Auguris babelics (ancje chest an…)

cropped-leb3.jpg

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

Sampdoria – Udinese 2-2

udin_neri

Doi goi fats, doi goi cjapâts e un altri pont puartât a cjase. La trasfierte a Gjenue di îr e mostre un Udin miôr di chel de setemane stade, plui dinamic e plui combatîf. Risultât just, partide avonde bile ancje se zuiade, ancjemò une volte, cuntune ande di discontinuitât.
L’Udin al partìs avonde sierât, prin di dut cun chê di meti adun une baridure salde cuintri des iniziativis dai parons di cjase. Eder e Okaka a sburtin indenant, i blancs e neris cuntune linie cuntun 3-5-2 flessibil, che si stramude dispès in 4-4-2, a tegnin bon, almancul tal prin cuart di ore, fintremai al gol di Obiang, che al capitalize un rilanç flaput di Karnezis e al vierç lis marcjaduris.

Il gol al è un patafon che al mande in crisi la scuadre di Stramaccioni, che i coventin passe cinc minûts par ricjapâsi.
Chest al sucêt al minût numar vincjeun, cuntune conclusion fûr bersai di Thereau, e po, in maniere miôr juste al trentesin, cuant che Geijo al profite di un erorat di Romero, che al fale inte jessude, e al firme l’un a un. Cumò a son i parons di cjase a clopâ e cussì l’Udin al frace sul aceleradôr, si fâs viodi indenant in plui ocasion e al rive a segnâ il doi a un cun Danilo che al bute dentri suntun  corner di Kone.

Tal secont timp e je la Sampdoria che e cjape sù la iniziative. L’intindiment de scuadre di Mihajlovic al è clâr: si à di dreçâ il risultât. Si svicine al doi a doi Eder dopo pôcs minûts e po al segne Gabbiadini, che pôc prime al veve riscjât di fâsi butâ fûr dal arbitri: un biel gol che i da ancjemò plui fuarce ai gjenovês.
La pression sampdoriane e je fuarte e costante, l’Udin al ten bot ancje dopo vê pierdût Herteaux, butât fûr par dople amonizion. Par vot minûts in inferioritât numeriche, l’Udin al difint il risultât e l’onôr. Alc al è alc.

Udinese -Verona 1-2

udin_neri

Al fâs za avonde dûl sintî par television che si zuie il “derby del triveneto”, ma viodi che chel stes derby l’Udin lu piert cemût che lu à pierdût domenie al lasse cence peraulis. Cun di fat, dopo dôs partidis là che finalmentri e veve tornât a fâ viodi alc di bon – massime cuintri dal Milan – e cun chel e veve rivât a passâ il turni di Cope Italie e po a puartâ a cjase trê ponts pesantons in campionât, la formazion vuidade di Stramaccioni si cjate a palesâ di gnûf chei difiets tatics e di mentalitât che e à mostrât zaromai in tantis ocasions.
In chest sens e je emblematiche la sielte dal tecnic di tignî fûr Thereau: masse pôre di zuiâ al atac?

Cussì i blancs e neris a tachin masse sierâts indaûr e masse pôc indreçâts a imponi il lôr zûc indenant, intant che il Verona al à une manovre plui fluide e une convinzion plui fuarte, che lU  puartin a rindisi pericolose des bandis di Karnezis cuntune conclusion cul cjâf di Moras, deviade di Hertaux in maniere insidiose pal puartîr.
Il pericul passât al fâs sunâ la svearine pe scuadre furlane e i ecuilibris tal cjamp a cambiin, cul Udin che si fâs sburtâ indenant di Bruno Fernandes. Al rive propit dai siei pîts il cross che Di Natale  al coreç dentri de puarte dai ospits al minût numar 31: al è un a zero.
Il Verona al patìs il colp e al fâs fature a tirâsi su, i blancs e neris a gjestissin la gare ma no somein cussì seneôs di staronzâ il vantaç e juste tal recupar dal prin timp i ospits a rivin a segnâ l’un a un contune biele conclusion di Toni su assist di Christodoupolous.

