Inter – Udinese 5-1

This image has an empty alt attribute; its file name is udin_neri.png

L’Udin, magari cussì no, al conferme lis previsions de vilie. Ancje a Milan la scuadre blancje e nere e zuie une partide grise e smamide, e patìs la superioritât dai aversaris e cussì e fâs la vitime sacrificâl pe fieste pal scudet dal Inter.
Il campionât al finìs malamentri, ma almancul a son dôs buinis gnovis, che za si savevin ancjemò prime de partide: l’Udin al zuiarà in serie A ancje inte prossime stagjon e par sigûr la setemane che e ven nol pierdarà ancjemò une altre volte…

Pe ultime partide di campionât Gotti si rimet ancjemò al 3-5-1-1 cun Musso tra i pâi, cun Becão, Bonifazi e Samir in difese, cun Molina, De Paul, Walace, Stryger Larsen e Zeegelaar in merdiane e cun Pereyra daûr di Okaka, uniche ponte. Conte al mande in cjamp Handanovic in puarte, D’Ambrosio, Ranocchia e Bastoni in difese, Hakimi, Vecino, Sensi, Gagliardini e Young in mediane e Pinamonti e Lautaro Martinez in atac.

I parons di cjase a cjatin il gol dal vantaç dopo nancje vot minûts di zûc: scambi inte aree di rigôr tra Lautaro e Young cul inglês che al impire Musso. L’Udin al prove a imbastî une reazion cun De Paul e cun Pereyra, ma nol rive a fâsi viodi pardabon des bandis di Handanovic. I minûts a passin, il ritmi nol è masse alt e la tension e cres dome par vie di un scuintri tra Becão e Lautaro cul atacant che si inrabie e cun Conte che al mande daurman Lukaku a scjaldâsi.

La ande de partide e va dilunc a jessi avonde smamide, tra un tîr fûr bersai di De Paul e une conclusion cun chel stes destin di Vecino.
Ae fin dal prin timp la scuadre furlane e prove a svicinâsi ae pate cuntun colp di cjâf di Stryger Larsen, che però nol cjate la puarte, ma juste prime de polse al rive il doi a zero pai parons di cjase: punizion di Eriksen, jentrât di cualchi minût tal puet di Sensi, e bale che e finìs tal sac, daûr di Musso.

La seconde frazion si vierç cu la sostituzion di Handanovic cun Padelli. Une azion Pereyra-De Paul, fermade di Hakimi, e fâs pensâ che l’Udin al puedi provâ ancjemò a fâ alc. Magari cussì no, e je une ilusion: l’Inter dal secont timp al à voie di sierâ l’incuintri in bielece. Cussì al rive il tierç gol: Hakimi al ven tocjât malamentri di Zeeglaar eal vuadagne un rigôr, che al ven tirât cun sucès di Lautaro Martinez.

La partide no à plui storie. L’Udin si sfante dal dut e al rive il poker dai neris e celescj, cuntun tîr spetacolâr di Perisic, su assist di Vecino, che al passe Musso e al va a finî in puarte dongje dal pâl plui lontan. Al jentre in cjamp ancje Lukaku e al segne ancje lui un gol, cuntune deviazion fortunose suntune conclusion di Sanchez. Gotti al met dentri Forestieri e Llorente tal puest di Zeeglaar e di Okaka e plui indenant al clame fûr ancje De Paul par Makengo, ma nol cambie nuie.
L’Udin al segne il gol de bandiere juste te ultime part dal incuintri: Eriksen al tocje la bale cu la man inte aree di rigôr, Volpi al sivile e Pereyra al tire a bersai dal discut. L’Inter al fâs fieste pal scudet cu la sô int, i tifôs furlans a scugnin contentâsi de fin de partide e dal campionât. Alc al è alc…

Udinese – Sampdoria 0-1

This image has an empty alt attribute; its file name is udin_neri.png

Ancjemò une partide smamide, ancjemò une sconfite decidude intal ultin par efiet di un penalty. Dopo dai cinc patafons cjapâts a Napoli, l’Udin al veve la pussibilitât di sfrancjâsi cuntune partide degne e un risultât bon in cjase cu la Sampdoria, ma i à lade strucje ancje in cheste ocasion. I blancs e neris a gjestissin avonde ben il print timp, i ospits a cressin vie pe seconde frazion e ae fin a rivin a vuadagnâ un rigôr e a segnâ. L’Udin al è salf, ma al va dilunc a jessi pôc san e ancje pôc fortunât. E la maluserie dai tifôs e cres.

Cul intindiment di tornâ a vinci in cjase l’Udin si presente cu la stesse formazion e cul stes modul de partide di Napoli: il 3-5-1-1, cun Musso in puarte, cun Becao, Bonifazi e Zeegelaar, cun Molina, De Paul, Walace, Makengo, Stryger Larsen in mediane, cun Pereyra tra le seconde e la prime linie e ancjemò cun Okaka uniche ponte. La Sampdoria si inschirie cul 4-4-2: tra i pâi al è Audero, la linie difensive e je formade di Bereszynski, Yoshida, Colley e Augello, tal centricjamp a son Candreva, Ekdal, Thorsby e Leris, in atac a son Gabbiadini e Keita.

