Sapade/Plodn, un toc di Friûl che al torne in Friûl

Ancje la Cjamare dai Deputâts e à votât a pro dal passaç di Sapade/Plodn de Regjon Venit ae Regjon Friûl-VJ. Vuê cualchi minût prime des dôs dopo di misdì al è rivât il vôt finâl: 257 a pro, 20 cuintri e 74 astignûts.

Il test, che al jere za stât fat bon dal Senât, al jere stât fermât ae Cjamare la setemane stade, dopo che il Consei regjonâl dal Venit si veve lamentât che al mancjave il so parê.

Al jere, evidentementri, dome un dai tancj tentatîfs – i ultins a son stâts chei fats di un pôcs di deputâts venits îr tal ufici di presidence e ancjemò vie pe buinore in aule – di blocâ l’iter parlamentâr, di rinviâ la discussion e la votazion e duncje di pidimentâ la conclusion positive dal percors fat de afermazion de volontât de int di chê part di Friûl che e veve voie di tornâ in Friûl, cu la jentrade te Regjon autonome Friûl-VJ.

Par fâle lâ sù pai stecs, i nemîs de tornade in Friûl di Sapade/Plodn lis vevin provadis dutis e a ducj i nivei, e ancje dopo dal vôt a son za chei che i domandin al president Mattarella di no firmâ la leç fate buine vuê.

Ancjemò vie pes ultimis setemanis, però, ancje i sostignidôrs de volontât de int di Sapade/Plodn a àn fat sintî la lôr vôs. Tra chescj e merete segnalade la iniziative cjapade sù de Assemblee de comunitât linguistiche furlane (CLiF), la istituzion che e da rapresetance istituzionâl ai comuns di lenghe furlane che a fasin part de Regjon che e ten dongje la plui part dal Friûl cun Triest, cuntune letare dal so president, il sindic di Cjarlins Diego Navarria, mandade cualchi zornade indaûr ae Presidente de Cjamare, Laura Boldrini.

La buine gnove che e rive di Rome e je stade saludade di tancj di lôr tant che un at di justizie. Chestis peraulis a son stadis dopradis in particolâr de bande de presidente de Regjon Friûl-VJ, Debora Serracchiani.

Tra lis tantis declarazions di sodisfazion e merete ricuardade propit chê dal president de CLiF, Navarria, che al à marcât cemût che «in tancj di lôr a àn poiât la iniziative dai sapadins – e tra chescj a son ancje i sindics furlans – ma soredut che il vôt de Cjamare di vuê al è il risultât de determinazion e dal snait de int di Sapade che par dîs agns e à tignût dûr, sghindant ancje i tancj tramais che ur àn fat une cierte politiche e une cierte burocrazie».

«Cumò – al à zontât Navarria – par dâur acet in Friûl ai sapadins cemût che a meretin, al covente il Friûl, ma cheste ca e je une altre bataie. Par intant, fasìn fieste» . Une fieste par Sapade/Plodn, pal Friûl e pe democrazie.

Advertisements

¡Endavant Poble Català!, doman a Turin si fevele di Catalogne

Une ocasion par cognossi e capî alc di plui in cont de cuistion catalane e dai siei disvilups plui resints. E je chê ufierte de bande di Noi restiamo Torino, che e à inmaneât un incuintri public cun Ícar Aranzo dal SEPC (Sindicat d’Estudiants dels Països Catalans), Arnau Cardona di Arran – Països Catalans e Marco Santopadre, redatôr di Contropiano e Ethnos & Demos, par frontâ l’argoment.

Magari cussì no, cemût che si lei culì, no si sa ancjemò in ce puest che l’incuintri si fasarà. Ce che al è sigûr al è che di une bande o di chê altre l’event al vignarà fat.

L’apontament al è a 5 mancul un cuart sot sere te jentrade grande (chê che le clamin ‘Main Hall’) dal Campus Einaudi de Universitât di Turin in Lungo Dora Siena 100A.

 

Felice e par furlan

Un piçul pas par un om o almancul un pas indenant simbolic pal Friûl.

O cjapìn at cun plasê di ce che nus àn contât, ven a dî che lunis stât, inte suaze de cerimonie pe scree dal cuarantesim dal gnûf an academic, il Retôr di chê che ancje a nô nus plâs clamâle Universitât dal Friûl, Alberto Felice De Toni, al à vût saludât il il President de Republiche Taliane, Sergio Mattarella, ancje par furlan, par sloven e par todesc.

Cun di plui, daûr di ce che si lei ator, tra stampe e web, il Retôr al à dit ancjemò alc altri par furlan.

