Storie + memorie + atualitât + la anteprime dal disc gnûf dai Lou Seriol + musiche des Asturiis al Friûl =Babêl Europe 21/2018

Storie, memorie, atualitât e musiche di îr, di vuê e di doman, cuntune cerce in anteprime di un disc che al vignarà presentât in maniere uficiâl ae fin di cheste setemane. La pontade numar 21 dal 2018 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, si presente in continuitât plene cun chê di cuindis dîs indaûr.

Cun di fat, si tornarà a fevelâ dal crowfounding inviât dai sarts Balentia pe produzion dal album che ju viôt tornâ dongje e che al varès di saltâ fûr dentri de fin dal an e soredut si scoltarà alc di Occitan, il disc gnûf dai Lou Seriol che al vignarà screât ai 19 di Otubar a Lo Vernant / Vernante te Val Vermenanha (Valadis ocitanis dal Piemont).

Vie pal apontament di vuê, martars ai 16 di Otubar a 11 a buinore in direte, e po in repliche ancje doman, miercus ai 17 a une dopo di misdì, e sabide ai 20 ancjemò a une e mieze, si memorearan ancje la fusilazion di Lluís Companys (ai 15 di Otubar dal 1940), la deportazion dai ebreus di Rome (ai 16 di Otubar dal 1943) e la aprovazion de prime Risoluzion dal Parlament european su la tutele des minorancis (ai 16 di Otubar dal 1918).

Si scoltarà ancje musiche par yiddish, cun Talila e Ensemble Kol Aviv, par asturian, cui Dixebra, e par furlan, cun Rive No Tocje.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet, cun Spreaker e cun Spotify.

Advertisements

Udinese – Juventus 0-2

Nuie ce fâ. L’Udin si met in zenoglon denant de Juventus di Ronaldo, Dybala e Mandzukic. Lis sperancis di viodi la scuadre di balon furlane tignî bot denant dai prins in classsifiche si sfantin tal zîr di cuatri minûts dopo de prime mieze ore di zûc, cul gol di Bentancur su cross di Cancelo, cul tîr di Mandzukic parât di Scuffet e cu la seconde segnature, firmade di CR7.

La formazion di Velazquez e fronte la capoliste e la sô potence tecniche e tatiche cun chê di sierâsi indaûr e di provâ a rispuindi in cuintripît. Magari cussì no, la difese no je simpri perfete e indenant lis iniziativis di De Paul a son masse pocjis e Lasagna nol rive a fâ alc e ce.

La Juve e cjape sù il comant des operazions daurman e si viôt vie par dut il prin timp, che siere cul dopli vantaç pe scuadre di Allegri e cul displasê pal Udin par no vê rivât a meti in puarte un biel tîr di Berhami juste prime de polse.

Te seconde frazion l’Udin al mostre un tic di iniziative in plui, ma al rive a fâsi viodi des bandis di Szczesny in ben pocjis ocasions e cuant che nol rive il puartîr al è Alex Sandro che i met un blec. Di chê altre bande al à par sigûr plui lavôr Scuffet, che al à il merit di evitâ che i ospits a fasin un botin ancjemò plui sostanziôs.

La performance dal puartîr di Remanzâs e je la robe miôr de partide, almancul cuntune cjaladure furlane. Pal rest, cundut che si saveve che cuintri de Juve e jere dificle, l’Udin al delût e si torne a sintî aiar di Mer…Dacia Arena.

Bologna – Udinese 2-1

Un prin timp discret e une seconde frazion zuaide cun mass sudizion a puartin l’Udin a pierdi ancje sul cjamp dal Bologna. Dopo dal stop in cjase patît miercus cuintre de Lazio la scuadre di balon furlane tal stadi Dall’Ara e cîr di tornâ a fâ ponts, ma e reste a bocje sute.
La formazion di Velazquez e je biele dome tai prins 45 minûts cuant che ur fâs pôre ai parons di cjase cul meti adun almancul sîs ocasions di gol. Dopo de polse il Bologna al incrès la intensitât dal so zûc e cun chê la sô pression ofensive, intant che l’Udin al cale e al lasse masse spazi ai ros e blu, che cussì a rivin a sierâ la partide cu la vitorie che ur coventave.

