“Viva Onde Furlane” ai 2 di Avost li dal Parc dal Cormôr di Udin

vivaof

Al è une altre volte timp di “Viva Onde Furlane”. La edizion 2013 de fieste-conciert di autofinanziament di Radio Onde Furlane che dal 2010 e segne la rivade de Sierade chest an e devente un event di mieç Istât e si sposte di Cjasielis a Udin. L’apontament al è li dal Parc dal Cormôr, a Udin, inte suaze di chest an si davuelzarà dentri dal Homepage Festival, vinars ai 2 di Avost a tacâ di vot sot sere.

Viva Onde Furlane”, che ogni an al cjape dentri un miâr e passe di scoltadôrs, amîs e colaboradôrs de “radio libare dai furlans”, al jere nassût tant che rispueste ae politiche regjonâl di riduzion des ativitâts di tutele e di promozion de lenghe furlane, setôr là che Onde Furlane e davuelç une funzion decisive, no dome cu la sô programazion radiofoniche e la sô ativitât di informazion, intratigniment e produzion culturâl par furlan ma ancje cu la valorizazion di dut ce che si môf in Friûl te musiche, te art e te creativitât, cu lis colaborazions cun chê s altris minorancis linguistichis in Europe e cu lis relazions disvilupadis cui furlans pal mont e soredut cui plui zovins.

Il conciert al viodarà sul palc i Arbe Garbe, inte lôr ultime reincarnazion “jazzfolkpunknoise”, e la cubiade dute di scuvierzi formade dal bluesom Fabian Riz e dal jazz blues hardcore feroç dal Orko Trio, vuidât dal tastierist Giorgio Pacorig.

A Viva Onde Furlane Riz e Orko Trio a presentaran in anteprime i tocs dal cd che a son daûr a regjistrâ pe etichete Musiche Furlane Fuarte. La opare e mostre za di jessi une des produzions musicâls plui inovativis e cjamadis di fuarce poetiche de musiche furlane, intant che il conciert al sarà dal sigûr un dai events musicâi plui ferbints di chest an in Friûl.

Ae musiche dal vîf si alternaran doi DJ set in linie cu la serade, Abrasive e Hybrida, che a curin dôs trasmissions di cult dentri dal palinsest di Onde Furlane, e lis incursions sul palc dai “Cjastrons”, grup comic che ta chescj ultins mês al è daûr a fâ il fisco su lis frecuencis de radio.

Viva Onde Furlane” e je inmaneade di “Lenghis dal Drâc – Amîs di Onde Furlane”, la associazion nassude par svilupâ iniziativis a pro de radio, adun cun Homepage Festival e Hybrida.

Par tirâ sù lis adesions dal public intant de serade si varà une postazion là che a saran fûr ancje lis produzions musicâls, editoriâls e audiovisivis di Onde Furlane. Jentrade libare, ufierte… «obleade».

Info in rêt: www.ondefurlane.eu.

Musiche Furlane Fuarte in Sagre, apontament di gale a Cjarlins

Foto Carnicats 2012

Vinars ai 26 di Lui a Cjarlins e sarà une serade speciâl. Il so titul al è ‘Musiche Furlane Fuarte in Sagre’ e al sclarìs ad in plen la sô fisionomie. Cun di fat, dentri de sagre dal paîs, a sunaran dôs des formazions miôr de gnove gjenerazion de musiche fate in Friûl: i Carnicats, trio di rappers cjargnei bulos e unevore dinamics, e i Luna e Un Quarto, band de Basse furlane che e misclice cun snait cjançon di autôr, blues, folk e rock.

A son doi grups unevore diferents pe ispirazion musicâl che però a àn diviers elements in comun: a son un grum atîfs, tra concierts, discs e altris iniziativis, a son sù par jù coetaneis e a doprin dispès e ben la lenghe furlane tai lôr tescj. Propit cheste peculiaritât e somee jessi une sorte di marcje di cualitât che ju met dentri, ducj i doi, di chê che e ven clamade “gnove musiche furlane”, un panorame di grups e soliscj che a fasin musiche buine par furlan e che cun chê a rivin avonde dispès a fâsi cognossi e preseâ ator, in Friûl e inaltrò. Cun di plui, propit la etichete Musiche Furlane Fuarte, nassude in bande di Radio Onde Furlane cun chê di promovi ducj chei progjets chei progjets «che a sburtin, che a sperimentin, che a disfin e che a tornin a fâ la musiche e la lenghe furlane»

Il fat che Carnicats e Luna e Un Quarto a sunin dentri di une sagre al somee ancjetant impuartant: la musiche e je fieste, incuintri e confront e duncje “in sagre” si pues vê ancje la musiche, che e je furlane e fuarte. In cheste maniere, la sagre di Cjarlins, “Dentro io sono abile”, dongje de atenzion specifiche pe solidarietât e pes tematichis sociâls, e cjape sù ancje un altri caratar distintîf e un altri element di inovazion e cualitât.

