Udinese – Juventus 1-2

This image has an empty alt attribute; its file name is udin_neri.png

Cuintri de Juve l’Udin al convinç, ma nol vinç. Anzit: al piert. Passade in vantaç dopo dîs minûts, la scuadre di balon furlane e manten il control de partide, e siere ducj i spazis e i lasse pocjis pussibilitâts di iniziative ae Juventus, che e stente a meti adun azions di sest. Chest al sucêt vie pal prin timp e vie pe plui part de seconde frazion, cuant che la formazion di Gotti e lenç ancje il secont gol. Tai ultins dîs minûts, però, doi episodis a dan il svolt ae partide a pro dai ospits. Un svolt che pal Udin e pai siei tifôs al è un ribalton: par talian si dîs «Dalle stelle alle stalle».

Gotti al mande in cjamp il 3-5-1-1 cun Okaka uniche ponte, cun Pereyra daûr di lui, cun Molina, De Paul, Walace, Arslan, Stryger Larsen, cun Becao, Bonifazi e Nuytinck in difese e – uniche novitât a pet de partide cul Benevento – cun Scuffet in puarte tal puest di Musso, scualificât. Pirlo al sielç il 4-4-2: Szczesny tra i pâi; Danilo, Di Ligt, Bonucci e Alex Sandro in difese; Cuadrado, Bentancur, McKennie e Bernardeschi in mediane; Dybala e Ronaldo in atac.

L’Udin al partìs cul pît just. I blancs e neris a metin cûr e polmons e a mostrin di vê snait e caratar. La Juve e je smamide e no rive a meti dongje une azion di sest. Dopo dîs minûts la scuadre furlane e passe in vantaç: De Paul al bat une punizion a sorprese e al servìs Molina che al profite de disatenzion de difese aversarie e al tire in puarte un diagonâl potent che al impire Szczesny.

La Juve e prove a imbastî une reazion, cun Alex Sandro che al sburte dilunc de corsie di çampe e cul dinamisim di Mc Kennie. L’Udin al neutralize la massime part des iniziativis de scuadre di Pirlo, che al rive a tirâ in puarte in trê ocasions, ma simpri fûr bersai, cun McKennie, cun Di Ligt e cun Ronaldo, intant che intun pâr di balons pericolôs Scuffet si fâs cjatât tal puest just tal moment just e po al pare in doi timps une conclusion di Dybala.

Il prin timp si siere cul vantaç de scuadre furlane, che si difint cun sintiment e cun spirt di sacrifici, vuidade indaûr di Nuytinck cun Walace tal mieç a recuperâ balons e Arslan e De Paul a fasin ancje un bon lavôr in cuvierzidure. In atac Okaka al ten il balon e al vuadagne teren a vantaç di Pereyra e de sô mobilitât. La seconde frazion si scree cun chê stesse musiche dai prins cuarantecinc minûts: Dybala e Ronaldo a son doi câs par “Chi l’ha visto?”, imberdeâts inte tele di ragn des liniis dal Udin.

I blancs e neris a van dilunc a blocâ cualsisedi tentatîf di azion dai aversaris. Cun di plui a lenzin il doi a zero cun Arslan che di une buine posizion al tire fûr di pôc. A passin i minûts e l’Udin al manten il control de partide. Pirlo al prove a dâ une scjassade ae sô scuadre e al clame fûr Bernardeschi e Dybala par Kulusevski e Morata. Lis ocasions miôr al va dilunc a vêlis l’Udin: dopo dal tîr di Arslan e rive une biele conclusion de distance di Stryger Larsen, ancje chê fûr di pôc.

La partide e somee indreçade ben, a pro dal Udin. La Juve e je in confusion e no rive a jessi pericolose des bandis di Scuffet. Tai ultins dîs minûts al sucêt alc che al cambie la ande dal incuintri. Il prin fat al è un contrast tra Stryger Larsen e Cuadrado fûr de aree di rigôr dal Udin: il zuiadôr juventin al scambie il prât bagnât dl Stadi Friûl par une pissine e si bute par tiere compagn che al ves di fâ un scjuc e Chiffi al sivile il fal. La punizion le tire Ronaldo e De Paul in bariere al salte e al tocje la bale cul braç, cussì la Juve e vuadagne il penalty: dal discut al bat CR7 e Scuffet nol pues fâ nuie altri che viodi la bale dentri tal sac.

