Udinese – Lecce 1-2

Salvece concuistade e scuadre apaiade e rilassade, ancje se no sentade, che ae fin e piert. No si pues dineâ che tra Udin e Lecce, nossere, lis dôs formazions a vevin motivazions diferentis e salacor une grinte diferente. Chest si lu à viodût massime vie pal secont timp cuant che i ospits, juste tal ultim, a àn rivât a segnâ il gol de vitorie che ur da ancjemò cualchi sperance di no sbrissâ in serie B. Un sucès in cualchi maniere meretât, cundut che la scuadre di balon furlane e à mostrât ancjemò di jessi in stât, cui siei zuiadôrs, di fâ ancje al di bon e di just.

La partide e je intense e plasevule tacant dal principi. Il merit al è dal Lecce che al scugne cirî di vinci par no pierdi dauran dutis lis sperancis di restâ in serie A ancje tal 2020/2021 e dal Udin che nol reste a cjalâ i aversaris ma al fâs il so zûc e al met adun diviersis azions ofensivis.

Lis conclusions in puarte a son dutis de scuaddre furlane. Si tache cuntune combinazion Fofana-De Paul, po dopo al è un corner di De Paul che Okaka al tocje cul cjâf ma lu mande fûr bersai e plui indennat al è ancje un assist di Ter Avest par Nestorovski, che al tire e al segne, ma Orsato al sivile il fûr zûc.

La perle al è un colp cul tac di De Paul, che al ven parât vie di Gabriel, intant che il gol dal Udin al rive inte ultime part dal prin timp: corner di De Paul par Samir che al salte plui indalt di ducj chei altris e le bute dentri cul cjâf. Cuatri minûts plui tart, però, inte aree blancje e nere Becao al tocje la bale cul braç, Orsato al sivile il penalty e Marrocu al tire e al segne.

La seconde frazion e viôt il Lecce che al frache sul aceleradôr, ancje se no i dâ masse lavôr a Musso. La scuadre salentine e piert Mancosu, che al cole mâl dopo jessi saltât par tirâ cul cjâf, ma ancje cence il cjapitani si puarte indenant.

L’Udin al ten bot e no i permet di cumbinâ alc e ce. Cun di plui si presente des bandis di Gabriel ancjemò cuntun diagonâl di De Paul che al lenç il pâl a man drete dal puartîr zâl e ros. La pression dai ospits ae fin ju puarte a jonzi il risultât plen: si svicin al obietîf cuntun tîr fûr bersai di Lucioni e po lu cjatin, juste tal ultin, cuant che Barak e Lapadula si cjatin inte aree blancje e nere, cuntune cierte libertât si passin la bale e l’ex dal Milan al segne cence fastidis (a part il fat che si infortune ae cjavile).

Furlans cuiets e salentins plens di sperance.

Pordenone – Salernitana 1-1

Un rigôr par om, un gol par om e un pont par om. Al è il struc de partide di nossere jenfri Pordenon e Salernitana, che a scombatin, a spudin balins e ae fin a jonzin un risultât che al va ben soredut pe scuadre di balon dal Friûl Ocidentâl, che si conferme al cuart puest, simpri a un pont di mancul dal Spezia, intant che la formazion di Ventura e varà di cirî di vinci cun chê scuadre ligure inte ultime di campionât par gafâ un puest in zone playoff.

Il Pordenon al partìs cul pît just, compat, ecuilibrât e dinamic. I ospits si presentin cun diviersis novitâts in cjamp – Vannucchi par Micai, Heurtaux par Migliorini, Capezzi par Akpa Akpro e Giannetti tal puest di Djuric – ma almacul in principi no cumbinin alc e ce, tacant di Dziczek che si fâs notâ par doi erôrs in atac. Ancje Pobega e Ciurra, di chê altre bande dal cjamp, a son pôc produtîfs intes primis dôs ocasions. Inte tierce, però, i sborfs no perdonin: Pobega al jentre ben inte aree de Salernitana e al oblee Aya a intervignî in maniere iregolâr cuintri dal neri e vert, Pezzuto al sivile e dal discut Burrai al segne.

Il gol cjapât al sune la svearine pe Salernitana, che al prove a fâ alc di plui e alc di miôr. Le jude, magari cussì no, l’arbitri che al viôt un fal (che nol esist) di Burrai su Di Tacchio e i da il penalty che al ven segnât propit dal atacant. Il gol fat i da ancjemò plui fuarce ae scuadre di Ventura, che e prove a passâ in vantaç cun Giannetti, che il so tîr cul cjâf al ve mandât in corner di Di Gregorio.