Velazquez al presente un 4-1-4-1 dinamic, che si stramude il 4-4-1-1 tes fasis di zûc comandadis dai aversaris. Scuffet al è in puarte, la difese e je simpri chê cun Stryger Larsen, Ekong, Nuytinck e Samir, Behrami al è tal mieç, tra la tierce linie e chê mediane, là che si cjatin Mandragora e Fofana cun Pussetto che al torne titolâr a man drete e cun De Paul che a man çampe al à la libertât di moviment che i covente ancje par sapontâ Lasagna in atac. Inzaghi al met in cjamp une formazion che i siei ponts di riferiment a son Nagy, Svanberg e Dzemaili tal mieç e Santander in atac.

L’Udin al partìs cul pît just. La scuadre furlane e fâs zirâ la bale e al imbastìs buinis azions ofensivis. Il Bologna al patìs la pression dai aversaris e ur lasse cjamp. Te fasse mezane si scombat e i blancs e neris a àn il control des operazions pe plui part dal prin timp. Tal zîr di mieze ore a metin adun almancul cuatri balis gol, che però De Paul, Lasagna e Mandragora a tirin fûr bersai.
Tal fratant des bandis di Scuffet nol sucêt alc e ce, se si gjavin un contrôl falât di Ekong e il contat seguitîf tra il difensôr dal Udin e Svanberg, che al va jù te aree di rigôr, ancje se par Manganiello no son lis cundizions par sivilâ il penalty, lis protestis dai parons di cjase e un pâr di atacs di Santander là che il puartîr furlan al rive a meti un blec cu la colaborazion di Stryger Larsen.

La regule dal gol mancjât che al devente gol cjapât e vâl ancje in cheste ocasion: la cuinte bale gol confezionade dal Udin – biele vierzidure di De Paul par Pussetto – e rive finalmentri a jentrâ te puarte di Skorupski, stant che la ale blancje e nere e gjestìs te maniere miôr la sfere, e salte Krejci e cussì e tire cul esterni dal so pît preferît. A conts fats il vantaç al è meretât, ancje parcè che tai minûts seguitîfs il Bologna nol rive a reagjî daurman e a son ancjemò i zuiadôrs di Velazquez a jessi pericolôs des bandis di Skorupski, in particolâr cuntun cross di Stryger Larsen e cuntun tîr di De Paul, che però al va fûr di pôc.

Ae fin dal prin timp, tal moment miôr dal Udin, la regule no scrite dal gol mancjât che al devente gol cjapât e vâl a pro dal Bologna, che al segne cuntune biele conclusion di Santander e al cree lis cundizions par tacâ ben la seconde frazion, che tal ben e tal mâl e regale la sô prime emozion ai tifôs bolognês dopo siet minûts cuntune buine manovre concludude mâl di Dzemaili, dopo di un tîr di De Paul che Skorupski al pare cence padins.

A passin i minûts e la manovre dal Udin si sfante. I parons di cjase a àn plui snait e plui benzine, la scuadre furlane e rispuint dome cun cualchi scat di De Paul e Fofana, intant che il Bologna al prove a cjatâ il gol cun Skorupski. Passade la mieze ore dal secont timp Inzaghi al zuie la cjarte Orsolini, che al jentre al puest di Svanberg, e la formazion emiliane e vuadagne ancjemò dinamisim e fuarce ofensive. Dopo un tîr fûr di pôc di Mandragora al è propit il gnûf jentrât chel che si fâs cjatâ tal pues just tal moment just suntun sugjeriment di Mattiello e cussì al rive a segnâ il gol dal vantaç.

Tai ultins minûts di zûc l’Udin al prove a dreçâ la partide, ma nol cjate main il spieli de puarte, intant che di chê altre bande Scuffet al fâs un mieç meracul su Santander e Orsolini al va dongje dal tierç gol, cuntune conclusion ben petade che e cjape il pâl.

Vitorie meretade pal Bologna e un tic di marum pal Udin, che al varès podût fâ rindi di plui il bon fat vie pal prin timp e che te seconde frazion nol varès vût di molâ cemût che al à fa. Sabide che e ven i blancs e neris a scugnaran fâ alc di plui e vie par dute la durade de partide. Il fat che i ospits a sedin chei de Juventus al podarès jessi un motîf di plui par sghindâ il pericul di inviâ une gnove ete marcade dal Efiet Mer…Dacia Arena.

Udinese – Lazio 1-2

L’Udin al piert ma nol è par vie di chel che in tantis ocasions, in passât, o vin clamât Efiet Mer…Dacia Arena. Nossere li dal Stadi Friûl la scuadre blancje e nere e zuie une partide oneste, là che e rive a tignî bot denant de plui titolade Lazio, e mostre ancje cualitâts tecnichis e tatichis e salacor e pues lamentâsi cun se stesse par no vê rivât a puartâ a cjase almancul un pont.

