Chievo – Pordenone 1-1

Il Pordenon si fâs ancjemò onôr e al met tal scansel un altri pont e une altre partide zuiade cun snait e cun sintiment. A Verone cuintri dal Chievo la scuadre di balon furlane impegnade tal campionât di Serie B prime e passe in vantaç e po e resist cuintri de massime part dai atacs dai aversaris, che a rivin dome a jonzi la paritât. I neris e verts a son pardabon bulos e a tegnin bot ancje cuant che a restin in inferioritât numeriche, fintremai cui doi oms di mancul.

La formazion di Tesser e partìs cul pît just: atente indaûr e concrete indenant. I ‘sborfs’ a cjatin il gol dopo dîs minûts di zûc: punizion di Monachello par Chiaretti che al disegne un cross golôs par Strizzolo; l’atacant furlan si cjatr tal puest just tral moment just e cul cjâf al met la bale là che Semper nol pues rivâ.

I parons di cjase a provin daurman a reagjî. Djordjevic al à diviersis ocasions, ma un pôc nol combine lui e un pôc al è Di Gregorio che al fâs il so lavôr inte maniere miôr.

Il Chievo al rive a jonzi la paritât dome tal secont timp, che si vierç cu la espulsion di Strizzolo. Il gol di Djordjevic al rive juste dopo dal cartelin ros e de definizion de superioritât numeriche dai parons di cjase: l’atacant di Beograd al anticipe Pasa e segne cul cjâf.

La paritât parziâl e l’om in plui a dan benzine ae scuadre vuidade di Marcolini. Cundut achel la puarte di Di Gregorio e reste simpri sierade e il Pordenon al scombat fint tal ultin, ancje de espulsion di Chiaretti.

Chel tra il puartîr de scuadre dal Friûl ocidentâl e la ponte zale e blu al è une sorte di duel. Lu vinç Di Gregorio e cun lui dut il Pordenon, che al vuadagne un altri pont impuartant e meretât.

Udinese – Bologna 1-0

L’Udin al scombat, al ten bot e al torne a vinci. Dopo dal pontut puartât a cjase martars stât la scuadre di balon furlane e fâs il risultât positîf che al covente cuintri dal Bologna, che al patìs la prime sconfite in trasfierte dal campionât. La formazion di Tudor e fâs un passut indenant: il zûc nol è alc e ce, ma almancul si viodin plui grinte e plui atenzion, cence dismenteâ la cualitât e la cuantitât, dutis dôs determinantis, di Okaka e Nestorovski.

I blancs e neris si presentin, par ce che al tocje l’organic e la disposizion tal cjamp, cun cualchi novitât. Chê plui significative – e chest si lu viodarà ancjemò di plui ae fin, tal moment dal belanç de partide – e je propit la cubie di atac Okaka-Nestorovski. Tal 3-5-2 dal Udin, denant di Musso in puarte, si viôt ancje la linie difensive Becao-Ekong-Samir e chê mediane là che Sema e Stryger Larsen a àn il compit di cori e di sburtâ dilunc des corsiis laterâls e tal mieç a son Jajalo, Mandragora e Fofana. Mihajlovic al mande in cjamp une formazion che e va daûr di chê de partide passade cu la ecezion dal atac là che Santander al è la prime ponte e dongje di lui si cjate Dzemaili.

I ospits a scomencin in maniere ordenade e decise: i bolognês a fasin zirâ bale e a mostrin di vê buinis gjeometriis. L’Udin no si scompon, si organize ben indaûr e al rispuint cu la corse in verticâl e cul dinamisim di Okaka e Nestorovski. Dopo des primis conclusions fûr bersai di Okaka, di une bande, e di Santander, di chê altre, il ritmi de partide al cres, prime par merit dal Bologna, che al impegne Musso cuntune punizion di Orsolini, e po in graciis de reazion dai blancs e neris, che si concretize in cualchi progression di Fofana, di Sema e Srtyger Larsen.

