Babêl Europe di vuê (e di doman), novitâts discografichis e lenghis incrosadis

forabandit

Vuê al è martars e a 11 a buinore in direte su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe.

Te gnove pontade dal program cuindisinâl dedicât a lenghis, musichis, minorancis e nazions cence stât, che si podarà scoltâle ancje doman il 1n di Jugn a une dopo di misdì si fevelarà ancjemò di  novitâts discografichis e si scoltaran cercis di discs che a rivin de Ocitanie, dal Friûl e de Sardegne.

Cun di plui un spazi specific al vignarà dât a progjets che – par esempli chel dai Forabandit – si podarès clamâju ultrababelics, stant che la lôr carateristiche di fonde e je l’incrosâsi des lenghis e des musichis tra Orient e Bonât e tra Europe e Asie.

Cuntune cjalade al lunari si fevelarà ancje di atualitât, cuntune gnove segnalazion in cont dal Premi Ostana – Scrituris in lenghe mari 2016, cul so grant finâl che si davuelzarà dai 2 ai 5 di Jugn, e po di storie, in gjenerâl, e de storie di un innomenât grup sart: i Kenze Neke.

Il Friûl alì dal Salon di Turin. Un câs par ‘Chi l’ha visto?’

salondallibri

Dôs setemanis indaûr, in ocasion de scree de edizion numar XXIX dal Salon internazionâl dal libri di Turin, o vevin scrit alc in cont di chê manifestazion che e je zaromai di tant timp une des plui impuartantis de nestre citât, massime pe partecipazion de int e pe atenzion mediatiche.
In particolâr si domandavin se tai paveons dal Lingotto o varessin cjatât alc – e trop – di furlan e magari ancje par furlan.

Se sul argoment, ancje su la fonde di cualchi informazion tirade dongje, za ae vilie dal Salon, za in chê volte no vevin pandût masse otimisim, cumò che la kermesse si à sierade di passe dîs dîs e dopo che o vin fat une biele passude dal Salon tra joibe ai 13 e lunis ai 16 di Mai, o podìn dî, cuntune cierte maluserie, che salacor la realtât e je stade piês di cemût che se spietavin.

Cun di fat chel de presince dal Friûl alì dal Salon si pues calcolâlu tant che un câs par Chi l’ha visto?. No lu scrivìn par vie che a tacâ dal an passât la presidente de Fondazione per il libro, la musica e la cultura, che e inmanee il Salon, e je propit Giovanna Milella, gjornaliste che par uns pôcs di agns e je stade la condutore di chê innomenade trasmission televisive, ma propit par vie che cirî e cjatâ il Friûl al Lingotto nus à someât la ricercje di une persone disparide, se di no piês.

Salone_del_Libro

Cul ferâl di Diogjen o vin cjatât alc – pocjissim… – alì des postazions di cualchi espositôr e di cualchi cjase editore furlane (Biblioteca dell’Immagine, LEG, Forum…) o tra i finaliscj dal concors leterari InediTO-Colline di Torino, intant che o vin fat ancjemò plui di fature – in proporzion – a fâ compagn tal stand uficiâl de Regjon Friûl-VJ, là che in teorie al varès vût di jessi alc di plui.

E je vere che ancje tes edizions passadis dal Salon, daûr di ce che nus sugjerìs la memorie, no nus à mai someât di viodi e di cjatâ cuissà cetant Friûl, però chest an o vin vût la impression che al fos ancjemò di mancul e soredut che e fos pardabon smamide la presince dal Friûl tal stand de Regjon e che e fos compagn – e salacor ancje puare, vueide e anonime, in gjenerâl – la stesse vitrine dal Friuli-VG.

Cun di fat, se di une bande il stand de Regjon al veve une aparence particolâr dal pont di viste architetonic, cuntune struture di len che e colpive il voli e che cualchidun al à vût preseât ancje su la stampe e in rêt, di chê altre, cundut de origjinalitât architetoniche, si stentave fintremai a capî di cui (e di ce) che al jere pardabon: Regione autonoma Friuli-VG, Librerie Coop o Angolo della poesia? O ce? Boh!