Cul savê di dopo si pues contestâ ae scuadre di balon furlane di no vê vût cûr di cjapâ sù la iniziative cun plui decision vie pal prin timp, cuant che i ospits, cun Milinkovic, Immobile e Leiva a polsâ in spiete dal derby domenie, a pensavin soredut a no vê masse fastidis. Cussì vie pai prins cuarantecinc minûts lis dôs scuadris no produsin alc e ce, se si gjave cualchi iniziative personâl, dai scats di Correa che si incrose cun Luis Alberto aes combinazions tra De Paul e Lasagna. La prime ocasion di gol e je pal Udin, cuntune punizion di De Paul che i scjalde lis mans a Strakosha, e po a rivin i tîrs fûr bersai di Correa e Parolo e dôs conclusions cence storie di Fofana.

Te seconde frazion di zûc, daûr di un copion za viodût tes partidis passadis, la musiche e cambie e il ritmi al cres. La gnove fase dal incuintri e ven screade di une azion imbastide di Barak cun Lasagna che i fâs rivâ la bale juste a Fofana: tîr e parade di Strakosha. La rispueste de Lazio e rive cui cambis ordenâts di Inzaghi: a jentrin Immobile e Durmisi, al puest di Caicedo e Lulic. I ospits a alcin la linie dal lôr zûc, Luis Alberto prime al prove a tirâ in puarte cence precision e po al bat une punizion che e impegne Scuffet: il puartîr al pare vie la bale che e finìs tai pîts di Acerbi che al segne.

Sîs minûts plui tart al rive il gol di Correa che al somee destinât a meti in zenoglons l’Udin. Par fortune nol è cussì: Velasquez al cambie Machis cun Pussetto e Barak cun Teodorczyk, cun chê di dâi plui pês e plui fuarce al atac. La reazion dai blancs e neris si viôt daurman, ancjemò cun doi tîrs di Fofana, e il svantaç al ven smiezât cul golon di Nuytinck che al zire in puarte in maniere spetacolâr une punizion di De Paul.

I blancs e neris no molin, il Stadi Friûl al è cun lôr. Teodorczyk nol cjate la puart suntun cross di Larsen, Velazquez al met dentri Vizeu al puest di Lasagna, a svualin cartelins zâi, emozions e minûts di recupar: une altre conclusion di Fofana, fermade ancjemò di Strakosha, e un salvament decisîf di Parolo su Vizeu.

Domenie l’Udin al zuiarà a Bologne.

Valtònyc + Alte Voce + Blu l’Azard + Lino Straulino + Suns Europe + Evò ce Esù = Babêl Europe 19/2018

Une trasmission plene di musiche babeliche poetiche, novitâts discografichis e segnalazions, tra cronache, manifestazions e apontaments. Si presente cussì la ultime pontade dal Istât di chest an di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

L’apontament al è par vuê, martars ai 18 di Setembar, a 11 a buinore e po in repliche tal dopodimisdì di doman, miercus ai 19 a une, e ta chel di sabide ai 22, a une e mieze, simpri sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

E sarà la ocasion par scomençâ a scoltâ alc di Bal Poètic, l’album gnûf dai Blu l’Azard, formazion che la plui part dal so repertori al è fat di cjançons par ocitan, par francoprovençâl e par francês, e lant daûr dai trois là che si incrosin musiche e poesie si scolatarà ancje alc dal disc plui resint di Lino Straulino, là che il mestri de cjançon di autôr par furlan al met in musiche une selezion di poesiis di Leonardo Zanier. Cun di plui il percors di Babêl Europe al tocjarà ancje i Paîs Catalans, a pôcs dîs de grande manifestazion dai 11 di Setembar pe Diada Nacional, cu la vôs dal rapper maiorchin Valtònyc, protagonist di une lungje bataie cuintri de censure, e la Corsiche, cuntun salt indaûr tal timp e cuntune cjançon dal storic grup cors Alte Voce.

Vie pe pontade 19/2018 di Babêl Europe si fevelarà ancje di festivals babelics, cu lis primis anticipazions in cont de edizion di chest an di Suns Europe, che ai prins di Dicembar al rindarà une altre volte Udin e il Friûl il centri de creativitât contemporanie tes lenghis minorizadis de Europe, e cuntun resocont di Evò ce Esù, rassegne cinematografiche che si à davuelete la setemane stade a Martignano, te Grecìe Salentine.

