Udinese – Fiorentina 0-0

Une partide a puartis sieradis, in ducj i sens: cence public tal stadi, daûr des disposizions che a son in vore in chescj dîs particolârs, e cence goi ni di une bande e nancj di chê altre. Cuintri de Fiorentina l’Udin al zuie ancjemò une volte une partide discrete ma cence rivâ a butâle dentri, cundut che al costruìs diviersis buinis ocasions. Ancje i ospits a mostrin di vê chel stes probleme: a costruissin alc di mancul de scuadre furlane, ma a cjapin un pâl prime de fin dal prin timp e a varessin chê di lamentâsi cuintri de sfighe. La conclusion de partide – nuie goi e un pont par om – e je sostanzialmentri juste.

Intal cidin dal Stadi Friûl lis dôs scuadris si presentin dutis dôs cul 3-5-2. L’Udin e à Musso tra i pâi, Becao, Nuytinck e Ekong in difese, Jajalo, Mandragora e Di Paul in mediane cun Sema e Larsen su lis corsiis esternis e Okaka e Nestorovski, preferît di Gotti a Lasagna, in atac. La Fiorentina si fonde su Badelj, Duncan e Castrovilli inte fase di costruzion, Dragowski al è in puarte e Vlahovic e Chiesa a son i ponts di riferiment dal atac.

I blancs e neris a scomencin avonde ben, cuvierts indaûr e cuntun ciert dinamisim de metât dal cjamp indenant. La Fiorentina e fâs sù par jù compagn cul risultât che inte zone mediane al è trafic e lis dôs scuadris no cjatin spazis par fâsi mâl une cun chê altre. La prime ocasion de Fiorentina al è un tîr di Lirola che al finìs tal esterni de rêt. L’Udin al rispuint cuntun tîr fûr bersai di Mandragora, intant che i ospits a provin cuntune punizion flapute di Badelj che e ven fermade cence padins di Musso. Ator de miezore la partide si scjalde cuntun tîr alt di Ekong, cuntune conclusion cul cjâf di Okaka che e va fûr di pôc e cuntun altri tentatîf mancul significatîf dal atacant blanc e neri. La Fiorentina e rispuint cun Duncan, che però nol cree problemis a Musso, cun Milenkovic che al cjape il pâl e cun Chiesa che al tire parsore de travierse.

Il secont timp si vierç cuntun erôr di Badelj, che De Paul al prove a disfrutâ cence sucès, e cuntune bombe di Sema, parade in doi timps di Dragownski. Pôc timp plui indenant Okaka al aprofite di une sbrissade di Pezzella e al va vie fint insom par metile tal mieç par Mandragora, che al ven murât al moment dal tîr svicinât. I doi colps dai blancs e neris a fasin sunâ la svearine pe Fiorentina, che si fâs vive des bandis di Musso cun Vlahovic: il so tîr al è sec ma il puartîr dal Udin nol à nissun fastidi a blocâ la bale.

I blancs e neris a tornin al atac cun De Paul, ma il so diestri al va fûr, intant che di chê altre bande Vlahovic al fâs une altre telefonade par Musso che al pare ancjemò cence problemis. De Paul al è ancjemò protagonist, passe un cuart di ore dopo de polse, ma ancjemò une volte la sô conclusion e je fûr bersai. Gotti al cambie Nestorovski cun Lasagna e plui tart al met dentri Fofana tal puest di Jajalo.

Intal ultin cuart di ore KL 15 si met in mostre cuntun biel tîr che al impegne Dragowski, Zeegelaar al cjape il puest di Sema e Mandragora al pronte une buine bale par Becao che al tire cul cjâf masse adalt. Di chê altre bande dal cjamp, al fâs compagn ancje Duncan, intant che ae fin, za tal recupar, si viôt Chiesa, che al tire intal spieli, ma al cjate Musso tal puest just tal moment just, che al conferme la pate: un risultât che al oblee dutis dôs lis scuadris – e l’Udin in particolâr – a stâ in vuaite, parcè che, daûr di cemût che e je lade inta chei altri cjamps, la distance de code de classifiche si à scurtade.