Spazio del Friuli Venezia Giulia alla ventinovesima edizione del Salone del Libro - Torino 15/05/2016

Parsore des listis di len de struture dal stand si podeve lei il non di puescj tant che Villa Manin o ben di cualchidune des manifestazions plui impuartantis che si davuelzin tal teritori regjonâl e che a varessin di vê un atrat sei culturâl sei turistic. A jerin i nons di Pordenonelegge, di èStoria, di Vicino/Lontano, di Mittelfest e forsit di un pâr di altris ancjemò, ma a’ndi mancjavin altris, a tacâ des manifestazions cinematografichis – cundut che propit Visioni e fos, cui siei diviers significâts, la peraule clâf dal Salon di chest an – e di events tant che PostajaTopolove/Stazione di Topolò o Suns Europe, che te sô prime edizion l’an passât al à mostrât cemût che lis specificitâts linguistichis e culturâls plurâls de regjon che e ten dongje la plui part dal Friûl cun Triest a son une clâf strategjiche par metisi in relazions positivis cul mont e par fâsi cognossi e ricognossi ator.

Di chê altre bande dal stand a jerin un pâr di scansiis di libris, ma no jere une rapresentazion ni dai autôrs dal Friûl e di Triest, ni de produzion de editorie regjonâl. Tai dîs passâts nus àn contât che diviers editôrs dal Friûl a jerin avonde inrabiâts parcè che cui che al à gjestît il stand no ju à ni calcolâts e ni coinvolzûts, intant che un rapresentant di une clape di culture nus à fat savê che a lôr ur vevin domandât alc, ma al jere masse tart par podê rispuindi e dâur un pôcs di libris e di rivistis.

Ancje i materiâi promozionâi nus àn someât avonde scjarsuts: lis solitis mapis di TurismoFVG (che dut câs a van simpri ben), cualchi depliant ca e là, une brochure de Fondazion Aquilee, copiis di un libri sui sîts archeologjics dal Alt Adriatic e uns pocjis di penis vançadis dal IntenetDay…

Spazio del Friuli Venezia Giulia alla ventinovesima edizione del Salone del Libro - Torino 15/05/2016

Il cjanton là che si fasevin i incuintris al jere ancje ninin. Però, cun dut che al jere ancje insiorât di une postazion dal Scriptorium Foroiuliense, al veve pardabon pôc atrat.
Cun di plui, la prime volte che o sin passâts di chês bandis o vin notât la espression stufadice di Gloria De Antoni (ma forsit e jere cussì dome par vie di un tweet di un assessôr regjonâl che le veve nomenade «Degli Antoni»… Cuissà?) e intune altre ocasion che o vin dât un cuc al program dai events, nus à someât pardabon une mission impussibile sielzi cuâl che, tra une presentazion dal libri di un poete piemontês par cure di Giovanni Tesio e un incuintri tra il diretôr artistic di Mittelfest e Simone Cristicchi, al sarès stât l’apontament plui rapresentatîf dal Friûl e de regjon…

Al mancjave il Friûl, si viodeve avonde pôc la regjon e soredut no si rivave a vualmâ la carateristiche di fonde des tieris a est dal nordest, ven a dî la esistence des lenghis ‘altris’ – il furlan, il sloven e il todesc – che cun dut de lôr storiche minorizazion a son ancjemò (avonde) vivarosis e a vegnin dopradis ancje par fâ alc di bon, di moderni e di interessant te scriture, te editorie, te comunicazion, te musiche, tal cine e plui in gjenerâl te produzion culturâl.

