Udin e Pordenon, dople vitorie furlane in Cope Italie

Tal zûc de tombule l’ambo al vâl pôc. Tal zûc dal balon, te definizion dai partecipants dai Otâfs di finâl de Cope Italie, al vâl par sigûr une vore di plui. Cussì, al è pardabon un risultât interessant chel di viodi dôs scuadris furlanis che a van indenant su chê strade.
Al è ce che al è sucedût îr e îr l’altri. Nossere l’Udin al à vinçût cuintri dal Perugia (8-3, undis goi in novante minûts) e miercus il Pordenon al à fat la grande imprese, cu la vitorie par 2-1 cuintri dal Cagliari.

Propit il sucès dai ‘sborfs’ verts e neris dal cjâf lûc dal Friûl Ocidentâl che a zuin in serie C si pues calcolâlu une vere e proprie imprese storiche. Al è un risultât che si insuaze intune storie une vore iinteressante, chê fate massime vie pai ultins agns di chê scuadre e di chê societât. E cumò la prossime aventure e je chê de partide di Milan cuintri dal Inter.
Ancje la vitorie dal Udin e je impuartante, par lâ indenant in Cope Italie ma soredut par recuperâ cûr e snait dopo dai patafons cjapâts in campionât. Sperìn che chel di bon che al è saltât fûr îr dal Stadi Friûl al vali ancje tes partidis di serie A, a tacâ di chê di lunis a Crotone.

Advertisements

Su Onde Furlane, in spiete di Suns Europe, si scoltin lis ultimis gnovis di Babêl Europe

A mancjin aromai pôcs dîs ae tierce edizion di Suns Europe, che si fasarà a Udin dai 30 di Novembar ai 2 di Dicembar e Babêl Europe, il program cuindisinâl di Radio Onde Furlane dedicât ae produzion musicâl tes lenghis minorizadis dal nestri continent, al va dilunc a presentâ cualchi cerce dal repertori dai artiscj che a partecipin ae sezion musicâl de manifestazion.

Tal apontament ‘babelic’ di cuindis dîs indaûr si veve za tacât a scoltâ cualchi toc di chei dai vot finaliscj. In particolâr – dongje di une selezion dal gnûf progjet dal cjantant e musicist (e un grum di altis robis) dal Paîs Basc, Fermin Muguruza, adun cul coletîf catalan The Suicide of Western Culture, che no àn nuie a ce fâ cun  Suns Europe ma a meretavin scoltâts – la scjalute e veve fat indenant lis propuestis dai galizians Esposa, des galesis Adwaith, dal rumanç Tumasch è e dai ocitans Uèi, che però juste cualchi dì indaûr a àn scugnût dâ forfait e duncje no saran in Friûl.

Te pontade di Babêl Europe che si podarà scoltâle in direte doman, martars ai 28 di Novembar a 11 a buinore, e po ancje in repliche tal dopo di misdì di miercus ai 29, a une, e di sabide ai 2 di Dicembar, a une e mieze, la scjalute ur darà spazi ae musiche di chei altris partecipants al concors cuntun viaç musicâl che al cjaparà dentri i Paîs Catalans, cun Joana Gomila Folk Souvenir, il Paîs Basc, cu la rapper La Basu, la Bretagne, cui rockers Ebel Elektrik, il Friûl, cul cjantautôr Franco Giordani, e la Basse Sassonie, cu la cjantante pop Isa Zwart. Cun di plui al sarà spazi ancje pai ospits speciâi: il cjantant, ghitarist e cineast galês Gruff Rhys e il grup Namgar che al rive de Buriazie, republiche de federazion russe che si cjate sul confin cu la Mongolie.

Radio Onde Furlane – e cun chê Babêl Europe – si scolte sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu. Al pues stâi che si rivi ancje a scoltâle e a cjalâle in direte fintremai su Facebook.

Dopo de prime emission in direte e des replichis di miercus e di sabide, ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.

Udinese – Napoli 0-1

L’alenadôr al è gnûf ma la musiche e reste chê, almancul par cumò. La prime partide dal Udin vuidât di Massimo Oddo, che vie pe setemane al à vût cjapât il puest di Luigi Delneri, si siere cuntune sconfite, in continuitât cu la partide di domenie stade.

