Laboratori di Autonomie, gnovis ‘Lezions’ tal Friûl Orientâl dai 2 ai 30 di Març

LabAut

Il Laboratori di Autonomie al va indenant cuntune gnove serie di incuintris tematics par resonâ de atualitât, de storie e dal avignî dal Friûl.

A tacâ di miercus ai 2 di Març e fintremai ae fin dal mês, la rêt metude adun di sedis sindics dal Friûl e di une schirie di entitâts e istituzions – des associazions La GrameLa Patrie dal Friûl a Radio Onde Furlane fintremai al Modul Jean Monnet MuMuCEI de Universitât dal Friûl – e inmanee cinc apontaments che a àn chê di meti in comun cognossincis e cussience in cont de situazion dal Friûl intal contest regjonâl, statâl e european e des sôs dibisugnis di autoguvier.

Lis cinc gnovis Lezions di autonomie si fasaran tal Friûl Orientâl, a S. Lurinç, e a frontaran cuistions che a tocjin la economie, la energjie, la storie des rivendicazion di autonomie tal Gurizan, la atualitât de dibisugne di autoguvier e autodeterminazion ator pe Europe, dai Paîs Catalans ae Scozie fintremai ae Corsiche, al Paîs Basc, ae Sardegne e al Friûl e lis relazions tra autonomie, democrazie e socializazion.

L’apontament al è a 6 e mieze sot sere alì de Sale consiliâr dal Municipi di S.Lurinç.
Stes puest e stes orari ancje par chês altris lezions, che si fasaràn ai 9, ai 16, ai 23 e ai 30 di Març, daûr dal program che si pues leilu achì.

Advertisements

‘Tieris Antighis, Peraulis Incjantadis’, doman presentazion a Udin tal Museu Etnografic

par_furlan_tieris_etnografic

Une biele iniziative editoriâl in lenghe furlane che e met dongje tescj di lei e di scoltâ, ilustrazions di cjalâ e di gjoldi, storiis di discuvierzi e di tornâ a contâ e altre documentazion ancjemò.
Il so titul al è Tieris Antighis, Peraulis Incjantadis e al è un progjet metût adun de bande de associazion Lenghis dal Drâc – Amîs di Onde Furlane cul jutori de ARLeF (Agjenzie Regjonâl pe lenghe Furlane).

A son trê libruts di sù par jù trente pagjinis par om che a son compagnâts di trê cds. Lis publicazions a metin in contat il Friûl, te sô fisionomie unitarie e plurâl, cun altris tieris de Europe, lant daûr di conessions che a vegnin intivadis inte narative popolâr, tai siei temis, tai siei personaçs e plui in gjenerâl te dibisugne che ducj i popui e dutis lis lenghis a àn di contâ e di contâsi. Cussì il Friûl furlan e sloven si cjate adun – e si cjale tal spieli – cul Gales, cu la Scozie e cul Paîs Basc.

Tieris Antighis, Peraulis Incjantadis al nas de colaborazion tra Carli Pup, che al à metût dongje i tescj e ju à adatâts e voltâts là che al coventave, e Guido Carrara e Lussia di Uanis, che a àn fat lis ilustrazions. Adun cun lôr, a àn lavorât su chest progjet ancje Giulia Spanghero, pe grafiche, e Aida Talliente e Michele Polo, che a àn metût a disposizion de iniziative lis lôr vôs e la lôr esperience teatrâl, par contâ chês stessis storis che si cjatin scritis e pituradis tes pagjinis dai trê libris.

etnografic

Ogni volum al ten dongje dôs contis compagnadis di une schede di profondiment che e tocje lis lenghis, i diviers teritoris e i temis de narazion. Tal prin libri, cul titul “Il re che al duar”, si cjatin une conte dal Gales, “Sot de culine dal noglâr”, e une slovene, “Il cidin dal re”. Tal secont – “Il frut scambiât” – a son lis contis “Il fi dal fari” (de Scozie) e “Il guriut curiôs e il paiant malât” (Friûl). Tal tierç, che il so titul al è “La nuvice incjantade”, a son une conte basche (“La siore dal landri) e une furlane (“Un amôr fûr di usance”).