segamentu-de-ancas

Il stand de Regjon Sardegne, che al jere pôcs metris plui innà, cu la denominazion uficiâl par sart e par talian, cun scansiis plenis di libris di diviers editôrs, cun tancj libris e altris materiâi ancje par sart o par catalan algherês, cun incuintris tant che un omaç a Sergio Atzeni, une leture musicade par cure di Giacomo Casti e Frantziscu Medda Arrogalla e la presentazion di Segamentu de ancas, la version par sart di une ricueltis di contis par arap dal scritôr sirian Zakaria Tamer, in confront al someave cuasit chel de Catalogne dal 2002…

Plui in gjenerâl, denant de evidence dade al riferiment a ‘visionaris sarts’ tant che Antonio Gramsci  o Grazia Deledda o de ricjece de rapresentazion editoriâl, culturâl, teritoriâl, turistiche e enogastronomiche de Regjon Pulie, chel de Regjon Friûl-VJ al someave pardabon un stand cence anime e cence un straç di…vision.

Nus à someade une sorte di ‘version 2.0’ de situazion de promozion turistiche regjonâl di un pôcs di agns indaûr: in chê volte daûr dal sproc ‘Ospiti di gente unica’ si stentave a capî che la unicitât de int dal Friûl e di Triest e jere la pluralitât linguistiche e culturâl (che si spiele te ricjece dai paisaçs, de enogastronomie, de architeture, de art, des storiis e des identitâts); cumò – almancul cussì al è stât a Turin – si viôt che in chê regjon a son ‘unics’ pe capacitât di no jessi in stât di fâsi viodi, di fâsi cognossi, di fâsi ricognossi e di fâsi preseâ…

Tai dîs passâts o vin let cun interès che tal 2017 la regjon ospit dal Salon di Turin e varès di jessi propit chê dal Friûl-VJ. Sperìn che par chê volte al sedi cambiât alc e che chi di un an e rivi finalmentri a mostrâ la sô muse reâl e plurâl.

‘Friûl@Europe’, un omaç a Spinelli e un confront su lenghis, dirits e informazion

spinelli

Lunis ai 23 di Mai al cole il trentesim inovâl de muart di Altiero Spinelli, che al ven calcolât justementri tant che un dai pari dal federalisim european. La ricorence e devente une ocasion par memoreâ la sô persone, la sô ativitât e il so impegn a pro de Europe unide e par fâ cualchi resonament in cont de Europe che e je e di che che e mancje e che nus covente.

Layout 1

Cun chel intindiment propit ai 23 di Mai in diviersis universitâts dal Stât talian a vegnin inmaneadis iniziativis di pueste, dedicadis a Spinelli e ae Europe. Une di chês e je la tierce edizion de taule taronde Friûl@Europe, che si davuelzarà a tacâ des 10 di buinore te Sale Florio, in bande de sede dal Retorât dal Ateneu furlan (v. Florio 1, Udin).

L’incuintri al è un omaç a Spinelli e un confront tra esperts e  rapresentants des comunitâts di lenghe furlane, slovene e todescje de regjon Friûl-Vignesie Julie sui temis de unitât europeane, dai dirits linguistics e de informazion.

mumucei_4

Friûl@Europe. A tribute tu Altiero Spinelli. Unità europea, diritti linguistici e informazione e je la tierce taule taronde inmaneade inte suaze dal Modul Jean Monnet MuMuCEI (Multilingualism, Multicultural Citizenship and European Integration) dal Dipartiment di Siencis Juridichis de Universitât dal Friûl, un progjet che al met dongje ativitâts di docence e di ricercje sui rapuarts tra integrazion europeane e promozion de diversitât lingusitiche e culturâl, par cure di Claudio Cressati, professôr di Storie des dotrinis politichis, e di Marco Stolfo, dotôr di ricercje in Storie dal federalisim e de unitât europeane.

Il program complet dal incuintri si pues leilu achì: 2016-05-23 LOC Mumucei light.

foto_uniud

Al torne Babêl Europe cun novitâts de Sardegne, dal Gales e de Galizie

9Bach_ANIAN

Doman al è martars e in direte su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe.

