Udinese – Fiorentina 1-0

bandieris-friuul

Un gol di Nestorovski intal ultin e cu la Fiorentina l’Udin al vinç une partide che e coventave vinçude pe classifiche e pal morâl. Tal Stadi Friûl lis dôs scuadris a zuin la plui part dal timp tal mieç dal cjamp, cirint di sierâ i spazis une a di chê altre, e a produsin avonde pôc in atac. Il sucès dai blancs e neris si justifiche cuntun nivel plui alt di atenzion e di concretece rispiet ai aversaris che a pain dut il presit di cualchi disatenzion di masse, in particolâr propit in ocasion dal gol de scuadre furlane.

Cuintri dai florentins Gotti al sielç di mandâ in cjamp Musso tra i pâi, Becao, Bonifazi e Nuytinck in difese, Molina, De Paul, Walace, Makengo, Stryger Larsen in mediane e la cubie Llorente -Nestorovski in atac. Ancje i ospits si presentin cuntun 3-5-2 compagn di chel dal Udin: Dragowski in puarte, Milenkovic, Pezzella e Martinez Quarta in difese, Malcuit, Eysseric, Pulgar, Castrovilli, Biraghi in mediane e Ribery e Vlahovic in prime linie.

Il prin timp si vierç e al va dilunc cuntun ecuilibri sostanziâl. Lis dôs formazions a son speculârs e a fasin un grum di fature par imbastî azions di atac, sei pal bon lavôr fat par cuvierzi e sierâ i spazis di moviment sei par vie dai erôrs inte fase di costruzion. La bale gol miôr le à l’Udin ator de metât de prime frazion, cun De Paul che i da un biel balon a Stryger Larsen e cul danês che al tire in diagonâl e al oblee Dragowski a une decisive deviazion cul pît. Di chê altre altre bande, la formazion di Prandelli e rive a jessi pericolose dome cuntune conclusion masse alte di Vlahovic e cuntun tîr di lontan di Martinez Quarta che, dopo di une deviazion acidentâl di un difensôr blanc e neri, al devente impegnatîf par Musso, che dut câs al rive a deviâlu in corner.

Lis dôs scuadris a van tai camarins cence vê fat o cjapât goi e a tornin tal cjamp inviant un secont timp cuntun ritmi che al somee jessi plui alt di chel de prime frazion, ancje se eculibri tal mieç dal cjamp e bariduris indaûr a permetin avonde di râr aes dôs scuadris di tirâ in puarte. Dopo undis minûts une jessude incierte di Dragowski suntun cross di diestre i permet a Nestorovski di recuparâ il balon e di zirâlu a Molina che si cjate in buine posizion, ma al tire masse adalt. Plui tart la Fiorentina e rispuint cun chê che e sarà la sô ocasion miôr: sbûs di Walace a centricjamp, assist indenant che di Ribery par Vlahovic che si cjate di bessôl denant di Musso ma al piert il moment just e si fâs sierâ dal puartîr.

Tal ultin cuart di ore Gotti al clame fûr Llorente e al met dentri Braaf, che… al manten ce che al somee sugjerî il so cognon e i da une buine bale a Arslan: il so tîr al è pericolôs ma al ven deviât di Pulgar di là de travierse. Prandelli al met Kokorin tal puest di Ribery, ma la manovre de sô scuadre e reste framentarie.
Intai ultins minûts lis scuadris si slungjin e si cree cualchi spazi in plui però aes dôs scuadris ur mancje la precision par profitâ. Cheste precision le à l’Udin juste ae fin dal secont timp, intant che la Fiorentine, cun Milenkovic, e fâs un erôr che al sarà decisîs: cross di De Paul, durmide dal difensôr e conclusion cul cjâf di Nestorovski che al impire Dragowski. Un gol che al vâl trê ponts.

Pordenone – Ascoli 1-1

This image has an empty alt attribute; its file name is pordenone-calcio.png

Il Pordenon al romp la rie des dôs ultimis sconfitis, ma nol rive ancjemò a tornâ a vinci. A Lignan, cuintri dal Ascoli, al passe in vantaç dopo dîs minûts ma dopo vê straçât cualchi buine o casion, vie pal secont timp al cjape un gol in cuintripît, sù par jù compagn che cuintri de Reggina, e ae fin l’incuintri si siere cuntun gol e cuntun pont par om.

