Catalogne, Ocitanie, Gales, Paîs Basc e Asturiis. Reggae e dub a Babêl Europe

Doman al è martars, ai 27 di Jugn, e su lis frecuencis di Radio Onde Furlane (sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu) al torne Babêl Europe, il program cuindisinâl dedicât ae produzion musicâl tes lenghis minorizadis dal continent.

In chê che e je la prime pontade dal Istât la atenzion e vignarà pontade sui ritmis dal reggae e sui sunôrs dilatâts dal dub che si si incuintrin cu lis lenghis des minorancis e des nazions cence stât de Europe.

In particolâr il viaç musicâl babelic al cjaparà dentri musichis che a rivin de Catalogne, dal Paîs Basc, des Asturiis, dal Gales e de Ocitanie e peraulis par basc, par catalan, par asturian, par ocitan e par galês.

Al sarà la ocasion par scoltâ tocs gjavâts fûr dal album Black is Beltza ASM Sessions, metût adun di Fermin Muguruza cul dj e produtôr catalan Chalart 58 e cu la partecipazion di une schirie di cjantants e musiciscj, e dal repertori di Gran Bal Dub, dai Soncai System e dai galês Anweledig.

Cheste pontade di Babêl Europe, dopo de direte di doman, si podarà tornâ a a scoltâle miercus ai 28 di Jugn a une dopo di misdì e sabide il prin di Lui a une e mieze dopo di misdì.

Ancje cheste trasmission si podarà scoltâle ancje sul sît internet di Radio Onde Furlane.

La corse dal Pordenon viers de serie B si ferme cul Parma

Il sium di viodi une scuadre furlane di balon ancje tal campionât talian di Serie B si sfante a Florence. Te semifinâl cuintri dal Parma, il Pordenon al zuie ben, lant daûr di chê maniere di stât tal cjamp, cun snait e cun ordin, che e à marcât dute la sô stagjon, ma ae fin a vincin i aversaris.
A son decisîfs i tîrs finâi dai undis metris, ma salacor i sborfs neris e verts a àn cualchi motîf par inrabiâsi ancje par cualchi decision dal arbitri vie pe partide.

La formazion de citât dal Friûl Ocidentâl si presente cuntune struture tatiche une vore compate e dinamiche: Pietribiasi di ponte, Misuraca e Cattaneo daûr di lui, la linie mediane a cuatri e la difese a trê. Tal scjafoiaç de serade tal stadi Franchi la partide e partìs planc plancut e il prin atac concret lu puarte indenant il Parma: corner di Scozzarella e conclusion finâl di Scaglia che al segne cuntun diagonâl precîs.

La reazion dal Pordenon e rive daurman cuntun biel tîr di Cattaneo, che però al è fûr bersai. Al passe il timp e la situazion e reste inclaudade: i sborfs di mister Tedino a sburtin ma no rivin a jessi pardabin pericolôs, il Parma al ten bot e dongje de fin dal prin timp al cjate ancjemò une ocasion cun Nocciolini che al sbare ad alt dal centri de aree di rigôr.

La seconde frazion si vierç cul Pordenon che al manten la iniziative e che al prove a tornâ al atac. E rive cussì une ocasion di aur par Pietribiasi, che però al tire masse plan e Frattali nol à fastidis par parâ.
I neris e verts a van dilunc a tignî il control de partide e il Parma si difint. Passade la mieze ore dal secont timp, une punizion di Burrai e ven fermade cuntun braç di Baraye tal mieç de arre di rigôr dai emilians, ma pal diretôr di gare Pillitteri nol è avonde par ordenâ il penalty.

L’un a un dal Pordenon al rive cualchi minût plui indenant. Cross di De Agostini, corezion di Martignago e tîr in puarte di Marchi.
La semifinâl si slungje cui doi timps suplementârs. E cres la pression dal Pordenon, che ae fin al domande – par dibant – un altri rigôr par un intervent almancul suspiet di Frattali su Buratto, ma il risultât nol cambie e la cualificazion si zuie dute cui tîrs dal discut, là che si va a oltrance, tra goi, pâi e paradis. Dut al finìs cun De Agostini che nol segne e cun Lucarelli che le bute dentri e al puarte il Parma in finâl.

Risultât definitîf: Parma-Pordenon 6-5 ai rigôrs (1-1 dopo dai timps suplementârs).

Eletroniche, rock e festivals. Il gnûf apontament cun Babêl Europe

Al è une altre volte timp di Babêl Europe, la trasmission cuindisinâl dedicade ae produzion musicâl tes lenghis minorizadis dal continent, che si pues scoltâle in direte il martars a 11 a buinore su Radio Onde Furlane.

Tal apontament di vuê – che al larà in onde in repliche ancje doman a une dopo di misdì e sabide ai 17 di Jugn a une e mieze dopo di misdì –  si sintarà ancjemò il rivoc de serade di vinars stât a Udin, cuant che cul dopli conciert di Gwenno e di Elsa Martin e Marco Bianchi e je stade une cerce di chê e sarà la gnove edizion di Suns Europe, il festival european des arts tes lenghis minorizadis.

Si fevelarà ancje di altris manifestazions che a àn almancul alc di ‘babelic’, a tacâ di Folkest, che si scree sabide ai 17 a Glemone, e di Occit’Amo, che il so program al è stât presentât tai dîs passâts e che al tache ai 7 di Lui.

No mancjaran ancje riferiments ae atualitât, tra gnovis de Europe e jessudis discografichis.

