Fieste dal Lavôr cun Lou Dalfin e Vididule Project + Negu Gorriak, Os Resentidos e Y Trwynau Coch = Babêl Europe 09/2018

Vuê al è martars e tal palinsest di Radio Onde Furlane a 11 a buinore in direte, al torne Babêl Europe, la trasmission cuindisinâl dedicade ae produzion musicâl tes lenghis propriis des minorancis e des nazions cence stât.

La pontade numar 9 dal program, te sô prime emission, e larà ‘in Onde’ il Prin di Mai, te zornade de Fieste dal Lavôr e propit chel dal lavôr, dal dirit dal lavôr e dai dirits dai lavorents al è un dai temis che a vignaran frontâts vie pe trasmission cu la poesie di Pier Paolo Pasolini e di Zuan Minut metude in musiche de bande dai ocitans Lou Dalfin e dai furlans Vididule Project.

Cun di plui si fevelarà di “grups storics” e di “classics babelics” e duncje si scoltaran cercis dal repertori di formazions tant che i galizians Os Resentidos, i galês Y Trwynau Coch e i bascs Negu Gorriak, juste pôcs dîs dopo dal inovâl numar 25 de jessude dal lôr sflandorôs album dopli Borreroak Baditu Milaka Aurpegi.

Dopo de direte di vuê, cheste pontade di Babêl Europe e torne ‘in Onde’, in repliche, ancje doman a une dopo di misdì e po sabide a une e mieze su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

Advertisements

Benevento – Udinese 3-3

Alc al è alc e nuie al è nuie. Però chel alc al è avonde pôc ancje se (forsit) al covente par contentâsi. Dopo vê pierdût undis partidis di file l’Udin al rive finalmentri a puartâ a cjase un pontut. Lu fâs inte partide cuintri dal Benevento, che al è za in Serie B, là che al mostre sù par jù chei stes difiets di simpri: pocje atenzion in difese, pocje costance tal zûc e une tignude atletiche e psicologjiche avonde deficitariis.

La rivade dal gnûf alenadôr, Igor Tudor, no mude cuissà cetant la fisionomie tatiche dai blancs e neris che ancje a Benevento si presentin cul 3-5-2. Lis novitâts ca son te formazion: Widmer al torne titolâr, Balic al scomence la partide zuiant tant che seconde ponte (o trecuartist) daûr di Lasagna, inte posizion là che si à viodût avonde dispès De Paul e te linie mediane si torne a viodi Fofana.

La scuadre di balon furlane e partìs avonde ben. Bizzarri al pare cence padins un tîr di Viola dopo siet minûts e dentri dal prin cuart di ore de partide l’Udin al cjate il gol cuntun tîr cul cjâf di Widmer su punizion di Balic. A passin i minûts e i parons di cjase a provin a reagjî, ma lu fasin in maniere masse leziose e confusionarie. De Zerbi ur da ai siei l’ordin di jessi plui concrets e plui decîs: i parons di cjase a van daûr di ce che ur dîs il lôr mister e a rivin a gafâ la paritât cun Venuti che al vuadagne tere su la corsie di çampe, al crosse tal mieç e al cjate Viola che di bessôl al tocje la bale cul cjâf e al segne.

Al è un cjaldon mostro, ma lis dôs scuadris a tegnin bot e a provin a imbastî cualchi azion: l’Udin si svicine al doi a un cuntune conclusion di Samir, parade di Brignoli, e il Benevento al tente il colpat cun Brignola, ma il so tîr al va fûr di un et.

Tal secont timp e cambie la clime, la temperature si sbasse e al puest dal soreli a son aiar e nûi. Il Benevento al piert Cataldi, che al va fûr par vie de seconde amonizion, ma l’Udin, là che De Paul al è in cjamp al puest di Barak, nol rive a profitâ de superioritât numeriche. Il Benevento si svicine al vantaç cun Viola e lu cjate stant su la fonde dal confront cu la Var suntune bale che e tocje il braç di Pezzella i ven dât un rigôr e chel a ven tirât in puarte di Coda cun sucès.

L’Udin al somee in zenoglon, ma in curt al cjate la strade pare tornâ a vierzi la partide, cun Lasagna che prime al tocje in puarte un cross di De Paul e dopo si zove di un erôr di Venuti e al segne il gnûf vantaç blanc e neri. Il moment al è bon pai blancs e neris che a podaressin incressi il risultât cun De Paul, cun Perica e cun Balic, ma no rivin a bati ancjemò Brignoli. Cussì, daûr de regule “gol falât, gol cjapât”, juste ae fin al rive il 3 a 3 dai parons di cjase.