La scuadre di balon furlane si presente in cjamp cuntun 4-3-1-2 cun Perisan in puarte, cun Vogliacco, Camporese, Barison e Chrzanowski in difese, cun Misuraca, Magnino e Zammarini in mediane e cun Ciurria daûr dai doi atacants Butic e Musiolik. E je compagne la disposizion dal Ascoli cun Leali tra i pâi, cun Pucino, Brosco, Avlonitis e D’Orazio in difese, cun Saric, Danzi e Caligara tal centricjamp, cun Cangiano e Dionisi in atac e cun Stoian daûr di lôr.

La prime iniziative ofensive e je dai ospits cuntune imbusade interessante di Stoian par Dionisi, che però il so tîr al ven fermât in aree di Chrzanowski. La rispueste dal Pordenon e je la conclusion a bersai di Ciurria, che al tocje la bale che i rive di Musiolik e al impire Leali. Il gol al sburte i neris e verts a puartâsi ancjemò al atac prime cuntune biele zuiade di Ciurria che al bruse i aversaris e i passe la bale a Musiolik che però al conclût malamentri e po cun Zammarini, che al tire fûr.
Il prin timp al va dilunc cuntun bon ritmi: triangul Dionisi-Cangiano-Dionisi e tîr sporcjât di Vogliacco parât di Perisan; lanç di Chrzanowski par Butic e jessude basse coragjose e decisive di Leali; Dionisi che al lenç il pâl e Musiolik che nol cjate la puarte.

Il secont timp si vierç ancjemò cul Pordenon indenant e cui tentatîfs di Camporese e di Ciurria. L’Ascoli al rispuint in cuintripît e cussì al impegne Perisan cun D’Orazi e cun Mosti, che al so secont tentatîf al rive a segnâ, sierant une combinazion inviade di Dionisi e disvilupade di Camporese cuntun assist golôs.
L’un a un al da fuarce ai ospits e al mande in crisi almancul par un moment i Sborfs, che dopo une gnove conclusion pericolose di Dionisi al torne a ripiâsi. Vie pai ultis dîs minûts Pordenon e Ascoli a scombatin, a àn un pâr di balis buinis par om, ma i tîrs no cjatin la puarte e l’incuintri si siere cul un a un.

Reggina – Pordenone 1-0

This image has an empty alt attribute; its file name is pordenone-calcio.png

Une altre sconfite par un a zero. Dopo de partide de setemane passade a Lignan cul Cittadella, il Pordenon al piert ancje cuintri de Reggina. La scuadre calabrese e va dilunc cu la sô rie di risultâts positîfs e si puarte a cjase trê ponts impuartantons inte prospetive de salvece, intant che i neris e verts a rivin a restâ inte prime metât de graduatorie ma si slontanin de zone playoff.

I Sborfs a tachin cun decision e tal imprin a oblein i parons di cjas a stâ inte lôr metât dal cjamp. La scuadre furlane e lenç il vantaç cun Biondi, che nol è par nuie fortunât, stant il so diestri al centre il pâl cun Nicolas batût. Col passâ dal timp la Reggina e prove a reagjî e passade la prime mieze ore Crisetig al tire in puarte e al cjape i doi pâi de puarte nere e verte, prime chel ae diestre e dopo chel a çampe di Perisan, cence che nissun dai siei compagns al rivi a butâ la bale tal sac.

Sierât il prin timp sul zero a zero, la seconde frazion si invie sù par jù su chê stesse strade. Ator de metât dal timp, però, al rive il gol de vitorie dai calabrês cuntun cuintripît che si siere cuntun assist di Bellomo par Folorunsho che al segne. Il Pordenon al rispuint, al sburte e al va al atac e i fâs vignî i sgrisui ae reggina cun Barison che al lenç il pâr. I parons di cjase, passât il pericul, a tegnin bot fint ae fin e a difindin i trê ponts.

Parma – Udinese 2-2

This image has an empty alt attribute; its file name is udin_neri.png

Un timp, un pont e doi goi par om. Parma e Udin si spartissin la partide. Dopo un prin timp cui parons di cjase protagoniscj, la scuadre di balon furlane e recupare inte seconde frazion cul efiet di ripiâsi dopo dai trê patafs cjapâts a Rome e di fâ un altri passut indenant dilunc de strade par garantîsi la presince in serie A.