La partide si vierç cuntun fal di Molina su Thorsby e cul Udin che al cjape la iniziative cun Pereyra in version sei di sugjeridôr che di tiradôr, ancje se pôc precîs. La Sampdoria e rispuint cu la sô manovre, dopo un cuart di ore di zûc, intant che De Paul e Pereyra a sburtin i blancs e neris indenant, che però no rivin a jessi pardabon pericolôs.
Il ritmi al cres passade la metât dal prin timp. Di une bande al è un tîr di Candreva che al ven parât di Musso cence padins, di chê altre e je une buine azion che i fâs rivâ la bale a Okaka, che cul tac le zire a Makengo, fermât di Colley. Plui tart Musso al pare ben un tîr di Gabbiadini, Molina al met un pò in pinsîr la difese ospite, Augello al tire fûr bersai e Makengo al fâs compagn su corner di De Paul.

Sierade la prime frazion cence goi e cence nancje masse ocasions, il secont timp si vierç cu la Sampdoria in atac, tra un assist di Candreva par Augello che al prove la conclusion ma il so tîr al è debil e al va fûr, un balon di Augello che al ven tocjât di Gabbiadini e po di Bonifazi che cuasi al ingjane Musso e cuntun tentatîf di lontan di Candreva che nol cree problemis al puartîr argjentin.

Dopo un cuart di ore Gotti al mande in cjamp Samir tal puest di Zeegelaar e Forestieri par Makengo, cun Pereyra che si sbasse svicinantsi a De Paul e cun Forestieri seconde ponte dongje di Okaka. La scuadre di balon furlane si fâs viodi des bandis di Audero cuntun pâr di iniziativis di De Paul, ma i sampdorians si salvin, prime cul lôr puartîr e dopo cun Bereszynski che al met un blec par fermâ la conclusion di Pereyra ispirade di un assist dal numar 10.

Gotti al clame fûr un Okaka avonde smamît e al met dentri Llorente, intant che Ranieri al zuie lis cjarteis Quagliarella e Verre, in cjamp tal puest di Gabbiadini e di Keita. La sielte dal mister blucerclât e je chê juste. Cun di fat, dongje de conclusion de partide propit suntun tîr di Verre Bonifazi al tocje la bale cul braç inte aree di rigôr, Gariglio al sivile e Quagliarella al tire e al segne.

I blancs e neris a provin a dreçâ la partide tai pôcs minûts che a mancjin ae fin. Tal recupar a lenzin la pate cuntune grande conclusion di Walace, che al cjate la grande rispueste di Audero, e po a riscjin di cjapâ il secont, cuntun tîr di Quagliarella, che però al cjate la rispueste puntuâl di Musso.
E finìs un a zero pai ospits. La uniche consolazion e je chê che a Napoli e jere lade ancjemò piês. Alc al è alc. O forsit no.

Napoli – Udinese 5-1

This image has an empty alt attribute; its file name is udin_neri.png

Cinc goi cjapâts e une altre sconfite pesante. L’Udin a Napoli, magari cussì no, al conferme inte maniere piês lis previsions di chei tifôs furlans che a vevin pôre che, denant di une scuadre motivade e fuarte tant che chê vuidade di Gattuso, i blancs e neris, cun di plui ancje cence diviers titolârs, a fossin flaps, smonâts e destinâts a fâ lis vitimis sacrificâls.
Se vie pal prin timp, cundut di un scuilibri a pro dal Napoli, l’Udin al è stât avonde presint inte partide, dopo de polse, cjapât il tierç gol, che al nas di un erôr macroscopic, i blancs e neris si sfantin e tal cjamp si viodin dome i celescj napoletans.
Par ridi e par no vaî, si pues dî che l’Udin al à rispietât la “par condicio”, pierdint sei cu la Juve sei cul Napoli. Par consolâsi, o podìn jessi contents par vie che e à vinçût la scuadre che e veve almancul un zuiadôr furlan: il Napoli di Meret.

La scuadre blancje e nere si presente tal stadi Diego Armando Maradona ancjemò cul modul 3-5-1-1: in puarte al è Musso; in difese nol è Nuytinck, signestrât, e a son Becao, Bonifazi e Zeegelaar; in mediane a sono Molina, Di Paul, Walace, Makengo e Stryger Larsen cun Pereyra daûr di Okaka, uniche ponte. Gattuso al mande in cjamp une formazion che e va daûr dal 4-2-3-1, cun Meret tra i pâi, cun Di Lorenzo, Manolas, Rrhamani e Hysaj in difese, cun Bakayoko e Ruiz denant de tierce linie e cun Lozano, Zielinski e Insigne in proiezion ofensive, daûr di Osimhen in atac.

Il Napoli al scomence cul pas just, cirint il zûc tra lis liniis soredut dilunc de direzion Ruiz-Zielinski. I parons di cjase a fasin valê la lôr superioritât tecniche e motivazionâl, si fasin viodi des bandis di Musso, ma almancul in principi no rivin a jessi pardabon pericolôs. L’Udin al ten bot e cu la vuide di De Paul al prove a rispuindi in cuintripît. Chê di Fuorigrotta e somee, in part, ae partide cu la Juve, cun trê diferencis di fonde: il Napoli nol è smamît tant che la scuadre di Pirlo viodude ai Riçs, l’Udin nol à la fuarce mostrade in chê partide e nol à nancje la pussibilitât di segnâ, cundut dal dinamisim di Molina e di Pereyra, che al prove ancje a tirâ in puarte cence cjatâ il bersai.

