Udinese – Genoa 2-0

Fûr lis bandieris e fûr… ancje un pôc di caratar e di snait. Dopo vê pierdût malamentri cuintri de Juve e dal Napoli e dopo vê cambiât alenadôr, cul licenziment di Nicola e la rivade di Tudor, che za l’an passât al veve vuidât i blancs e neris viers de salvece, l’Udin al torne in cjamp, al mostre une muse miôr che te plui part dal campionât zuiât fin cumò e al vinç.
Il sucès cuintri dal Genoa al è une bocjade di aiar bon par plui motîfs: pai trê ponts vuadagnâts, par chel alc di bon che si à viodût sul plan dal zûc e de tignude atletiche e psicologjiche e pal grant numar di bandieris furlanis tes tribunis. Juste une setemane indaûr, in ocasion de partide di cualificazion pal campionât european dal 2020 jenfri la rapresentative dal Stât talian e chê de Finlandie, servizi di ordin e carabinîrs a vevin confiscât diviersis bandieris cu la acuile di Beltram. Al è stât dit che al è stât un ecès di premure. Che al sedi ce che al sedi chel fat al è stât une rivelazion e al è deventât une svearine par tancj di lôr, che la lôr reazion e je deventade une afermazion di braùre furlane, che o sperìn che e ledi indilunc. Par intant: nuie efiet Mer…Dacia Arena ni in cjamp e nancje in tribune.

Tudor al mande in cjamp une scuadre rinovade sul plan tatic, un 4-3-3 cun Ekong, De Maio, Larsen e Zeegelaar denant di Musso, cun Fofana, Mandragora e Sandro te linie mediane e cun Pussetto, Okaka e De Paul a scombati. Il Genoa al rive a Udin fuart de vitorie concuistade cuindis dîs indaûr cuintri de Juve, ma dopo cuatri minûts si cjate sot di un gol, cun Okaka che al siere une azion imbastide di Pussetto e De Paul e perfezionade di Fofana.
I ospits a fasin zirâ di plui la bale ma no rivin a cumbinâ alc e ce. La lôr reazion al disvantaç e prodûs dôs conclusions di Kuoamè e di di Radovanović che a vegnin fermadis cun mistîr de bande di Musso. L’Udin al ten bot e al rispuint ancjemò in cuintripît cun verticalizazions sveltis cu la bale basse che a puartin ancjemò Pussetto e Okaka al tîr, intant che ae fin dal prin timp e rive une punizion fûr bersai di Criscito.

Tal secont timp il Genoa al cambie Lazović e Rolon cun Pandev e Bessa e al partìs al atac, cuntun cross pericolôs dal atacant macedon che al ven neutralizât cuntun intervet cul cjâf de bande di Zeegelaar, cuntune conclusion di fûr di Radovanović che nol cjate il spieli de puarte e po cuntun tîr di Sturaro che al va une vore plui indalt de travierse. La rispueste dal Udin e va daûr dal copion dal prin timp, poiantsi soredut su la velocitât di De Paul e Pussetto, che a imbastissin zuiadis di atac bielis e buinis ancje se no van a bersai. Al minût 62 al rive il secont gol de scuadre di balon furlane cun Mandragora che, avonde fûr de aree di rigôr, al controle cul pet un cross di Pussetto e cul pît çamp al piture une parabole fuarte e fine che e mande la bale te puarte di Radu.

Il vantaç dopleât al rinfuartìs la posizion dai parons di cjase, che ancjemò cun Pussetto si fasin viodi un pâr di voltis des bandis di Radu e po a resistin ai atacs dal Genoa te ultime part de partide. Ancje Lasagna, jentrât in cjamp al puest di Okaka, al à dôs buinis ocasions, ma nol rive a disfrutâlis, intant che il Genoa dome tai ultins minûts al rive pardabon dongje ae segnadure cu la dople conclusion di Lapadula e Kouamè che a vegnin fermadis di Musso ancje cul jutori de travierse.

