+SKlet/XtremeTV, il sport e il teritori si discuvierzin par furlan

06_xtreme

Si clame +sKlet/XtremeTV e al è un progjet audiovisîf ‘par furlan’ che al salte fûr di chê farie creative simpri in moviment che e je la cooperative Informazione Friulana, la societât editore di Radio Onde Furlane.

A son cinc pontadis che a compagnin il public intun viaç inmagant a torzeon tra lis ativitâts sportivis plui origjinâls che si pues praticâlis in puescj particolârs dal Friûl, des monts ae marine.
Lis cinc dissiplinis presentadis a son caraterizadis di une imersion totâl tal ambient naturâl e de esplorazion di lûcs dulà che pues rivâ dome in cheste maniere: cul Canyoning, cul Downhill, cul Kayak di mâr, cul Kite-surf e cul Paramotôr.

Ogni pontade si siere cu la discuvierte di un setôr particolâr de ospitalitât turistiche, simpri caraterizât in tiermins culturâi, ambientâi e teritoriâi.

La serie di +sKlet/XtremeTV e je stade realizade di Giorgio Cantoni, cul contribût de ARLeF (Agjenzie Regjonâl pe Lenghe Furlane). In chel istès e je une biele produzion audiovisive par furlan, un biel prodot di cjalâ par television, al cine o in internet, caraterizât di un lengaç visîf dinamic e svelt, e une sorte di campagne promozionâl de partiche sportive, de sostignibilitât ambientâl e di un turisim di cualitât.

A tacâ di cheste domenie +sKlet/XtremeTV al jentre te programazion televisive regjonâl di Rai 3 e Rai 3 Bis. Lis cinc pontadis di a laran in onde su Rai 3 a difusion regjonâl la domenie a 9.45 ancje ai 28 di Jugn, ai 5 di Lui, 12 di Lui e ai 19 di Lui. Cun di plui a saran mandadis in repliche su Rai 3 Bis, Canâl 103 dal Digjitâl Terestri, il miercus di sere, dopo di Alpe Adria Magazine che al tache a 9.10, ai 24 di Jugn, il 1n di Lui, ai 8 di Lui, ai 15 di Lui e ai 22 di Lui.

Ancje cui che nol è a stâ in Friûl al pues viodi almancul une cerce di cheste serie achì.

Advertisements

«Mi ven di reading», ai 18 di Jugn il “Premi S. Simon” al rive a Udin

cover_mizzau

Ancjemò leterature, ancjemò alì de Biblioteche “Joppi” e ancjemò PAR FURLAN ATOR PAR UDIN. Dopo de scree dai 5 di Jugn, cu la presentazion dal numar 25 de riviste leterarie ‘La Comugne’ che e je deventade une ocasion di confront public in cont di scriture e di editorie, la manifestazion inmaneade de bande dal Sportel pe lenghe furlane dal Comun di Udin – Furlan in Comun, e fâs indenant une sorte di zimulament cul concors leterari plui impuartant par furlan, il Premi S. Simon.

Joibe ai 18 di Jugn a tacâ di 6 sot sere alì de Sale Corgnali de Sezion moderne de Biblioteche “V. Joppi” (vie Bartolini 5, Udin), propit dentri dal program di PAR FURLAN ATOR PAR UDIN si fâs l’ultin incuintri di “Mi ven di reading”, serie di apontaments che a tocjin la leterature par furlan e che a àn chê di promovi ancje la edizion di chest an dal premi S.Simon, stant che la scjadince par partecipâ e je chê dai 30 di Jugn.
Dopo di Spilimberc, di Tumieç, di Codroip, di Cjarlins e di Cividât, l’itinerari dedicât ai autôrs finaliscj de edizion dal 2014 dal concors codroipin, aes lôr oparis e plui in gjenerâl ae scriture creative par furlan al rive te “Capitâl dal Friûl”, cun Tarcisio Mizzau, autôr di Speriments di perfezion (Forum, 2014), il romanç che al à vinçût il San Simon l’an passât.

