I 50 agns di Pratobello + Kenze Neke + Gruppo Rubanu + Pixamandurries + Blu L’Azard + Sinead O’Connor = Babêl Europe 12/2019

Musichis, lenghis, minorancis e nazions cence stât jenfri storie e atualitât. La gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze, e sarà dedicade in particolâr al cincuantesim inovâl di un fat impuartant inte storie de Sardegne.

Inte trasmission, che e va in onde inte ultime setemane di Jugn, si memorearà la lote di Pratobello, la resistence pacifiche, antimilitariste e anticolonialiste fate de int di Orgosolo tal mês di Jugn dal 1969: une mobilitazion popolâr di sucès cuintri de ocupazion militâr dal teritori.
Si fevelarà di chei fats e si scoltarà la cjançon che e conte di chês zornadis e di chê int, “Pratobello”, inte version origjinâl dal Gruppo Rubanu e in chê, tornade a fâ passe vincj agns indaûr, dai Kenze Neke.

Il percors musicâl, dongje de Sardegne, al tocjarà ancje la Catalogne, cu la band dai Pixamandurries, la Irlande, cuntune des cjançons par gaelic dal repertori de innomenade cjantante Sinead O’Connor, e lis valadis ocitanis e francoprovençâls dal Piemont, cuntune selezion de produzion dai Blu L’Azard, grup protagonist la setemane stade di un conciert speciâl, une Nit OccitanoArpitana che si à davuelte intun ambient di Barcelone vinars ai 21 di Jugn.

E sarà la ocasion ancje par segnalâ un biel articul di Andrea Geniola su QCodeMag in cont de situazion politiche in Catalogne e a Barcelone dopo des elezions aministrativis dai 26 di Mai, par ricuardâ che e mancje ancjemò une setemane par presentâ lis candidaturis pe partecipazion ae sezion musicâl di Suns Europe, par fevelâ dai events plui resints fats in Friûl inte suaze dal percors viers de edizion dal 2019 dal festival european des arts intes lenghis minorizadis,  par segnalâ il festival Undàrius che si davuelç a Girona in Catalogne e par marcâ cemût che la musiche furlane e sedi ancje un prodot di esportazion, lant daûr dai concierts fats inte setemane stade di Alvise Nodale e Franco Giordani in Trentin e dai Luna e Un Quarto tal Tirôl dal Sud.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion http://www.ondefurlane.eu). Dopo des sôs trê emissions vie pe setemane (martars ai 25, miercus ai 26 e sabide ai 30), ancje cheste gnove pontade si pues tornâ a scoltâle in rêt su Spreaker e su Spotify.

Advertisements

Suns Europe 2019, il bant pe sezion musicâl al scjât ae fin di Jugn. E intant îr a Vençon e a S. Denêl altris doi events leâts al festival

A van dilunc i preparatîfs pe edizion di chest an di Suns Europe, il festival des arts tes lenghis minorizadis dal nestri continent, che si davuelzarà in Friûl jenfri la fin di Novembar e i prins di Dicembar. Il prin di Jugn, in particolâr, al è saltât fûr il bant dal concors de sezion musicâl di Suns Europe 2019, che si cjate sul sît uficiâl de manifestazion. L’intidiment de manifestazion al è chel di dâ visibilitât aes produzions contemporaniis intes lenghis minoritariis caraterizadis di modernitât, di origjinalitât e di inovazion e cussì di promovi la diversitât linguistiche e culturâl tant che un patrimoni, un dirit e une oportunitâts par ducj.

Cun dut che Suns Europe al trate ancje la leterature e il cine, il bant che si cjate in rêt al rivuarde in maniere esclusive il setôr musicâl, che al è ogjet di un percors specific, là che e je previodude la assegnazion di un premi, inte serade de sabide (par chest an l’apontament al è pai 30 di Novembar) che daûr de tradizion inviade intal 2015 e ven calcolade un dai events plui impuartants di dute la manifestazion. Al è pussibil presentâ lis candidaturis, lant daûr des modalitâts previodudis dal bant, dentri dai 30 di Jugn. Duncje e je ancjemò une setemeane di timp. I musiciscj partecipants a vignaran selezionâts dal comitât artistic di Suns Europe dentri de fin di Lui.