Te gnove pontade dal program cuindisinâl dedicât a lenghis, musichis, minorancis e nazions cence stât, in onde in direte ai 17 di Mai a undis a buinore e in repliche passant doman, ai 18, a une dopo di misdì, la plui part dal spazi e vignarà dade aes novitâts discografichis, cun cercis golosis di musiche babeliche par sart, par catalan, par galizian e par galês, gjavadis fûr dai discs gnûfs di Arrogalla, di Claudia Crabuzza, di Caxade e di 9Bach.

Al sarà spazi ancje par fevelâ di alc altri, tra musiche, peraulis, libris, apontaments, storie, storiis e atualitât.

crabuzza_coM-Un_soldat

La trasmission si podarà tornâ a scoltâle sul sît internet di Onde Furlane, compagn di chês altris che a son za ladis in onde: par esempli la pontade di Babêl Europe lade in direte ai 3 di Mai (e in repliche ai 4), dedicade ae musiche di lei, cu lis segnalazion di libris tant che La Corse… et ma guitare. Une histoire passionnée de la musique corse di Jean Mattei, Rockmeria. Un repasu a la música popular del Sieglu XX  dal asturian Xune Elipe e Rockarbëresh di Demetrio Corino de Peppa Marriti Band.

Pieter_Bruegel_the_Elder_-_The_Tower_of_Babel_Rotterdam

Udinese – Carpi 1-2

lunazzi_dinatale

L’omaç a Di Natale e di Di Natale, la maluserie dal Carpi che al va jù in serie B cun dignitât e la sconfite numar 19 che pal Udin e siere une stagjon di dismenteâ o – miôr – di tignî ben iniments par che no si ripeti plui. La ultime partide dal campionât 2015-2016 si pues leile cun diviersis cjaladuris. Cun voi blancs e neris, al pâr miôr tacâ cul pontâ la atenzion su Totò, su ce che al à fat in dodis agns a Udin, cul Udin e pal Udin e su cemût che ancje l’Udin e il Friûl i àn zovât al zuiadôr napolitan. E ancjemò su cemût che chê che e je stade presentade tant che la so ultime partide in blanc e neri e je stade segnade de fieste pal om e pal campion e dal gol de bandiere fat di Di Natale su rigôr. Cence dismenteâ ancje chei altris doi veterans blancs e neris che a saludin Udin e il Friûl, Domizzi e Pasquale.

L’incuintri al tache avonde ben pai parons di cjase. Pal Carpi la partide dal Stadi Friûl e je chê des ultimis sperancis par no lâ in serie B, intant che pal Udin e varès di jessi la ocasion par sierâ in bielece une stagjon che no je stade par nuie biele. La scuadre di balon furlane e scomence in maniere positive, cuntun pâr di iniziativis di Zapata e di Widmer e po cuntune altre conclusion di Piris, fermade di Colombi, e cuntun tîr fûr bersai di Bruno Fernandes.

udin_neri

Il Carpi al ten bot indaûr, al masane zûc tal mieç, ma nol rive a sburtâ masse indenant par jessi pericolôs des bandis di Karnezis. Lu judin in cualchi maniere un contat inte aree blancje e nere tra Felipe e Lasagna e soredut la decision di Mazzoleni di sivilâ il rigôr a pro dai ospits. Dal discut al segne Verdi e il vantaç dal Carpi nol tocje dome il risultât ma si slargje ancje al numar di zuiadôrs tal cjamp, stant che Thereau al palese a fuart di no jessi par nuie in cunvigne cu la decision dal arbitri e par chel si fâs butâ fûr cuntun cartelin ros: un brut moment finâl par un dai zuiadôrs miôr di cheste di stagjon.

