Suns Europe 2019 + Me+Marie + Steso + Tumasch è + Jansky + Martina Iori = Babêl Europe 23/2019

Une trasmission dute dedicade a Suns Europe, jenfri la atualitât de edizion 2019 dal festival des arts in lenghe minorizade, che e je tacade ai 15 di Novembar e che si siere juste cheste setemane a Udin, e la storie des edizions passadis. Si presente cussì la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une e in chel di sabide a une e mieze.

Suns Europe 2015 - foto Andrea Tomasin-1

Dopo de schirie di barcons vierts in anteprime su Suns Europe 2019, intant dai ultins doi mês, dentri di Babêl Europe si fevelarà dal program de manifestazion che e je in plen davuelziment e si scoltarà la musiche dai artiscj che intai agns passâts a àn vût vinçût il concors de sezion musicâl dal festival.

E sarà la ocasion par tornâ a scoltâ la cubie ladine/rumance Me + Marie, prin premi de jurie tal 2015, il grup des isulis Fær Øer Steso, premiât tal 2016, il cjantautôr rumanç Tumasch è, vincidôr inte edizion 2017 e protagonist tai dîs passâts di doi concierts a Comelians e a Pagnà, adun cun Massimo SilverioSilvia Michelotti, e i catalans Jansky, in evidence l’an passât. Cun di plui al sarà spazi ancje pe cjantante ladine Martina Iori, che inte serade di sabide ai 30 di Novembar e sarà sul palc dal teatri Giovanni da Udine a fâ di presentadore in cubie cul rapper cjargnel Doro Gjat.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Sampdoria – Udinese 2-1

Un bon prin timp nol è avonde pal Udin par lâ dilunc a fâ ponts. Passade in vantaç cun Nestorovski, la scuadre di balon furlane e siere il prin timp in paritât par efiet di une biele punizion di Gabbiadini juste prime de polse e ae fin di un recupar di sîs minûts. Vie pal secont timp i blancs e neris a pain cjaronon, cu la espulsion di Jajalo e cuntun rigôr sivilât a Ekong, un pâr di ingjenuitâts, che i permetin ai parons di cjase di respirâ une bocjade di aiar bon e di tirâsi fûr dal pantan de code de classifiche.

La partide si vierç cu la memoreazion di Ermanno Cristin, zuiadôr furlan de Sampdoria dai agns Sessante e Setante dal Nûfcent, che al è muart juste chê altre dì. Inte bancjine dal Udin al è ancjemò Gotti, che al scuen rinunziâ a Okaka e a Sema e al mande in cjamp une formazion che e viôt Musso tra i pâi, De Maio, Ekong e Nuytinck in difese, Mandragora, Jajalo e Di Paul inte mediane, adun cui laterâi Opoku e Stryger Larsen, e Lasagna e Nestorovski in atac.

La partence dai blancs e neris, pe ocasion vistûts di ros, e je buine. Dopo doi minûts a vuadagnin il prin corner e inte azion seguitive a rivin ancje a segnâ: cross di De Maio par Nestorovski, che le bute dentri cul cjâf. Pecjât che, dopo cjalât il Var, Pairetto al decît di no fâ buine la segnadure par fûr zûc. La rispueste dai parons di cjase e rive un tic plui tart cuntun tîr di cjâf di Ramirez, su cross di Jankto, che al sbat cuntri dal pâl ae çampe di Musso.I va strucje ancje a Gabbiadini, che al strace une ocasionone su assist di Ferrari e il puartîr dal Udin si fâl cjatâ pront su lis conclusions di Jankto e di Gabbiadini.

La partide e à une ande plasevule, lis dôs scuadris a fasin zûc e a son emozions dicà e dilà. Tal Udin si fâs notâ il dinamisim di Nestorovski, che juste ae fin de prime mieze ore de partide al robe un balon ai aversaris e si invente un missil dal limit de aree che al cjate la deviazion decisive di Colley e al sbuse la puarte di Audero. A passin i minûts e la reazion dai parons di cjase no rive a produsi nuie di significatîf. Cun di plui al rive ancje il signestri muscolâr di Bertolacci, ma il svolt al rive tal ultin secont dal cuint minût di recupar dal prin timp cuntune biele punizion zoie di Gabbiadini che e impire Musso.