La prossime partide dal Udin e sarà in cjase, domenie ai 6 di Mai, cul Inter.

Udinese – Crotone 1-2


Simpri piês. Al reste pôc o nuie di chel alc di bon che l’Udin al veve mostrât inte partide cuintri dal Napoli. Cul Crotone la scuadre di balon furlane e mostre ancjemò une volte chei difiets che si àn palesât a fuart vie pai ultins trê mês: intermitence dal zûc, pocje atenzion daûr, scjarse produtivitât in atac (e mancul mâl che al jere Lasagna…), problemis di tignude atletiche e di caratar. Cun di plui si zonte ancje chel et di sfortune e cussì il risultât finâl al è la sconfite di file numar undis che e fâs sbrissâ i blancs e neris te zone là che si à di scombati par no colâ te Serie B.

Oddo al decît di frontâ la scuadre calabrese cuntune formazion une vore diferente di chê di miercus che i veve fat spudâ balins almancul par sessante minût ae seconde fuarce dal campionât. In puarte al è Bizzarri, in difese Danilo, Samir e Larsen, che al torne là che al jere Nyutick, te mediane dongje di Barak a son Behrami e Fofana, là che a jerin Balic e Ingelsson, tes corsiis laterâls a tornin Alì Adnan e Widmer e in atac si torne a viodi la cubie Maxi Lopez – Lasagna. L’intindiment dal mister al è chel di vê plui pês e plui grinte tal mieç dal cjamp e plui in gjenerâl di zovâsi dai oms cun plui esperience.

La partence e je buine, di une bande e di chê altre. Udin e Crotone a son vivarôs e dinamics. I blancs e neris a frachis sul pedâl dal aceleradôr e dopo sîs minûts a cjatin il gol cun Lasagna: Maxi i da un biel balon in aree e Kevin al controle, si zire e al tire a colp sigûr. I ospits no restin a cjalâ e a rispuindin daurman cun Simy che al è plui svelt di Samir suntun cross di Nalini e al bat Bizzarri.

L’ecuilibri dal risultât al cuiete la partide. Dutis dôs lis scuadris a ridusin il ritmi e la pression ofensive. La bale e baline te zone mezane dal cjamp e nol è masse ce fâ par Bizzarri e Cordaz, se si gjave une conclusion di Trotta, che però e ven fermade di Danilo, e doi tîrs di Lasagna e Fofana, e cussì si siere il prin timp.

La seconde frazion si scree cuntun pâr di atacs dal Crotone. Cul passâ dal timp si torne a viodi ancje alc de bande dai blancs e neris che si svicinin al vantaç cun Lasagna, che al oblee Cordaz a fâ un miracul. Si svicine la fin de partide e al somee che lis dôs scuadris a vedin di spartîsi il botin, ma juste tai ultins minûts al rive un tîr di Simy, Samir al interven ma i regale la bale a Faraoni che al segne e al firme il ko.

Il puartîr de Juve, Gianluigi Buffon, forsit al disarès che une partide che e dure novante minûts al puest dal cûr e à un casselot di scovacis…

Ancjemò une volte tal Stadi Friûl si sint il pês dal efiet Mer…Dacia Arena. Il public furlan, che al veve za contestât scuadre e societât vie pal prin timp, al torne a businâ e a palesâ la sô avilizion. Masse dispès il blanc e il neri a son deventâts grîs, ma cumò il grîs al è deventât neri e salacor ancje maron. Al covente fat alc daurman par no finî malamentri il campionât. E al coventarà fat alc altri ancjemò, cuntune vision strategjiche diferente, pal avignî. La domande e je: ma ise la pussibilitât di vêle june strategjie?

Mancul mâl che il sport furlan al ufrìs ancje alc altri di miôr.

 

Napoli – Udinese 4-2


L’Udin al piert ancjemò. Lu fâs cuintri dal Napoli, la seconde fuarce dal campionât, e dopo vê zuiât la sô partide miôr di passe doi mês incà. Tal stadi San Paolo i blancs e neris a passin in vantaç dôs voltis e a tegnin bot par doi tierçs dal timp di zûc, cuant che a van al mancul e intant che i parons di cjase a cressin e a palesin la lôr superioritât tecniche, tatiche, atletiche e di caratar.