Tieris Antighis, Peraulis Incjantadis al è un imprest che al promôf la leture e la interculturalitât e che al pues judâ la didatiche dal furlan e par furlan, stant che lis schedis che a compagnin i tescj a puedin deventâ un pont di partence. I trê libruts a vierzin lis puartis par gnovis ricercjis, par gnovis cognossincis e salacor ancje par gnovis contis, par vie che ce che si lei, che si cjale e che si scolte a sticin la curiositât di cui che al lei e in gjenerâl a fasin vignî gole di viazâ cu la fantasie, e no dome cun chê.

Il progjet al è stât pensât pai fruts di dîs agns, ma pes sôs carateristichis al è interessant un pôc par ducj, cence limits di etât. Doman, martars il Prin di Març a cinc sot sere, li dal Museu Etnografic di Udin, tal Palaç Giacomelli in Borc di Greçan, si fasarà la presentazion uficiâl inte suaze di Par furlan ator par Udin, il program di events e di iniziativis metudis dongje dal Sportel comunâl pe lenghe furlane Furlan in Comun cu la colaborazion di altris sogjets dal teritori, propit cun chê di promovi ator pe citât la lenghe furlane e la produzion culturâl contemporanie par furlan.

Udinese – Verona 2-0

fuarceudinees

Cundut de vilie, che cun chê overdose di Dacia Arena e di “derby del triveneto” (di ce????) no prometeve nuie di bon, la partide cul Verona e je lade inte maniere miôr, pal risultât e no dome par chel. L’Udin al à vinçût, ma ancjemò prime al à mostrât di vê caratar e snait, soredut cun Di Natale, tornât a zuiâ dal prin minût.

Propit la cualitât di Totò e à fat la diference tra l’Udin e il Verona, là che Toni e Pazzini a son stâts grîs e smamîts. Cussì chê che e jere une disfide decisive par dutis dôs lis scuadris – cui blancs e neris che a son stâts protagoniscj di un periodat e a scugnivin fâ un scat par no sbrissâ ad in plen te zone retrocession e i veronês di Delneri, che tes ultimis setemanis a vevin metût dongje diviers risultâts positîfs, e a vevin chê di provâ ancjemò a tirâsi fûr de code de classifiche – e je finude benon pe scuadre furlane e mâl pe formazion dal alenadôr di Aquilee.

L’Udin al scree la partide cun determinazion, sburtade di Badu e ispirade di Di Natale, che al dialoghe in maniere costrutive cun Thereau e cun Bruno Fernandes, intant che il Verona al cîr di tignî bot e al prove a vierzisi cualchi spazi su la corsie di drete, rivant des bandis di Karnezis cun Helander.

La prime ocasion dal Udin, dopo vincjedoi minûts, e je une iniziative di Bruno Fernandes, cun Gollini che al interven e al mande in corner. Passade la mieze ore di zûc, al rive ancje il gol di Badu, su ispirazion di Totò, che al invente e al sugjerìs ancje se la ploie no jude lis zuiadis di fin. Il Verona al prove a reagjî, ma al rive a meti dongje dome une conclusion di Pazzini, fermade di Karnezis cu la colaborazion di Adnan, e il prin timp si siere cul Udin in vantaç.

Dopo dal interval Delneri al prove a savoltâ la sô scuadre: al lasse fûr Siligardi par Romulo e dopo dîs minûts al cambie ancje Pazzini cun Rebic. L’Udin no si scompon e si fâs compagnâ indenant ancjemò de bande di Di Natale, che al gjestìs inte maniere miôr un cross di Piris e al met Thereau tes cundizions di segnâ il doi a zero. Totò al è ancjemò protagonist tant che sugjeridôr plui indenant, prime di jessi cambiât cun Zapata e di ricevi une standing ovation plui che meretade, e po al torne in sene Karnezis che al interven sui ultins tentatîfs veronês. E la partide e finìs doi a zero.