Il Napoli al manten la sô pression e le concretize cualchi minût plui tart cul gol dal ex blanc e neri Zielinski, che al impire Musso, recuperant un balon parât vie dal puartîr argjentin suntun tîr di Osimhen. Si svicine la prime mieze ore di zûc e al è ancjemò Osimhen a jessi pericolôs cuntune conclusion che e cjate la deviazion providenziâl di Bonifazi. I va miôr a Fabian Ruiz che cuntun biel tîr al cjate il cjantonut adalt in bande di Musso e al firme il doi a zero.

Sot di doi goi, l’Udin al prove a alçâ la linie dal so zûc, cence grancj efiets, fale che il pericul di lassâ spazis ai aversaris, che a cirin il tierç gol cun Bakayoko, che però al tire masse adalt. Cundut achel, prime dal interval, i blancs e neris a rivin a smiezâ il disvantaç e a tornâ a vierzi la partide cun Okaka che, servît in aree di Di Paul, al scombat cun Manolas e al cjate une biele zirade che e mande la bale intal cjantonut bas.

Sierât il prin timp sul doi a un, lis dôs scuadris a tornin in cjamp pe seconde frazion. La musiche e je sù par jù chê di prime: il Napoli al è paron dal cjamp, l’Udin al cîr di di difindisi e Musso al rispuint par ordin cuant che i aversaris a tirin in puarte. Gotti al prove a mudâ la muse de sô scuadre, clamant fûr Becao e Walace e mandant in cjamp Forestieri e Owejan, cun Stryger Larsen che si sposte a diestre, cun Molina che al va plui indenant e cun Owejan che i ven dât il compit di cori su la corsie di çampe.

Nol è il timp par viodi se la gnove struture tatiche dai blancs e neris e je in stât di judâju a dreçâ la partide parcè che al rive daurman l’erorat che al met il Napoli intes cundizions di segnâ ancjemò e di sierâ la partide in maniere definitive: cul intindiment di passâle a De Paul, Musso i regale la bale a Lozano e il messican al porfite de situazion e le bute dentri pal trê a un.

L’Udin al imbastìs une reazion cuntun pâr di iniziativis di Owejan cence sucès e il Napoli i da ancjemò di lavorâ a Musso cun Osimhen, prime di segnâ il cuart gol cun Manolas cul cjâf. I blancs e neris a deventin un câs par “Chi l’ha visto?” e di chel moment indenant si viodin dome i parons di cjase che cun Insigne prime a cjapin la travierse e plui indenant, intal recupar, a segnin il gol dal cinc a un.

L’Udin al è salf, ma nol è masse san. Sperìn che al fasi miôr tes ultimis dôs partidis, tacant dal incuintri cu la Sampdoria.

Udinese – Bologna 1-1

This image has an empty alt attribute; its file name is udin_neri.png

E podeve jessi une vitorie biele e buine pal Udin, ma tal ultin si à stramudade intune pate e al è stât il pericul che al fos ancjemò alc di piês. Ae fin i blancs e neris a jonzin cuote cuarante – e e fâs compagn ancje il Bologne – però ancjemò une volte si sfante la pussibilitât di viodiju vinci une partide in cjase.

La scuadre di balon furlane e fronte il Bologne mostrant il so miôr e il so piês. Di une bande al è un prin timp discret, cun iniziative e cun personalitât, soredut chê di De Paul che al fâs une altre grande partide, inte prime frazion al firme un gol che al è un zoiel e lunc di dut l’incuintri nol sbrisse inte ingjenuitât fate cuintri de Juve di metisi a zuiâ di bale a svol. Di chê altre un secont timp plui flap, cul Bologne che al zuie di plui, cun Musso che dongje di un pâr di bielis paradis al fâs une jessude fûr timp di Palacio: fal, rigôr e gol dal un a un.

Gotti al ponte ancjemò sul 3-5-1-1. La formazione je chê di domenie stade, fûr che par Musso in puarte, là che cuintri de Juve si veve tornât a viodi Scuffet. La partence no à un ritmi cuissà ce alt: il Bologne, che Mihajlovic al met adun daûr de struture dal 4-2-3-1. al prove a sburtâ un tic di plui, ma l’Udin al ten il control de partide, stant che de pression relative dai aversaris aburissin fûr dome uns pôcs di corner.

Cun De Paul, impen, l’Udin al cjate il gol ae sô prime ocasion. Rodrigo al concuiste la bale, si inserìs framieç des tra lis maiis de difese aversarie, e cuant che Skorupski al prove a sierâi il cjamp visîf, lui al tire cul esterni diestri sul pâl plui lontan e al segne. I blancs e neris a mentegnin il vanat° cence masse preocupazions, stant che i tentatîfs di Soriano e di palacio a cjatin Musso tal puest just tal moment just.

Il secont timp si vierç cul Udin che al controle la situazion, cun chê di rispuindi eventualmentri in cuintripît e par un cuart di ore al sucêt pôc o nuie. A chel Mihajlovic al cambie trê dai siei oms – fûr Schouten, Skov Olsen e Barrow par Orsolini, Svamberg e Sanson – cun chê di dreçâ la partide.

La proiezion ofensive dai ospits e cres, ancje se no prodûs alc e ce, intant che sul cuader dal cronist a cjatin spazi lis conclusions di Okaka e Arslan. La situazion e mude intal ultin cul episodi che al puarte al rigôr pal Bologne, che al ven tirât cun sucès di Orsolini. A son ancjemò dîs minûts di zûc, l’Udin al prove a rispuindi, ancje cu la metude in cjamp di Forestieri tal puest di Arslan, ma al è dome sbelançât indenant cence jessi concret. Il Bologne al prove a profitâ, ma ae fin il risultât nol cambie e al è just cussì, par dutis dôs lis scuadris che si tegnin a distance di sigurece de zone retrocession.

