La lenghe furlane e je vive. W la lenghe furlane!

lengate1

Il furlan al è une lenghe vive, vivarose e zovine e une risorse pe integrazion e pal disvilup di dute la comunitât regjonâl. Al è ce che al salte fûr de ricercje metude adun de Universitât dal Friûl par volontât de ARLeF, che i siei risultâts a son stâts presentâts vinars ai 22 di Mai alì dal Palaç de Regjon a Udin. Il scandai sociolinguistic al presente une fotografie inzornade sei de situazion de lenghe furlane e dal so ûs che de percezion che a àn di chê lis personis che a son a stâ in Friûl e de lôr opinion in cont de normative di tutele de minorance linguistiche furlane.

I dâts tirâts dongje vie pal 2014, suntun campion di 1005 di lôr, de bande dal grup di lavôr coordenât di Claudio Melchior, si pues confrontâju cui risultâts di altris dôs indagjins fatis tal 1977 e tal 1998 e dentri di cheste comparazion si pues vualmâ daurman un element interessant, ven a dî che e je stade ridusude la tindince a lâ al mancul dal ûs de lenghe furlane. Se si ipotizave une pierdite di sù par jù l’1% ad an dai locutôrs, cumò cheste ande e reste sot dal 0,65%.

Daûr de ricercje, tes provinciis di Gurize, Pordenon e Udin, a son 600mil di lôr chei che a doprin la lenghe furlane: in 420mil a fevelin par furlan in maniere regolâr e in 180mil lu doprin in maniere ocasionâl. A son plui dal 60% de popolazion des trê provinciis, intant che se si cjapin dentri tal cont, tant che riferiment totâl, ancje i abitants de provincie di Triest, che e je stade tignude fûr dal studi, al risulte che la lenghe furlane e je doprade de bande di sù par jù la metât de popolazion regjonâl.

Un altri element che al merete marcât, in tiermins gjenerâi, al tocje i prejudizis cuintri dal furlan, dal so ûs e de sô tutele, che a risultin jessi patrimoni (si fâs par mût di dî…) dome di une piçule minorance, che si à ridusude rispiet aes rilevazions fatis in passât. Sù par jù l’80% de popolazion des trê provinciis al è ancje a pro de esistence e de metude in vore des leçs di tutele dal furlan e de minorance linguistiche furlane: e je cheste la opinion dal 72,9% dai abitants de provincie di Pordenon, dal 75,4% de provincie di Gurize e dal 82,7% dai abitants de provincie di Udin. Chest al vûl dî che la percentuâl di chei che tes trê provinciis furlanis a declarin di calcolâ la tutele dai dirits linguistics e la promozion de lenghe furlane e dal sô ûs tant che alc di just  e je di passe l’80%. E al vûl dî che ancje tancj di chei che no lu fevelin a calcolin positive la presince di leçs e di politichis di tutele ative dal furlan.

Un dai dâts plui interessants al tocje l’ûs de lenghe furlane de bande dai plui zovins, stant che te classe di etât tra 18 e i 29 agns a declarin di fevelâ par furlan in maniere regolâr sù par jù il 36,8% di lôr: une percentuâl plui alte rispiet a chês des classis di etât di 30-39 agns (30,8%) e di 40-49 (36,7%).
Chest dât si pues calcolâlu tant che l’efiet positîf di ce che a àn fat chei che, te comunicazion, te creativitât e te agregazion dai zovins, a lavorin cu la lenghe furlane e duncje a pro de lenghe cun cûr, cun sintiment e cun professionalitât – intune peraule: cun snait – a tacâ di Radio Onde Furlane e di chei altris sogjets che si movin ator e in bande de «radio libare dai furlans».
L’impat de lôr azion al podarès jessi ancjemò plui alt se i decisôrs politics a vessin plui cognossince e plui cussience di chest lavôr e dal so valôr e duncje se si invistìs di plui e miôr a pro di chestis ativitâts. Si pues pensâ che cheste riconcuiste de lenghe e sarès ancjemò plui alte se il furlan al fos jentrât pardabon tes scuelis, passant pe puart principâl. Magari cussì no, nol è ancjemò cussì.