Oddo, tra infortunis, scualifichis e sieltis tecnichis, al imbastìs une formazion cun diviersis novitâts, daûr di un scheme che al mude dal 3-5-2 al 3-5-1-1: Bizzarri in puarte, difese cun Danilo, Samir e Nuytinck, linie mediane che si da dongje ator di Balic, cun Barak e Ingelsson e cui gnûfs laterâi Zampano e Pezzella, e atac cun Jankto e Perica.

La partence e je buine par dutis dôs lis scuadris. Il Napoli al è plui pericolôs, sburtât indenant dal ex blanc e neri Zielinski, che i fâs spudâ balins a Ingelsson, e cun Insigne e Hamsik che a imbastissin i prins atacs. L’Udin si difint cun snait, cun Bizzarri al è simpri tal puest just, che a sedin cross o tîrs in puarte e cun Pezzella e Zampano che a cuvierzin ben e a judin la tierce linie, e al mostre di no vê pôre dai aversaris. Jankto al è protagonist di cualchi buine iniziative, Perica al scombat e Balic e Barak a tirin sù la scuadre, che e scomence a dâi di lavorâ a Reina, a tacâ di une biele conclusion dal boem, par rivâ al gol di Jankto, che al siere une biele combinazion tra Perica e Zampano.

Il Napoli al rive a segnâ l’un a un dentri de fin dal prin timp cun Insigne e dopo de polse al mostre sul imprin di vê plui determinazion indenant, cun Diawara e Hamsik, ancje se l’Udin no si scompon e al rispuint cun Zampano e Pezzella che a van dilunc a sburtâ vie pes corsiis laterâls. Juste di un cross di Zampano al rive il gnûf vantaç de scuadre furlane cun Inglesson che al tire di prime intenzion e al sbuse la puarte dai celescj.

Sarri al cambie scheme, dal 4-3-3 al 4-2-3-1, e al mande in cjamp Mertens al puest di Hamsik cun chê di ribaltâ il risultât. La manovre e je chê juste: prime Callejon al impegne Bizzarri e te azion che e salte fûr dal corner seguitîf Albiol si cjate tes cundizion di tirâ in puarte e al segne.

Al è il svolt. Il Napoli al frache il pedâl dal aceleradôr intant che l’Udin al mostre di vê pocje benzine sei sul plan atletic che in tiermins psicologjics. A rivin cussì la sgrife di Milik che al segne il gol dal sorpàs e il tîr cul cjâf di Tonelli che al fâs poker, intant che lis sperancis blancjis e neris di tornâ a dreçâ la partide a van a sfracaiâsi su la travierse cjapade di Perica.

Domenie a Udin al rive il Crotone, che al à fermât la Juve in cjase e al à une dibisugne mostre di fâ ponts. Rivaraie la scuadre di Oddo a zuiâ par novante minûts e a jonzi finalmentri un risultât positîf?

Mauresca Fracas Dub + Xavi Sarrià + Moot + Dr. Drer & CRC Posse + Beatles par rumanç = Babêl Europe 8/2018

O sin ai 17 di Avrîl e cheste e je la setemane juste par une gnove pontade di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence che al cjate spazi tal palinsest di Radio Onde Furlane vuê, martars, a 11 a buinore in direte, e po in repliche ancje doman, miercus ai 18 a une dopo di misdì, e sabide ai 21 a une e mieze.

La pontade numar 8 dal 2018 de trasmission e pontarà la sô atenzion su la atualitât, tra cronache, gnovis jessudis discografichis e gnovis produzions video.

In particolâr si podarà scoltâ alc di Big Sur, l’album gnûf dai ocitans Mauresca Fracas Dub, une altre cerce di Amb l’esperança entre les dents, il prin disc tant che solist di Xavi Sarrià e il toc che i da il titul al disc plui resint dai sarts Dr. Drer & CRC Posse, Cabudanni, che di chel juste un mês indaûr al è saltât fûr ancje il videoclip uficiâl.

Cun di plui, il viaç musicâl di Babêl Europe al tocjarà ancje la isule di Man, cui Moot, e il Cjanton dai Grisons, cuntun classic dai Beatles – Rain – tornât a cjantâ par rumanç de bande di Corin Curchellas, Hendrix Ackle & Adrian Stern.