L’un a un al dismôf i ospits e al see lis gjambis al Udin che dopo vê fat cetant al somee jessi daûr a pierdi energjiis. Ronaldo, che nol segnave di trê partidis, juste ae fin al à une altre bale golose, che i rive cuntun biel cross pinelât di Rabiot, e le bute dentri cul cjâf profitant ancje de incierte marcjadure di Samir.
La partide si siere inte maniere piês pal Udin che al reste cu la bocje garbe e no cjape nancje un pont, cundut che a’nt varès meretâts trê. Grande fieste pe Juve, che cui trê ponts no piert il contat cun chês altris scuadris che a pontin a vuadagnâ un puest in Champions League.

Benevento – Udinese 2-4

bandieris-friuul

Al torne in cjamp De Paul e l’Udin al torne a vinci. A Benevento la scuadre di balon furlane e segne cuatri goi e e cjape ducj i trê ponts a disposizion. I blancs e neris a rivin daurman a imponis sui parons di cjase, si complichin la vite inte ultime part dal prin timp, ma a mantegnin il vantaç fint ae fin de partide, intant che la scuadre di Pippo Inzaghi no rive a dreçâ la gare, e cussì e va dilunc a clopâ e a pierdi posizions in classifiche.

L’Udin si presente tal cjamp dal stadi Vigorito cun Musso in puarte, cun Becao, Bonifazi e Nuytinck in difese, cun Molina, De Paul, Walace, Arslan e Stryger Larsen in mediane, cun Okaka uniche ponte e cun Pereyra daûr di lui cun massime libertât di moviment tra centricjamp e atac: Gotti al torne al 3-5-1-1. Il Benevento al rispuint cul 3-5-2 che al viôt Montipó tra i pâi, la linie difensive cun Glik, Caldirola e Barbe, la mediane cun Depaoli, Dabo, Viola, Hetemaj e Improta, e Sau e Lapadula in atac.

I blancs e neris a partissin cul pît just e in mancul di cuatri minûts a rivin a segnâ, cun De Paul che al ispire in verticâl Molina, che al firme il so prin gol in serie A cuntun grant diagonâl. I parons di cjase a provin a reagjî ma Musso al dinee il gol a Glik cuntune biele parade. La scuadre furlane e va dilunc cu lis azions vuidadis dal talent di De Paul, che al prove ancje la conclusion di lontan, ma Montipò le bloche cence padins.

Passâts i prins vincj minûts di zûc Inzaghi al scuen clamâ fûr Sau, che al à problemis muscolârs, e tal so puest al met Gaich. I parons di cjase a àn di tornâ a organizâsi, intant che l’Udin al manten une cierte costance, che lu puarte a dopleâ il vantaç cun Arslan che al ricêf di Pereyra e al siere inte maniere miôr une azion inviade ancjemò une volte di De Paul.

Dopo segnât il gol Arslan al fâs une falope, dant indaûr a Musso une bale che e devente un assist par Lapadula che al ven tocjât dal puartîr in jessude: Mariani al sivile e Viola al tire e al segne. Scurtât il disvantaç, i zâi e ros a insistin par cirî la pate, ma l’Udin, dopo cualchi erorut di masse, al ten bot, la pression dal Benevento no à nissun efiet particolâr e il prin timp si siere cul doi a un pe formazion furlane.

Inte seconde frazion Inzaghi al mande in cjamp Schiattarella tal puest di Viola, ma la partence e je buine soredut pal Udin che al cjate daurman il gol dal trê a un cun Stryger Larsen che al rive inte aree di rigôr aversarie e al salte plui indalt di ducj par zirâ in puarte cul cjâf il cross pinelât par lui di De Paul.