Prime al è il svedês blanc e neri che al pronte un balon golôs par Nestorovski che al impegne Skorupski e po dopo al è il cursôr danês che al fâs il cross par Okaka che l’atacant lu stramude in gol cuntune conclusion cul cjâf. L’Udin al segne, ma la reazion dal Bologna si le viôt daurman cu lis iniziativis di Sansone e di Orsolini, che però no i dan nuie ce fâ a Musso, intant che di chê altre bande dal cjamp al è Skorupski a scugnî meti un blec suntun biel tîr di Okaka.

Il print timp si siere cul vantaç da Udin: un risultât che al premie la concretece de scuadre che si difint ben e cuant che e tire in puarte, massime cun Okaka, e je plui pericolose dal Bologna. La seconde frazion si vierç cui ospits che a tornin a manovrâ cun chê di svicinâsi ae puarte di Musso e cul Udin che al va dilunc a rompi in partence lis iniziativis dai aversaris. I ros e blu dopo une desene di minûts a tachin a mudâ formazion e schemis, cun Palacio e Skov Olsen a cjapin il puest di Sansone e Orsolini, cun chê di meti in crisi la scuadre furlane.

L’Udin al ten bot e si dinfint ben. Tudor al cambie Okaka cun Lasagna, che al è protagonist di un pâr di conclusions fûr bersai, compagn di Fofana. I blancs e neris a lassin il balin in man al Bologna par cirî di gjavâial a pene che si puartin in tic plui indenant.
A son tantis interuzions e al cres il nervosisim, si zuie e si scombat soredut tal mieç dal cjamp e i tîrs in puarte a son pôcs. Santander si svicine a e paritât cuntun tîr cul cjâf che al va fûr, intant che juste tal ultim Walace al impegne Skorupski. Ae fin de partide Soriano si fâs butâ fûr di Giua, za contestât de bande dai bolognês par no vê viodût doi contats jenfri Okaka e Denswil e Samir e Skov Olsen, ma il stes Bologna nol bute vie la bale cuant che Nestorovski al è par tiere infortunât.

Pal Udin e je une vitore sufierte, ma meretade, concuistade cul cûr e ancje cun mistîr.

Pordenone – Benevento 1-1

Il Pordenon al torne in Friûl e al torne a fâ un risultât positîf. Chê di Tesser si conferme une formazion che e à snait e caratar. La scuadre di balon furlane che e zuie in serie B no à pôre di vê cuintri une des candidadis plui increditadis ae promozion in serie A.

Ai Riçs, in graciis dai verts e neris, si torne a viodi e a sintî chel che nus plâs clamâlu “efiet Stadi Friûl”. I ospits a cirin di fâ valê il lôr pês specific, ma il Pordenon al ten bot. Il Benevento al passe in vantaç dopo dodis minûts: Maggio al cor dilunc de corsie di diestre e al pronte une biele bale par Kragl che al segne. I sborfs a cirin di dreçâ la situazion e a rivin a fâlu cun Camporese che al bat Montipò cuntun tîr cul cjâf dopo di un corner.

Il risultât nol cambie vie pe seconde frazion, segnade di un ecuilibri sostanziâl cun dutis dôs lis scuadris che a provin a vinci, in particolâr cui tentatîfs di Ciurra e di Coda. Il Benevento al pues dî di vê tirât in puarte di plui dal Pordenon, ma insom De Gregorio e Montipò a àn di lavorâ sùù pa jùù compagn. Risultât di paritât just e bon, che i perment ae scuadre dal cjâflûc dal Friûl Ocidentâl si posizionâsi in classifiche a cuote siet.

Verona – Udinese 0-0

Nissun gol e un pont par om. Udin e Verona no podevin permetisi di pierdi ancjemò e cussì a àn zuiât une partide là che a àn cirût di no vê masse fastidis. Ur coventave a dutis dôs lis scuadris di fermâ la rie di sconfitis e lu àn fat.