Dopo des emissions in direte e in repliche ancje cheste pontade di Babêl Europe si podarà tornâ a scoltâle in podcast cun Spreaker e cun Spotify.

Udinese – Torino 1-1

Udin e Turin a spartissin goi, ponts e displasês. La partide di îr ur permet a dutis dôs lis scuadris di puartâ a cjase un pontut e duncje di contentâsi, tignint bot a metât classifiche, e in chel istès di no contentâsi par nuie.
Chest al vâl pal Udin, par vie che il gol segnât tal prin timp di De Paul al da la impression che cui granatas al puedi fâ compagn che cu la Sampdoria, e salacor al vâl ancjemò di plui pal Turin, che vie par dute la partide al prodûs plui azions ofensivis dai blancs e neris e al à ancje cualchi reson par inrabiâsi par vie di un pâr di decisions dal arbitri Valeri.

La scuadre di balon furlane si presente sul cjamp dal Stadi Friûl cun Scuffet in puarte, cu la difese a cuarti cun Styger Larsen, Ekong, Nuytinck e Samir, cun Mandragora, Berhami e Fofana tal mieç, cun De Paul e Pussetto laterâi e cun Lasagna uniche ponte. Il Toro al rispuint cuntun 3-4-2-1, là che a cjatin puest zuiadôrs innomenâts tant che il puartîr Sirigu, il difensôr Nkoulou e l’atacant Belotti.

I ospits a mostrin daurman di vê plui determinazion e plui fuarce in atac, cun Berenguer, cun Belotti e cun Iago Falque, che però dopo nancje vincj minûts al scuen lâ fûr par infortuni e i lasse il puest a Zaza. Dopo undis minûts di zûc Bereguer al tire in puarte e al segne, ma Valeri ancjemò prime dal tîr al calcole la sô posizion iregolâr e al sivile e duncje il gol nol ven convalidât.
Se si gjave vie la conclusion dal ex zuaidôr dal Osasuna e lis discussions su la valutazion dal arbitri, il Turin al masane plui zûc e al ten di plui la bale, ma nol rive a jessi pardabon pericolôs des bandis di Scuffet. L’Udin no si scompon, al va dilunc cu lis sôs ripartencis e cussì e rive a cjatâ il gol cuntun tîr di De Paul, che si zove ancje di une deviazion di Nkouku, dentri de prime mieze ore di zûc.

Il prin timp si siere cul Udin in vantaç e cui ospits maluseriôs no dome pe mancjade convalide dal gol di Bereguer e ma ancje par un contat suspiet tra Fofana e Meité che al varès inviât la azion dal gol dal blanc e neri argjentin.
La seconde frazion si vierç ancjemò i ospits che a son ben proietâts indenant. Al rive cussì il golon di Meité, che cuntun biel tîr, potent e precîs, al mande la bale juste tal cjanton tra travierse e pâl a man drete di Scuffet. E rive ancje la variazion tatiche di mister Velazquez che al cambie Pussetto cun Teodorczyk cun chê di dâi plui pês al atac.

Cundut dai mudaments tatics, la cjançon de partide e reste sù par jù simpri chê, cul Toro che al manovre cun plui continuitât cence però jessi masse incisîf in zone tîr e cul Udin che al prove a rispuindi cun verticalizazions in velocitât.
I ospits a protestin ancjemò par un altri contat suspiet tra Samir e Belotti che nol ven sanzionât in nissune maniere di Valeri, intant che i blancs e neris a provin ancjemò a colpî in cuintripît.

La pression granata e prodûs cualchi scat di Belotti e Zaza, che però a vegnin tignûts sot voli de difese blancje e nere. Lis rispuestis dal Udin a metin Lasagna e Teodorczyk tes cundizions di tirâ in puarte, ancje se nissun dai doi al rive a fâ rindi inte maniere miôr chês buinis ocasions. Al fâs compagn ancje Machis che juste ae fin de partide si cjate di bessôl denant di Sirigu ma al controle malamentri e al bruse une bale di aur.

Chel mangjât di Machis al podeve jessi il gol de vitorie dal Udin. Al sarès stât un sucès pesant e impuartant, ma nol sarès stât just pal Turin, massime pe cuantitât e pe cualitât dal zûc imbastît de scuadre granata.
Al Udin i restin la sodisfazion pe buine tignude de difese e pal mantigniment de imbatibilitât e la necessitât di dâi plui fuarce e al atac, là che dongje des buinis prestazions di De Paul e va dilunc il moment no di Lasagna.