Al è jessût il risultât che al jere il plui probabil, stant che i blancs e neris a àn zuiât cul Napoli prin in classifiche, che par sigûr al è une scuadre fuarte e biele di viodi. Rispiet a ce che si spietavisi almancul daûr dai pronostics de vilie, però, l’Udin al à cjapâ dome un gol e almancul cheste e je une biele gnove. Cun di plui, vie pal secont timp la scuadre di balon furlane e à provât a fâ ancje alc di concret in atac, ancje se il Napoli nol à vût masse fastidis a difindi il vantaç e a puartâ a cjase chei trê ponts che a confermin la sô posizion di comant in graduatorie.

Vie pe prime frazion si scombat di plui di cetant che si zuie. L’Udin al mostre cualchi novitât te formazion e te struture tatiche. In puarte si torne a viodi Scuffet, in atac a son De Paul e Perica, te linie de difese a son in trê – Danilo, Angella e Samir – intant che te mediane a son in cinc di lôr: Balic tal mieç al centro, Fofana e Barak dongje di lui e Adnan e Widmer plui larcs cul compit di sburtâ tes corsiis esternis. Il Napoli al è mancul dinamic di ce che si podarès pensâ e si contente di ce che al rive a f

Al passe il timp e par almancul vincj minûts no si viôt nuie di particolâr in atac, ni di une bande ni di chê altre. L’Udin al è avonde atent e ordenât daûr ma al lasse di bessôi Perica e De Paul e il Napoli al somee flap e smamît, a part cualchi bon moviment di Insigne

La prime conclusion e je une punizion di Mertens che si distude su la bariere al minût numar 23. Sù par jù dîs minûts plui indenant Di Bello al sivile un penalty pai ospits par vie di un contat tra Angella e Maggio: dal discut al tire Jorginho, Scuffet al pare vie la bale ma il brasilian al rive prin di ducj par tocjâ il balon e lu bute dentri tal sac.

La reazion dal Udin no si viôt, il Napoli al gjestìs il vantaç cence problemis e il prin timp si siere cece nissun fat che al merete contât. Te seconde frazion si viôt un tic di plui l’Udin, che fin a trê cuarts dal cjamp al rive a masanâ avonde zûc, ma al stente tal meti Perica e po Lasagna tes cundizions di tirâ in puarte. Un pôc al è par vie dai siei limits, un pôc al è par vie de difese dai ospits, che e je ordenade e atente cemût che al covente.

Sù par jù ator de metât dal timp secont e rive la prime vere conclusion in puarte dal Udin, cuntun tîr conclusion di Barak che Rejna al rive a fermâ in doi timps. Il Napoli al rispuint cun cualchi tentatîf in cuintripît che però nol è masse convincent e al somee ancjemò di mancul convinçût.

Pal Udin a fasin ancjemò alc Balic e Barak, che al torne a impegnâ Reina, pal Napoli al à une buine ocasion Callejon e ae fin il risultât al reste chel: la vitorie de scuadre di Sarri.

Probabilmentri l’Udin al varès meretât un pontut, pe grinte e pe costance che al à mostrât, però al à paiât i siei limits soredut in atac. Che in bancjine al sedi Delneri o che al sedi Oddo, i blancs e neris a àn di sgarfâ di plui.

Sapade/Plodn, un toc di Friûl che al torne in Friûl

Ancje la Cjamare dai Deputâts e à votât a pro dal passaç di Sapade/Plodn de Regjon Venit ae Regjon Friûl-VJ. Vuê cualchi minût prime des dôs dopo di misdì al è rivât il vôt finâl: 257 a pro, 20 cuintri e 74 astignûts.

Il test, che al jere za stât fat bon dal Senât, al jere stât fermât ae Cjamare la setemane stade, dopo che il Consei regjonâl dal Venit si veve lamentât che al mancjave il so parê.

Al jere, evidentementri, dome un dai tancj tentatîfs – i ultins a son stâts chei fats di un pôcs di deputâts venits îr tal ufici di presidence e ancjemò vie pe buinore in aule – di blocâ l’iter parlamentâr, di rinviâ la discussion e la votazion e duncje di pidimentâ la conclusion positive dal percors fat de afermazion de volontât de int di chê part di Friûl che e veve voie di tornâ in Friûl, cu la jentrade te Regjon autonome Friûl-VJ.