Denant di cheste forme di rispiet ancje tai siei confronts – e no dome viers dal Friûl – ancje Mattarella i à dit «Mandi» e cussì al à fat biele figure ancje lui.

Nus fâs pardabon plasê. No lu scrivìn par vie che o pensìn che a Palaç Florio a vedin let il nestri blog e il nestri articul, là che o domandavin che almancul cualchindun dai sorestants dal Friûl i des a Mattarella il benvignût in dutis lis cuatri lenghis dal Friûl, e a vedin cjapât sù il nestri sugjeriment. Nus fâs plasê parcè che o pensìn che e sedi stade fate une robe juste.

O sperìn che no sedi la uniche.

Lunis ai 13 Mattarella al sarà in Friûl. Cualchidun i daràjal il benvignût ancje par furlan, par sloven e par todesc?

Lunis ai 13 di Novembar si scree il cuarantesim an academic de Universitât dal Friûl e al sarà presint anche il President de Republiche Taliane, Sergio Mattarella.

Al sarès biel che cualchidun dai sorestants dal Friûl – il Retôr de Universitât, la Presidente de Regjon, il Sindic di Udin… – i des il benvignût tes cuatri lenghis dal Friûl e cussì i disès ancje: «Sâr President, benvignût in Friûl. Gospod Predsednik, dobrodošli v Furlaniji. Sehr geehrter Herr Präsident, willkommen in Friaul».

Cualchi an indaûr al jere sucedût. Cemût che si lei culì, il Sindic di Faedis di in chê volte, Cristiano Shaurli, jal veve dit al President de Republiche di in chê volte, Giorgio Napolitano, e i veve ancje consegnât un document, prontât dal Comitât/Odbor/Komitaat/Comitato 482, che al domandave propit l’intervent dal President, tant che “garant de Costituzion”, a pro de metude in vore ad in plen des leçs di tutele e duncje a pro de garanzie plene di chei dirits ricognossûts in tiermin formâi de Leç fondamentâl de Republiche e di ches altris normis specifichis, cemût che a domandin ancje in Europe.

Cumò Shaurli al è Assessôr regjonâl. Al podarès tornâ a fâ chel ‘beau geste’ lui o ben al podarès sugjerîjal a cualchidun dai siei coleghis.

Un intervent di chê fate al larès ben ancje cumò.

E larès ben ancje une gnove sugjestion a pro de metude in vore pardabon des leçs di tutele des minorancis linguistichis. Magari cussì no, al è ancjemò tant ce fâ in chest cjamp.

Cundut achel un salût di chê fate al sarès za alc di bon. Al sarès une forme di rispiet, no dome pe int dal Friûl ma pal stes President, te sô persone e te sô istituzion.

La Republiche taliane e je di ducj: ancje dai citadins dal Friûl che a son di lenghe furlane, di lenghe slovene e di lenghe todescje.

Nus covente almancul un biel segnâl, in linie cui principis di fonde de Costituzion e cun chei de Europe unide te diversitât.

Al torne Babêl Europe, un viaç de Corsiche al Gales e un ricuart de ‘Cjarte di Strasburc’

Vuê al è martars e su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Dopo dal speciâl di cuindis dîs indaûr, dedicât dut ae Catalogne, cheste gnove pontade e presentarà un percors une vore svariât tra lenghis. musichis, minorancis e nazions cence stât, che al partìs de Corsiche, al tocje la Estonie, la Ongjarie e il Friûl e al rive in Gales.

Si podarà scoltâ musiche par cors, par votian (antighe lenghe ugro finiche de regjon baltiche che e je pardabon in vie di estinzion), par romanes, par furlan e par galês, cun Cantelli, Raud Ants, Karavan Familia, Franco Giordani e Gruff Rhys.

Si fevelarà ancje di storie, di istituzions europeanis, di dirits linguistics e di tutele des minorancis, in ocasion dal inovâl a pene passât de aprovazion de bande dal Parlament European (ai 16 di Otubar dal 1981) de cussì clamade Carte di Strasburc, la prime cjolte di posizion di un orghin comunitari a pro de diversitât linguistiche e culturâl e de protezion des minorancis e dai lôr dirits, cognossude ancje cul non dal so reladôr, Gaetano Arfè.

Dopo de prime emission in direte, cheste gnove pontade di Babêl Europe e torne te programazion di Radio Onde Furlane in repliche: doman, miercus ai 18 di Otubar, a une dopo di misdì, e ancjemò sabide ai 21 a une e mieze.

Cun di plui si podarà tornâle a scoltâ tal sît internet de radio libare dai furlans.

