Spal – Udinese 0-3

bandieris-friuul

L’Udin a Ferrara al mostre di vê imparade la lezion de partide in cjase cul Genoa. Cuintri de Spal la scuadre di Gotti e zuie cun atenzion e cun sintiment dal principi ae fin e cussì e vinç cuntun risultât taront: trê goi e trê ponts che a segnin un altri bon pas indenant viers de salvece.

La scuadre di balon furlane si presente tal cjamp dal Mazza cun Musso tra i pâi, cun Becao, De Maio e Nuytinck in difese, cun De Paul, Wallace e Fofana in mediane, adun cun Larsen e Zegelaar su lis corsiis esternis, e cun Lasagna e Okaka in atac. I blancs e neris a partissin cul pît just e dopo trê minûts al rive il prin tîr di Wallace che però al è fûr bersai. A àn chel stes destin ancje il tîr cul cjâf di Lasagna su cross di De Paul e la prime conclusion dai parons di cjase, che si fasin vîfs des bandis di Musso in maniere cuasi casuâl cun Murgia, che al profite di chel che al sarà l’unic erôr de difese blancje e nere cuntun diagonâl avonde pericolôs.

Un minût plui tart l’Udin al passe in vantaç, cun De Paul che al tire in puarte dal limit de aree e al impire Letica. La Spal e prove a rispuindi ancjemò cun Murgia, che al smire masse adalt e cun chê iniziative al conferme che i parons di cjase a somein blocâts e no rivin a meti adun pardabon un zûc che al vedi continuitât.

L’Udin al mostre un bon potenziâl: Wallace al distribuìs balons, De Paul e Fofana a garantissin dinamisim e profonditât, Okaka e Lasagna a fasin i moviments juscj, intant che daûr la difese e ten bot e Musso al fâs il so cuant che al covente.

La cronache e regjistre une ocasion straçade di Lasagna e une parade dal puartîr argjentin su Petagna, prime dal gol dal doi a zero. Lu segne Okaka, che al profite di une deviazion di Bonifazi suntun tîr di Di Paul e le bute dentri, sierant di fat il prin timp, che al viôt la Spal rispuindi cuntun tentatîf di Sala fermât di Musso, e metint une sorte di ipoteche su la partide interie.

Tal imprin de seconde frazion la scuadre di Di Biagio e prove a sburtâ cun plui cunvinzion e cussì a rivin lis conclusions pericolosis di Petagna, di Sala e di Strefezza, a pene jentrât tal puest di Murgia. L’Udin al lasse che i parons di cjase si sbrochin cence pierdi la concentrazion e rispuindint in cuintripît.

Propit di une azion di cheste fate, disvilupade dilunc de linie Fofana-Lasagna, al salte fûr il tierç gol furlan che al puarte la firme di KL15, brâf a ricevi la bale, a gjestîle inte maniere miôr, a schiribiçâ Letica e a segnâ di une posizion par sigûr  no masse comude. La Spal e prove a fâ pressing vie pai ultins minûts, ma no rive a creâ problemis a Musso, che di une bande al è simpri là che al covente e di chê altre nol à masse ce fâ, stant che i tîrs di Sala e di Dabo a son fûr bersai. Dut ben pal Udin, che cussì al puarte a cjase ducj i ponts a disposizion.

Riddim X + Fyah P + Carnicats + Lamatumbà + Arrogalla & Sa Ratapignata = Babêl Europe 14/2020

Vuê al è martars e a 11 a buinore su Radio Onde Furlane al torne Babêl Europe, il program cuindisinâl dedicât a musichis, lenghis, minorancis e nazions cence stât.

Ancje par cheste setemane – la trasmission e larà in onde ancje doman, miercus ai 8 di Lui, a une dopo di misdì e sabide ai 11 a une e mieze dopo di misdì – Babêl Europe nol vignarà fat in direte, ma si tornarà a mandâ in onde une pontade che e jere za stade programade timp indaûr.

Si fasarà un salt indaûr tal timp, fintremai ai 11 di Lui dal 2017, par tornâ a scoltâ i ritmis di divignince gjamaicane e i sunôrs dilatâts cun rivocs e efiets eletronics che in chl

volte a jerin stâts i protagoniscj dal program: un viaç framieç dal reggae e dal dub babelic, che al cjape dentri la Sardegne, la Corsiche, la Galizie, la Frisie e il Friûl, cu la musiche di Arrogalla e Sa Ratapignata, lis rimis di Fyah P, lis melodiis dai Lamatumbá, chês di Riddim X e un classic dai Carnicats.