microfonROF

La stesse classe di etât che e segne il «sbalç culturâl» positîf de riconcuiste de lenghe e je ancje chê là che si cjate la percentuâl plui alte di chei che a disin di no rivâ a capî la lenghe furlane (ator dal 13%). Cun dut achel, in gjenerâl la lenghe furlane le capissin passe il 90% di chei che a son stâ tes trê provinciis furlanis: plui dal 83% de popolazion des provinciis di Pordenon e di Gurize e plui dal 96% di chê de provincie di Udin. Chest al vûl dî che no je justificabile la pôre di doprâ la lenghe furlane – in public, par esempli… – par vie che no si rivarès a fâsi capî di ducj.

Ancje la presince de lenghe furlane tes scuelis e je considerade positive di percentuâls maioritariis di popolazion, che a stan dentri tra il 70,6% de provincie di Udin e il 66,9% regjistrât in provincie di Gurize. A son percentuâls une vore altis, ancje se un tic plui bassis rispiet a chês rilevadis tal 1977, te seconde metât dai agns Otante e passe cuindis agns indaûr, cuant che par esempli in provincie di Udin a jerin simpri ator dal 85% chei a pro dal ûs e dal insegnament dal furlan.
Cheste flession e je stade justificade cul fat che, cu lis leçs  regjonâls 15/1996 e 29/2007 e cun chê statâl 482/1999, di sù par jù une cuindisine di agns il furlan a scuele nol è plui une rivendicazion.
Probabilmentri la cuistion e je plui complicade: cemût che a san chei che a àn i fîs a scuele in Friûl – e cemût che si pues lei ator, par esempli achì – la lenghe furlane e à citadinance plene tes scuelis dome su la cjarte ma no par sigûr in concret e duncje al pues stâi che un pôcs di lôr a sedin deludûts di cemût che a van lis robis…

Chel de scuele al è stât un setôr strategjic pe minorizazion dai furlans e dal furlan e par chel al è ancjemò plui impuartant pe lôr liberazion e pe lôr tutele. Dut chest al salte fûr ancje dai dâts de ricercje. I insegnants, in gjenerâl, a son une des categoriis che e je mancul a pro de lenghe furlane, dal so ûs e dal so insegnament tes scuelis e des politichis. Cun di plui tancj insegnants no àn competence ative e salacor nancje passive de lenghe furlane e tancj di lôr che no vuelin nancje vêlis. Nol è di ce maraveâsi, duncje, se tes scuelis, cundut dal lâ al mancul dai prejudizis cuintri dal furlan, si cjate a fuart il virus di chê che par talian e ven clamade  friulanofobia.

In cheste suaze al cjate puest ancje un rapuart biunivoc tra scuele e gjenitôrs che pal moment al disvilupe une cjadene di contradizions: cu lis fameis che a domandin il furlan a scuele e che a declarin di jessi a pro de trasmission de lenghe furlane ancje in cjase, cu la scuele che masse dispès no rispuint in maniere juste e cheste domande, cui gjenitôrs che no protestin cuintri de scuele che no ur da alc che e à di dâur a lôr e ai lôr fîs daûr des leçs e des lôr stessis richiestis e ancjemò cui gjenitôrs che, cundut des buinis intenzions, a stentin ancjemò a fevelâ par furlan cui lôr fruts.

Par tornâ al scandai sociolinguistic presentât vinars stât, al merete tornât a marcâ il fat che l’ûs de lenghe furlane al è calât – ma mancul di ce che si veve pôre che al fos – però e je cressude la cualitât di chest ûs, in tiermins sei concrets che teorics, e soredut al è cressût il status de lenghe, che la plui part de int e vûl che al sedi une lenghe normâl, di dut, ducj, par dut e par ducj. In chest sens la opinion de int e je plui indenant sei dai sorestants che dai cussì clamâts «opinion leaders».

Par chel, l’ategjament positîf in cont de lenghe furlane e des normis e des politichis di tutele, che al salte fûr de ricercje, al varès di dâi un sburt ai sorestants regjonâi – e no dome a lôr – par che si movin daurman a fâ di plui in chest cjamp che nol tocje dome la culture ma al cuvierç soredut la dimension dai dirits di citadinance e chê de oportunitât di disvilup e di integrazion. Al somee che lu vedi capît ancje la presidente de Regjon Friûl-VJ, Debora Serracchiani, che e je intervignude ae presentazion dal studi, cemût che si pues lei achì.