Il dopli conciert al tache, uficialmentri, a vot e mieze sot sere.

Dôs bielis gnovis: tiere, lenghe e libertât

bandieris

Lis gnovis di chescj dîs, pal plui, a fasin vignî i sgrisui. Però a’nd è almancul dôs che a tocjin il Friûl e che o podìn calcolâlis tant che buinis.

La prime e je di sù par jù une setemane indaûr, cuant che al è saltât fûr che Edipower al à rinunciât in maniere definitive al so progjet di dopleâ la centrâl idroeletriche di Somplât. Cuintri di chel progjet, che al varès condanât a muart il Lât di Cjavaç cence nancje puartâ zovaments di cualchi sorte ae popolazion, i comitâts a vevin metût in vore iniziativis e mobilitazions. A son stâts propit chei che a àn mandât ator la buine gnove de decision dai aministradôrs di Edipower, cemût che si pues lei achì.

La seconde e tocje la tutele des minorancis, i dirits linguistics e in particolâr la lenghe furlane. La Cort Costituzionâl, cu la sô sentence numar 215 dai 18 di Lui, e à sclarît che no à nissune fonde juridiche la distinzion tra minorancis di serie A e minorancis di serie B, fate indenant de bande cussì clamade “spending review” un an indaûr.

Che il proviodiment fat bon dal Guvier Monti, là che si fevelave, di une bande, di minorancis “di lingua madre straniera” e, di chê altre, di comunitâts definidis daûr dal ûs di “particolari dialetti” e fos une robe cence mani e cence sens, di plui ponts di viste, al jere za clâr in chê volte.

Cumò no son plui dubis: la cuistion e je sclaride ancje ta chest comunicât dal Comitât/Odbor/Komitaat/Comitato 482.

cumò si à di movisi in maniere consecuente, visantsi che no je tant une cuistion di puescj di dirigjent scolastic.
La indicazion d sostance che e rive de sentence de Cort Costituzionâl e je clare: si à di movisi par meti in vore pardabon e par ben la legjislazion di tutele che in tancj cjamps – e in particolâr ta chel de scuele – e esist dome su la cjarte (e tancj no rivin nancje a leile alì…).

Topolove/Topolò, une stazion là che al è biel rivâ

topolo2

Par cui che al torne (o che al rive) in Friûl e al à voie di viodi cualchi spetacul particolâr nol esist dome il Mittelfest. Un pôc plui insù di Cividât, tes Vals dal Nadison, al merete (almancul) fat un scjampon a Topolove/Topolò.
In chescj dîs, in particolâr, al è in plen davuelziment, za di vinars stât, chel festival di art cence confins che si clame Postaja Topolove / Stazione Topolò.

Usgnot, tra lis altris, e sarà la proiezion di ‘Across the River/Oltre il Guado’, il gnûf filmdal regjist furlan Lorenzo Bianchini, La opare, che e je stade presentade un mês indaûr te59esime edizion dal Taormina Film Festival, e je stade zirade in part propit des bandis di Topolò cun int dal puest e i siei dialicsa son in part intal dialet sloven locâl.
Bianchini si veve fat cognossi za agns indaûr par vie dai siei horror movies fats ducj o in part par furlan, a tacâ dal so esordi, il mitic ‘Lidrîs cuadrade di trê’, dal 2001, che al veve vût une buine rispueste dal public e de critiche, e di ‘Custodes Bestiae’, prin premi al ToHorror Film Festival di Turin.

Doman, dal dopomisdì indenant, grant finâl cun poesiis e musichis.

Dut il program de rassegne si cjate achì.

“Emigrant. Chants du Friûl”, il Mittelfest 2013 si vierç cuntun omaç a Giorgio Ferigo

emigrant-1

Dai 12 ai 21 di Lui a Cividât e inaltrò al torne il Mittelfest, innomenade rassegne artistiche e culturâl dedicade al incuintri tra storiis, lenghis e culturis.

La manifestazion si presente tant che un barcon viert su la diversitât linguistiche e culturâl dal Friûl e de Europe. Magari cussì no, chest no si lu viôt masse te sô comunicazion istituzionâl, che e je dome par talian cun alc ancje par inglês e par francês, cuant che si spietaressisi di viodi almancul alc ancje par furlan, par sloven e par todesc (par esempli, il sît internet de Estivada di Rodes/Rodez,  manifestazion dedicade ae culture ocitane e a chês de Europe dal Mediterani, si fâs lei ancje par ocitan, par catalan e par talian).