 

Catalogne, prime e dopo (e in bande) dal Referendum dal prin di Otubar

A son passâts cuindis dîs dal prin di Otubar, cuant che in Catalogne in 2.286.217 di lôr a àn rivât a cjapâ part a chel referendum che a Madrid a disevin che nol veve di jessi fat e che fintremai cualchidun al à declarât che nol è stât. In spiete di viodi ce che al nas, dopo de declarazion dal president de Generalitat de Catalunya, Carles Puigdemont, fate denant dal Parlament catalan martars stât, e dopo de gnove reazion dal president dal guvier spagnûl, Mariano Rajoy, tra domandis retorichis di sclariment e altris menacis «costituzionâls»,  o pensìn che al sedi il câs di frontâ la cuistion ancje tal nestri blog, stant che e tocje argoments che nus interessin une vore (a tacâ de garanzie e dal rispiet dai dirits di fonde, de partecipazion democratiche, dal autoguvier e de Europe).

Prin di dut no si pues fâ di mancul di marcâ il fat che tancj catalans a àn votât e che lu àn fat in cundizions pardabon griviis e penzis.
Za di timp il guvier di Madrid e diviers tribunâi a vevin metût in vore une schirie di azions par che il referendum nol vignìs fat, tra denunciis, percuisizions e arescj, ma tes ultimis dôs setemanis di Setembar la situazion e je deventade ancjemò plui pesante.
Te smicje dai judiçs e des fuarcis di polizie a jerin in particolâr passe sietcent sindics e un biel trop di funzionaris de Comunitât autonome. Cuant che e je lade al mancul la ricercje des schedis e des urnis, la Guardia Civil e la Policia Nacional si àn discjadenât cuintri de int che e veve chê di votâ e di permeti a chei altris di votâ.

La azion dai doi cuarps statâi di polizie e je stade pardabon une vore violente. Ancje i Mossos d’Esquadra, la fuarce di polizie de Comunitât autonome de Catalogne, inte suaze des restrizions dai podês des istituzions autonomichis catalanis inviade ancjemò ae vilie dal prin di Otubar, a àn scugnût meti in vore une azion repressive pe sierade dai coleçs eletorâi, ma lu àn fat intune manioer plui serie – a àn sierât in maniere ‘preventive’ sù par jù 250 seçs – e cence fâur mâl a di nissun. La Guardia Civil e la Policia Nacional invezit a àn vût sierât mancul di un centenâr di seçs ma a àn pestât un grum di lôr – a son sù par jù 900 i ferîts – e a àn fintremai devastât cetantis scuelis là che la int e veve di votâ: tra bancs, scrivaniis e fintremai gabinets disfats si calcole che a sedin stâts fats dams par passe 300mil euros.

Il numar di chei che a àn rivât a votâ al è stât plui alt di chel dai votants dai 9 di Novembar dal 2014, cuant che une consultazion sù par jù compagne – ancje chê considerade fûr leç, ma fate cence i condizionaments di cheste volte – e veve viodût la partecipazion di 2.236.806 di lôr. La afluence aes urnis in Catalogne pal referendum dal prin di Otubar e je stade plui alte, in tiermins percentuâi di chê di chei che, in dut il Stât spagnûl (ator dal 42%) e ancje inte Generalitat (sù par jù il 41%), tal 2005 a jerin lâts a votâ pe ratifiche dal Tratât pe Costituzion de Union Europeane.
Dongje di chei che par vie des violencis des fuarcis dal ordin (…) a son stâts «libars di scugnî no votâ», par vie des pachis cjapadis o ben ancje pe pôre di cjapâlis, altris di lôr, macolâts o sinistrâts, no àn molât, a son restâts in code denant dai seçs e ae fin a àn esprimût la lôr volontât te schede eletorâl. Cun di plui, si calcole che almancul 700mil di lôr no àn podût esprimi la lôr volontât, o par vie che ur àn puartât vie lis schedis par votâ o ben parcè che ur àn puartât vie lis schedis za votadis. E se si contassin ancje chei la percentuâl e sarès plui dal 50%…

In cualsisedi maniere, tancj di lôr a àn votât. A pro de indipendence e ancjemò di plui cuintri de arogance di Madrid, che massime a tacâ dal 2010 cu la sentence dal Tribunâl costituzionâl in cont dal ricors cuintri dal gnûf Statût di autonomie – za ridimensionât intant dai siei passaçs tra Barcelone e Madrid, jenfri il 2003 e il 2006 – i à fat cuintri ae volontât di autoguvier dai catalans, che almancul fintremai al 2010 e al 2012 e jere cuasit dome di caratar autonomist.

La aspirazion indipendentiste e je cressude parie cul nazionalisim e cul centralisim çondar dal Guvier spagnûl. La aspirazion indipendentiste, che si insuaze inte crisi gjenerâl dal Stât spagnûl, e je stade une rispueste ae sieradure categoriche e ideologjiche de bande dai sorestants di Madrid.