La conclusion dal iter di aprovazion dal Plan gjenerâl di politiche linguistiche e soredut la sô metude in vore a mostraran se al è pardabon cussì. Intant si pues zontâ ancjemò une ultime considerazion: la mancjance di politiche linguistiche che e je stade tra il 2009 e il 2013, par fortune, no à fat masse dams. Tal ultin an e mieç alc al è cambiât in miôr, ancje se mancul di ce che si spietavisi e soredut di ce che al covente. Alc al è alc, ma cumò al covente alc di plui: un scat decîs che al sedi in stât di rispuindi aes domandis de societât par compagnâ chel «sbalç culturâl» che al esist e par rinfuarcîlu viers un futûr miôr, plui furlan e duncje plui european e plui viert viers il mont e viers l’avignî.

Ducj i dâts de ricercje si cjatin achì.

Advertisements

Udinese – Sassuolo 0-1

udin_neri
Mâl e vonde. La ultime partide in cjase dal Udin e je il spieli di dut il campionât di chest an, là che la salvece e je rivade par ordin ma cuasit plui par vie dai demerits di altris che par merit dai blancs e neris, là che in masse ocasions si à viodude une scuadre smamide, flape e confondude e là che dome in cualchi ocasion – masse pocjis – al è saltât fûr alc di verementri bon, almancul daûr di une cjaladure furlane.

Ae vilie de partide cul Sassuolo si spietavisi dal Udin une prove di caratar e di personalitât, dopo de gare cun dôs musis zuiade a Rome la setemane stade e di chê pardabon negative fate in cjase cuintri de Sampdoria. Si à viodût dome alc: masse pôc par fâ risultât e masse par fâ cressi ancjemò l’aviliment.

L’Udin al scomence avonde ben, al cjape sù la iniziative e al rive ancje a rindisi pericolôs des bandis di Consigli. Al sucêt dopo cinc minûts di zûc cuntun lanç di Karnezis che Badu al stramude intun assist par Perica, ma la robe e va strucje par vie dal bon intervent di Acerbi. I ospits si difindin cun ordin e cun sintiment e a rispuindin in cuintripît, metint in moviment lis trê pontis dal lôr schiriament. La ocasion plui pericolose e rive ator de mieze ore cuntune verticalizazion di Biondini a pro di Zaza che al tire fûr bersai.

Doi minûts plui indenant Karnezis al scuen lassâ il cjamp, par vie dai efiets di un colp cjapât di Floro Flores. La sô sostituzion e je un moment impuartant sei pal batiman cjalt, sincîr e meretât che il public dai Riçs al fâs al portîr grêc, che al è stât par sigûr un dai miôrs dai blancs e neris vie par dute la stagjon, sei pal fat che cussì al à tornât a zuiâ Scuffet, che al è stât simpri in banchine dal principi dal campionât. Po e rive ancje la ocasion plui nete pai parons di cjase: corner di Kone e acrobazie di Danilo che e ven tocjade di Consigli e e va a sbati su la traverse. E prime dal interval al è Scuffet che al fâs il numar cuintri di un tîr a colp sigûr di Zaza.

Tal secont timp, il Sassuolo, che prime de polse al veve domandât un penalty par un contat tra Allan e Bernardi, calcolât dal diretôr di gare tant che une simulazion dal emilian, al frache sul acelerafôr, cuntun pâr di cumbinazions ofensivis che a marchin la diference di gjambis, di zûc e mentalitât tra il coletîf di Di Francesco e i zuiadôrs alenâts di Stramaccioni. Prime al è Zaza e po al è Floro Flores che si fasin vîfs in zone gol, intant che di chê altre bande l’inest di Di Natale al puest di Perica al puarte Totò dongje dal so gol numar 208, cuntune pinelade che e ven fermade su la linie de puarte de bande di Cannavaro.