Udinese – Juventus 1-2

This image has an empty alt attribute; its file name is udin_neri.png

Cuintri de Juve l’Udin al convinç, ma nol vinç. Anzit: al piert. Passade in vantaç dopo dîs minûts, la scuadre di balon furlane e manten il control de partide, e siere ducj i spazis e i lasse pocjis pussibilitâts di iniziative ae Juventus, che e stente a meti adun azions di sest. Chest al sucêt vie pal prin timp e vie pe plui part de seconde frazion, cuant che la formazion di Gotti e lenç ancje il secont gol. Tai ultins dîs minûts, però, doi episodis a dan il svolt ae partide a pro dai ospits. Un svolt che pal Udin e pai siei tifôs al è un ribalton: par talian si dîs «Dalle stelle alle stalle».

Gotti al mande in cjamp il 3-5-1-1 cun Okaka uniche ponte, cun Pereyra daûr di lui, cun Molina, De Paul, Walace, Arslan, Stryger Larsen, cun Becao, Bonifazi e Nuytinck in difese e – uniche novitât a pet de partide cul Benevento – cun Scuffet in puarte tal puest di Musso, scualificât. Pirlo al sielç il 4-4-2: Szczesny tra i pâi; Danilo, Di Ligt, Bonucci e Alex Sandro in difese; Cuadrado, Bentancur, McKennie e Bernardeschi in mediane; Dybala e Ronaldo in atac.

L’Udin al partìs cul pît just. I blancs e neris a metin cûr e polmons e a mostrin di vê snait e caratar. La Juve e je smamide e no rive a meti dongje une azion di sest. Dopo dîs minûts la scuadre furlane e passe in vantaç: De Paul al bat une punizion a sorprese e al servìs Molina che al profite de disatenzion de difese aversarie e al tire in puarte un diagonâl potent che al impire Szczesny.

La Juve e prove a imbastî une reazion, cun Alex Sandro che al sburte dilunc de corsie di çampe e cul dinamisim di Mc Kennie. L’Udin al neutralize la massime part des iniziativis de scuadre di Pirlo, che al rive a tirâ in puarte in trê ocasions, ma simpri fûr bersai, cun McKennie, cun Di Ligt e cun Ronaldo, intant che intun pâr di balons pericolôs Scuffet si fâs cjatât tal puest just tal moment just e po al pare in doi timps une conclusion di Dybala.

Il prin timp si siere cul vantaç de scuadre furlane, che si difint cun sintiment e cun spirt di sacrifici, vuidade indaûr di Nuytinck cun Walace tal mieç a recuperâ balons e Arslan e De Paul a fasin ancje un bon lavôr in cuvierzidure. In atac Okaka al ten il balon e al vuadagne teren a vantaç di Pereyra e de sô mobilitât. La seconde frazion si scree cun chê stesse musiche dai prins cuarantecinc minûts: Dybala e Ronaldo a son doi câs par “Chi l’ha visto?”, imberdeâts inte tele di ragn des liniis dal Udin.

I blancs e neris a van dilunc a blocâ cualsisedi tentatîf di azion dai aversaris. Cun di plui a lenzin il doi a zero cun Arslan che di une buine posizion al tire fûr di pôc. A passin i minûts e l’Udin al manten il control de partide. Pirlo al prove a dâ une scjassade ae sô scuadre e al clame fûr Bernardeschi e Dybala par Kulusevski e Morata. Lis ocasions miôr al va dilunc a vêlis l’Udin: dopo dal tîr di Arslan e rive une biele conclusion de distance di Stryger Larsen, ancje chê fûr di pôc.

La partide e somee indreçade ben, a pro dal Udin. La Juve e je in confusion e no rive a jessi pericolose des bandis di Scuffet. Tai ultins dîs minûts al sucêt alc che al cambie la ande dal incuintri. Il prin fat al è un contrast tra Stryger Larsen e Cuadrado fûr de aree di rigôr dal Udin: il zuiadôr juventin al scambie il prât bagnât dl Stadi Friûl par une pissine e si bute par tiere compagn che al ves di fâ un scjuc e Chiffi al sivile il fal. La punizion le tire Ronaldo e De Paul in bariere al salte e al tocje la bale cul braç, cussì la Juve e vuadagne il penalty: dal discut al bat CR7 e Scuffet nol pues fâ nuie altri che viodi la bale dentri tal sac.

L’un a un al dismôf i ospits e al see lis gjambis al Udin che dopo vê fat cetant al somee jessi daûr a pierdi energjiis. Ronaldo, che nol segnave di trê partidis, juste ae fin al à une altre bale golose, che i rive cuntun biel cross pinelât di Rabiot, e le bute dentri cul cjâf profitant ancje de incierte marcjadure di Samir.
La partide si siere inte maniere piês pal Udin che al reste cu la bocje garbe e no cjape nancje un pont, cundut che a’nt varès meretâts trê. Grande fieste pe Juve, che cui trê ponts no piert il contat cun chês altris scuadris che a pontin a vuadagnâ un puest in Champions League.

