Inter – Udinese 0-0

simonescuffet

L’Udin al torne di Milan cuntun pont e nissun gol, ni fat e ni cjapât. Par chest an, massime in chest moment, o scugnìn contentâsi dal fat che l’Udin nol piert e al fâs un altri piçul pas in direzion de salvece. La vitorie dal an passât cul Inter e je lontanone che mai e ancje chê di Cope Italie di cheste stagjon e somee chê di une altre scuadre e duncje si à di sfuarçâsi cetant par cjatâ alc di bon, che però al è. Cun difat, se la partide no je stade alc e ce, dongje dal fat che almancul un pontut al è stât cjapât a son almancul altris doi elements che a meretin marcâts: il fat che la difese e à tignût bot e soredut che Sant Simon di Remanzâs al mostre pardabon di vê snait, cemût che si à viodût soredut te part finâl de gare.

I blancs e neri si presentin a Milan cul scheme solit, cuntune ponte sole e cun cualchi cambiament di formazion. In atac al è Muriel, al puest di Di Natale, e talmieç dal cjamp al è Badu al puest di Pinzi. La partide si vierò cu lis dôs scuadris che si studìin: l’Inter al mostre une propension ofensive plui fuarte intant che l’Udin al palese di no vê pôre e di fâ zirâ la bale cun ritmi e continuitât.

Dopo cinc minût Scuffet si fâs viodi cuntune biele jessude cui pugns. Par il rest la pression dai zuiadôrs di Mazzarri no rive a crevâ la roste difensive de scuadre furlane.Ator de mieze ore invecit al è l’Udin a jessi in cualchi maniere pericolôs, cun Muriel, fermât dai interiscj. Prime de fin dal prin timp la formazion di Guidolin e rive a fâ ancje di miôr cun Bruno Fernandes che al oblee Handanovic a un bon intervent che però al met badu tes condizions di tirâ. In cualchi maniere, ma la bale e vâ fûr.

La ande de seconde frazion e va daûr di chê dal prin: Inter che al sburte indenant ma al stente tal cjatâ spazis, Udin che si difint e che al prove a rispuindi in cuintripît. I interiscj, a fuarce di dâi, a rivin a vê ancje cualchi ocasion, ma là che no rivin i difensôrs in blanc e neri al rive il difensôr estrem cu la maie par so cont. Il puartîr dal Udin al pare dut ce che al rive des sôs bandis, massime a tacâ dal tîr di lontan di Alvarez, che al marche la incressite de pression dai parons di cjase.
L’Inter al prove, al tire, al sburte e al confezione ancje cualchi ocasion ma il puartîf furlan al è simpri presint e se nol è lui al rive Domizzi a meti un blec.

Advertisements

Udinese – Sassuolo 1-0

fuarceudinees

Une partide brutute e une biele vitorie. L’incuintri cul Sassuolo al finìs inte maniere miôr pal Udin, che al fâs valê la sô supremazie teritoriâl e tecniche e par fortune al mostre i siei limits plui in atac che in difese. E finìs un a zero, a jentrin in cjase trê ponts e si tache a respirâ aiar di salvece.

Il prin timp si vierç cuntun Udin che al mostre la voie di cjapâ daurman il control des operazions. Il Sassuolo al tire sù bariduris e muraiis di ogni sorte cul intindiment di rispuindi in cuintripît. Tai prins dîs minûts nol sucêt nuie ni di une bande ni di chê altre. Dopo l’emilian Zaza al cjape sù une iniziative personâl e al rive ae conclusion: Scuffet si cjate tal puest just tal moment just e al rive a fâ la robe juste.

I ospits a tornin a sbassâ la lôr linie di zûc, l’Udin al alce la sô, si svicine des bandis di Pegolo e suntune biele azion in verticâl la bale e rive sul cjâf di Di Natale che le met dentri. Il Sassuolo al prove a rispuindi ma al mostre di no rivâi, intant che l’Udin al fâs zirâ la bale miôr, cun dut che nol rive pardabon a conclusions pardabon pericolosis. Al rive il rigôr, lu tire Totò, ma la çope maladete i fâs mandâ il balon fûr bersai e la pussibilitât di sierâ la partide e va sù pai stecs.

Nol sucêt nuie altri tal prin timp e nol è alc e ce nancje il secont timp, che al va indenant cence padins ni emozions, fale che tal câs di un rigôr di Floccari che al cjape il pâl (benedete che çope tal dischet…). La ocasion pierdude e il timp che al passe a dan un tic di energjie in plui al Sassuolo che al cîr di sburtâ indenant, ma la situazion no cambie, no dome pe inconsistence ofensive dai emilians e par une cierte atenzion garantide de difese dal Udin ma ancje par vie che une biele cumbinazion tra Badu e Muriel, jentrâts al puest di Pinzi e Di Natale, no si siere inte maniere juste e cussì si sfante un altri viaç la pussibilitât di sierâ la partide cuntun dopli vantaç.