Vie pe trasmission si fevelarà ancje dal Minority Safepack e de manifestazion di domenie stade a Barcelone a pro de liberazion dai presonîrs politics.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

Cagliari – Udinese 2-1

E cussì, magari cussì no, e je rivade ancje la sconfite numar nûf. L’Udin a Cagliari al sune ancjemò une volte chê cjançon: chê di une scuadre che, se al va ben, e zuie dome vincj minûts, e che e à limits struturâi massime in atac, là che si viôt alc dome se al è Lasagna ma se Kevin al scuen molâ al è il vueit. Il Cagliari al mostre snait e caratar, al ten bot cuant che i blancs e neris a fasin alc di plui e po al cres, cu la convinzion che i covente par tirâsi fûr di une situazion di classifiche che e pues deventâ grivie, e al rive a cjapâ ducj i trê ponts. L’efiet Sardegna Arena al è une vore diferent di chel targât Mer…Dacia.

Oddo al mande in cjamp une scuadre cun cualchi novitât: in atac Maxi Lopez al torne titolâr dongje di Lasagna, tal mieç de mediane si tornin a viodi Balic e Fofana adun di Barak, intant che tes corsiis laterâl a son Larsen e Adnan e denant de puarte difindude di Bizzarri si cjatin Danilo, Samir e Nuytinck. La partence de formazion furlane e je buine. Dopo trê minûts Lasagna al jentre te aree di rigôr aversarie, Castan lu ferme in maniere iregolâr ma Giacomelli no si inacuarç di nuie. Plui indenant al è Fofana che al met tal mieç un balon interessant par Lasagna, che però nol rive a tocjâlu cemût che al covente.

Lis robis a van miôr al minût numar dîs, cuant che Barak al cjape la iniziative, al semene mieze scuadre aversarie e al cîr Lasagna che nol mancje l’apontament e al segne cence fastidis. Il gol a l sune la svearine pai aprons di cjase che a reagjissin daurman e Faragò al met tal mieç une bale pevarine che e oblee Bizzarri a jessi plui svelt di Pavoletti. L’atacant livornês, che vie pal Istât e ancje dopo al someave che al podès rivâ in Friûl, al à la pussibilitât di mostrâ il so talent in plui ocasions e in curt al rive ancje a segnâ: punizion di Cigarini che e cjape il pâl e il bomber dal Cagliari che si bute tant che un variûl su chê bale e le bute tal sac.

Il risultât parziâl al va daûr di ce che a mostrin lis dôs scuadris, che passade la mieze ore di zûc, a cjapin flât e cuntun mix di atenzion e di pôre a compagnin la gare fin ae fin de prime frazion. Al tache cun chê stesse ande ancje il secont timp, là che lis dôs scuadris a mostrin di vê soredut chê di no riscjâ di fâsi mâl, ancje se cul passâ dal timp si palesin lis diferencis jenfri Cagliari e Udin.

I blancs e neris a pierdin Lasagna, infortunât, e il lôr potenziâl ofensîf si sfante, stant che ni Jankto, che al cjape il so puest, ni Maxi Lopez e nancje De Paul, che al jentre al puest dal zuiadôr porteño, a mostrin di jessi in stât di colpî des bandis di Cragno. Par cuintri, la organizazion di zûc coordenande de bande di Cigarini e po di Cossu, che al cjape il so puest, cu la colaborazion di Padoin (almancul un motîf di braùre furlane…), e pues poiâsi cun costance sul dinamisim di Pavoletti. L’Udin si difint ma pe plui part de seconde frazion si eclisse o scuasit de metât dal cjamp insù, impen i parons di cjase a fasin alc di plui e a fuarce di dâi a rivin a vuadagnâ il corner bon, che i permet a Cossu di meti tal mieç il balon just che Ceppitelli al tocje cul cjâf inte maniere miôr e cussì al firme il doi a un finâl.

Pal Cagliari e je une bocjade di aiar bon, pal Udin une altre sbrissade di rive jùù masse dongje de code de classifiche. Miercus i blancs e neris a zuiaran cuintri dal Napoli.