Pe ocasion Gotti al sielç une formazion che e viôt Musso in puarte, Becao, Nuytinck e Bonifazi in difese, Stryger Larsen, Di Paul, Arslan, Walace, Zeegelaar in mediane, Llorente ponte uniche e Pereyra daûr di lui tra la prime e la seconde linie. Il Parma al rispuint cun Sepe, Conts, Bani, Gagliolo, Pezzella, Hernani, Brugman, Kucka, Karamoh, Cornelius, Mihaila. L’Udin al scuen fâ di mancul di Deulofeu, intant che intal Parma a van in tribune Kurtic e Gervinho.

Lis dôs scuadris a tachin cul pît just e la partide e à daurman un ritmi bon. Tal zîr di trê minûts i parons di cjase a rivin a segnâ: cross di Pezzella e Cornelius che al salte plui indalt di ducj chei altris e le bute dentri. Il vantaç i da fuarce ae formazion di D’Aversa, che si puarte ancjemò al atac, cun Karamoh che al met tal mieç une biele bale par Mihaila che nol rive a profitâ e po cun Cornelius che però al cjate Musso tal puest just tal moment just. L’Udin al à la pussibilitât di dreçâ l’incuintri prime cun Zeegelaar che però si mangje un gol za fat suntun cross di De Paul parcè che dut di bessôl al tire fûr dal spieli de puarte e po cun Bonifazi che suntune punizion di De Paul al salte ben ma le mande fûr.

La regule no scrite dal “gol mancjât = gol cjapât” e vâl ancje in cheste ocasion. Passade la prime mieze ore di zûc, Mihaila al jentre inte aree furlane, al ven butât jù di Becao, Irrati al sivile il rigôr e Kucka al tire e al segne. L’Udin al prove a rispuindi, ma nol è concret e soredut no son precîs i siei zuiadôrs che cuant che a tirin in puarte lu fasin simpri fûr bersai. Cussì il prin timp si siere cul dopli vantaç dai parons di cjase.

Dopo de polse Gotti al lasse intai camarins Walace e Becao e al mande in cjamp Nestorovski e Molina, spostant Pereyra indaûr inte linie mediane e lassant indenant Llorente e l’atacant macedon.
La prime ocasion de seconde frazion e je dal Parma, cuntun tîr fûr bersai di Kucka, ma cul passâ dal timp l’Udin al vuadagne cjamp, al ten di plui il balon e al è plui pericolôs, massime dopo dal cambi di Llorente cun Okaka.

La sielte di Gotti e je chê juste parcè che cuatri minûts dopo jentrât tal cjamp propit Okaka al siere inte maniere miôr une azion inviade di De Paul, che i pronte une bale golose che l’atacant al met tal sac daûr di Sepe. D’Aversa le viôt grivie e al clame fûr Hernani e Karamoh par Gras e Man e dopo ancje Brugman e Mihala par Cyprien e Bruno Alves. L’Udin al va dilunc a atacâ e a fuarce di dâi al cjate il gol dal doi a doi: punizion di Ouwejan, jentrât za di un pôc tal puest di Zeegelaar, e Nuytinck al salte plui alt di ducj e cul cjâf al segne il so prin gol in campionât.

La scuadre furlane e somee inviade ben fintremai viers dal sucès e si svicine al tierç gol cun Nestorovski suntun cross di Molina.
I ultins minûts a son ferbints e ancje il Parma al à lis sôs buinis ocasions, ma ni Gagliolo ni Cyprien a rivin a tirâ in puarte. Il risultât al reste chel: al è just e al va ben soredut pal Udin, che si manten poc sot de mieze classifiche intant che il Parma nol rive a slontanâsi de code de graduatorie.