Vie pal secont timp il ritmi al è plui bas, ma si va dilunc a scombati. Gondo al cjape la travierse e Capezzi al prove cuntune conclusion centrâl di fûr. Il Pordenon al ten bot e juste intai ultins minûts al va dongje dal sucès, cun Semenzato che dal limit de aree di rigôr al oblee Vannucchi a salvâsi in corner cuntun bile gjest atletic. Plui tart ancjemò al è Di Gregorio a metis in mostre suntun tîr di Giannetti, intant che Dziczek al conferme di jessi in “zornade no” straçant une buine bale, che e finìs in curve.

Cagliari – Udinese 0-1

La salvece matematiche ancjemò prime di scomençâ la partide cul Cagliari e une biele vitorie che e da respîr ae classifiche e che e premie la scuadre blancje e nere, che zuie cun snait e cun sintiment.

Lis buinis gnovis, pe graduatorie, che a rivin di Bologne, là che i parons di cjase a vincin cul Lecce e a garantissin daurman la permanence in serie A dal Udin ancje pal 2020/2021, no vegnin calcoladis masse de formazion blancje e nere, che – justementri – e va in cjamp cul Cagliari cun dute la concentrazion che e covente.

Pe ocasion Gotti al lassse Fofana in bancjine e al torne a recuperâ Walace intal mieç dal centricjamp, dongje di De Paul e Sema e cun Stryger Larsen e Zeeglaar esternis laterâi. In puarte al è Musso, denant di lui a son Becao, De Maio e Nuytinck e in atac si torne a viodi la cubie Lasagna-Okaka. La scuadre furlane e tache cul pît just e juste dopo un pâr di minûts e cjate il gol cun Okaka, che al controle ben il lanç di Stryger Larsen, al passe Ceppitelli e al impire Cragno.

Il Cagliari nol somee in stât di rispuindi e l’Udin al mante il control de bale e de partide al imbastìs ancjemò azions di atac cun Lasagna e soredut cun De Paul, che i da di lavorâ a Cragno. I parons di cjase a son lents, imprecîs e smamîts: a provin il tîr di lontan cun Lykogiannis, ma Musso al è ben plaçât e al fâs compagn suntune punizion avonde pericolose di João Pedro, e a riscjin al in cuintripît cul Udin ispirât di Walace e di De Paul.

Il prin timp si siere, di une bande, cu lis conclusions di De Paul e di De Maio, e di chê altre cuntun tîr di Simeone, che no mudin il risultât parziâl. La seconde frazion si vierç cuntune conclusion alte di Lykogiannis e cuntune cierte pression dai parons di cjase, che e crès in graciis de jentrade tal cjamp di Pereiro ancje se no prodûs nuie di masse significatîf, stant che l’Udin si difint cun ordin e al rispuint cu lis sôs verticalizazions.

Cragno al ven impegnât di Okaka e di Lasagna e ancjemò prime Walace al prove a tirâ di fûr, ma la bale e va alte parsore de travierse, intant che Musso al interven par ordin sui gnûfs tentatîfs di Mattiello e di Pereiro. L’Udin si svicine al secont gol cun De Paul e juste tal recupar il Cagliari al à la bale pe pate, prontade ben di Simeone par João Pedro, ma nol rive a disfrutâ la ocasion. Cussì il risultât al reste chel: un a zero pal Udin. Une vitorie meretade, che e marche il moment positîf de scuadre furlane; une gnove sconfite pal Cagliari, dopo di chê di chê altre dì cuintri de Lazio e inte suaze di un periodi segnât pal plui di partidis flapis e di delusions, là che la ultime vitorie e rimonte a un mês indaûr (4 a 2 cul Toro).

Ascoli – Pordenone 2-2

Il Pordenon cuintri dal Ascoli al prove a rompi la rie des ultimis sconfitis par tignîsi inte part plui alte de classifiche cun chê di passâ tai playoff inte maniere miôr. Vie pal prin timp i sborfs a imponin il lôr zûc e a passin in vantaç, prime de polse i parons di cjase a smiezin lis distancis e po tal secont timp a segnin ancjemò e ae fin lis dôs scuadris si spartissin un pont par om.