Bologna – Udinese 1-1

L’Udin al zuie ancjemò une altre partide discrete e al passe fintrmai in vantaç, al manten il control de gare pe plui part dal timp, ma ae fin al scuen contentâsi dome di un pont. Cuintri dal Bologna i blancs e neris a mostrin ancjemò une volte une biele muse, tra gjeometriis e azions in cuintripît, a imbastissin diviersis ocasions par segnâ, a fasin ancje un gol, ma nol è avonde, stant che i parons di cjase, cu la poie dal lôr public, a fasin la lôr part e a rivin a segnâ tai minûts di recupar.

Pal incuintri dal Dall’Ara, mister Gotti al mande in cjamp Musso in puarte, Becao, Ekong e Nuytinck in difese, Mandragora,Fofana e DiPaul tal meç, cu la poie di Sema e di Larsen su lis corsiis esternis,e Lasagna e Okaka in atac. Il Bologna al sconence cun morbin e la prime conclusion e je sô: un tîr alt di Palacio dopo cinc minûts. La scuadre di balon furlane e cîr di sierâ la strade ai aversaris e di rispuindi in cuintripît e cul passâ dal timp e rive a realizâ il so intindiment. Prime si vuadagne une punizion cul Lasagna, ancje se la esecuzion di Madragora si distude intor de bariere, e po a rivin un pâr di tîrs di Lasagna e di De Paul che no crein problemis a Da Costa.

Ator de prime mieze ore di zûc la partide cres di intensitât cun Musso che al à il so bon ce fâ denant di une conclusion di Orsolini, intant che un tîr di Skov Olsen al va di pôc fûr. La rispueste dal Udin e je il gol di Okaka, che al coreç in puarte cul cjâf une punizion di De Paul. Prime de polse Gotti al mande dentri Zegelaar al puest di Sema, che al patìs un signestri muscolâr, e il Bologna al prove a dreçâ la gare cun Mbaie e cun Barrow, che però no cjatin il spieli de puarte.

Il secont timp si vierç cuntune gnove ocasion par Orsolini, che il so tîr al ven parât vie di Musso, e cun doi tentatîfs fûr bersai di Barrow e di Palacio. I minûts a passin: l’Udin al prove e staronzâ il risultât, ma Okaka e Lasagna no àn ni smicje e ni fortune; il Bologna al à chê di jonzi la paritât e al prove cun Orsolini e cun Palacio.

Tes ultimis fasis de partide i parons di cjase a frachin il pedâl dal aceleradôr e cussì, a fuarce di dâi, a rivin a impatâ cun Palacio che le met dentri di doi pas, sierant inte maniere miôr une azion avode caotiche, inviade di un cross di Tomyatsu. Sodisfazion pe scuadre i Mihajlovic, displasê pe formazion furlane e pai siei tifôs.

Udinese – Verona 0-0

Nuie goi e un pont par om. L’Udin al va dilunc a segnâ pôc o nuie, ma almancul nol piert. Cuintri dal Verona, che al rive in Friûl dopo vê vinçût cuintri de Juve e cuntune buine rie di risultâts positîfs, la scuadre blancje e nere e zuie une altre partide discrete: e ten bot denant di un aversari che al è inte cundizion miôr e al masane azions cuntune cierte continuitât. La formazion di Gotti e costruìs zûc e azions di gol, ma i mancje un tic di precision e une buine dose di fortune. Cun di plui, compagn che cul Brescia, e riscje ancje di pierdi. Ae fin e cjape un pont, che inte strade viers de salvece al è avonde bon.

Pe partide dal misdì Gotti al mande in cjamp Musso tra i pâi e Becao, Ekong e Nuytinck in difese. Cun di plui, inte mediane il mister al sielç di scomençâ cun Mandragora e Fofana tal mieç cun Larsen e Sema su lis corsiis esternis e cun Di Paul a sapontâ la cubie di atac Lasagna-Okaka.

La prime ocasion e je dal Verona cun Borini che al siere une combinazion cun Verre obleant Musso a butâle in corner. La prime rispueste dal Udin e je une punizion di Mandragora che e va a finîle alt di pôc.
La formazion furlane e cîr di fâ valê il so jessi parone di cjase e e mande al tîr Fofana, Mandragora, De Paul e Fofana ma cence sucès. I ospits i lassin spazi di manovre però cuant che a rispuindin in cuintripît i dan il so bon ce fâ a Musso, cemût che al sucêt cuntune combinazion tra Lazovic e Borini.

