Udinese – Roma 0-4

Al veve di jessi l’incuintri dal cambiament, de reazion e de dignitât. Dopo de partide smamide di Bergamo e dai siet goi cjapâts de Atalanta, ducj a speravin di viodi un Udin che al fos in stât di scombâti, di lotâ e di cambiâ musiche. Impen, cuintri de Rome i blancs e neris a fasin ancjemò piês che domenie stade cuintri de formazion vuidade di Gasperini. Cussi, intant che chê altre dì, in dîs cuintri undis, i blancs e neris a pierdevin e a cjapavin siet patafs, usgnot la scuadre furlane e piert e e cjape cuatri scufiots, fintremai in superioritât numeriche par doi tierç de gare. Al vignarès di dî: dal blanc e neri al “neri e vonde” che al è simpri plui “neri”.

Tudor al mande in cjamp il so 3-5-2 classic: Musso in puarte; Becao, Ekong e Samir in difese; Mandragora, Jajalo e De Paul te linie mediane, compagnâts di Ter Avest e di Sema dilunc des fassis laterâls, e Lasagna e Okaka in atac. I blancs e neris a somein atents e ordenâts intal sierâ il spazi di manovre ai zâi e ros, che però a mostrin daurman di vê plui gjambis, plui cjâf e plui cûr dal Udin.
Jajalo si interesse de prime costruzion de manovre, lu poin Di Paul, che al à spazi di manovre a çampe e Mandragora, che si cjate di chê altre bande. Di chê altre bande si fasin viodi daurman Pastore, Kluivert e Zaniolo.

L’Udin nol rive a combinâ alc e ce. I ospits, invezit, a cjapin sù il control de partide, si svicinin al gol cun Pastore e po lu segnin cun Zaniolo, che al profite di une buse di Samir suntun lanç di Kolarov, al va dret viers de puarte e al impire Musso. I blancs e neris a son sturnîts e incocalîts e no mostrin di jessi in stât di rispuindi. La Rome e profite de situazion e cussì e torne al atac cun Pastore e cun Zaniolo. La scuadre di balon furlane e prove a fâ alc di plui passade la prime mieze ore di zûc e si svicine ae aree di rigôr romaniste cun Okaka, che al ven tocjât in maniere iregolâr di Fazio: par Irrati al è fal e cartelin ros.

La superioritât numeriche no zove al Udin, che al stente ancjemò a imbastî azions di sostance. Dome inte ultime part de prime frazion i blancs e neris a provin pardabon a jessi in cualchi maniere pericolôs des bandis di Lopez cun De Paul. Cun dut des buinis intenzions, i zuiadôrs di Tudor no rivin a fâur pôre ai aversaris e fintremai a lassin cualchi spazi vueit pai lôr cuintripîts.

Dopo de polse l’Udin, cun Barak tal puest di Mandragora, al prove a sburtâ cun plui decision ma l’impat des sôs iniziativis al è pardabon limitât. I blancs e neris a son gnervôs e i lôr intervents a son simpri fûr timp, cun Jajalo e Barak che si fasin amonî, cun Okaka e Lasagna che a somein doi protagoniscj di “Chi l’ha visto?”e cu la difese che e fâs pastroçs.
Juste une bale zuiade mâl dentri de aree blancje e nere si stramude inte ocasion juste par Smalling che al segne il so prin gol cu la maie de Rome. Doi minûts plui tart al rive ancje il tris cun Kluivert, che al siere une biele combinazion inviade di Kolarov e rifinide di Pastore.

La Rome no si ferme, l’Udin no si môf e cussì al rive ancje il poker romanist: Irrati al sivile un rigôr par un fal di man di Becao, Kolarov al tire ben e al bat Musso. La reazion dal Udin no si le viôt in nissune maniere, l’aviliment al cjape la plui part de int che e je tal Stadi Friûl e pe scuadre di Fonseca al è facil tignî la situazion sot control e gjestî il vantaç fin aes trê siviladis finâls.