Il gol fat dai undis metris al clame daurman ancje il secont gol di Verdi e il prin timp si siere cuntun dopli passîf, che al podarès fintremai deventâ un trê a zero. Tal secont timp la situazion no je alc e ce ni di une bande ni di chê altre: la reazion dal Udin e je avonde flape, intan che il Carpi al somee rindisi cont che a Palermo lis robis a van intune maniere che no je favorevule. Nol sucêt nuie fint cuant che Totò Di Natale al jeve de bancjine e al ven mandât tal cjamp al puest di Bruno Fernandes.
A passin doi minûts e Mazzoleni al sivile un penalty a pro dal Udin, Totò al tire e al è doi a un.
Di chel moment indenant e je fieste par lui e cun lui, ma ancje par Pasquale, protagonist di un bon secont timp, e par Domizzi, che De Canio lu fâs jentrâ al puest di Widmer juste in timp par ricevi un batimans ancje par lui.

Pal rest nol è nuie ce fiestezâ, a part il fat di vê sghindade la retrocession. Pluitost al covente che la societât si movi: nus covente un Udin plui competitîf e plui furlan, te rose de scuadre, ma soredut tal stîl e te comunicazion istituzionâl che, biadelore, e varès di jessi ancje in lenghe furlane, compagn de segnaletiche dal stadi, cemût che al jere stât anunziât in maniere uficiâl ancjemò ae fin di Otubar dal an passât.

keep-calm-and-fuarce-udin-2

 

Al tache il Salon dal libri di Turin e al è alc di babelic. Isal ancje alc di furlan?

salondallibri

Si scree vuê la edizion numar XXIX dal Salon internazionâl dal libri di Turin. Daûr di une lungje tradizion, la citât – massime sui gjornâi, par radio e par television – e somee jessi dute cjapade dal event.

Il program al è strafont di robis, di apontaments e di events di ogni sorte. Cualchidun al à provât a segnalâ cualchi iniziative in particolâr. Si cjatìn avonde in cunvigne cun chescj sugjeriments achì, cun dut che nus interesse ancje alc altri che par solit no i ven fate masse publicitât.

Cun di fat, come par solit o larìn a cirî se, tra libris, cjasis editoris e apontaments cui autôrs, si cjate ancje alc di Friûl e di furlan.

Za une setemane indaûr la Regjon Friûl-VJ e à dât fûr un comunicât che al presente il so stand, i siei espositôrs e lis sôs iniziativis promozionâls. Daûr di ce che si lei achì al somee pardabon dificil cjatâ alc che al sedi pardabon furlan.

prinselhon

La impression e je sù par jù chê stesse che si à vude in ocasion dal cuarantesin inovâl dal taramot, cun Vençon, Glemone e Udin imbandieradis compagn che a fossin daûr a memoreâ i 4 di Novembar dal 1918 e no i 6 di Mai dal 1976 e cul president Mattarella che tes ocasions publichis al è stât chel che al à fevelât di plui par furlan, cundut che plui di cualchidun al sperave alc di diferent de bande dai sindics e di chei altris sorestants “nostrans” (cjatant une rispueste une vore parziâl tal salût plurilengâl dal President dal Consei regjonâl e inte citazion di pre Checo Placerean fate dal Sindic di Udin: alc al è alc???).

Ma magari, lant a cjalâ plui di dongje, forsit si rivarâ a cjatâ di plui interessant e vivarôs.

Par sigûr al promet alc di plui il dopomisdì di sabide ai 14 di Mai alì dal pavilion dedicât aes Lingue Madri, la che di 2 e mieze a 4, par iniziative di Chambra d’Óc , a saran un resonament su la tutele des minorancis linguistichis tal Stât talian, la presentazion de edizion di chest an dal Premio Ostana. Scritture in lingua madre e chê di Lo Prinselhon, la version par francoprovençâl dal innomenât Le Petit Prince di Antoine de Saint Exupery, dât fûr de cjase editore sarde Papiros.

corse_mattei

Di chel apontament si veve za fevelât su lis frecuencis di Onde Furlane dentri de pontade di Babêl Europe lade in direte ai 3 di Mai (e in repliche ai 4).