Par fâle lâ sù pai stecs, i nemîs de tornade in Friûl di Sapade/Plodn lis vevin provadis dutis e a ducj i nivei, e ancje dopo dal vôt a son za chei che i domandin al president Mattarella di no firmâ la leç fate buine vuê.

Ancjemò vie pes ultimis setemanis, però, ancje i sostignidôrs de volontât de int di Sapade/Plodn a àn fat sintî la lôr vôs. Tra chescj e merete segnalade la iniziative cjapade sù de Assemblee de comunitât linguistiche furlane (CLiF), la istituzion che e da rapresetance istituzionâl ai comuns di lenghe furlane che a fasin part de Regjon che e ten dongje la plui part dal Friûl cun Triest, cuntune letare dal so president, il sindic di Cjarlins Diego Navarria, mandade cualchi zornade indaûr ae Presidente de Cjamare, Laura Boldrini.

La buine gnove che e rive di Rome e je stade saludade di tancj di lôr tant che un at di justizie. Chestis peraulis a son stadis dopradis in particolâr de bande de presidente de Regjon Friûl-VJ, Debora Serracchiani.

Tra lis tantis declarazions di sodisfazion e merete ricuardade propit chê dal president de CLiF, Navarria, che al à marcât cemût che «in tancj di lôr a àn poiât la iniziative dai sapadins – e tra chescj a son ancje i sindics furlans – ma soredut che il vôt de Cjamare di vuê al è il risultât de determinazion e dal snait de int di Sapade che par dîs agns e à tignût dûr, sghindant ancje i tancj tramais che ur àn fat une cierte politiche e une cierte burocrazie».

«Cumò – al à zontât Navarria – par dâur acet in Friûl ai sapadins cemût che a meretin, al covente il Friûl, ma cheste ca e je une altre bataie. Par intant, fasìn fieste» . Une fieste par Sapade/Plodn, pal Friûl e pe democrazie.

¡Endavant Poble Català!, doman a Turin si fevele di Catalogne

Une ocasion par cognossi e capî alc di plui in cont de cuistion catalane e dai siei disvilups plui resints. E je chê ufierte de bande di Noi restiamo Torino, che e à inmaneât un incuintri public cun Ícar Aranzo dal SEPC (Sindicat d’Estudiants dels Països Catalans), Arnau Cardona di Arran – Països Catalans e Marco Santopadre, redatôr di Contropiano e Ethnos & Demos, par frontâ l’argoment.

Magari cussì no, cemût che si lei culì, no si sa ancjemò in ce puest che l’incuintri si fasarà. Ce che al è sigûr al è che di une bande o di chê altre l’event al vignarà fat.

L’apontament al è a 5 mancul un cuart sot sere te jentrade grande (chê che le clamin ‘Main Hall’) dal Campus Einaudi de Universitât di Turin in Lungo Dora Siena 100A.

 

Udinese – Cagliari 0-1

L’Udin al torne a zuiâ, dopo trê setemanis cence partidis uficiâl, e al torne a pierdi. Dopo che tai ultins doi incuintris di campionât al veve rivât adore a puartâ a cjase sîs ponts, cuintri dal Cagliari, la formazion blancje e nere e torne a jessi masse segnade di chel che za di timp al ven clamât efiet Mer…Dacia Arena.

La scuadre di balon furlane e zuie in maniere flape, cence atenzion e cence continuitât. Di une bande no rive a fâ rindi chel pôc di bon che e imbastìs vie pal timp regolamentâr e di chê altre e fas masse erôrs e ju paie ducj. Il Cagliari, invezit, al zuie la sô partide ordenât e atent e cussì al concuiste un sucès impuartant pe classifiche e pal morâl.

Delneri al met in cjamp une scuadre che e somee in stât di fâ ben. Denant di Bizzarri, Angella al torne in cubie cun Danilo tal mieç, intant che Widmer e Samir a àn il compit di difindi e di sburtâ indenant dilunc des corsiis laterâls, te linie mediane si viôt pe prime volte Balic in posizion centrâl, dongje di lui a son Barak e Jankto, e plui indenant a son Perica, De Paul e Maxi Lopez, intune sorte di 4-3-2-1 cun gjeometrie variabile.