Prossime partide chê cuintri dal Milan a San Siro martars ai 2 di Avrîl.

Alan Stivell + Claudia Aru + Fermin Muguruza & Chalart58 + Euskal Herria amb Catalunya +Yann Fañch Kemener = Babêl Europe 6/2019

Discs in circolazion di un pôc di timp, concierts e atualitât, tra musiche, cronache e politiche. Vuê, martars ai 19 di Març, a 11 a buinore e po in repliche doman, miercus ai 20, a une dopo di misdì e sabide ai 23 a une e mieze te programazion di Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât e al presente un menù di cheste fate.

In particolâr, inte pontade numar 6 dal 2019 si scoltarà une gnove cerce di Human/Kelt, il disc plui resint di Alan Stivell, che di passe cincuante agns al è un personaç di ponte de gnove musiche bretone e de world music in gjenerâl e che il so tour leât ae gnove produzion al tocje il Stât talian cun trê datis juste in chescj dîs: joibe ai 21 a Rome li dal Auditorium Parco della Musica, vinars ai 22 a Mestre li dal Teatro Corso e sabide ai 23 a Morbegno li dal Auditorium Sant’Antonio.

Lant daûr des presentazions dal so cine di animazion Black is Beltza inte suaze di diviers festivals ator pal mont, si tornarà a scoltâ ancje alc dal repertori di Fermin Muguruza e in particolâr di chel disc metût adun tal 2017 cul dj e produtôr catalan Chalart58.
E sarà ancje la ocasion par scoltâ la cjantante sarde Claudia Aru e la version bilengâl basc/catalan dal supergrup Euskal Herria amb Catalunya de cjançon di Lluis Llach ‘L’Estaca’, che te sô version origjinâl e à marcât la grande manifestazion in solidarietât cui presonîrs politics catalans e a pro dal dirit di decidi che si à davuelte sabide stade a Madrid, e par ricuardâ il cjantant breton Yann Fañch Kemener, che impen juste sabide stade al è muart.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade di Babêl Europe si podarà tornâ a scoltâle in podcast cun Spreaker e Spotify.

Napoli – Udinese 4-2

Dopo de partide cuintri de Juve, l’Udin al rispiete il pronostic ancje cuintri dal Napoli ancje se, in contront cu la partide di Turin, al San Paolo i blancs e neris a mostrin almancul di vê un fregul di dignitât. Il Napoli al è mancul fuart che in altris ocasions, ma ae fin al rive a fâ valê la sô superioritât tecniche e tatiche e a fâ segnâ i siei atacants. La scuadre di balon furlane e à une partence discrete, e rive a dreçâ il risultât vie pal prin timp, ma po te seconde frazion e ven punide dai aversaris e ancje di cualchi so erorut di masse, soredut in difese.

La formazion di Nicola e presente diviersis novitâts, motivadis di assencis di ogni sorte. I blancs e neris a presentin Madragora in difese, al puest di Nuytinck, dongje di Ekong e Stryger Larsen, Sandro al è titolâr tal mieç dal cjamp e la cubie di atac e je formade di Pussetto e Lasagna.

La prime ocasion de partide e je propit pe scuadre furlane, cun Pussetto che al scate in verticâl e al oblee Ospina a fâ une jessude kamikaze. Il Napoli al fâs zirâ la bale in oriziontâl, intant che l’Udin al ten di voli la situazion, cuviert indaûr e impegnât a rispuindi in cuintripît. Cul passâ dai minûts i parons di cjase a rivin a vuadagnâ spazis indenant e a meti in cundizion Mertens e Younes di imbastî une biel combinazion che l’ex zuiadôr dal Ajax al à la pussibilitât di sierâ cun calme (masse?) e cun precision, cuntune biele bale pinelade a fîl dal pâl plui lontan de puarte di Musso.
A passin i minûts e al rive ancje il secont gol dai parons di cjase: Mertens al vuadagne spazi su la cvorsie di çampe e al met dentri un bile cross par Callejon che cundut che le tocje malon e cun pocje convinzion al rive a sgnacale dentri de piuarte. In altris timps si varès dit: gollonzo!