Lou Dalfin + Mascarimirì + Lou Seriol + Nux Vomica + Patxi eta Batbiru + Oskorri + Bachas Mont-Joia = Babêl Europe 04/2021

La cuarte pontade dal 2021 di Babêl Europe, il program cuindisinâl di Radio Onde Furlane, dedicât a lenghis, musichis, minorancis e nazions cence stât, e rive juste inte setemane de fin dal Carnevâl e dal principi de Cuaresime.
Propit par chel il gnûf viaç ator pe Europe de diversitât linguistiche e de creativitât musicâl, in programazion vuê, martars ai 16 di Fevrâr, a 11 in direte e po in repliche doman, miercus ai 17 (h. 13), e sabide ai 20 (h. 13.30), si disviluparà daûr des musichis e dai bai de tradizion popolâr e des fiestis di Carnevâl.

In particolâr si fasarà un percors che al cjape dentri il Paîs Basc, la Ocitanie e il Friûl, cui carnevâi di Lantz, di Nize e di Resie, e al tocje di sfris ancje la Grecìe Salentine e il carnevâl di Martignano, cu la musiche di Lou Dalfin, Mascarimirì, Patxi eta Batbiru, Oskorri, Nux Vomica, Bachas Mont-Joia e Lou Seriol e chê regjistrade di Alan Lomax.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Roma – Udinese 3-0

This image has an empty alt attribute; its file name is udin_neri.png

“Tertium non datur” pal Udin, “Three is the magic number” pe Rome. I blancs e neris no rivin a ripeti i sucès concuistâts tes ultimis dôs partidis cuintri dal Spezia e dal Verona. La Roma e je un aversari di un altri nivel e ancje chê furlane no je la stesse scuadre, atente indaûr e decise in atac, che si à viodude tai incuintris passâts. I parons di cjase a mostrin cualitât, organizazion e determinazion miôr, a segnin il prin gol dopo cinc minûts di zûc, a doplein il vantaç, passade la prime metât dal prin timp, e a mantegnin il control de partide vie par dute la prime frazion. Dopo de polse l’Udin al prove a fâ alc di plui indenant cence fortune, ma in difese al palese ancjemò cualchi buse di masse e ae fin al cjape ancje il tierç gol. Pai zâi e ros: trê goi fats, trê ponts cjapâts e il tierç puest in classifiche.

Cuintri de “Maggica” Gotti al recupare De Paul e al conferme la cubie di atac Llorente – Deulofeu, cun Musso in puarte, cun Bonifazi, Nuytinck e Samir in difese e cun Stryger Larsen e Zeeglars laterâi di mediane e cun Walace e Arslan tal mieç dongje di De Paul. La Rome si presente cun Pau Lopez in puarte, cun Mancini, Cristante e Ibanez in difese, cun Karsdorp, Veretout, Villar, Spinazzola in mediane, cun Pellegrini e Mkhitaryan a sapontâ la uniche ponte Mayoral.

La Rome a partìs cul pît just e cussì e cjate daurman il gol dal vantaç cuntun tîr cul cjâf di Veretout. Pal Udin e je une partide in rive su, cui parons di cjase che a son ancjemò pericolôs cun Karsdorp, che al ven neutralizât di Zeegelaar, cun Veretout, che al clame la biele parade di Musso, e cuntune biele combinazion inviade di Mkhitaryan e di Spinazzola a vantaç di Mayoral, che al ven anticipât di Nuytinck. Tal framieç al è un lanç di DePaul par Deulofeu, che al ven fermât in maniere arude di Cristante in aree, ma Giacomelli nol à dubis su la regolaritât dal intervent dal difensôr, e po e je une bale buine par Llorente, fermât dai zâi e ros.

I parons di cjase, a fuarce di dâi, a incressin il vantaç: cross di Pellegrini par Mayoral, jessude di Musso che al tocje cul pît l’atacant, Giacomelli al sivile il rigôr e Veretout lu segne. La Rome e à il control complet de partide e fintremai e impire ancjemò Musso, ma l’arbitri nol fâs bon il gol di Pellegrini parcè che al viôt, cul jutori dal Var, un fal di Mkhitaryan su Stryger Larsen.
Il prin timp si siere cuntun tîr dal limit di Cristante che al va fûr di pôc e cul Udin che nol rive a fâsi vîf in atac.