Il puartîr dal Udin al è ancjemò protagonist inte ultime part dal prin timp, cuant che al intervent prime suntune conclusion cul cjâf di Kumbulla su corner di Veloso e po dopo par anticipâ Verre a pôcs centimetris dal gol. Inte seconde frazion par sùù par jùù vincj minûts nol sucêt nuie di particolâr. Po dopo Lasagna al cjape un pâl e De Paul al segne, ma la azion no ven fate buine parcè che intal so principi al jere za almancul un blanc e neri in posizion di fûr zûc.

Lasagna al à ancjemò un pâr di buinis ocasions, ma la prime conclusion e je fûr bersai e la seconde – un colp cul cjâf – e ven tocjade di Silvestri che al pare vie la bale in corner. Di chê altre bande Faraoni al tire alt e Zaccagni tal mieç de aree al à une ocasionone che no si stramude in gol in graciis dal salvament su la linie di Nuytinck.
Tal ultin cuart di ore la tension e cale e i tentatîfs di Kumbulla, di Lazovic e di Lasagna no mudin il risultât di zero a zero che al ven confermât dopo cinc minûts des trê siviladis di Abbatista.

Brescia – Udinese 1-1

L’Udin al podeve vinci ma al à riscjât di pierdi e juste intal ultin al à rivât a cjapâ un pont. Cul Brescia la scuadre di balon furlane e zuie ancjemò une volte une partide discrete, cun bielis azions e cun diviersis ocasions, ma e stente a butâle dentri. Mancul mâl che ae fin al rive il gol di De Paul.

Chel dal Rigamonti al è un scuintri diret pe salvece. L’Udin al fronte l’apontament cun Musso in puarte, cun De Maio, Ekong e Nuytinck in difese, cu la novitât Jajalo tal mieç dal cjamp, dongje di Fofana e di Di Paul e dai laterâi Stryger Larsen e Sema, e ancjemò cun Okaka e Lasagna in atac. Pai parons di cjase e je la prime partide cun Diego Lopez a direzi la scuadre, che i da la fasse di cjapitani a Balotelli, tornât de scualifiche, nol mude la fisionomie de scuadre e al domande ai siei di fâ ponts.

L’Udin, cu la maie grise, al partìs benon. Dopo doi minûts Lasagna, su assist di Okaka, al tire in puarte e al cjape la travierse. La scuadre di Gotti e manten il comant de partide e si viôt prime assegnât e po refudât un rigôr par un intervent di Bisoli suntun cross di Sema che par Piccinini al sarès fat cu la man e che impen il Var al mostre che la bale e ven tocjade cu la muse. Joronel si vuadagne il pagnut suntun altri tîr di Lasagna e po si viôt ancje il Brescia, cuntune biele tonade di Balotelli che e finìs alt di pôc.

La formazion furlane e va dilunc a masanâ zûc e a meti dongje ocasions di gol, cun De Paul che al sugjerìs, cun Lasagna e Okaka che a tirin cjapant l’esterni de rêt e po ancjemò cun Okaka che al oblee Joronen a distirâsi par parâ un so diagonâl. Dopo de polse la partide e cjape une ande mancul dinamiche par sùù par jùù vincj minûts e i tentatîfs di Okaka e Lasagna no àn nissun efiet. La svearine le sunin di une bande Ayè, cuntune conclusion centrâl, e di chê altre De Paul, che al tire zovantsi di un assist di Stryger Larsen cun Joronen che al met un tacon, cu la deviazion che e covente par mandâ la bale su la travierse.

Il Brescia al cjape pôre e si siere indaûr, tentant di rispuindi in cuintripît o disfrutant cualchi bale inative. Al sucêt cussì che suntune punizion lungje e lungje di Sabelli De Maio al fâs un pastroçon, la bale e reste inte aree di rigôr, al rive Bisoli che al tire fuart e le fâs passâ tra lis gjambis di De Maio e di Musso: un a zero.

Il gol al da fuarce ai parons di cjase che a tornin a impegnâ Musso cun Bidoli e cun Smerhal. Al Udin i covente cualchi moment par ripiâsi e la sô reazion si le viôt soredut intal recupar, cul gol di De Paul e cul tîr cul cjâf fûr bersai di Nestorovski. La scuadre di balon furlane e rive a rompi la rie des partidis pierdudis, cumò al covente fat ancjemò alc di plui. Domenie che e ven tal Stadi Friûl al rive il Verona che al à fermât la Juve.