Al va dilunc ancje il percors che al puarte aes fin di Novembar, che al è segnât ancjemò di altris apontaments. Dopo dai incuintris che a son stâts inmaneâts Udin, li de Librarie Tarantola, ai 14 e ai 21 di Mai, dedicâts aes realtâts di Catalogne e Sardegne, cu lis presentazions dai libris La sfida catalana di Marco Santopadre e Idee di Sardegna di Carlo Pala, juste îr, sabide ai 22 di Jugn, in Friûl a son stâts doi events “targâts” Suns Europe.

A Sant Denêl inte suaze di Aria di Festa al è stât il conciert dai Lou Seriol, formazion che di passe vincjecinc agns e prodûs une misture esplosive di rock, folk e tescj in lenghe ocitane, intant che a Vençon, dentri dal program de Notte romantica, al è stât l’incuintri dal titul Musiche Furlane intal Borc, cui cjantautôrs  Franco Giordani e Silvia Michelotti, che a àn presentât in version acustiche diviers tocs dai lôr repertoris e a àn dialogât sul scrivi e sul cjantâ par furlan, cul coordenament di Pauli Cantarut di Radio Onde Furlane.

 

Cine + leterature + politiche + Mounqup + Raud Ants + I Cantelli + Franca Masu + Gran Bal Dub = Babêl Europe 11/2019

Musiche, cine, leterature, politiche e atualitât. A son chescj i ingredients che e cirarà di meti dongje la gnove pontade di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze.

Inte trasmission che e va in onde vuê ai 28 di Mai e po in repliche tal dopo di misdì ancje doman, miercus ai 29, a une e sabide ai 2 di Jugn, a une e mieze si fevelarà dal Festival dal cine di Cannes, là che il prin premi de jurie inte sezion Un Certain Regard al è stât vinçût dal film galizian O que arde dal regjist Oliver Laxe, il prin cine par galego presentât inte suaze di chê innomenade manifestazion. Un altri argoment che al vignarà frontât al è chel de edizion 2019 dal Premio Ostana, manifestazion dedicade ae scriture e ae creativitât tes lenghis minorizadis de Europe e dal mont, che si davuelç a Ostana, piçul borc di mont tal cjanâl dal Po, tes Valadis ocitanis dal Piemont, dai 31 di Mai ai 2 di Jugn. Cun di plui si provarà a dâ un cuc ai risultâts tes elezions europeanis, davueltis dai 23 ai 26 di Mai, des fuarcis politichis espression di minorancis e nazions cence stât.

Lis selezions musicâls a compagnaran chel percors tematic. Si viazarà de Galizie, di dulà che e rive la cjantante e musiciste Mounqup, che l’an passât e veve dât fûr il disc Castro Verdi fintremai ae Estonie dai Raud Ants che a misclicin rock, folk e metal e a cjantin inte lenghe votiane, passant pe Ocitanie dal progjet Gran Bal Dub, metût adun za di cualchi an de bande di Sergio Berardo dai Lou Dalfin e di Madaski dai Africa Unite, e dal disc Benvenguts a bòrd, pe citât di L’Alguer/Alghero, la “Barceloneta de Sardenya”, cu la vôs di Franca Masu, e pe Corsiche, là che si fasarà un salt indaûr tal timp par recuperâ une cerce dal repertori dai Cantelli.

Si pues scoltâ Babêl Europe  su lis frecuencis di Radio Onde Furlane: sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

Cagliari – Udinese 1-2

L’Udin al vinç a Cagliari e al siere il campionât intune posizion in classifiche che i fâs fâ biele figure. La partide e à une ande avonde trancuile, cu lis dôs scuadris che a àn la salvece inte sachete e che a onorin l’impegn de ultime partide cence dâsi masse fastidi.