Inte seconde frazion l’Udin al prove a reagjî. E rive la prime vere conclusion dai blancs e neris, cun Deulofeu che al ricêf la bale di Stryger Larsen e al tire tal spieli de puarte ma cence creâ masse fastidis a Pau Lopez che al pare. In atac la scuadre furlane e scomence a fâ alc di plui, intant che in difese e mostre ancjemò di jessi incierte e clopadice. Cundut achel i blancs neris a rivin a tignî bot e a cirin il gol cun De Paul cence sucès. Gotti al fâs un dopli cambi, fûr Stryger Larsen par Molina e Llorente par Okaka, intant che la Rome e torne al atac cun Pellegrini e cun Djeko, in cjamp tal puest di Mayoral, e i blancs e neris a duarmin in difese, ma par fortune Musso al reste dismot.

I ultins vincj minûts de partide si vierzin cuntune ocasionone pe scuadre furlane. Deulofeu al robe la bale a Cristante e al scate in aree cun chê di lâ al tîr, ma si slungje un pôc masse la bale e cussì Pau Lopez i va incuintri, al rive a no fâsi saltâ e al salve i siei. L’atacant catalan al va dilunc a jessi pericolôs, sburtât di De Paul, ma la Rome si difint cun ordin e e rispuint in atac, impegnant Musso cun Dzeko e cun Mkhitaryan. Il timp al passe, lis pussibilitâts dal Udin di segnâ a van al mancul e ae fin e je glorie ancje par Pedro, jentrât in cjamp che nol è tant tal puest di Veretout, che al segne il tierç gol e al siere la partide.

Pordenone – Cittadella 0-1

This image has an empty alt attribute; its file name is pordenone-calcio.png

Il Pordenon al torne a zuiâ a Lignan e al torne a pierdi. Dopo de sconfite di une setemane indaûr cul Vicenza, il Pordenon al cole ancjemò cuntune scuadre dal Venit, il Cittadella, che dopo trê patis al vinç cuintri dai neris e verts e al rinfuartìs la sô posizion in classifiche.

I ospits a mostrin di vê alc di plui dai neris e verts za sul imprin. Il Cittadella al disfrute la fuarce atletiche dai siei zuiadôrs e al imbastìs daurman un ciert pressing, intant che il Pordenon al cîr la verticalizazion. Dopo trê minûts di zûc Beretta al lenç il gol cuntun colp di tac e i Sborfs a rispuindin cun Ciurria che al prove cul cjâf ma Maniero al sta in vuaite e al pare.

Il ritmi al è alt e la partide e je divertente. Benedetti al cjape la travierse e dîs minûts plui tart il risultât si disbloche cun Beretta che al segne su assist di Tsadjout. Nol è nancje il timp par fâ fieste e il Pordenon al prove a dreçâ la partide: il so tîr al è bon, ma ancje Maniero al interven ben.
Si scombat tal mieç dal cjamp, la scuadre furlane e alce la linie dal so zûc ma il Cittadella al ten bot e al prove a rispuindi in cuintripît cul efiet che il prin timp si siere cence novitâts.

La seconde frazion e tache in maniere mancul vivarose. Al tentatîf fûr bersai di Ognuseye al rispuint un atac di Ciurria, che al ven butât jù inte aree di rigôr: al somearès rigôr, ma par Paterna e je dome une simulazion dal atacant neri e vert che al cjape une amonizion.

Sghindât il pericul di un penalty cuintri, il Cittadella al sposte l’ecuilibri de partide a so pro, ma i siei atacs a cjatin Perisan tal puest just tal moment just, sei su Benendetti che su Baretta. Al è alc che nol funzione, la scuadre dal Friûl no rive a fâsi viodi pradabin des bandis di Maniero e lis pussibilitâts di segnâ l’un a un a van al mancul. Cun di plui, tai ultins minûts ,Tesser si inrabie cul arbitri e al ven butât fûr di Paterna par protestis. Vitorie dal Cittadella e Pordenon che al sbrisse fûr de zone playoff

Spal – Pordenone 1-3

bandieris-friuul

Une vitorie biele e buine. A Ferrara il Pordenon, dopo vê pierdût sabide stade cuintri dal Vicenza, al mostre di jessi une scuadre cun cûr e cun sintiment e, cundut des assencis, al zuie cun snait e cun ecuilibri e al rive a vinci, cuntun risultât taront, cuintri di une Spal che e alterne cualchi lapade di lusôr e diviers moments di scur e cussì e paie la organizazion miôr e il caratar de formazion furlane.

