Pordenone – Frosinone 3-0

Trê goi, trê ponts e (almancul par cumò…) il prin puest in classifiche. Il batisim dal Pordenon in serie B nol podeve lâ miôr. La scuadre furlane di balon vuidade di Attilio Tesser e zuie ben, cun snait e cun personalitât, no à nissune sudizion viers dai aversaris, increditâts tant che une des scuadris che a varessin di scombati cun plui mieçs pe promozion in Serie A, a mantegnin il control de partide par dute la sô durade e a vincin in maniere juste, clare e taronde.

I neris e verts a cjapin daurman la iniziative. A fasin zirâ la bale e za dopo pôcs minûts i dan di lavorâ al puartîr dal Frosinone, Bardi, cuntune conclusion di Ciurra. I ospits no rivin a fâ alc e ce e a provin a cirî la strade dal gol dome su punizion, cun Ciano, che però nol cree problemis ae formazion dal Friûl Ocidentâl.

L’unic pericul pal Pordenon al rive ae fin de prime mieze ore di zûc, cuntun biel tîr di Trotta che al cjate Bindi tal so puest, pront par parâ inte maniere miôr. Passât il spac, i neris e verts a tornin al atac, si svicinin al gol cuntun tîr di Semenzato, fermât di Beghetto, e a cjatin il vantaç cun Popega, che al profite dal intervent falât di Airaudo suntun tîr-cross di Ciurra e al segne.

Sierât il prin timp sul un a zero, il Pordenon si cjate tes cundizions miôr par zuiâ la seconde frazion. I ospits a patissin la continuitât de manovre de scuadre dal Friûl Ocidentâl e a stentin a imbastî il lôr zûc. Tal zîr di siet minûts e rive la seconde segnadure de formazion di Tesser: ancjemò une biele bale metude tal mieç di Ciurria, ancjemò un intervent difensîf falât di Airaudo e ancjemò Popega che si cjate tal puest just par fâ la robe juste e al firme ancje il doi a zero.

Il Frosinone al è in zenoglon. La sô uniche reazion e je une biele punizion di Ciano, che Bindi i rispuint parant vie la bale in corner cuntun altri intervent une vore bon. Il ritmi al cale, cul Pordenon simpri paron di dut il cjamp, e al rive ancje il tierç gol sul disviliup di un corner: tîr cul cjâf di De Agostini, parade di Bardi e tîr a colp sigûr di Barison, che al staronze il risultât.

Cun trê goi di vantaç il Pordenon al gjestìs la ultime part de partide, intant che il Frosinone al prove intun pâr di ocasions a segnâ il gol de bandiere, ma lis conclusions di Ciano e di Trotta no cjatin il bersai.

Sabide ai 31 di Avost e sarà la seconde dal campionât e pal Pordenon e sarà la prime trasfierte in serie B, in cjase dal Pescara.

Advertisements

Udinese – Milan 1-0

Un gol e trê ponts. Une setemane dopo de vitorie in Cope Italie, l’Udin al scomence ben ancje in campionât. In cjase cuintri dal Milan i blancs e neris a zuin une buine partide, atente e ecuilibrade, a mostrin di vê avonde cjâf, cûr e gjambis, di no vê pôre dai aversaris plui cuotâts e di jessi in stât di cjapâ la iniziative, massime vie pal secont timp.

Tudor al mande in cjamp Musso in puarte, Becão, Ekong e Samir in difese, Larsen, Fofana, Mandragora, Jajalo e Pezzella, che al à za la valîs pronte par lâ a Parma, inte linie mediane, e Pussetto e Lasagna in atac. Di chê altre bande Giampaolo al presente un Milan che al zire ator di Suso e di Piantek.

Il prin timp nol somee alc e ce. Lis dôs scuadris si studiin, a fasin zirâ la bale ma a stentin a cjatâ ocasions di gol. Vie pai prins cuarantecinc minûts lis conclusions plui pericolosis – si fâs par mût di dî – a son doi tîrs di Lasagna, un di Romagnoli e un di Suso, ducj cuancj fûr bersai. L’Udin si difint cun sintiment, al rispuint in maniere avonde concrete e cussì al oblee i aversaris a salvâsi in corner in plui ocasions.

Dopo de polse la partide e vuadagne in tiermins di ocasions e di emozions. Il Milan al manten di plui il contol de bale, ma la sô manovre e je pardabon pôc produtive. La scuadre di Giampaolo un pôc e je imbalade par so cont e un pôc e ven neutralizade dal Udin, salacor ancjemò plui atent e plui svelt tal difindisi e tal imbastî azions ofensivis che vie pe prime frazion.

Donnarumma si vuadagne il pagnut suntun tîr di Fofana e suntune conclusion di Jajalo, intant che i tentatîfs dai milaniscj Borini, Paquetà, Castillejo e Platek si distudin lontan de puarte di Musso. A passin i minûts, l’Udin al prove a atacâ ancjemò cun Jajalo e cun Lasagna, ma il risultât al reste inclaudât sul zero a zero.

Il svolt pe partide al nas al setantesim minût, cuant che Tudor al clame fûr Fofana e Pussetto par Nestorovski e De Paul, e al cres doi minûts plu tart: corner dal fanatasist argjentin e conclusion cul cjâf di Becão, che al batie inte maniere miôr la sô prime partide di campionât cu la maie blancje e nere.