La pate concuistade juste prime de polse e permet ae Sampdoria di tornâ in cjamp tal secont timp cun plui convinzion. Le jude in chel ancje Jajalo che dopo cinc minûts al cjape il secont cartelin zâl par un intervent studpit tal mieç dal cjamp e par chel al ven parât vie, lassant i compagns di scuadre in inferioritât numeriche. Gotti al è costret a clamâ fûr Nestorovski par meti Ter Avest. L’Udin al scuen sbassâ la sô linie di zûc e i parons di cjase a provin a sburtâ, ancje se cence efiet.

In cheste situazion dificile si viôt ancjemò un rai di lusôr pe scuadre furlane, che e va une vore dongje dal gol dal doi a un: tîr di Nuytinck che al ven tocjât di Lasagna e i fâs la barbe al pâl. Daûr de regule no scrite dal gol che nol ven fat che al devente gol cjapât, il vantaç sampdorian al rive juste pôcs minûts plui tart: intervent falât e falôs di Ekong su Quagliarella in aree, Pairetto al sivile il penalty e Ramirez al segne. Tal ultin cuart di ore l’Udin al prove a rispuindi, ma no cumbine alc e ce e la Sampdoria e controle la partide fin ae fin.

Pordenone – Perugia 3-0

bandieris-friuul

Il Pordenon al torne a zuiâ a Udin e al torne a vinci. Cuintri dal Perugia, une des formazions tra chês plui impegnadis inte concuiste de promozion in serie A, la scuadre di Tesser e fâs une altre des sôs partidis, segnadis di atenzion, di snait e di cualitât, e cussì e segne trê goi e e puarte a cjase altris trê ponts, che i permetin di ocupâ almancul par cumò fintremai la seconde posizion inte graduatorie.

I ospits a àn l’imperatîf categoric di fâ ponts par no pierdi ancjemò teren de part plui altre de grauatorie dopo vê pierdût la ultime in cjase cuintri dal Cittadella. I sborfs neris e verts a àn chê di lâ diliunc te lôr strade che pal moment, in chê che e je la lôr prime stagjon assolude in serie B, ju à puartâts in plene zone play off, juste dongje dal Perugia. La scuadre di Oddo si presente tal Stadi Friûl cu la difese a cuatri, cun Balic, Falzerano e Dragomir tal mieç e cun Fernandes di poie aes pontis Melchiorri e Iemmello. Tesser al rispuint cuntune formazion che e à cualchi novitât, tacant di Pasa al puest di Burrai. Indenant a scombati e je la cubie Strizzolo-Ciurria, cun Misuraca trecuartist-

La scuadre di balon dal cjâf lûc dal Friûl Ocidentâl e partìs al atac. Il Perugia al cîr di tignî bot e al prove a diliberâsi de smuarse dai sborfs, che a masanin zûc ma no rivin, almancul in pricipi, a jessi periculôs des bandis di Vicario. La prime vere azion di gol dal Pordenon e rive cuntun tîr di di Strizzolo parât in corner dal numar un perusin, che si ripet daurman suntun cross di Camporese.

Il Pordenon al proteste par un intervent suspiet a dam di De Agostini inte aree dai ospits e Pobega al impegne Vicario cuntune conclusion in acrobazie, juste dopo de prime bale golose pai blancs e ros che Falzerano nol rive a butâ dentri. Il Perugia al tire pardabon in puarte, ancje se fûr bersai, dome cun Rosi, che al prove di passe trente metris, intant che i furlans a cjapin une travierse clamorose cun Pobega che cul cjâf al siere un bile cross di Gavazzi.

Il secont timp si vierç cul Pordenon in plene, che in siet minûts al pronte dôs ocasiononis: prime al è Barison che al siere un corner cjatant la grande rispueste di Vicario e dopo al è Strizzolo che al svol al tire alt di pôc suntun cross che al rive de çampe. Stant che si dîs “tertium non datur”. La ocasion seguitive e ven stramudade in gol di Gavazzi che al cjape la bale, al va indenant di bessôl e al place la bale tal cjantonut di çampe de puarte dai opsits.