Domenie che e ven i blancs e neris a zuiaran a Verone cuintri dal Chievo.

Uèi + Bališ + Catatonia + Bande Tzingare + Niko Valkeapää = Babêl Europe 18/2018

Al è tacât il mês di Setembar e su lis frecuencis di  Radio Onde Furlane al torne Babêl Europe, il program che ogni cuindis dîs al propon un viaç ator pe Europe tra lenghis, musichis, minorancis e nazions cence stât.
Vie par cheste setemane – vuê, martars ai 4 di Setembar, a 11 a buinore; doman, miercus ai 5, a une dopo di misdì; sabide ai 8, a une e mieze dopo di misdì – a son proviodudis lis emissions de pontade numar 18/2018 de trasmission.

L’apontament al metarà dongje cercis di gnovis produzions discografichis e salts indaûr tal timp, tra Ocitanie, Gales, Carinzie, Sapmi e Friûl. E sarà la ocasion par scoltâ alc di Soleu d’Argent, il disc gnûf dai ocitans Uèi, e dal ep plui resint dai Bališ, rock band carinziane di lenghe slovene.
In continuitât cu la trasmission di cuindis dîs indaûr, cuant che e jere stade proponude ancje une cjançon de galese Cerys Matthews, al sarà spazi ancje par un toc gjavât fûr dal repertori di chel che vie pai agns Novante al jere il so grup, i Catatonia. Cun di plui, a proposit di “classics”, inte scjalute e je proviodude la presince de Bande Tzingare e dal cjantautôr di lenghe sami Niko Valkeapää.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Dopo des trê emissions de setemane, ancje cheste trasmission si podarà tornâ a scoltâle in podcast cun Spreaker e cun Spotify.

Fiorentina – Udinese 1-0

Dopo de paritât cul Parma e de vitorie cu la Sampdoria, e je rivade ancje la sconfite cuintri de Fiorentina.
Te tierce di campionât, magari cussì no, l’Udin al sperimente ancje il risultât piês. Lu fâs intune partide dificile, zuiade cun sintiment ancje se in maniere un tic masse rinunziatarie, cuintri di un aversari che al mostre cûr e cualitât.

I parons di cjase a palesin determinazion e fuarce ofensive fin dal principi, intant che la scuadre di balon furlane e rispuint in cuintri pît e si difint cun ordin e cun dissipline. Cussì, vie pal prin timp a son pardabon pocjis lis ocasions di gol che a vegnin metudis adun e si rive ae polse cence goi ni di une bande ni di chê altre.

La musiche no cambie masse te seconde frazion: la Fiorentina e ven sburtade dal so public al atac ma l’Udin al ten bot. Velasquez al mude la linie ofensive dai blancs e neris cul clamâ fûr Pussetto, cul meti dentri Teodorczyk e cul spostâ Lasagna a man çampe. La scuadre colôr viole e prove ancjemò cun Eysseric e Benassi a sbusâ la puarte di Scuffet, ma cence sucès, par merit dsal puartîr furlan e pe pocje precision des lôr conclusions.

Dome ator de mieze ore dal secont timp la pression de Fiorentina e ven premiade dal gol: iniziative di Chiesa e conclusion di Benassi. L’Udin al rispuint daurman, ma la sô reazion no je masse produtive, stant che la scuadre di Pioli si difint cence sbassâ masse la linie dal so zûc e cussì Chiesa si svicine al doi a zero, intant che i blancs e neris no rivin a superâ Dragowski.

La setemane che e ven il campionât si ferme. Si torne a zuiâ chi di cuindis dîs, cuant che l’Udin al zuiarà in cjase cul Toro: une partide che in cualsisedi maniere che e finidi, nus da simpri almancul cualchi sodisfazion (e cualchi displasê) …

Udinese – Sampdoria 1-0

Un prin timp al atac e une seconde frazion di resistence. L’esordi dal Udin in cjase al è bon, almancul in part pe cualitât, ma soredut pal caratar, pal risultât e pe prestazion di cualchi zuiadôr. Cuintri de Sampdoria i blancs e neris a scombatin, a fasin zûc, a corin e a tegnin bot cuant che al covente difinidisi dai aversaris, che tal secont timp si dismovin e a deventin pericolôs.
Chê de scuadre di balon furlane, e je une vitorie buine e juste. Par sigûr un biel pas indenant rispiet ae prime di campionât cul Parma e ancjemò di plui se si fâs un confront cu la partide di Cope Italie cul Benevento. Al è par sigûr cetant ce fâ, ma juste ae fin de zornade de muart di Carletto Della Corna, il mitic puartîr blanc e neri de dople promozion de serie C ae serie A, che al è stât onorât cuntune buine prove de scuadre, usgnot ai Riçs si à respirât un aiar diferent: un aiar di Stadi Friûl. Sperìn che e sedi dome la prime di tantis voltis, vie pe gnove stagjon.