La prime reazion dal Benevento si concretize intune punizion di Lapadula che e sbat cuintri de bariere e in pocjis conclusions in puarte che no crein problemis a Musso, a part une conclusion di dongje di Gaich che il puartîr al rive a parâ vie cun tempisim perfet.

Il timp al passe e i doi alenadôrs a fasin ducj i cambis che ur coventin: Inzaghi al mande dentri Insigne par rinfuarcî l’atac e Gotti al ponte a mantignî il vantaç e a no pierdi fuarce ofensive. Par chel al clame fûr un Okaka avonde smamît e al mande dentri Braaf, che juste dopo doi minûts al impire Montipò.

L’Udin al met la partide in cassefuart, cundut che il Benevento inte ultime part dal incuintri al prove ancjemò a cirî il gol. Lu cjate cun Lapadula, lu cîr ancjemò cun Gaich ma cence sucès, intun finâl di partide cun intensitât di emozions che nol mude il risultât finâl. L’Udin al vinç e ancje par efiet dai risultâts di chês altris scuadris vie pe zornade al vuadagne posizions in classifiche, passant ancje il Bologna, intant che il Benevento al sbrisse jù tal tierç ultim puest.

Udinese – Cagliari 0-1

This image has an empty alt attribute; its file name is udin_neri.png

L’Udin al torne a zuiâ in cjase e al torne a pierdi. La partide cul Cagliari e va a finîle cul stes risultât di chê cuintri dal Toro. La scuadre sarde e segne un gol e si puarte a cjase trê ponts impuartantons che si zontin a chei vuadagnâts sabide stade cuintri dal Parma. La formazion di mister Semplici e scombat di plui dai blancs e neris, prime par cirî di segnâ e po par difindi il vantaç, denant de reazion de scuadre furlane che no je nancje masse fortunade, stant che intal ultin e cjape une travierse. Cun di plui l’Udin al patìs la mancjance di De Paul, scualificât, e lis buinis paradis dal puartîr dai ros e blu, Vicario, furlan e cressût tal Udin, che al è deventât titulâr pe positivitât al coronavirus di Cragno.

Gotti al sielç ancjemò il 3-5-2, confermant la cubie di atac Okaka-Forestieri, intant che in puarte al è Musso, in difese a son Becao, Bonifazi e Nuytinck e in mediane a scomencin Molina, Pereyra, Walace, Arslan e Stryger Larsen. Al fâs compagn Semplici cun Vicario tra i pâi, cun Ceppitelli, Godin e Carboni in difese, cun Nandez, Marin, Nainggolan, Deiola e Asamoah inte seconde linie e cun Pavoletti e Joao Pedro indeant.

I ospits a partissin cul aceleradôr ben fracât e dopo cinc minûts a lenzin il vantaç, cun Pavoletti che a al cjape pâl sui disvilups di une punizion tirade di Marin tal mieç de aree. Di chê altre bande dal cjamp Molina i da une buine bale a Forestieri che al tire in puarte cun masse pocje fuarce e Vicario al blocche cence padins.

La partide e va dilunc intune situazion di ecuilibri sostanziâl, cuntun pâr di tentatîfs di Arslan e di Molina, fermâts di Vicario, e cui ros e blu che a tirin in puarte cun Nainggolan, che al fâs un slalom tra i blancs e neris ma il so diagonâl al è fûr bersai, e po cun Joao Pedro, che si dilibare di Bonifazi e le bute dentri, ma Guida al consulte il Var, al viôt un contat a centricjamp tra Marin e Forescj e nol fâs bon il gol.

Sierade la prime frazion cence altris grandis emozions, tal principi dal secont timp la musiche e je sù par jù compagne e chel stes Var che al veve indreçât Guida viers de mancjade convalide dal gol di Joao Pedro al met in cundizions l’arbitri di sivilâ un penalty a pro dai ospits par un contat tra Molina e Carboni. Dal discut al tire Joao Pedro, Musso si slungje par fermâle, ma al rive dome a tocjâle cu la ponte dai dêts e la bale e finìs intal sac.

