Inter – Udinese 5-2

Si distudin lis lûs di San Siro e si distude ancjemò prin la lum dal Udin, che a Milan cuintri dal Inter al zuie une partide smamide. La ultime di campionât e je une delusion pal zûc e pal risultât: tancj goi cjapâts e nuie diesim puest in classifiche. Anzit, ae fin te graduatorie la scuadre di balon furlane e sbrisse al puest diesim tierç.

E sì che la partide no tache nancje mâl. Lis gnovis che a rivin di Marassi, là che il Napoli al à vinçût cu la Sampdoria, a sono une motivazion in plui pai blancs e neris par sierâ las stagjon in bielece e tentâ di jonzi chel plaçament in graduatorie che al somee ancjemò a puartade di man, cuntune vitorie cul Inter. Di chê altre bande però e je une scuadre che e à un grum di robis (ancjemò di plui de nestre…) di fâsi perdonâ dai siei tifôs e no pues permetisi di fâ brutis figuris. Cussì, denant di un Udin ordenât ma cui zîrs dal motôr bassuts, l’Inter al prove daurman a sburtâ in verticâl e dopo cinc minûts al rive il gol di Eder: acelerazion di Santon e cross pal atacant di divignince brasiliane, che al bat Scuffet.

La reazion dal Udin no si fâs spietâ e si viôt tes conclusions di Angella e di Zapata, che però a son fûr bersai. L’Inter al zonte une ponte di cinisim e salcor ancje di tristerie e al torne a segnâ. Eder al lasse par tiere Heurteaux – ma l’arbitri Di Paolo dulà isal e dulà cjalial? – e al servìs Perišić, che le bute dentri. Delneri si inrabie cul diretôr di gare e al prove a mudâ la muse tatiche de scuadre, cun di plui che al scugne clamâ fûr propit Heurteaux, intant che l’Inter al sburte ancjemò cun Perišić e po cun Brozovič, che al segne il tierç.

Sierât il prin timp cuntun tentatîf di Matos e une altre conclusion fûr bersai di Perišić, la seconde frazion si vierç cuntune gnove par bande: Nagatomo par Medel e Badu al puest di Jankto. Dentri di mancul di dîs minûts al rive il poker dai interiscj, ancjemò cun Eder su assist di Perišić, che i van daûr une iniziative pôc precise di Zapata e un pâl di Palacio.

Il ritmi al cale, l’Inter si contente e si rive tal ultin cuart di ore, cuant che finalmentri ancje l’Udin al rive a segnâ. Il gol de bandiere lu segne Balić, par sigûr il miôr dai blancs e neris, che al vuadagne un balon parât fûr de difese interiste e lu tire in ouarte cun fuarce e cun precision. Il gol furlan al torne a meti in vore la gjostre des segnaduris. A rivin cussì l’autogol involontari di Angella, che i sbat intor e po e va in puarte un cross di Kondogbia par Nagatomo, e il cinc a doi firmât di Zapata.

La stagjon e finìs achì. E podeve lâ miôr, ma sul imprin dal campionât al someave che e podès jessi piês ancjemò. Par chel, in cualchi maniere, o podaressin ancje stâ contents.

L’impuartant al è che pal an che al ven lis robis a ledin miôr, a tacâ de conferme di Delneri in bancjine e de disponibilitât di une scuadre competitive in ducji i reparts.

Udinese – Sampdoria 1-1

E veve di jessi la partide fondamentâl pe concuiste dal diesim puest in classifiche, ma e podeve jessi ancje dome une gare balneâr cence snait e cence emozions. Pal diesim puest e je lade strucje ma lis emozions no son mancjadis, no tant pal zûc ma pe barufe che e je saltade fûr ator de metât dal secont timp, dopo di un rigôr gjenerôs dât ae Sampdoria, de sô realizazion de bande di Muriel e de provocazion fate dal ex blanc e neri che al à fat inrabiâ plui di cualchidun. Cussì e je lade a finî cuntun gol par om e cun trê espulsions.

Pe ultime de stagjon tal Stadi Friûl, Delneri al presente Scuffet in puarte sin dal principi, Angella, Danilo, Felipe e Gabriel Silva in difese, Balič, Halfredsson e Jankto te linie mediane e Zapata, Thereau e De Paul in atac. La scuadre di balon furlane e partìs cul pît just, par merit so e ancje par vie che la Sampdoria e somee avonde clopadice daûr e smamide indenant.