I Sborfs a partissin cul pît just e dopo trê minûts a àn bielzà une buine ocasion: sugjeriment di Falasco par Ciurria che al tire al svol e al mancje il spieli de puarte par pôc. La scuadre di Tesser e à in man il balin dal zûc e e torne a fâsi viodi des bandis di Berisha ancjemò cuntun tîr centrâl di Ciurria che al ven parât cence fastidis. La Spal e prove a rispuindi ma no rive a cumbinâ alc e ce e il prin timp al passe la mieze ore cence grandis ocasions ni di une bande ni di chê altre, prime di une punizion di Falasco che cu la complicitât di Camporese e rive a Butic che al segne il so prin gol de stagjon.

I parons di cjase a provin daurman a dreçâ la partide a jonzin l’obietîf prime de polse cuntune biele iniziative di Dickmann che al libere Paloschi e lu met in cundizions di butâle dentri. Sierât il prin timp in paritât, la seconde frazion si vierç di gnûf cul Pordenon al atac. Berisha prime al fâs un biel intervent in jessude su Biondi e plui tart al ven impirât di Ciurria che cul cjâf al bute dentri un balon pinelât par lui di Berra.

Se dopo dal gol di Butic la Spal e veve mostrât di jessi in stât di rispuindi, il gnûf vantaç dai neris e verts nol à chel stes efiet. La partide je intes mans de scuadre furlane, che e impegne ancjemò Berisha cuntune punizion di Butic e po e cjate il tierç gol cun Zammarini su cross di Ciurria.

Udinese – Verona 2-0

bandieris-friuul

Vitorie taronde dal Udin che si concretize dome intai ultins dîs minûts, cundut de superioritât dai blancs e neris pe plui part de partide e massime vie pal prin timp. La scuadre di balon furlane, in cjamp cence il scualificât De Paul, e fâs valê la sô supremazie teritoriâl. Il Verona al patìs la pression ofensive dai blancs e neris e al rive a fâi cuintri soredut cul so puartîr, Silvestri, che par passe otante minûts al è un ostacul insuperabil par Deulofeu, Walace, Stryger Larsen e compagns. Ma tal ultin propit un pastroç di Silvestri al vierç la strade dal Udin viers de concuiste dai trê ponts.

L’Udin al fronte il Verone cuntune gnove cubie di atac: cul basc Llorente e cul catalan Deulofeu. Daûr di lôr Gotti al mande in cjamp Musso in puarte, Bonifazi, Nuytinck e Samir in difese e Stryger Larsen, Pereyra, Walace, Arslan e Zeegelaar. A Udin si viôt ancje Lasagna cu la divise de sô gnove scuadre, in atac dongje di Zaccagni e di Kalinic, intant che in mediane Juric al presente Faraoni, Tamèze, Barak e Lazovic in mediane, Dawidowicz, Gunter, Dimarco in difese e Silvestri in puarte.

La partence e je buine e dopo sîs minûts l’Usdin al met dongje une biele manovre cun Llorente e Deulofeu, cul catalan che al tire e Silvestri che al pare cence padins. Nol à fastidis nancje Musso suntun cross di Dimarco, intant che i blancs e neris a van dilunc a alçâ la linie dal lôr zûc e a met adun azions. Deulofeu al è in zornade sì e si lu viôt in plui ocasions. Une vore buine e je ancje la prestazion di Silvestri che al scomence a fâ miracui sui tentatîfs di Walacs, di Samir e di Deulofeu. Tal ultin cuart di ore dal prin timp la scuadre furlane e prove plui voltis il colp dal un a zero, ancjemò cun Deulofeu, che al imbastìs un duel cul puartîr veronês, cun Stryger Larsen, cun Bonifazi e cun Walace, ma e cjate simpri Silvestri e cuant che nol rive a intervignî lui al met un blec ancje Barak.

La seconde frazion si vierç cu la jentrade in cjamp di Nestorovski tal puest di Pereyra e cun trê cambis tal Verona: Lovato par Dawidowicz, Magnani par Gunter e Ilic par Lasagna. I ospits a àn un pas diferent rispieta al prin timp e a provin a fâ alc di plui indenant, sburtâts di Zaccagni, Tamèze, Kalini e Ilic. L’Udin al è mancul incisîf, ma al ten bot indaûr e si mante ecuilibrât in ducj i reparts. La impression e je chê che la partide si pues disblocâle dome cuntun episodi.