Il vantaç de scuadre sarde al da la scjassade al incuintri, cul Udin che al reagjìs cun braùre e al cjape sùù il comant dal zûc. Gotti al mande in cjamp Nestorovski, che al è protagonist daurman di un pâr di buinis ocasions: prime al cjape la travierse cuntun biel tîr cul cjâf ben indreçât, dopo nol disfrute inte maniere miôr un bale golose che i rive di un assist involontari di Asamoah e di bessôl denant di Vicario al tire fûr. Semplici al domande ai siei di alçâ la lôr linie dal zûc, ma il pressing dal Udin al è costant e il Cagliari al scuen dome che sierâsi indaûr, zovantsi de frescjece di Simeone e Duncan, che a jentrin tal puest di Joao Pedro e Deiola. Gotti al incres la pression ofensive clamant fûr Nuytinck par Braaf.

Tal ultin cuart di ore di zûc – comprendût ancje il recupa – chel dal Udin si pues clamâlu pardabon assedi: prime Arslan al da un bon balon a Okaka, che però al tire fûr e po, un minût plui tart, al prove Braaf, che di cuant che al è jentrât al à zontât energjie e dinamisim, ma Vicario al tire jù la sierande, e Gotti al clame fûr Pereyra e al zuie la cjarte Llorente, che però nol rive a cumbinâ alc e ce. Vicario al sta in vuaite e il Cagliari al streç in dincj fint ae fin, puartant a cjase une vitorie pardabon impuartante.

Crotone – Udinese 1-2

bandieris-friuul

Doi goi di De Paul e l’Udin al torne finalmentri a vinci, dopo trê sconfitis une daûr di chê, e al cjate chei ponts che a coventin par rivâ a garantîsi daurman la salvece. Cuintri dal Crotone la scuadre di balon furlane e veve di fâ une buine partide par puartâ a cjase ducj i trê ponts a disposizion e cun snait e cun determinazion, denant di une formazion che di une bande e à provât a tignî bot, massime vie pal prin timp e ae fin de partide, e di chê altre e je someade smonade e zaromai rassegnade ae retrocession.

Gotti al mande in cjamp une formazion cun cualchi novitât, tacant de sielte di tornâ al 3-5-2: in puarte al è Musso, in difese al torne Nuytinck, dogje di Bonifazi, tal puest di Becao, e Samir, in mediane a son Molina, De Paul, Walace, Pereyra e Stryger Larsen e lis pontis a son Okaka e Nestorovski. Ancje i parons di cjase vuidâts di Cosmi si presentin cul 3-5-2 cun Cordaz tra i pâi, cun Djidji, Golemic e Cuomo in difese, cun Pedro Pereira, Messias, Petriccione e Salvatore Molina in mediane e cun Ounas e Simy in atac.

Lis primis iniziativis a son dai parons di cjase, che a imbastissin une azion cun Messias e Salvatore Molina che al tire cul cjâf in puarte, ma Musso al bloche cence fastidis. Il ritmi al è bas, i contignûts tecnics e agonistics no son alc e ce. L’Udin al fâs zirâ bale cun Walace che, denant de difese, al coordene lis operazions, slargjant il zûc in direzion dai esternis Srtyger Larsen e Molina. De Paul al prove a inventâ alc, ma pal moment nol cjate la zuiade decisive.

Chê e rive cinc minûts prime de polse, cuntune azion corâl. Okaka al zire la bale di prime intenzion a Stryger Larsen che simpri di prime al mande Nestorovski al tîr, cun Cordaz che al pare e al mande indaûr la bale che e rive sui pîts dal stes atacant, che le passe al poie DePaul. Il cjapitani blanc e neri tal mieç de aree al controle cun calme e al segne e il prin timp si siere cul Udin in vantaç.

La seconde frazion si vierç cul Udin che al manten il possès de bale e al sburte dilunc des corsiis laterâls. Il Crotone al prove a imbastî cualchi azion ma nol rive a jessi pericolôs, intant che i blancs e neris a àn une buine ocasion cun Nestorovski che su corner di De Paul al tire cul cjâf, ma i va strucje. Dongje de metât dal secont timp il Crotone al rive a segnâ il gol dl un aun: lanç di Golemic par Reca che al controle e al jentre inte aree blancje e nere, Molina al intervent e al tocje la bale cu la man, Massimi al sivile il penalty e Simy al impire Musso.