La scuadre di balon dal Friûl Ocidentâl e partìs cul pît just e e rive a segnâ daurman tal prin minût di zûc cun Bocalon, che al ven servît in verticâl inte aree di rigôr e al impire Leali. Sù par jù vincj minûts plui tart, dopo di un tentatîf fûr bersai dal blanc e neri Padoin, al rive il doi a zero firmât di Pobega, che al recupare un biel cross di Bocalon, al controle e al tire in puarte cun sucès.

L’Ascoli no si piert pai trois e al prove a reagjî cun Ninkovic, che al pinele un bon diestri a zirâ, che al ven tocjât in corner di Vogliacco. Il Pordenon al rispuint ancjemò
cun Pobega che al tire cul cjâf, ma nol cjate il spieli de puarte e i parons di cjase a rivin a segnâ juste ae fin de prime frazion: cross di Cavion e tîr cul cjâf di Ninkovic.

Il secont timp si vierç cul Ascoli che al torne a sburtâ indenant e al segne ancjemò cul so atacant serp, che al jentre inte aree e al tire in diagonâl: nuie ce fâ par Di Gregorio.
I parons di cjase a provin a segnâ ancje il tierç, almancul intun pâr di ocasions ancjemò cun Ninkovic e po cun Eramo. Il Pordenon al à mancul iniziative, al ten bot e al rispuint in cuintripît. Juste tal ultin dutis dôs lis scuadris a àn la bale buine par puartâsi a cjase i trê ponts, ma di une bande la conclusion di Zammarini, a pene jentrât tal puest di Pobega, e finìs disore de travierse e di chê altre il corne di Petrucci al ven deviât ben cul cjâf di Scamacca ma Di Gregorio al pare. E cussì la partide e finìs doi a doi e il Pordenon al reste tal cuart puest in classifiche, in spiete di zuiâ in cjase cuintri de Salernitana.

Udinese – Juventus 2-1

A jerin ducj pronts par cjantâ il peana pe vitorie anticipade dal novesim scudet di file de Juve, sei inte tribune stampe dal Stadi Friûl – dulà che a àn scugnût lassâ a cjase i gjornaliscj furlans par che a fossin avonde puescj par chei che a vevin za pront il toc che al varès esaltât la scuadre di Sarri e i siei dirigjents – che inaltrò in dut il Stât talian, denant de radio o de television. E impen a àn scugnût gloti la vitorie dal Udin.

I blancs e neris furlans a strenzin i dincj vie pal prin timp denant di chei di Turin, che a segnin juste ae fin dal prin timp, e dopo de polse a fasin ancjemò alc di plui: a tegnin bot, a jonzin la paritât e juste tal recupar a mostrin di vê imparât la lezion di Napoli e di Politano e cun Fofana a cjatin il gol de vitorie, che al vâl une mieze salvece e salacor alc altri ancjemò.

La Juve e rive a Udin cul favôr dai pronostics, ma ancje cun cualchi assence impuartantone, tacant dal scualificât Bonucci e dal infortunât Chiellini, e duncje cun cualchi novitât in difese, tant che Rugani e De Ligt. L’Udin al fronte i campions di Italie di vuê e forsit di doman, che in atac a presentin Bernardeschi, Ronaldo e Dybala, cence Lasagna. In puarte al è Musso, in difese a son Becao, Ekong, Nuytinck, inte mediane si cjatin Fofana, Di Paul, Sema, cui esternis Ter Avest e Zeegelaar, e in atac a scombatin Okaka e Nestorovski.

Ronaldo al scjalde daurman lis manecis di Musso, ancje se al è l’Udin che si svicine di plui al gol cun Sema che al crosse e cul juventin Danilo che cence volê le tocje cul cjâf e al cjape il so pâl. Si passe di un pericul autogol a di un altri: Dybala al podarès tirâ ma nol controle, Nuytinck al recupare la bale e le passe in maniere insidiose a Musso, che i ven un sgrisul e le tocje cu la ponte dal pît chel tant che al covente par mandâle in corner.

Il puartîr argjentin al fâs un biel intervent plui tart suntun tîr di Dybala, intant che di une bande Sema e di chê altre Ronaldo a tirin di fûr cence sucès.
Il prin timp al somee daûr a sierâsi cuntun ritmi plui flap e cence emozions, ma nol è cussì, stant che al rive il gol de Juve: bale in aree di Rabiot, Ekong che le bute fûr cul cjâf e De Ligt che le recupare e di fûr si invente un diestri precîs e potent in diagonâl che al impire Musso.