Il secont timp si vierç cul Verona in plene e l’Udin flap, distrat e distirât. Al rive cussì il secont gol veronês, cun  Christodoupolous che al recupare un balon pierdût di Allan, al cor indenant e al induvine il tîr bon che al passe tal mieç des gjambis di Karnezis e si ferme tal sac.
Stramaccioni al zuie la cjarte Thereau e al spere che alc si movi indenant. Nol è cussì, o almancul nol è avonde, parcè che lis conclusions des bandis di Benussi no fasin masse pôre al puartîr dal Hellas, intant che i ospits a provin la vie dal cuintripît cun cualchi risultât, ma cence jemplâ la sporte di altris goi.

Al Udin i coventin plui zûc e plui caratar. Rivaraial a cjatâju finalmentri? E dulà? Sot dal arbul di Nadâl?

Liet International 2014. Vitorie ladine, vitorie furlane

logo-liet

Ogni mês si fâs la lune, ogni dì si impare une e sù par jù ogni setemane e salte fûr une buine gnove che e tocje la produzion musicâl par furlan, tra premis, jessudis discografichis, events e iniziativis di rilevance internazionâl. Une setemane indaûr e jere chê de biele partecipazion di Loris Vescovo ae serade di premazion de Targa Tenco, sul palc dal teatri Ariston di Sanremo: discors par furlan e un live set di alt nivel, a conferme che il ricognossiment cjapât in chê ocasion al è plui che meretât, «alla faccia del dialetto e dei dialettanti»… Prime ancjemò e jere stade la sodisfazion de edizion di chest an di Suns, il Festival de cjançon in lenghe minoritarie che al cuvierç la Europe alpine e mediteranie, che si à davuelt a Udin. Cumò il svint positîf al è chel che al sofle di Oldenburg, la citât dal nord de Gjermanie là che vinars passât e je stade fate la finâl continentâl dal concors pe musiche tes lenghis minorizadis, Liet International.
Cun di fat il premi finâl al è stât vinçût di Martina Iori, la zovine cjantautore de Val di Fasse che ai 15 di Novembar e veve za colpît lis orelis, il cûr e il cerviel dal public dal teatri Palamostre di Udin e de jurie di Suns. La sô cjançon par ladin ‘Via con mia musega’ e à vût il numar plui alt di ponts de bande de jurie internazionâl che e à valutât lis cjançons e li esibizion di ducj i dîs concorints dal festival fat te Basse Sassonie.
Al è stât un sucès che plui di cualchidun al calcolave pussibil se no ancje probabil za intant de semifinâl dal Liet International pe Europe dal sud, stant che chê cjançon, cussì biele, frescje e semplice e chel istès rafinade e plene di sostance, tra composizion, arangjament e esecuzion, e someave vê dutis lis carateristichis che a coventin par convinci components di jurie cun guscj e ategjaments ancje avonde diferents in cont di musiche e di ûs des lenghis in musiche, tra tradizion e inovazion. Chescj pronostics, fats indenant cun convinzion ma cence masse sunsûr, a àn cjatât conferme inte maniere miôr.

martinaiori448x245

La vitorie di Martina Iori e je la prime afermazion di musiciscj ladins tal Liet International.
La sô afermazion si pues calcolâle ancje une vitorie furlane, almancul par doi motîfs.
Di une bande par vie che, dongje dal baterist di Moena, Enrico Tommasini, le compagnave ancje un musicist furlan, il bassist Mirco Tondon. Di chê altre parcè che la vitorie finâl e je stade une esplicite certificazion de cualitât di Suns, cemût che al è saltât fûr in particolâr chest an. Cun di fat Martina Iori e je rivade a Oldenburg propit par vie di vê cjapât part al festival de Europe alpine e mediteranie che al è nassût in Friûl tal 2009 e che al è stât inmaneât a Udin ancje chest an. Si podarès fevelâ di une dople conferme, stant che simpri di Suns, ma de sô edizion dal an passât, al rivave ancje un altri dai protagoniscj plui interessants de serade di Oldenburg, i rappers sarts Forefingers Up!, che cuntun toc dai contignûts fuarts tant che ‘Sa luxe ‘e su soli’ e cuntune tignude dal palc perfete a àn rivât adore a brincâ il tierç puest te graduatorie finâl, daûr de vincidore e dal Aila Duo. Cheste cubie di cjantantis e musicistis di lenghe sami de Finlandie, secondis in classifiche cuntune cjançon biele e particolâr, ‘Naharij kandâ’, e à vût un premi speciâl daûr de valutazion di ducj i musiciscj.