Udinese – Inter 0-2

In cjase compagn che in trasfierte. L’Udin al piert ancjemò une volte, ancje se al zuie une altre partide discrete e l’Inter al scuen spudâ balins par rivâ a puartâ a cjase i trê ponts che i permetin di no pierdi masse classifiche de Juventus.

L’Udin si presente sul cjamp dal stadi Friûl cun Musso in puarte, cun Becao, Di Mai e Nuytinck denant di lui, cun Mandragora, Fofana e Di Paul in mediane, adun cui laterâi Stryger Larsen e Sema, e cun Okaka e Lasagna in atac. L’Inter al è cence Handanovic e Lautaro Martinez e il lôr puest al ven cjapât di Padelli e di Esposito, intant che Eriksen al fâs il so esordi inte scuadre.

L’Inter al partìs al atac e Musso al à daurman ce fâ, parant fûr i corner un tîr di Esposito. E je mancul impegnative la seconde conclusion dai ospits: il tîr centrâl di Erksen al ven fermât dal puartîr argjentin. L’Udin si ten bas e al cîr di rispuindi in cuintripît e al rive a fâsi viodi indenant: tîr di De Paul, cun Padelli che si salve in corner, e conclusion di Fofana fûr bersai.

La partide e van dilunc cuntun bon ritmi. L’Udin si difint cun sintiment e al rispuint in verticâl, sburtât di un Fofana che al cjante e al puarte la crôs: al cor, al concuiste balons e al va ancje al tîr, dant il so bon ce fâ a Padelli prime de mieze ore. Tal Inter Lukaku no si viôt pôc o nuie, par merit di Becao e De Maio e ancje un pôc par colpe sô e dai siei compagns.

Il prin timp si siere cence goi e intune situazion di ecuilibri sostanziâl. La seconde frazion, impen, si scree cuntun erôr di un dai blanc e neris miôr, Sema, che al sbrisse e i lasse la bale a Esposito tal mieç de aree di rigôr: par fortune il tîr al è flap e Musso al pare. L’Udin al va dilunc a tignî bot indaûr e a masanâ cualchi biele zuiade indenant, sburtât soredut di Fofana e Sema, che i da une buine bale a De Paul, ma il so tîr al va fûr bersai.

Daûr di chê regule no scrite che e vûl che dopo di une ocasion pierdude par solit si cjape un gol, juste cuatri minûts plui tart e rive la prime rêt di Lukaku, che si cjate tal puest just tal moment just, al tire ben, al à ancje la fortune di rivâ a fâ passâ la bale sot des gjambis di Nuytinck e al segne.
La scuadre di balon furlane e somee patî il colp. L’Inter, che za di uns pôcs di minûts si zove dal dinamisim fresc di Brozovic, jentrât tal puest di Eriksen, al prove a fracâ sul aceleradôr e Lukaku si cjate di bessôl denant di Musso, al tire ma il puartîr blanc e neri no si fâs impirâ.

Un minût plui tart l’Inter al vuadagne un penalty, par vie di un fal di Musso in jessude su Sanchez. Al bat Lukaku: la bale e va di une bande e l’argjentin di chê altre e al è doi a zero.
L’Udin al reagjìs daurman. Prime al prove De Paul ma la sfere e finìs fûr e po dopo a son dôs conclusions di Lasagna che però no incuadrin la puarte. E cussì, passâts ancje trê minûts di recupar, l’Inter al romp la rie di patis, cun bon pro pe classifiche e ancje pal morâl. L’Udin al paie ancjemò une volte un tic di sfortune e masse pocje precision e decision in zone gol.

Parma – Udinese 2-0

Dopo Milan, al Udin i va strucje ancje a Parma. In Emilie l’Udin al zuie une partide discrete, ma ancjemò cun mancul precision in zone gol che cuintri dal Milan, e al piert. I parons di cjase si confermin une scuadre biele e buine, a segnin doi goi, a tegnin bot denant dai atacs ded scuadre furlane e a sierin in glorie e si svicinin ae zone Europa League.

Gotti al mande in cjamp Musso tra i pâi, Becao, Ekong e Nuytinck in difese, Mandragora, Fofana, De Paul in mediane cun Sema e Stryger Larsen laterâi, e Okaka e Lasagna in atac. La partence de scuadre furlane e je buine e dopo sîs minûts un biel cross di Sema al ven tocjât cul tac di Okaka ma Sepe lu pare vie. La rispueste dal Parma e rive cuntune conclusion fûr bersai di Cornelius, intant che di chê altre bande dal cjamp un tîr sù par jù compagn di Okaka, su cross di Stryger Larsen, al à chel stes destin.