Chê trasmission, dedicade plui in gjenerâl ae musiche di lei, cu lis segnalazion di libris tant che La Corse… et ma guitare. Une histoire passionnée de la musique corse di Jean Mattei, Rockmeria. Un repasu a la música popular del Sieglu XX 
dal asturian Xune Elipe e Rockarbëresh di Demetrio Corino de Peppa Marriti Band, si pues tornâ a scoltâle in rêt.

Cence dismenteâ che juste trê agns indaûr, propit alì dal Lingotto, e jere stade fate la prime presentazion de publicazion etitade di Lidrîs e Butui,  Occitania, Friuli, Europa. La mia lingua suona il rock .

CoverOccitaniaJPG

Atalanta – Udinese 1-1

FuarceUdinees

Un gol fat e un cjapât e un pontut puartât a cjase. La trasfierte a Bergamo e va inte maniere miôr pussibile, un pôc par merit dal Udin e une vore di plui par merit e par demerit di chei altris. Cun di fat, la zornade di îr si siere cu la conferme matematiche de permanence in serie A de scuadre di balon furlane, soredut in graciis dal risultât finâl di Carpi-Lazio, là che emilians a pierdin 3-1 e par chel si mantegnin a cuote 35, cuntun pît in serie B.

Domenie che e ven si siere il campionât propit cun Udinese – Carpi alì dal stadi Friûl. Par intant si pues fâ za daurman une riflession su cemût che e je la de cheste stagjon, là che e je saltade fûr a fuart la diference tra il mâl e il malan, ven a dî tra une scuadre scjarse che e rive a salvâsi e une che e sbrisse in serie B.

Pal moment o podìn ancje contentâsi – al è pardabon il câs di dî “alc al è alc, nuie al è nuie”– e cussì il mâl al devente ancje alc di bon, però al covente fâ in mût che l’an che al ven lis robis a ledin intune altre maniere, cemût che si meretin i tifôs dal Udin che chest an, tra partidis smamidis, scuadre flapute e efiet Dacia Arena, a àn scugnût gloti di dut e cundut achel a àn poiât la scuadre cuntune grande passion.

La partide di Bergamo e je impuartante plui pal risultât che pal zûc, in particolâr pe scuadre di balon furlane.
Tai prins minûts l’Udin al mostre une determinazion plui fuarte dai aversaris, leade ae sante scugne di fâ ponts. Al rive cussì il gol di Duvan Zapata, che le met dentri cul cjâf suntun biel cross di Alì Adnan. Il vantaç dal Udin al dure dîs minûts, stant che Danilo al tocje la bale cu la man, Rizzoli al sivile il penalty e il cjapitani de Atalanta, Bellini, al tire dal discut e al segne, juste inte ultime partide di zuiadôr in neri e blu, e pe prime volte, dopo disevot agns di ativitât simpri cun chê scuadre, al segne tal stadi di cjase.

Dopo dal gol, la Atalanta dal alenadôr gurizan Edi Reja e cjape il control de partide, e frache un tic – no masse, ma ce che al covente par blocâ l’Udin – sul aceleradôr e si svicine al doi a un cun Cigarini. Ancje la formazion di De Canio e torne a fâ alc: il protagonist al è ancjemò Zapata, cuntun tîr di fûr che al met in crisi Sportiello, che nol rive a fermâlu e che po al riscje di fâsi segnâ di Badu.

A son il ultimis ocasions di gol, di une bande e di chê altre. Po dopo, in particolâr vie pal secont timp, la partide e va indenant slisse e cence cuintricolps, cu la fieste finâl par Bellini, pe Atalanta e ancje pal Udin, che e cjate finalmentri la salvece ma vie pe partide e piert i infortunâts Wague e Kuzmanovic.