Oddo al prove a mudâ struture e formazion par rispuindi ae situazion di disvantaç: fûr  Balic e Fernandes e dentri Carraro e Buonaiuto. Ma la musiche no cambie, stant che e rive la seconde segnadure furlane cun Ciurra. Il Perugia si puarte indenant ae disperade vie, cun chê di cirî di dreçâ la partide, ma nol rive a cumbinâ alc e ce e Di Gregorio nol à nancje tant ce fâ.
Di chê altre bande il Pordenon al prove ancjemò a dâ cualchi displasê ai ospits e cussì al rive il tierç gol di Mazzocco, che al segne ancje il so non tra i marcadôrs, juste une desene di minûts dopo jessi jentrât tal cjamp al puest di Gavazzi.
Il Pordenon al fâs fieste e il Perugia si avilìs.

Suns Europe 2019 + Magalì Sare + Mattiu Dafuns + Eneritz Furyak + Tumasch è + La Basu = Babêl Europe 22/2019

Un altri viaç a torzeon jenfri musichis, lenghis, minorancis e nazions cence stât e soredut un altri pas indenant inte direzion de edizion 2019 di Suns Europe, che e je daûr a tacâ. Al è ce che e promet la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une e in chel di sabide a une e mieze.

Ancje in cheste trasmission si vierzarà un barcon in anteprime su Suns Europe 2019, il festival des arts tes lenghis minorizadis dal nestri continent che si davuelzarà in Friûl dai 15 ai 30 di Novembar. In particolâr si larà dilunc a scoltâ une cerce dal repertori dai artiscj protagoniscj de serade finâl che si davuelzarà li dal Teatri gnûf Giovanni da Udine. Cussì al vignarà dât spazi ai ultins doi nons de liste di chei che si presentaran intal conciert-concors che al siere la kermesse furlane e europeane: il cjantautôr dai Grisons, Mattiu Defuns, e la cjantante catalane, Magalì Sare.

Simpri cun riferiment ai contignûts de sezion musicâl di Suns Europe 2019, si scoltaran ancje Eneritz Furyak, che e ven dal Paîs Basc, e Tumasch è, musicist e autôr rumanç, che al veve vinçût il concors dal festival intal 2017. i doi a saran tra i protagoniscj, dongje di Silvia Michelotti, di Michela Franceschina e di Massimo Silverio dai cuatri concierts che a screin la manifestazion,  a Romans dal Lusinç ai 15 di Novembar, a Lavarian ai 16, a Comelians ai 23 e a Pagnà ai 24.

Cun di plui, stant che Suns Europe nol è dome un festival di musiche, ma al cuvierç ancje altris espressions artistichis che a van dal cine ae leterature, si sgarfarà tal program de rassegne, ricuardant alamancul cualchidun di chei altris apontaments che a son tal cartelon dal festival.

Inte scjalute de trasmission al sarà ancje un pôc di spazi par une gnove produzion discografiche, che e je stade presentade juste sabide passade a Bilbao: il disc gnûf de rapper basche La Basu, che il so titul al è Gerra.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Udinese – Spal 0-0

L’Udin al veve di cirî di vinci e soredut nol veve di pierdi. Sù par jù compagne e jere la situazion de Spal, che e jere rivade in Friûl cun chê di tirâsi fûr dal ultin puest in classifiche. Par chel la partide di vuê e je stade scombatude e ecuilibrade. L’Udin al à provât a vinci, al à riscjât di pierdi, tai minûts di recupar, ma Musso al à parât il rigôr che al podeve jessi fatâl.

In spiete di viodi cui che al sarà il gnûf alenadôr titolâr, al puest di Tudor, l’Udin si presente tal prât dal Stadi Friûl ancjemò cun Gotti in bancjine, che pe ocasion al met adun une formazion diferente di chê che e veve vinçût a Gjenue, in particolâr pe difese, che e torne a trê, cun Becao, Ekong e Nuytinck, e pe linie mediane, che e torne a cinc, cul bloc Jajalo-Mandragora-De Paul e cui laterâi Stryger Laresen a diestre e Sema a çampe, intant che in puarte al è simpri Musso e in atac la cubie di partence e je ancjemò chê formade di Nestorovski e Okaka. Di chê altre bande la Spal si rimet al ex blanc e neri Felipe e pal atac Semplici al sielç di lassâ fûr Petagna e di tacâ cul tandem Paloschi-Floccari.