L’incuintri al finìs un a zero. Cumò l’Udin al varà il so ce fâ cul Inter. Sperìn che e ledi compagn che in Cope Italie.

 

Roma – Udinese 3-2

udin_neri

L’Udin al torne a cjase di Rome cence ponts, cun trê goi cjapâts, doi fats e plui di cualchi ocasion straçade. Cu la scuadre di Garcia i blancs e neris a podevin ancje pierdi, stant che chê e je une des miôr dal campionât, ma a vevin di mostrâ un almancul tic di snait e di personalitât.

A àn mostrât chel e chê, ma àn palesât ancje – e soredut – i lôr difiets di simpri, almancul par cheste stagjon: une fature mostre par rivâ a meti une bale tal sac e une cierte capacitât tal clopâ in difese e fâsi cjastiâ par chest de bande dai aversaris.

La scuadre furlane si presente a Rome cul so classic 3-5-1-1. L’intindiment al è clâr: fâ sù une roste cuintri de potence di atac romaniste e provâ a rispuindi in cuintripît.

La Rome e cjape sù il control des operazions, ma la prime iniziative ofensive e je di marcje blancje e nere: tîr di Badu mandât in corner. La rispueste e rive di Destro, che al impegne Scuffet. Po e cres la pression romaniste e dopo vincjeun minûts al rive il gol di Totti.

La reazion dal Udin si le viôt daurman, cuntune biele conclusion di Badu fermade di De Sanctis, però la Rome e manten la sô supremazie teritoriâl e ator de mieze ore al rive a fâ ancje il secont gol, cun Destro, su passaç di Gervinho. Al torne a provâ a fâ alc Di Natale ma il puartîr romanist al rive a mandâle fûr e sùù par jù pal ultin cuart di ore dal prin timp nol sucêt nuie altri.

Il secont timp si vierç cuntun Udin plui decîs, che cun Pinzi al smieze lis distancis dopo sîs minûts cunDi Natale si svicine ae paritât, se nol fos par De Sanctis.

I romaniscj si rindin cont che l’Udin al à masse iniziative e duncje a tornin a cjapâ il control de situazion, cuntune pression ofensive che e cres, in graciis des iniziativis di Gervinho e Torosidis, che al firme il tierç gol de sô scuadre.

L’Udin al prove ancjemò a ridusi lis distancis e al rive a fâlu cun Basta. Ma nol rive a fâ di plui.

Te prossime partide l’Udin al zuiarà cul Sassuolo in cjase. A coventin snait, personalitât e soredut atenzion.

I 8 di Març di Rosina Cantoni

Rosina_Cantoni

Chê altre dì a jerin i 8 di Març, la Zornade internazionâl de femine.
O tornìn sul argoment, che o vin za frontât in chê date sei chest an  che l’an passât, cuntun test ch o vin cjatât ator.

E je une poesie sui 8 di Març, scrite di Rosina Cantoni, la partigjane Giulia, tal 1961.

Par che si rivi a leilu miôr,  il test al è stât al è stât metût  te grafie uficiâl de lenghe furlane che in chê volte no esisteve.

Une testemoneance di une grande femine furlane.
Peraulis semplicis e profondis che a valin ancje pal dì di vuê.

8 di Març 1961
(Zornade des feminis)

Un pinsîr, un flôr zentîl
e cheste gran zornade
a noaltris destinade
a disin tantis robis.

A disin che ogni femine
e à un desideri in cûr
che vuê al salte fûr
e al svole vie cul svint.

Al va di un paîs al altri,
al va des monts al mâr
e fevelant biel clâr
al è come un  zurament.

Sì, unissin simpri plui
par che no vegni vuere,
par che une pâs sincere
e vegni a calmâ ogni cûr.

E ognidun al vedi dirit
di sedi ben tratât
e no dome sfrutât
par ingrandî il potent.

Sûrs di ogni part di Mont,
di ogni colôr di piel,
volìn un Mont plui biel
che al vedi puest par ducj.

Volìn che i voi dai fruts
mai plui a cognossin vueris,
ni fan e ni miseriis,
ma un avignî seren.

Udinese – Milan 1-0

FuarceUdinees

Trê ponts impuartants pe classifiche, pal cerviel e pal cûr. Un Udin discret al vinç cuintri di un Milan un tic clopadiç e al pare vie almancul dôs brutis fantasimis: chê dal pericul di tornâ a fâsi cjapâ dentri de code de classifiche e chê de maledizion di un mês di Març tacât inte maniere piês.

