Fieste dal Lavôr cun Lou Dalfin e Vididule Project + Negu Gorriak, Os Resentidos e Y Trwynau Coch = Babêl Europe 09/2018

Vuê al è martars e tal palinsest di Radio Onde Furlane a 11 a buinore in direte, al torne Babêl Europe, la trasmission cuindisinâl dedicade ae produzion musicâl tes lenghis propriis des minorancis e des nazions cence stât.

La pontade numar 9 dal program, te sô prime emission, e larà ‘in Onde’ il Prin di Mai, te zornade de Fieste dal Lavôr e propit chel dal lavôr, dal dirit dal lavôr e dai dirits dai lavorents al è un dai temis che a vignaran frontâts vie pe trasmission cu la poesie di Pier Paolo Pasolini e di Zuan Minut metude in musiche de bande dai ocitans Lou Dalfin e dai furlans Vididule Project.

Cun di plui si fevelarà di “grups storics” e di “classics babelics” e duncje si scoltaran cercis dal repertori di formazions tant che i galizians Os Resentidos, i galês Y Trwynau Coch e i bascs Negu Gorriak, juste pôcs dîs dopo dal inovâl numar 25 de jessude dal lôr sflandorôs album dopli Borreroak Baditu Milaka Aurpegi.

Dopo de direte di vuê, cheste pontade di Babêl Europe e torne ‘in Onde’, in repliche, ancje doman a une dopo di misdì e po sabide a une e mieze su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

Advertisements

Omaç ae Catalogne, vuê su Onde Furlane al torne Babêl Europe

Trê dîs dopo de manifestazion inmaneade a Udin pe Zornade Europeane des Lenghis e doi dîs dopo dai fats di domenie stade in Catalogne (il referendum pe indipendence, lis violencis de polizie spagnole, la resistence ghandiane de int…) su lis frecuencis di Radio Onde Furlane al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Il prin apontament dal mês di Otubar di chest an cun cheste trasmission (a undis a buinore) al sarà dedicât dut ae Catalogne, ae musiche par catalan, a ce che al è sucedût tai ultins dîs e tes ultimis setemanis e aes formis internazionalitariis di solidarietât musicâl.

Il viaç musicâl babelic di vuê in direte (ma ancje – in repliche – di doman, miercus ai 4 di Otubar, a une dopo di misdì, e di sabide ai 7, a une e mieze) al tocjarà la Catalogne e plui in gjenerâl i Paîs Catalans e si slargjarà ancje inaltrò, dal Paîs Basc ae Ocitanie e de Galizie ai Stâts Unîts di Americhe, cu lis vôs, tra chei altris, dai Obrint Pas, di Marina Rossell, dai Lou Dalfin, dai Sustraia e ancjemò di Joan Baez, in continuitât cu la trasmission di cuindis dîs indaûr.

Dopo des emissions in direte e in repliche (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu), ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.

 

 

Al torne Babêl Europe cui 30 agns dai Dixebra e discs gnûfs di Ocitanie e Friûl

Pieter_Bruegel_the_Elder_-_The_Tower_of_Babel_Rotterdam

Si scree vuê il 2017 di Babêl Europe, la trasmission cuindisinâl dedicade ae produzion musicâl tes lenghis minozadis dal continent, che e fâs part de programazion di Radio Onde Furlane.

Dopo de polse obleade di cuindis dîs indaûr, il viaç a torzeon tra grups, soliscj, discs, concierts, lenghis, musichis, storiis, teritoris, minorancis e nazions cence stât al torne a tacâ a 11 a buinore di vuê, martars ai 24 di Zenâr, in direte, e po doman, miercus ai 25, in repliche a une dopo di misdì.

gran-bal-dub

Tal prin apontament dal an gnûf si fevelarà di novitâts discografichis, tant che il gnûf ep Gran Bal Dub di Sergio Berardo e Madaski e l’album Rivoluzion Rosa dai Trabeat, e di grups storics tant che i asturians Dixebra, che ai 6 di Zenâr a àn finût i lôr prins trente agns di ativitât e che a memorearan chest inovâl cuntune schirie di iniziativis vie par dut il 2017.