Cussì, dopo cinc minûts al rive il gol di Thereau: iniziative di Zapata su la corsie di man drete, diagonâl perfet a pro dal zuiadôr di Privas che al segne cence fastidis. L’incuintri al somee lâ di rive jùù per formazion di Delneri. Zapata al fâs ce che al vûl in atac e Balič e Felipe a provin a cjatâ la strade dal gol, ma il risultât nol cambie, e chest al vâl ancje pe uniche ocasion dai ospits, un tîr di Schick, che al ven parât cun mistîr di Scuffet.

Il secont timp si vierç sù par jù cun chê stesse situazion. La prime emozion e je la decision di Pinzani di butâ fûr De Paul par un so intervent decîs su Torreira che probabilmentri par chel al jere avonde il cartelin zâl.

Ancje se cuntun om in plui, la Sampdoria no combine alc e ce, intant che l’Udin al manten il control de partide. Il svolt al rive cuant che Pinzani al sivile, in maniere discutibile, par un intervent di Gabriel Silva su Muriel te aree di rigôr. Dai undis metris l’atacant di Santo Tomàs al segne e po al va a provocâ public e aversaris. Danilo al cole te vuate e lu cjape pal cuel e cussì l’arbitri ju pare fûr ducj doi.

In dîs cuintri nûf, la Sampdoria no cambie la sostance de sô partide, l’Udin al ten bot e ae fin e reste une paritât che pai blancs e neris e vûl dî che il diesim puest si slontane e che al fâs compagn, almancul pal moment, ancje il diesim prin, cul Sassuolo che al straviç cul Cagliari e al scjavace la scuadre furlane.

Crotone – Udinese 1-0

L’Udin a Crotone nol è la fantasime viodude a Bologne e al somee di plui a chê scuadre di sest che e veve fat un a un cu la Atalanta, però i parons di cjase, che a scombatin fint tal ultin par meti dongje ducj i ponts pussibii par no tornâ in serie B, a àn une marcje in plui e a vincin la partide.

La scuadre di balon furlane si presente li dal stadi Scida cun cualchi novitât: in puarte al tache tant che titolâr Scuffet, in atac dongje di Zapata e De Paul si torne a viodi Thereau, te linie mediane dongje di Jankto a son Kums e Badu, intant che dome la difese e reste chê di domenie passade, cun Adnan e Widmer laterâi e Danilo e Felipe tal mieç.

La scuadre di mister Nicola e rispuint cu la cubie di atac Falcinelli-Trotta, cun Cordaz in puarte, cu la difese a cuatri formade di Ceccherini, Ferrari, Rosi e Sampirisi e cu la linie mediane fate dai esternis Rohden e Nalini e dai centrâi Barberis e Crisetig, cul risultât che a son doi i zuiadôrs che a vegnin dal Friûl: il puartîr blanc e neri, che al è di Remanzâs, e il centrocampist crotonês nassût a Cividât.

I blancs e neris a partissin avonde ben: dopo trê minûts une iniziative di Widmer e ven concludude fûr bersai di Badu e un pôc plui indenant al è un tentatîf di Adnan. Il Crotone al rispuint, sburtât dal so public e ispirât des gnovis che a rivin di chei altris cjamps là che si zuin Cagliari-Empoli e Palermo-Genoa, e al cjate il gol con Rohden, che al ricêf di Trotta e al bat Scuffet.

L’Udin al prove a reagjî, cuntun biel tîr di De Paul, ma Cordaz al è tal puest just tal moment just e al pare. Al fâs compagn Scuffet, prime de polse, suntun pâr di conclusions di Falcinelli e il prin timp si siere sul un a zero.

La scuadre di Delneri e torne dai camarins dal stadi cun plui determinazion e cun plui snait. I efiets a son une pression ofensive plui fuarte, une conclusion di Badu (parade di Cordaz) e un dopli colp cul cjâf di Felipe: il prin lu pare il puartîr, il secont al cjape il pâl. La paritât e somee pardabon a puartade di man e il tecnic di Aquilee al prove a dâi energjie gnove ae sô scuadre cul clamâ fûr Kums e Thereau e cul meti dentri Balič e Perica.