Il prin timp al è grintôs e dinamic. L’Udin al partìs cul pît just e Nestorovski dopo cuatri minûts di zûc al ricêf un cross bas e al tire in puarte cjapant il pâl ae çampe di Berisha. Cinc minûts plui indenant il macedon cul cjâf al rive ancje a segnâ, ma il so gol nol ven fat bon di Massa par vie che la posizion de ponte blancje e nere e je iregolâr.
I ospits a rispuindin cun Kurtic che al oblee Musso a fâ une paradone suntun so tîr cul cjâf e cun dôs conclusions di Strefezza. La scuadre furlane si svicine al gol plui tart cuntun diestri di De Paul che al ven tocjât di Missiroli e par chel al riscje doi impirâ Berisha.

La seconde frazion si vierç cul Udin che al prove a dâi di lavorâ al puartîr de scuadre ferarese. La pression ofensive e je ma tal imprin no prodûs alc e ce, fale che une buine dose di stress pal puartîr ospit, che intun pâr di ocasions al riscje une vore cui pîts in disimpegn, ma Okaka e De Paul no rivin a aprofitâ, intant che e va fûr di pôc une conclusion cul cjâf di Mandragora.

La Spal e prove a ribaltâ i ecuilibris e i tentatîfs di Sala e di Tomovic i dan cualchi fastidi a Musso. Passât il pericul, la scuadre di balon furlane e rispuint cui scats di Lasagna, che al è jentrât tal puest di Nestorovski, e cuntun tîr di Mandragora che al lenç il pâl.
Si lote e si scombat fint tal ultin. Lis emozions a cressin intant che il timp al è daûr a finî cun trê tentatîfs dai ospits Sala, Kurtic e Petagna su balon di angul. Intal recupar Sema al fâs un fal di man inte aree di rigôr. Massa al sivile il penalty, che al ven tirât di Petagna e parât di Musso, un moment prime de fin.

Virtus Entella – Pordenone 1-1

Un gol fat, un gol cjapât e un altri pont puartât a cjase. Il Pordenon a Chiavari al à il so bon ce fâ cuintri dai parons di cjase de Virtus Entella, che a fasin di dut par vinci, però al fâs valê il so caratar, la sô fuarce, lis cualitâts dai siei zuaidôrs e ancje un tic di fortune.

La partence e je marcade de iniziative dai blancse blu di cjase, che a imbastissin zûc e a provin a jessi pericolôs. Il Pordenon no si scompon e al à la prime vere ocasion di gol cuntune punizion di Almici che e ven deviade in corner. La Virtus Entella e rispuint daurman ancje se Di Gregorio par passe vincj minût nol à nuie ce fâ, intant che la scuadre di balon furlane prime e met adun une biele combinazion Misuraca-Almici-Ciurria che si siere fûr bersai di un nuie e po e cjate il gol cuntune acrobazie di Strizzolo su cross di Gavazzi.

La reazion dai paron di cjase e je imediade e Giuseppe Di Luca cuntun tîr cul cjâf al impegne Di Gregorio. Il Pordenon al continue la sô partide ecuilibrade, si difint ben e al prodûs ancje azions ofensivis che a puartin al tîr Candellone.

Prime de polse la Virtus Entella e rive a segnâ il gol dal un a un cuntune azion personâl di Schenetti. Intal secont timp la formazion di Boscaglia e incrès la sô pression ofensive ancje se almancul in principi no rive a tirâ in puarte e impen al è il Pordenon a fâsi viodi des bandis di Contini cun Alnici, Candellone e Ciurra.

Cuant che a rivin a tirâ in puarte, i parons di cjase no àn nancje masse fortune, stant che Manuel De Luca al cjape doi pâi in trê minûts e Di Gregorio al è simpri tal puest just intal moment just. Tesser a scugne fâ di mancul di Burrai, che al cjape il secon cartelin zâl e al ven butât fûr di Baroni, e al met la sô scuadre intes cundizions di difindisi ancjemò cun plui atenzion.