L’Udin al zuie miôr vie pal prin timp e il Verona al impon la sô iniziative vie pe seconde frazion, massime dopo de jentrade in cjamp di Verre al pueste di Zaccagni. In chê fase dal incuintri i parons di cjase si svicinin di plui al gol e al covente une altre volte un intervent miracolôs di Musso par che il risultât al resti chel.

I blancs e ners si presentin tal prât dal Bentegodi cuntun 3-5-1-1, là che denant di Musso in puarte e di Samir, di Troost-Ekong e di Becao in difese si torne a viodi dal prin minût Mandragora, un tic spostât a diestre, intune linie mediane componude ancje di Jajalo, tal mieç, di Fofana, plui a çampe, e dai esternis Stryger Larsen e Sema, intant che daûr di Lasagna al torne in cjamp Barak cun chê di tignî dongje la prime e la seconde linie.

La partence e je flapute di dutis dôs lis bandis dal cjamp. Il Verona al prove a fâ valê lis sôs prerogativis di paron di cjase, ma l’Udin al siere ducj i trois e al rispuint cun cualchi manovre avonde proviodibile che no à efiets particolârs: dome un pâr di conclusions di Barak che no crein problemis a Silvestri.
La rispueste veronese si limite, inte prime mieze ore di zûc, a un tîr cul cjâf di Rrahmani, intant che l’ultin cuart di ore dal prin timp al viôt i blancs e neris che a incressin la lôr pression ofensive cul risultât di meti finalmentri Lasagna tes cundizions di tirâ in puarte, ma chê che e je la sô prime conclusion e ven fermade cence padins di Silvestri e no à sucès nancje un tîr di Fofana.

Il prin timp si siere cuntune ocasion golose par Lasagna che però nol cjate la puarte ancje se si cjat intune buine posizion e cun altri tîr cul cjâf di Rrahmani fûr bersai. La seconde frazion si vierç cul Verona che al prove a impone il so zûc ma nol rive a sfondâ e cul Udin che al strac une altre ocasionone cun Lasagna che al tire malamentri.

Il pericul sghindât dai parons di cjase al segne un svolt inte partide. L’Hellas al cres e l’Udin al cale, Amrabat, Verre e Stepinski i dan di lavorâ a Musso e Tudor al prove a cambiâ alc in taca – fûr Lasagna e po Barak e dentri Okaka e po Walace – ma no mude la sostance de scuadre, che no rive a produsi alc e ce e si poie dome su la cualitât di Musso, ancjemò protagonist decisîf suntune altre conclusion di Stepinski, che i permet di puartâ a cjase un bon pontut.

Livorno-Pordenone 2-1

Lontan dal Friûl il Pordenon al torne a pierdi. Sabide a Livorno la scuadre furlane che e zuie tal campionât di Serie B no à rivât a cjapâ nancje un pont. I parons di cjase, che a jerin ancjemò a cuote zero in graduatorie, dopo vê pierdût dutis lis trê partidis zuiadis fint cumò, a scombatin cu la britule in man e a rivin a vinci.

La formazion amarant e tache cul pît just, sburtade di Marsura, Marras e Agazzi. La prime conclusion di Marras e je fûr bersai, intant che la seconde, che e partìs dal pît diestri di Agazzi, e passe Di Gregorio e e finìs intal sac.

Il Livorno no si contente: al à une voie mostre di vinci e al sa che il Pordenon nol è une scuadre che si fâs meti sot facilmentri. Vie pal prin timp e je ancjemò la scuadre parone di cjase a jessi plui pericolose in graciis des iniziativis di Morganella, Di Gennaro e Mazzeo. Il Pordenon al ten bot, ma nol rive a fâ alc e ce indenant e la prime frazion si siere cul parziâl di un a zero.

Dopo de polse la scuadre di mister Tesser e prove daurman a dreçâ la partide. La sô prime vere ocasion e rive dopo dîs minûts: cross di Pobega, tîr di Strizzolo e gol.
La paritât no dure masse. Il Livorno al torne al atac, si svicine al gol acnejmò cun Morganella e lu cjate atore de metât de seconde frazion cun Marras che al siere inte maniere miôr un biel assist di Marsura.