Venezia – Pordenone 1-2

Il Pordenon al torne a vinci. A Vignesie i neris e verts prime a tegnin bot denant de iniziative di parons di cjase, che a passin in vantaç, e po a rivin a imbastî un ribalton complet che ur permet di puartâ a cjase la prime vitorie in trasfierte e altris trê ponts pe classifiche.

Vie pal prin timp i lagunârs a provin a fâ alc di plui in atac, intant che il Pordenon al cîr soredut di neutralizâ lis iniziativis dai aversaris. L’efiet di cheste dinamiche al è che inte prime mieze ore di zûc i doi puartîrs no àn masse lavôr.

Te ultime part de prime frazion il Vignesie al incrès la sô pression ofensive cun Bocalon che però nol profite inte maniere miôr di un pâr di balis golosis. A fasin compagn ancje Caligara e Di Mariano, intant che la scuadre di balon furlane e va dilunc a difinidis cence padins e cun ordin, e cussì si rive ae polse cence goi.

Il secont timp si vierç cui parons di cjase in bombe e daurman dome la travierse i gjave a Suciu la sodisfazion dal gol, che al rive plui indenant in conclusion di une combinazion tra Zuculini, Di Mariano e Capello, che il so tîr al impire Di Gregorio.

La reazion dal Pordenon si palese in curt cuntune zirade di Zammarini, ma une grampe di seconts plui tart al è di gnûf il Vignesie che al prove a cirî il gol, cence cjatâlu, cun Bocalon. Cul passâ dai minûts i parons di cjase si sentin e si straviin e i furlans a tornin al atac, rivant a segnâ cun De Agostini prime de fin dal timp regolamentâr.

Tai ultins minûts la partide si inflame: prime Zuculini al strace une ocasionone par tornâ in vantaç e juste ae fin, a fuarce di dâi, il Pordenon al rive a segnâ cun De Agostini, che al cussì al met la sô firme dapît di une vitorie concuistade cun sintiment, cun snait e ancje cuntun tic di chê fortune che par solit e jude cui che al à cûr e cerviel, sicu la scuadre di Tesser.

Suns Europe + Catalogne + Grup de Folk + Avalots + Joan Baez + Son of Fortune + Y Sybs = Babêl Europe 21/2019

Un viaç a torzeon jenfri musichis, lenghis, minorancis e nazions cence stât, che al incrose atualitât, memorie e avignî. Vuê in direte a undis a buinore, doman in repliche a une dopo di misdì e ancjemò sabide ai 2 di Novembar a une e mieze dopo di misdì, inte programazion di Radio Onde Furlane al torne Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

Par ce che al tocje la atualitât la atenzion e je ancjemò pontade in direzion di ce che al nas in Catalogne, cuindis dîs dopo de publicazion de sentence di condane dai ativiscj e dai politics catalans arestâts dopo dal referendum pe autodeterminazion dal 1n di Otubar dal 2017.

Il confront cu la cronache al permetarà ancje di fâ cualchi salt indaûr tal timp inte produzion musicâl par catalan, di cjatâ conessions jenfri Catalogne e Americhe e di scoltâ alc dal repertori dal storic Grup de Folk, dai punk rockers Avalots, atîfs tai prins agns dal gnûf secul, e di… Joan Baez, un mît de cjançon di autôr americane, internazionâl e almancul in part “babeliche”.