La radio libare dai furlans si scolte sui 90 Mhz inte plui part dal Friûl, sui 90.200 in Cjargne e in rêt, par dut il mont, in streaming, cumò ancje cu la plataforme web Radio Garden.

Ancje cheste pontade di Babêl Europe si podarà tornâ a scoltâle in rêt, compagn di chê altris, sul Spreaker di Radio Onde Furlane.

 

Udinese – Genoa 2-2

L’Udin al fâs une altre buine partide e dal prin minût di zûc al cuart dai cinc minûts di recupar finâi (che a deventaran siet) al mostre di jessi plui fuart dal Genoa. Tal minût seguitîf un intervent di Zeegelaar su Biraschi al oblee Orsato a consultâ il Var e a decidi di dâ il rigôr: si rive al 97esim, Pinamonti al tire, Musso al pare fûr ma il ros e blu al recupare la bale e le bute dentri.
Fin a un moment prime l’Udin al vinceve doi a un – e si veve svicinât in plui ocasion ancje ae tierrce segnature –di chel moment ae fin il risultât al è doi a doi. La spartizion dai ponts e va strente ai blancs e neris e ur gjave la sigurece tendenziâl de salvece, intant che i regale al Genoa ancjemò la sperance di no sbrissâ jù in serie B.

Gotti al mande in cjamp Musso in puarte tra i pâi, Ekong, Nuytinck e Samir in difese, Jajalo, Fofana e Di Paul in mediane, adun cun Stryger Larsen e Sema, e i autôrs dai doi goi cunintri de Rome, Lasagna e Nestorovski. Il tecnic dal Genoa, l’ex blanc e neri Nicola, al presente une formazion avonde diferente de ultime partide: al zuie la cjarte Goldaniga in difese, ma al conferme la sielte di Behrami tal mieç dal cjamp, cun Biraschi e Depenade tant che esternis e cun Iago Falque e Sanabria.

La prime ocasion e je dai ospits: punizion tirade ben di Iago Falque e intervent puntuâl di Musso che le bute in corner. Il Genoa al fâs zirâ la bale, ma la sô manovre e je sterpe, stant che l’Udin al reste in spiete, le ferme e al ripartìs in cuintripît. La scuadre di balon furlane e manten une buine pression sui puartadôrs di bale rossoblu e cul passâ dai minûts e vuadagne cjamp. A rivin cussì un tîr alt di De Paul e po, un minût prin de prime mieze ore di zûc, une conclusion di Lasagna, su sugjeriment di Fofana in percussion verticâl, parade in corner di Perin. Juste ae fin de prime frazion al rive ancje il gol: cross di De Paul e tîr cul cjâf di Fofana che al va a bersai.

Dopo de polse Nicola al prove a rinfuartî il potenziâl ofensîf de sô scuadre cun Soumaro e Pinamonti tal puest di Romero e di Behrami. Tal imprin i ospits a sburtin cun plui convinzion e a vuadagnin doi corners, rivant al tîr cun Iago Falque, ma la bale e va fûr. Passât il pericul l’Udin al recupare il control de partide e al imbastìs diviersis ocasions: Stryger Larsen al tire fûr bersai suntun biel cross di Sema, De Paul al tire une bombe in diagonâl che e finìs in bande de puarte e po Lasagna al siere in gol une triangolazion cun Fofana.

Il dopli vantaç al è plui che meretât. L’Udin si svicine fintremai al tierç gol, ancjemò cun Lasagna, che al siere un bon cross di Zegelaar, che di pôcs minûts al è jentrât tal puest di Sema, ma Perin al pare. Cussì, daûr di chê regule no scrite che e vûl che dopo une ocasion che va sù pai stecs si puedi cjapâ un gol, e rive une combinazion Pandev-Pinamonti che, cu la complicitât di une mieze durmide de difese, e ven sierade in puarte dal atacant macedon e al è doi a un.