Ancje il Crotone al prove a viodi di fâ alc di plui. La pôre di no rivâ a manitignî il vantaç si stramude te voie di incressi il botin. I protagoniscj de fase centrâl dal secont timp a son Trotta, che cul cjâf al indrece ben un cross di Nalini e al tocje la part alte de travierse, Rosi, che al impegne Scuffet cuntune altre conclusion in acrobazie, il puartîr furlan che al interven benon, e Falcinelli, che al segne ma par di bant, stant che al è in fûr zûc e Fabbri al è atent a ce che al sucêt.

Al rive cussì l’ultin cuart di ore de partide, che si slungje di cinc minûts cul recupar, e al è segnât des sostituzions e di un lâ al mancul des fuarcis e de intensitât dal zûc.
Il Crotone e i siei tifôs a puedin lâ dilunc a cjantâ A mano a mano e Ma il cielo è sempre più blu e vê la sperance di gafâ l’ultin puest de classifiche par sghindâ la retrocession.
Pal Udin e je la sodisfazion di vê viodût Scuffet in cjamp dal prin minût e alc di bon mostrât di cualchidun dai siei zuiadôrs. Però, se si à voie pardabon di rivâ al diesim puest, si à di sgarfâ di plui e cun plui continuitât.

Udinese – Atalanta 1-1

Dopo i cuatri patafs cjapâts a Bologne al Udin i coventave une prove di caratar. Par fortune, tornâts tal Stadi Friûl, i blancs e neris a àn fat viodi di jessi ancjemò vîfs e vivarôs e a àn zuiât une partide discrete, che e à mostrât fintremai alc di interessant pal avignî.

Delneri, cuintri di une Atalanta salde e ecuilibrade, al met adun une formazion che e mostre alc di gnûf: in atac Perica al zuie dal prin minût dongje di Zapata, daûr e in bande dai doi De Paul al à la pussibilitât di movisi, di scombatî e di inventâ, e ancje te linie mediane si viôt pe prime volte il zovin Balič, dongje di Hallfredsson e di Jankto, intant che in difese te posizion che par solit e je dal infortunât Samir i ven dade a Adnan cul dopli compit di cuvierzi e di puartâsi indenant.
Di chê altre bande, Gasperini al rispuint cuntun 3-5-2, là che, ancje par vie de infermerie plene, dopo tant timp, al torne a meti titolâr Raimondi, cu la garanzie de cubie di atac formade di Gomez e Petagna.

La partide si invie ben, cun ecuilibri e cun cualchi emozion. Widmer al scuen limitâ il so contribût ae manovre ofensive par vie che i tocje tignî cont di Gomez, ma i blancs e neris a rivin compagn a fâ alc di bon des bandis di Berisha, che al rispuint ben suntun tîr di Zapata, e al fâs compagn Karnezis su Gomez e su Petagna. Di Bello no si vise di un brut fal di Raimondi su Zapata e cualchi minût prime de polse al rive il gol. Lu segne l’unic zuiadôr furlan in cjamp, Bryan Cristante di Sant Zuan di Cjasarse, che al tocje cul cjâf un corner tirât di Gomez e puarte in vantaç la Atalanta.

Il secont timp al presente daurman un Udin cun chê di tornâ a meti a scuare il risultât. Tal zîr di vot minûts al rive il gol di Stipe Perica, che i rive un biel assist di De Paul, al tire in puarte, Berisha al rispuint, al torne a tirâ e al segne. Gasperini al cambie muse ae sô scuadre che un pôc par cunvinzion e un pôc par sante scugne si siere indaûr. L’Udin al prove ancjemò a fâ alc di plui, Delneri al cambie l’atac e al bute dentri Thereau e Ewandro e ancjemò prime al clame fûr Balič par Kums, ma il risultât nol cambie. E insom ur va ben cussì a ducj cuancj: al Udin che al riscate il disonôr dal Dall’Ara e ae Atalanta che e va dilunc te sô strade viers de Europa League.

La prossime dal Udin e sarà a Crotone. Domenie ai 14 di Mai a coventaran une vore di snait e di atenzion.