Mizzau al sarà intervistât di Walter Tomada, gjornalist e studiôs de leterature furlane, intant che il scritôr Carlo Tolazzi al leiarà parts dal test de opare che e je stade premiade.
PAR FURLAN ATOR PAR UDIN al cjape dentri sei presentazions di publicazions e di oparis audiovisivis, teatrâls e multimediâls, che incuintris tematics (leterature, musiche, art, cine, creativitât dai zovins, narative pai fruts, leturis publichis…) che si davuelzin alì des sedis de Biblioteche “V. Joppi” o in altris spazis de citât.

Altris informazions in cont de iniziative si cjatin achì.

reading

Sport e solidarietât, «furlan pride» a Turin

turin_lamoleantoneliane

Nol è mai masse tart par pandi un pôc di chel che plui di cualchidun al clame «furlan pride».
La setemane stade a Turin o vin vudis almancul dôs ocasions par fâlu e cumò, ancje se e je passade za cualchi zornade, o podìn dâ cont di cheste braùre furlane ancje tal nestri blog.

Nepal_462b

Il prin apontament al è stât chel di Joibe stade, ai 11 di Jugn, alì dal Teatro Regio cuntune biele serade di musiche e di solidarietât par tirâ dongje risorsis a pro dal Nepal, che al à patît lis scjassadis distrutivis dal taramot dai 25 di Avrîl, e in particolâr a pro dal progjet de onlus Friuli Mandi Nepal Namasté pe costruzion des aulis de Mahendrodaya School di Mulpani, tal distret di Dhading.

TurinAssoluTOspade

La seconde ocasion e je rivade dai Campionâts talians di scrime, che si son davuelts a Turin – li dal PalaRuffini – dai 12 ai 15 di Jugn.
Tes competizions individuâls i risultâts plui impuartants a son chei des atletis furlanis di spade: Mara Navarria di Cjarlins e je rivade seconde, dopo vê scombatût fin tal ultin cuintri de campionesse mondiâl Rossella Fiamingo, che cussì e à cjapât ancje il titul talian, intant che Giulia Rizzi di Udin e je rivade al tierç puest.
Medaiis ancje tes competizions a scuadris: aur te spade pe scuadre dal Esercit là che e je Mara Navarria e arint te sable pe formazion che e cjape dentri sô sûr Caterina.

Montreux _une_bandiere_par_ducj

Il numar 25 de ‘La Comugne’ al scree ‘Par furlan ator par Udin’

la_comugne_25

Al è timp di PAR FURLAN ATOR PAR UDIN, une schirie di apontaments che si davuelzin ator pe Capitâl dal Friûl cun chê di promovi la lenghe furlane e la produzion culturâl contemporanie par furlan.
Il prin incuintri al è vinars ai 5 di Jugn a 6 sot sere alì de Sale Corgnali de Biblioteche Civiche ‘V. Joppi’, là che si fevelarà di scriture e di leture par furlan, cu la presentazion dal n. 25 de riviste leterarie La Comugne.

La publicazion, dade fûr de KappaVu, di sù par jù vincj agns e je une vere e proprie palestre di scriture creative e un pont di riferiment par cui che al scrîf e par cui che al lei par furlan.
I contignûts de gnove jessude de La Comugne a vignaran presentâts di Paolo Cantarutti, coordenadôr editoriâl de riviste, adun cui scritôrs Raffaele Serafini e Giacomo Trevisan e cul fotograf Marco Cuoco.
L’incuintri, cemût che al salte fûr ancje dal so titul, ‘Furlan di scrivi e di lei’, al sarà une ocasion par fâ un resonament plui larc in cont de scriture, de leture e de editorie par furlan, ancje in graciis de partecipazion di Walter Tomada, gjornalist, scritôr e studiôs di leterature furlane, e di Giuliano Velliscig de cjase editore KappaVu.

par_furlan_ator_par_udin

Il cartelon di PAR FURLAN ATOR PAR UDIN al cjape dentri presentazions di publicazions e oparis audiovisivis, teatrâls e multimediâls e incuintris tematics che a tocjin la art, la leterature, la musiche, il cine, la creativitât dai zovins, la narative pai fruts e alc altri ancjemò.