Dutis dôs lis formazions a partissin avonde ben. La prime ocasion e je dai ospits, cuntun tîr di Ionita dopo sîs minûts, ma l’Udin almancul tai prins trente minûts al è plui pericolôs, cuntune biele conclusion di Barak, che e cjate la rispueste pronte di Rafael, cul tentatîf seguitîf di tap-in di Maxi Lopez cul cjâf che al finìs fûr bersai, cuntune altre conclusion cul cjâf di Jankto suntun cross di Barak e ancjemò cuntun tîr dal boem che al ven parât di Rafael.

Il Cagliari al cres cul passâ dal timp e cul sghindâ i pericui. A rivin cussì i sugjeriments di Barella, lis conclusions di Pavoletti e di Faragò e lis paradis di Bizzarri, che a sierin il prin timp e a marchin che tra i blancs e neris al è alc che nol funzione par ordin.

Cheste situazion e cjate conferme sul imprin de seconde frazion, cuant che Barella al pronte un biel assist in profonditât par João Pedro, che il brasilian nol à fastidis a corezi in puarte, cun Danilo e Widmer che a durmin e cun Bizzarri che nol rive a meti un tacon.

Il gol cjapât al fâs sunâ la svearine tra i parons di cjase, intant che il gol fat i da fuarce al Cagliari.
I ospits si zovin ancjemò dai intervents dal so puartîr, prime suntun biel tîr di Perica e po suntun tentatîf di Maxi Lopez, e a mantegnin lis lôr posizions cence scomponisi. La reazion dal Udin e je intermitente e pôc produtive, no dome par merit di Rafael. I cambis fats di Delneri – Fofana al puest di Balic e Lasagna al puest di Maxi Lopez, cun Perica prime ponte – no mudin masse la situazion.

Al passe il timp e Jankto e De Paul si cjatin te posizion buine par tirâ iin puarte, ma no rivin a jessi pardabon pericolôs. Alc di plui lu fâs, te ultime part de partide, Baijc, metût dentri al puest di De Paul, cun cualchi bon sugjeriment par Perica e Lasagna, che a cjatin ancjemò Rafael tal puest just tal moment just. Di chê altre bande il Cagliari si svicine al doi a zero tai ultins minûts cun Farias – buine la rispueste di Bizzarri – e po cun Faragò, che al oblee il puartîr blanc e neri a fâ un fal che al paie cul cartelin ros, juste pôcs seconts prime de fin.

Felice e par furlan

Un piçul pas par un om o almancul un pas indenant simbolic pal Friûl.

O cjapìn at cun plasê di ce che nus àn contât, ven a dî che lunis stât, inte suaze de cerimonie pe scree dal cuarantesim dal gnûf an academic, il Retôr di chê che ancje a nô nus plâs clamâle Universitât dal Friûl, Alberto Felice De Toni, al à vût saludât il il President de Republiche Taliane, Sergio Mattarella, ancje par furlan, par sloven e par todesc.

Cun di plui, daûr di ce che si lei ator, tra stampe e web, il Retôr al à dit ancjemò alc altri par furlan.

Denant di cheste forme di rispiet ancje tai siei confronts – e no dome viers dal Friûl – ancje Mattarella i à dit «Mandi» e cussì al à fat biele figure ancje lui.

Nus fâs pardabon plasê. No lu scrivìn par vie che o pensìn che a Palaç Florio a vedin let il nestri blog e il nestri articul, là che o domandavin che almancul cualchindun dai sorestants dal Friûl i des a Mattarella il benvignût in dutis lis cuatri lenghis dal Friûl, e a vedin cjapât sù il nestri sugjeriment. Nus fâs plasê parcè che o pensìn che e sedi stade fate une robe juste.

O sperìn che no sedi la uniche.

Al torne Babêl Europe. Anticipazions di Suns Europe e altris gnovis ancjemò

Si svicine la tierce edizion di Suns Europe, che si fasarà a Udin dai 30 di Novembar ai 2 di Dicembar, e al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Il gnûf apontament ‘babelic’ su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefu rlane.eu) al è par vuê, martars ai 14 di Novembar, in direte a undis a buinore.

E sarà la ocasion par scomençâ a scoltâ alc di cualchidun dai artiscj che a sunaran a Udin te sezion musicâl de manifestazion inmaneade di Informazione Friulana e Punto Zero cul jutori de ARLeF.

Si fevelarà ancje di altris argoments di atualitât e si scoltarà ancje un toc dal gnûf progjet là che si dan dongje il cjantant e musicist (e un grum di altis robis) dal Paîs Basc, Fermin Muguruza, e il coletîf catalan The Suicide of Western Culture.