Si podarès dî che la strategjie di Rajoy e dai siei, par fâur cuintri ai catalans, e je stade falimentâr. Cun di fat, Madrid nol à rivât a evitâ il referendum e cu la sô ande al à fat cressi il numar di chei che a volevin esprimi il dirit a decidi e, tra chescj, di chei che a jerin e che a son a pro de indipendence.
Però, cjalant cemût che a son ladis daûr a disvilupâsi lis robis, si podarès fintremai pensâ il contrari: al Guvier di Madrid e ae sô propagande ur coventave e ur covente un nemì. Dopo che tai mês passâts, tal Paîs Basc, si à sierât il disarmament unilaterâl di ETA, cu la indiference o forsit cul displasê de Moncloa, a cui che al comande a Madrid, che magari al à ancje cualchi fastidi cu la justizie, i coventave indreçâ la plui part de opinion publiche cuintri di un altri nemì che al pues fâi cuintri ae «sacre» unitât de nazion «Una, Grande y Libre».

Chest ategjament di ostilitât al à tornât a palesâsi in plui ocasions: dal discors dal re Felipe VI, in chel istès flap e arogant, cun peraulis che a àn butât benzine sul fûc, al auguri fat di un esponent dal PP spagnûl al president catalan Puigdemont di fâ la stesse fin dal so predecessôr Lluìs Companys i Jover, arestât dai naziscj e copât dai franchiscj juste setantesiet agns indaûr (ai 15 di Otubar dal 1940), fintremai ae menace dai vertiçs dal Guvier spagnûl di meti in vore chel articul 155 de Costituzion dal Ream di Spagne, che al proviôt la pussibilitât di ridimensionâ e scjafoiâ lis prerogativis di autoguvier des Comunitâts autonomis in câs di mancjât rispiet de Costituzion stesse o di pericul pai interès gjenerâi dal Stât.

In confront, l’ategjament de societât civîl catalane e dai siei rapresentants politics al è stât simpri plui viert a pro dal dialic e a pro de soluzion dal conflit. Al è ce chel salte fûr a fuart de resistence no violente e ghandiane de int, denant dai manganei e dai proietii di gome de Guardia Civil e de Policia Nacional, e salacor de stesse declarazion in cont de indipendence «metude in glacere», fate indenant di Puigdemont ai 10 di Otubar, juste cun chê di cirî un confront positîf e une mediazion internazionâl.

Vie par chestis setemanis dut il mont al à viodût la int de Catalogne in place. Prime dal vôt, cun chê domandâ di esprimisi e di protestâ cuintri dal ategjament dal Guvier di Madrid, des formis preventivis di repression judiziarie e de propagande dai media spagnoliscj. Il prin di Otubar, cun chê di votâ e – magari cussì no – ancje par cjapâlis dai pulizais, che no à vût pietât par nissun. Tai dîs seguitîfs cun altris manifestazions massivis, un pôc dapardut, a tacâ dal siopar dai 3 di Otubar.
E dut il mont al à viodût la violence esagjerade des fuarcis dal ordin…

Domenie stade si à viodude ancje altre int in place, che impen e palesave la sô posizion cuintri de indipendence e soredut cuintri dai indipendentiscj. A jerin in tancj di mancul di chei viodûts, cun intindiments contraris, in diviersis ocasions e salacor tancj di lôr a rivavin di altris bandis dal Stât spagnûl: une sorte di «visitors» o ben une sorte di conferme dal atrat turistic de Catalogne e soredut di Barcelone…

Cun rispiet ancje par chês posizions, no si pues fâ di mancul di marcâ l’ategjament conflituâl di tancj di lôr e salacor ancje un ciert fanatisim nazionalist spagnûl, che in tancj câs al è cuinçât, plui o mancul a palês, des nostalgjiis pal regjim franchist. In cheste suaze no si pues fâ di mancul nancje di marcâ lis contradizions fuartononis che si cjatin dal discors dal scritôr peruan Mario Vargas Llosa, cuintri dal nazionalisim catalan calcolât «divisîf» e imbombât di un unitarisim spagnolisim retoric, sglonfât e par sigûr pôc tolerant e rispietôs.