Cul cjâf, cul cûr, cui voi e cu lis orelis viers l’avignî, ancje in cheste pontade di Babêl Europe si vierzarà un altri barcon in anteprime su la edizion 2019 di Suns Europe, il festival des arts tes lenghis minorizadis dal nestri continent che si davuelzarà in Friûl ae fin di Novembar e si scoltarà la musiche dai faeroerês Son of Fortune e dai galês Y Sybs, tra i protagoniscj de sezion musicâl dal festival che al promôf la creativitât intes lenghis minorizadis e il dirit ae diversitât.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Atalanta – Udinese 7-1

Siet patafons. La trasfierte dal Udin a Bergamo e finìs ancjemò piês di ce che cuntune buine dose di pessimisim si podeve pensâ. La Atalanta e je une des scuadris miôr dal campionât e par chel la partide di vuê no deve masse sperancis. Cundut achel nissun si varès spietât un risultât di cheste fate. Cumò i blancs e neris a àn pierdût ancje il record dal numar plui bas di goi cjapâts. Mancul mâl che cheste sdrondenade e à efiets avonde limitâts su la classifiche.

La scuadre di balon furlane si presente in cjamp cuntune formazion che e somee compate e in chel instes coragjose, ancje se e je cualchi novitât che in tiermins tatics si stente a capîle: Musso tra i pâi, linie difensive cun Becao, Ekong e Samir, centricjamp cun Mandragora, Jajalo, Di Paul e cun Opoku e Sema su lis corsiis esternis, in atac la cubie Lasagna-Okaka. L’Atalanta in atac si rimet a Ilicic e Muriel cun Gomez a supuart. De Roon e Pasalic a son tal mieç dal cjamp cun Hateboer e Castagne esternis e in difese si viodin Djimsiti, Kjaer e Toloi.

La formazion nere e blu e fâs valê daurman il so rûl di parone di cjase e la fuarce de sô organizazion di zûc, ma l’Udin al ten bot, tra interdizion e costruzion, ispirade di Jajalo e tal imprin al è un ciert ecuilibri.
Dopo une prime azion ofensive di Muriel, fermade di Becao, al rive a sorprese il gol dal Udin, cun Okaka che al robe la bale a Kjaer e le bute dentri cuntun biel diagonâl, che no i permet di fâ nuie a Gollini.

I bergamascs a reagjissin cun Gomez che al impegne Musso. Al minût 21 une biele manovre in velocitât si siere cuntun assist perfet di Di Roon par Ilicic, che al segne cjatantsi intune posizion dubie di fûr zûc, che però e ven calcolade tant che regolâr di Maresca dopo vê fate la prove dal Var.
Concuistade la paritât de bande de Atalanta, un bon intervent di Gollini al gjave la sodisfazion dal gol a Lasagna. Cussì, dopo dal sfantâsi de ocasion par tornâ in vantaç pal Udin, si vierç la fase là che a vegnin metudis lis fondis di chel che al sarà il risultât finâl. Muriel di tac i da une bale golose a Ilicic e Opoku, za amonît, lu tocje cul efiet di permeti a Maresca di sivilâ il rigôr, segnât di Muriel, e di parâ fûr il difensôr blanc e neri.

L’Udin al reste sot di un gol e in dîs cuintri undis. A passin pôcs minûts e Maresca al sivile un altri penalty, ma dopo al verifiche il Var e al cambie idee. Si svicine la fin dal prin timp, ma la Atalanta e rive a segnâ ancjemò: assist di Muriel par Castagne che al tire, buine rispueste di Musso, bale che e sbalce in maniere pericolose e tîr falât di Gomez che al devente un passaç par Ilicic, che al sbuse la puarte blancje e nere.

Tal secont timp Tudor al met dentri Pussetto tal puest di Okaka cul intindiment di provâ a dreçâ la partide, però la Atalanta e torne daurman al atac cuntune combinazion tra Ilicic, Gomez e Muriel che le bute dentri ancjemò. Il poker nol è ancjemò avonde pai parons di cjase: Musso al dîs di no a Gomez che al prove a fâ il cuint, ma nol rive a fâ compagn plui tart cuant che Gomez al fâs un cross par Pasalic che al firme il 5-1.

