Buine Zornade Furlane dai Dirits!

1511

Chê di vuê e je une zornade particolâr, pe storie e pe atualitât dal Friûl. Cun di fat al è l’inovâl de “Joibe Grasse” dal 1511, riviel popolâr che al sclopà a Udin e si slargjâ inte plui part de Patrie.

Al è un fat storic une vore impuartant, par plui resons: al è un dai tancj moments là che i popul furlan al à mostrât dignitât, personaliât e cussience di se; e je la prime grande insurezion de Europe de Rinassince; e je une ocasion là che in particolâr i contadins furlans a àn cjapât sù une vere sogjetivitât politiche, che tra lis altris, un pôcs di agns plui indenant, tal 1533, e cjatà un vêr ricognossiment istituzionâl inte cussì clamade “Contadinance”.

Par chestis motivazions e pal fat che il riviel dal 1511 al è stât fat cuintri de prepotence dai nobii e pe difese dai “dirits antîc” des comunitâts rurâl, lis associazions e chês altris entitâts des comunitâts furlane, slovene e todescje dal Friûl, che si dan dongje tal Comitât/Odbor/Komitaat/Comitato 482 ancjemò tal 2004 a à sielzude cheste date tant che “Zornade Furlane dai Dirits”.

Chê dai 27 di Fevrâr e je  une ocasion speciâl par fâ une riflession sui dirits, soredut chei che a son ricognossûts su la carte ma che masse dispès in concret a vegnin ignorâts, menaçâts, sbeleâts e fintremai scancelâts. E ogni an a vegnin fatis iniziativis di pueste e alc dal gjenar al è stât fat in passât, tal sô piçul, ancje de bande de associazion Lidrîs e Butui.

Un dai sogjets plui atîfs tal memoreâ la “Joibe Grasse”, la sô storie e i siei leams cu la contemporanitât, propit in cont di dirits, di partecipazion e di democrazie, al è Radio Onde Furlane, che inte zornade di vuê e fâs indenant une programazion  specifiche, che si pues scoltâle ancje vie internet, ae direzion www.ondefurlane.eu.

Udinese – Napoli 0-0

Udinese Calcio v FC Internazionale Milano - Serie A

L’Udin al à cjapât un pont cuintri de seconde in classifiche. No à fat goi, ma no’nd à nancje cjapâts.
No à vinçût – cemût che al sucedeve simpri tes ultimis partidis in cjase – e però no à nancje pierdût.
Si à difindût ben e al à fermât il Napoli, che però nol è someât cussì fuartonon.

In “zone Europe” al va indenant ancje il Catania e e torne a movisi ancje la Rome. L’Udin al reste indaûr, in chest sens, ma almancul si vicine a “cuote 40” e la salvece e je sigure.

Il biel (o il brut?) di dutis chestis riflessions al è che a tegnin dongje realisim, une ande otimisiste e un profîl bas, bassissim, minimalist. Forsit un pôc di plui di chel che al covente.
Sul sît uficiâl de societât l’otimisim nol fâs rime cul minimalisim e cheste e je une buine gnove.

De partide di lunis a saltin fûr la conferme de cualitât e dal «moment sì» di cierts zuiadôrs – par esempi Basta – e de fase negative di chel che al reste un om fondamentâl pal Udin, Totò Di Natale, che al somee vitime de maledizion dal gol numar 150. Saraial il câs di clamâ un esorcist?

Prossime pontate: Pescara. Che nol sedi compagn che a Gjenue, par plasê.

La Patrie dal Friûl, gnove grafiche resistente

rotativis-300x174

I media inte lenghe proprie a son fondamentâi pe tutele des minorancis. Al è par chest che ai sogjets impegnâts a fâ informazion e comunicazion doprant lis lenghis minorizadis ur ven ricognossude une funzion strategjiche che e à sei un valôr culturâl sie une rilevance di caratar politic, stant che dirits linguistics e libertât di espression e di informazion a son elements di fonde pe democrazie.