La seconde frazion si vierç cul Udin che al mostre che nol à nissune voie di fâ di vitime sacrificâl. Nestorovski al impegne daurman Szczesny e po al torne a tirâ in puarte cinc minûts plui tart cun sucès: cross di Sema de corsie di çampe, i difensôrs de Juve a durmin e l’atacant macedon si bute e al segne cul cjâf. La Juve e patìs il colp, ducj i zuiadôrs a patissin l’umit e lis scuadris si slungjin.

La Juve e prove a tornâ in vantaç cun Dybala che le tire ben, ma al cjate Musso tal puest just, che al bloche, intant che ancje Alex Sandro al fâs un tentatîf di lontan ma al tire fûr dal spieli de puarte.
L’Udin al ten bot e al rive ancje a rispuindi, par esempli cuntun biel cross di De Paul su punizion par Okaka, che il so tîr cul cjâf al è fûr bersai. I ospits a somein un tic smamîts, salacor distudâts, cuasi che a scugnin contentâsi de paritât.

L’Udin al tire sù baricadis, si mostre ecuilibrât e compat. Al merete ad in plen la division dai ponts e salacor ancjemò alc di plui.
Al è chel alc di plui che si concretize intant dal recupar cuant che Becao al recupare un balon fûr de sô aree, al patìs ancje fal ma Irrati al ricognòs il vantaç parcè che la bale i rive a Fofana e il francoivorian le puarte indenant, al resist a un atac tal mieç dal cjamp, al continue la sô corse, al salte De Ligt e al impire Szczesny. Doi a un: pe Juve al è efiet MerDacia Arena, pal Udin al è efiet stadi Friûl!

“La Patrie Sot dal Tei”. Ai 23 di Lui a Cormons un altri incuintri public cul “gjornâl dai furlans che no si rindin”

Ocasions interessantis di incuintri e di confront tra il mensîl La Patrie dal Friûl e la sô int: sei cun cui che al è za usât a lei il gjornâl dai furlans che no si rindin che cun chei che magari pe prime volte si svicinin al sfuei che al continue la storie de testade fondade tal 1946 di Felix Marchi e pre Josef Marchet. Si pues presentaju cusssì i diviers apontaments dal titul La Patrie Sot dal Tei, che a viodin diviersis firmis de Patrie presentâ al public il gjornâl, i siei contignûts e la sô maniere di “lei” e di “contâ” il Friûl e il Mont.

La schirie di events di cheste fate e je stade screade Joibe stade, ai 16 di Lui, a Cjarlins. L’apontament, che al à screât ancje il cartelon di events e spetacui pal Istât, #CarlinoEstate2020, al è stât une vore interessant e cuntune partecipazion vivarose.

Al è stât un incuintri segnât di une buine dose di furlanetât “sane e cussiente”, la che si à fevelât dal Friûl e dal rest dal mont, di storie, di culture e di atualitât. Tal Parc dai Marinârs dal paîs de Basse il confront di ideis al è stât inviât cuntune riflession interessante in cont di lenghe e identitât fate dal sindic di Cjarlins, Loris Bazzo, e si à disvilupât cui intervents dal diretôr de Patrie, Walter Tomada, e dal president de Clape di culture Patrie dal Friûl, che e je la editore dal gjornâl, Andrea Valcic.

Si à po discorût plui in detai di media e di storie: l’ex diretôr Andree Venier al à pontât la sô atenzion sul ûs de lenghe furlane in internet e in particolâr intes rêts sociâls, intant che Diego Navarria, ex sindic di Cjarlins e ex president de Assemblee de Comunitât linguistiche furlane, che al sta daûr di une rubriche dedicade ae storie dal Friûl e dai patriarcjis, al à tocjât il teme de cognossince e de meorie storiche. Cun di plui a àn zontât alc di interessant ancje diviers di lôr, tacant di Ivan Petrucco e Andrea Dri, sindics un di Cjasteons di Strade e chel altri di Porpêt, e dal sindicalist Roberto Muradore.

Dopo dal incuintri di Cjarlins, il program di La Patrie Sot dal Tei al va dilunc cuntune schirie di altris apontament, tacant di chel di cheste Joibe, ai 23 di Lui a Cormons, inmaneât adun cu la Enoteche in place XXIV di Mai a siet sot sere, cu la partecipazion di Andrea Valcic, di Diego Navarria e di Marco Stolfo.