Gotti al mande in cjamp Forestieri par Nestorovski e Arslan par Walace par dâ energjiis frescjis ae sô scuadre. Il gol ur da gnove fuarce ai parons di cjase, che a tornin al atac, ma Musso al interven cence problemis. Di chê altre bande al fâs il so lavôr ancje Cordaz, suntune conclusion svicinade di Okaka, e Forestieri al recupare la bale par tirâ in puarte ma l’arbitri al sivile il fûr zûc dal argjentin. Doi minûts plui tart i blancs e neris a tornin in vantaç cun Die Paul, che al controle ben une bale che i ven passade di Pereyra e al tir,e impirant Cordaz cuntun diestri precîs.

Cosmi al fâs ancjemò cualchi sostituzion, mandant in cjamp Zanellato e Cigarini par Ounas e Petriccione, cun chê di provâ a cjatâ la pate. L’Udin si difint cun sintiment e ancje De Paul al da une man daûr. Juste ae fin i blancs e neris a àn ancje un tic di fortune, stant che une buine conclusion di Simy e va a sbati sul pâl, ma tai minûts di recupar a pierdin De Paul, che al ven butât fûr par un intervent cu la gjambe alte su Salvatore Molina, e il Crotone al prove a zovâsi de superioritât numeriche e al va in pressing fin ae sivilade finâl, ma il risultât nol cambie, ancje par merit di Musso che al fâs ancjemò un bon intervent in jessude alte.

Udinese – Torino 0-1

This image has an empty alt attribute; its file name is udin_neri.png

Al segne il Gjal, nol criche il dì, l’Udin al piert e il Toro si slontane un tic de zone B. La sabide di sere dal Stadi Friûl e devente une ocasion di fieste dome pai granatas, che dopo dal bon derby de setemane stade a rivin a vinci e a vuadagnâ altris trê ponts. La scuadre di balon furlane, che Gotti al mande in cjamp dome cun Llorente di ponte, no rive a fâ valê la sô predominance teritoriâl cuant che e à di tirâ in puarte. Cussì il Toro al segne e al vinç, l’Udin nol rive a impirâ Milinković-Savić e cumò a son trê lis partidis pierdudis une daûr di chê altre.

Pe ocasion l’Udin al partìs cul 3-5-1-1: Musso tra i pâi; Becao, Bonifazi e Samir in difese; Molina, De Paul, Walace, Arslan e Stryger Larsen in mediane; Llorente in atac e Pereyra daûr di lui, tra prime e seconde linie. Nicola al conferme il bloc dal derby, cun Milinković-Savić in puarte, cun Izzo, Bremer e Buongiorno in difese, cun Vojvoda, Rincon, Mandragora e Ansaldi in mediane, cun Sanabria e Belotti di ponte e cun Verdi che ju saponte daûr di lôr.

La partence e je flapute. E je une serade frede e lis dôs scuadris a mostrin di no vê masse voie di cirî gnot. L’Udin al ten di plui la bale, ma lis primis ocasions lis àn i ospits cun Verdi e cun Sanabria, che però no cjatin la puarte, compagn di Llorente che su corner al tire cul cjâf ma la sô conclusion e je fûr bersai. Il ritmi de partide al cres e dutis dôs lis scuadris si fasin viodi di plui in atac. La ocasion miôr le àn i blancs e neris dopo passade la prime mieze ore di zûc: Milinković-Savić e Buongiorno a fasin un pastiel che al devente une bale gol clamorose par Molina, ma la ocasion e ven straçade malamentri.