Il Pordenon al ven colpît ma nol mole. I parons di cjase a tirin sù mûrs e baricadis e a provin a rispuindi in cuintripîts cun Raicevic, intant che i sborfs neris e verts i dan di lavorâ a Zima cun Chiaretti e Monachello. I intervents dal puartîr boem a son decisîfs par mantingniment dal sucès dal Livorno. Doman la scuadre furlane e varà di provâ a tornâ a fâ ponts a udin cuintri de prime in classifiche Benevento.

Udinese – Brescia 0-1

Si torne a sintî e a viodi l’efiet Mer… Dacia Arena. Il percors in campionât dal Udin al somee chel di un gjambar. Partide ben cul Milan in cjase, la scuadre di balon furlane impegnade inte Serie A taliane e à pierdût prime cul Parma, dopo une partide là che e veve fat ancje alc di bon, e po ancje cul Inter, cuant che e veve paiât il fat di vê scugnût zuiâ in dîs cuintri undis. Cumò e torne a pierdi in cjase cuintri dal Brescia, dopo vê tignût di plui la bale e tirât di plui in puarte dai aversaris, ma palesant limits a nivel sei individuâl che coletîf.

Cuintri de scuadre blu e blancje Tudor al mande in cjamp Musso in puarte, Becao, De Maio e Samir in difese, Larsen, Walace, Jajalo, Fofana e Sema inte linie mediane e Pussetto e Lasagna a scombati indenant. La formazion di Tudor e mostre daurman di jessi un tic clopadice, cun De Maio che dopo siet minûts al lasse une bale golose a Dommarumma, che però, par fortune, al cjate Musso tal puest just tal moment just.

Cul passâ dai minûts i blancs e neris a masanin plui zûc e a sburtin indenant, ancje se il Brescia si difint cun sintiment. Lis conclusions metudis dongje di Pussetto, Fofana e ancjemò Pussetto vie pe fase mezane dal prin timp a son dutis fûr bersai.
Intal ultin cuart di ore prime de polse a son i ospits chei che a frachin cun plui convinzion il pedâl dal aceleradôr e a rivin cussì i tîrs di Spalek e Ayè, intant che l’Udin al rispuint cun Lasagna e il Brescia al prove ancjemò a colpî in cuintripît cun Spalek.

Il secont timp si vierç cuntune iniziative di Pussetto che al ven butât jù intant che al prove a jentrâ inte aree di rigôr aversarie: Valeri al indiche daurman il discut, ma dopo vê clamâr in cause il Var al decît par une punizion dal limit che e ven tirade di Jajalo e parade in corner di Joronen.

Il ritmi al somee plui alt rispiet al prin timp, l’Udin al ponte di plui su lis progressions in velocitât di Lasagna e il Brescia al continue a zuiâ in cuintripît. Dopo dodis minûts de polse la partide e cjate il so svolt decisîf: prime al è Pussetto che al finìs par tiere inte aree dai ospits ma Valeri al calcole tant che regolâr l’intervent cuintri dal atacant argjentin che al sielç di punîlu lui cuntune amonizion par simulazion e po al è Romulo ch al tire in puarte e il so diagonâl, in graciis de deviazion involontarie di De Maio, al finìs inte puarte difendude di Musso.

Il Brescia al ten bot, cul vantaç inte sachete, denant di une reazion blancje e nere che e je avonde smamide e flape. Tudor al clame fûr Fofana e Pussetto e al mande in cjamp Barak e Okaka e al cambie la posizion dai doi laterâi Sema e Larsen, ma in atac la produzion dal Udin e reste scjarsute, par demerit sô e par merit dai aversaris, che si sierin ben e a provin a incressi il vantaç cun Sabelli che al impegne Musso.