Cun dut achel, propit i sogjets impegnâts in chest cjamp a son chei che a patissin di plui i tais indiscriminâts dai fonts publics. I esemplis, soredut tai ultins agns, no mancjin, dal Piemont, là che za timp indaûr al veve manifestât chestis dificoltâts il storic mensîl ocitan Ousitanio Vivo, al Friûl.

Achì, in particolâr, la situazion e je deventade une vore grivie par Onde Furlane, la storiche “radio libare dai furlans”, par Radio Spazio 103 e pal setemanâl dai slovens de provincie di Udin, Novi Matajur, cemût che o vin ricuardât cualchi setemane indaûr.

Une altre realtât, che compagn des dôs emitentis ricuardadis cumò denant, e je stade colpide a fuart dai ultins tais dai fonts pai ents ricognossûts tant che primaris pe tutele de minorance linguistiche furlane e pe promozion de sô lenghe, e je la clape di culture La Patrie dal Friûl, che e da fûr il mensîl omonim.

Par fâi cuintri a cheste situazion, “La Patrie” e à decidût di rispuindi «cu la fuarce de reson, cu la inteligjence des ideis, cul spirt dal riviel»: cuntun gnûf progjet grafic che al vignarà presentât ai 23 di Fevrâr a Udin li dal bar dal Visionario.
L’apontament al è pes 5 sot sere.

Zornade internazionâl de lenghe mari

poster2013

Chê dai 21 di Fevrâr e je une date impuartante par cui che i ten al pluralisim linguistic e culturâl. Cun di fat, a tacâ dal 2000, e je la ‘Zornade internazionâl de lenghe mari’.

La ricorence, proclamade de bande de Conference Gjenerâl de UNESCO ae fin dal 1999, e à chê di promovi il valôr de diversitât linguistiche e il dirit di doprâ la lenghe proprie.

La rilevance de dimension dai dirits linguistics in cheste iniziative e salte fûr a clâr inte date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
Tra lis altris, in chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

In cont de diversitât culturâl e dai dirits linguistics e duncje dal significât de ‘Zornade’ al è simpri di atualitât il sproc di une campagne promovude dal Ufici european pes lenghis mancul dopradis ancjemò tai agns Novante: «Lis lenghis a son di amâ e no di meti sot veri».

Chel stes invît a doprâ lis lenghis cun amôr, cun rispiet e in maniere normâl si lu cjate inte frase par inglês, «Use it, don’t lose it», sielzude dal Consei de Europe par fâ cognossi i contignûts de ‘Cjarte europeane des lenghis regjonâls o minoritariis’.

A son invîts e indicazions che, cun dut des lôr motivazions saldis e fuartononis, a stentin ancjemò a vignî metudis in vore, in particolâr tal Stât talian.
In Friûl, par esempli, intant de campagne eletorâl pes votazions politichis dai 24 e 25 di Fevrâr, tra lis tantis robis che no si son ni viodudis e ni sintudis e je ancje la lenghe furlane, che no je stade doprade par nuie te propagande, a part cuatri peraulis saltadis fûr suntun manifest, scritis cence atenzion e cence rispiet. Par talian si disarès «con sciatteria»; par furlan «a la Diu ju stramaledissi».

A pensâi par ben, cemût che al ven sclarît achì, no podevin che fâ cussì…

Macroregjons e micropolitics

sirmione

Sabide stade a Sirmione si son dâts adun i presidents des regjons Piemont, Roberto Cota, Venit, Luca Zaia, e Friûl-VJ, Renzo Tondo, e un dai candidâts ae presidence de regjon Lombardie, Roberto Maroni.
I cuatri a àn firmât un acuardi pe creazion de cussì clamade “macroregione del nord”.

La iniziative, che e sedi dome une robe propagandistiche o un progjet istituzionâl plui articolât (e in chest câs al ven di domandâsi cualis che a son lis sôs fondis), par plui resons e fâs vignî i sgrisui e il pêl dret.
Chest al vâl za se si le cjale di Turin, ma se il pont di viste al è chel dal Friûl alore al è propit di restâ scaturîts. In chest câs la definizion miôr e je chê di Fantozzi in cont de Coraçade Potemkin.