La partide si vierç avonde ben pe scuadre di Guidolin, là che si viodin daurman il dinamisim di Widmer, Pereyra, e Fernandes: propit Pereyra al firme la prime conclusion de partide: bale robade a Zapata, incursion te aree di rigôr, tîr in diagonâl e intervent cul pît di Abbiati.

Cul passâ dai minûts e cres, in tiermins relatîfs, la pression ofensive milaniste, cuntun pâr di ocasions di Pazzini. Di chê altre bande al è Widmer che i da di lavorâ a Abbiati e pôcs minûts prime dal interval Mexes si met tal mieç tra Di Natale e il gol. A son i unics moments di emozion di un prin timp flap e marcât di tancj erôrs de bande des dôs scuadris in ducj i reparts.

Il secont timp al scomence cuntune biele rispueste di Scuffet suntune conclusion cul cjâf di Robinho. Dopo dal intervent dal puartîr furlan, l’Udin al cjape in man il guvier dal zûc, al vuadagne velocitât e intensitât, ancje par vie che il Milan al va al mancul soredut te zone mezane e al tache a sfruçonâsi ancje in difese. Dopo passe un cuart di ore Di Natale nol rive a profitâ di une buse di Mexes, ma si rifâs sîs minûts plui indenant. Dut al partìs di une iniziative di Pereyra in tandem cun Bruno Fernandes: bale in aree par Totò che si fâs cjatâ puntuâl e nol à problemis a tirâle dentri.

Il Milan al prove a ripiâsi cu la jentrade tal camp di Balotelli, ma la situazion no mude, ancje par vie de puantualitât dai intervents di Scuffet e anzit al è l’Udin che cun Allan e Badu al prove a dopleâ, prime di compagnâ l’incuintri ae conclusion, cuntun sucès preseôs e in sostance meretât.

Zornade de femine 2014

udin2014

Vuê e je la Zornade internazionâl de femine.

Ancje chest an no si dismentein di cheste ricorince, che e reste une ocasion sei par fâ fieste che par fâ cualchi riflession e cualchi resonament su paritât di gjenar, dirits e rispiet.

Juste un an indaûr o vevin tirât dongje cualchi element pe riflession e pe celebrazion de Zornade.

Par chest  us invidìn a tornâ a dâ un cuc a ce che o vevin scrit tal blog ai 8 di Març dal 2013.

A Turin e inaltrò, ancje in  Friûl, a son tancj apontaments in cont de Zornade e dai siei significâts.

O segnalìn lis iniziativis che a son in vore a Mirafiori Sud  e chês che si fasin a Udin dentri dal program di Calendidonna.

Cagliari-Udinese 3-0

udin_neri

Il mês di Fevrâr, cun dut des delusions, al è stât un mês avonde bon pal Udin. Chel di Març, almancul daûr de maniere che al è tacât, al somee lâ dut di une altre bande.

Cun di fat, la partide di domenie a Casteddu cul Cagliari e je lade te maniere piês: trê goi cjapâts e un ridimensionament che al tocje in part la classifiche e soredut il spirt de scuadre, simpri plui grise, inconcludente e flape.

Al pues stâi che se Di Natale al ves butât dentri chel balon che i veve dât Pinzi dopo di un cuart di ore di zûc, cumò si fevelarès di dute une altre gare e di dute une altre situazion. E impen e je lade cussì: Di Natale al mancje une biele ocasion, Ibarbo no e cussì la partide e cjape une cierte ande, che no cambie fin ae fin.

Tal prin timp l’Udin al masane ancje zûc, ma in difese al clope – dulà jerial Naldo  te azion dal prin gol di Ibarbo? – e in atac al çuete, un pôc par imprecision, un pôc par sfortune – se chê bale di Di Natale deviade di Dessena e fos jentrade impen di bati su la travierse… – e un pôc par merit dai sarts.

La situazion e va in piês tal secont timp, là che no si viôt une vere reazion de scuadre di Guidolin, che e zuie in orizontâl ma no rive a jessi pardabon pericolose des bandis di Avramov. Il Cagliari si difint cence padin e te ultime part de gare e rive a fâ altris doi goi cun Vecino e Ibraimi.

Un risultât finâl che salacor al punìs in maniere masse pesante l’Udin e  al marche cemût che la sô situazion e sedi avonde catastrofiche. Par jessi otimiscj, si pues dî che, par fortune,  daûr de scuadre furlane te classifiche dal campionât al è ancjemò alc di piês e il pericul di sbrissâ te zone plui perocolose al reste , ma nol è (ancjemò?) cussì fuart.

Si spietisi un cambiament in positîf, ma cun pocje convinzion. Si spere dome che no ledi ancjemò piês…

Sabide al rive il Milan a Udin. Si rivaraial a viodi une scuadre blancje e nere miôr?