Tal prin timp il Cagliari al fâs alc di plui, ancje parcè che Maran al sielç di presentâ la sô scuadre miôr cu la difese a cuatri formade di Srna, Lykogiannis, Pisacane e Klavan, cun Cragno tra i pâi, cu la linie mediane di Bradaric, Ionita e Barella e cun Pavoletti e Joao Pedro in prime linie, cu la poie di Castro. L’Udin al ten bot, cun Tudor che al presente une scuadre cun diviersis novitâts: in atac al mande in cjamp la cubie Pussetto-Teodorczyk, lassant Lasagna in bancjine e Okaka e De Paul a cjase, inte mediane si torne a viodi Badu al puest di Sandro, dongje di Ter Avest, Mandragora, Hallfredsson e Zeegelar, e daûr a son De Maio, Troost-Ekong e Samir, cun Musso in puarte.

Chel alc di plui che al somee che a vedin i parons di cjase si concretize, passât il prin cuart di ore, cuntune conclusion di Lykogiannis, fermade di Musso, e cuntun tîr a bersai di Pavoletti. Il gol cjapât al fâs sunâ la svearine tal Udin, che al alce il cjâf e al frache il pît sul aceleradôr. A rivin cussì un tentatîf ae pirate vie di Teodorczyk e doi intervents decisîfs di Cragno ancjemò suntun tîr dal atacant polac e po suntune conclusion di D’Alessandro.

Il prin timp si siere cul Udin al atac e ancje te secondre frazion i blancs e neris a sburtin indenant. Al rive cussì, dopo vot minûts, un gol firmât di Pussetto che però nol ven fat bon di Volpi dopo de verifiche fate cul Var che al segnale la posizion di fûr zûc. La decision dal arbirti e rimande l’apontament cu la paritât di siet minûts cuant che Hallfredsson al fâs partî un cross che al devente un tîr in puarte.

Mancul di dîs minûts plui tart l’Udin al passe in vantaç cun De Maio che al segne cul cjâf. Il Cagliari al prove a ribaltâ la situazion, ma lis conclusion plui pericolosis a son ancjemò chês de scuadre furlane cun Teodorczyk e cun Lasagna, che al cjape il puest di Pussetto. Dome tai minûts di recupar il Cagliari al rive a vê la bale pal doi a doi, ma Joao Pedro no le bute dentri e al lasse dute la sodisfazion pe partide ai blancs e neris.

Udinese – Spal 3-2

L’Udin al vinç e si svicine ae concuiste de permanence in serie A. Cuintri de Spal la scuadre blancje e nere e rive a segnâ daurman, dopo cinc minûts di zûc, e dentri dal prin timp al incrès il so vantaç cun altris soi goi. Tal secont timp la musiche e je diferente, cul Udin che a di un ciert pont al cale, i ospits che a cressin, a segnin e a riscjin di jonzi la paritât e di impeolâ i blancs e neris.

La scuadre di balon furlane si presente cun Musso in puarte, cun De Maio, Ekong e Samir in difese, cu la linie mediane costruide cun Mandragora e Sandro tal mieç, cun Stryger Larsen e Zeegelaar laterâi e cun De Paul a sapontâ la cubie di atac formade di Okaka e Lasagna.

La partence dai parons di cjase e je decise. Il gol al rive in curt cuntune conclusion cul cjâf di Samir suntun cross di De Paul e dopo doi minûts une altre bale pinelade dal trecuartist argjentin e e devente un “cuasi autogol” par vie dal intervent di Gomis e de deviazion di Bonifazi. L’Udin al ridûs i zîrs dal motôr e la Spal e profite par provâ a lâ dongje de paritât cuntun tîr-cross di Fares che al ven parât vie di Musso e cuntun tîr fûr bersai di Petagna.

Tal ultin cuart di ore l’Udin al torne a cjapâ in man la partide. Il prin efiet di cheste situazion al è un corner di De Paul cun Okaka che nol mancje l’apontament e al segne cul cjâf. A passin trê minûts e l’ex atacant dal Watford al segne ancjemò in acrobazie. L’Udin al va dilunc a sunâ chê musiche e si fâs viodi ancjemò des bandis di Gomis cun De Paul e cun Lasagna.