Gotti al clame fûr i autôrs dai doi goi, Fofana e Lasagna, e al mande in cjamp Teodorczyk e Wallace cul intindiment di difindi i trê ponts. L’Udin al ten bot e il Genoa nol rive a cumbinâ alc e ce. Orsato al comande un recupar lunc e pai blancs e neris dut al somee lâ inte maniere juste, fin che no rive la ingjenuitât di Zegelaar, che e ven rilevade de bande dal arbitri, dopo de verifiche cul Var. Musso al pare il penalty ma nol rive a fâ nuie sul secont tîr di Pinamonti. E al è doi a doi.

Perugia – Pordenone 1-2

bandieris-friuul

La sodisfazion pe vitorie, concuistade cun fuarce e salcor cun cinisim, che i vâl il salt adalt fintremai tal tierç puest in classifiche e lis preocupazions pal infortuni di Di Gregorio, che per fortune vie pe bunore di vuê al è stât dimetût dal ospedâl. A son lis dôs musis de partide di nossere dal Pordenon cuintri dal Perugia.

I sborfs a segnin juste tal prin minût de partide cuntun tîr cul cjâf di Mazzocco. I parons di cjase a rispuindin daurman e a cjatin l’un a un cuntun biel tîr di Falzerano e provin a fâ valê la lôr predominance teritoriâl, ma il Pordenon al ten bot, cun atenzion e cun sintiment.

Vie pe partide il Perugia al proteste, domandant il rigôr prime par un intervent su Buonaiuto e juste tal ultin par contat suspiet cun Rajkovic, che però a vegnin calcolât regolârs di Camplone, e al cjape une travierse cun Nicolussi Caviglia tal prin timp e un pâl inte seconde frazion.

Cun di plui la scuadre di Cosmi e reste cuntun om di mancul dopo che l’autôr dal gol al ven parât fûr cul cartelin ros. I variûi perusins a tegnin di plui la bale, ma la lôr pericolositât ofensive e je limitade e, calcolant l’efiet des lôr ocasions miôr, a puedin ancje lamentâsi par une cierte dose di sfortune.

Il Pordenon si difint cun ordin e al rispuint cun cualchi buine manovre in cuintripît, ancje se nol rive a costruî cetantis balis di gol. Lis ocasions pardabon golosis che a vegnin metudis adun dai neris e verts a son dome trê, ma dôs di chês a van a bersai: dopo dal gol di Mazzocco in vierzidure al rive ancje chel decisîf di Ciurria. Tal mieç al è ancje il scuintri di zûc tra Di Gregorio e Melchiorri cul puartîr dal Pordenon che al bat in cjâf, al reste par tiere e al ven puartât tal ospedâl.
Cumò pe scuadre di Tesser al è il moment di jessi contents no dome pal risultât e pe classifiche.

Roma – Udinese 0-2

bandieris-friuul

Une vitorie biele, buine e juste. L’Udin al zuie ben, dal principi ae fin, al cjape daurman lis misuris a une Rome flapute, al rive a segnâ tal imprin dal prin timp, no si scompon denant de reazion dai parons di cjase e al siere cuntun altri gol, che al marche la sô supremazie tatiche, tecniche, atletiche e emotive.

Gotti al mande in cjamp Musso tra i pâi, Becao, De Maio e Nuytinck in difese, Jajalo, Wallace e Di Paul in mediane, cun Stryger Larsen e Zegelaar su lis corsiis esternis, e la cubie di atac Lasagna-Okaka. Fonseca al presente une scuadre cun ancjemò plui novitâts rispiet a partide di domenie stade, stant che al sielç di fâ di mancul, tra chei altris, di Dzeko, di Mkhitaryan, di Mancini e di Kluivert.

La scuadre di balon furlane e partìs cul pît just cul possès de bale e cuntun bon ecuilibri tra i diviers reparts. I blancs e neris a mostri di vê lis ideis claris za tal prin minût cuntun cross di Stryger Larsen, che pôc timp dopo al met tal mieç un altri bon balon a pro di Lasagna e al oblee Mirante a anticipâlu. L’Udin al cjate il gol dopo dîs minûts di zûc cuntune biele verticalizazion di Lasagna, che al crosse par De Paul, cul argjentin che al tire malamentri ma i torne la bale a KL15, che al impire Mirante cence padins.