Intai ultin minûts, cun Nestorovski al puest di Sema, Tudor al stramude il so 3-5-2 intun 3-4-3, ma l’Udin nol rive a butâle dentri nancje cun trê pontis. La partide si siere cuntun altr risultât negatîf – la tierce partide pierdude su cuintri incuintris zuiâts – e cul marum dal public furlan, che al sivile, mostrant che l’efiet Mer… Dacia Arena propit no i plâs. E no i plâs nancje la posizion dai blancs e neris in classifiche.
Al covente cambiâ in miôr e daurman.

Vindotalé + Silent Woo Goore + Kortatu + Sagarroi + Llan de Cubel + Suns Europe = Babêl Europe 18/2019

De Udmurtie ae Bretagne, de Ocitanie al Paîs Basc, des Asturiis ae Basse Sassonie. La gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze, e sarà une vore siore di contignûts.

Si fevelarà di novitâts discografichis e in particolâr di Vindotalé, il gnûf progjet là che e je implicade la cjantante bretone Bleunwenn Mevel. Si fevelarà ancje di atualitât, ricuardant lis manifestazions pe Diada Nacional in Catalogne dai 11 di Setembar e chê cuintri de francesizazion dai nons di lûc in Bretagne di sabide ai 14. In cheste suaze si scugnarà frontâ ancje cualchi brute gnove.

Te Federazion Russe e va dilunc la politiche inviade di Putin doi agns indaûr cuintri des lenghis “altris”, de lôr presince inte societât e dal lôr insegnament intes scuelis: par protestâ cuintri di cheste situazion il linguist Al’bert Razin, innomenât studiôs de lenghe udmurte e militant a pro dai dirits linguistics de sô int, si à dât fûc e al è muart. Intal Stât spagnûl, vie pe prime part di Setembar, a son muarts doi impuartants musiciscj babelics: il basc Iñigo Muguruza e l’asturian Elías García. Par chel si scoltarà ancje la musiche di Silent Woo Goore, Kortatu, Sagarroi e Llan de Cubel.

Al sarà spazi ancje par une buine gnove. A tacâ dal apontament di chest setemane (vuê in direte, doman e sabide in repliche) si discuvierzarà alc de edizion 2019 di Suns Europe, il festival des arts tes lenghis minorizadis dal nestri continent. Lis primis anticipazions a tocjin la sezion musicâl e i siei partecipants: par esempli i ocitans Mauresca Fracas Dub e il cjantautôr de Basse Sassonie neerlandese Leon Moorman.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Inter – Udinese 1-0

Prime trasfierte dal campionât e seconde sconfite. L’Udin a Milan cuintri dal Inter al zuie une partide discrete, ma al piert parcè che i parons di cjase a mostre di vê plui cûr, plui gjambis e plui cerviel e soredut parcè che si zovin dal vantaç numeric – undis cuintri dîs – che ur ven regalât cu la espulsion dio De Paul al minût 35′ dal prin timp.

L’Udin si presente cun Musso in puarte, cun Becao, De Maio e Opoku in difese, cul esordient Walace, cun Fofana e Jajalo tal mieç, dongje dai laterâi Larsen e Sema, e cun De Paul e Lasagna in atac. La partide e scomence ben pai blancs e neris, che a mostrin di jessi ben taponâts indaûr ma cence masse pôre dal Inter, cundut che i aversaris a mostrin daurman di vê chê di pontâ a chel sucès che almancul par 48 oris ur permetarès di jessi prins in classifiche cun nûf ponts in trê zornadis.

La scuadre di Conte si svicine in curt al gol cuntune conclusion Politano che e va a sbati sul pâl. L’Udin al rispuint cuntun corner di De Paul par Sema che al crosse par Opoku che al tire in puarte a al impegne Handanovic, intant che di chê altre bande, trê minûts plui tart, al è Musso a scugnî vuadagnãsi il pagnut suntun tentatîf di Sensi.