Passât il pericul potenziâl dai doi tentatîfs di Okaka, il Parma al alce la linie dal so zûc e al va in vantaç cuntun gol di Gagliolo che al impire Musso di doi pas. L’Udin al rispuint daurman, ma nol cjate la bale juste par tirâ in puarte, e cussì al è ancjemò il Parma a svicinâsi al gol cun Cornelius, che al ven fermât di Musso. Il puartîr dal Udin al è mancul precîs doi minûts plui tart, cuant che nol rive a fermâ la conclusion di Kulusevski, che al firme il doi a zero.

Prime de polse l’Udin al prove a ridusi la distance cun dôs conclusions di Lasagna: cu la prime al impegne Sepe e cu la seconde al cjape la travierse. Tal imprin dal secont timp l’Udin al torne a presentâsi al atac cui tîrs fûr bersai. Il Parma al rispuint cuntun tîr cross di Hernani che Musso al patafe in corner e po cuntun altri tentatîf di Kulusevski.

Gotti al prove a cambâ alc: al mande in cjamp Jajalo al puest di Becao e al fâs sbassâ Larsen e Sema. L’Udin al passe dal 3-5-2 al 4-4-2 e al prove ancjemò a impirâ Sepe cun Mandragora, cun De Paul, cun Lasagna e fintremai cun De Maio. Cuant che al covente, il puartîr dal Parma al è simpri tal so puest. A fuarce di dâi, l’Udin al rive ancje a butâle dentri cun Lasagna, ma Sozza nol fâs bon il gol dal atacant parcè che il so assistent al marche la posizion iniziâl di fûr zûc di Okaka, che i veve dade la bale buine. E il Parma al fâs fieste.

Milan – Udinese 3-2

Ae vilie de partide la plui part di lôr si spietavin un sucès dal Milan, intant che i tifôs dal Udin a speravin intune prestazion in stât di scancelâ la vergogne de partide di Cope Italie cu la Juve. Ae fin a àn vût reson chei e chei: i blancs e neris a àn zuiât cuntune buine dose di personalitât e di ordin e il Milan al à rivât adore a vinci, ancje se juste tal ultin minût suplementâr.

Gotti a San Siro al mande in cjamp Musso tra i pâi, Becao, Ekong e Nuytinck in difese, Mandragora, Fofana e Di Paul tal mieç cun Stryger Larsen e Sema su lis corsiis esternis e Okaka e Lasagna in atac. I blancs e neris a mostrin di no vê pôre dai aversaris che si zovin de poie da lôr public e de voie di lâ dilunc cu la fase positive screade tal 2020. La scuadre di balon furlane e rive a fâi pôre al diaul e dopo nancje siet minûts Lasagna si slargje a man drete fûr de aree, Donnarumma al fâs une jessude aventurose cul cjâf par anticipâ la ponte blancje e nere e Stryger Larsen al recupare la bale e al tire in puarte cun precision e cun sucès.

L’Udin al va dilunc a tignî il balin in man e mancul di dîs minûts plui tarts al è ancjemò pericolôs cuntun biel cross di Sema par Lasagna che al siere fûr. Il Milan al cres inte manovre ma i blancs e neris no i permetin di jessi masse produtîf. I parons di cjase si fasin vîfs des bandis di Musso cuntun tîr cul cjâf di Romagnoli e po cuntune conclusion di Castillejo fermade dal puartîr. La scuadre di balon furlane e rispuint in cuintripît cun Fofana e De Paul che a ispirin e Lasagna e Okaka che a provin il tîr.

Sierât il prin timp cul Udin in vantaç, la seconde frazion e viôt te formazion milaniste une novitât che e deventarà decisive: Bonaventura al reste fûr e il so puest al ven cjapât di Rebic. Il ritmi al è bon e a son emozions di dutis dôs lis bandis: Donnarumma al ferme un biel diagonâl di Lasagna, Musso al pare une conclusion di Castillejo e po al rive il gol di Rebic che al firme l’un a un.