Il vantaç dai ospits al è plui che meretât. La Rome e prove a rispuindi ma e rive dome a vuadagnâ cualchi corner. L’Udin si difint cence problemis e al rispuint in cuintripît, ancjemò cuntun pâr di atacs di Lasagna e di De Paul che a vegnin neutralizâts de difese zale e rosse, intant che pai parons di cjase Perez al cuince al è un tîr insidiôs che al va fûr di pôc e inte azion seguitive Perotti al fâs un brut fal di atac a dam di Becao, che al ven punît di Guida cul cartelin ros.

In dîs cuintri undis, i parons di cjase a provin a reagjî cun Under che al oblee Musso a fâ un bon intervent e cun Cristante che al prove di lontan: il so tîr al ven deviât e si distude su la part esterne de travierse. Il prin timp si siere cuntune gnove iniziative di De Paul, che però nol rive a servî Lasagna, e l’argjentin al è protagonist ancje dal inviament de seconde frazion cuntune conclusion fûr bersai, intant che si torne a viodi in dôs ocasions il duel jenfri Perez e Musso, cul atacant romanist che al tire e il puartîr dal Udin che si fâs cjatâ simpri pront.

Teodorczyk, mandât di Gotti tal puest di Lasagna, al à une buine bale par segnâ il secont, ma nol rive a profitâ, e plui indenant al fâs sù par jù compagn ancje De Paul. L’Udin al gjestìs la partide cun sintiment e cun calme, la Rome no rive a jessi periculose des bandis di Musso e i blancs e neris si cjatin ancjemò intes cundizions di incressi il vantaç. Nestorovski, jentrât tal puest di Okaka, al prove une prime volte cence fortune, ma inte seconde ocasion al fâs gol: Fofana, in cjamp tal puest di Wallace, al scate su la corsie di çampe e al crosse di chê altre bande par De Paul, che al strenç e le met tal mieç a vantaç dal atacant macedon, che nol piert l’apontament.

Il doi a zero al piture ancjemò miôr la ande de partide. Le Rome e prove a cumbinâ alc cun Zappacosta e cun Dzeko, sostitût di Kalinic, ma no rive a mudâ la muse de partide, che si siere ancjemò cul Udin in zone tîr cun De Paul e cun Fofana, che però no son masse precîs.

Dopo dôs sconfitis l’Udin al rive finalmentri a vinci e a cjapâ chei trê ponts che i permetin di rivâ a cuote 31 cul Toro e cu la Fiorentina. Al è ben e al conven che ancje inte prossime partide, in cjase cuintri de Sampdoria, i blancs e neris a ripetin la performance e il risultât di cheste serade romane.

Loris Vescovo Quartet, trê concierts ator pal Friûl e un progjet gnûf in anteprime

Trê apontaments di no pierdi par cui che al è a stâ in Friûl e une biele gnove in cont de produzion musicâl par furlan che e vâl par ducj e in ogni dontri. Vinars ai 3 di Lui a Puçui, sabide ai 4 a Vierse di Romans dal Lusinç e domenie ai 5 al Cuel di Sant Martin di Dartigne, dopo un pôc di timp di cidin, si podarà tornâ a viodi e scoltâ dal vîf Loris Vescovo, che di aromai vincj agns al è un dai cjantautôrs furlans plui ispirâts e interessants.

In cheste ocasion l’om di Trivignan al incrose il so snait cun chel di altris musiciscj di grande personalitât tant che il produtôr e polistrumentist Leo Virgili, altri non di ponte de sene furlane plui vivarose, plui inovative e plui cognossude ancje tal forest, il bassist e viloncelist Massimo Silverio, e il baterist e percussionist Nicholas Remondino.

Si presentin adun cul non di Loris Vescovo Quartet par une schirie di spetacui che si fondin soredut su lis gnovis cjançons, scritis di Vescovo vie pai ultins mês, che dentri de Sierade a vignaran publicadis suntun gnûf album.

Une di chês, che il so titul al è “Sotans”, e ven programade za di cualchi dì cuntune cierte frecuence su Radio Onde Furlane e e somee pardabon interessante. Une anticipazion golose dai concierts di chescj dîs e soredut dal disc che al vignarà e che si clamarà “Adalt”, parcè che, cemût che al sclarìs Vescovo tal articul chi da pît, al tignarà dongje «cjançons che a àn in comun il teme de altece, de verticalitât, de gravitât, de distance tra alt e bas e tra “sorestants” e “sotans”, de sclavitût e de liberazion e de spiritualitât leade ae tiere»

Pordenone – Entella 2-0

bandieris-friuul

Il Pordenon al torne a vinci. Inte partide di nossere la scuadre di balon dal Friûl Ocidentâl si sfrancje de brute sconfite patide sabide stade a Trapani, e rive a segnâ doi goi tal secont timp e cussì si puarte a cjase trê ponts che a zovin al spirt e ancje ae classifiche. Intant che il Benevento al fâs za fieste pe vitorie dal campionât e pe promozion in serie A, i sborfs a recuperin la cuinte posizion e cence masse sunsûr a tornin ancje a pensâ ae pussibilitât di rivâ a fâ il salt di categorie.