L’Inter al ponte a vierzi la difese blancje e nere cun Lukaku, che però al ven tignût sot voli, al fâs moviment ma nol rive a jessi pardabon periculôs. L’Udin al ten bot indaûr e al prove a atacâ cence pôre e cun determinazion e al mande al tîr Walace, che al cjate ancjemò Handanovic su la sô strade. Passade la prime mieze ore di zûc, l’incuintri al somee avonde eculibrât. Tal zîr di cualchi minût la situazion e cambie a colp: De Paul e Candreva a pitufin, l’argjentin dal Udin i da une sorte di pataf al interist e par chel al ven mandât fûr cul cartelin ros.

Di in chel moment indenant l’Udin al scuen zuiâ in dîs. Lu fâs cun sintiment e cun atenzion, ma magari cussì nol è avonde. I parons i cjase a sburtin e a rivin a viodi se a pluedin gjoldi ad in plen dal vantaç numeric. Prime Politano al impegne Musso e il puartîr furlan al siere la persiane e po dopo de corsie di diestre al rive un biel balon par Sensi che al segne.

Sierât il prin timp cuntun om di mancul e sot di un gol, l’Udin al prove ancjemò a rispuindi pontant su Lasagna e su li sôs cualitâts. L’atacant blanc e neri al scuen fâ dut di bessôl: al cjate ancje la bale buine, al tire ma Handanovic i dîs di no. Sghindât il pericul, al è l’Inter che al torne al atac plui voltis cun Ga.gliardini, cun Brozovic e cun Sensi: a son tîrs fûr bersai o ben che Musso nol à problemis a fâs il so dovê.

Cul passâ dal timp l’Udin al viôt che lis sôs pussibilitâts di indreçâ la partide a van al mancul, massime dopo de conclusion di Becao che no cjate il spieli de puarte. Tudor al mande dentri Mandragora par Walace e Pussetto al puest Sema, ma la situazion no cambie. L’Inter, che vie pe partride  al permet che l’ex blanc e neri Sanchez al fasi il so esordi in chest campionât, al vinç e al devente, almancul par cumò, prin in classfiche. L’Udin al piert e al sbrisse jù in classfiche, ma – lassant in bande la brute ingjenuitât di De Paul, paiade cjare di ducj – al pues consolâsi cul fate che al à zuiât avonde ben e che nol à patît nissune sudizion. Alc al è alc… ma a coventin ancje i ponts in classifiche.

Pordenone – Spezia 1-0


Il Pordenon al torne in Friûl e al torne a vinci. Intal anticipi de tierce zornade dal campionât talian di serie B la scuadre di balon verde e nere al concuiste i trê ponts cuntune partide zuiade cun sintiment e cun cualchi padin, là che a son stâts determinants almancul doi intervents di De Gregorio, che al à sierât la puarte furlane aes conclusions dai atacants dal Spezia, e un golon di Barison.

Il prin timp al è avonde ecuilibrât. Si vierç cuntune conclusion dal Spezia – un tîf fûr bersai di Galabinov – e al va indenant cuntune desene di minûts avonde flaps, che a lassin spazi a une incressite de iniziative dal Pordenon, che al rispuint cuntune biele zirade di Monachello che no cjate la puarte par pôc, e po cun Gavazzi che al oblee Scuffet a mostrâ lis sôs cualitâts.

L’ultin cuart di ore de prime frazion e à tant che protagoniscj i zuiadôrs dal Spezia sei cuant che, cun Ricci, a stracin une bale gol clamorose, sei cuant che i dan di lavorâ a Di Gregorio, che al fâs un miracul suntun tîr di Capradossi.

Passât il dopli pericul e sierât il prin timp in paritât, il Pordenon al scomence la seconde frazion cul acelaradôr fracât. Al rive cussì, daurman, il gol di Barison che cul cjâf al tocje inte maniere juste une punizion di Burrai e al bruse Scuffet. Cinc minûts plui indenant Pobega al imbastìs un biel cross che al ven neutralizât di Capradossi e la pussibilitât di dopleâ il vantaç e va sù pai stecs.