Il Milan si svee e al frache il pît sul aceleradôr, ancje se l’Udin al à almancul trê ocasions par tornâ in vantaç: une biele combinazion tra Lasagna e Okaka che no si siere inte maniere miôr, une bale golose di De Paul par Mandragora, che al tire di doi pas ma al cjate Donnarumma e po ancjemò Okaka che al impegne il puartîr milanist.

Straçade la pussibilitât di gafâ il doi a un, l’Udin al va sot di un gol, intal moment che il Milan al incres ancjemò di plui la sô pression ofensive: prime al è un cross di Leao par Ibrahimovic che le zire cul cjâf cence masse potence e po dopo al rive il tîr di Hernandez che al impire Musso dal limit de aree.

L’Udin nol mole e Gotti al clame fûr Nuytinck par Nestorovski cun chê di dâi plui fuarce al atac. Ibrahimovic al lenç il tierç gol cuntun diestri fûr di pôc e l’Udin al impate cuntun tîr cul cjâf di Lasagna, che al salte ben e si zire ancjemò miôr sul cross di Larsen, impirant la puarte di Donnarumma, e doi minûts plui tarts Nestorovski cul çamp al tire di pôc fûr.

Tra cambis e bale zuiade te zone mediane, la partide e somee zaromai destinade a sierâsi cuntun pont par om, ma nol è cussì, stant che Rebic al rive a segnâ juste tal ultin e cussì la fieste e ducj i ponts a son dome dal Milan. Al Udin i restin la sodisfazion di vê zuiât une biele partide e il displasê di vê fermât la rie di risultâts positîfs in campionât.

Juventus – Udinese 4-0

Une altre trasfierte a Turin che e finìs inte maniere piês. Juste un mês dopo de partide di campionât, l’Udin al torne al Juventus Stadium pai otâfs di finâl di Cope Italie, al torne a fâ la vitime sacrificâl e al torne a pierdi, cjapant cuatri patafons.

Pal apontament dal miercus di sere che al passe “in clâr” par television lis dôs scuadris si presentin cun diviersis novitâts tes formazions. Un pôc par sante scugne, tra infortunis e virus di stagjon, ma soredut par fâ polsâ tancj di lôr in spiete di chei altris impegns di campionât. Il 3-5-2 di mister Gotti al à lis musis di Nicolas in puarte, di Opoku, De Maio e Nuytinck in difese, di Barak, Jajalo e Walace in mediane, adun cun Sema e cun Ter Avest, e di Nestorovski e Teodorczyk, intant che i parons di cjase a son cence Ronaldo e tal centicjamp a àn Bernardeschi, Bentancur e Rabiot.

Fint dal principi si viôt che lis dôs scuadris a àn une ande diferente: la Juve e à morbin e gjeometriis, l’Udin al somee daurman flap e smamît. La iniziative e je tai pîts dai parons di cjase che a fasin zirâ la bale, a sburtin, a fasin pressing e a strenzin la scuadre furlane inte sô metât dal cjamp, cui prins tentatîfs di Higuain.

Il pipita e Dybala si cirin e si cjatin e dopo un cuart di ore di zûc a metin adun une dople triangolazion strente che e lasse incocalide la difese colôr naranç e si siere cun Higuain che al sbuse la puarte di Nicolas.
La partide pal Udin e je ancjemò di plui di rive sù: te zone mediane dal cjamp Rabiot e Bentancur a fasin ce che a vuelin, intant che Jajalo, Walace e Barak a stentin sei in costruzion che in cuvierzidure e Nestorovski e Teodorczyk a son a sec di riforniments.

La Juve e va dilunc a sunâ la sô musiche, cun Douglas Costa pericolôs compagn dai doi argjentins. Al rive cussì ancje il doi a zero: Bernardeschi al va a sierâ un triangul inte aree furlane, Nicolas al prove a anticipâlu e nol pues fâ di mancul di tocjâlu e di tirâlu jù, rigôr di Dybala e gol. Pai parons di cjase la pratiche e je za biele che sierade e l’Udin nol rive a cumbinâ nuie, fale che un tîr dal limit di Sema che al va fûr bersai, e la Juve e lenç il tris cuntun tîr di Bentancur che al cjape il pâl.