L’incuintri di Triest si disvilupe vie pe prime frazion dilunc di une linie di ecuilibri sostanziâl, cul Entella che al mostre di jessi une scuadre ben struturade, in stât di tignî bot e di rispuindi denant di un Pordenon che al prove daurman a cjapâ in man lis brenis de partide. Lis primis conclusions a son un tîr di Vogliacco su assist di Candellone e, di chê altre bande dal cjamp, une iniziative imbastide di Settembrini e Dezi. Cun scuadris curtis e pocje precision in zone tîr, sei cun Candellone e Pobega che cun Settembrini, i sborfs e i diaui a sierin il prin timp cence goi.

La partide si disbloche dome siet minûts dopo de polse, cun Gavazzi che al cuince une bale golose par Mazzocco, che al è brâf tal controlâle e tal tirâle in puarte. L’Entella al va sot di un gol, ma al prove daurman a tornâ a dreçâ la gare ancje se nol rive pardabon a imbastî conclusions pericolosis par Di Gregorio, fale che cuntun tîr di Morra e cuntun tentatîf di Schenetti, che a son ducj i doi fûr bersai.

Il timp al passe, il Pordenon al manten il vantaç e al cîr di colpî la scuadre di Chiavari in cuintripît, cundut achel ni Ciurra ni Tremolada a rivin a segnâ e il doi a zero al rive intal prin dai sîs minûts di recupar: punizion di Tremolada che e sbat su la travierse e tap-in di Barison, che al impire Borra.

Udinese – Atalanta 2-3

La Atalanta si conferme une siore scuadre, biele di viodi e in chel istès une vore concrete: il client piês par un Udin avonde biel e bon, che al rive fintremai a segnâ doi goi, ma magari cussì no a’nt cjape trê e cussì al reste inclaudât  a cuote 28 inte posizion diesime cuinte. La prime partide in cjase dopo dal confinament e va mâl par ce che al tocje il risultât, ancje se e mostre alc di bon, tacant dai doi goi di Lasagna, che no le butave in puarte dal mês di Zenâr.

La scuadre di balon furlane, cence Mandragora e De Paul, si presente cul so classic 3-5-2, che al viôt Musso in puarte, Ekong, Nuytinck e Samir in difese, Wallace, Jajalo, Fofana a centricjamp, cun Larsen e Sema su lis corsiis esternis, e la cubie di atac Lasagna-Teodorczyk. Inte Atalanta di mister Gasperini Zapata al è la prime ponte, daûr di lui a son Gomez e Malinovsky e al torne titulâr Caldara, adun cun Toloi e Djimsiti denant di Gollini, e te zone mediane si viodin Castagne, tal puest di Gosens, Hateboer, Freuler e Pasalic.

La partence e je avonde buine. L’Udin al prove a cjapâ la iniziative, ancje se i ospits a mostrin daurman di volê e di podê fâ alc di plui. La prime ocasion e je dai blancs e neris, cuntun tîr di Fofana che Gollini al pare cence fastidis. Di chê altre bande dal cjamp le à plui grivie Musso che prime al interven, benon, in doi colps su lis conclusion di Malinovsky e di Gomez e un minût plui tart al ven impirât di Zapata, che si zove dal fat che Ekong i lasse masse spazi e al pues zuiâ inte maniere miôr la biele bale che i da Freuler.

Sot di un gol, l’Udin al stente a reagjî. I ospits a tegnin il control des operazion e no ur permetin a Sema e a Stryger Larsen di sburtâ dilunc des corsiis laterâls cemût che al covente e cussì i blancs e neris no rivin a jessi masse pericolôs, fale che cuntune combinazion Teodorczyk-Lasagna che si siere cuntun tîf cence storie e in fûr zûc.