In confront cu lis edizions di cualchi an indaûr – par esempli chê di Udin dal 2011 – il Liet International al à dât la impression di vê un profîl un tic plui bas, sot diviersis cjaladuris.
Dal pont di viste musicâl, par esempli. In chest sens e pues vê pesât la divierse modalitât di selezion dai partecipants, tra finaliscj che a rivin alì dal Liet International dopo vê vinçût une semifinâl euroregjonâl o dopo vê fat un concors regjonâl o ben su la fonde de sole presentazion di une regjistrazion.
Cualchi concorint al à rivât a esprimisi miôr te jam session che e à caraterizât il tierç timp, fûr concors, che dentri de serade uficiâl.

premiazion

Cun dut achel si à confermade la validitât di manifestazions di cheste fate – il Liet International e soredut Suns, che chest an al è stât ancjemò plui memorabil – par plui resons.
Tant che ocasions di incuintri, di cognossince e di confront in cont di lenghis, di dirits linguistics e di creativitât in musiche, tra personis, musiciscj, entitâts plui o mancul istituzionâls e espressions di comunitâts linguistichis, regjons e nazionalitâts de Europe. Tant che azions di promozion de ricjece de diversitât linguistiche. E tant che promemorie dal fat che une altre Europe e  je pussibile: chê pardabon unide te diversitât.

babel-1024x824

Doman, ai 16 di Dicembar, in direte a tacâ di 11 a buinore e miercus ai 17 in repliche a 1 dopomisdì, dentri di Babêl, Europe, la trasmission di Onde Furlane dedicade ae produzion musicâl tes lenghis minoritariis in Europe, e sarà une interviste bilengâl (par furlan e par ladin) cu la autore e interprete de cjançon ‘Via con mia musega’, vincidore dai doi festivals europeans.
Il program si pues scoltâlu su lis frecuencis de radio libare dai furlans e ancje in internet ae direzion www.ondefurlane.eu.

Inter – Udinese 1-2

FuarceUdinees

L’Inter e l’Udin a zuin un timp par om, ma i blancs e neris ae fin se gjavin miôr ancje cuant che a son mancul presints e a tirin fûr grinte e cualitât te seconde frazion, che e je chê decisive pal risultât. L’Udin al vinç e soredut tal secont timp al convinç e al mostre di vê rivât a fâ cressi chel pôc di bon e di incoragjant che al veve mostrât te partide di Cope Italie cul Cesena. Dopo des ultimis partidis di campionât, chê di nossere e je stade pardabon une bocjade di aiar fresc e bon e la vitorie finâl e zove sei ae classifiche che al morâl, che juste une setemane indaûr a San Siro al someave decisamentri finût sot dai tacuts des scarpis.

La partide si invie cui parons di cjase che, par dovê di ospitalitât – si fâs par mût di dî – e soredut par dovê di classifiche e di tradizion e par vie che di cuant che a àn cambiât alenadôr no àn ancjemò vinçût, a cirin di fâ il lôr zûc e di imponi la lôr superioritât teritoriâl. L’Udin al mostre un ategjament “catenacciaro”, cu la difese a trê rinfuarcide di une linie mediane a cinc, cun Di Natale di bessôl indenant e Bruno Fernandes a tignî dongje l’atac e il centricjamp: no à grandis iniziativis ofensivis, ma – miôr che in altris ocasions – al romp cun costance la iniziative aversarie e al sta atent indaûr.

Par vincj minûts l’Inter al reste imberdeât te rêt che l’Udin i à cusît intor. Cun dut achel Kovacic al mostre di jessi in stât di cjatâ spazi e iniziative: al fâs zirâ balons a drete e a çampe e soredut al è l’autôr de prime ocasion de scuadre di mister Mancini, un biel tîr che al sbat su la travierse disore di Karnezis. A son soredut lui e Guarin i ponts di riferiment de manovre interiste, che però e prodûs dome lis conclusions fûr scuare di Medel, intant che l’Udin al rispuint finalmentri su la linie Allan-Di Natale.
Un minût prime de fin dal prin timp la pression interiste e parturìs il vantaç cun Icardi. Tai tifôs furlans al cres il marum pal risultât parziâl e pal ategjament de scuadre

Il secont timp si vierç cence cambiaments tes dôs formazions. L’Inter al somee sentât sul so vantaç, intant che l’Udin al tache a mostrâ chel dinamisim e chê iniziative che no si veve viodût te prime frazion. Bruno Fernandes al rive a fâ plui e miôr chei moviments che a coventin e che al veve za cirût di fâ in cualchi ocasion prime dal interval, intant che i interiscj Dodò e Palacio si fasin notâ par cualchi eroron. Chescj gnûfs ecuilibris a puartin prime Di Natale in zone gol e po Bruno Fernandes a inventâsi une triangolazion e un tîr in diagonâl che al sbuse la puarte di Handanovic.