Sot di doi goi, l’Udin si dismôf e al profite des contradizions dai aversaris che a somein mancul fuarts dilunc de corsie centrâl. Pussetto al è plui svelt di Koulibaly, Sandro al sugjerìs e Lasagna si môf ben. Pirme de fin dal prin timp a rivin cussì il prin gol dai blancs e neris, firmât di KL15, e chel de paritât cun Fofana che al imposte e al siere une biole combinazion e al segne cun snait e cun grinte.

Sierade la prime frazion cu la pôre pes cundizions di Ospina, che tant che consecuence dal scuintri cun Pussetto tal imprin de gare al piert i sintiments e al cole par tiere (intervent imediât dai sanitardiis, che lu puartin tal ospedâl, di dulà che a rivaran gnovis avonde positivis, e jentrade tal cjamp al so puest di Meret), il secont timp si vierç cul Udin ancjemò indenant in verticâl cun Lasagna.

Dal bon moment dai blancs e neris nol salte fûr nuie di particolâr. I va miôr al Napoli, che si fâs vuidâ di Milik, che al segne cul cjâf il gol dal gnûf vantaç e al invide i siei compagns a tornâ sot.
Cussì il Napoli al cres, l’Udin al va al mancul e al rive ancje il gol di Mertens, che dopo vê fat il sugjeritôr vie par dute la partide al firme la sô prime segnadure dal 2019.

La sperance di tornâ a cjase di Napoli almancul cuntun pont si è sfantade. E reste la piçule sodisfazion che la scuadre no vedi fat dûl cetant che cuintri de Juve e cun chê a son la preocupazion che e diven de classifiche e dai risultâts positîfs di Cagliari, Spal e Bologna e la idee che, cundut dai erôrs dal Udin e des contradizions de sô condote, la scuadre di balon furlane e puedi rivâ a salvâsi ancje chest an. Viodarìn.

Juventus – Udinese 4-1

Efiet Mer…Dacia Arena ancje a Turin, ma forsit no si podeve pretindi altri. Cuintri de Juventus l’Udin al ten bot sù par jù par dîs minûts e dopo cjapât il prin gol si sfante e e disparìs. Allegri al lasse polsâ Cristiano Ronaldo e altris superstars tant che Dybala, Mandzukic, Bonucci e Chiellini, in spiete de partide di Champions, e al presente une formazion cun diviersis novitâts, tacant dal zovin Kean, pe prime volte titolâr, che al sarà l’om de partide. Nicola al rispuint cun Musso in puarte, cun De Maio, Nuytinck e Ekong in difese, cu la linie mediane formade di Fofana, Wilmot, Larsen, Ter Avest e Zeegelaar, e De Paul e Pussetto in atac.

Za tal imprin si viôt che i parons di cjase a àn une marcje in plui. L’Udin si difint cun ordin ma nol rive a meti adun nissune azion ofensive che e sedi tâl. La Juve e fâs alc di plui daurman, massime in graciis dal dinamisim di Bernardeschi e Alex Sandro. Cun di plui i dan une man ancje i zuiadôrs dal Udin, cun cualchi erorut di masse. Al è ce chei sucêt in particolâr a Wilmot, che al regale un bon balon a Alex Sandro, che lu met tal mieç a pro di Kean che al segne.

Il gol al marche in maniere definitive la superioritât dai parons di cjase. Pal Udin la partide e devente ad in plen di rive sù. La Juve e prove a inricjî il so botin cun Rigani e cun Bernardeschi e e rive a cjatâ il secont gol cuntune biele iniziative di Kean che si zove di une bale zuiade mâl di Fofana, al masane metris di cjamp si svicine a Musso, lu passe e al tire in puarte, cun Wilcot che cence volê le tocje e lu jude a butâle dentri. L’Udin al prove a rispuindi cuntune conclusion fûr bersai di Fofana.