Ce che al è sucedût in Catalogne, tal Stât spagnûl, tai ultins agns e tes ultimis setemanis, al palese a plen no dome la crisi dai Stâts nazionâi ma ancje chê de Union Europeane fate sù dai Stâts nazionâi, che no i permetin di jessi ni Union e nancje Europeane, cemût che, magari cussì no, si à viodût in tantis altris ocasions e in particolâr in chest câs specific prime cul cidinôr e po cu lis cjoltis di posizion dai vertiçs di Bruxelles.
Al è pardabon un pecjât…

Dai «estibadors» dai puarts di Barcelone e Tarragone ai students des universitâts, dai comitâts di cuartîr aes associazions des fameis dai fruts che a van a scuele, dai pompîrs, autentics erois popolârs che a àn difindût la int de violence de Guardia Civil e de Policia nacional, e fintremai ai Mossos de Esquadra, i pulizais «regjonâi» che a àn scugnût gloti l’ordin di Madrid ma àn sierât i seçs eletorâi cence pestadicis… si à viodût dut un popul in moviment, cun chel stes spirt che si veve palesât za timp indaûr, sei tes manifestazions a pro dal bon acet dai rifugjâts che tes reazions cuintri dai atentâts dal Isis dai 17 di Avost.

Cun di plui tes rivendicazions di autuguvier de Catalogne si rive a vualmâ une volontât di trasformazion de societât in miôr inte direzion de garanzie di chei dirits di fonde, civîi e sociâi che a son simpri plui menaçâts.

Ancje il fat che te schede di chel referendum – legjitim, ilegâl, sospendût o inestistent che al sedi… – la domande «Volêso che la Catalogne e sedi un stât indipendent in forme di republiche?» e sedi stade fate tes trê lenghis de Catalogne (par catalan, par spagnûl e par ocitan) nus somee interessant.
Tant a dî che une altre Europe e je necessarie e salacor pussibile: une Europe dai citadins, pardabon «unide te diversitât».

No savìn cemût che e larà a finîle, ma o pensìn che il braç di fier tra Madrid e Barcelone nol sedi dome une cuistion interne dal Ream Spagnûl… Di cheste situazion di crisi si pues saltâ fûr o cuntune crisi piês o cuntune situazion miôr. Viodarìn ce che al nas.

Note. Par savênt alc di plui de cuistion, par lei e scoltâ alc che nus somee une vore plui di sest de plui part des robis che vie par chestis setemanis o vin let e scoltât in cont di chest argoment, ve chi cualchi sugjeriment (di articui, intervents e coments fats ancje cun visions diferentis, che no son necessariamentri in linie cun chê che e je la opinion su la cuistion che o palesìn tal nestri blog):

a) i speciâi di Radio Onde Furlane: https://www.spreaker.com/show/speciai-catalogne

b)  La cronache dai acjadiments principâi des ultimis dôs setemanis organizade par zornadis par cure dal blog di Internazionalitari, storiche trasmission di Radio Onde Furlane
http://internazionalitari.blogspot.it/2017/10/catalogne-di-par-di-la-cronache-des.html

c) cualchi articui jessût tai ultins numars de La Patrie dal Friûl, che si piues leiju ancje in rêt
http://www.lapatriedalfriul.org/?p=19366
http://www.lapatriedalfriul.org/?p=19370
http://www.lapatriedalfriul.org/?p=19402

d) la rubriche Friûl Europe de La Patrie dal Friûl
http://www.lapatriedalfriul.org/?cat=81

e) i Quaderni catalani di Andrea Geniola
http://www.qcodemag.it/category/blog/quaderni-catalani/

f) I tancj riferiments che si cjatin tes pagjinis Facebook di Ethnos & Demos – Identità, culture, diritti e integrazione in Europa

g) il coment di Alfonso Botti
https://www.mentepolitica.it/articolo/la-questione-catalana-dopo-la-dichiarazione-da-indipendenza-a-met-di-puigdemont/1255

h) il coment di Adriano Cirulli su Radio Blackout
http://radioblackout.org/2017/10/catalogna-il-desiderio-di-separarsi-dallausterity/

i) la interviste cul politolic valenzian Jordi Muñoz
http://www.publico.es/politica/entrevista-jordi-munoz-independentismo-convertido-elemento-estructural-sociedad-catalana.html

l) i articui di Marco Santopadre su http://www.contropiano.it
http://contropiano.org/news/internazionale-news/2017/10/11/puigdemont-retromarcia-repressione-096548
http://contropiano.org/news/internazionale-news/2017/10/10/barcellona-fascisti-giorno-096529
http://contropiano.org/news/internazionale-news/2017/10/08/puigdemont-tsipras-bivio-096439
http://contropiano.org/news/internazionale-news/2017/10/06/catalogna-scenario-greco-096387
http://contropiano.org/news/internazionale-news/2017/09/28/unione-europea-catalogna-096030
http://contropiano.org/news/internazionale-news/2017/09/27/catalogna-madrid-polizia-seggi-096014
http://contropiano.org/news/internazionale-news/2017/09/21/catalogna-polizia-portuali-sciopero-095797
http://contropiano.org/news/internazionale-news/2017/09/22/catalogna-comunque-vada-madrid-gia-perso-095810

m) i articui di Steven Forti su MicroMega
http://temi.repubblica.it/micromega-online/catalogna-verso-la-dichiarazione-unilaterale-d-indipendenza/
http://temi.repubblica.it/micromega-online/catalogna-tra-repressione-e-possibili-scenari/