La classifiche e fâs mancul pôre. Sperìn che nol sedi dome un episodi, ma che si vedi continuitât di risultâts e incressite dal zûc, che al varès di jessi alc di plui des invenzion dal cjapitani Totò (par intant: mancul mâl che a son chês…).

Zornade Furlane dai Dirits (27.02.2016). Su Onde Furlane storie, memorie, atualitât e avignî

lengate1

Doman e je sabide ai 27 di Fevrâr.  Cemût che o vin za ricuardât tal nestri blog chê di doman e je une zornade particolâr. Cun di fat  al cole l’inovâl de Joibe Grasse dal 1511, il riviel popolâr che al sclopà a Udin e che si slargjâ inte plui part de Patrie.

Chel fat storic al è une vore impuartant, parcè che al è un dai tancj moments là che il popul furlan al à mostrât dignitât, personalitât e cussience di se, in particolâr pe difese dai “dirits antîc” des comunitâts rurâls. Par chel, di passe dîs agns, par iniziative di Radio Onde Furlane, chê ricorence e je deventade la Zornade Furlane dai Dirits.

JoibeGrasse1511

Ancje chest an, cun chê di memoreâ la “Zornade”, juste sabide ai 27 di Fevrâr , la “radio libare dai furlans” e met dongje une programazion di pueste, cun intervistis, aprofondiments tematics, testemoneancis, leturis e rubrichis specifichis.
Il prin apontament al è a nûf a matine cuntune pontade speciâl di Dret e Ledrôs, par cure di Mauro Missana, là che si fevelarà des mobilitazions e des resistencis teritoriâls, ambientâls e linguistichis dal Friûl, cui intervents di Massimo Morettuzzo, Diego Navarria, Lorenzo Fabbro, Aldevis Tibaldi e Mario Anzil.
Vie pe buinore – e po in repliche sot sere a tacâ di cinc e mieze – a saran ancje Babêl Europe, la rubriche su musiche, dirits e minorancis par cure di Marco Stolfo, e lis convesazions cun Giorgio Cavallo e Adrian Cescje che a fevelaran dai lôr libris Ripensare la nazione e Memoriis di politiche linguistiche.

microfonROF

I dirits in musiche a saran tra i protagoniscj dal dopodimsdì, cu lis selezions musicâls di Carli Pup (Irrintzi, a misdì e mieç) e di Leo Virgili (a trê e mieze), e po ancje de serade cu la edizion speciâl di Indigo, cun Francis e Adrianus.
Cun di plui a trê e larà in onde la leture storiche de Joibe Grasse par cure di Barbara Minen e di cuatri e mieze Carli Pup e Pauli Cantarut a fevelaran dai dirits linguistics dai slovens e dai todescs dal Friûl cun Antonio Banchig e cun Alfredo Sandrini.

Onde Furlane si pues scoltâle sui 90 Mhz te plui part dal Friûl, sui 90.2 Mhz in Cjargne e in direte web ae direzion www.ondefurlane.eu in dut il mont. Si pues scoltâle dapardut ancje su smartphone, tablet, iPhone e iPad cu la aplicazion di pueste di discjamâ de rêt.

Babêl Europe di vuê: Zornade de lenghe mari, gnovis dal Paîs Basc e ‘Nazioni e Regioni’

mconak

Vuê al è martars e al è une altre volte timp di Babêl Europe, il program cuindisinâl dedicât a lenghis, musichis e nazions cence stât, che si pues scoltâlu in direte a 11 su Radio Onde Furlane.

La cuarte pontade dal 2016, che e vignarà trasmetude ancje doman, miercus ai 24 di Fevrâr, a une dopomisdì, e cjape dentri novitâts discografichis dal Paîs Basc e de Bretagne e musiche slovene, catalane e francoprovençâl tra la Val di Aoste, il Piemont e i doi paîs di Faeto e di Celle di San Vito in Pulie.

Si fevelarà ancje di Zornade internazionâl de lenghe mari e dai contignûts dal numar 6 de riviste Nazioni e regioni. Studi e ricerche sulla comunità immaginata.

NeRe-la une-6-2015

Il dopli apontament al è in modulazion di frecuence (sui 90 Mhz te plui part dal Friûl e sui 90.2 Mhz in Cjargne) e in rêt, ae direzion www.ondefurlane.eu.