Dopo de prime emission in direte, cheste gnove pontade di Babêl Europe e torne te programazion di Radio Onde Furlane in repliche: doman, miercus ai 15, e sabide ai 18, la prime volte a une e la seconde a une e mieze dopo di misdì.

Cun di plui si podarà tornâle a scoltâ tal sît internet de radio libare dai furlans.

Lunis ai 13 Mattarella al sarà in Friûl. Cualchidun i daràjal il benvignût ancje par furlan, par sloven e par todesc?

Lunis ai 13 di Novembar si scree il cuarantesim an academic de Universitât dal Friûl e al sarà presint anche il President de Republiche Taliane, Sergio Mattarella.

Al sarès biel che cualchidun dai sorestants dal Friûl – il Retôr de Universitât, la Presidente de Regjon, il Sindic di Udin… – i des il benvignût tes cuatri lenghis dal Friûl e cussì i disès ancje: «Sâr President, benvignût in Friûl. Gospod Predsednik, dobrodošli v Furlaniji. Sehr geehrter Herr Präsident, willkommen in Friaul».

Cualchi an indaûr al jere sucedût. Cemût che si lei culì, il Sindic di Faedis di in chê volte, Cristiano Shaurli, jal veve dit al President de Republiche di in chê volte, Giorgio Napolitano, e i veve ancje consegnât un document, prontât dal Comitât/Odbor/Komitaat/Comitato 482, che al domandave propit l’intervent dal President, tant che “garant de Costituzion”, a pro de metude in vore ad in plen des leçs di tutele e duncje a pro de garanzie plene di chei dirits ricognossûts in tiermin formâi de Leç fondamentâl de Republiche e di ches altris normis specifichis, cemût che a domandin ancje in Europe.

Cumò Shaurli al è Assessôr regjonâl. Al podarès tornâ a fâ chel ‘beau geste’ lui o ben al podarès sugjerîjal a cualchidun dai siei coleghis.

Un intervent di chê fate al larès ben ancje cumò.

E larès ben ancje une gnove sugjestion a pro de metude in vore pardabon des leçs di tutele des minorancis linguistichis. Magari cussì no, al è ancjemò tant ce fâ in chest cjamp.

Cundut achel un salût di chê fate al sarès za alc di bon. Al sarès une forme di rispiet, no dome pe int dal Friûl ma pal stes President, te sô persone e te sô istituzion.

La Republiche taliane e je di ducj: ancje dai citadins dal Friûl che a son di lenghe furlane, di lenghe slovene e di lenghe todescje.

Nus covente almancul un biel segnâl, in linie cui principis di fonde de Costituzion e cun chei de Europe unide te diversitât.

La conclusion di Europa 57/17, students e esperts a domandin plui Europe e plui Friûl

La Europe e clame e il Friûl al rispuint. La sô rispueste e je chê di une comunitât teritoriâl multilengâl e multiculturâl che e à cussience di chestis sôs peculiaritâts e che su chestis fondis e marche il so jessi part de Europe: tant a dî un Friûl «unît te diversitât» che si ricognòs te Europe «unide te diversitât» e che par chel al domande ae Union Europeane di jessi plui Union e plui Europeane.

Dut chest al è saltât fûr a clâr inte suaze di Europa 57/17, iniziative metude adun de bande  dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, che e je stade screade ai 14 di Otubar, cu la prime di une serie di programs su Radio Onde Furlane, e che si à sierade vinars ai 3 di Novembar cuntune conference/taule taronde li dal centri economic e juridic dal Ateneu Furlan di Vie Tomadini 30/a.

Propit l’event conclusîf dal progjet, cu la partecipazion di cuatricent students dal convit Paolo Diacono di Cividât e dai istitûts Deganutti, Uccellis, Marinelli, Percoto e Stellini di Udin e cui intervents di une schirie di reladôrs che a àn frontât diviers aspiets de storie e de atualitât dal procès di integrazion continentâl, cuntune atenzion specifiche pontade su la «prossimitât» e su la «cuotidianitât» de dimension europeane, al à mostrât cetant che a son fuarts e positîfs, in teorie e in pratiche, i rapuarts tra Friûl e Europe e tra Europe e Friûl.