La setemane che e ven, ai 31 di Lui, simpri a siet sot sere, il tierç apontament cu La Patrie Sot dal Tei al sarà a Plasencis cu la partecipazione di Walter Tomada, di Andrea Valcic, di Diego Navarria e di Roberto Muradore.

Informazions in cont dai diviers events di La Patrie Sot dal Tei si cjatin su la pagjine Facebook da La Patrie dal Friûl.

Ricuardant l’Istât dal 2019: Rodeo + Claudia Aru + Familia Caamagno + Africa Express + DLH Posse = Babêl Europe 15/2020

Vuê al è martars e a 11 a buinore su Radio Onde Furlane al torne Babêl Europe, il program cuindisinâl dedicât a musichis, lenghis, minorancis e nazions cence stât.

Ancje par cheste setemane – la trasmission e larà in onde ancje doman a une dopo di misdì e sabide a une e mieze dopo di misdì – Babêl Europe nol vignarà fat in direte, ma si tornarà a scoltâ une pontade che e jere za stade programade timp indaûr.

In cheste ocasion, in particolâr, si tornarà indaûr tal Istât dal an passât, cuntun viaç che al partìs dal Paîs Basc e che al rive fintremai a scjavaç tra Ream Unît e Afriche.

Si podarà scoltâ la musiche ruspiose e desertiche dai bascs Rodeo, la cjançon par sart siore di contignûts musicâi e testuâi di Claudia Aru, une cerce de storie dal hip hop par furlan cui DLH Posse, un toc dai galizians Familia Caamagno e une cjançon gjavade fûr dal repertori di Africa Express, un dai progjets musicâi dal ex cjantant dai Blur, Damon Albarn, che cu la colaborazion di tancj di lôr al va dilunc a miscliça sunôrs, ritimis e lenghis de Afriche e in cheste ocasion al ponte la sô atenzion su Johannesburg e al zonte ancje la lenghe galese, in graciis de partecipazion di Gruff Rhys.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, in streaming, cumò ancje cu la plataforme web Radio Garden.

Ancje cheste pontade di Babêl Europe si pues tornâ a scoltâle in podcast cun Spreaker e Spotify.

Napoli – Udinese 2-1

L’Udin al somee in stât di rompi il tabù dal San Paolo, là che dal 2013 nol rive a fâ ponts, ma ae fin al piert in graciis di un golon di Politano. La scuadre blancje e nere e zuie une partide plui che discrete, cun ordin e cun sintiment, e riscje fintremai di vinci e po e manten la paritât fin tal penultin minût di recupar, cuant che l’atacant napolitan si cjate intes cundizions di plaçâ la bale juste sul prin pâl là che chê i sbat intor e po e finìs in rêt. Une vitorie che i da sodisfazion al Napoli, che dopo dôs patis i tignive a puartâ a cjase trê ponts; une sconfite che l’Udin nol à meretât.

Cuitri dal Napoli la formazion furlane, che e scugne fâ di mancul di Jajalo e Teodorczyk, si presente cun Musso in puarte, cun Becao, De Maio e Nuytinck in difese, cun De Paul, Walace e Fofana in mediane, adun cui esternis Stryger Larsen e Zeegelaar e cun Nestorovski e Lasagna.
I parons di cjase a provin a fâ valê daurman lis lôr dotis tecnichis, il possès de bale e la capacitât di fâsi spazi ancje tal strent di Immobile, di Ruiz e di Zielinski, ma a cjatin un Udin ben coraçât, che ur lasse zuiâ la bale fin te trê cuarts dal cjamp e po ur siere ducj i trois – o cuasit – e cussì a scugnin spudâ balins par rivâ inte aree di rigôr.

La scuadre di Gotti e tire sù lis sôs bariduris e e rispuint in cuintripît cul risultât, tai prins minûts, di fermâ cun Becao une biele conclusion di Zielinski e fintremai di segnâ cun Nestorovski, ancje se il so biel tîr cul cjâf nol ven fat bon di Chiffi, che al sivile il fûr zûc.
I napolitans a provin a bati Musso cuntun pâr di conclusions di Insigne e cuntun tîr di Zielinski, però o che la bale eje fûr bersai o ben che e je tal spieli de puarte cul puartîr argjentin simpri tal puest just intal moment just.