Lis motivazions di une valutazion di cheste fate a son sclaridis par esempli intun articul, che o vin cjatât in rêt e che i vin robât in part il so titul. Al jere saltât fûr passe cuatri mês indaûr, ma si pues leilu ancjemò: si cjate achì a pagjine 6.

Sul argoment cualchi dubi al ven pandût ancje su lis pagjinis e sul sît internet di un altri cuotidian che al ven dât fûr in Friûl: achì.

Cun di fat, e je une robe che no à mani, se l’intindiment al è chel di promovi specificitâts, dibisugnis e interès de comunitât teritoriâl che e ten dongje il Friûl e Triest. Parcè che cussì, impen di deventâ il centri de Europe, a tornaressin a jessi periferie de Italie.

Simpri che invezit l’intindiment al sedi propit chel di fâi cuintri, in particolâr, al Friûl e ae sô int.

PS. Daûr des declarazions dadis fûr in difese di cheste iniziative, là che tra lis altris il lengaç al somee chel stes doprât dai tecnics dal guvier talian par fâ cuintri ae tutele des minorancis linguistichis dentri dal proviodiment di revision de spese dal Istât passât, al somee propit che i tifôs de macroregjon no i vuelin ben al Friûl.

Genoa – Udinese 1-0

udin

Lontan dal Friûl l’Udin al fâs dûl. Ancje a Gjenue la scuadre furlane e conferme di no rivâ a fâ zûc e a cjapâ ponts. Un tic di sfighe in principi – l’infortuni a Lazzari dopo pôcs minûts, la zornade no di Padelli, i doi “cuasi goi” di Benatia e Merkel – e une ande rinunciatarie a son i caratars di fonde de prestazion dai blancs e neris, marcade ancje di un Di Natale flap e sbandonât indenant e di Maicousel e Pereyra che a van a corint alternade.

Il rivoc di personalitât e di grinte palesât tai ultins dîs minûts di une bande al è di preseâ e di chê altre al fâs inrabiâ ancjemò di plui.

Une cuistion di gjambis, di cjâf, di arbitris? In chest câs il diretôr di gare nol à condizionât la partide. A àn fat dut lis dôs formazions: il Genoa che al veve une voie mostre di vinci e fâ ponts, cun dut di mieçs avonde limitâts; l’Udin che al someave chel viodût a Turin un mês indaûr cuintri de Juve.

Une conferme in chest sens e rive de declarazion dade fûr di Dusan Basta, che al fâs il teorizadôr dal «intant cirìn di fâ un pont cuant che o sin fûr cjase»: une filosofie che tes ultimis setemanis no à fat saltât fûr nuie di bon.

Guidolin ae fin de partide al è dit di jessi sodisfat pe prestazion ma no pal risultât e di jessi otimist pal avignî. Sperìn che al vedi reson. Numars e fats a disin il contrari, almancul par cumò.

Prossime pontate: cul Napoli in cjase ai 25 di Fevrâr.

“Friûl di Magance” in mostre a Felet

friul_di_maganceOK

Une mostre interessante e biele di viodi e je stade screade vuê a Felet, te jentrade dal municipi.
Si clame “Fri
ûl di Magance”. E je interessante parcè che e je dedicade aes tradizions popolârs dal Friûl e ai protagoniscj dal so imagjinari. E je biele di viodi par vie che orcui, benandants, cjalcjuts, basaliscs, aganis, maçarots, boboros e tancj altris personaçs de narative orâl a vegnin contâts cu lis ilustrazions fatis di Luigino Peressini.

 Friûl di Magance” e je une vere e proprie mape che, de Cjargne ae Lagune, e permet di orientâsi tra vilis e paîs e soredut tra incjant, misteri, figuris e crodincis. Une iniziative di valôr culturâl e cuntune vocazion didatiche e promozionâl, metude adun de cooperative Serling, che e cjape dentri ancje altris struments di documentazion e comunicazion, a tacâ di un libri trilengâl (furlan, inglês e talian) e de riproduzion de mape ilustrade di Peressini.

La mostre e reste sù a Felet fintremai ai 21 di Fevrâr.

“Trappola a Porta Nuova” doman li de librerie Belgravia

belgravia

Al sucêt avonde dispès che lis libreriis no sedin dome puescj là che si comprin i libris.