Dai 19 di Otubar ai 17 di Novembar a Udin a son lis gnovis Lezions di Autonomie

LabAut

Si scree vuê a Udin une gnove serie di Lezions di Autonomie.
Dai 19 di Otubar ai 17 di Novembar a saran altris cinc incuintris tematics par resonâ de atualitât, de storie e dal avignî dal Friûl e soredut par frontâ une schirie di argoments che a tocjin la teorie e la pratiche dal autoguvier teritoriâl, ancje cuntun confront cun altris realtâts dal Stât talian e dal rest de Europe, tant che la Val di Aoste, il Tirôl dal Sud e il Paîs Basc.

La iniziative e je promovude dal Laboratori di Autonomie, la rêt che e ten dongje vincjeun comuns dal Friûl e di une schirie di entitâts e istituzions. des associazions La Grame e  Patrie dal Friûl a Radio Onde Furlane e fintremai al Modul Jean Monnet MuMuCEI de Universitât dal Friûl.

Lis cinc gnovis Lezions di Autonomie si fasaran dutis a Udin li de Sale Florio dal Retorât de Universitât dal Friûl.

uniud

Tal prin incuintri si fevelarà di autonomie economiche e politiche-aministrative e al è proviodût ancje l’intervent dal jurist e politic valdostan Roberto Louvin.

Tes lezions seguitivis a vignaran frontâts i temis dal rapuart tra identitâts linguistichis e autonomie, de scuele e de competence primarie su la istruzion che i coventarès centant ae regjon Friûl-VJ, di Europe, tutele des minorancis e politichis linguistichis e di cemût che la specificitât linguistiche e je un valôr ancje in tiermins economics, a tacâ de esperience de Comunitât autonome basche, là che a pro de lenghe basche si investìs l’1% dal belanç regjonâl e chest al prodûs il 5% dal prodot interni sporc de regjon, cemût che al jere stât contât l’an passât inte suaze de seconde taule taronde Friûl@Europe.

Ducj i incuintri a tachin a 6 sot sere. La partecipazion e je libare e al ven conseât di notâsi prime cun chê di vê sigurece di cjatâ puest.

Il program in detai si pues leilu achì.

lezions_2016_2017

 

I 35 agns de «Cjarte di Strasburc», un inovâl impuartant pe Europe «unide te diversitât»

0515_lengate

Chê dai 16 di Otubar e je une date impuartantone par cui che i ten ae diversitât culturâl, ai dirits linguistics, ae tutele des minorancis e plui in gjenerâl ae democrazie e ae prospetive di une Europe «unide te diversitât».

In chê dì di trentecinc agns indaûr – juste ai 16 di Otubar dal 1981 – il Parlament european al faseve buine la Risoluzion suntune Cjarte des lenghis e des culturis regjonâls e suntune Cjarte dai dirits des minorancis etnichis, cognossude ancje cul non dal so reladôr, l’eurodeputât socialist talian Gaetano Arfè.

Chê Risoluzion e je la prime cjolte di posizion uficiâl in cont di chestis cuistions de bande dai rapresentants dai citadins di chê che in chê volte e jere la Comunitât economiche europeane. La sô aprovazion e i siei contignûts si insuazin intun contest politic e sociâl che al palese la situazion di crisi dal stât nazionâl e la incressite de dibisugne di democratizazion a ducj i nivei istituzionâi e teritoriâi e là che si cjatin dongje il cussì clamât revival  etnic e la gnove fase di avanzament dal procès di integrazion continentâl rapresentade des primis elezions europeanis dal 1979.

libri_stolfo_arfe

Propit chel gnûf leam tra eletôrs e elets al marche un svolt pardabon rilevant par ce che al tocje la evoluzion des istituzions comunitariis, stant che di in chê volte, su la fonde de sô elezion direte, il Parlament european al devente par sigûr plui rapresentatîf dai citadins.

Cun di plui chel stes Parlament european che ai 16 di Otubar 1981 al vote in maiorance a pro de cussì clamade «Cjarte di Strasburc», ai 14 di Fevrâr dal 1984 al fasarà bon ancje il Progjet di Tratât de Union Europeane  fat indenant di Altiero Spinelli, che di chê altre bande al veve dade la so poie ae Risoluzion promovude di Arfè.