L’Udin, passâts i pericui, si fâs viodi indenant cuntune verticalizazion di Zeegelaar, che al met tal mieç une bale basse, che e ven tocjade di sfrîs di Mario Rui e cussì e rive tai pîts di De Paul, che al controle, al tire in diagonâl e al impire Ospina: un a zero!
Il Napoli al patìs il colp, ma al prove daurman a reagjî, prime cuntun tîr a zîr di Mario Rui, che Musso al met in corner, e po cuntune azion cu la bale che tresse dute la aree di rigôr blancje e nere, e ven tornade a butâ tal mieç di Ruiz e po e ven tocjade cu la ponte dal pît di Milik, che a pene jentrât tal puest di Mertens al segne l’un a un.

La paritât recuperade ur met lis alis tai pîts ai partenopeus, che a insisitin ancje se no rivin a cumbinâ alc e ce, stant che l’Udin si difint cun grinte e cun ordin. Il prin timp si siere cussì dome cuntune jessude di Ospina su Lasagna, ispirât di De Paul, e cuntun tîr cul cjâf di Insigne che al ven blocât di Musso.

La seconde frazion si vierç cul Napoli in atac e cul Udin che si difint. La scuadre di Gattuso e met adun ancjemò cualchi buine bale di gol cun Insigne, che al tire fûr, e cun Zielinski, che il so tîr al ven tocjât di Musso, al sbat su la travierse, nol passe dal dut la rie de puarte e al ven neutralizât.
Il cuasi gol al da fuarce ai parons di cjase che a provin ancjemò cun Mario Rui e cun Ruiz, ma Musso no si scompon, i siei compagns si sierin in difese e po a rispuindin in cuintripît cun Lasagna che al impegne Ospina e cun Nestorovski che al cjate il stop di Koulibaly.

Intai ultins dîs minûts dal timp regolamentâr e je ancjemò une buine dose di emozions, prime cui tîrs fûr bersai di Milik, di Mario Rui e di Insigne e po cuntun gnûf cuintipît dal Udin che si siere cun Di Paul che si presente denant di Ospina, lu passe cuntun colp di fin indreçât in puarte che al ven tocjât in extremis cu la tibie di Koulibaly e al va a stampâsi sul pâl. Par un pêl (e par un pâl) l’Udin nol torne in vantaç.

Si svicine la fin e Chiffi al decît che si varà di zuiâ ancjemô sîs minûts. Gotti al scugne clamâ fûr Walace, che intun contrast al cole mâl e si macole la spale, e al mande dentri Ekong che al cjape il puest di Nuytinck, spostât tant che median denant de difese. Za di vincj minûts tal Napoli al è in cjamp tal puest di Callejon Politano che al fâs un bon lavôr cence bale e juste tal ultin si cjate inte posizion juste par tirâ in puarte cu la bale che e tocje il pâl e e finìs daûr di Musso. Al è il doi a un pai parons di cjase: un mieç miracul di Sant Zenâr.

Pordenone – Cosenza 1-2

Il Pordenon al à voie di vinci par scancelâ l’impat de sconfite cul Crotone e il Cosenza al à une dibisugne mostre di vinci par jonzi la salvece. Ae fin e je plui fuarte la fam di ponts de scuadre calabrese, che e vinç in graciis dal fat di vê rivât a segnâ doi goi un daûr di chel altri jueste a metât dal prin timp. I sborfs, che a scomencin cul pît just, a patissin il colp dopli dai ospits e cundut che a tegnin di plui la bale (58%) e a tirin di plui in puarte (16 tentatîfs cuintri 7) a rivin a segnâ dome un gol: masse pôc par no lassâ il sucès ai cosentins.

I sborfs a scomencin cun chê di fâ valê la lôr supremazie teritoriâl e a imbastissin cualchi azion ofensive, ancje s no crein problemis a Saracco. Il Cosenza al ten bot e al rispuint. Dopo disevot minûts di zûc Rivière al jentre in aree e al rive a vuadagnâ un rigôr, lu tire e lu segne. In curt al rive ancje il gol di Bittante che al met dentri un biel cross che i rive de fasse diestre. Il Pordenon si cjate cuntun dopli disvantaç e al reste in chê cundizion fin ae polse.