Te seconde frazion la musiche e reste chê. La Juve e atache cun calme e in libertât e l’Udin al stente a proponisi indenant, cun dut che Nicola al vedi cambiât Wilmot cun Lasagna, mandât in prime linie dongje di Pussetto, cun De Paul daûr dai doi e Fofana denant de difese.
Passât un cuart di ore, la calme relative de partide e ven metude in crisi di une gnove iniziative di Kean che al jentre tre aree de scuadre di balon furlane e si vuadagne un penalty in graciis di un intervent di Opoku: tîr di Emre Can e 3-0. Pôcs minûts plui indenant al rive ancje il poker juventin cul tîr cul cjâf di Matuidi. Tai ultins minûts la Juve e mole, la sô atezion e cale e cussì al rive il gol de bandiere de scuadre di balon furlane cuntun biel diagonâl di Lasagna.

La memorie e rimonte a al campionât 1996/1997 cuant che tal stadi Delle Alpi l’Udin di Zaccheroni, cun Amoroso, Poggi e Bierhoff in atac e Turci in puarte, al vinceve 3-0 cuintri de Juve. Altris timps…

Gran Bal Dub + Malasorti + Mounqup + Mario Muñoz + Gacha Empega + Zornade des Feminis = Babêl Europe 5/2019

La atualitât, lis novitâts discografichis, lis tradizions babelichis dal Carnevâl e la Zornade internazionâl des feminis. La cuinte pontade dal 2019 di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze, e cirarà di meti dongje ducj cuancj chescj ingredients.

Inte trasmission che e va in onde vuê ai 5 di Març e po ancje doman, miercus ai 6, e sabide ai 9 al sarà spazi par une novitât frescje frescje che e rive dal progjet Gran Bal Dub, metût adun za di cualchi an de bande di Sergio Berardo dai Lou Dalfin e di Madaski dai Africa Unite: une anticipazion dal disc gnûf Benvenguts a bòrd, che al vignarà metût in distribuzion (ancje in free download) ai 8 di Març. Si scoltarà une cerce ancje di altris trê discs che a son saltâts fûr vie pai ultins mês, ven a dî S’Ardicity dal supergrup sart Malasorti, batiât ator de fin dal 2018, Start dal cjantant di Barcelone Mario Muñoz, screât ai 22 di Fevrâr stâts, e Castro Verdi de cjantante e musiciste galiziane di divignince francese Mounqup, che impen al è jessût ancjemò te Vierte passade.

Stant che Mounqup e je par sigûr un biel esempli di femine babeliche fuarte e che juste ai 9 di Març te capitâl galiziane, A Coruña, e sarà une des protagonistis di un conciert dal titul Mulleres que transforman realidades, la sô presince te scjalute di  Babêl Europe e sarà ancje la ocasion par memoreâ la Zornade internazionâl des feminis. Ancje la presince di Mario Muñoz e à un valôr che al va plui innà de musiche. Cun di fat si scoltarà Als teus ulls, il so adatament par catalan di In your eyes, une cjançon che e fâs part dal repertori di Peter Gabriel. La sielte no je casuâl par vie che juste pôcs dîs indaûr l’innomenât musicist britanic al à tornât a palesâ la sô solidarietât cui indipendentiscj catalans.

Cun di plui, lant daûr des sugjestions dal lunari, al vignarà dât spazi al Carnevâl, cun sclesis di ritmis e bâi des tradizions di chescj dîs de Sardegne, de Galizie e dal Paîs Basc e cuntun toc tradizionâl ocitan che juste vincj agns indaûr al vignive tornât a cjantâ de bande di chel grup innomenât des bandis di Marsilie/Marselha che il so non al jere Gacha Empega.  