Simpri sul sît de radio libare dai furlans si pues tornâ a scoltâ ancje chês altris trasmissions di Babêl Europe, a tacâ di chê che e je lade in onde cuindis dîs indaûr, dedicade al Carnavâl.

Pieter_Bruegel_the_Elder_-_The_Tower_of_Babel_Rotterdam

 

Genoa – Udinese 2-1

udin_neri

I efiets de maledizion dal non  Dacia Arena si viodin ancje a Gjenue, là che l’Udin al à zuiât pôc e avonde mâl e al à pierdût, par sigûr in maniere meretade, ma salacor ancje cuntun tic di sfighe, stant che juste tal ultin minût di zûc Di Natale si faseve parâ un rigôr decisîf pe definizion dal risultât finâl.

Se chê di îr e veve di jessi la partide de veretât in cont des cundizions de scuadre e de sô situazion inte classifiche, par vie che il Genoa inte graduatorie al jere ancjemò plui indaûr dai blancs e neris, nol è nuie ce dî: la scuadre di balon furlane e je malon e e scugne dâsi une biele sveade pes prossimis dôs partidis cuintri dal Verona e dal Frosinone.

Che lis robis no ledin nuie ben lu à confermât ancje Giampaolo Pozzo cu lis sôs declarazions ae fin de partide – ma isal pussibil rindisi cont che la preparazion e i alenaments no son fats ben dome ae fin di Fevrâr? – e si lu viôt sù par jù in dutis lis partidis: zuiadôrs smonâts, turnover che no si rive a capîlu, zûc che par vuiodilu si à di fâ compagn di Diogjen. E se l’Inter nol ves vinçût cu la Sampdoria, la posizion in classifiche dal Udin  e sarès ancjemò piês za di cumò.

Par intant, la partide di îr e à mostrât dôs scuadris sù par jù ta chê stesse situazion che a àn reagjît in maniere diferente. Il Genoa al à fat il paron di cjase dal prin al ultin minût, cun soference, cui siei limits, ma cuntune cierte continuitât. L’Udin al à tignût bot dome par un timp, massime par merit di Karnezis, che te prime frazion al pare dut ce che al à di parâ e intune ocasion, suntun tîr di Cerci, si fâs judâ ancje di un pâl.

I blancs e neris a àn rivât ancje e passâ in vantaç, cuant che pe prime volte si àn cjatât a rivâ a tirâ in puarte: punizion di potence di Adnan, erôr di Perin e gol. Ma che ce che a vevin fat fintremai in  chel moment nol fos avonde al jere une vore clâr. Cun di fat, cjapât il gol, i gjenoans a provavin daurman a dreçâ la partide cun Matavz: mancul mâl che Piris i meteve un blec.

L’atacant sloven al jere protagonist – dome parziâl, par fortune – ancje sul imprin dal secont timp. Cussì il Genoa al provave a sburtâ, però nol rivave a jessi pardabon pericolôs e a un ciert pont l’Udin al tornave a fâsi viodi in atac e al leve dongje dal doi a zero cun Badu.

Magari cussì no ai gjenoans une man – al è propit il câs di dîlu – ur e dave Zapata che al tocjave in maniere iregolâr un balon te aree blancje e nere e al obleave Gervasoni a sivilâ il rigôr: tîr di Cerci e un a un.
La rivade de paritât e jere aiar bon pes velis dai gjenoans, che si puartavin ancjemò indenant, des bandis di Karnezis. Il puartîr blanc e neri al fermave une conclusion di fûr di De Maio, ma nol rivave a sierâ la puarte denant de corezion curte di Laxalt. E al jere doi a un.

In chestis cundizions, Colantuono al à zuiât la cjarte di Natale, in cjamp tal ultin cuart di ore al puest di Guilherme. Totò al rivave a dâ cualitât e sostance ae sô scuadre, ma al pierdeve la ocasion dal doi a doi propit ae fin de partide: fal di Izzo su Thereau, sivilade di Gervasoni, balon sul discut e… parade di Perin.