Un esempli, in chest sens, al rive de librerie Belgravia di Turin, che za di agns al è un lûc di incuintri e un spazi di promozion culturâl vivarôs.

Al baste fâ un scjampon in Vie Vicoforte 14, in Borgo San Paolo, o dâ un cuc ae sô pagine facebook par rindisi cont di chest.

A son almancul doi o trê i apontaments setemanâi: conferencis, presentazions, cors e altris iniziativis.

Tra chescj si pues segnalâ chel di doman, ai 16 di Fevrâr, aes 6 sore sere, cu la presentazion di “Trappola a Porta Nuova”, il cuart libri dal scritôr turinês Rocco Ballacchino: un zâl ambientât inte Turin dal dì di vuê.

Par savênt di plui: libreria.belgravia@gmail.com.

Europe, l’acuardi sul belanç e il sbelançament de UE

bandeu

Ai 8 di Fevrâr stâts il Consei european al à rivât a cjatâ un acuardi sul gnûf belanç de Union Europeane.

I rapresentants dai guviers di Stâts a àn cjatât une intese, che però no je convincente pal Parlament european, almancul daûr dai prins coments dai leaders dai grups politics de assemblee di Strasburc, che e varà di fâle buine a a maiorance.

La propueste dai rapresentants dai guviers statâi no convinç tancj di lôr, par diviers motîfs, e plui di cualchidun al spere intune cjolte di posizion de bande dal Parlament european par che si dreci il sbelançament de Union, che e je simpri plui dipendente dai interès e dai egoisims dai singui Stâts e des lôr élites politichis, economichis e finaziariis.

Su chest argoment al merete une cjalade il coment di Alberto Majocchi, professôr di sience des financis li de Universitât di Pavia e component dal Diretîf dal “Centro studi sul federalismo” di Moncalieri.

Udinese – Torino 1-0

fuarceudinees

L’Udin al vinç ma nol convinç ad in plen.
La scuadre di Guidolin e zuie ben tal prin timp, là che e mostre personalitât e snait, intant che te riprese e à un pas diferent e e lasse cjamp e iniziative ai toriniscj.

L’imprin de paritide al è dut blanc e neri, cun Pereyra, Maiocusel, Basta e Pasquale dinamics e vivarôs. Tai prins cuindis minûts l’Udin al va al tîr cuatri viaçs, comprendude la conclusion di Pereyra, che al segne dopo siet minûts di zûc.

Il Toro al patìs il domini teritoriâl dai furlans almancul pai prins cuarantecinc minût. Tal secont timp l’Udin al somee jessi mancul in partide, soredut cu lis gjambis. Il Toro al cjape sù cualchi iniziative in plui, massime cun Vives e Jonathas, ma nol rive a jessi masse pericolôs des bandis di Padelli. Ancje la scuadre furlane si fâs viodi ancjemò in cualchi ocasion indenant, cun Di Natale e Maicosuel, però il risultât nol mude di un et.

Il belanç finâl al è un sucès sclagn e essenziâl pal Udin, che al à cjapât ancje un pâl cun Maicosuel. Pal Toro, che al varès vût di vê un rigôr a pro ae fin dal prin timp (Allan al met jù Santana) e magari ancje un altri inte riprese (contrast tra Benatia e Glik) e che al à cjapât une travierse cun Cerci, e à mani cualchi recriminazion cul destin e cu la direzion de gare.

Cun dut che te contabilitât de partide a pesin ancje i erôrs arbitrâi, il Turin al è someât in gjenerâl un tic masse flaput.

Pal Udin a son trê pont impuartants e un biel prin timp, che al da sperance pal avignî. In spiete almancul dal gol numar 150 di Di Natale e di chei altris cuatri ponts che a mancjin par rivâ ae “cuote 40” che e covente pe salvece, cun dut che, tal campionât di chest an, si pues domandâ e cirî alc altri ancjemò.

La prossime partide e sarà a Gjenue cuintri dal Genoa: un apontament dificil, ma ancje une ocasion per provâ a cambiâ la tendence che e viôt l’Udin pierdi masse dispès, cuant che al è lontan dal Friûl.