Si pues scoltâ Babêl Europe  sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

Udinese – Bologna 2-1

Cuintri dal Bologna l’Udin al fâs ce che al à di fâ: fâ ponts e zuiâ cun sintiment. La scuadre di Nicola e scombat, e patìs, e fâs avonde zûc e cussì e rive a vinci. I blancs e neris a frontin la partide cun Musso in puarte, cun Ekong, Nuytinck e De Maio in difese, cun Mandragora e Ter Avest te mediane, compagnâts di Zeegelaar e Stryger Larsen tes corsiis laterâls, cun De Paul daûr des pontis e cun Pussetto e Okaka in prime linie.

Al è un incuintri tra dôs scuadris che a àn dutis dôs une dibisugne mostre di fâ ponts e di no fâ erôrs. Sul imprin a somein plui determinâts i ospits, ben coordenâts di Orsolini e avonde pericolôs des bandis di Musso cun Santander, che al impegne il puartîr blanc e neri, e cun Mbaye, che al cjape il pâl. L’Udin al patìs il pressing dal Bologna e al rive a rispuindi plui cun iniziativis individuâls che cun azions struturadis. Al è juste intune di chestis ocasions che la scuadre di balon furlan si cjate tes cundizions di vierzi lis segnaduris e di passâ in vantaç: Poli al pastroce te aree di rigôr, Pussetto i robe la bale , il centrocampist bolognês lu tocje in maniere iregolâr, Massa al sivile il penalty, De Paul lu tire e al segne.

La reazion dai ospits e rive daurman. La scuadre di Mihajlovic e torne al atac cun Palacio, cun Poli, cun Santander, cun Orsolini e cun Dzemaili, ma Musso e i difensôrs dal Udin a rivin a tignî bot pe plui part dal prin timp e dome tai ultins minûts prime de polse il Bologna al rive a segnâ l’un a un, cuntune combinazion tra Dzemaili, Orsolini e Palacio, sierade inte maniere miôr dal argjentin che al sbuse la puarte di Musso.

Te seconde frazion il Bologne al somee contentâsi de paritât e il so motôr al cale di zîrs. L’Udin impen al mostre plui grinte e plui snait. Protagonist principâl dal riscat blanc e neri al è Pussetto, che al è il terminâl dal zûc de scuadre furlane, dongje dal continuâ a dâ fastidi ai aversari cui siei moviments cu la bale tra i pîts e cence.

L’atacant si svicine une vore al gol dal doi a un za dopo siet minûts dal interval, cuant che al oblee Skorupski a fâ il miracul, e al torne a jessi pericolôs uns pôcs di minûts plui indenant, cjatant ancjemò il puartîr aversari a gjavâi la sodisfazion dal gol, che finalmentri al rive tal ultin cuart di ore de partide: Stryger Larsen si libere su la cortsie di diestre e al pinele un bile cross tal mieç che Pussetto al tocje cul cjâf cun fuarce e cun precision, in maniere di mandâ la bale in puarte dongje dal pâl plui lontan.

Pal Udin i zûcs a son fats. Il Bologna nol à avonde fuarce par imbastî une reazion di sets, intant che i parons di cjase no molin e a provin ancjemò a rindisi pericolôs cun Mandragora, che però il so tîr al è fûr bersai. Dopo vê sufiert vie pal prin timp, ma ancje dopo vê zuiât avonde ben in difese, la scuadre di Nicola e cres soredut tal secont timp e cussì e siere la partide inte maniere miôr, cuntune vitorie meretade che i permet di cjapâ une bocjade di aiar bon, di vuadagnâ ponts su la code de classifiche, là che il Bologna al torne a jessi impeolât ben e no mâl, e dâsi fuarce e serenitât par zuiâ lis prossimis partidis cuintri de Juve e dal Napoli.