La ocasion pierdude e segne un svolt tal davuelziment de partide, stant che par passe mieze ore l’Udin al disparìs – o cuasit – e il Sassuolo al à la pussibilitât di masanâ chês azions che a coventin  par cjapâ in man ad in plen la partide. Dopo di un intervent suspiet (cu la man?) di Pelusi te aree dai ospits, al setantesim al rive il gol che al decît la partide: cumbinazion tra Floro Flores e Berardi e servizi a pro di Manganelli, che al tire in puarte di prime intenzion e cu la sô bombe ben confezionade al rive a superâ Scuffet.
L’ultin cuart di ore al viôt ancjemo il Sassuolo protagonist des bandis di Scuffet, intant che pal Udin la croniche e regjistre dome la espulsion par dople amonizion di Guilherme.

Al mancje ancjemò une partide e po il campionât al finìs. Al vignarès di dî: finalmentri…

Roma – Udinese 2-1

udin_neri

L’Udin al prove a fâ la biele magjie di dâi un displasê ae «Maggica», al zuie cuntune determinazion che e je superiôr ae medie des sôs prestazions di chest an – magari cussì no, par chest nol covente nancje tant… – ma dopo vêur fat pôre a Totti e compagnie al va al mancul e al paie a un presit altonon un brut erôr di Widmer, dongje di patî a fuart il snait e la costance dai aversaris.

La fortune e jude chei che a son ardîts e coragjôs e cussì sù par jù ae metât dal secont timp la Rome, che ae fin de partide e varà fat in dut disevot tîrs in puarte cuntun possès di bale par doi tierçs dal timp di zûc, e cjate la strade de vitorie suntune sagre dai erôs, che a son sôs – il cross di Nainggolan nol è alc e ce – e soredut de scuadre di balon furlane, tra la buse grandonone di Herteaux e il «superliscio» di Widmer, che i lasse a Torosidis la bale di butâ dentri tal sac.
Cussì la Rome si merete il sucès e l’Udin al pues dî che al varès vût di puartâ a cjase almancul un pontut, la atenzion dai media talians e je dute sul derby roman che al deciderà il secont puest in classifiche e ai tifôs furlans ur reste il dubi se jessi braurôs pal caratar de lôr scuadre, soredut tal prin timp, o vê aviliment pai erôrs decisîfs, pal campionât flaput, pe tatiche rinunciatarie, pe posizion in graduatorie e pe pôre che l’an che al ven al sedi compagn o ancjemò piês.

Par ce che al tocje la cronache, la partide di nossere e partìs avonde ben pal Udin, stant che i romaniscj a somein imberdeâts, tra tante voie di fâ, ancjetante pôre di sbaliâ e une cierte organizazion di zûc, in clâf difensivistiche cun chê di rispuindi in cuintripît, de bande de scuadre di Stramaccioni. Denant di une Rome confondude, seneose e spauride, i blancs e neris – che a lassin Di Natale in bancjine – a rivin a segnâ dopo vincj minûts cuntune percussion di Thereau che al robe la bale a Manolas e soredut cu la corezion in puarte di Perica dal balon parât indaûr di De Sanctis.

Totti al cîr di sburtâ i siei compagns, ur dîs di no vê pôre e ur conte che a fasaran cuatri goi, ma pe plui part dal prin timp al è l’Udin a jessi plui atent e plui pericolôs: une punizion dal Pupone e cjate Karnezis tal puest just tal moment just, intant che di chê altre bande Widmer al servìs un balon golôs pal cjâf di Perica, che lu mande fûr di un et, e Allan al met la marcje juste par colpî in cuintripît. La intenzion e je buine, la realizazion dal passaç par Thereau mancul e la cuvierture su la gnove manovre romaniste e lasse masse busis viertis. Al rive cussì l’un a un: Totti al vierç par Pjanic e chel al salte Piris e al libere Nainggolan, che al cjate la strade libare par segnâ.
Ma a son ancjemò emozions, prime de polse, massime cuant che Guilherme al tire une bombe su punizion, che e lasse De Sanctis incocalît ma e sbat su la travierse.