Zornade internazionâl de lenghe mari. Ocjo al «monalinguismo»!

lengate

Îr e jere la Zornade Internazionâl de Lenghe Mari.
Ancje chest an o ricuardìn cheste ricorence impuartante, ancje se une dì dopo de date uficiâl.
E je une cuistion che nus tocje ducj e che e vâl ducj i dîs e no dome ai 21 di Fevrâr.
Par chel o recuperìn un articul cjatât tal blog di Euro Furlan, che al è stât publicât doi agns indaûr, ma che par sigûr al vâl ancje in dì di vuê.

EURO FURLAN

A tacâ dal 2000 chê dai 21 di Fevrâr e je la Zornade internazionâl de lenghe mari.

Cheste ricorence e je stade proclamade de bande de Conference Gjenerâl de UNESCO ae fin dal 1999. Il so intindiment al è chel di promovi il valôr de diversitât linguistiche e il dirit di doprâ la lenghe proprie.

La impuartance de cuistion e salte fûr ad in plen de date sielzude de UNESCO, a pro des lenghis e dal dirit ae lenghe. Cun di fat, ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
In chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

Magari cussì no, si…

View original post 149 more words

Udinese – Bologna 0-1

udin_neri
Chel che al jere un suspiet cualchi setemane indaûr cumò al è alc di sigûr: se si continue a clamâ il Stadi Friûl Dacia Arena, al è pardabon dificil pal Udin vinci une partide in cjase. Lu à mostrât ad in plen la partide di îr, cul Udin che cuintri dal Bologna al cjapât un pâl, al à straçât une ocasion di aur e al à pierdût.

Dopo trê patis, une in cjase e dôs fûr, l’Udin al à provât a vinci, ma  par vie dal caratar e dal snait de scuadre di Bologne, dal câl de sô atenzion e de sô determinazion e di une buine dose di sfighe, che al è avonde clâr di dulà che e rive, la partide e je lade a finî intune altre maniere: un gol cjapât, nissun fat e nuie ponts gnûfs.

Il prin timp al è ecuilibrât e avonde plasevul, cundut che, ancje par vie de ploie, a son diviers erôrs sei une bande che di chê altre. La prime ocasion, almancul in teorie, e je pal Udin, cuntun biel sugjeriment di Thereau a pro di Matos, che però nol rive a tocjâ la bale.
I blancs e neris a son ancjemò plui pericolôs plui indenant, cun Thereau che al fâs un assist par Kuzmanovic, che al tire cul cjâf e al oblee Da Costa a meti un blec cuntune une biele paradone, intant che Armero nol rive a fâ compagn che cul Milan.

La partide e rive al interval cence goi, ancje parcè che une punizion di Destro e ven neutralizade di Karnezis, Mounier al cjape un pâl e Thereau al ricêf un biel cross di Hallfredsson ma al tire fûr bersai. Il risultât parziâl al somee chel just, sei pal numar di ocasions di gol che pal zûc costruît di Lodi e di Diawara e pal bon dinamisim dai blancs e neris Hallfredsson, Matos e Kuzmanovic e dai bolognês Destro, Giaccherini, Donsah e Mounier.

Te seconde frazion il Bologna al incrès la sô pression ofensive, intant che l’Udin al patìs la iniziative dai aversaris, nol rive a sburtâ indenant e al scugne sierâsi in difese.
I ospits a vuadagnin spazi te fasse mezane cun Donsah e Diawara, ma a fasin confusion tal moment di sierâ lis azions des bandis di Karnezis. Cun chê di dâi plui fuarce ae scuadre di balon furlane, Colantuono al cambie Matos cun Zapata e la sielte e puarte cualchi risultât, par vie che i ospits a pierdin teren e a ridusin l’impat des lôr azions e Thereau al va une vore dongje al gol cuntun tîr che al fâs la barbe al pâl.