Il marum par chê pussibilitât lade su pai stecs al ven lassât in bande daurman dal Udin che al va dilunc a provâ a dâi il so bon ce fâ al puartîr dal Toro. Prime al prove De Paul, che in dôs ocasions al tire fûr dal spieli e intal tierç tentatîf al oblee il serb-galizian a slungjâsi il plui pussibil par rivâ a fermâ il diagonâl dal argjentin, e po i tocje a Llorente, che juste prime de polse al tire cul cjâf e Milinković-Savić al tire jù la persiane.

Il secont timp si vierç ancjemò cul Udin che al manten il comant dal zûc, ancje se nol rive a cumbinâ alc e ce in atac. In tiermins relatîfs i va miôr al Toro che al prove la conclusion cun Mandragora e cun Verdi, cence cjatâ il spieli de puarte, e po al vuadagne un penalty cun Belotti che al ven tocjât in maniere malsacodade di Arslan: Doveri nol à dubis, al sivile e al segne il discut dal rigôr; Belotti al tire e al impire Musso.

L’Udin al prove a meti adun la sô reazion e il Toro al cîr di difindi il vanatç. Par chel i doi alenadôrs a mandin in cjamp fuarcis frescjis. Intal Turin a jentrin Zaza par Sanabria e Lukic par Rincon, intant che Gotti al met Okaka tal puest di Llorente e Forestieri tal puest di Arslan.
I blancs e neris a rinfuartissin il lôr repart ofensîf, però il Toro si organize ben indaûr e pe scuadre furlane lis ocasions par tirâ in puarte a son pocjis e ancje chês no vegnin fatis rindi cemût che al coventarès. Di une bande ur va strucje sei a Pereyra che a De Paul, di chê altre Verdi i da une bale buine a Izzo che cul cjâf al tire pôc parsore de travierse de puarte di Musso.

E je la ultime conclusion dal Toro. Comprendût ancje il recupar, di chel moment indenant al sarà un cuart di ore di assedi blanc e neri, dal tîr di Forestieri blocât di Milinkovic-Savic ae jentrade tal cjamp di Nestorovski tal puest di Stryger Larsen fintremai al tîr cross di De Paul parât vie di Izzo. Un assedi sterp che al sbat cuintri des muraiis tiradis sù dal Turin, che cussì al vinç e al convinç.

Atalanta – Udinese 3-2

This image has an empty alt attribute; its file name is udin_neri.png

La Atalanta si conferme scuadre di un nivel superiôr e – denant di un Udin che al prove a tignî bot e al mostre di no vê pôre, ma al ptìs la fuarce dai aversaris – e vinç, e convinç e si manten cun merit tal tierç puest in classifiche. La scuadre furlane e fâs masse erôrs e ju paie ducj e par chel no rive nancje a puartâ a cjase un pont.

I blancs e neris si presentin tal stadi di Bergamo cu la maie zale e cul lôr classic 3-5-2. Gotti al sielç di tornâ al so scheme principâl e cuntune dople novitât in atac, là che lis dôs pontis mandadis in cjamp in principi a son Okaka e Braaf. In puarte al è Musso, in difese a son Becao, Bonifazi e Nuytinck e inte linie mediane si cjatin Molina, De Paul, Walace, Pereyra e Zeegelaar. Gasperini al sielç il 4-3-1-2 cun Gollini in puarte, cun Toloi, Romero, Palomino e Gosens in difese, cun Freuler, De Roon e Pessina in mediane, cun Malinovskyi trecuartist e Muriel e Zapata in atac.

I parons di cjase a tachin cul pît just e a fasin valê daurman la lôr supremazie tecniche e teritoriâl: a fasin zirâ la bale e a tegnin la scuadre furlane inte sô metât dal cjamp.
Il prin tentatîf al è un diagonâl fûr bersai di Zapata. L’Udin al rispuint cuntun cross di De Paul che al ven fermât di De Roon e cualchi minût plui tart al tache il show di Muriel che prime al incjoche la difese furlane e al met tal mieç une buine bale par Zapata che nol rive a aprofitâ, po al impegne Musso su punizion e dopo dîs e nûf minûts di zûc al segne, sierant inte maniere miôr une azion inviade cuntun colp di tac par Gosens, che al zire la bale su Pessina che al pinele un assist pal colombian che al tire e zovantsi di une deviazion di Bonifazi al rive a sblefâ il puartîr dal Udin.

