Udinese – Cagliari 2-1

Dopo i trê patafs cjapâts a Napoli, l’Udin al torne a zuiâ in cjase e al torne a vinci. Il sucès dai blancs e neris al rive ae fin di une partide, che vie pal prin timp e je stade avonde ecuilibrade e smamide e che te seconde frazion e à dât il miôr si se.

Chel che cualchidun lu à clamade «derby internazionalitari» (tra Friûl e Sardegne) al è finût cemût che al è finût soredut in graciis de sielte di Delneri di mandâ in cjamp Perica al puest di Thereau cualchi minût prime de metât dal secont timp e l’atacant cravuat al è decisîf par vierzi lis segnaduris.

Cuintri dal Cagliari la scuadre di balon furlane si presente cu la classiche struture cun cuatri zuiadôrs in difese, trê tal mieç, cun Badu, Halfredsson e Jankto, e trê in atac, cun Thereau e De Paul dongje di Zapata. I aversaris a ocupin il cjamp sù par jù in chê stesse maniere: cuatri indaûr, trê te linie mezane e Borriello ponte principâl cun dongje Joao Paulo e cun Sau che al fâs il trecuartist.

L’Udin al partìs cul pît just e dopo sîs minûts al impegne Rafael in dôs ocasions, cun Zapata e cun De Paul. Cul passâ dal timp il ritmi al cale e nol sucêt alc e ce, a part un rigôr a pro dal Udin, juste al bati de prime mieze ore di zûc: al tire Thereau e Rafael al pare e il risultât al reste inclaudât sul zero a zero fintremai al interval.

Il rigôr mancjât al see lis gjambis a Thereau, che ancje tal secont timp al mostre di no jessi masse a plomp, intant che ancje Zapata al è mancul dinamic di prime de polse. Propit par chel, compagn che in altris ocasions, Delneri al clame fûr l’atacant di Privas e al mande dentri Perica, che – bot e sclop – al cjate la ocasion buine par fâ un golon e le disfrute inte maniere miôr.

Il Cagliari al patìs il colp cjapât e trê minûts plui tart al scugne viodi une altre volte la bale dentri de sô puarte, cun Angella che al profite de confusion te aree dai ospits dopo di une corner e al segne. La scuadre sarde e somee pardabon metude aes cuardis, stant che Perica al è ancjemò pericolôs in dôs ocasions e in particolâr al cjape un pâl.

Il mancjât trê a zero al fâs sunâ la svearine pe scuadre di Rastelli, che tai ultins minûts prime e ridûs lis distancis dal Udin cuntun gol di Borriello, che al profite di une indecision di Karnezis, e po si svicine ae paritât cuntun tîr di Salamon, che però al ven fermât su la linie de puarte de bande di Danilo.

E cussì l’Udin al siere cun trê ponts in plui in classifiche e i torne ae scuadre sarde il risultât de partide zuiade a Casteddu/Cagliari ai 28 di Novembar stâts.

 

Advertisements

Musiche babeliche e resistente, martars ai 18 in direte su Onde Furlane

Doman al è martars e su Onde Furlane al torne Babêl Europe, la trasmission cuindisinâl dedicade ae produzion musicâl tes lenghis minorizadis dal continent.

Si svicine la date dai 25 di Avrîl e par chel la gnove pontade dal program, che si podarà scoltâle in direte ai 18 di Avrîl a 11 a buinore (e po, in repliche, ancje miercus ai 19 a une dopo di misdì e sabide ai 22 a une e mieze dopo di misdì) e sarà dedicade ae Lote di Liberazion cuintri dai fassisims in Europe.

E sarà une trasmission plene di musiche babeliche e resistente, cuntun percors che al cjape dentri Friûl, Sardegne, Bretagne, Paîs Basc e Catalogne.

In particolâr si podarà scoltâ la version par breton e in part ancje par francês di Bella Ciao dai Ramoneurs de Menhir, lis storiis par sloven e par furlan de Resistence in Friûl contadis e cjantadis dai The Preklets e dai Rive No Tocje, l’omaç in musiche ae figure di Antonio Gramsci fat dai sarts Ratapignata, juste intant de jessude dal film Nel mondo grande e terribile di Laura Perini, Maria Grazia Perria e Daniele Maggioni, e la version dai bascs Betagarri de L’Estaca, la innomenade cjançon antifranchiste di Lluis Llach.