La seconde frazion si vierç cu la Spal che e prove a masanâ zûc par cjatâ un troi inte direzion de puarte di Musso. L’Udin al è atent e al rispuint ae manovre dai aversaris. I minûts a passin, la partide e je plasevule e ecuilibrade e i ferarês a rivin a segnâ cun Petagna, intant che i blancs e neris a puartin al tîr Mandragora, cuntune biele manovre disvilupade di D’Alessandro, Stryger Larsen e Okaka, e Lasagna, cuntun sugjeriment di Okaka.

I blancs e neris no rivin a concretizâ lis lôr zuiadis e cussì e je la Spal a cjatâ la strade dal gol cun Valoti che le met dentri cul cjâf suntun cross di Kurtic. Il vantaç dal Udin al è dome di un gol e Tudor al prove a zuiâ la cjarte Pussetto, che al jentre in cjamp al puest di Lasagna, cun chê di dâ plui fuarce e plui profonditât aes azions di atac.

La sielte dal tecnic e je juste ancje se il so impat al è limitât. Il ritmi dal zûc al cale e l’Udin al cîr soredut di tignî la bale. A son ancjemò emozions di une bande e di chê altre. La Spal si svicine ae paritât cun Kurtic che al tire fûr bersai di un et e al fâs vignî i sgrisui ai tifôs furlans. I ospits a sburtin ancjemò, l’Udin si difint e al rispuint cun Mandragora. I minûts a passin, ancje i cuatri di recupar, e la partide si siere cul unic risultât bon pe scuadre furlane, che si cjate intune posizion di sigurece, ancje par vie de paritât jenfri Cagliari e Genoa. Condut achel al è bene al conven – soredut par se stes, stant che l’Udin cumò al varès di jessi a puest – che il Toro al fasi il so dovê cul Empoli.

Suns Friûl + “La sfida catalana” = Babêl Europe 10/2019

Libris di lei, musiche di scoltâ e apontaments di ricuardâ, jenfri Friûl e Catalogne. La pontade numar 10 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, e cole intune setemane particolâr, che in Friûl e je segnade di une bande di trê apontaments dedicâts a libris e a autôrs che a fevelin de cuistion catalane e di chê altre di Suns Friûl, vetrine di gale de musiche furlane contemporanie che e je in program ai 18 di Mai a Passarian inte suaze di Sapori Pro Loco.

Propit chei a saran i argoments frontâts dilunc de trasmission, in onde in direte vuê, martars ai 14 di Mai, a 11 a buinore e po, in repliche, doman, miercus ai 15, a une dopo di misdì e ancje sabide ai 18 a une e mieze. Prin di dut si fevelarà di Suns Friûl, dal so program e dai siei protagoniscj e po dal incuintri che si à davuelt nossere inte sale de Societât operarie di Cividât, là che par iniziative dal Novi Matajûr, in colaborazion cun Onde Furlane, al è stât un confront dopli, tra doi libris e doi autôrs: ven a stâi il pont di viste di Marco Santopadre e dal so La sfida catalana. Cronaca di una rivoluzione incompiuta  e chel di Bojan Brezigar e dal so I giorni della Catalogna.

Cun di plui, stant che juste vuê a 6 sot sere li de librarie Tarantola di Udin (vie Vittorio Veneto 20), al sarà un altri incuintri di presentazion dal libri La sfida catalana, si fasarà une tabaiade sui contignûts de publicazion e su la atualitât de Catalogne juste cul so autôr.

La conversazion e vignarà compagnade de musiche di artiscj  de Catalogne o di chei altris teritoris di lenghe catalane e si ricuardarà ancje la presentazion di I giorni della Catalogna che si fasarà sabide ai 18 di Mai a 11 a buinore li de librarie Einaudi di Udin, inte suaze di Vicino/Lontano

Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.
Dopo des trê emissions de setemane ancje cheste trasmission si podarà tornâ a scoltâle in podcast cun Spreaker e cun Spotify.