Il secont timp si vierç sù par jù cun chê stesse ande: Udin «barricadero» daûr e pront a rispuindi di rimesse cun Thereau e Rome simpri seneose ma ancjemò un tic imbalade. Però sul plui biel che la scuadre furlane si svicine al doi a un – cun Allan che al piert il moment bon suntun assit di Thereau  – la Rome e pescje il jolly, stant che in mancul di doi minûts la bale e je inte aree dal Udin, là che e ven maltratade dal puar Widmer dut a pro di Torosidis che nol à fastidis par segnâ.

La partide si stramude e cun chê la Rome, che e cjate l’ordin e la precision che i mancjavin vie pai sù par jù sessantecinc minûts za zuiâts e che si met a costruî azions di gol bielis  e buinis, a tacâ dal colp cul tac di Nainngolan che Karnezis al mande a sbatis sul pâl e dal tiron di Holebas, che al cjape la travierse.
L’Udin si eclisse, nol rive a reagjî e al reste in zenoglon, cul displasê di vê paiât cjars doi bruts erôrs – soredut chel che al devente il secont gol romanist – e forsit cu la braùre di vêi fat pôre a chê che e je la seconde fuarce dal campionât.

Di InediTo a EdiTo, Mattiuzza al torne al Salon dal libri di Turin

maurizio-mattiuzza

E je tacade la edizion 2015 dal Salon internazionâl dal Libri di Turin. Ancje chest an alì dal Lingotto une des nestris ativitâts preferidis e je chê di lâ a cirî alc di bon e di furlan. Magari cussì no – e su chest si cjatìn in cunvigne cun ce che al diseve îr in cont dal argoment Massimiliano Santarossa a Radio Onde Furlane – cheste ricercje no rive a jonzi grancj risultâts, stant che o pensìn che si podarès viodi tant di plui di ce che al nas intun teritori cussì siôr di creativitât, di diversitât linguistiche e culturâl, di int che e scrîf e di int che e lei. Cun dut achel, o podìn dî cun plasê che nol è propit il desert e che anzit tal program dal Salon si rive a cjatâ alc di interessant ancje cun cheste cjaladure.

Al è par sigûr il câs dal apontament di vuê, ai 16 di Mai, a misdì alì dal spazi de Regjon Piemont te Sala Argento, là che al vignarà presentât il gnûf libri dal poete e scritôr furlan e babelic, Maurizio Mattiuzza, dal titul La Donna del Chiosco sul Po.
Nol è un câs che cheste publicazion e vegni screade propit achì, stant che propit cuntune selezion des poesiis che si cjatin cumò dentri di chest libri Mattiuzza al veve vinçût la edizion dal an passât dal concors leterari InediTo – premio Colline di Torino e la stesse publicazion e va daûr di chê vitorie. Cun di plui, cun altris tocs di cheste ricuelte il poete e scritôr, za esponent dal grup poetic dai Trastolons e di cuasit vincj agns incà autôr di viers e di tescj biei di lei e plens di significât, par furlan, par talian o tal dialet de Valsugana, al jere rivât in finâl tal Premi Mario Soldati, cemût che o vevin contât in chê ocasion.

Chê dal Lingotto no je la uniche ocasion par viodi e sintî Mattiuzza di chestis bandis cul so gnûf libri. Cun di fat une altre presentazion le fasarà usgnot a vot sot sere in place Umberto I a Chieri, dentri dal program dal Salone OFF e dongje de premiazion de edizion di chest an di InediTo – premio Colline di Torino.

‘La Donna del Chiosco sul Po’ e conferme la fuarce narative e evocative de scriture sute, minimaliste e in chel stes visionarie di Maurizio Mattiuzza. Dentri dal libri, i viers dal autôr, che a son par furlan o par talian o tal dialet de Valsugane, a cjapin sù ancje une vieste asturiane e slovene cu lis traduzions di Martin Lopez Vega e di Jolka Milič.

La gnove publicazion e rive dopo des racueltis ‘La cjase sul ôr’, ‘L’inutile necessitâ(t)’ e ‘Gli alberi di argan’ e di altris progjets che a tocjin la scriture, la leture e la musiche, par esempli tal disc ‘Tiere Nere’ fat cun Lino Straulino.