L’itinerari babelic proponût aes scoltadoris e ai scoltadôrs di Onde Furlane al tocjarà, dongje des Asturiis, dal Friûl e de Ocitanie, ancje la Sardegne e la Galizie, cun Su Maistu Alessio Mura e il grup di Alonso Caxade.

dixebra-1

Babêl Europe si pues scoltâle in modulazion di frecuence (Radio Onde Furlane si cjape sui 90 Mhz te plui part dal Friûl e sui 90.2 Mhz in Cjargne) o ben in rêt, in dut il mont, ae direzion www.ondefurlane.eu. Cun di plui, dopo des dôs emissions di doman e di miercus, la trasmission e sarà a disposizion in rêt.

rof_suns2016

Babêl Europe, doman in direte e miercus in repliche la ultime puntade dal 2016

Babêl Europe no si ferme nancje vie pes fiestis di Nadâl e dal ultin dal an. La trasmission cuindisinâl dedicade ae produzion musicâl tes lenghis minozadis dal continent, che di passe cuatri agns e fâs part de programazion di Radio Onde Furlane, … Continue reading

Il taur, la acuile e la crôs: Turin, Ocitanie e Friûl

udinesemag_cover001

Sul numar 6 de riviste Udinese Magazine, dât fûr li dal Stadi Friûl ai 31 di Otubar pe partide tra Udin e Turin, al è jessût chest articul che al fevele dal Toro, di Turin, dal Friûl e de Ocitanie.

Cui che nol jere a Udin, li dal Stadi Friûl, e che par chel – e magari no dome par chel – nol à rivât a cjatâlu e a leilu, cumò al pues lei chel articul culì…

curvamaratona

Storie, liende, atualitât. Inte suaze dal zûc dal balon tal Stât talian il ‘Toro’ al à un puest particolâr. La sô innomine e va une vore plui innà de citât di Turin, dal Stât talian e dai stes risultâts tes competizions agonistichis. E je une innomine che in chel istès e je memorie, fantasie, mît, sium e salacor ancje consolazion, massime cuant che lis robis, tal cjamp o inaltrò, no van nuie ben.
Il ‘Toro’ al è stât e al è ancjemò un simbul di lote e di sperance. Pal spirt romantic e «barricadero» dal club turinês, Giovanni Arpino al veve inventât une espression di pueste: al veve cjapât ispirazion di un tiermin spagnûl e lu veve clamât «tremendismo granata».

La «Grande squadra del Torino»
Propit chel «tremendismo granata» al è l’element di fonde de identitât dal ‘Toro’ e de sô int.
Te storie taliane il Turin al è deventât un simbul, in particolâr vie pai agns Cuarante dal secul passât. Cul so zûc, cui siei talents e cui siei risultâts, il ‘Grande Torino’ al à rapresentât la volontât e la fuarce morâl di saltâ fûr dai rudinaçs e de devastazion de Seconde Vuere Mondiâl.
Chê stesse scuadre e veve cjapât sù un significât evocatîf, che al lave plui innà dal sport, za intant di chel conflit. Cemût che al salte fûr dal film ‘I nostri anni’ di Daniele Gaglianone, juste in chei agns il riferiment ae «Grande squadra del Torino» al jere deventât une sorte di peraule di ordin par ricognossisi tra antifassiscj e partigjans. Lote, sperance e Resistence.

gigi-meroni-2

Il ‘Grande Torino’ al jere la scuadre dal popul e cul popul. La scuadre di Mazzola, di Gabetto, di Bacigalupo e di ducj chei altris zuiadôrs, ma ancje la scuadre di Oreste Bolmida, il «trombettiere del Filadelfia», che al sunave la trombe par dâur fuarce ai granatas, e di ducj i siei tifôs.

Cussì in chê sere dai 4 di Mai dal 1949, a Superga, no murivin dome chei zuiadôrs e ducj chei altris passezîrs dal trimotôr Fiat G 212, ma al murive ancje alc tal cûr e te anime di dute la int.

E jere une muart che però e deventave risurezion: mît e memorie.
No sarà la uniche. Al baste pensâ ae figure di Gigi Meroni, il cjavelon cui cjalçons inrodolâts, cul so stîl di zûc e di vite e cu la sô muart, ai 15 di Otubar dal 1967, tirât sot di dôs machinis.
Une di chês e jere vuidade di un zovin che passe trente agns plui tart al deventarà il president dal ‘Toro’, Attilio Romero. Une altre disgrazie, un altri mît e un altri segn dal destin, stant che ancje il Turin tant che societât al sarà protagonist di une muart e di une risurezion: il faliment dal 2005 e la rifondazion.