L’Udin nol da segns di vite, intant che i bergamascs a van dilunc a zuiâ in bombe. Ilicic al cjape la travierse e dopo si fâs fermâ di Musso, che al pare ancje un altri tîr di Muriel. Il colombian al ven tocjât in aree, al è rigôr e l’ex blanc e neri al segne ancjemò.
Ma no je ancjemò finude: Gasperini al decît che al è il moment dal debut in serie A di Amad Diallo Traorè, il fradi piçul di Junior, zuiadôr dal Sassuolo, che al cjape il puest di Ilicic e dopo sîs minûts al met ancje il so non inte liste dai marcjadôrs.

Pordenone – Cittadella 0-0

Il Pordenon al torne in Friûl e al torne a fâ ponts. Chê zuiade îr a Udin cuintri dal Cittadella e je stade une partide scombatude, là che puartîr e difesis a àn fat ad in plen il lôr lavôr e par chel l’incuintri al è finût cence goi. E je stade ancje une partide gnervose cun tantis amonizions.

La prime ocasion pe scuadre di balon furlane e rive dopo disenûf minût: tîr in diagonâl di Strizzolo
che al va fûr di di pôc. Plui indenant il puartîr ospit Paleari al ferme un biel tîr di Gavazzi.

Tal secont timp si viôt ancje il Cittadella che cun Vita e cun Diaw al impegne Di Gregorio, dopo vê riscjât a fuart suntun tîr cross di Gavazzi che al sbat sul pâl. Te ultime part dal incuintri il Pordenon si svicine al gol cuntune conclusion a colp sigûr di Candellone che e ven neutralizade cuntun miracul di Paleari, intant che di chê altre bande dal cjamp si discjadenin lis protestis par une stratignude di Barison su Diaw, che Illuzzi le calcole regolâr.

Nissun gol e un pont par om. Juste cussì.

Udinese – Torino 1-0

L’Udin al torne a vinci, par merit so e ancje par demerit dal Toro che tal Stadi Friûl al è smamît e flap, massime vie pal prin timp. I blancs e neris a concuistin chel che pe classifiche e no dome par chê al è l’unic risultât bon. La scuadre di balon furlane e merete la vitorie parcè che e zuie cul cûr e cul cerviel, profitant de eclisse dai ospits e mostrant di vê snait, ecuilibri, sostance e sintiment.

I blancs e neris si presentin cun Musso in puarte, cun Opoku, Ekong e Samir in difese, cun Jajalo, Mandragora e De Paul tal mieç, compagnâts inte linie mediane dai laterâi Ter Avest e Sema, e cun Lasagna e Okaka in atac. Il Toro al à une fisionomie sùù par jù compagne, ancje se la ponte e je dome une, Belotti, cun Verdi che al zuie daûr di lui.

La scuadre di balon furlane e partìs cun decision e e lenç daurman il gol prime cuntun biel tîr di Sema che al cjape il pâl e po cuntune deviazion di Okaka, che al strace une ocasion golose. L’Udin al fâs zirâ di plui la bale e al manten il control de partide e Sirigu al à il so bon ce fâ suntune bombe di Jajalo.

Te fase centrâl dal prin timp il ritmi al cale, ma tal ultin cuart di ore l’Udin al frache l’aceleradôr e al torne a impegnâ Sirigu, ancjemò cun Jajalo e po cun De Paul, par rivâ a passa dopo cualchi minût cun Okaka che al siere inte manier miôr une manovre inviade di De Paul par Sema che de corsie di çampe al met la bale tal mieç par Mandragora: il so tentatîf di butâle dentri al devenet un assist pal atacant che si cjate denant de puarte e al segne.

Te prime frazion il Toro nol rive a cumbinâ nuie se si gjave un tîr di Lukic che no i cree nissun fastidi a Musso. Tal secont timp Mazzarri prove a cambiâ alc e al mande in cjamp une altre ponte, Zaza, al puest di Lukic. I ospits a mostrin plui caratar, a jentrin in partide, a sburtin, e a crein la prime ocasion daurman: cross di Baselli, acrobazie di Belotti e deviazion decisive di Musso, che al tire jù la sierande. A son ancje altris tentatîfs: di Zaza, cence efiet, e di Laxalt, cul puartîr dal Udin che al è ancjemò tal puest just tal moment just.