La manifestazion, che e je inmaneade de bande dal Sportel pe lenghe furlane dal Comun di Udin – Furlan in Comun, e vignarà ospitade tes sedis de Biblioteche ‘V. Joppi’ o in altris spazis de citât.
In ducj i câs la partecipazion e je libare e sore nuie.

Informazions in cont dal prin apontament e di dut il program si cjatin achì e achì: 050615_PAR_FURLAN_ATOR_ A4.

 

Cagliari – Udinese 4-3

udin_neri
L’Udin al piert ancje la ultime di campionât e al finìs la stagjon te cuintultime posizion a cuote cuaranteun ponts. Salacor lis brutis gnovis che a rivin dal incuintri di domenie alì dal stadi Sant’Elia a finissin achì. Prin di dut parcè che il campionât al è finût e cun chel l’aviliment des ultimis setemanis e parcè che al à vinçût il Cagliari, che al è une scuadre che nus plâs e che almancul al salude la serie A cuntun sucès. Cun di plui par vie dai siet goi segnâts intes dôs puartis – in cualchi maniere un spetacul – e parcè che si à viodût alc di gnûf in cjamp e fintremai – tal secont timp – doi zuiadôrs furlans, tant che il portîr Scuffet, che magari cussì nol à finût i siei disenûf agns inte maniere miôr, e l’atacant Pontisso, jentrât dopo dal interval al puest di Perica.

A pôcs dîs de fin dal campionât si sa za che Stramaccioni nol sarà plui l’alenadôr dal Udin e che il so puest lu cjaparà Colantuono. La gnove de fin dal rapuart tra il tecnic roman e l’Udin e zirave tal ambient zaromai di cualchi setemane: stant che o vin viodût une scuadre masse dispes flape, difensiviste e cence zûc, chê de conclusion de ete targade Strama no nus somee une brute gnove. Nancje la rivade a Udin dal tecnic che chest an al à vuidât la scuadre che e à finût la stagjon te cuartultime posizion – la Atalanta – no nus somee alc e ce, cundut dai coments positîfs di tancj di lôr, a tacâ dal vecjo mister Galeone e dal gjornalist Xavier Jacobelli.
Probabilmentri, in ducj i doi câs, la posizion finâl in graduatorie des scuadris e dipent soredut dai zuiadôrs. Par sigûr nus tocje ameti che tal Udin di chest an lis risorsis umanis metudis tal cjamp – la plui part di lôr – no vevin dutis lis cualitâts che a coventin  (o ben no lis àn mostradis e almancul in cualchi câs la responsabilitât di chest e va ricognossude dute al alenadôr). Sperìn che pe anade che e ven la societât e meti adun une scuadre cun plui cûr, cun plui flât, cun plui gjambis, cun plui pîts e cun plui snait.

La partide di domenie stade e tache di rive sù pai blancs e neris, par vie dal infortuni patît tal prin minût di Wiedmer. Il Cagliari al somee plui in partide e la sô prime conclusion le cjate dopo dîs minûts: tîr di Joao Pedro e parade di Scuffet. Trê minûts plui indenant al rive il gol di Sau e prime de metât dal prin timp il Cagliari al fâs il bis cuntune punizion di Joao Pedro. L’Udin al rive a smiezâ lis distancis prime dal interval cuntune biele conclusion di Aguirre su assist di Bruno Fernandes. Alc al è alc.

La seconde frazion si vierç cuntune ande avonde flapute di dutis dôs lis bandis. Tal desert gjenerâl un dai miôr al è Bruno Fernandes che al met dongje ideis e cuantitât. Il timp al passe cence masse emozions e dome tai ultins vincj minûts la partide e torne a scjaldâsi, prime par merit dai sarts, cun Cop che si cjate di bessôl denant di Scuffet ma nol rive a concludi te maniere juste e po cun Mpoku che al segne il tierç gol, e po par merit dai blancs e neris, che a cjatin il doi a trê cun Bruno Fernandes. Cualchi minût plui indenant al è ancjemò lui il protagonist, ancje se magari cussì no tant che autôr di un autogol cuntun brut intervent suntun cross cence storie di Murru.  Pal Udin al segne ancjemò, te puarte juste, Thereau, che al siere te maniere miôr une triangolazion cun Pasquale, e al firme il risultât finâl.