La pate parziâl e rive juste passade la prime mieze ore e dopo superade cence padins une iniziative di Malinovsky, parade di Musso: verticalizazion di Fofana par Lasagna che al scate, si cjate di bessôl denant di Gollini e al segne. La Atalanta e prove daurman a tornâ in vantaç, ancjemò cuntun tîr di Malinovsky che al cjate Musso tal puest just intal moment just, intant che inte ultime part dal prin timp a son dôs ocasions pal Udin: assist preseôs di Fofana par Lasagna che al tire masse alt e punizion di Sema che e ven parade di Gollini.

La seconde frazion si vierç lant daûr dal copion dal prin timp. La Atalanta e va dilunc a comandâ timps e zûc e i blancs e neris a cirin di tignî bot e di rispuindi in cuintripît. A rivin cussì dôs conclusions di Wallace: une che e lenç il pâl e chê altre che e ven parade di Golllini.
La rispueste dai bergamascs si concretize intun tîr di Freuler, fermât di Musso, intune conclusion di Muriel, jentrât tal puest di Malinovski, che e ven parade vie dal puartîr dal Udin, e ancjemò intune punizion di Muriel, tirade benonon juste tal siet, che e torne a puartâ la Atalanta in vantaç.

L’atacant colombian cualchi minût plui tart al tire a svol une canonade che ven parade fûr di Musso e juste tal imprin dal ultin cuart di ore di zûc al torne al tîr su assist di Gomez e al torne a segnâ. 3 a 1.

Gotti, dopo vê za clamâ fûr Teodorczyk e vê mandât in cjamp Okaka, al zuie ancje lis cjartis  Ter Avest e Nestorovski, che a jentrin un tal puest di Stryger Larsen e chel altri in sostituzion di Jajalo. Intai ultins minûts l’atacant macedon al prove il tîr de distance ma la bale e finìs di là de travierse e po une azion inviade di Okaka e ven disvilupade di Zegelaar che il so corss al cjate il tîr cul cjâf di Lasgagna, che al segne.

L’Udin al reste ancjemò sot di un gol e nol è plui avonde timp par dreçâ la partide. La Atalanta e vinç cun merit, i blancs e neris a pierdin cuntun tic di marum. Inte prossime partide al devente indispensabil puartâ a cjase un risultât positîf.

Trapani – Pordenone 3-0

Il Pordenon a Trapani al cjape trê patafons. La scuadre di balon dal Friûl Ocidentâl e zuie une partide avonde flape e i parons di cjase, che a àn une fam mostre di ponts par cirî di sghindâ la retrocession, a mostrin di vê almancul une marcje in plui e a vincin cence masse fastidis.

L’inviament de partide al è avonde ecuilibrât ancje se cul passâ dai minûts il Trapani al incrès la sô pression e si fâs viodi des bandis di Di Gregorio cuntune verticalizazion di Pettinari par Piszczek che al crosse par Kupisz, cui sborfs che si salvin in corner, e po cuntune acrobazie fûr bersai di Pettinari su assist di Taugourdeau.

Il Pordenon al rispuint cuntune iniziative di Candellone, ma il so tîr al ven butât in corner. E je dome une sflamade furlane, stant che il Trapani al torne al atac cun Grillo e po, passade la mieze ore di zûc, cuntune azion che, profitant di une durmide de difese dai sborfs, si siere cul cross di Piszczek e cul gol dal ex dal Udin, Coulibaly, che si cjate tal mieç de aree intes cundizions miôr par segnâ.

Inte prime frazion a son ancjemò un altri atac dai sicilians e un bon intervent di Di Gregorio su Pettinari. Il secont timp si vierç cui parons di cjase che a àn il control des operazions e dopo nancje un cuart di ore un altri sugjeriment di Piszczek al devente un gol, cun Pettinari che al ricêf e le bute dentri. Ma no je ancjemò finide, stant che un contat jenfri Di Gregorio e Pettinari inte aree dal Pordenon al ven calcolât fal di rigôr de bande di Prontera – ancje se probabilmentri nol jere fal e impen al jere un fûr zûc – e dal discut al è il stes Pettinari che al tire e al segne.