Il secont timp al scomence cun Lasagna tal puest di Teodorczyk. L’Udin al somee un tic plui dinamic, ancje se masse pôc in confront ae potence dai aversaris, che dopo nûf minûts si viodin anulât dal Var il tris di Higuain par fûr zûc e po a cjatin la tierce segnadure cuntune pinelade di Dybala: une bale che Nicolas al rive dome a tocjâle, ma no a fermâle, e che e va a finile in puarte, sot dal siet.

La scuadre di balon furlane no rive a dâ segns di vite, Aureliano al sivile un altri penalty par un intervent di Nuytinck, che in aree al ferme un tîr di Rugani cul pet e po – cence volê – ancje cu la man, e dal discut e je glorie ancje par Douglas Costa, che al firme il poker.

Sarri al cambie il brasilian cun Cuadrado, Rabiot cun Ramsey e Dybala cun Pjaca. Gotti al prove a zuiâ la cjarte Fofana, che tal ultin cuart di ore al cjape il puest di Walace e al mostre di vê un pôc plui di gjambe e di snait, ma la cjançon e reste simpri chê e la Juve si svicine fintremai ae cincuine cun Higuain, cun Bernardeschi, cun Cuadrado e cun Rugani che al cjape un altri pâl.

Domenie al torne a tacâ il campionât. Sperìn che la polse fate usgnot ur zovi ai varis Musso, De Paul, Okaka e Mandragora e che cuintri dal Milan l’Udin al scanceli la vergogne di cheste partide, tornant a mostrâ chel caratar e chê grinte che a àn segnât lis ultimis buinis provis cuintri di Cagliari, Lecce e Sassuolo.

Udinese – Sassuolo 3-0

bandieris-friuul

Nol è doi cence trê. Dopo chês cul Cagliari e cul Lecce e rive ancje la vitorie cuintri dal Sassuolo. L’Udin si gjolt il soreli de prime partide in cjase dal 2020 e al siere la prime part dal campionât cuntune partide zuiade cun snait e cun sintiment. Un gol tal prin timp e doi inte seconde frazion, compagnâts di un pâr di paradonis di Musso, a permetin ae scuadre di balon furlane di rivâ a cuote 24 e di cjatâsi ae metât de classifiche, cui stes ponts dal Napoli.

I blancs e neris a frontin il Sassuolo cul lôr classic 3-5-2, che pe ocasion al viôt in atac Okaka e Lasagna dal prin minût, al presente une linie difensive cun Becao dongje di Nuytinck e Ekong e un centricjamp cun Mandragora, Fofana e De Paul, compagnâts dai esternis Larsen e Sema. De Zerbi al scuen fâ di mancul di diviers di lôr, tacant di di Berardi, e al met adun une formazion che in atac si fonde su Traorè e Djuricic.

L’Udin al à une partence buine e al met adun un pâr di ocasions cun Okaka e ancjemò prime une cun Lasagna. Il Sassuolo al rispuint cuntun tîr di Traorè che al cjape il pâl intant che un minût plui tart Okaka al rive a butâle dentri cul cjâf suntun cross pinelât benon di Mandragora. Dopo dai doi goi anulâts a Lecce pal atacant blanc e neri al somee che e rivi une gnove mancjade convalide, ma Volpi, dopo cjalât il Var, al ricognòs che il contat jenfri Becao e Toljan al è regolâr e al sivile l’un a zero. Une sodisfazion par ducj e soredut pal atacant.

L’Udin al manten il control de partide, al gjestìs il vantaç cence lassâ la iniziative al Sassuolo e si fâs vîf des bandis di Consigli cun De Paul e cun Mandragora, intant che i ospits a provin a imbastî la lôr reazion pontant ancjemò su Traorè che al impegne Musso. Il prin timp si siere cul vantaç blanc e neri.

Inte seconde frazion la musiche e je sù par jù compagne, ancje se il Sassuolo al prove a sburtâ un tic di plui. Traorè al torne a impegnâ Musso, che si vuadagne il pagnut almancul in dôs ocasions, sierant la puarte denant des conclusions ancjemò dal ivorian e po ancje di Boga.

Passât il moment plui bon dal Sassuolo cence problemis, l’Udin al torne a vuadagnâ metris e a fâ zûc. Pussetto al jentre al puest di Lasagna e al puarte gnovis energjiis, Fofana al cor e al distribuìs balons e De Paul al ten dongje la seconde linie e chê di atac. Al rive cussì il secont gol dai blancs neris, firmât di Sema che al impire Consigli cuntun diagonâl a fîl di tiere.