Si torne a zuiâ soredut tal mieç dal cjamp e inte ultime part de gare il Spezia al zuie dutis lis sôs cjartis par jonzi la paritât, ma al paie ancjemò la imprecision dai siei atacants, la buine vuardie fate de scuadre furlane e la puntualitât dai intervents di De Gregorio.

A Lignan la educazion interculturâl e zuie di bale tal zei cul progjet Eu T@P-in

This image has an empty alt attribute; its file name is cropped-eu-t40p-in-logo.jpg

Une iniziative interessante e je stade metude adun tai dîs passâts in Friûl. Dai 31 di Avost ai 8 di Setembar stâts, par iniziative de associazion di promozion sociâl e culturâl KLARIS, si à davuelt a Lignan un scambi internazionâl pai zovins, che al à clamât dongje fantatis e fantants de Polonie, de Ucraine e dal Stât talian.

Il progjet, dal titul Eu T@P-in, al è stât inmaneât inte suaze dal program ERASMUS + de Union Europeane, cul intindiment di davuelzi ativitâts in stât di tignî dongje il sport, la educazion informâl e la cussience civiche europeane. La idee di fonde e jere chê che il sport al è un strument impuartant pe educazion no formâl e la stesse pratiche sportive e je une esperience formative e educative, stant che e jude la acuisizion e il disvilup di competencis e di cognossincis, che a son buinis in contescj varis e diferents.

In sessante di lôr – vincj dal Centri sportîf de Universitât statâl Precarpatiche Vasyl Stefanyk di Ivano-Frankivs’k (Ucraine), vincj dal Circul sportîf AGH Krakow, che al fâs part de Associazion sportive academiche de Universitât di Siencis e Tecnologjie AGH di Cracovie (Polonie) e vincj components di une sorte di rapresentative de regjon Friûl-VJ, metude adut de bande dal Cus Udin e de Società ginnastica triestina – a son stât protagoniscj di laboratoris tematics, di alenaments e di zûcs formatîfs, vuidâts di animadôrs e di alenadôrs cualificâts.

This image has an empty alt attribute; its file name is image-1.png

Inte suaze di Eu T@P-in – il non al è l’acronim di European Training @ Pineta e si riferìs a un mot tecnic particolâr dal basket (il tap-in, la realizazion di un pont cu la corezion al svol di un sbalç dopo di un tîr sbaliât) – a son stâts tancj moments une vore significatîfs sei dal pont di viste dai contignûts che daûr dal coinvolziment emotîf.
Al è il câs des seradis inmameadis dai diviers grups cun chê di presentâ i stâts e i teritoris di divignince, dai laboratoris sul sport e su la educazion multiculturâl e dal torneu conclusîf di basket. O ben chel dal incuintri, miercus ai 4 di Setembar, cul ex zuiadôr di bale tal zei furlan Michele Mian, che si è confrontât cui fantats sui aspiets tecnics dal basket, su la sô esperience sportive e umane e duncje su ce che si pues imparâ e scuvierzi cul zûc.

Il belanç dal progjet Eu T@P-in al è une vore positîf. Lis ativitâts fatis e la partecipazion dai fantats a àn dât conferme concrete aes premetiduris teorichis de iniziative inmaneade de associazion KLARIS e ai principis e ai indreçaments di fonde dal program Erasmus+.

Ducj i sogjets coinvolzûts in Eu T@P-in a àn palesât la lôr sodisfazion, intant dai incuintris di valutazion e vie pal apontament conclusîf, caraterizât de cerimonie di premiazion dal torneu di bale tal zei e de consegne ai fantats dal certificât Youthpass, che al marche la acuisizion no formâl di gnovis competencis e cognossincis, e dal kit informatîf e promozionâl in cont de ufierte culturâl e turistiche de regjon che e ten dongje la plui part dal Friûl cun Triest. Messaçs di preseament pe iniziative a s rivâts ae associazion KLARIS de bande dal Comun di Lignan e de Universitât dal Friûl.