Benevento – Udinese 2-4

bandieris-friuul

Al torne in cjamp De Paul e l’Udin al torne a vinci. A Benevento la scuadre di balon furlane e segne cuatri goi e e cjape ducj i trê ponts a disposizion. I blancs e neris a rivin daurman a imponis sui parons di cjase, si complichin la vite inte ultime part dal prin timp, ma a mantegnin il vantaç fint ae fin de partide, intant che la scuadre di Pippo Inzaghi no rive a dreçâ la gare, e cussì e va dilunc a clopâ e a pierdi posizions in classifiche.

L’Udin si presente tal cjamp dal stadi Vigorito cun Musso in puarte, cun Becao, Bonifazi e Nuytinck in difese, cun Molina, De Paul, Walace, Arslan e Stryger Larsen in mediane, cun Okaka uniche ponte e cun Pereyra daûr di lui cun massime libertât di moviment tra centricjamp e atac: Gotti al torne al 3-5-1-1. Il Benevento al rispuint cul 3-5-2 che al viôt Montipó tra i pâi, la linie difensive cun Glik, Caldirola e Barbe, la mediane cun Depaoli, Dabo, Viola, Hetemaj e Improta, e Sau e Lapadula in atac.

I blancs e neris a partissin cul pît just e in mancul di cuatri minûts a rivin a segnâ, cun De Paul che al ispire in verticâl Molina, che al firme il so prin gol in serie A cuntun grant diagonâl. I parons di cjase a provin a reagjî ma Musso al dinee il gol a Glik cuntune biele parade. La scuadre furlane e va dilunc cu lis azions vuidadis dal talent di De Paul, che al prove ancje la conclusion di lontan, ma Montipò le bloche cence padins.

Passâts i prins vincj minûts di zûc Inzaghi al scuen clamâ fûr Sau, che al à problemis muscolârs, e tal so puest al met Gaich. I parons di cjase a àn di tornâ a organizâsi, intant che l’Udin al manten une cierte costance, che lu puarte a dopleâ il vantaç cun Arslan che al ricêf di Pereyra e al siere inte maniere miôr une azion inviade ancjemò une volte di De Paul.

Dopo segnât il gol Arslan al fâs une falope, dant indaûr a Musso une bale che e devente un assist par Lapadula che al ven tocjât dal puartîr in jessude: Mariani al sivile e Viola al tire e al segne. Scurtât il disvantaç, i zâi e ros a insistin par cirî la pate, ma l’Udin, dopo cualchi erorut di masse, al ten bot, la pression dal Benevento no à nissun efiet particolâr e il prin timp si siere cul doi a un pe formazion furlane.

Inte seconde frazion Inzaghi al mande in cjamp Schiattarella tal puest di Viola, ma la partence e je buine soredut pal Udin che al cjate daurman il gol dal trê a un cun Stryger Larsen che al rive inte aree di rigôr aversarie e al salte plui indalt di ducj par zirâ in puarte cul cjâf il cross pinelât par lui di De Paul.

La prime reazion dal Benevento si concretize intune punizion di Lapadula che e sbat cuintri de bariere e in pocjis conclusions in puarte che no crein problemis a Musso, a part une conclusion di dongje di Gaich che il puartîr al rive a parâ vie cun tempisim perfet.

Il timp al passe e i doi alenadôrs a fasin ducj i cambis che ur coventin: Inzaghi al mande dentri Insigne par rinfuarcî l’atac e Gotti al ponte a mantignî il vantaç e a no pierdi fuarce ofensive. Par chel al clame fûr un Okaka avonde smamît e al mande dentri Braaf, che juste dopo doi minûts al impire Montipò.

L’Udin al met la partide in cassefuart, cundut che il Benevento inte ultime part dal incuintri al prove ancjemò a cirî il gol. Lu cjate cun Lapadula, lu cîr ancjemò cun Gaich ma cence sucès, intun finâl di partide cun intensitât di emozions che nol mude il risultât finâl. L’Udin al vinç e ancje par efiet dai risultâts di chês altris scuadris vie pe zornade al vuadagne posizions in classifiche, passant ancje il Bologna, intant che il Benevento al sbrisse jù tal tierç ultim puest.

Udinese – Cagliari 0-1

This image has an empty alt attribute; its file name is udin_neri.png

L’Udin al torne a zuiâ in cjase e al torne a pierdi. La partide cul Cagliari e va a finîle cul stes risultât di chê cuintri dal Toro. La scuadre sarde e segne un gol e si puarte a cjase trê ponts impuartantons che si zontin a chei vuadagnâts sabide stade cuintri dal Parma. La formazion di mister Semplici e scombat di plui dai blancs e neris, prime par cirî di segnâ e po par difindi il vantaç, denant de reazion de scuadre furlane che no je nancje masse fortunade, stant che intal ultin e cjape une travierse. Cun di plui l’Udin al patìs la mancjance di De Paul, scualificât, e lis buinis paradis dal puartîr dai ros e blu, Vicario, furlan e cressût tal Udin, che al è deventât titulâr pe positivitât al coronavirus di Cragno.

Gotti al sielç ancjemò il 3-5-2, confermant la cubie di atac Okaka-Forestieri, intant che in puarte al è Musso, in difese a son Becao, Bonifazi e Nuytinck e in mediane a scomencin Molina, Pereyra, Walace, Arslan e Stryger Larsen. Al fâs compagn Semplici cun Vicario tra i pâi, cun Ceppitelli, Godin e Carboni in difese, cun Nandez, Marin, Nainggolan, Deiola e Asamoah inte seconde linie e cun Pavoletti e Joao Pedro indeant.