Il percors musicâl de ultime pontade de Vierte di chest an al cjaparà dentri eletroniche, sperimentazions, pop, cjançon di autôr e rock plui o mancul ruspiôs, dal Gales ae Sardegne, de Ladinie ae Catalogne, de Corsiche al Friûl, cun Gwenno, Arrogalla, Martina Iori, Brams, Vindetta e Franco Giordani.

Chest numar di Babêl Europe, dopo de direte di vuê e des repliche di doman e di sabide, si podarà tornâ a scoltâlu in rêt, compagn di chei altris, sul sît internet di Radio Onde Furlane.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu.

A Turin Blackout in fieste, in Friûl Onde Furlane a monteâ. Radio Days… and Nights

Chi di cualchi mês al cole in maniere uficiâl il vincjesim cuint inovâl di Radio Blackout, la storiche emitente alternative e antagoniste di Turin, che si scolte sui 105.250 Mhz e in rêt.
Cundut achel la ricorence e ven memoreade daurman, di vuê a domenie ai 11 di Jugn, li dal Spazio 211 in vie Cigna, cu la gnove edizion dal Blackout Fest, che par solit si fâs tra la fin dal mês di Mai e la prime metât di Jugn.

Il program complet al met dongje trê dîs pençs di concierts e di altris events, a tacâ za tal dopodimisdì.
Une manifestazion di no pierdi, par plui resons.

A proposit di radios, se si spostisi di Turin al Friûl, al merete segnalât l’apontament di doman, sabide ai 10 di Jugn, su Radio Onde Furlane. Te trasmission di aprofondiment gjornalistic Dret & Ledrôs, curade e condusude dal diretôr de emitente, Mauro Missana, si fevelarà di mont, di malghis, di prodots tipics, di aghe e di energje, cuntune schirie di ospits cualificâts.

Pe ocasion la radio libare dai furlans e larà a monteâ in Cjargne, cun doi colegaments in direte dal Çoncolan intant che il malgâr Michele Gortani al mene fin a Malghe Pozof lis sôs vacjis bisis, inte suaze di chel che al è deventât un event, il Transumanza Day. Cun di plui, si fevelarà ancje de fieste Make Frico not War di Tramonç di Sot.

Onde Furlane si pues scoltâle ancje in rêt e cu la App, che si pues discjamâle a gratis.

Par dîle cul titul di un cine di Woody Allen: a son Radio Days… and Nights.

Gwenno dal Gales e vERsO dal Friûl, ai 9 di Jugn a Udin une cerce di Suns Europe

Un apontament di no pierdi cu la musiche furlane e babeliche contemporanie. Al è chel di vinars ai 9 di Jugn, cuant che a Udin, te cort Morpurgo, tor 9 mancul un cuart di sere, al è proviodût un conciert dopli pardabon interessant.

L’event al è une sorte di anteprime di Suns Europe, il festival des arts tes lenghis minorizadis dal nestri continent, che za di un pâr di agns la cooperative Informazione Friulana, cu la colaborazion di divieris entitâts e istituzions, e inmanee vie pal mês di Dicembar te Capitâl dal Friûl e par chel e clame dongje di dute Europe musiciscj, cineastis e scritôrs che a esprimin la lôr creativitât doprant la lôr lenghe.

Daûr dal spirt de manifestazion, ancje ta cheste ocasion si metin dongje progjets artistics di cheste fate: un galês e un furlan.
L’apontament di vinars, in particolâr, al sarà la ocasion par viodi e par scoltâ Gwenno (pe anagrafe Gwenno Meredid Saunders), cjantante, musiciste, dj, presentadore radiofoniche e atore di Caerdydd/Cardiff, che e gjolt di une cierte innomine a nivel internazionâl pe sô ativitât e che par sigûr e je cognossude di cui che al scolte Radio Onde Furlane e in particolâr la trasmission Babêl Europe.

Dal 2005 al 2010 e à cjantât e sunât cul grup The Pipettes e po e à inviât la sô cariere soliste, Il so disc Y Dydd Olaf, jessût passe doi agns indaûr, al à vût un sucès discret in dut il Ream Unît e ancje inaltrò. Al met dongje un schirie di tocs là che melodie, eletroniche e ricercje sonore si misclicin, cun risultâts une vore bogns, cu la vôs inmagante di Gwenno che e cjante par galês e intune cjançon ancje par cornic, une altre lenghe minorizade dal Ream Unît, che so pari, Tim Saunders, al dopre in leterature dongje dal galês, dal breton e dal gaelic irlandês.

La esperience di Gwenno si insuaze tal panorame de musiche, de comunicazion e de art dal Gales, che al è une vore vivarôs e là che lis produzions te lenghe proprie a son tantis e preseosis, tra bands di innomine planetarie tant che i Gorky’s Zygotic Mynci e i Super Furry Animals e produzions audiovisivis tant che Sam Tân.

Te serade di vinars, dongje di Gwenno, si podarà gjoldi ancje de esibizion de cjantante Elsa Martin e dal ghitarist Marco Bianchi, che a presentaran vERsO, un spetacul là che tocs de tradizion popolâr furlane si compagnin cun composizions origjinâls par talian e par furlan cun chê di mostrâ il Friûl vivarôs e complès dal dì di vuê, a miezis tra tradizion e inovazion.

In Cort Morpurgo si presentarà ancje il bant pe edizion 2017 dal festival Suns Europe.

La manifestazion e je metude adun des cooperativis Informazione Friulana e PuntoZero, cu la poie dal Assessorât regjonâl pal turisim, dal Comun di Udin e de ARLeF.