Domenie che e ven la ultime di campionât: saraie fieste di fin cariere (dome in blanc e neri o ancje in gjenerâl?)  ancje par Di Natale?

06.05.1976_06.05.2016, cuarante agns

friul

Cuarante agns indaûr, a nûf di gnot al rivale l’orcolat.
In ocasion di chest inovâl o fasìn il plen di memorie vive, cun cussience, ma cence retoriche.

Ve chi cualchi imagjin, cualchi sunôr, cualchi peraule. Par no dismenteâ, par cognossi e par capî ce che o podìn imparâ ancje in dì di vuê e pal avignî.

Pal Friûl che al è in Friûl e par chel che al è pal Mont; cul Friûl che al è in Friûl e cun chel che al è pal Mont.

tarcint

http://www.friulionline.com/cultura-spettacoli/dretledros-special-cosi-onde-furlane-ricorda-sisma/

http://www.corriere.it/cronache/16_maggio_04/identita-piu-forte-crolli-lezione-friuli-421dd45e-1165-11e6-950d-3d35834ec81d.shtml

trasaghis

http://www.ansa.it/friuliveneziagiulia/notizie/2016/05/03/quaranta-anni-fa-il-terremoto-in-friuli-quando-lorcolat-si-risveglio-_37d83f25-3591-4754-8834-2bcb0c830081.html

https://eurofurlan.wordpress.com/2016/05/06/6-di-mai-une-ocasion-par-cjapa-cussience-e-par-palesale-cun-dignitat-e-cence-sotanisims/

http://www.unfriuldiferent.eu/wp-content/uploads/2016/05/La-lezione-del-76.pdf

londar

 

 

 

 

 

 

 

http://www.ondefurlane.eu/gerovinyl-02-05-2016-orcolat?utm_content=buffer0871d&utm_medium=social&utm_source=facebook.com&utm_campaign=buffer

 

 

Babêl Europe al torne cun musiche di scoltâ e di… lei

kenze5

Cheste e je la setemane di Babêl Europe. Doman, martars ai 3 di Mai, in direte su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e torne la trasmission cuindisinâl dedicade a lenghis, musichis, minorancis e nazions cence stât.

Dentri dal prin apontament dal mês di Mai, che al tornarà in onde, in repliche, ancje miercus ai 4 a une dopo misdì, al sarà spazi pe musiche di scoltâ e pe musiche di lei. Tra storie, memorie e atualitât, novitâts discografichis e apontaments, si fevelarà ancje di libris, plui o mancul gnûfs, che a fevelin di musichis babelichis.

In spiete de edizion di chest an dal Salon dal libri di Turin e dal tierç inovâl de presentazion, propit alì dal Lingotto, di Occitania, Friuli, Europa. La mia lingua suona il rock, a vignaran segnalâts uns pôc di titui.

Si fevelarà ancje de Sa Die de sa Sardigna e ancjemò di altris inovâi, in continuitât cu la pontade di Babêl Europe di dôs setemanis indaûr, cuant che si veve fevelât di Resistence, di Liberazion, di memorie, di dirits, di imnis nazionâi e plui in gjenerâl di cjançons.

cover CORINO PROVA:Layout 1

Dopo des dôs emissions in modulazion di frecuence e in internet – là che la radio libare dai furlans si pues scoltâle ancje cuntune aplicazion di pueste – ancje cheste gnove pontade di Babêl Europe si podarà cjatâle e tornâ a scoltâle in rêt.

Te pagjine web dedicade si puedin scoltâ ancje chês altris trasmissions di Babêl Europe, a tacâ di chê di dôs setemanis indaûr, cu la musiche dai galês Swnami e dai arbereshe Spasulati Band, cun Óró ‘s é do bheatha ‘bhaile cjantade di Sinead O’Connor, cu la version par catalan di Bella Ciao fate de innomenade cjantante catalane Marina Rossell  e cuntune altre cerce dal album gnûf dai Lou Dalfin, Musica Endemica.

microfono