Chi di cualchi dì, cheste pontade Babêl Europe, dopo de emission in direte di doman e des replichis di miercus e di sabide, si podarà tornâ a scoltâle in rêt, compagn di chê altris pontadis di Babêl Europe, sul sît internet di Radio Onde Furlane.

Napoli – Udinese 3-0

udin_neri

Cu la classifiche de serie A sot dai voi un risultât positîf dal Udin a Napoli al sarès stât pardabon une biele sorprese tal ûf di Pasche. Magari cussì no, l’incuintri di nossere tal stadi San Paolo al è finût inte maniere che si podeve proviodi cun plui sigurece, cuntun sucès dai parons di cjase.

L’Udin a Napoli al mostre une muse avonde ecuilibrade, cun cualchi novitât te formazion rispiet ae partide passade, a tacâ de difese, cun Heurteaux al puest di Felipe e Alì Adnan al puest di Samir, e de linie mediane, cu la tornade di Jankto tra i titolârs. In atac Delneri al conferme lis trê pontis Zapata-Thereau-De Paul, in stât di stamudâsi intune ponte sole – il colombian – cun chei altris doi in posizion di mieze ponte, juste cun chê di mostrâ di no vê pôre dal Napoli e in chel istès soredut di cirî di imberdeâ i aversaris e di neutralizâ il lôr potenziâl ofensîf.

La strategjie dal alenadôr furlan e funzione vie pal prin timp. Il Napoli al fâs zirâ di plui la bale, ma la sô e je une manovre sterpe e par chel cun pocjis conclusions. La pression de scuadre di Sarri dilunc des corsiis laterâls no prodûs alc e ce: dome tancj corners, cualchi numar di Hamsik e un tîr di Mertens che Karnezis al pare cence masse fastidis. L’Udin si difint cun ecuilibri e cun sintiment e al ten bot fintremai ae fin de prime frazion de partide.

Tal secont timp la musiche e cambie a pro dai parons di cjase, stant che dopo trê minûts Jorginho al pronte un biel assist par Mertens, che al cjate spazi tra Herteaux e Danilo in dificoltât e al segne. L’Udin al rispuint daurman, cun Delneri che al clame fûr De Paul e al met dentri Perica, cun chê di incressi la pression ofensive. La partide e vuadagne in vivarosetât e i blancs e neris a van une vorone dongje de paritât cuntune conclusion cul cjâf di Zapata, su cross di Alì Aznan, che e finìs suntun dai doi pâi de puarte di Reina.

La rispueste dal Napoli e je imediade: Allan i parte vie la bale a Alì Adnan – in maniere pôc regolâr, ma Massa no si inacuarç – e al cjate la strade dal gol che al garantìs il sucès pal Napoli, che di chel moment indenant al gjestìs il vantaç, cence vê problemis daûr e cun chê di provâ a cjatâ il tierç gol, cuntun colp di tac di Insigne, cun Karnezis che al pare, e cuntun tîr di Callejon, che impen, cualchi minût prime dal ultin cuart di ore di zûc, al rive a metile dentri.

Il Napoli al gjolt e si svicine ae Rome, cun chê di rivâ a puartâi vie il secont puest daûr de Juve. L’Udin al reste là che al è, te posizion numar undis de graudatorie e a cuote cuarante pont: la prossime partide e sarà in cjase cuintri dal Cagliari, che al à vinçût cul Chievo e cussì al à trentevot ponts.

Udinese – Genoa 3-0

L’Udin al zuie avonde ben e al vinç cence fastidis cuintri di un Genoa in crisi di zûc e di risultâts che al ten bot dome par vincj minûts e dopo si sfante sot dai colps dai blancs e neris.
Delneri al manten sù par jù la scuadre che e veve fat ben cuintri dal Turin, ancje se al fâs tornâ tra i pâi Karnezis al puest di Scuffet, al zonte ae seconde linie Evangelista al puest dal scualificât Jankto e pal atac al met Thereau dongje di Zapata e De Paul.

La scuadre di balon furlane si presente ordenade e ecuilibrade, no si scompon denant dai tentatîfs di acelerazion, avonde smamîts, di Laxalt e Simeone e al rispuint cuntun biel tîr di De Paul, che al concretize inte maniere miôr un passaç di Evangelista e al segne il vantaç.