La Atalanta e va dilunc a mantignî il balin dal zûc e l’Udin al rive a cumbinâ avonde pôc. Muriel si fâs viodi ancjemò in zone gol e i difensôrs de scuadre furlane a àn il lôr bon ce fâ. L’Udin al prove a rispuindi cul dinamisim di Braaf, che però ogni tant al zire ancje a vueit, cuntune conclusion debile di Okaka, cuntun pâr di cross di De Paul e cuntune conclusion di Molina che e ven parade vie. Ae fin dal prin timp Muriel al segne il gol dai doi a zero, ma l’Udin al à il snait di rispuindi daurman e prime de polse al rive a dismiezeâ il disvantaç cun Pereyra che al impire Gollini su assist di Molina, un dai miôrs dal Udin.

La seconde frazion si vierç cun Gasperini che al lasse fûr Muriel e Gosens par meti dentri Ilicic e Djimsiti. I bergamascs a tornin al atac e Musso prime al pare un tîr di Zapata e po nol à fastidis suntune conclusion di Pessina. La pression dai parons di cjase no va la mancul e Zapata e De Roon a àn ancjemò altris buinis ocasions che però no disfrutin cemût che al coventarès. L’Udin nol rive a fâ nuie di plui che difindisi: i aversaris no i permetin di inviâ cuissà ce azions. Gotti al rpove a cambiâ alc: al clame fûr Okaka e Zeeeglar e al mande dentri Llorente e Stryger Larsen.

La sielte dal tecnic dal Udin e je chê juste parcè che dopo vot minûts propit il danês al cjate la strade dal gol. Magari cussì no, però, a pene fats i cambis dal Udin, i bergamanscs a segnin il tierç gol cun Zapata che al aprofite di un assit golôs di di Malinovskyi. L’Udin al ridûs la distance cuasi daurman, dopo che Gotti al zuie ancje lis cjartis Samir e Forestieri: la azion inviade di Molina e ven disvilupade propit di Forestieri che al zire la bale a Stryger Larsen in aree che al tire a colp sigûr.

L’Udin al somee in stât di tornâ a vierzi la partide. De Paul al tire in puarte su punizion ma al mande la bale masse adalt intant che di chê altre bande dal cjamp Freuler al prodûs un tîr che nol cree fastidis a Musso. E je dome une ilusion: intant che si svicine la fin de partide, in atac la scuadre furlane no rive a fâ plui nuie e i parons di cjase si sierin ben e a sburtin ancjemò de metât dal cjamp indenant.
Juste ae fin Ilicic al profite di un erôr clamorôs di Bonifazi ma al tire fûr: e je la ultime ocasion de partide, che si siere cul sucès dai neris e blu. Pal Udin e je la seconde sconfite in rie dopo chê di dôs setemanis indaûr cuintri de Lazio.

Udinese – Lazio 0-1

This image has an empty alt attribute; its file name is udin_neri.png

La Lazio e ferme la rie di risultâts positîfs dal Udin. Ai Riçs la scuadre romane e rive a vuadagnâ ducj i trê ponts a disposizion in gracie di un print timp zuiât cun plui atenzion e cun plui precision de formazion furlane, rivant a segnâ cun Marusič, e di une seconde frazion di resistence denant de organizazion e de determinazion dai blancs e neris.

Ancje cuintri de Lazio Gotti al sielç il scheme di partence dal 3-5-1-1: Musso il puarte, Becao, Bonifazi e Nuytinck in difese, Molina, De Paul, Walace, Makengo e Stryger Larsen in mediane, Llorente in atac e Pereyra daûr di lui, par poiâlu in atac e par mantignî lis conession cu la seconde linie. Inzaghi al rispuint cul 3-5-2 che al viôt Reina tra i pâi, Patric, Acerbi e Radu in difese, Lazzari, Milinković Savić, Leiva, Luis Alberto e Marusič in meidane e Immobile e Muriqi in atac.