I blancs e neris i lassin la iniziative al Toro, che cun Iago in cjamp al puest di Verdi al cambie scheme, passant dal 3-5-2 al 4-4-2. L’Udin si adate ae gnove situazion, al ten bot e al rispuint ai ultins tentatîfs di Iago e di Laxalt cuntun pâr di conclusions di De Paul: une e ven parade in corner di Sirigu e chê altre e finìs fûr bersai. Dopo cuatri minûts di recupar Abisso al sivile la fin e l’Udin al pues fâ fieste pai trê ponts e pal gol di Okaka, che cuintri de Fiorentina nol veve esprimût il so potenziâl. Il Toro al zuie dome tal secont timp e nol è avonde.

Juve Stabia – Pordenone 4-2

La trasfierte dal Pordenon a Castellamare di Stabia e finìs cun chel stes risultât de partide zuiade a Pescara ai doi di Setembar: cuatri a doi pai parons di cjase.

I neris e verts a patissin la supremazie teritoriâl dai parons di cjase che a partissin cul pît just e si cjatin a sierâ la partide intal prin timp, ancje profitant di cualchi erôr di masse de scuadre furlane. La Juve Stabia e vierç lis segnaduris dopo vot minûts di zûc cuntun tîr cul cjâf di Mezavilla. Il Pordenon al rispuint daurman e cinc minûts plui tart al cjate il gol dal un a un cun Misuraca che i rive un biele balon de çampe e al tire in puarte a colp sigûr: nuie ce fâ par Russo.

I parons di cjase no si scomponin e a tornin al atac. Tal zîr di trê minûts a tornin a passâ in vantaç: erôr di Burrai e assist di Canotto par Forte, che al segne. Il vantaç al da inmò fuarce ae Juve Stabia che e manten il control des operazions.
Il Pordenon al somee sfladât e masse pôc reatîf e al cjape ancjemò doi goi prime de polse. Il tierç al rive, compagns dal prin, ancjemò suntune bale inative: cross di Calò e conclusion in puarte di Calvano. Il cuart lo segne, juste dopo mieze ore dal principi dal incuintri, Canotto che al zuie inte maniere miôr un balon golôs di Calò e al jentre inte aree di rigôr al impire ancjemò Di Gregorio.

Il prin timp si siere cul vantaç pesant dai parons di cjase e cul Pordenon in zenoglon. La seconde frazion si vierç cu la scuadre di Tesser che e prove a dreçâ la partide e si sivicine al gol cun Camporese, che al tire ben cul cjâf ma Russo no si scompon. La Juve Stabia e gjestìs il vantaç e e prove a incressi ancjemò il risultât, cuntune combinazion Mallamo-Canotto che però no si siere ben e cuntune biele conclusion di Germoni che e ven parade di Di Gregorio.

I minûts a corin e pal Pordenon la imprese di rivâ a cjapâ un pontun e devente simpri plui dificile. La Juve Stabia i lasse pocjis pussibilitâts par tirâ e chês pocjis ocasions a van dutis strucjis. Dome intai ultins minûts la formazion furlane e rive a segnâ, ma in graciis dal autogol di Calò.

Kop + At Versaris + la Fera Ferotge + Mocker’s + Claudia Crabuzza + Silvia MIchelotti = Babêl Europe 20/2019

Musichis di scoltâ e atualitât di cognossi e di capî. La gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze, e pontarà la sô atenzion su ce che al è sucedût e al è daûr a sucedi in Catalogne, là che je stade dade fûr la sentence dal Tribunâl Suprem dal Stât Spagnûl cuintri dai ativiscj e dai politics catalans arestâts dopo dal referendum pe autodeterminazion dal 1° Otubar dal 2017.