La pratiche e somee dal dut sierade. In realtât nol è cussì, stant che Di Gregorio al à il so bon ce fâ par no permeti a Taugourdeau di fâ il cuart cualchi minût plui tart e il Pordenon al prove a tornâ a dreçâ la partide inte sô ultime part.
Magari cussì no, al è masse tart e soredut il Trapani al sta in vuaite cun Carnesecchi che al siere la puarte su Candellone, intant che chei altris tentatîfs no son alc e ce e ancje l’ultin tîr di Chiaretti si sfante disore de travierse.

Torino – Udinese 1-0

Sodisfazion pal Toro e displasê pal Udin. La scuadre di balon furlane e zuie la sô prime partide dopo dal confinament tal stadi Olimpic di Turin. E mostre di vê gjambis e sintiment, ma compagn che passe trê mês indaûr i mancje la precision e la fortune sot puarte. Il Toro, che al à za tornât a zuiâ cualchi zornade indaûr, cuintri dai blancs e nersi i met il cûr (e forsit ancje une dose di… cûl) e al rive a vinci, poiantsi su la sigurece di vê un atacant di gale, Belotti, e un puartîr che al è simpri tal puest just intal moment just, Sirigu.

La scuadre di Gotti e tache cul pît just: ordenade e ecuilibrade, cul so zaromai classic 3-5-2, e cjape sù daurman la iniziative cun Stryger Larsen che al met tal mieç une buine bale za tal secont minût di zûc, ma Nestorovski nol rive a gafâle e a tirâle in puarte. I blancs e neris a van dilunc a masanâ zûc, intant che i parons di cjase a tegnin bot, si sierin indaûr, in plui ocasions a butin la bale in corner e a cirin di rispuindi in cuintripît.

L’Udin si svicine pardabon al gol cualchi minût plui tart cun Sema che si sburte indenant su la corsie di çampe e al crosse tal mieç par Nestorovski che le tocje par Stryger Larsen, che al tire e al cjape il pâl a man drete di Sirigu. Dopo sfantade la pussibilitât di passâ in vantaç, l’Udin al cjape il gol: biele acelerazion di Edera in verticâl dilunc de corsie centrâl e bale pinelade a çampe par Belotti che al jentre inte aree di rigôr, al tire di potence sul prin pâl e al met in crisi Musso, che cul so intervent, magari cussì no, al jude la bale a jentrâ intal sac.

Cul prin vêr tîr in puarte il Toro al passe in vantaç, intant che l’Udin al prove plui voltis ma un pôc par colpe so e un pôc par merit di Sirigu nol rive a segnâ. Al è ce che al jere sucedût sul imprin de gare e che al torne a sucedi cuntune conclusion a svol di Fofana, che al oblee il puartîr dal Turin a slungjâsi cun chê di tocjâ la bale e di mandâle in corner, o ben cuntun tîr-cross di De Maio che al ven blocât dal numar un dai parons di cjase o ancjemò cuntun tîr cul cjâf dal difensôr blanc e neri di Saint-Denis, che al à un destin compagn.

Tal secont timp la musiche e reste chê e salacor l’Udin al è ancjemò plui paron dal cjamp e de bale. Cundut achel la sô manovre e je sterpe e Sirigu nol à masse fastidis. Cun di plui i blancs e neris a pierdin Mandragora, signestrât seriamentri, e inte ultime part dal incuintri Belotti al prove a fâ il bis, su assit di Berenguer, ma in chê ocasion Musso al sta in vuaite e al pare fûr.

Cuindis tîrs in puarte e nissun gol e sedis corners a un a son i numars che a marchin, tal ben e tal mâl, la partide dal Udin, che al somee cressût sul plan dal zûc rispiet al periodi prime dal confinament ma al va dilunc a vê i siei problemis in zone gol. Pal Toro, impen, e je la vitorie che e coventave par tirâsi fûr de part plui basse de classifiche, là che l’Udin al reste ancjemò impeolât, ancje se intune posizion che e somee mancul grivie par vie dal fat che chês altris scuadris plui indaûr no àn rivât a fâ ponts.

Pe cronache, insom, al è ben ricuardâ dôs decisions di Maresca che a àn impiât cualchi discussion: probabilmentri chel sivilât a Zaza tal prin timp, prime che Edera al tiràs in puarte, nol jere fal, ma Samir e Nuytinck si vevin dât cuintri un cul altri di bessôi; par sigûr Berenguer al à butât la bale in corner suntune punizion di De Paul slargjant la man e al varès podût jessi rigôr a pro de scuadre furlane.