I ospits a colin daurman in zenoglon: lents, proviodibii e sconfusionâts. Il control dal cjamp e des operazion al è ad in plen tai pîts dai blancs e neris che a cjatin avonde in curt la strade pal secont gol: corner di Hallfredsson, tîr di Angella, rispueste di Muñoz e conclusion decisive di Zapata che al inclaude Rubinho.

Il predomini furlan, cun Widmer e Samir su lis corsiis laterâls, Badu e Halfredsson tal mieç e De Paul e Zapata in atac, al va dilunc ancje tal secont timp, che si vierç cul tierç gol blanc e neri: corner di De Paul diret in puarte e pastroç di Rubinho.

Il Genoa al è une sorte di fantasime, che no si dismôf nancje cu la jentrade in cjamp di Palladino, Pandev e po ancje Veloso. Propit Palladino al firme la uniche conclusion dai grifons – un tîr fûr bersai che al ven tignût di voli di Karnezis tai ultis vincj minûts di zûc – intant che l’Udin al gjestìs il vantaç cun calme e cun sodisfazion fintremai aes trê siviladis e cussì al puarte a cjase i trê ponts.

Onde Furlane a Vinitaly, Vinitaly su Onde Furlane

Vuê, domenie ai 9 di Avrîl, si scree la edizion 2017 di Vinitaly. Ancje chest an li dal Salon internazionâl dai vins e dai distilâts che si fâs a Verone e sarà presinte Radio Onde Furlane, cuntune sô postazion logade tal Paveon 6 di VeronaFiere, là che al è il stand coletîf de Regjon Friûl-VJ e dal ERSA. Cussì la innomenade manifestazion e vignarà contade, cuntune schirie di trasmissions in direte, de bande de radio libare dai furlans.

Daûr di une tradizion che e à zaromai vot agns, Mauro Missana e Enrico Turloni a tiraran dongje informazions, gnovis, curiositâts e intervistis, che a laran in onde di vuê a martars ai 11.

Tal palinsest di Onde Furlane a son proviodûts diviers spazis dedicâts a Vinitaly, che si pues scoltâju in modulazion di frecuence (sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu): vuê, domenie ai 9 di Avrîl, di 10 a 11.30 a buinore e di 5 a 6 sot sere; doman, lunis ai 10 di Avrîl, di 9.30 e 10.30 a buinore, de une aes dôs dopo di misdì e di 5 a 6 sot sere mieze; martars ai 11 di Avrîl di 9.30 a 10.30 e di 3 a 5 dopo di misdì.

E sarà la ocasion par scoltâ la vôs di esperts, produtôrs, esportadôrs e rapresentants des istituzions, che vie par chescj dîs a son implicâts te manifestazion. Tra chei che a àn za dât la lôr disponibilitât a intervignî su Onde Furlane a son i organizadôrs di BorderWine Fabrizio Mansutti, Luca Bernardis e Valentina Nadin, l’esportadôr di vins furlans tai USA Franco Canciani, il cogo Manuel Marchetti, cognossût ancje par vie de so partecipazion ae trasmission televisive La Prova del Cuoco, la somellier Diana Candusso, professioniste dal turisim enogastronomic, e Remo Rossi, dirigjent di bancje par profession e espert di vinsi par passion.

A son proviodûts ancje i intervents dal assessôr regjonâl pes risorsi agriculis e forestâls Cristiano Shaurli, dal diretôr dal ERSA Paolo Stefanelli e di rapresentants di PromoTurismoFVG.

«O sin a Vinitaly ancje chest an – al è il coment di Mauro Missana, diretôr di Radio Onde Furlaneparcè che al è un event impuartant pe societât e pe economie dal Friûl. Contâ cheste manifestazion par furlan al è il nestri lavôr e al fâs part di chê funzion di servizi public par dut il Friûl che la nestre radio e plui in gjenerâl la nestre cooperative, Informazione Friulana, e davuelç zaromai di 37 agns».

«Al è impuartant jessi achì e… mostrâ la lenghe – al zonte Enrico Turloni – ancje par vie che chel che al è il caratar di fonde de nestre ativitât di informazion e di comunicazion al zove ancje ae promozion dal Friûl e dai siei prodots intune maniere origjinâl e cun chê di marcâ la lôr origjinalitât e fâju cognossi e ricognossi ator».

E juste cun chel spirt, il bon acet ai ospits di Onde Furlane al vignarà dât cun prodots made in Friûl tant che il cafè OroCaffè e la aghe Dolomia.