Il gol al bute in zenoglon il Milan e al sburte indenant l’Udin, cun Lasagna che al cjate la zirade juste e al oblee Donnarumma a fâ un mieç miracul. I ospits, dopo di chel gnûf pericul, a provin a dreçâ la partide intai ultins minûts di zûc, ma no rivin a cumbinâ masse, soredut par vie che la scuadre di balon furlane si difint cun snait e cun atenzion e cussì si puarte a cjase une vitorie impuartante e meretade, cemût che al salte fûr ancje des statistichis, là che al risulte che i blancs e neris a vuadagnin plui corners e a tirin plui voltis in puarte.

Africa Express + Familia Caamagno + Rodeo + DLH Posse + Claudia Aru = Babêl Europe 16/2019

Un viaç che al partìs dal Paîs Basc e che al rive fintremai a scjavaç tra Ream Unît e Afriche. Al è chel che al ven proponût inte gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât, che e cjate spazi inte programazion di Radio Onde Furlane vuê, martars ai 20 di Avost, doman, miercus ai 21, e po ancjemò sabide ai 24.

Inte pontade numar 16 dal 2019 di Babêl Europe  si larà a torzeon tal timp e tal spazi, tra discs publicâts intai ultins mês o intes ultimis setemanis e produzions plui o mancul “di anade”. Si podarà scoltâ la musiche ruspiose e desertiche dai bascs Rodeo, la cjançon par sart siore di contignûts musicâi e testuâi di Claudia Aru, une cerce de storie dal hip hop par furlan cui DLH Posse, un toc dal disc gnûf dai galizians Familia Caamagno e une cjançon gjavade fûr di Egoli, la produzion plui resinte firmade Africa Express, un dai progjets musicâi dal ex cjantant dai Blur, Damon Albarn, che cu la colaborazion di tancj di lôr al va dilunc a miscliça sunôrs, ritimis e lenghis de Afriche e in cheste ocasion al ponte la sôatenzion su Johannesburg e al zonte ancje la lenghe galese, in graciis de partecipazion di Gruff Rhys.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane (vuê a undis a buinore, doman a une dopo di misdì e sabide a une mieze dopo di misdì), ancje cheste pontade di Babêl Europe si podarà tornâ a scoltâle in podcast cun Spreaker e Spotify.

Udinese – Südtirol 3-1

La prime partide uficiâl de stagjon 2019-2020 dal Udin si siere cuntune vitorie. Tal tierç turni di Cope Italie cuintri dal Südtirol, formazion che e zuie in serie C, la scuadre di balon furlane e fâs un tic di fature di plui di ce che si spietisi par vinci.

Il prin timp dal incuintri dal Stadi Friûl al è avonde flap e par chel al finìs cence goi. I blancs e neris a rivin a segnâ juste cuatri minûts dopo de polse cun Lasagna. Il sucès temporani de formazion blancje e nere al ven metût in discussion dai sudtirolês che a cjatin la bale dal un a un cun Morosini.

Inte ultime part de gare l’Udin al frache sul aceleradôr, sburtât di De Paul, di Pussetto e di Mandragora, e al rive a vinci in maniere clare e taronde, in graciis di doi goi dal centrocampist napoletan.

La stagjon uficiâl e partìs cul pît just, almancul pal risultât.  Pal campionât, che al vignarà screât domenie cu la partide in cjase cuintri dal Milan, i blancs e neris a varan di fâ di plui e a tacâ dal prin minût. Par intant scuadre e tifôs si contentin  dal passaç al cuart turni di Cope Italie e di chel alc di bon che si à viodût. Alc al è alc…

Yann Tiersen + Orka + Sŵnami + Jansky + Bumbe Orchestra + La Causa dei Popoli = Babêl Europe 15/2019

Babêl Europe no si ferme nancje vie pal mês di Avost. Vuê, martars ai 6, a undis a buinore – e po ancje tal dopo di misdì di doman, miercus ai 7, a une e di sabide ai 10, a une e mieze, intal palinsest di Radio Onde Furlane al torne il program cuindisinâl dedicât ae produzion musicâl intes lenghis minorizadis de Europe.

Inte gnove pontade de trasmission si fevelarà di atualitât sei in tiermins musicâi che “di contest”, tra concierts, discs, events, manifestazions e publicazions. E sarà la ocasion par scoltâ un altri toc par breton dal disc plui resint di Yann Tiersen, All, juste un mês dopo dal conciert che al à fat a Passarian, denant de Vile Manin.

swnami2

Il percors targât Babêl Europe al tocjarà ancje lis isulis Fær Øer, il Gales, là che e je in plen davuelziment la edizion 2019 dal Eisteddfod, i Paîs Catalans e la Sardegne, cu la musiche dai Orka, dai Sŵnami, dai Jansky e de Bumbe Orchestra. Cun di plui e vignarà dade in anteprime une voglade al gnûf numar dopli (7-8) de riviste taliane dedicade aes minorancis e aes nazionalitâts de Europe e dal mont dal titul La Causa dei Popoli.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane, ancje cheste gnove pontade si pues tornâ a scoltâle in rêt su Spreaker e su Spotify.

logo_web_ROF_new