Une sensibilitât di cheste fate le a à palesade in particolâr il scritôr, insegnant e vicepresident de Cjase pe Europe  di Glemone, Angelo Floramo, che tal so intervent al à marcât cemût che di simpri il Friûl, unitari e plurâl, al sedi simpri stât part de Europe e che chestis sôs peculiaritâts, scjafoiadis tal ultin secul e mieç dal nazionalisim dominant, a resistin ancjemò in dì di vuê e ta chest gnûf contest a deventin un patrimoni e une risorse.

Par Floramo la alteritât dal Friûl plurâl, che e jere stade calcolade un probleme e salacor un pericul inte suaze dal Stât nazionâl talian, fat sù su la fonde de idee di nazion «una d’arme, di lingua e d’altare», cemût che al scriveve Alessandro Manzoni te sô poesie ‘Marzo 1821’, e devente une risorse impuartantone par metisi in relazion positive cun chei altris e duncje par jessi citadins europeans, cun cussience e cun cognossince.

Su chescj aspiets a àn tornât a bati ancje Carli Pup, president de cooperative Informazione Friulana, e Diego Navarria, president de Assemblee de Comunitât linguistiche furlane. In particolâr a àn fevelât di esperiencis di cooperazion cun altris entitâts des minorancis in Europe di caratar rivendicatîf e politic – par esempli il Protocol di Donostia pe garanzie dai dirits linguistics in Europe, fat indenant di 120 sogjets e tra chescj propit di Informazione Friulana, Radio Onde Furlane, La Patrie dal Friûl, CLAAP e Novi Matajur – o ben culturâl e promozionâl, a tacâ des colaborazions tra i media ai progjets in rêt e de realizazion dal festival Suns Europe, e di cemût che il disvilup de integrazion europeane si zovi de tutele des minorancis e al vedi zovât ae tutele des minorancis, massime tal Stât talian, là che lis «normis specifichis» proviodudis dal articul 6 de Costituzion a son rivadis dome a tacâ de fin dal secul stât.

Chest element al jere saltât fûr ancje te ultime trasmission radiofoniche di Europa 57/17, cu la testemoneance di Antonio Banchig, gjornalist dal Novi Matajur. Ta chês altris dôs pontadis de serie coordenade e condusude di Marco Stolfo, e jere stade presentade la storie dal procès di integrazion europeane e a jerin stâts frontâts diviers argoments leâts ae situazion dal dì di vuê, cui intervents dal responsabil sientific dal Centri di documentazion europeane ‘G. Comessatti’‘, Claudio Cressati, dal espert di politiche europeane e internazionâl Roberto Castaldi (Universitât eCampus e CESUE), e di Renato Damiani de Cjase pe Europe di Glemone.

Propit Damiani, adun cul president dal Comitât talian dal Moviment european, Pier Virgilio Dastoli, e cul ricercjadôr de Scuola Superiore Sant’Anna di Pisa, Giorgio Grimaldi, al è stât un dai reladôrs de prime part de buinore dai 3 di Novembar, che e jestade dedicade ai Tratâts di Rome e aes disfidis che a son denant de Europe dal dì di vuê.  Te seconde parte de zornade a son stâts ancje i intervents di Francesco Rossi di Zero Idee e di Sonia Bosaro e Jolita Ziauberyte de Universitât dal Friûl, che a àn fevelât des oportunitâts pai zovins inte suaze dai programs Europe Creative, Europe pai CitadinsZoventût e de mobilitât europeane e internazionâl dai students, a tacâ dal progjet Erasmus, che juste tal 2017 al finìs i siei prins trente agns.

La partecipazion dai students e je stade buine e vivarose e si à palesade cuntune schirie di domandis e osservazions che a àn tocjât diviers argoments: de situazion de Catalogne ai gnûfs slargjaments de UE, dal defict democratic ai dirits sociâi, de necessitât di plui competencis pes istituzions europeanis aes cuistions leadis ae sigurece e al terorisim.

Il progjet Europa 57/17 al è stât metût adun cun chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente. Su la fonde di cemût che e je lade la buinore di vinars stât e po ancje daûr dai contignûts des trasmissions su Onde Furlane, si pues dî che al à jonzût i siei obietîfs. Un pont di partence o un moment di passaç inte direzion di une Europe pardabon «unide te diversitât», cence pôris, cence prejudizis e magari ancje cence retoriche.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.