I ospits a partissin cul aceleradôr ben fracât e dopo cinc minûts a lenzin il vantaç, cun Pavoletti che a al cjape pâl sui disvilups di une punizion tirade di Marin tal mieç de aree. Di chê altre bande dal cjamp Molina i da une buine bale a Forestieri che al tire in puarte cun masse pocje fuarce e Vicario al blocche cence padins.

La partide e va dilunc intune situazion di ecuilibri sostanziâl, cuntun pâr di tentatîfs di Arslan e di Molina, fermâts di Vicario, e cui ros e blu che a tirin in puarte cun Nainggolan, che al fâs un slalom tra i blancs e neris ma il so diagonâl al è fûr bersai, e po cun Joao Pedro, che si dilibare di Bonifazi e le bute dentri, ma Guida al consulte il Var, al viôt un contat a centricjamp tra Marin e Forescj e nol fâs bon il gol.

Sierade la prime frazion cence altris grandis emozions, tal principi dal secont timp la musiche e je sù par jù compagne e chel stes Var che al veve indreçât Guida viers de mancjade convalide dal gol di Joao Pedro al met in cundizions l’arbitri di sivilâ un penalty a pro dai ospits par un contat tra Molina e Carboni. Dal discut al tire Joao Pedro, Musso si slungje par fermâle, ma al rive dome a tocjâle cu la ponte dai dêts e la bale e finìs intal sac.

Il vantaç de scuadre sarde al da la scjassade al incuintri, cul Udin che al reagjìs cun braùre e al cjape sùù il comant dal zûc. Gotti al mande in cjamp Nestorovski, che al è protagonist daurman di un pâr di buinis ocasions: prime al cjape la travierse cuntun biel tîr cul cjâf ben indreçât, dopo nol disfrute inte maniere miôr un bale golose che i rive di un assist involontari di Asamoah e di bessôl denant di Vicario al tire fûr. Semplici al domande ai siei di alçâ la lôr linie dal zûc, ma il pressing dal Udin al è costant e il Cagliari al scuen dome che sierâsi indaûr, zovantsi de frescjece di Simeone e Duncan, che a jentrin tal puest di Joao Pedro e Deiola. Gotti al incres la pression ofensive clamant fûr Nuytinck par Braaf.

Tal ultin cuart di ore di zûc – comprendût ancje il recupa – chel dal Udin si pues clamâlu pardabon assedi: prime Arslan al da un bon balon a Okaka, che però al tire fûr e po, un minût plui tart, al prove Braaf, che di cuant che al è jentrât al à zontât energjie e dinamisim, ma Vicario al tire jù la sierande, e Gotti al clame fûr Pereyra e al zuie la cjarte Llorente, che però nol rive a cumbinâ alc e ce. Vicario al sta in vuaite e il Cagliari al streç in dincj fint ae fin, puartant a cjase une vitorie pardabon impuartante.

Crotone – Udinese 1-2

bandieris-friuul

Doi goi di De Paul e l’Udin al torne finalmentri a vinci, dopo trê sconfitis une daûr di chê, e al cjate chei ponts che a coventin par rivâ a garantîsi daurman la salvece. Cuintri dal Crotone la scuadre di balon furlane e veve di fâ une buine partide par puartâ a cjase ducj i trê ponts a disposizion e cun snait e cun determinazion, denant di une formazion che di une bande e à provât a tignî bot, massime vie pal prin timp e ae fin de partide, e di chê altre e je someade smonade e zaromai rassegnade ae retrocession.

Gotti al mande in cjamp une formazion cun cualchi novitât, tacant de sielte di tornâ al 3-5-2: in puarte al è Musso, in difese al torne Nuytinck, dogje di Bonifazi, tal puest di Becao, e Samir, in mediane a son Molina, De Paul, Walace, Pereyra e Stryger Larsen e lis pontis a son Okaka e Nestorovski. Ancje i parons di cjase vuidâts di Cosmi si presentin cul 3-5-2 cun Cordaz tra i pâi, cun Djidji, Golemic e Cuomo in difese, cun Pedro Pereira, Messias, Petriccione e Salvatore Molina in mediane e cun Ounas e Simy in atac.

Lis primis iniziativis a son dai parons di cjase, che a imbastissin une azion cun Messias e Salvatore Molina che al tire cul cjâf in puarte, ma Musso al bloche cence fastidis. Il ritmi al è bas, i contignûts tecnics e agonistics no son alc e ce. L’Udin al fâs zirâ bale cun Walace che, denant de difese, al coordene lis operazions, slargjant il zûc in direzion dai esternis Srtyger Larsen e Molina. De Paul al prove a inventâ alc, ma pal moment nol cjate la zuiade decisive.

Chê e rive cinc minûts prime de polse, cuntune azion corâl. Okaka al zire la bale di prime intenzion a Stryger Larsen che simpri di prime al mande Nestorovski al tîr, cun Cordaz che al pare e al mande indaûr la bale che e rive sui pîts dal stes atacant, che le passe al poie DePaul. Il cjapitani blanc e neri tal mieç de aree al controle cun calme e al segne e il prin timp si siere cul Udin in vantaç.

La seconde frazion si vierç cul Udin che al manten il possès de bale e al sburte dilunc des corsiis laterâls. Il Crotone al prove a imbastî cualchi azion ma nol rive a jessi pericolôs, intant che i blancs e neris a àn une buine ocasion cun Nestorovski che su corner di De Paul al tire cul cjâf, ma i va strucje. Dongje de metât dal secont timp il Crotone al rive a segnâ il gol dl un aun: lanç di Golemic par Reca che al controle e al jentre inte aree blancje e nere, Molina al intervent e al tocje la bale cu la man, Massimi al sivile il penalty e Simy al impire Musso.