La Zornade de Europe pe Europe di ducj e di ducj i dîs

europe

Sabide stade a jerin i 9 di Mai. E je une date impuartantone, stant che e je chê dal inovâl de innomendade “Declarazion Schuman” e par chel, a tacâ dal 1985, e je memeoreade tant che “Zornade” o “Fieste” de Europe.
Cun di fat, in chê dì dal 1950 il ministri pai afârs forescj dal Stât francês di in chê volte, Robert Schuman, al fasè un discors public a Parîs che al tocjeve la pâs e la Europe e in cualchi maniere cu lis sôs peraulis al invià chel procès che, pûr cun cetantis contradizions, al è ancjemò in vore in dì di vuê: il procès de integrazion europeane.
In cont de impuartance e de atualitât de “Declarazion” us conseìn di lei doi articui: un che al è saltât fûr cualchi zornade indaûr  e un altri, publicât l’an passât, che al tocje ancje il Friûl tant che part de Europe.

Di trente agns incà cheste zornade e ven memoreade un pôc dapardut cun chê di marcâ la impuartance de prospetive de unitât europeane. Magari cussì no, al sucêt avonde dispès che l’argoment al vegni frontât cun tante retoriche e cun pocje sostance. Al sucêt ancje alc altri, par fortune, e chel inovâl al devente une ocasion par moments di aprofondiment in cont de situazion de Europe, chê che e je e chê che e mancje.

Un di chescj al è l’incuintri che si davuelç ai 12 di Mai a Turin alì dal Campus Einaudi de Universitât, in Lungo Dora Siena 100.
Inmaneade de bande de riviste Europae  e dal Centro studi sul federalismo
di Moncalieri, la zornade e à tant che titul Ucraina al bivio. Quale sovranità ai confini di quale Europa?.

La crisi ucraine e je une des tantis cuistions viertis che tai ultins agns, di une bande, a son motîf di preocupazion ator pe Europe e, di chê altre, a palesin propit i limits e lis contradizions dal  procès de integrazion europeane e a marchin la dibisugne di vê une Europe plui unide e duncje plui Europe. Sul argoment,  frontât propit cun chê di cjalâ in muse la realtât de Europe tal so complès,  si pues tornâ a lei ancje un articul saltât fûr un an e mieç indaûr.

Une altre cuistion, une vore di atualitât, che si pues calcolâle tant che un altri spieli des contradizions de Europe dai ultins agns, e je chê che si palese ogni dì tal cûr dal Mediterani, cun tancj di lôr che a scjampin des vueris e de fam, cun chei che a speculin su cheste dibisugne di scjampâ e di lâ inaltrò a cirî fortune e cun chei che no àn ancjemò capît ben ce che a àn di fâ denant di cheste situazion.
Ancje su chest argoment o zontìn un articul di lei.

Cui auguris in ritart pe Fieste de Europe. E, cence limits di datis, a pro di une Europe «plui Europe» ducj i dîs. E par ducj.

Udinese – Sampdoria 1-4

udin_neri
Cuatri patafs. L’Udin in cjase al zuie pôc e mâl e i permet ae Sampdoria di jessî fûr dal Stadi Friûl cuntune vitorie meretade e preseose. Si pues strucâ cun chestis peraulis la partide di îr che e je stade biele dome par une des dôs formazions.

Di une bande e je la scuadre di Stramaccioni, che no à ni snait, ni zûc e ancjemò mancul motivazions  – cun dut che fâ une biel epartide in cjase in continuitât cu lis ultimis discretis prestazions al varès di jessi za avonde…o no? – e di chê altre si cjate chê di Mihalovic, che e à une voie mostre di saltâ fûr di un pocjis di ‘zornadis no’ e duncje di rivâ ancjemò a grampâsi a un dai vagons dal tren che al puarte te Europa League.

Che la situazion e sedi cheste si lu viôt a clâr za tal prin timp. In principi dutis dôs lis contendentis a àn une ande calme se no flape, po cul passâ dal timp i ospits a cressin chel pôc che al covente par cjatâ scuasit par câs il gol che al vierç la liste des segnaduris: Guilherme al pastroce e la iniziative di Wzosek e devente un gol par Soriano.
Ben sierade daûr e vivarose ce che al covente denant, la Samp no si scompon denant dei tentatîfs une vore limitâts dal Udin di imbastì un straç di azion – Nuie Allan… nuie zûc, compagn di chel innomenât aperitîf che, cence di chel, no jere fieste! – e la uniche conclusion de scuadre di balon furlane e je chê di Kone.