Musiche babeliche di balâ e di scoltâ. Usgnot a Turin e doman a Udin

Doi apontaments di no pierdi cu la musiche babeliche di scoltâ e di balâ, tra usgnot e doman.

Il prin al è a Turin, li dal Centri sociâl Askatasuna (cors Regina Margherita 47), là che usgnot – orari uficiâl a 11 – al è proviodût il conciert di Gran Bal Dub, il progjet metût adun di Sergio Berardo (vôs, ghironde e milante altris struments tai Lou Dalfin e in altris progjets di musiche ocitane) e Madaski, innomenât produtôr e musicist, cu la colaborazion di Chiara Cesano al violin e di Roby Avena ae armoniche e al semiton. Ritmis e musichis doc cuinçadis in salse gjamaicane e eletroniche.

Il secont al doman a Udin, li dal Bar dal Visionario (vie Asquini 33), za a tacâ di 8 e mieze di gnot.
L’apontament si clame Une Patrie che e cjante. Peraulis e musichis de Cjargne ae Basse e al cjape dentri la esibizion di trê nons impuartant de cjançon furlane contemporanie, inte suaze di Friûl Patrie di Ducj, il program des iniziativis inmaneadis cul coordenament di Furlan in Comun, il Sportel pe lenghe furlane dal Comun di Udin, par memoreâ la Fieste de Patrie dal Friûl.

I protagoniscj de serade, lant daûr di un percors artistic e gjeografic che al va des monts ae marine, a son il zovin cjantautôr cjargnel Alvise Nodale, che sù par jù un an indaûr al veve dât fûr il so prin disc, Conte Flame, la cubie dai Rive No Tocje, che a messedin rock, blues e tescj ruspiôs e visonaris di ispirazion ‘trastolone’, cemût che al mostre in maniere interessante il lôr secont disc Lis conseguenzis dal deliri, e Silvia Michelotti, cjantautore di Udin, che e torne pe ocasion in sene, dopo une polse di uns pôcs di agns, autore une desene di agns indaûr di albums interessants tant che Sono lagrimis o stelis? e Alis.

O di ca o di là si scugne lâ. Par balâ o par scoltâ.

Novitâts discografichis (e no dome chês). Su Onde Furlane al torne Babêl Europe

Discs gnûfs di cerçâ e classics di tornâ a scoltâ, tra colaborazions intercontinentâls, croseris di lenghis, musiciscj di innomine planetarie, storiis, storie e atualitât. Al è chest, in struc, il menù de gnove pontade di Babêl Europe, la trasmission cuindisinâl dedicade ae produzion musicâl tes lenghis minorizadis dal continent, che e torne vuê, ai 4 di Avrîl in direte a 11 a buinore, te programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Il viaç torzeon tra musiciscj, discs, concierts, events e altris iniziativis in cheste ocasion al tocjarà Irlande, Galizie, Grecìe Salentine e, in maniere scalembre e trasversâl, ancje Ocitanie, Sardegne, Friûl e Paîs Basc.

Si tornaran a scoltâ i Avleddha e un altri toc dal progjet metût adun cualchi an indaûr de formazion ocitane La Talvera cul musicist brasilian Silvério Pessoa, si fevelarà di fiestis nazionâls e di imnis cence stât e al sarà spazi par une gnove cerce dal disc de galiziane Ses dal titul Opoñerse á Extinción, jessût ae fin dal 2016, e par une altre novitât di gale che e rive dal Stât spagnûl là che a son coinvolzûts diviers personaçs babelics.

Cheste pontade Babêl Europe e vignarà compagnade ancje di une altre novitât: il program, dongje de emission in direte di vuê e de repliche di doman, miercus ai 5 di Avrîl a une dopo di misdì, al tornarà in onde ancje sabide, cuntune seconde repliche a une e mieze dopo di misdì.

Chi di cualchi dì, chê stesse trasmission si podarà tornâ a scoltâle in rêt, compagn di chê altris pontadis di Babêl Europe, sul sît internet di  Radio Onde Furlane.

Buine Fieste de Patrie dal Friûl! (ancje chest an)

Une Fieste che e je par ducj e par une Patrie che e je
di ducj, inclusive, plurâl e rispietose.

Une Patrie che par chel no à ni agjetîfs ni etichetis.

Une Patrie che no je ni «piçule», ni «extralarge».