Bologna – Udinese 4-0

L’Udin si dismentee di zuiâ e al cjape cuatri patafs dal Bologna. I blancs e neris a son flaps e smamîts e cussì di une bande si sfante la ocasion par cjapâ ponts e svicinâsi ae Sampdorie a metât de classfiche e di chê altre si torne a viodi une scuadre furlane brute e scjarse che par fortune al jere un pôc di timp che no si le viodeve in chestis cundizions.

I parons di cjase a àn dute une altre grinte e dut un altris snait. A àn voie di zuiâ e sante scugne di fâ ponts e a vierzin daurman lis segnaduris cun Destro e a sbusin la puarte di Karnezis ancje cun Krejci, ma Celi si vise par ordin che al è in fûr zûc.

I blancs e neris a son clopadiçs in difese, cemût che al sarà ancjemò plui evident tal secont timp, no rivin a masanâ zûc tal mieç e no àn nissune pression ofensive. La uniche ocasion dal prin timp e je une conclusion di Jankto, fermade su la linie de bande di Maietta, intant che il Bologna al neutralize il dinamisim solitari di Widmer, no à nissun fastidi daûr e al rive a segnâ il secont gol prime de polse, cuntun tîr di Taider, che al profite di une altre brute buse difensive.

Il piês pal Udin al rive te seconde frazion. I parons di cjase a zuin e a mantegnin il comant e i blancs e neris no dan segns di vite e a van di lunc a fâsi maltratâ, stant che nancje la jentrade di Perica e Matos e cambie la situazion. Al rive cussì il tierç gol, ancjemò cun Destro che al à timp di tirâ e tornâ a tirâ dopo di une prime parade di Karnezis.

L’Udin nol rive mai pardabon des bandis di Mirante e in chel istès al lasse simpri plui busis indaûr, massime te zone di Danilo, che al à ancje la sfighe di tocjâ un tîr di Verdi a dam di Karnezis.

Pal Bologna al è poker, pal Udin a son cuatri patafons, che a riscjin fintremai di deventâ cinc.

Udinese – Cagliari 2-1

Dopo i trê patafs cjapâts a Napoli, l’Udin al torne a zuiâ in cjase e al torne a vinci. Il sucès dai blancs e neris al rive ae fin di une partide, che vie pal prin timp e je stade avonde ecuilibrade e smamide e che te seconde frazion e à dât il miôr si se.

Chel che cualchidun lu à clamade «derby internazionalitari» (tra Friûl e Sardegne) al è finût cemût che al è finût soredut in graciis de sielte di Delneri di mandâ in cjamp Perica al puest di Thereau cualchi minût prime de metât dal secont timp e l’atacant cravuat al è decisîf par vierzi lis segnaduris.

Cuintri dal Cagliari la scuadre di balon furlane si presente cu la classiche struture cun cuatri zuiadôrs in difese, trê tal mieç, cun Badu, Halfredsson e Jankto, e trê in atac, cun Thereau e De Paul dongje di Zapata. I aversaris a ocupin il cjamp sù par jù in chê stesse maniere: cuatri indaûr, trê te linie mezane e Borriello ponte principâl cun dongje Joao Paulo e cun Sau che al fâs il trecuartist.

L’Udin al partìs cul pît just e dopo sîs minûts al impegne Rafael in dôs ocasions, cun Zapata e cun De Paul. Cul passâ dal timp il ritmi al cale e nol sucêt alc e ce, a part un rigôr a pro dal Udin, juste al bati de prime mieze ore di zûc: al tire Thereau e Rafael al pare e il risultât al reste inclaudât sul zero a zero fintremai al interval.

Il rigôr mancjât al see lis gjambis a Thereau, che ancje tal secont timp al mostre di no jessi masse a plomp, intant che ancje Zapata al è mancul dinamic di prime de polse. Propit par chel, compagn che in altris ocasions, Delneri al clame fûr l’atacant di Privas e al mande dentri Perica, che – bot e sclop – al cjate la ocasion buine par fâ un golon e le disfrute inte maniere miôr.

Il Cagliari al patìs il colp cjapât e trê minûts plui tart al scugne viodi une altre volte la bale dentri de sô puarte, cun Angella che al profite de confusion te aree dai ospits dopo di une corner e al segne. La scuadre sarde e somee pardabon metude aes cuardis, stant che Perica al è ancjemò pericolôs in dôs ocasions e in particolâr al cjape un pâl.