Tal secont timp si spietisi une reazion blancje e nere. Impen a son i ospits chei che a cjapin sù la iniziative: Muriel al cor intune maniere che no lu vevin mai viodût cuant che al jere tal Udin, Soriano al fâs ancjemò miôr e Duncan si svicine al doi a zero cuntune conclusion che finìs sul pâl.
L’Udin, che si salve cun Domizzi suntune altre conclusion di Muriel, si fâs viodi un pôc plui indenant, finalmentri: Thereau, che al à cjapât il puest de fantasime di non Geijo, al segne un gol – anulât par vie di un fûr zûc une vore discutibil di Aguirre – e Widmer al cjape un pâl.

Alc al è alc e nuie  al è nuie, ma chel alc che al fâs l’Udin al è masse pôc rispiet a ce che e cumbine la Samp, che si zove ancje de energjie gnove che e rive de jentrade tal cjamp di Djordjevic, e cjate daurman la strade pal secont gol di Soriano e po pal tierç, firmât di Acquah.

L’onôr blanc e neri al ven salvât de bande di Di Natale – protagonist de fieste fate prime de partide pai siei 206 goi in Serie A – che al alce ancjemò la aste dal so record personâl, rivant a cuote 207,  cuntun tîr dai undis metris ben plaçât daûr di Viviano.

Magari cussì no, al è masse pôc. Prime de fin de partide lu conferme ancjemò la Samp, che cuntune conclusion di Duncan e fâs il so poker.

 

I.BI.S., ai 9 di Mai a Udin il cuart incuintri su plurilinguisim e integrazion

IBISweb

Cognossi dôs lenghis al è miôr che cognossi une sole e cognossi trê al è miôr ancjemò.
Chest al vâl par ducj – furlans, slovens, talians e polacs… – e in ogni dontri:  a Turin, in Friûl e in  cualsisedi altri puest.

In cont dal plurilinguisim al va indenant a Udin il progjet I.BI.S., metût adun de associazions dai polacs in Friûl, Polonik, cu la colaborazion di tancj di lôr (tra chescj e je ancje la nestre associazion) e ancje cul patrocini de ARLeF (Agjenzie Regjonâl pe Lenghe Furlane) e dal Comun di Udin.

Dopo de tierce lezion-conference dal program fate ai 11 di Avrîl, vie pal mês di Mai a son ancjemò doi apontaments. Chel di sabide ai 9 di Mai al tocjarà il rapuart tra bilinguisim e lengaç dal cuarp e al vignarà condusût de bande di Massimiliano Godeassi.

Dutis lis informazions si cjatin achì.

Musiche Babeliche Fuarte di scoltâ e di viodi

sabersysteme

A son bielis gnovis chês che a rivin dal mont de musiche cjantade tes lenghis minorizadis – ma resistentis – de Europe.

Joibe ai 30 di Avrîl a Nashville (Tennessee – USA) e je stade dade fûr la liste dai vincidôrs e dai segnalâts inte edizion 2014 dal International Songwriting Competition.
Tra chescj a son ancje i Saber Système, zovinuts di Poranh, parincj – e no dome in tiermins musicâi – dai Gai Saber, che a àn vût une menzon speciâl te sezion world music cuntun toc dal titul La Libertat, une cjançon che e met dongje eletroniche, rock e sugjestions che a rivin de tradizion des tieris d’Óc cuntun test là che si incorsin l’ocitan, il spagnûl e il francês.

La gnove e je stade dade fûr îr su Onde Furlane inte gnove pontade di Babêl Europe, che si pues scoltâle ancje vuê in repliche a une dopo di misdì, no dome sui 90 Mhz in Friûl ma ancje in rêt
e cu la gnove App, e di doman indenant ancje tal archivi web de radio libare dai furlans.

Copertina video nino-204eb93fc2

Une altre segnalazion, che o cjapìn sù simpri di Babêl Europe, e je chê dal gnûf singul dai sarts Ratapignata.
il so titul al è Nino (Su mali connotu) e al è un omaç ae figure di Antonio Gramsci in forme di cjançon rocksteady, che al è compagnât ancje di un biel video, zirât tra Abas, Casteddu e Turin de bande dai nestri amîs di Eja TV.