La partence dal Udin e je buine: il 4-2-3-1 di Velasquez al somee plui un 4-3-3, che tal moment di difindisi si stramude in 4-5-1. Denant di Scuffet a son Ekong e Nuytinck tal mieç, Larsen a man drete e Samir a man çampe, la mediane e je formade di Mandragora, Fofana e Berhami, al puest di Barak, e in atac dongje di Lasagna al è spazi par De Paul e Machis. I blancs e neris a frachin daurman il pedâl dal aceleradôr e i fasin pesâ ae Sampdoria la lôr superioritât teritoriâl.
Dopo di un tentatîf fûr bersai di Machis e di un biel tîr di Fofana, parât di Audero, al rive il gol di De Paul, che al profite ancje di une durmide coletive de difese sampdoriane. La seconde segnadure in campionât dal argjentin e marche l’inviament di une fase di zûc a sens unic: Udin in atac e ospits sierâts indaûr.
Lis ocasions par incressi il vantaç no mancjin, cun Lasagna, cun Berhami, cun Machis e cun Fofana, ma un pôc al è brâf Audero a meti blecs ca e là e un pôc a son pôc precîs i zuiadôrs blancs e neris, in particolâr Lasagna, che nol rive a concretizâ inte maniere miôr dôs ocasions golosis.

Tal secont timp la musiche cambie. Vie pal interval Giampaolo al à di vê fat sunâ la svearine e la Sampdoria e somee pardabon une altre scuadre: svelte, dinamiche e cun personalitât. Dongje di un tîr di Mandragora tal imprin de seconde frazion, tal cuader dal cronist al è spazi dome pes conclusions dai ospits. La prime e je chê di Defrel che ur fâs vignî i sgrisui ai tifôs furlans, cuntun tîr che al sbat cuintri dal pâl. Plui tart a rivin chês di Bereszynski, di Kownacki e di Linetty, che Scuffet ur rispuint cun atenzion e cun mistîr.
L’Udin al somee sfladât e al dopre dutis lis sôs energjiis dome che par difindisi. Lu fâs cun sintiment, cul cûr e ancje cuntun tic di fortune e cussì al rive a mantignî il vantaç e a puartâ a cjase ducj i trê ponts a disposizion.

Mauresca Fracas Dub + Balt Hüttar + Cyres Matthews + Imlé + un ricuart di Aretha Franklin = Babêl Europe 17/2018

A mancjin pocjis oris ae prime emission de pontade numar 17 dal 2018 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence che al cjate spazi tal palinsest di Radio Onde Furlane vuê, martars ai 21 di Avost a 11 a buinore in direte, e po in repliche ancje doman, miercus ai 22 a une dopo di misdì, e sabide ai 25 ancjemò a une e mieze.

Vie par cheste trasmission al sarà spazi pe atualitât e pe storie, tra gnovis produzions, omaçs e ricuarts. In particolâr si podarà scoltâ une altre cerce di Big Sur, l’album gnûf dai Mauresca Fracas Dub, saltât fûr cuatri te prime part di chest an, là che il grup di Montpelher al misclice cun risultâts interessants la lenghe ocitane, chê francese, il reggae, il raggamuffin, il rock, il pop e il dub, e di Trinkh Met Miar, il secont disc dai Balt Hüttar, formazion che e rive des bandis di Slege/Asiago e che e cjante par cimbar e par talian, a scjavaç jenfri folk, rock e epic metal.

Dentri di Babêl Europe si ricuardarà ancje Aretha Franklin, la regjine dal soul, che e je muarte la setemane stade, cuntun omaç scalembri gjavât fûr dal repertori classic dai bascs Negu Gorriak. Il viaç babelic al tocjarà ancje la Irlande cu la musiche dai Imlé  e il Gales cuntune cjançon di Cerys Matthews, za cjantante e ghiariste dai Catatonia e di passe cuindis agns impegnade intun progjet solist.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet, cun Spreaker e cun Spotify.