Cuatri minûts plui tart de ocasion pierdude pai furlans, al rive il gol di Destro, che al mande in tilt Danilo e Herteaux e al tire a colp sigûr. A chel pont l’Udin al va al atac cun determinazion e cun disperazion.
Colantuono al zuie la cjarte Di Natale, cun Totò che al jentre al puest di Thereau. Donadoni al rispuint cu la jentrade in cjamp di Floccari e lu mande a scombati dongje di Destro, cun chê di mostrâ di no vê pôre de reazion dai parons di cjase.

Il cûr dal tecnic dal Bologna al ven premiât, parcè che la sô scuadre no rive a cumbinâ masse indenant ma e ten bot indaûr, ancje cuntune buine dose di fortune: Felipe al cjape il pâl, Zapata si mangje un gol e i ros e blu a puartin a cjase ducj i trê i ponts a disposizion.

Lenghis e dirits in musiche, apontament usgnot a Tsanuch – Chianocco

12_12

Al va indenant il tour di 12 canti per 12 lingue, il progjet metût adun za un pôc di timp indaûr de bande de Chambra d’Òc, cun chê di promovi la cognossince des minorancis linguistichis storichis, des lôr lenghis, des lôr culturis e de leç 482/1999, che e varès di garantî la tutele di lenghis, culturis e dirits.

Usgnot il recital didatic e promozionâl par cure di Dario Anghilante, Flavio Giacchero, Luca Peluc Pellegrino e Marzia Rey, che al cjape dentri lis lenghis dai albanês, dai catalans, dai todescs, dai grêcs, dai slovens, dai cravuâts, dai francês, dai francoprovençâi, dai furlans, dai ladins, dai ocitans e dai sarts dal Stât talian, al vignarà presenât a Tsanuch – Chianocco, te part francoprovençâl de Val di Susa.

L’apontament, inmaneât de bande de Tsambra Francoprovensal e Chambra d’Òc, al è a 9 li dal asîl Don Barella.

‘Bêçs furlans, Monede di Buie’, su Onde Furlane si fevele di economie e di finance

money

Un program radiofonic al servizi des personis, tant che citadins, consumadôrs e sparagnadôrs. E je cheste la definizion pussibile Bêçs furlans, Monede di Buie, la rubriche cuindisinâl di educazion finanziarie che za di un pâr di mês e fâs part dal palinsest di Radio Onde Furlane.

L’apontament – une setemane sì e une no – al è pal martars a buinore a 10.30 e al è une occasion par ducj par cognossi e par capî la economie e la finance, massime cun chê di indreçâ cun coerente e cun cussience lis sieltis di consum, di sparagn e di invistiment.

Bêçs furlans, Monede di Buie e ven curade e condusude de bande di Manlio Zuliani, consulent finanziari, che al cognòs i diviers aspiets de cuistion, tra teorie e pratiche, tra storie e atualitât.

In ogni pontade, daûr des domandis di Pauli Cantarut, Zuliani al presente une panoramiche de situazion, cun coments su la atualitât in gjenerâl e cun aprofondiments specifics in cont des tipologjiis dai prodots finanziaris e des sieltis di sparagn e di invistiment.

«La trasmission – al conte Zuliani – e à chê di dâ informazions su lis tendincis gjenerâl de economie e de finance, su la fonde des ultimis gnovis, e duncje di d luce delle ultime novità, e di meti dongje cognossincis e indicazions operativis. Si partìs de diference di fonde tra invistiment e speculazion par rivâ ae identificazion di ce che si à di cjalâ tes diviersis propuestis di invistiment, cuâi che a son i difiets e i elements di ambiguitât dai prodots finanziaris e cuâi i caratars positîfs».

Te pontade di Bêçs furlans, Monede di Buie di martars ai 9 di Fevrâr, par esempli, si fevelarà di bancjis, di deflazion, di credit e di licuiditât.

Onde Furlane si pues scoltâle in modulazion di frecuence (90 Mhz pe plui part dal Friûl e  90.2 Mhz in Cjargne) e su internet ae direzion www.ondefurlane.eu.

Onde Furlane si pues scoltâle ancje cul smartphone, cul tablet, cul iPhone e cul iPad cuntune aplicazion specifiche, che si cjate in rêt e che si pues discjamâle sore nuie.