Il dopli vantaç al da ancjemò plui fuarce ae scuadre furlane, che e impegne Consigli cun De Paul dopo di un triangul cun Larsen. Il Sassuolo nol mole dal dut e juste tal ultin cun Kyriakopoulos al oblee Musso a fâ un altri biel intervent. A son ancjemò uns pôcs di minûts di recupar e cussì al è timp ancje pal tierç gol di De Paul, che al segne in conclusion di une azion di cuintripît e al conferme la vitorie, mreretade, de formazion blancje e nere.

Lecce – Udinese 0-1

bandieris-friuul

L’Udin al scree il so 2020 inte maniere miôr. Cuintri dal Lecce al zuie cun sintiment e cun ordin, si difint ben, cul passâ dal timp al cjape sù ancje la iniziative in atac e juste pôcs minûts de fin de partide al rive a cjatâ il gol biel e bon cun De Paul e cussì al vinç e al puarte a cjase trê ponts impuartantons. Il Lecce al va di lunc a no vinci in cjase e al reste inte part plui basse de classifiche: dome Brescia, Genoa e Spal a àn ancjemò mancul ponts.

I blancs e neris a frontin i 4-3-3 de scuadre salentine, che si poie su lis trê pontis Babacar, Mancosu e Falco, cuntu 3-5-2: denant di Musso in puarte a son De Maio, Ekong e Nuytinck, in mediane si cjatin Mandragora, Fofana e Di Paul, cun Larsen e Sema intes corsiis esternis, e in atac e partìs la cubie Okaka-Nestorovski.

La partide e tache cun ritmis avonde bas. Al sofle un aiar di tramontan e al è pardabon dificil zuiâ. Il Lecce al prove a fâ zirâ di plui la bale, cun chê di scancarâ la difese furlane. La prime conclusion e je de formazion salentine, che juste dopo sîs minûts dal inviament de partide e prove a jessi pericolose cuntune acrobazie di Babacar. L’Udin al rispuint cuntun cross insidiôs di De Paul e cuntun tîr di fûr di Fofana.

La partide, cundut dal svint, e devente plui vivarose. Falco al scjampe vie in sghiribiç tal mieç dal cjamp e al scate di bessôl indenant, ma il so tîr in puarte nol cree nissun probleme par Musso. Il puartîr argjentin dal Udin al è protagonist cualchi minût plui tart: cuintripît di Tabanelli che al passe la bale a Babacar, che al salte doi oms, al jentre in aree e al lasse partî une bombe che e sbat su la travierse; bale tornade a tirâ in puarte di Mancosu, di precision, e paradone dal estrem difensôr dal Udin.

La scuadre di balon furlane si fâs vive des bandis di Gabriel cun Fofana che al sfide in slalom dute la difese aversarie e al oblee il puartîr zâl e ros a fâ un intervent in jessude basse. Il Lecce al rispuint ancjemò cun Mancosu che il so tîr al va fûr di pôc e l’Udin al siere il prin timp cuntun tentatîf di Mandragora.

Dopo de polse Mancosu al impegne ancjemò une volte Musso, che al bloche la sô conclusion, e l’Udin al segne cun Okaka, che le bute dentri di doi pas dopo un tîr di Nestorovski, ma Giua al consulte il Var e al decît che il gol nol è bon. Lis scuadris si slungjin e l’Udin al cjape il control dal zûc. La pression ofensive dai blancs e neris e cres cun Fofana, De Paul e Okaka in evidence. Il Lecce si salve in corner e al prove a rispuindi cun Falco e Petriccione, intant che l’Udin al prove cun Lasagna che al cjape il puest di Nestorovski.

L’atac de scuadre di balon furlane, là che al cjate spazi ancje Pussetto, jentrât al puest di Sema, al sburte ma nol rive ancjemò a cjatâ pardabon la puarte di Gabriel. Par che al sucedi al covente rivâ intai ultins minûts di zûc, cuant che un corner parât vie dal puartîr salentin al vent stramudât intun triangul strent tra De Paul e Mandragora e po intun control inmagant dal argjentin che al rive a tirâ in puarte cun sucès.

Il Lecce al à ancjemò vot minûts – doi di timp “normâl” e sîs di recupar – par provâ a dreçâ l’incuintir ma l’Udin al manten il balin in man e al siere in vantaç. Il risultât bon dopo une prestazion buine.