Buine Fieste de Patrie a dutis e a ducj!
Ancje chest an.

http://www.arlef.it/media/stampa_friulano/files/udinese_magazine_n._15_19.03.2017.pdf

 

Torino – Udinese 2-2

Moments di gjonde e di delusion, colps di sfighe o di fortune, snait blanc e neri e cûr ‘granata’. Cuntune prime mieze ore avonde flape e chê altre ore plene di emozions, la partide tra Toro e Udin e finìs doi a doi: une paritât che in cierts moments ur va strente a dutis dôs lis scuadris e che però, propit par chel, ae fin e je chê juste.

L’Udin a Turin si presente cun cualchi novitât: al è ancjemò Scuffet in puarte cun Angella in difese adun cun Danilo, Widmer e Samir, cun Kums, Badu e Jankto te seconde linie e cun Zapata, De Paul e Perica in atac. Il Toro al rispuint in maniere avonde speculâr: Hart tra i pâi, difese a cuatri cun Zappacosta, Rossettini, Moretti e Molinaro, mediane cun Acquah, Lukic e Baselli e prime linie cun Iago Falque, Belotti e Ljajic.

I blancs e neris si mostrin ecuilibrâts e in stât di jessi pericolôs. Dopo cinc minûts di zûc si met in mostre Perica, che al vuadagne une punizion, tirade di De Paul su la bariere. Cualchi minût plui indenant e rive di une bale ferme ancje la prime ocasion dal Turin: cross par Rossettini, che le tocje cul cjâf ma le mande fûr bersai. Altris tentatîfs ju fasin Perica e Bellotti, ma il risultât al reste chel.

Il timp al passe e Toro e Udin a tegnin bot un cun chel altri: Zapata, Perica e De Paul si movin ben in orizontâl e in verticâl e a judin ancje indaûr, intant che di chê altre bande i parons di cjase a sburtin cul dinamisim di Belotti e cu la energjie gnove zontade de jentrade di Iturbe. Si zuie, si va al atac e si difindisi, di une bande e di chê altre, però la ande de partide no somee jessi alc e ce, stant che dopo i prins tentatîfs a mancjin dal dut lis conclusions in puarte.

Dome tai ultins dîs minûts al rive il svolt. A son lis azions in cuintripît dal Udin che a produsin une conclusion cul cjâf di Zapata, parade di Hart, un tîf fûr bersai di Jankto e une combinazion Perica-Zapata cul colombian che nol cjate la puarte. E a son lis conclusions dal Toro juste prime de polse: doi corners di Zappacosta e tîrs di Belotti e Rossettini, che a cjapin il prin la travierse e il secont il pâl, cun Scuffet che al met un blec suntun altri tentatîf di Moretti.

Il puartîr furlan si fâs cjatâ tal puest just tal moment just ancje sul imprin dal secont timp, cuntun biel intervent suntun tîr di Acquah. Al è il segnâl che l’Udin al pues provâ a cirî daurman il gol e cussì tal zîr di pôcs minûts Jankto al profite di un erôr di Rossettini, al frache sul aceleratôr e al fâs partî une bombe che e cjate spazi te puarte di Hart.

Mihajlovic al decît di rinfuartî daurman la trazion ofensive de sô scuadre. A jentrin Boyé par Lukic e plui indenant ancje Maxi Lopez al puest Baselli, ma il Toro cun cuatri pontis nol rive a ribaltâ la situazion. Delneri al rinfuartìs la difese, cun Heurteaux al puest di De Paul, e l’Udin si siere indaûr e al torne al atac cun chê di disfrutâ i sbilançaments dai aversaris. Al è ce che al sucêt cuant che Badu i robe la bale a Boyé e al mande lunc in profonditât Zapata, il colombian al tire in diagonâl, la difese dal Toro e je fûr scuare e Perica al rive di bessôl denant de puarte e al tocje la bale che e finìs dilà de rie.

Il cûr ‘granata’ al ven fûr ad in plen in cheste ultime part de partide. Doi minûts dopo dal gol dal atacant cravuat al rive il gol di Moretti, che par segnâ si zove di une deviazion di Samir suntun tîr di Iturbe, tal ultin cuart di ore prime al segne ae sô maniere ‘il Gjal’ Belotti e po si svicine al ribalton complet Ljiaic, che però al cjate la puarte sierade di Scuffet, ancjemò protagonist positîf te puarte furlane, dopo vê fermât ancje un tîr di Boyé.