Udinese – Lazio 1-2


Se par talian si dîs che «non c’è il due senza il tre», par ce che al tocje lis sconfitis dal Udin nus tocjarâ gloti che par furlan si disi ancje «nol è il siet cence il vot». Magari cussì no, la partide cuintri de Lazio e conferme ad in plen la tindince negative dai blancs e neris. La scuadre di Rome e je fuarte, però l’Udin – che par sigûr al à fat ancje alc di plui che in altris ocasions – al à fat masse pôc e ancjemò masse pôc ben par pretindi di jonzi un risultât diferent.

La partence dai blancs e neris no je stade nancje mâl, anzit. La formazion di Oddo, cun Bizzarri in puarte, cun Danilo, Samir e Nuytinck in difese, cun Balic tal mieç de mediane, cun Jankto e Barak dongje di lui, cun Larsen e Alì Adnan tes corsiis laterâls e cun Lasagna che al torne a jessi il pont di riferiment dal atac dongje di Maxi Lopez, e partìs cul pît just. La Lazio e somee strache e flape e e patìs il dinamisim dai parons di cjase. Cundut de pression e dal ritmi, lis conclusions de scuadre di balon furlane a son pocjis e par nuie pericolosis. Però, dopo nancje un cuart di ore di zûc e rive la combinazion juste: scat di Larsen su la corsie di diestre, cross tal mieç de aree par Lasagna che al tocje la bale cul cjâf e le bute dentri inte puarte di Strakosha.

Il gol dal Udin al fâs sunâ la svearine de Lazio, che e scomence a imbastî cualchi azion, e alce la linie dal so zûc e si fâs viodi des bandis di Bizzarri cuntun tîr fûr bersai di Immobile, cuntune conclusion deviade in corner di Milinkovic e cuntun tîr cul cjâf di Lucas Leiva che il puartîr blanc e neri al scuen fermâlu in doi timps. A fuarce di dâi, i ospits a segnin: Felipe Anderson si slargje a man çampe e i passse la bale a Lulic che al fâs partî un tîr-cross che al devente un assist par Immobile, che i met la çate e le bute tal sac.

Pal Udin al è un brut pataf, no dome par vie de pierdite dal vantaç ma ancje parcè che la azion dal gol e je condizionade di un intervent di Marusic su Jankto che nol somee masse regolâr. La reazion de scuadre furlane, par fortune, no si limite aes protestis cuintri di Rocchi, ma si palese ancje in cualchi iniziative in verticâl, cun Maxi Lopez che al fâs chel dal assist e cun Lasagna che al scombat, ancje se par Strakosha nol è masse ce fâ.
Il prin timp si svicine ae fin e al viôt la Lazio che e segne il secont gol: verticalizazion te aree di rigôr di Immobile e tîr sigûr di Luis Alberto che Bizzarri nol rive a fermâlu.

La seconde frazion si vierç cul Udin al atac e cuntun cross di Alì Adnan par Maxi Lopez che cul cjâf al va avonde dongje dal doi a doi. Al è dome un moment: cul passâ dal timp la Lazio e scjafoie cualsisedi manovre blancje e nere, cence masse sfuarçs, stant che la scuadre di Oddo si cuiete di bessole.

I ospits provin a jessi ancjemò pericolôs, ma ur mancje une buine dose di precision. Oddo al met dentri Widmer al puest di Samir, al sposte Larsen in difese e al mande il svuizar a fâ il cursôr de bande diestre. L’Udin al prove a fâ alc, ma nol rive a impegnâ pardabon Strakosha, ancje par vie dai blecs che e rive a meti la difese celeste. La Lazio e rispuint e i blancs e neris indaûr in cualchi ocasion a clopin e in cualchi altre a fasin miracui, cun Danilo al ferme un tîr di Murgia e cun Bizzarri al salve suntun tîr di Marusic.

A passin i minûts, la Lazio e manten il control de partide ancje se l’Udin nol somee ancjemò fûr dai zûcs, cun De Paul e Ingelsson che a jentrin cun chê di rinfuartî la pression ofensive.
Cuant che Lasagna al pinele un cross par Jankto, juste ae fin dal incuintri, la scuadre di balon furlan e pâr fintremai in stât di dreçâ il risultât, ma la bale tocjade cul cjâf dal boem no jentre in puarte e cussì pe formazion di Oddo e je la sconfite numar vot.
E la code de classifiche e je mancul lontane.