Si fevelarà ancje de iniziative cuintri des servitûts militârs inmaneade a Capo Frasca in Sardegne e si tornarà a vierzi il barcon in anteprime su la edizion 2019 di Suns Europe, il festival des arts tes lenghis minorizadis dal nestri continent che si davuelzarà in Friûl ae fin di Novembar e ai prins di Dicembar.

E sarà la ocasion par scoltâ cercis dal repertori di Kop, At Versaris, La Fera Ferotge e Claudia Crabuzza e par cjatâ altris doi protagoniscj de sezion musicâl de gnove edizion di Suns Europe: la cjantautore furlane Silvia Michelotti e i rockers bascs Mocker’s.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Fiorentina – Udinese 1-0

L’Udin al fâs une partide discrete ma nol rive a puartâ a cjase nancje un pont. La Fiorentina, sapontade dai siei tifôs, e fâs valê lis sôs cualitâts tecnichis e tatichis – che par sigûr cumò a son plui altis di chês dai blancs e neris – e cussì e scombat, e patìs ancje chel alc di bon metût adun de scuadre furlane e e rive a vinci la tierce partide une daûr chê altre, parant vie in maniere definitive lis fantasimis de crisi che a svoletavin parsore dal cjâf di Montella intes primis zornadis dal campionât. Divierse la situazion dai blancs e neris che a tornin a sbrissâ jù in classifiche, inte zone plui basse.

Tudor a Florence al mande in cjamp une formazion che, daûr di un scheme 3-4-1-2, e mostre in chel instès l’intindiment di difinidisi cun sintiment e di produsi alc di bon e di produtîf indenant: Musso in puarte; la tierce linie formade di Opoku, Troost-Ekong e Samir; Jajalo e Mandragora tal mieç cun Sema e Stryger Larsen laterâi; De Paul, tornât de scualifiche, daûr des pontis, e la cubie di atac formade di Okaka e Nestorovski.

La Fiorentina, sburtade di Castrovilli, di Pulgar, di Chiesa e Ribery, e cîr di esprimi daurman il so strapodê teritoriâl di parone di cjase. L’Udin no si scompon, al ten bot, tignint di voli i atacants colôr di viole, e al rispuint cun De Paul e cun Nestorovski. L’argjentin al firme la prime iniziative ofensive significative pe scuadre di balon furlane, intant che di chê altre bande Chiesa, Castrovilli, Caceres e Pezzella no rivin a dâ masse preocupazions a Musso, e il macedon al cjate ancje la strade dal gol, che però nol ven fat bon di Prontera, par vie che il Var al mostre un colp cu la man di Opoku.

Il gol cjapât, cundut de mancjade convalide, al fâs sunâ la svearine jenfri i parons di cjase che a provin a incressi i zîrs dal lôr motôr. Al rive daurman un altri tîr di Castrovilli, che però al ven parât vie di Nestorovski, tornât indaûr in cuvierzidure sul corner di Pulgar, ma no si viôt nuie altri fintremai ae fin dal prin timp.

La seconde frazion e somee plui vivarose. Il prin colp al è dal Udin cun De Paul che al tire fûr bersai. La Fiorentina e rispuint cun Chiesa, che al profite di un erorat di Troost-Ekong, e cun Ribery, ma in dutis dôs lis ocasions Musso al interven e al siere la puarte. Il ritmi e il tas agonistic a cressin e Stryger Larsen si lamente par un intervent fat cuintri di lui di Dalbert te aree di rigôr dai parons di cjase, ma Prontera nol sivile. L’arbitri al devente protagonist plui indenant e cuant che Tudor al proteste par un fal di Castrovilli che nol ven par nuie calcolât al tire fûr il cartelin ros cuintri dal tecnic blanc e neri.