E simpri in cont di musiche e lenghis, al merete ancjemò segnalât che in Val di Fasse e je in plen davuelziment la edizion di chest an de Aisciuda Ladina.

aisciuda

 

Verona – Udinese 0-1

fuarceudinees

L’Udin al vinç, al vinç cuintri dal Verone e al vinç a Verone, pe prime volte te sô storie in Serie A. Al bastarès chest par jessi contents, ma la partide di îr e regale ancjemò altris sodisfazions, a tacâ dal gol di tac di Di Natale, che al è biel, al è decisîf e al certifiche il superament di Roberto Baggio te classifiche dai realizadôrs di simpri tal campionât talian plui impuartant, e de prestazion positive de scuadre, che e somee vê intivât finalmentri la strade juste par zuiâ in maniere dignitose e rivâ a fâ risultât. Al reste dome un motîf di aviliment: a son ancjemò chei che a fevelin di cheste partide tant che «derby triveneto» o dal so andament tant che afermazion dal «dominio territoriale in area triveneta», cemût che o leìn cun maluserie achì.

Il print timp si vierç cu lis dôs scuadris disponudis ben sul plan tatic e cuntune buine determinazion agonistiche. Sul imprin l’Udin al somee plui decîs, stant che tal zîr di pôcs minûts al rive a fâsi viodi des bandis di Benussi e fintremai al segne un gol – anulât par offside – cun Thereau, che te prime linie si cjate in compagnie di Perica, intant che Di Natale al ven tignût in bancjine.
Cul passâ dal timp il Verone al vuadagne teren e si puarte al atac e si sivicine al gol: al cjape la travierse cun Tachtsidis al prin cuart di ore di zûc e plui indenant al buris fûr une biele conclusion di Jankovic.
L’Udin al ten bot, al rispuint dilunc des fassis laterâls cence rivâ a jessi masse pericolôs, fale che cuntune conclusion di Perica, e tal cont des ocasions dal prin timp al jentre ancjemò un tîr di Lopez che al finìs te bande esterne de rêt.

Te seconde frazion la ande e je sù par jù compagne: ritmi discret e un pâr di ocasions par om, a tacâ di une iniziative di Thereau fermade di Benussi e di un tîr di Toni fûr bersai di pôc. Passât un cuart di ore di zûc dopo dal interval al rive il (dopli) svolt de partide: Stramaccioni al mande in cjamp Di Natale al puest di Perica e l’arbtri Cervellera al bute fûr cuntun cartelin ros il veronês Sala.
L’Udin al à Totò in plui e il Verone un zuiadôr di mancul. Al rive cussì il gol dai blancs e neris: Thereau al libere su la corsie a man drete Widmer, il svuizar al cor decîs e le met tal mieç de aree par Di Natale e cul tac al mande la bale dongje dal pâl plui lontan. Nuie ce fâ par Benussi.

Il Verone al patìs il colp ma al prove daurman a risupindi. La sô e je une reazion di sostance, che e domande atenzion de bande de scuadre furlane, cun Karnezis suntun tîr plaçât di Marquez cun Piris che al salve su la linie suntune conclusion di Toni.
L’Udin no si limite a cirî di no vê dams, ma al rispuint cun chê di disfrutâ inte maniere miôr la superioritât numeriche. Thereau al è il protagonist principâl con trê conclusions – une di chês e cjape il pâl – ma si fasin viodi in zone Benussi ancje Widmer, Allan, Bruno Fernandes e ancjemò Di Natale, che però no rivin a fâ il gol de sigurece, intant che il Verone al cale, par vie de inferioritât numeriche che tal ultin e devente di doi oms, cu la espulsion di Marquez par dople amonizion.

La prossime partide in cjase cu la Sampdoria e je la ocasion  pal Udin di mostrâ pardabon che alc al è cambiât tal cjâf, tes gjambis e tal cûr dai siei zuiadôrs.  Par intant si gjoldìn il superament de cuote 40 e dut il rest, di bon, che nus à dât la partide dal Bentegodi.