Cun dut achel, il spirt «Mitteleuropean» e multiculturâl si rive a vualmâlu ca e là tal cartelon dai events. Un dai esemplis miôr in chest sens al è chel dal spetacul che al scree dute la manifestazion, in program doman ai 12 di Lui a 5 prime di sere li dal teatri Ristori di Cividât:  il recital “Emigrant. Chants du Friûl”, produsût dal ‘Théatre national de Bourdeux en Aquitanie’.

Al è un spetacul che al rive de France ma che lis sôs lidrîs a son furlanis o – par jessi plui precîs – cjargnelis. “Emigrant. Chant du Friûl” al è une opare furlane e duncje foreste e foreste e duncje furlane: une conte di partencis, di dislidrisaments, di nostalgjie, ma ancje di identitât, di libertât e di cussience, tra sium e memorie e storie personâl, familiâr e coletive. E al è un omaç al repertori di musiche, peraulis, ideis e passions di Giorgio Ferigo e dal Povolâr Ensemble.

Cun di fat, la atore e cjantante Nadia Fabrizio, che e je nassude in Svuizare, e vîf tal Stât francês ma e je di divignince di Davâr, adun cun sô sûr Katia e cui musiciscj Philippe Vranckx e Christophe Jodet, e puarte in sene une opare là che si messedin furlan, francês e talian e che e disvilupe un intinerari dramaturgjic che al à lis sôs fondis intune selezion des cjançons che si cjatin tes primis dôs ricueltis dal Povolâr Ensemble, “Il timp das radîs” (dal 1980) e “Cjamp dai pierdûts amôrs” (dal 1983).

Dopo de premiére di doman, la dì dopo, ai 13 di Lui a 8.30 sot sere, “Emigrant. Chants du Friûl” al sarà in repliche a Comelians, li dal teatri L’Alpina.

Une Sabide speciâl a Udin cu lis Lotis dal Cormôr

05_07-lotisdalcormoor

Une Sabide speciâl inte suaze di UdinEstate, il cartelon di incuintris e events culturâi inmaneâts dal Comun di Udin pal Istât. Chê altre sere, ai 6 di Lui, la storie e la memorie vive a son stadis protagonistis li de Cort di Palaç Morpurgo, là che a 9 sot sere Lorenzo Fabbro e Adriano Venturini a àn presentât La Memoria, dopo la Liberazione le Lotte per il Lavoro. 1950, la Bassa alza la testa: Le Lotte del Cormôr.

L’apontament al jere dedicât aes Lotis dal Cormôr , une des pagjinis plui interessantis e magari cussì no ancjetant pôc cognossudis de storie dal Nûfcent in Friûl.
Forsit nol è un câs che in cont dal Friûl vicendis e personis che inaltrò a saressin ogjet di une sorte di cult coletîf e salacor ancje di une sorte di promozion cuasit di nivel comerciâl, cun films, libris e altris inziativis, a deventin “memorie platade” par vie di une operazion di rimozion coletive, dulà che no si pues fâ di mancul di vualmâ une vere strategjie di caratar ideologjic, stant che a son fats che a mostrin un Friûl vêr, che al è diviers e alternatîf rispiet a cierts lûcs comuns. Chest al vâl pes Lotis dal Cormôr compagn che pal riviel dal 1511 o par personaçs tant che
Felix Marchi, Zuan Minut, Achille Tellini o, cun dut de lôr innomine planetarie, Tina Modotti e il stes Pier Paolo Pasolini, che dome tai ultins agns al è stât tornât a scuvierzi, almancul in Friûl.

Il siopar ledrôs fat te Vierte dal 1950 de bande di disocupâts e operaris de Basse Furlane a pro dal inviament di un plan di oparis di bonifiche te plane dal Cormôr al è stât contât cun leturis, cun testemoneancis video e cun intervents musicâi. Di chês lotis di popul, che a coinvolzerin passe vincjmil personis in dute la Basse, no àn fevelât dome Lorenzo Fabbro e Adriano Venturini, ma ancje lis leturis di Maurizio Mattiuzza, di Gino Dorigo, di Daniel Samba e di Franco Saccavini e lis cjançons dai Luna e Un Quarto.

Un apontament storic, no dome par vie che al tocjave un toc cuasi dismenteât de storie furlane, cun dut dal lavôr di documentazion fat agns indaûr di Paolo Gaspari, dai cuadris su la int dal Cormôr fats di Giuseppe Zigaina e dal drame storic e didatic scrit di Pierluigi Visintin, ma ancje parcè che une cierte storie dal Friûl e je stade contade, cun di plui par furlan, tal centri di Udin, tal cûr de citât.