Inte seconde frazion la scuadre di balon furlane e prove in plui ocasions a cirî di impirâ Saracco e al rive a jonzi l’obietîf cuntune deviazion di Candellone cul cjâf di un tîr cross di Tremolada. I verts e neris a van di lunc a atacâ, ma il Cosenza si difint cun snait e cun continuitât, si svicine fintremai al tierç gol cun Bahlouli in cuintripît e al puarte a cjase trê ponts impuartantons che i dan ancjemò la sperance di restâ in serie B.
Il Pordenon al reste tal cuart puest, in zone playoff.

Il Pordenon al à voie di vinc al pâr scancelâ il impat di sconfite cul Crotone e il Cosenza al à un dibisugne mostris di ponts pe salvece. Ae fin e je plui fuarte la fam di ponts di scuadre calabrese, che e vinç in graciis dal fat di vê rivât a segnâ cun Bahlouli in cuintripît.

Udinese – Lazio 0-0

Nissun gol e un pont par om. Si siere cussì la partide tra Udin e Lazio, dopo che dutis dôs lis scuadris a àn provât a vinci. La Lazio e veve chê di rompi la serie negative dai ultins trê incuintris e di no pierdi ancjemò teren de part plui alte de graduatorie, intant che al Udin i coventavin ponts par tignîsi a distance di sigurece de code de classifiche, massime dopo de ocasion pierdude di domenie stade cuintri de Sampdoria. I ospits a provin a jonzi l’obietîf soredut vie pal prin timp e i blancs e neris si svicin al sucès soredut vie pe seconde frazion. La scuadre di balon furlane e mostre di no vê pôre dai aversaris e se chel tîr di De Paul che tal ultin minût di recupar al à sbatût tal esterni dal pâl a man drete di Strakosha al fos jentrât in puarte… e sarès finide cuntun gol e cun trê ponts pai blancs e neris.

Pe ocasion Gotti al mande in cjamp Musso in puarte, De Maio e Nuytinck in difese, De Paul, Jajalo, Fofana a centricjamp, cun Stryger Larsen e Sema esternis, e Okaka e Lasagna in atac. L’intindiment al è clâr: difindisi cuintri des iniziativis dai avesaris e rispuindi in cuintripît. La formazion vuidade di Simone Inzaghi e zuie daurman lis sôs cjartis e vie pai prins vincj minûts al prove a tirâ in puarte, ma cence sucès, cun Immobile, cun Luis Alberto e cun Parolo. La rispueste dal Udin e à la muse des conclusions masse altis di Lasagna e di De Paul.

Il prin timp al va dilunc cuntun ritmi no masse alt ma cun diviersis emozions: Musso si fâs viodi par trê bogns intervents suntun corner che al podeve deventâ pericolôs, suntun tîr di Lazzari e suntune zirade di Immobile e i cuintripîts de scuadre furlane a produsin un diagonâl debil di Stryger Larsen e un tîr di Becao che al ven parât in corner di Strakosha.

La prime frazion si siere cul cambi Jajalo-Walace pal Udin e la seconde e ven screade di un corner pe Lazio e po di un cross di di Luis Alberto che però nol cjate il cjâf di Acerbi pe conclusion. Cul passâ dai minûts e cres la iniziative dal Udin: prime Luis Felipe al met un blec suntun tîr di Lasagna e po KL15 in cuintripît si cjate denant di Strakosha, no si vise che al podarès zirâ la bale a Okaka che al è di bessôl e al podarès segnâ e si fâs ipnotizâ dal puartîr laziâl, che plui tart al torne protagonist suntune bombe di De Paul, tocjantle chel che al covente par butâ la bale in corner.

La supremazie blancje e nere e ven fermade par cualchi minût de Lazio che e torne a fâsi viodi des bandis di Musso cui tîrs fûr bersai di Bastos e di Milinkovic Savic. Gotti al bute dentri Teodorczyk tal puest di Okaka, Ter Avest in chel di Sema e un pôc plui indenant ancje Samir par Nuytinck par dâ ancjemò plui dinamisim ae so scuadre. Lis scuadris si slungjin, si scombat, cun agagns, apneis e imperfezions ogni trê passaçs, e a rivin il tîr di Adekanye che al ven fermât di De Paul in cuvierzidure e doi tentatîfs fats ancjemò dal argjentin dal Udin. L’ultin, juste tal ultin, al è chel che al va a finîle intor dal pâl. Magari cussì no.