Il mancjât trê a zero al fâs sunâ la svearine pe scuadre di Rastelli, che tai ultins minûts prime e ridûs lis distancis dal Udin cuntun gol di Borriello, che al profite di une indecision di Karnezis, e po si svicine ae paritât cuntun tîr di Salamon, che però al ven fermât su la linie de puarte de bande di Danilo.

E cussì l’Udin al siere cun trê ponts in plui in classifiche e i torne ae scuadre sarde il risultât de partide zuiade a Casteddu/Cagliari ai 28 di Novembar stâts.

 

Napoli – Udinese 3-0

udin_neri

Cu la classifiche de serie A sot dai voi un risultât positîf dal Udin a Napoli al sarès stât pardabon une biele sorprese tal ûf di Pasche. Magari cussì no, l’incuintri di nossere tal stadi San Paolo al è finût inte maniere che si podeve proviodi cun plui sigurece, cuntun sucès dai parons di cjase.

L’Udin a Napoli al mostre une muse avonde ecuilibrade, cun cualchi novitât te formazion rispiet ae partide passade, a tacâ de difese, cun Heurteaux al puest di Felipe e Alì Adnan al puest di Samir, e de linie mediane, cu la tornade di Jankto tra i titolârs. In atac Delneri al conferme lis trê pontis Zapata-Thereau-De Paul, in stât di stamudâsi intune ponte sole – il colombian – cun chei altris doi in posizion di mieze ponte, juste cun chê di mostrâ di no vê pôre dal Napoli e in chel istès soredut di cirî di imberdeâ i aversaris e di neutralizâ il lôr potenziâl ofensîf.

La strategjie dal alenadôr furlan e funzione vie pal prin timp. Il Napoli al fâs zirâ di plui la bale, ma la sô e je une manovre sterpe e par chel cun pocjis conclusions. La pression de scuadre di Sarri dilunc des corsiis laterâls no prodûs alc e ce: dome tancj corners, cualchi numar di Hamsik e un tîr di Mertens che Karnezis al pare cence masse fastidis. L’Udin si difint cun ecuilibri e cun sintiment e al ten bot fintremai ae fin de prime frazion de partide.

Tal secont timp la musiche e cambie a pro dai parons di cjase, stant che dopo trê minûts Jorginho al pronte un biel assist par Mertens, che al cjate spazi tra Herteaux e Danilo in dificoltât e al segne. L’Udin al rispuint daurman, cun Delneri che al clame fûr De Paul e al met dentri Perica, cun chê di incressi la pression ofensive. La partide e vuadagne in vivarosetât e i blancs e neris a van une vorone dongje de paritât cuntune conclusion cul cjâf di Zapata, su cross di Alì Aznan, che e finìs suntun dai doi pâi de puarte di Reina.

La rispueste dal Napoli e je imediade: Allan i parte vie la bale a Alì Adnan – in maniere pôc regolâr, ma Massa no si inacuarç – e al cjate la strade dal gol che al garantìs il sucès pal Napoli, che di chel moment indenant al gjestìs il vantaç, cence vê problemis daûr e cun chê di provâ a cjatâ il tierç gol, cuntun colp di tac di Insigne, cun Karnezis che al pare, e cuntun tîr di Callejon, che impen, cualchi minût prime dal ultin cuart di ore di zûc, al rive a metile dentri.

Il Napoli al gjolt e si svicine ae Rome, cun chê di rivâ a puartâi vie il secont puest daûr de Juve. L’Udin al reste là che al è, te posizion numar undis de graudatorie e a cuote cuarante pont: la prossime partide e sarà in cjase cuintri dal Cagliari, che al à vinçût cul Chievo e cussì al à trentevot ponts.

Udinese – Genoa 3-0

L’Udin al zuie avonde ben e al vinç cence fastidis cuintri di un Genoa in crisi di zûc e di risultâts che al ten bot dome par vincj minûts e dopo si sfante sot dai colps dai blancs e neris.
Delneri al manten sù par jù la scuadre che e veve fat ben cuintri dal Turin, ancje se al fâs tornâ tra i pâi Karnezis al puest di Scuffet, al zonte ae seconde linie Evangelista al puest dal scualificât Jankto e pal atac al met Thereau dongje di Zapata e De Paul.