L’Inter al va in crisi e l’Udin al concuiste ancjemò fuarce e cjamp. Stramaccioni al clame fûr Di Natale ma no lu cambie cuntun difensôr cun chê di difindi il pontut. Al puest dal cjapitani Totò al jentre Thereau, che par Stramaccioni cu la sô frescjece e cu la sô corse al varès di tirâ fûr alc di bon de confusion interiste e de ande positive dai blancs e neris.

Al è propit ce che al sucêt: eroron di Palacio, Thereau al cjape il balon, al schiribice ancje Handanovic e al è doi a un.
Di li indenant l’Inter al provarà a sburtâ, ma cence ordin e cence risultâts concrets. L’Udin al controle e al rispuint cetant che al covente par no vê fastidis e par puartâ insom la partide in vantaç.

Udinese – Cesena 4-2

FuarceUdinees

L’Udin al torne a vinci, almancul in cjase, e al mostre alc di bon, par sigûr di miôr che tes ultimis garis di campionât. Tal turni sec di Cope Italie cuintri dal Cesena la scuadre di balon furlane e scomence malut – al contrari des ultimis partidis – ma e cres dilunc vie de partide, ancje se i coventin i timps suplementârs par rivâ a vinci e a vuadagnâsi la cualificazion ai Otâfs di finâl.

Sul imprin lis dificoltâts a son soredut in difese: cu la linie a trê che e à problemis di stabilitât e cun Scuffet che al torne a zuiâ a tacâ dal prin minût e al somee patî un ciert disorientament. Al è in chestis cundizions che al rive il gol di Djuric dopo cuatri minûts di zûc.

Il svantaç al sune la svearine pe scuadre di Stramaccioni, che e tache a vuadagnâ supremazie  teritoriâl, ma no rive a jessi pardabon pericolose in atac cun manovris che a metin in dificoltât i romagnûi. Dome dopo vincj minûts Bruno Fernandes al pescje la bale juste par che Allan si invii  inte direzion de puarte aversarie, cuntun slalom su Capelli e Volta e cuntun biel tîr che al finìs tal sac daûr di Agliardi.

Il svint dal un a un al sglonfe lis velis de scuadre furlane, che si svicine al vantanç cun Geijio, che al cjape il pâl. Il doi a un al rive un minût prime de polse cun Bruno Fernandes, che al dopre benon un sugjeriment di Pasquale: bale tal siet.

Il secont timp si vierç cul Cesena che al prove a cirî  di tornâ a dreçâ la sô partide. I ospits a cjatin la vie dal gol cuntune acrobazie di Succi dopo nancje dîs minûts, ma dopo a pierdin Volta, che al cjape un cartelin ros par une sô jentrade pericolose a dam di Bruno Fernandes. L’Udin al patìs il colp – pocje atenzion daûr in ocasion dal gol – e al prove a tornâ a metisi in moviment, ma cence rivâ a disfrutâ la superioritât nmeriche.

I novante minûts si sierin sul doi a doi e l’acès ai Otâfs al ven decidût tai timps suplementârs. Dopo nûf minûts al rive il gol di Evangelista, che cul cjâf al pare dentri un balon che al jere za stât tocjât i Agliardi suntun cross di Pasquale. Il trê a doi al see lis gjambis ai ospits, che a calin, e al dâ fuarce al Udin che tal secont suplementâr al fâs poker cun Thereau.

Pe Cope Italie il prossim incuintri al sarà chel cul Napoli, intan che il campionât al viodarà l’Udin un altri viaç a Milan, cuintri dal Inter. Dopo de partide di nossere l’Udin al somee vê recuperât almancul un tic di caratar e di forme. Cun di plui si à tornât a vodi un bon Bruno Fernandes, zuiadôr che al podarès jessi une vore impuartant propit cuintri de scuadre di Mancini. O viodarìn ce che al nas.