesse trasmission si podarà tornâ a scoltâle domenie ai 22 a 10 e mieze a buinore e joibe ai 26 a 5 sore sere.

Dopo che te setemane stade si veve fevelât a dilunc dal inviament dal procès di integrazion continentâl, a tacâ dal Manifest di Ventotene, de Declarazion Schuman, dal Tratât di Parîs pe istituzion de Comunitât Europeane dal Cjarbon e dal Açâl (CECA), e soredut dai Tratâts di Rome e de creazion de CEE e de Euratom, cui intervents di Claudio Cressati, Giorgio Anselmi e Renato Damiani, cumò il program, par cure di Marco Stolfo, al tratarà dal percors de evoluzion des Comunitâts Europeanis ae Union Europeane e de situazion dal dì di vuê des istituzions di Bruxelles, Strasburc, Francfurt e Lussemburc, cui contribûts di Roberto Castaldi e ancjemò di Renato Damiani.

Europa 57/17 e fâs part di une iniziative cun chel stes titul, che e je stade metude adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane e che si insuaze tal progjet di rêt 60 anni di Unione europea: sfide e prospettive per l’Europa, cun chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente.

Dongje de trasmission su Onde Furlane, la iniziative Europa 57/17 e proviôt ancje la organizazion di une conference/taule taronde, che si fasarà a Udin ai 3 di Novembar dal 2017.

Fiorentina – Udinese 2-1

Pal Udin e veve di jessi la partide de continuitât, dopo de vitorie in cjase cuintri de Sampdoria, e duncje chê dai prins ponts in trasfierte. Invezit la scuadre blancje e nere e à durmît par almancul metât incuintri, i à lassât la iniziative ae Fiorentina, che e veve di recuperâ la brute figure di cuindis dîs indaûr, e cussì e à pierdût.

Vie pal prin timp la formazion di Delneri e somee une altre volte un câs par «Chi l’ha visto?»: inesistente in atac, flapute tal mieç e pôc atente indaûr. In chestis condizions la Fiorentina no à masse fastidis tal fâ valê la sô predominance teritoriâl, cun Simeone, Chiesa e l’ex blanc e neri Thereau in atac, che a provin daurman a jessi pericolôs des bandis di Bizzarri.

Al è soredut Simeone, tant che prime vere ponte dai parons di cjase, che al prove a segnâ: prime Bizzarri al pare e dopo il so tîr al è fûr bersai. A rivin ancje i tentatîfs di Thereau, che si svicine ancjemò di plui ae conclusion cuntun tîr fermât di Angella e dal pâl, intant che Astori al rive ancje a segnâ, ma in posizion di fûr zûc e duncje in maniere no regolâr.

Al è l’avîs dal fat che il gol de Fiorentina – chel vêr – al è pront e madûr. Doi minûts prime de mieze ore il zuiadôr di Privas si cjate in plene libertât par dâ la gafade juste su la rispueste di Bizzarri a un tîr di Simeone e cussì al puarte in vantaç la sô scuadre.

Il prin timp si siere cu la Fiorentina in vantaç e l’Udin in version fantasime. La situazion e je sù par jù compagne ancje sul imprin de seconde frazion. Delneri al clame fûr Widmer e Lasagna par Alì Adnan e Matos, ma almancul par un cuart di ore la scuadre di balon furlane no mostre nissun cambiament impuartant e Thereau al segne ancje il doi a zero, zovantsi di une rispueste curte di Bizzarri suntun tîr di Veretout.

Lis robis a van miôr te ultime mieze ore di zûc, cuant che finalmenti (ma masse tart) e sune la svearine e i blancs e neris a provin a fâ alc e intant che i parons di cjase si preocupin di difindi il dopli sucès.

A rivin cussì un tîr di fûr di Aì Adnan, un gol di De Paul, che al ven anulât par vie di un fûr zûc di Maxi Lopez, e un tîr di Samir che al sbuse Sportiello. L’Udin al ridûs il svantaç e al prove ancjemò a fâ alc, ma cence sucès, e la Fiorentina e tire sù muraiis e bariduris che i permetin e cussì e manten il risultât fin ae fin.

Domenie che e ven l’Udin al zuiarà in cjase cu la Juve. Sperìn che par chê volte la musiche e sedi diferente.