A passin i minûts, si scombat tal mieç dal cjamp e i doi puartîrs no àn masse ce fâ. La uniche ocasion inte fase centrâl dal secont timp ele à Dimarco che al tire adalt parsore de travierse. I doi alenadôrs a provin a cambiâ e a messedâ lis lôr cjartis: Molina par Zeegelaar, Bessa par Zaccagni, Makengo par Arslan e Okaka par Llorente. Il Verona al va in pressing e l’Udin si difint e al rispuint in cuintripît, cun Okaka in evidence intune biele azion che Molina al siere mâl cuntun cross fûr scuare par Nestorowski.

Intai ultins dîs minûts a rivin i goi dal Udin. Deulofeu al mande fûr zîrs Dimarco e al crosse a fîl di tiere par Okaka, Silvestri al prove a brincâ la bale prime dal atacant blanc e neri ma le tocje malamentri e le bute inte sô puarte.
Fat il gol, l’Udin al cîr di fâ zughesse, il Verona nol rive a cumbinâ alc e ce, intant che i blancs e neris a provin ancjemò a jessi pericolôs in dôs ocasions cun Deulofeu che prime al tire fûr bersai e po al impire Silvestri, profitant di un erorat di Magnani e tirant cun precision a fîl di pâl.

Pordenone – Vicenza 1-2

This image has an empty alt attribute; its file name is pordenone-calcio.png

La rie di risultâts positîfs che e à segnât lis primis setemanis dal 2021 dal Pordenon si ferme a Lignan. Tal stadi Teghil i neris e verts a vevin pierdût la ultime volte prime di Nadâl cu la Cremonese e a tornin a pierdi, cun chel stes risultât, cjuinti dal Vicenza che al vuadagne trê ponts impuartantons che lu slontane de code de graduatorie.

I ospits a passin in vantaç dopo trê minûts di zûc, a tegnin bot denant dai tentatîfs de scuadre furlane di recuperâ, a cjapin il gol tal ultin ma a rivin a segnânt un altri daurman, prime des trê siviladis finâls di Volpi.

Il prin gol dai blancs e ros lu firme Longo che cul cjâf al tocje cun fuarce un balon ben pinelât di Beruatto, lu fâs sbati sul pâl e di lì al finìs tal sac daûr di Perisan. La rispueste dai Sborfs si concretize sul imprin intune punizion di Calò che e ven parade vie dai divensôrs vicentins, intant che di chê altre bande i ospits a lenzin la dopleade cun Capelletti, che al tire fûr di pôc.

La partide e je divertente, e va dilunc cuntun bon ritmi e dutis dôs lis formazions si svicinin ae segnadure: i furlans cun Zammarini e il Vicenza cun Meggiorini. Il Pordenon al insist cun chê di comedâ il risultât, si svicine ae pate cun Scavone, al riscje di cjapâ il secont suntun tîr di Beruatto che al cjape la travierse e al prove a passâ Perina cun Butic e po cun Berra, ma il risultât nol mude fin ae polse.

Il secont timp si vierç cuntune ocasionone dai ospits: azion resonade dai blancs e ros e bale inte aree furlane dulà che Cappelletti le recupare al tire in puarte ma al cjate Perisan tal puest just tal moment just. Tesser al mande in cjamp il gnûf acuist Kevin Biondi tal puest di Zammarini, intant che Di Carlo al fâs compagn cun Giacomelli e Gori tal puest di Vandeputte e Meggiorini.

La partide si manten interessante e vive: Butic al lenç il gol cuntun tîr di potence, Giacomelli nol rive a fâ rindi un bon balon lavorât di Giacomelli, che al tire masse adalt, e dopo une altre svintule di cambis, a fuarce di dâi, intal finâl Morra al segne l’un a un. Il risultât al è just, ma la partide no je finide e il Vicenza al cjastie il Pordenon cun Giacomelli, che al rive a impirâ Perisan un minût plui tart e al regale ae sô scuasre ducj i ponts a disposizion.