La scuadre di balon furlane si presente ordenade e ecuilibrade, no si scompon denant dai tentatîfs di acelerazion, avonde smamîts, di Laxalt e Simeone e al rispuint cuntun biel tîr di De Paul, che al concretize inte maniere miôr un passaç di Evangelista e al segne il vantaç.

I ospits a colin daurman in zenoglon: lents, proviodibii e sconfusionâts. Il control dal cjamp e des operazion al è ad in plen tai pîts dai blancs e neris che a cjatin avonde in curt la strade pal secont gol: corner di Hallfredsson, tîr di Angella, rispueste di Muñoz e conclusion decisive di Zapata che al inclaude Rubinho.

Il predomini furlan, cun Widmer e Samir su lis corsiis laterâls, Badu e Halfredsson tal mieç e De Paul e Zapata in atac, al va dilunc ancje tal secont timp, che si vierç cul tierç gol blanc e neri: corner di De Paul diret in puarte e pastroç di Rubinho.

Il Genoa al è une sorte di fantasime, che no si dismôf nancje cu la jentrade in cjamp di Palladino, Pandev e po ancje Veloso. Propit Palladino al firme la uniche conclusion dai grifons – un tîr fûr bersai che al ven tignût di voli di Karnezis tai ultis vincj minûts di zûc – intant che l’Udin al gjestìs il vantaç cun calme e cun sodisfazion fintremai aes trê siviladis e cussì al puarte a cjase i trê ponts.

Torino – Udinese 2-2

Moments di gjonde e di delusion, colps di sfighe o di fortune, snait blanc e neri e cûr ‘granata’. Cuntune prime mieze ore avonde flape e chê altre ore plene di emozions, la partide tra Toro e Udin e finìs doi a doi: une paritât che in cierts moments ur va strente a dutis dôs lis scuadris e che però, propit par chel, ae fin e je chê juste.

L’Udin a Turin si presente cun cualchi novitât: al è ancjemò Scuffet in puarte cun Angella in difese adun cun Danilo, Widmer e Samir, cun Kums, Badu e Jankto te seconde linie e cun Zapata, De Paul e Perica in atac. Il Toro al rispuint in maniere avonde speculâr: Hart tra i pâi, difese a cuatri cun Zappacosta, Rossettini, Moretti e Molinaro, mediane cun Acquah, Lukic e Baselli e prime linie cun Iago Falque, Belotti e Ljajic.

I blancs e neris si mostrin ecuilibrâts e in stât di jessi pericolôs. Dopo cinc minûts di zûc si met in mostre Perica, che al vuadagne une punizion, tirade di De Paul su la bariere. Cualchi minût plui indenant e rive di une bale ferme ancje la prime ocasion dal Turin: cross par Rossettini, che le tocje cul cjâf ma le mande fûr bersai. Altris tentatîfs ju fasin Perica e Bellotti, ma il risultât al reste chel.

Il timp al passe e Toro e Udin a tegnin bot un cun chel altri: Zapata, Perica e De Paul si movin ben in orizontâl e in verticâl e a judin ancje indaûr, intant che di chê altre bande i parons di cjase a sburtin cul dinamisim di Belotti e cu la energjie gnove zontade de jentrade di Iturbe. Si zuie, si va al atac e si difindisi, di une bande e di chê altre, però la ande de partide no somee jessi alc e ce, stant che dopo i prins tentatîfs a mancjin dal dut lis conclusions in puarte.

Dome tai ultins dîs minûts al rive il svolt. A son lis azions in cuintripît dal Udin che a produsin une conclusion cul cjâf di Zapata, parade di Hart, un tîf fûr bersai di Jankto e une combinazion Perica-Zapata cul colombian che nol cjate la puarte. E a son lis conclusions dal Toro juste prime de polse: doi corners di Zappacosta e tîrs di Belotti e Rossettini, che a cjapin il prin la travierse e il secont il pâl, cun Scuffet che al met un blec suntun altri tentatîf di Moretti.

Il puartîr furlan si fâs cjatâ tal puest just tal moment just ancje sul imprin dal secont timp, cuntun biel intervent suntun tîr di Acquah. Al è il segnâl che l’Udin al pues provâ a cirî daurman il gol e cussì tal zîr di pôcs minûts Jankto al profite di un erôr di Rossettini, al frache sul aceleratôr e al fâs partî une bombe che e cjate spazi te puarte di Hart.