 

 

“La sfida catalana” e “I giorni della Catalogna”, vuê a Cividât e doman a Udin si fevele di libris e di Catalogne

Cui che al è a stâ in Friûl, vie par cheste setemane, al à almancul dôs ocasion par savê alc di plui su la Catalogne e su la situazion di chê comunitât, tra rivendicazions di autoguvier, repression de polizie, politics in preson e in esili, nazionalisim esasperât e contradizions europeanis. In particolâr la cuistion catalane e sarà al centri dal incuintri dal titul Catalogne, une cuistion europeane, in program doman, martars ai 14 di Mai, a 6 sot sere li de librarie Tarantola di Udin (vie Vittorio Veneto 20), cu la presentazion dal libri La sfida catalana. Cronaca di una rivoluzione incompiuta di Marco Santopadre.

Il volum, publicât l’an passât di PGreco, al propon une leture atente des vicendis catalanis e al marche la impuartance de cuistion nazionâl e de domande di sovranitât popolâr. Il test al partìs de croniche detaiade des mobilitazions de Sierade dal 2017, al propon i elements impuartants de storie catalane contemporanie, al ufrìs une panoramiche des formazions politichis e sociâls catalanis e al fronte i grops no ancjemò disfats de “transizion” dal regjim franchist al ordin politic e sociâl dal dì di vuê ancje midiant di une selezion di articui scrits intai ultins agns, di intervistis fatis cun rapresentants dal indipendentisim e de traduzion di materiâi produsûts dal moviment catalan.

A dialogâ cul autôr sui contignûts dal libri e sui disvilups plui resints de situazion in Catalogne a saran Carli Pup, responsabil dal blog Internazionalitari e redatôr di Radio Onde Furlane, e di Marco Stolfo, politolic de Università dal Friûl.
L’apontament al è promovût de cooperative Informazione Friulana, societât editore di Onde Furlane, cu la colaborazion de librarie Tarantola, dal setemanâl de comunitât slovene de provincie di Udin Novi Matajûr, dal progjet MuMuCEI (Multilingualism Multicultural Citizenship and European Integration) dal Ateneu furlan e de iniziative di informazion e documentazion su chescj temis Ethnos & Demos. Identità, Culture, Diritti e Integrazione in Europa.

L’incuintri al jentre intal program des ativitâts leadis ae edizion 2019 di Suns Europe, il festival des arts intes lenghis minorizadis dal continent.

Cun di plui, ancjemò prime che a Udin, un altri apontament interessant dedicât ae cuistion catalane al è chel in program vuê a 6 e mieze sot sere inte sale de Societât operarie di Cividât (place Giulio Cesare 14). Par iniziative dal Novi Matajûr, in colaborazion cun Onde Furlane, al sarà un dopli confront, tra doi libris e doi autôrs. Il pont di viste di Marco Santopadre e da La sfida catalana al cjatarà chel di Bojan Brezigar, gjornalist e politolic, par sedis agns diretôr dal cuotidian Primorski Dnevnik e espert di politiche europeane e internazionâl, e da I giorni della Catalogna, la edizion taliane, publicade cualchi mês indaûr de cjase editore Qudulibri, dal so instant book dedicât al referendum dal 1 di Otubar, za jessût par sloven cul titul Šest dni v Kataloniji.

La partecipazion ai doi events e je libare e gratuite.

Frosinone – Udinese 1-3

Une vitorie che no je dome necessarie, ma ben ancje fondamentâl. L’Udin a Frosinone al torne a vinci lontan dal Stadi Friûl dopo vot mês e al puarte a cjase trê ponts impuartantons che inte corse pe salvece i permetin di tignîsi l’Empoli dôs lungjecis indaûr e di no pierdi teren rispiet aes scuadris che a son plui indenant.

Il sucès de scuadre di balon furlane si fisse bielzà vie pal prin timp, ancje se la partide no je une spassezade par vie che i parons di cjase, cundut che la matematiche ju à za condanâts ae retrocession, a mostrin di volê fâ biele figure denant dai lôr tifôs, e vie pal prin timp a tegnin bot tal confront cui bklancs e neris e salacor in cualchi passaç a somein plui ordenâts e compats.