L’Udin al zuie la ultime mieze ore cence l’alenadôr. Lasagna al cjape il puest di Nestorovski, intant che Montella al met dentri Benassi al puest di Badelj. La Fiorentina e torne al atac cun convinzion e Ribery al è protagonist di un biel slalom inte aree blancje e nere ma il so cross nol ven disfrutât di nissun. Al finìs intune altre maniere il corner di Pulgar, che i parons di cjase a vuadagnin zovantsi de sielte une vore discutibile di Jajalo di lassâ lâ fûr il balon cence intervignî: il cross al è perfet par Milenkovic che al salte ben e le bute dentri cul cjâf.

Cumò i tocje al Udin rispuindi daurman al vantaç dai parons di cjase. Lu fâs cun Lasagna che al tire in puarte, là che però Dragowski al rive a tocjâ la bale di chel et che al covente par che e ledi fûr. Di chê altre bande Ribery al mene la dance e al met ancjemò in dificoltât la difese furlane. Inta ultins minûts i parons di cjase a provin a staronzâ il sucès cun Benassi e cun Dalbert, cence creâ masse problemis par Musso, e i blancs e neris, ancje cul contribût di Barak e di Ter Avest, a cirin ancjemò di gafâ la paritât. Si svicinin une vore al obietîf cun Sema e cun De Paul, ma Dragowski al sta in vuaite e al difint la vitorie.

Pordenone – Empoli 2-0

Il Pordenon al continue a fâ ben e a meti in dificoltât ancje lis scuadris plui titoladis dal campionât di serie B. Dopo dal Benevento, vuê al è l’Empoli che al patìs chel che nus plâs clamâlu “efiet Stadi Friûl”, al piert e al sbrisse jù dal prin puest in classifiche: se pe scuadre di Inzaghi la trasfierte a Udin si veve sierade cuntun risultât di paritât, pe scuadre toscane la partide cui neris e verts e va a finîle ancjemò piês.

La scuadre di balon dal cjâf lûc dal Friûl Ocidentâl, cundut de mancjance dai scualificâts Strizzolo e
Chiaretti, e rive a imponi la sô iniziative fint dal principi. Le judin ancje i ospits cun Bandinelli che al tire un pataf a Pobega e si merete il cartelin ros, lassant i siei compagns in dîs cuintri undis a tacâ dal secont minût de partide. La inferioritât numeriche e met in confusion i ospits, che dopo un cuart di ore si cjatin in svantaç par vie che Maggioni al calcole tant che iregolâr un contat jenfri Dezi e Misuraca e al sivile il rigôr, che al ven tirât in puarte cun cuscès di Burrai.

Cul savê di dopo si podarès dî che al è un penalty almancul dubi, ma la stesse robe e vâl ancje par rigôr sivilât sîs minûts plui tart a pro dal Empoli pal contant jenfri di Gregorio in jessude e Mancuso. La diference sostanziâl e je tal fat che, al contrari di Burrai, il zuaidôr blanc e celest al tire fûr. Cussì il Pordenon al manten il vantaç, no dome par ce che al tocje il risultât ma ancje pe cundizions psicologjiche.

Il zûc de formazion vuidade di Attilio Tesser al è ordenât e precîs, intant che cul passâ dal timp l’Empoli nol rive a cumbinâ alc e ce. E je esemplâr la azion che, prime de polse, e puarte di gnûf il Pordenon al gol: colp di tac di Monachello par Gavazzi e assist golôs di Ciurria par Pobega che al segne.

La seconde frazion e va daûr de prime. Il Pordenon al manten il control de situazion. L’Empoli al prove a fâ alc di plui par dreçâ la partide, ma nol rive a jonzi risultâts significatîf. Lis conclusions plui pericolosis a son un diagonâl di Balkovec che al cjate Di Gregorio tal puest just intal moment just e un tentatîf di Frattesi che al ven neutralizât cun snait dal puartîr dal Pordenon. La scuadre di balon furlane impegnade tal campionât di serie B e rive a imbastì ancjemò cualchi azion di gol, in particolâr cun Monachello. Ae fin no si zonte nuie ai doi goi segnâts vie pal prin timp, che a son avonde par garantî al Pordenon trê ponts e la confereme de imbatibilitât in cjase.