Gotti al mande in cjamp Forestieri par Nestorovski e Arslan par Walace par dâ energjiis frescjis ae sô scuadre. Il gol ur da gnove fuarce ai parons di cjase, che a tornin al atac, ma Musso al interven cence problemis. Di chê altre bande al fâs il so lavôr ancje Cordaz, suntune conclusion svicinade di Okaka, e Forestieri al recupare la bale par tirâ in puarte ma l’arbitri al sivile il fûr zûc dal argjentin. Doi minûts plui tart i blancs e neris a tornin in vantaç cun Die Paul, che al controle ben une bale che i ven passade di Pereyra e al tir,e impirant Cordaz cuntun diestri precîs.

Cosmi al fâs ancjemò cualchi sostituzion, mandant in cjamp Zanellato e Cigarini par Ounas e Petriccione, cun chê di provâ a cjatâ la pate. L’Udin si difint cun sintiment e ancje De Paul al da une man daûr. Juste ae fin i blancs e neris a àn ancje un tic di fortune, stant che une buine conclusion di Simy e va a sbati sul pâl, ma tai minûts di recupar a pierdin De Paul, che al ven butât fûr par un intervent cu la gjambe alte su Salvatore Molina, e il Crotone al prove a zovâsi de superioritât numeriche e al va in pressing fin ae sivilade finâl, ma il risultât nol cambie, ancje par merit di Musso che al fâs ancjemò un bon intervent in jessude alte.

Udinese – Torino 0-1

This image has an empty alt attribute; its file name is udin_neri.png

Al segne il Gjal, nol criche il dì, l’Udin al piert e il Toro si slontane un tic de zone B. La sabide di sere dal Stadi Friûl e devente une ocasion di fieste dome pai granatas, che dopo dal bon derby de setemane stade a rivin a vinci e a vuadagnâ altris trê ponts. La scuadre di balon furlane, che Gotti al mande in cjamp dome cun Llorente di ponte, no rive a fâ valê la sô predominance teritoriâl cuant che e à di tirâ in puarte. Cussì il Toro al segne e al vinç, l’Udin nol rive a impirâ Milinković-Savić e cumò a son trê lis partidis pierdudis une daûr di chê altre.

Pe ocasion l’Udin al partìs cul 3-5-1-1: Musso tra i pâi; Becao, Bonifazi e Samir in difese; Molina, De Paul, Walace, Arslan e Stryger Larsen in mediane; Llorente in atac e Pereyra daûr di lui, tra prime e seconde linie. Nicola al conferme il bloc dal derby, cun Milinković-Savić in puarte, cun Izzo, Bremer e Buongiorno in difese, cun Vojvoda, Rincon, Mandragora e Ansaldi in mediane, cun Sanabria e Belotti di ponte e cun Verdi che ju saponte daûr di lôr.

La partence e je flapute. E je une serade frede e lis dôs scuadris a mostrin di no vê masse voie di cirî gnot. L’Udin al ten di plui la bale, ma lis primis ocasions lis àn i ospits cun Verdi e cun Sanabria, che però no cjatin la puarte, compagn di Llorente che su corner al tire cul cjâf ma la sô conclusion e je fûr bersai. Il ritmi de partide al cres e dutis dôs lis scuadris si fasin viodi di plui in atac. La ocasion miôr le àn i blancs e neris dopo passade la prime mieze ore di zûc: Milinković-Savić e Buongiorno a fasin un pastiel che al devente une bale gol clamorose par Molina, ma la ocasion e ven straçade malamentri.

Il marum par chê pussibilitât lade su pai stecs al ven lassât in bande daurman dal Udin che al va dilunc a provâ a dâi il so bon ce fâ al puartîr dal Toro. Prime al prove De Paul, che in dôs ocasions al tire fûr dal spieli e intal tierç tentatîf al oblee il serb-galizian a slungjâsi il plui pussibil par rivâ a fermâ il diagonâl dal argjentin, e po i tocje a Llorente, che juste prime de polse al tire cul cjâf e Milinković-Savić al tire jù la persiane.

Il secont timp si vierç ancjemò cul Udin che al manten il comant dal zûc, ancje se nol rive a cumbinâ alc e ce in atac. In tiermins relatîfs i va miôr al Toro che al prove la conclusion cun Mandragora e cun Verdi, cence cjatâ il spieli de puarte, e po al vuadagne un penalty cun Belotti che al ven tocjât in maniere malsacodade di Arslan: Doveri nol à dubis, al sivile e al segne il discut dal rigôr; Belotti al tire e al impire Musso.

L’Udin al prove a meti adun la sô reazion e il Toro al cîr di difindi il vanatç. Par chel i doi alenadôrs a mandin in cjamp fuarcis frescjis. Intal Turin a jentrin Zaza par Sanabria e Lukic par Rincon, intant che Gotti al met Okaka tal puest di Llorente e Forestieri tal puest di Arslan.
I blancs e neris a rinfuartissin il lôr repart ofensîf, però il Toro si organize ben indaûr e pe scuadre furlane lis ocasions par tirâ in puarte a son pocjis e ancje chês no vegnin fatis rindi cemût che al coventarès. Di une bande ur va strucje sei a Pereyra che a De Paul, di chê altre Verdi i da une bale buine a Izzo che cul cjâf al tire pôc parsore de travierse de puarte di Musso.