La relazion tra citadins e eurodeputâts e je determinante ancje par che il Parlament european al puarti ae atenzion di chei altris orghins comunitariis lis cuistions che a tocjin minorancis, lenghis e tutele.
Cun di fat, vie pe campagne eletorâl des europeanis dal 1979 diviers citadins che a fasin part di minorancis e nazions cence stât a sburtin i candidâts a fâ alc par che a nivel comunitari al vegni fat alc che al zovi al ricognossiment e ae garanzie dai dirits linguistics e che al meti ancje i Stâts – par esempli chel talian e chel francês – tes cundizions di indotâsi di une normative e di politichis di pueste. Al è che che al sucêt ancje in Friûl, là che Arfè al à contats e ocasions di confront cun diviers rapresentants des comunitâts furlanis e slovenis.
Par chel si pues dî che la «Cjarte di Strasburc» e je nassude (ancje) in Friûl.

bandiera-europa

Chel test al palese, in cont di lenghis, minorancis e tutele, une vision che e je moderne e globâl, stant che su fondis teorichis une vore saldis al fronte l’argoment no dome tai siei aspiets culturâi, ma ben ancje dal pont di viste juridic e politic cuntun orientament a clâr europeist.

Propit par chel la prime Risoluzion Arfè e je «fie dai siei timps», ma e je ancje di grande atualitât.

Prin di dut, la «Cjarte di Strasburc» e sclarìs cemût che la tutele di chês comunitâts, dai lôr dirits e des lôr lenghis, che il podê dai Stâts ur à fat cuintri o a palês o in cidin, no rispuint dome a une dibisugne culturâl ma e je ancje la metude in vore di principis di fonde tant che libertât e avualiance. Cun di plui, e proferìs ancje une schirie di indicazions operativis che a son concretis e coerentis cun chei principis stes e che a tocjin azions e intervents tai cjamps de istruzion, dai media e de vite publiche.

La sô impuartance storiche pe tutele des minorancis in Europe e je ancje intai siei efiets.
A son chei imediâts, tant che l’inseriment di cheste cuistion inte suaze des politichis comunitariis, cu la viertidure tal 1983 di une gnove linie di belanç che almancul fintremai ae fin dal secul passât i à dât ae Comission europeane la pussibilitât di sapontâ progjets e iniziativis di tutele e di promozion cun contribûts di pueste.
E a son chei che no cognossin limits di timp, che a rindin la «Cjarte di Strasburc» un pont di riferiment in Europe sei pes rivendicazions che pes politichis di tutele.

arfe

Par chel al è ben e al convent ricuardâ chê Risoluzion e il so reladôr e memoreâ chest inovâl, cemût che e veve fat cuindis agns indaûr la Provincie di Turin, cemût che a àn fat in chescj dîs in Friûl la associazion KLARIS e Radio Onde Furlane e cemût che o fasìn ancje nô cun chest articul e cul invît a documentâsi e a lei alc altri in cont de «Cjarte di Strasburc», par furlan e par talian.

‘Friûl SotSore’, Onde Furlane e conte il taramot e la sô ‘int’

foto_taramot

Il taramot dal 1976 al va «in Onde». Di doman, sabide ai 24 di Setembar, la programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont su internet ae direzion www.ondefurlane.eu) si insiore di un spazi gnûf che al partìs dal cuarantesim inovâl dal sisme che al à sdrumât il Friûl par ricuardâ chei moments, par contâ chê storie e chês storiis e par meti adun une riflession in cont di chê esperience, di soference, di solidarietât e di citadinance ative.

L’apontament si clame Friûl SotSore e al marche une serie speciâl di Dret & Ledrôs, la rubriche setemanâl di aprofondiment gjornalistic, curade e cundusude dal diretôr de emitente, Mauro Missana, in onde la sabide a buinore di 9.30 a 11.

«In ocasion di chest inovâl – al sclarìs Missana – a son stadis diviersis iniziativis celebrativis, là che in maniere plui o mancul cussiente e je stade fate indenant une cierte vision dai fats: una ‘vulgata’ retoriche che e conte che la ricostruzion dal Friûl e je stade concuardade tra un guvier talian ‘iluminât’ e un guvier regjonâl eficient sul cjâf de int».