Cun dut de superioritât numeriche, la Virtus Entella no rive a produsi alc e ce, fale che une punizion di Schenetti e une altre conclusion di Giuseppe De Luca. Masse pôc par rivâ a vinci. Il risultât nol cambie e la pate i va miôr al Pordenon che si manten tai cuartîrs alts de classifiche dal campionât di serie B.

Pordenone – Trapani 2-1

bandieris-friuul

Une altre vitorie pal Pordenon che in cheste maniere al fâs ancjemò un salt indenant inte graduatorie dal campionât di serie B. I neris e verts a regolin la pratiche Trapani cun chel stes risultât che la setemane stade a vevin puartât a cjase di Vignesie.

Ancje in cheste ocasion Tesser al mande tal cjamp une scuadre compate e organizade. Dopo siet minûts la scuadre di balon furlane e passe in vantaç cun Camporese che al met daûr di Carnesecchi une biele bale pinelade dal corner di Burrai. Il Trapani al prove a rispuindi cun Nzola, autôr di une conclusion velenose che però e ven parade di Di Gregorio. Doi minûts plui tart il Pordenon si svicine al doi a zero cun Strizzolo che al cjape il pâl.

Tal secont timp i ospits a provin a sburtâsi indenant cun plui determinazion. Il Pordenon no si scompon, nancje denant di une bile conclusion di Moscato, e al ten il control de partide, rivant a dopleâ il vantaç cuntun rigôr sivilât par un fal di Fornasier su Ciurria e tirât a colp sigûr di Burrai.

Dongje dal finâl i ven dât un penalty ancje al Trapani. Al tire e al segne Taugourdeau che al scurte la distance, ma nol cambie la sostance dal risultât e de partide.

Genoa – Udinese 1-3

Par latin si dîs “Tertium non datur”. No je une cuistion di filosofie, ma dome la constatazion che dopo lis dôs sdrondenadis cjapadis dal Udin cuintri de Atalanta e cuintri de Rome nol jere amissibil un altri tombolon. A àn di vêlu capît ancje i zuiadôrs de scuadre di balon furlane, che îr a Gjenue a àn mostrât finalmentri di vê cûr, gjambis e cerviel e a àn rivât a segnâ trê goi e a puartâ a cjase trê ponts.

E veve di jessi la partide dal riscat e e je lade propit cussì. L’Udin a Gjenue al cor, al spude balins, al masane zûc e in cierts moments al è fintremai biel di viodi. I blancs e neris, dopo dal licenziament di Tudor, si presentin a Marassi cun Luigi Gotti in bancjine, che al mande in cjamp une formazion cuntune muse diferente, par diviers motîfs. Il scheme di partence al è un classic 4-4-2 e denant di Musso la linie difensive e je formade di Di Mai, Ekong, Nuytinck e Opoku, intant che tal centricjamp si dan dongje Mandragora, Walace, Di Paul e Sema e in atac si viôt la cubie Okaka-Nestorovski.

La partence e je buine par dutis dôs lis scuadris. Il Genoa si zove dal fatôr cjamp e si sburte indenant cun plui fuarce, cun Schoene diretôr di orchestre, Pandev pont di riferiment e Kouamé che i da di lavorâ a Opoku. La prime ocasion pe scuadre dal Variûl e je propit dal avolian che al tire cul cjâf ma nol cjate la puarte di Musso.

Dopo vincj minûts i parons di cjase a passin in vantaç cun Pandev che al siere inte manier miôr une biele azion inviade di Romero, che i da la bale a Kouamè, protagonist di un dopli scambi strent cul atacant macedon. L’Udin al rispuint in cuintripît, al profite dai spazis che il Genoa al lasse libars tal mieç e al jonç la paritât cuntune biele pinelade di Di Paul. I ros e blu a calin e i blancs e neris a cressin e prime de polse si fasin vîfs ancjemò des bandis di Radu cuntun pâr di biei tentatîfs di Nestorovski e di Mandragora.

Il secont timp si vierç cul Genoa che al ten di plui la bale, ma nol prodûs alc e ce, fale che un pâr di scats di Kouamè, che intun câs al oblee Musso a intervignî in jessude. Si scombat tal mieç dl cjamp, là che l’Udin, compagn che te ultime part dal prin timp, al cjate i spazis juscj par deventâ plui pericolôs cun Nestorovski, Mandragora e De Paul.