Storie dal Friûl e de emigrazion furlane, i cincuante agns de Cunvigne di Friburc memoreâts vuê su Radio Onde Furlane

Vuê al cole un inovâl impuartant inte storie de emigrazion furlane e plui in gjenerâl in chê dal Friûl. Cincuante agns indaûr, ai 2 di Març dal 1969, inte sale riunions dal ristorant “Gambrinus” di Friburc, si davuelzeve la prime “Cunvigne dai furlans emigrâts in Svuizare”. Ancjemò in dì di vuê si pues calcolâle une iniziative impuartante, par plui di un motîf.

Un prin element par sigûr impuartant al è chel dai sogjets che le vevin inmaneade: a jerin la associazion “Pal Friûl” di Losane (un sodalizi gnûf, che al jere stât metût adun propit in Svuizare intal 1968, cun chê di tignî dongje i emigrants cuntun spirt diviers, cemût che al marcave ancje il so non par furlan), il Fogolâr Furlan di Friburc e la associazion dai emigrants slovens dal Friûl-VJ, ancje cheste costituide di pôc. La cunvigne e nasseve dal bas e de colaborazion tra furlans e slovens.

Un altri element al è chel dai siei contignûts, stant che tra esperiencis e rivendicazions, in chê zornade si veve fevelât, si veve resonât e si veve discutût di economie, di societât, di lavôr, di culture, di dirits, di dibisugnis, di identitât, di solidarietât, di presint e di futûr, di servitûts militârs, di lenghis, di Universitât furlane, di sessualitât, di barachis, di prejudizis e di sperancis.
Cemût che si pues viodi massime se si lein lis relazions presentadis dai diviers protagoniscj di chel incuintri, la mozion unitarie fate buine ae fin de zornade e i articui detaiâts che vie pes setemanis seguitivis a vevin cjatât spazi su lis pagjinis di “Friuli d’Oggi”, chei che si vevin dâts dongje a Friburc a vevin discutût dal sigûr di cuistions in cont de emigrazion e dai furlans «pal mont», ma a vevin fevelât e resonât plui in gjenerâl in cont dal Friûl «in Friûl», che i partecipants ae Cunvigne a palesavin in maniere braurose la lôr volontât di jessi part di chel e che cun chel a volevin mantignî e disvilupâ un rapuart fuart, vîf e colaboratîf.

Probabilmentri al è par ducj chei motîfs che la organizazion de Cunvigne e veve cjatât diviers ostacui in Friûl. Gianfranco Ellero, che in chê volte al jere il diretôr dal sfuei dal Moviment Friûl, al scrivè che la preparazion di chê zornade e jere stade lungje e dificile «perché il Friuli vecchio e rancido aveva interesse a boicottare il convegno, ad evitare una presa di posizione poco gradita e tanto meno opportuna per il conservatorume di casa nostra».

Cundut achel, la Cunvigne e je stade inmaneade cun sucès, cun snait e cuntune disposizion e cuntune vision, là che di une bande al è fuart il spirt di chei timps e di chê altre si rive a vualmâ plui di cualchi contignût che al è bon ancjemò in dì di vuê, no dome in tiermins di storie e di memorie ma ben anche cun riferiment ae atualitât, pal Friûl «in Friûl» e ancje par chel che al è «pal mont» (che al esist ancjemò e anzit al è ancjemò plui consistent che in passât, se si calcolin i fîs e i dissendents dai emigrants “storics” adun cun chê che e je clamade “gnove emigrazion”).

Chê manifestazion di cussience, di vitalitât e di dignitât no poderin fâ di mancul di viodile e ricognossile nancje lis istituzions regjonâls, che a scugnirin tignî cont di lôr, a tacâ de prime Conference de emigrazion, inmaneade a Udin in maniere uficiâl vie pal mês di Dicembar dal 1969.

Vuê la Cunvigne di Friburc e vignarà memoreade su Radio Onde Furlane inte rubriche setemanâl di aprofondiment Dret & Ledrôs, par cure di Mauro Missana, cuntune schirie di ospits e di testemoneancis.

Radio Onde Furlane si puest scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.