La iniziative e vûl fâi cuintri a cheste rimozion, parcè che, cemût che al marche Missana, «i furlans a àn pierdût la memorie di chê solidarietât che il taramot al à discjadenât dentri e fûr dal Friûl, des mobilitazions, des lotis popolârs e des esperiencis di autoguvier dal bas. Cheste memorie e cheste cussience a coventin ancje parcè che solidarietât, mobilitazion e autoguvier a tornin a jessi temis di strente atualitât».
La prime pontade di Friûl SotSore e je dedicade al Friûl dai agns Setante dal secul passât, che al jere une tiere cun diviers elements di conflit sul plan sociâl e politic. «Cognossi cheste suaze – al zonte ancjemò il diretôr de ‘Radio libare dai frulans’ – al jude a capî lis dinamichis che si viodaran po intal Friûl taramotât».

logo_web

Par frontâ chescj argoments, Mauro Missana e Antonio Buiani a varan ospits in studi il gjornalist Andrea Valcic, in chê volte militant de çampe extraparlamentâr, e Ferruccio Saro, che al presentarà il so pont di viste, daûr de sô esperience, in chei agns, di sindic dal Psi. A son previodûts ancje i intervents dal ricercjadôr Tiziano Sguazzero, specialist te storie dai partîts politics, di Giorgio Cavallo, che al jere atîf te çampe extraparlamentâr, di Renato Fiorelli, esponent de aree radicâl e ecologjiste e dal gjornalist Toni Capuozzo, in chê volte ancje lui atîf te çampe extraparlamentâr.

Tes pontadis seguitivis di Friûl SotSore si fevelarà ancje di altris argoments: de ricostruzion tra Comuns, Regjon e Stât centrâl; dal taramot de int, tra mobilitazions e autoguvier locâl; des rivendicazions e des bataiis che a son saltadis fûr; di chei teritoris furlans che a son stâts sacodâts ma ancje dismenteâts; dal cussì clamât ‘model Friûl’ e dai elements di resonaments che a divegnin di chê esperince pal Friûl di vuê e di doman.

Il prin apontament cun Friûl SotSore si podarà scoltâlu in repliche ancje domenie ai 25 di Setembar a 8 a buinore.

Cun di plui, dongje che in modulazion di frecuence e in internet, Radio Onde Furlane si pues scoltâle su smartphone, Iphone, tablet e Ipad, doprant la aplicazion specifiche che si le discjame de rêt daûr des indicazions che si cjatin ae direzion www.ondefurlane.eu.

taramot-2

‘Idee di Sardegna. Autonomisti, sovranisti, indipendentisti oggi’, trê presentazions a Casteddu, Tàtari e Nùgoro di vuê a vinars

cuviertele_pala

Idee di Sardegna. Autonomisti, sovranisti, indipendentisti oggi al è il titul dal biel libri di Carlo Pala, politolic de Universitât diTàtari, che al presente la storie e la situazion dal dì di vuê des ideis di identitât, di autoguvier e di autodeterminazion e des personis e des fuarcis politichsi che lis puartin indenant.

La publicazion, dade fûr di cualchi setemane de bande dal editôr Carocci, e sarà la protagoniste di trê incuintris di presentazion, che si davuelzaran usgnot, doman e passant doman a Casteddu-Cagliari, Tàtari-Sassari e Nùgoro-Nuoro.

Il prin apontament al è vuê a Casteddu, li de Aule Magne de Ex Facoltât di Siencis politichis de Universitât (v. Sant’Ignazio 78) a 5 e mieze sot sere.
L’incuintri, coordenât dal gjornalist Giuseppe Meloni, al sarà viert dal salût di benvignût de diretore dal Dipartiment di Siencis Sociâls e Istituzions dal Ateneu di Casteddu (UniCa), Cecilia Novelli, e al proviôt i intervents di Gianfranco Bottazzi (UniCa) e Michel Huysseune (Vrije Universiteit Brussel).

Il secont al è doman, ai 22 di Setembar, a chê stesse ore, a Tàtari, li de Universitât (UniSs) Aule dal Consei dal Dipartiment di Jurisprudence (v. Mancini 5), cu la jentrade dal diretôr dal Dipartiment, Gian Paolo Demuro, e i intervents di Omar Chessa (UniSs), Adriano Cirulli (Universitât telematiche Uninettuno – Utiu) e Michel Huysseune (Vrije Universiteit Brussel).

Il tierç al è vinars ai 23, ancjemò a 5 e mieze sot sere, a Nùgoro, li de Aula Magna de Universitât (v: Salaris 18): salûts di benvignût di Fabrizio Mureddu (Comissari pal Consorzi pe promozion dai studis universitaris te Sardegne di mieç), Andrea Soddu (Sindic di Nùgoro) e Gian Paolo Demuro (diretôr dal Dipartiment di Jurisprudence de UniSS), jentrade e coordenament di Salvatore Cubeddu (diretôr de Fondazione Sardinia) e intervents ancjemò di Adriano Cirulli (Universitât telematiche Uninettuno – Utiu) e Michel Huysseune (Vrije Universiteit Brussel).

In ducj i incuintri al sarà presint ancje l’autôr.