Mihajlovic al decît di rinfuartî daurman la trazion ofensive de sô scuadre. A jentrin Boyé par Lukic e plui indenant ancje Maxi Lopez al puest Baselli, ma il Toro cun cuatri pontis nol rive a ribaltâ la situazion. Delneri al rinfuartìs la difese, cun Heurteaux al puest di De Paul, e l’Udin si siere indaûr e al torne al atac cun chê di disfrutâ i sbilançaments dai aversaris. Al è ce che al sucêt cuant che Badu i robe la bale a Boyé e al mande lunc in profonditât Zapata, il colombian al tire in diagonâl, la difese dal Toro e je fûr scuare e Perica al rive di bessôl denant de puarte e al tocje la bale che e finìs dilà de rie.

Il cûr ‘granata’ al ven fûr ad in plen in cheste ultime part de partide. Doi minûts dopo dal gol dal atacant cravuat al rive il gol di Moretti, che par segnâ si zove di une deviazion di Samir suntun tîr di Iturbe, tal ultin cuart di ore prime al segne ae sô maniere ‘il Gjal’ Belotti e po si svicine al ribalton complet Ljiaic, che però al cjate la puarte sierade di Scuffet, ancjemò protagonist positîf te puarte furlane, dopo vê fermât ancje un tîr di Boyé.

Udinese – Palermo 4-1

L’Udin al vinç e al convinç. Cul Palermo la scuadre di balon furlane e ripet la partide fate in Sicilie ai 28 di Otubar stâts, cun caratar, cun snait e cun cualitât. Il Palermo al è determinât e al à chê di cirî di fâ ponts par no pierdi dal dut lis sperancis di salevece, ma al rive a fâ alc dome vie pal prin timp e dopo al scuen colâ in zenoglon denant dai blancs e neris, che a sierin ancje in vantaç numeric, dopo de espulsion di Diamanti.

La partence e je buine di dutis dôs lis bandis. I ospits a provin a sburtâ, ma no àn sucès, intant che l’Udin al rispuint su lis corsiis laterâls e si svicine daurman ae puarte di Posavec cuntun biel tîr di Samir, cuntune iniziative di Zapata e cuntune conclusion di Jankto. Cundut achel, il prin gol lu fâs il Palermo dopo nancje un cuart di ore di zûc: assist di Aleesami par Sallai e tîr che al passe Scuffet.

L’Udin no si scompòn e al rispuint, ancje se il Palermo al ten bot, pe plui part dal prin timp. Di une bande Zapata nol profite di dôs bielis ocasions e di chê altre al è Morganella che al prove a impegnâ Scuffet e cussì si svicine l’interval cui rose e neris che a tachin a pensâ di rivâ a tignî il vantaç.
Lis robis, però, a van intune altre maniere: Thereau, che fin a chel moment nol jere stât masse in partide, al tire une bombe di passe vincjecinc metris e al segne. Nuie ce fâ par Posavec e pe sô scuadre, che tal secont timp e patirà la predominance blancje e nere.

La seconde frazion si zuie dute intune direzion: chê dal Udin in atac. Al rive cusssì il gol di Zapata – il tierç consecutîf – che al profite des conseguencis di un rimpal tra Perica e Gazzi, su corner di De Paul, e al segne. Il vantaç parziâl al cres in curt cuntune dople conclusion di De Paul: la prime e ven tocjade di Posavec, che però i torne la bale al argjentin; la seconde e passe il puartîr e e finìs tal sac e al è 3 a 1.

Il Palermo al prove a rompi l’assedi blanc e neri. Lu fâs cuntune punizion di Diamanti, par sigûr il miôr dai ospits, che però nol rive a jonzi l’obietîf e impen al minût 74 al ven butât fûr di Maresca par un fal su De Paul.

In undis cuintri dîs, l’Udin al pues permetisi di aumentâ ancjemò il so botin, cuntun gol di Jankto, dopo che Posavec al veve fermât un biel colp cul cjâf di Heurteaux. Cuatri a un e fieste furlane, no dome pal balon ma ancje pe vitorie de GSA Udin cuintri de Alma Triest tal campionât di serie A2 di bale tal zei.