Dongje de fin de partide propit un tîr sporc dal argjentin al devente un assist par Okaka che cun dut dal ecuilibri precari al rive a difindi bale e a zirâle par Sema, che al intive il diagonâl just che al impire Radu e al puarte in vantaç i blancs e neris.

Il Genoa al patìs il colp e i covente cualchi minût par rispuindi cuntune conclusion fûr bersai di Radovanovic in plen recupar. L’Udin al ten bot e passât il pericul al mande in gol Lasagna, che jentrât nancje vincj minûts prime al puest di Nestorovski al schiribice Barreca e nol perdone Radu.

Lenghe furlane, aministradôrs a scuele di tutele (dai 7/11 ai 6/12)

La tutele de minorance linguistiche furlane e je alc di impuartant par ducj cuancj, tant che garanzie di dirits fondamentâi, promozion dal patrimoni culturâl, jutori pe coesion sociâl e fintremai risorse in cjamp economic. Par chel al è ben e e al conven che i aministradôrs dai ents teritoriâi dal Friûl a’nt vedin plene cussience, in maniere di davuelzi inte maniere miôr la lôr ativitât istituzionâl e politiche.

Juste cun chê di incressi lis cognossincis e duncje la cussience in cont di cheste cuistion de bande di sindics, assessôrs, conseîrs e funzionaris publics, la Assemblee de Comunitât Linguistiche Furlane (ACLiF), che e je l’organisim di rapresentance dai comuns furlanofons de Regjon che e ten dongje la massime part dal Friûl cun Triest, e je daûr a inmaneâ une iniziative formative di pueste adun cul il Centri interdipartimentâl pal disvilup de lenghe e de culture dal Friûl (CIRF) di chê che nus plâs clamâle Universitât dal Friûl .

Chel che al è stât presentât ai 26 di Otubar a Udin al è un cors di formazion, indreçât in maniere prioritarie ai aministradôrs e ai dipendents publics, ma viert a ducj chei che a àn voie di savê alc di plui di une cuistion che e je cetant impuartante e che però, magari cussì no, e je cognossude e capide ancjemò masse pôc e par chel e ven frontade masse dispès cun superficialitât o lant daûr di prejudizis e mistificazion.

Il cors al fronte la cuistion de suaze teoriche (minorancis, tutele e dirits) e de normative statâl e regjonâl di riferiment fintremai aes politichis linguistichis e duncje ae lôr planificazion e ae lôr metude in vore concrete e al è struturât in dôs lezions, che si davuelzaran in diviersis localitâts dal Friûl vie pai mês di Novembar e di Dicembar cun chest program: a Tresesin (Municipi, Sale Consiliâr, place Ellero 1), joibe ai 7 e ai 28 di Novembar; a Caprive (Centri Civic di place Vitorie 1), vinars ai 8 di Novembar e ai 22 di Novembar; a Palme (Municipi, Sale Consiliâr, place Grande 1), joibe ai 14 di Novembar e ai 5 di Dicembar; a Tumieç (Municipi, Sale Consiliâr, place XX Setembar), vinars ai 15 e ai 29 di Novembar, a Spilimberc (Sale Consiliâr di Palaç Disore, plaçute Tiepolo 1), joibe ai 21 di Novembar e vinars ai 6 di Dicembar.
Ducj i incuintris a vegnin fats di 6 a 9 sot sere.

La partecipazion e je libare e sore nuie. Par savênt di plui e par notâsi (lis iscrizions a vegnin cjapadi sù dentri dai 6 di Novembar) al covente metisi in contat cul CIRF ai numars di telefon 0432 556480 e 0432 556486 e ae direzion di pueste eletroniche cirf@uniud.it.

PS. Il cors al tache juste pôcs dîs dopo che il Consei regjonâl dal Friûl-VJ al à fat bon un disen di leç prontât de Zonte che al savolte la normative di tutele de minorance linguistiche furlane (L.R. 29/2007) e che magari cussì no, se no si rive a intervignî par dreçâ la situazion, al fasarà dams grandonons a lenghe e dirits.