Turin e Friûl
Ogni partide cul Turin e devente une ocasion par confrontâsi cul so mît e cu la sô storie, che e devente almancul in part ancje la nestre. Di cui che i plâs il zûc dal balon. Di cui che i plâs il Friûl. Di cui che si vise che ancje te nestre storie al jere – e al è ancjemò, cundut che al ven masse dispès platât – un «tremendismo» furlan. Di cui che si vise dai diviers zuiadôrs furlans che a àn zuiât tal ‘Toro’: dal clautan Ruggero Grava, ancje lui colât a Superga, al plui cognossût Enzo Bearzot, dal gurizan Giorgio Puia al campion di Italie Vittorio Caporale, di Claudio Sclosa a Massimo Donati. E di cui che si ricuarde che a Turin a son tancj di lôr che a son di divignince furlane: a saressin sù par jù uns vincjmil di lôr.

enzobearzot_toro

Al è ancje un altri aspiet dal ‘Toro’ che al pues tocjânus tant che furlans. A son chês bandieris rossis, cuntune crôs zale cun dodis pomui (trê par ogni braç), che si viodin simpri plui dispès framieç di chês granatas, tal stadi di Turin e ancje inaltrò. A son lis bandieris de Ocitanie, simbul di une identitât cence confins e di une lenghe cuntune nobiltât leterarie antighe che e à patît une minorizazion forsit ancjemò plui penze di chê dal furlan.

lou_dalfin1_granatissimo

L’ocitan al è la lenghe storiche di dutis lis tieris ‘d’Oc’ dai Pireneus aes Alps. A’nt fasin part ancje dodis valadis des provinciis di Cuneo e di Turin, là che la lenghe e esist, e resist e si torne a inventâ cul cine, in graciis di autôrs tant che Fredo Valla, Diego Anghilante e Andrea Fantino, e cu la musiche di tancj di lôr, a tacâ dai Lou Seriol e dai Lou Dalfin, esemplis di «tremendismo» granata e ocitan.

Marco Stolfo

bandieredoc

Babêl Europe dai 23.08, la novitât discografiche e regne de Ladinie ae Sardegne

martinaiori448x245

Doman in direte a 11 a buinore e miercus ai 24 di Avost, in repliche a une dopo di misdì, al torne su lis frecuencis di Radio Onde Furlane il program cuindisinâl dedicât ae produzion musicâl tes lenghis minorizadis dal continent che si clame Babêl Europe.

La gnove pontade de trasmission, che si pues scoltâle sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu, e varà un tai ‘avostan’ e ‘di splaze’.

Soracuerta_CD_Martina

Dongje di cualchi informazion e segnalazion, no dome di caratar musicâl, te scjalute di Babêl Europe a saran protagonistis principâls lis novitâts discografichis, a tacâ dal disc de cjantante ladine fassane Martina Iori, dal titul Amore e Buscofen, che al è saltât fûr juste ai prins di Avost.

Cun chê di lâ daûr des jessudis discografichis dai ultins mês, il viaç cun Babêl Europe al tocjarà ancje Galizie, Ocitanie e Sardegne, cu lis produzions plui resintis di Caxade, Lou Dalfin, Arrogalla e Claudia Crabuzza.

Pieter_Bruegel_the_Elder_-_The_Tower_of_Babel_Rotterdam

Al torne Babêl Europe, tra cercis di novitâts discografichis e atualitât sportive e politiche

cymru

Vuê al è martars e a 11 a buinore in direte su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe.

Te gnove pontade dal program cuindisinâl dedicât a lenghis, musichis, minorancis e nazions cence stât, che si podarà scoltâle ancje doman ai 13 di Lui, si tornarà a cerçâ cualchi novitât discografiche, a tacâ dal album dai Lou Dalfin, Musica Endemica, ma soredut si fevelarà di atualitât sportive e politiche.

y bandana

A doi dîs de fin dai Campionâts europeans di balon, che a son stâts tal Stât francês, dentri di Babêl Europe al sarà un omaç par chê che plui di cualchidun al à calcolât tant che «la uniche scuadre che si veve di tignî par chê, soredut de bande dai furlans cuntun tic di sintiment e di cussience», ven a dî chê dal Gales.

Il bon risultât de nazionâl galese – tierce classificade a pâr cu la Gjermanie, par vie che ai 6 di Lui e veve pierdût in semifinâl cuintri dal Portugal, che al è deventât campion de Europe – al è dome un dai motîfs par scoltâ un pâr di tocs cjantâts par cymraeg.

Tra lis resons di une sielte di cheste fate si puedin zontâ la stesse partecipazion ai Europeans di chê rapresentative di une nazion cence stât, il fat che si vedi presentade formalmentri ancje par galês, la decision de federazion galese di sielzi une localitât de Bretagne par preparâsi ae competizion e la iniziative di fâ la sô comunicazion no dome par galês, par inglês e par francês, ma ancje par breton, lenghe «sûr» di chê galese e soredut lenghe proprie de Bretagne.

na gathan

Dongje dal omaç al Gales, cu la musiche dai Y Bandana e dai 9Bach, si fevelarà ancje di «Brexit e Scot …in» e cussì e sarà ancje la ocasion par tornâ a scoltâ i Na Gathan, band scozese di cult pe sô musiche, pal fat di cjantâ par gaelic scozês e pe sô coerence politiche.