Tudor al mande in cjamp une scuadre cun cualchi mudament inte formazion rispiet aes partidis passadis. In difese a tornin Samir e Ekong, Stryger Larsen al recupare la posizion di laterâl di diestre inte linie mediane, là che a çampe si torne a viodi ancje D’Alessandro, e in atac dongje di Lasagna al cjate puest Okaka. Di chê altre bande il Frosinone al palese une buine propension ofensive cu la sielte dal scheme 3-4-3, là che lis pontis a son Ciofani, Pinamonti e Ciano, in difese Capuano al cjape il puest di Goldaniga e in puarte al è Bardi al puest di Sportiello.

La partence dai parons di cjase e je chê cul pît just e la prime ocasion e je une iniziative di Pinamonti che al salte Musso ma si cjate la strade sierade de bande di De Maio. L’Udin al rispuint soredut cul dinamisim di Okaka, che dopo unids minûts di zûc al è brâf a puartâi vie la bale a Valzania, al schiribice doi aversaris e al mande cun precision la bale in puarte fasint la barbe al pâl.

Il Frosinone al mostre di no volê fâ la vitime sacrificâl pe salvece de scuadre furlane e al prove a reagjî cun grinte e cun continuitât, ancje se Musso al è atent e puntuâl e al neutralize i tentatîfs aversaris. Ben cuviert in puarte e in difese, l’Udin al sghinde i pericui puartâts di Ciano e si puarte indenant ae ricercje dal secont gol che al rive cuatri minûts prime de polse cun Samir che cuntun tîr cul cjâf al mande in puarte un biel cross su punizion prontât di De Paul.

Pai parons di cjase al è il colp dal ko, che al vierç la strade pe tierce segnature furlane, che e siere la prime frazion: assist di De Paul par Lasagna, passaç di KL15 par Okaka e conclusion a colp sigûr e a puarte vueide.

Tal secont timp l’Udin al è intes cundizions di gjestî il vantaç e fintremai di segnâ il poker cun De Paul, cun Larsen e cun Lasagna, intant che il Frosinone al prove a rispuindi cun Pinamonti e Paganini.
Dongje de fin de partide i parons di cjase a rivin a segnâ il gol de bandiere cun Ciofani, ma l’Udin no si scompon plui di tant. Al manten il control de partide e al cîr di segnâ ancjemò cun De Paul e Pussetto, jentrât al puest di Okaka.

INT/ART, la culture e la creativitât protagonistis ai 10 di Mai a Udin li de Universitât dal Friûl

Vinars ai 10 di Mai li de aule 2 di Palaç Antonini (Universitât dal Friûl – V. Petracco 8, Udin) a 5 sore sere il CIRF (Centri interdipartimentâl pal disvilup de lenghe e de culture dal Friûl) dal Ateneu furlan, in colaborazion cun Radio Onde Furlane e cu la societât di produzion audiovisive Agherose, inte suaze de Setemane de Culture Furlane promovude de Societât Filologjiche Furlane, al inmanee un apontament dedicât ae comunicazion e ae creativitât in lenghe furlane cu la proiezion di doi episodis de serie di documentaris INT/ART di Dorino Minigutti e Giorgio Cantoni.

INT/ART, che il so titul al fâs riferiment ae INT e ae ART e in chel istès al riclame ancje la nozion di ARTiscj INTernazionâi, al è un progjet audiovisîf che al conte la storie di une schirie di zovins artiscj furlans – protagoniscj ognidun di un episodi – che a son impegnâts tai cjamps de musiche, de ilustrazion, dal cine, dal teatri, de sculture, de fotografie e de scriture creative. La lôr ativitât e je inlidrisade inte culture e inte identitât dal Friûl in maniere fuarte, personâl e dinamiche e il lôr lavôr al inricjìs la culture furlane e al contribuìs al so rinovament continui. Cun di plui, chês conessions specifichis cul Friûl e, massime in cierts câs, l’ûs de lenghe furlane a marchin, in maniere plui o mancul fuarte e esplicite, la lôr produzion e a deventin elements di origjinalitât che ur permetin di jessi cognossûts, ricognossûts e preseâts ancje inaltrò, ator pal mont.