E je la ultime conclusion dal Toro. Comprendût ancje il recupar, di chel moment indenant al sarà un cuart di ore di assedi blanc e neri, dal tîr di Forestieri blocât di Milinkovic-Savic ae jentrade tal cjamp di Nestorovski tal puest di Stryger Larsen fintremai al tîr cross di De Paul parât vie di Izzo. Un assedi sterp che al sbat cuintri des muraiis tiradis sù dal Turin, che cussì al vinç e al convinç.

Atalanta – Udinese 3-2

This image has an empty alt attribute; its file name is udin_neri.png

La Atalanta si conferme scuadre di un nivel superiôr e – denant di un Udin che al prove a tignî bot e al mostre di no vê pôre, ma al ptìs la fuarce dai aversaris – e vinç, e convinç e si manten cun merit tal tierç puest in classifiche. La scuadre furlane e fâs masse erôrs e ju paie ducj e par chel no rive nancje a puartâ a cjase un pont.

I blancs e neris si presentin tal stadi di Bergamo cu la maie zale e cul lôr classic 3-5-2. Gotti al sielç di tornâ al so scheme principâl e cuntune dople novitât in atac, là che lis dôs pontis mandadis in cjamp in principi a son Okaka e Braaf. In puarte al è Musso, in difese a son Becao, Bonifazi e Nuytinck e inte linie mediane si cjatin Molina, De Paul, Walace, Pereyra e Zeegelaar. Gasperini al sielç il 4-3-1-2 cun Gollini in puarte, cun Toloi, Romero, Palomino e Gosens in difese, cun Freuler, De Roon e Pessina in mediane, cun Malinovskyi trecuartist e Muriel e Zapata in atac.

I parons di cjase a tachin cul pît just e a fasin valê daurman la lôr supremazie tecniche e teritoriâl: a fasin zirâ la bale e a tegnin la scuadre furlane inte sô metât dal cjamp.
Il prin tentatîf al è un diagonâl fûr bersai di Zapata. L’Udin al rispuint cuntun cross di De Paul che al ven fermât di De Roon e cualchi minût plui tart al tache il show di Muriel che prime al incjoche la difese furlane e al met tal mieç une buine bale par Zapata che nol rive a aprofitâ, po al impegne Musso su punizion e dopo dîs e nûf minûts di zûc al segne, sierant inte maniere miôr une azion inviade cuntun colp di tac par Gosens, che al zire la bale su Pessina che al pinele un assist pal colombian che al tire e zovantsi di une deviazion di Bonifazi al rive a sblefâ il puartîr dal Udin.

La Atalanta e va dilunc a mantignî il balin dal zûc e l’Udin al rive a cumbinâ avonde pôc. Muriel si fâs viodi ancjemò in zone gol e i difensôrs de scuadre furlane a àn il lôr bon ce fâ. L’Udin al prove a rispuindi cul dinamisim di Braaf, che però ogni tant al zire ancje a vueit, cuntune conclusion debile di Okaka, cuntun pâr di cross di De Paul e cuntune conclusion di Molina che e ven parade vie. Ae fin dal prin timp Muriel al segne il gol dai doi a zero, ma l’Udin al à il snait di rispuindi daurman e prime de polse al rive a dismiezeâ il disvantaç cun Pereyra che al impire Gollini su assist di Molina, un dai miôrs dal Udin.

La seconde frazion si vierç cun Gasperini che al lasse fûr Muriel e Gosens par meti dentri Ilicic e Djimsiti. I bergamascs a tornin al atac e Musso prime al pare un tîr di Zapata e po nol à fastidis suntune conclusion di Pessina. La pression dai parons di cjase no va la mancul e Zapata e De Roon a àn ancjemò altris buinis ocasions che però no disfrutin cemût che al coventarès. L’Udin nol rive a fâ nuie di plui che difindisi: i aversaris no i permetin di inviâ cuissà ce azions. Gotti al rpove a cambiâ alc: al clame fûr Okaka e Zeeeglar e al mande dentri Llorente e Stryger Larsen.

La sielte dal tecnic dal Udin e je chê juste parcè che dopo vot minûts propit il danês al cjate la strade dal gol. Magari cussì no, però, a pene fats i cambis dal Udin, i bergamanscs a segnin il tierç gol cun Zapata che al aprofite di un assit golôs di di Malinovskyi. L’Udin al ridûs la distance cuasi daurman, dopo che Gotti al zuie ancje lis cjartis Samir e Forestieri: la azion inviade di Molina e ven disvilupade propit di Forestieri che al zire la bale a Stryger Larsen in aree che al tire a colp sigûr.

L’Udin al somee in stât di tornâ a vierzi la partide. De Paul al tire in puarte su punizion ma al mande la bale masse adalt intant che di chê altre bande dal cjamp Freuler al prodûs un tîr che nol cree fastidis a Musso. E je dome une ilusion: intant che si svicine la fin de partide, in atac la scuadre furlane no rive a fâ plui nuie e i parons di cjase si sierin ben e a sburtin ancjemò de metât dal cjamp indenant.
Juste ae fin Ilicic al profite di un erôr clamorôs di Bonifazi ma al tire fûr: e je la ultime ocasion de partide, che si siere cul sucès dai neris e blu. Pal Udin e je la seconde sconfite in rie dopo chê di dôs setemanis indaûr cuintri de Lazio.