Te scjalute de trasmission al sarà spazi ancje pes Ganes, grup di ponte de produzion musicâl par ladin, une vore preseât soredut in Gjermanie, in Svuizare e in Austrie.

SŸdtirol Themenservice Schšngeist 2010 © SŸdtirol Marketing Gesellschaft / Max Lautenschlaeger, Berlin +49 177 4384167 mail@maxlautenschlaeger.de NO MODELS RELEASE DAS NUTZUNGSRECHT DER ABGEBILDETEN PERSONEN IST UNGEKL€RT

Uvernada 2014, trê dîs di musiche «d’oc». Ma cence i Massilia Sound System

loutapage

Al è di gnûf timp di Uvernada, la fieste di unvier de musiche e de culture ocitanie in Piemont. Il dut si davuelç tes Valadas e al ven inmaneât de bande dai Lou Dalfin. Doman a Lo Borg/Borgo San Dalmazzo, in provincie di Cuneo, si jentre tal clou de manifestazion cu la edizion numar 24 de ‘Festa de Lou Dalfin’, un apontament là che dongje dal grup di Sergio Berardo si dan adun tancj altris musiciscj, des Valadas Occitanas dal Piemont, de Occitania Granda e ancje di altris bandis de Europe e dal mont.

Il program des seradis dai 31 di otubar e dal 1n e dai 2 di Novembar si cjate achì. Juste tal ultin al è saltât fûr un cambiament di program. Cemût che al ven sclarît achì, no saran i Massilia Sound System, che tai dîs passâts a àn fat fieste pai trente agns de lôr ativitât e a  pe ocasion a àn dât fûr un gnûf disc e a àn tacât un gnûf tour. E sarà distès une biele ocasion, stant che sul palc si viodaran i mitics Nux Vomica, che tra lis altris  si cjatin ancje tal cd in zonte dal libri Occitania, Friuli, Europa. La mia lingua suona il rock, e i Lou Tapage, grup occitan che ai 15 di Novembar al sarà in Friûl tant che finalist di Suns, il festival european de cjançon in lenghe minoritarie.

Uvernada 2013, Lou Dalfin in fieste a Lo Borg

Uvernada_2013

Di vuê a domenie a Lo Borg/Borgo San Dalmazzo, in provincie di Cuneo, si fâs fieste. E je la edizion numar 23 de ‘Festa de Lou Dalfin’, un apontament là che dongje dal grup di Sergio Berardo si dan adun tancj altris musiciscj, des Valadas Occitanasa dal Piemont, de Occitania Granda e ancje di altris bandis de Europe e dal mont.

A tacâ dal an passât la manifestazion e à rinfuarcît la sô vocazion musicâl e culturâl. Lu sclarìs chel altri titul che al cjape dentri ducj i concierts e chei altris apontaments ch si davuelzin li dal palaç Bertello, tal centri de citât, ven a dî ‘Uvernada’, un non che al marche il rapuart di parintât cu la ‘Estivada‘, la rassegne di culturis e musicihis ocitanis e mediteranis che si davuelç vie pal istât a Rodés/Rodez, tal Stât francês.

Il program di dute la manifestazion si cjate li dal sît uficiâl dai Lou Dalfin. Ta chês stessis pagjinis si puedin lei altris informazion in cont de iniziative, là che dongje di musiche, lenghe e culture si cîr di promovi ancje il teritori e siei prodots. Un altri esempli di cemût che il ‘logos’ (la lenghe) e devente un ‘logo’, une marcje di cualitât e di origjinalitât in stât di fâsi cognossi, ricognossi e preseâ, soredut se e sune ben e se e sune fuart.

‘AntePrima’, a Verzuolo e tache la Vierte d’Oc

ante_prima2013

La musiche ocitane te sôs diviersis espressions e je la protagoniste di ‘AntePrima’, manifestazion inmaneade a Verzuolo, di vuê a domenie ai 24 di Març,  de bande de associazion Lou Dalfin cu la colaborazion dal Comun.

Si tache vuê cuntune lezion-conciert di Sergio Berardo e Enrica Bruna.

Doman, ai 23 di Març, il program al cjape dentri bai ocitans tal dopo di misdì a tacâ des 3. A 9 e mieze sot sere e conciert cui Cap Levat e i Sonaires de la Val d’Estura.

Domenie a tacâ des 4 dopo di misdì Grand Bal Occitan cun Bal-A-La-Viola e Pitakass.

Vie pe manifestazion al sarà presint ancje l’innomenât costrutôr di ghirondis, Jean Claude Boudet, intant che domenie a 11 a matine al sarà un incuintri cun Christine Demontaix, insegnante di viola a riom de Alvernie.