In particolâr, dilunc dal apontament dai 10 di Mai, a vignaran presentâts i episodis che a contin la esperience artistiche e personâl di Carin Marzaro, che e fâs la grafiche e la ilustradore e e sune il bas eletric, e di Federico Scridel, atôr impegnât in cetancj progjets di teatri, di cine e di television.

L’incuintri, che al vignarà introdusût dal diretôr dal CIRF, Enrico Peterlunger, e al varà la conduzion di Pauli Cantarut di Radio Onde Furlane, al previôt la presince dal regjist e produtôr di INT/ART, Dorino Minigutti, di tancj agns impegnât ancje inte realizazion di prodots in lenghe furlane, e dai doi artiscj protagoniscj dai doi documentaris.

La partecipazion al event e je libare e gratuite.

Udinese – Inter 0-0

Un piçul pas indenant viers de salvece. Dopo de prestazion discrete di Bergamo, cuant che l’Udin al veve pierdût cuintri di une Atalanta fuarte e fortunade, i blanc e neris in cjase a rivin a fâ alc di miôr par ce che al tocje il risultât. No rivin a segnâ nancje un gol, però no’nt cjapin e duncje a puedin puartâ a cjase un pontut impuartant, che nol permet ancjemò di sierâ pardabon la cuistion de permanence in serie A ma al jude une vore massime sul plan psicologjic.

Cuintri di chê che e je la tierce fuarce dal campionât Tudor al mande in cjamp Musso in puarte, Stryger Larsen, De Maio e Nuytinck in difese, Sandro tal mieç dongje di Mandragora e di De Paul cun D’Alessandro e Zeegelaar su lis corsiis esternis e cun Pussetto e Lasagna a scombati in atac. La Inter e mostre di vê une marcje in plui, ma la scuadre di balon furlane e ten bot, e cîr di fâ pressing sui aversaris che a puartin indenant il balon, di fermâju e di rispuindi in cuintripît.

Lis ocasions di gol plui gruessis a son dutis dai ospits, che a oblein Musso a stâ in vuaite e a intervignî cun snait e cun mistîr cun Perisic e cun Nainggolan. Dopo vincjedoi minûts di zûc al è Lautaro che al fâs vignî i sgrisui prime ai tifôs furlans parcè che si cjate al apontament cu la bale pinelade par lui di D’Ambrosio e po ai supporters interiscj par vie che la sô conclusion e je fûr scuare e fûr bersai.

Cul passâ dal timp l’Udin al vuadagne teren e si fâs viodi des bandis di Handanovic cuntune biele combinazion tra De Paul e Mandragora, che il so tîr al ven fermât dal ex puartîr furlan. Prime de polse Brozovic inte aree di rigôr interiste al sburte in maniere iregolâr e vistose Mandragora, ma par Rocchi nol sucêt nuie e nol è nancje il câs di zovâsi dal jutori dal Var.

La seconde frazion si vierç cuntun ritmi plui alt e cun dutis dôs lis formazions che a provin a fâ alc par rompi la paritât. A son emozions in atac e in difese: Lautaro al impegne Musso di fûr, Brozovic al fâs un miracul par fermâ Pussetto che si svicine in maniere pericolose ae puarte di Handanovic e po al è il puartîr blanc e neri a meti un blec cul pît suntun tîr di Nainggolan tocjât cul tac di De Vrij.

La pression ofensive de Inter e aumente, poiantsi ancje su Icardi, jentrât al puest di Borja Valero, cun Lautaro che al dâ lavôr a De Maio e a Zeegelaar. La scuadre di balon furlane e scuen pensâ dome a difindisi e lu fâs cun atenzion e cun continuitât, ancje cuant che Spalletti al bute dentri Candreva e Keita par lâ al atac. Lis bariduris fatis sù dal Udin a tegnin e se ancje si vierç cualchi sfese al è simpri Musso che al tire jù la sierande.