 

La solidarietât dal Friûl ae Catalogne doman in place a Udin

Doman a buonore, di 11 fin misdì, al è in program a Udin, in place Sant Jacum, un presidi in difese de democrazie, des libertâts civîls e dai dirits umans cumò sot atac in Catalogne par vie de repression politiche e judiziarie metude in at cuintri dal indipendentisim catalan de bande dal guvier centrâl spagnûl e des fuarcis spagnolistis.

Cundut che la decision dai judiçs todescs di refudâ la estradizion dal president catalan Carles Puigdemont pai reâts di ribelion e sedizion e da un colp dûr al cjistiel judiziari imbastît de magjistrature spagnole, no si pues dismenteâ che in dì di vuê la autonomie catalane e reste suspindude e che nûf dirigjents indipendentiscj catalans si cjatin intes presons spagnolis intant che altris sîs a son in esili.

La iniziative e à chê di riclamâ la atenzion su cheste situazion che e fâs a pugns cu lis fondis de democrazie e de libertât, e di manifestâ in maniere visibile la solidarietât dai furlans ai catalans.

Il presidi al è inmaneât dai Manoâi pe autonomie e al gjolt de poie di diviersis organizazions espression de aree autonomiste e nazionalitarie furlane.

E je une iniziative interessante: a pro de democrazie, des libertâts civîls e dai dirits umans in Catalogne e inaltrò in Europe e tal mont e a pro de Europe dai popui e dai citadins.

Cui che al è in Friûl – massime cui che si cjate des bandis di Udin – al fâs ben a cjapâ sùù l’invît fat indenant dai organizadôrs e cjatâsi in place S. Jacum, se pussibil cun intor alc di zâl, colôr de solidarietât ai presonîrs politics catalans.

Udinese – Fiorentina 0-2

Che e sedi la Atalanta in trasfierte o la Fiorentina in cjase la musiche e je simpri chê: l’Udin al piert.
E cumò a son siet lis partidis pierdudis di file de scuadre di balon furlane, intant che i aversaris a tornin a cjase dal Friûl cul cuint sucès un daûr di chel altri.

Chê de Fiorentina e je une vitorie meretade e chê dal Udin e je une sconfite meretade.
Se si gjavin in prins vincj minûts dal secont timp, cuant che e imbastìs un pôc di zûc e cualchi azion ofensive, la scuadre blancje e nere e je flape e smamide, daûr di chê che e je zaromai deventade une brute tradizion.

Nuie Fieste de Patrie li dal stadi Friûl, dome l’efiet Mer…Dacia Arena e – alc al è alc – l’omaç dal public ae memorie di Davide Astori.

Babêl Europe 07/2018. La Fieste de Patrie e altris datis di memoreâ tra storie e atualitât

Une gnove pontade ‘normâl’ intune altre zornade ‘speciâl’. Il prin apontament cun Babêl Europe vie pal mês di Avrîl dal 2018, al cole inte setemane de Fieste de Patrie dal Friûl. In particolâr inte sô prime emission, il program di Radio Onde Furlane, dedicât a lenghis, musichis e nazions cence stât, si pues scoltâlu (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) juste vuê ai 3 di Avrîl a 11 a buinore, tal inovâl di chê dì dal 1077 cuant che l’imperadôr Indrì IV i deve al patriarcje di Aquilee Siart il titul di «Comes Fori Julii, Dux et Marchio».

Chê ricorence, che e je soredut une fieste dal Friûl di vuê e di doman, e ven memoreade ancje inte suaze di Babêl Europe, cun cualchi segnalazion in cont des iniziativis che a vegnin inmaneadis ator pal Friûl pe ocasion e cul riferiment a cualchidune des altris fiestis nazionâls babelichis de Europe, dal Paîs Basc al Gales e de Sardegne ae Cornualie e ai Paîs Catalans. Cun di plui si fevelarà di atualitât, tra Catalogne e Palestine, e di novitâts discografichis.

E sarà la ocasion par scoltâ une gnove cerce di Le Kov, l’album gnûf dut par cornic di Gwenno, e par sgarfâ tal repertori de storiche band sarde Kenze Neke, dai metalârs catalans Siroll, di Loris Vescovo e Raff BB Lazzara e dai bascs McOnak.

Dopo de emission di vuê, cheste pontade di Babêl Europe e torne te programazion di Radio Onde Furlane tes dôs replichis dal dopodimisdì di doman, miercus ai 7, a une e di sabide ai 10 a une e mieze.