La partide si vierç cuntune fase di studi di sù par jù une desene di minûts. Lis scuadris a son metudis in cjamp in mnaiere cuasi speculâr e si neutralizin inte fasse mediane. Cul passâ dal timp la Lazio e mostre di vê alc in plui tes gjambis, tai pîts, tal cûr e tai polmons. I ospits a fasin zirâ di plui e miôr la bale e a rivin a fasin viodi des bandis di Musso, un pôc par merit lôr e un pôc pes busis lassadis dal Udin, che al piert plui di cualchi bale inte fase di jessude e di impostazion.

La Lazio e sburte soredut dilunc de corsie di diestre là che Luis Alberto e Marusič a son une vore atîfs e a profitin ancje de zornade grise di Becao e de scjarse cuviertidure di Molina. Propit Luis Alberto al è il prin che i da il so bon ce fâ a Musso cuntune sô conclusion. I laziâi a concuistin ancje diviers corners, i blancs e neris a tegnin bot ma si viôt che a patissin la iniziative dai aversaris, che a fuarce di dâi a rivin a segnâ te ultime part dal prin timp cuntune biel tîr di Marusič. Il gol cjapât al fâs sunâ la svearine tra i blancs e neris che prime de polse a imbastissin une biele azion cun De Paul e Molina, che e ven sierade di Stryger Larsen, cuntun tîr fermât di Reina.

L’Udin al partìs cul pît just ancje tal imprin dal secont timp. La scuadre furlane e à un altri pas rispiet ae plui part de prime frazion e cun Nestorovski tal puest di Makengo al mude la sô fisionomie tatiche, cun dôs pontis veris indenant. Dopo un cuart di ore a jentrin ancje Okaka tal puest di Llorente e Forestieri par Becao e l’Udin al manten il control dal zûc e al sburte indenant, obleant la Lazio a sierâsi indaûr par difindi il vantaç.

Che la musiche e sedi une altre, in confront cul prin timp, lu mostre a clâr De Paul daurman, cinc minûts dopo tornâts dai camarins, che al lenç l’un a un: la sô conclusion e passe Reina ma e sbat cuintri dal pâl. Plui indenant al è ancjemò protagonist l’argjentin, sei tirant in puarte sei tant che sugjeridôr, cuntune biel assist par Okaka che al tire in puarte cul cjâf. L’Udin al prove a segnâ ancje cuntune zirade di Nestorovski su invît di Forestieri ma e va strucje.

La Lazio, cui cambis ordenâts di Inzaghi, e tire sù lis sôs bariduris in mediane e in difese e plui indenant e prove a rispuindi in cuintripît, cul intindiment intune maniere o in chê altre di puartâ a cjase la vitorie. In atac si le viôt avonde pôc, fale che par une iniziative dople di Immobile che prime e ven parade vie di Musso e po e cjape il pâl e par un pâr di ocasions neutralizadis di Nuytinck e di Musso.

A son plui produtîfs i blancs e neris, che tal ultin a provin ancjemò a impirâ Reina cun Okaka, cun Pereyra e cun Nestorovski, ma no rivin a mudâ il risultât, che al premie la Lazio e i permet di no pierdi teren de part plui alte de classifiche, intant che l’Udin si manten inte zone mediane de graduatorie.

Genoa – Udinese 1-1

This image has an empty alt attribute; its file name is udin_neri.png

Une altre partide zuiade cun sintiment, un altri risultât bon, un altri pont puartât a cjase che al zove ae classifiche e al spirt di dute la scuadre. A Gjenue l’Udin si dinfint ben, al imbastìs ancje diviersis azions di atac, al ten bot cuant che il Genoa al è pericolôs e tal ultin al à ancje un tic di fortune, cuant che Berhami al cjape il pâl.

L’Udin a Marassi si presente cun chel stes scheme di partence de partide cul Sassuolo: un 3-5-1-1 cun Llorente uniche ponte, cun Musso in puarte, cun Becao che al torne in cjamp dongje di De Maio e di Nuytinck in difese, cun Molina, De Paul, Walace, Arslan, Stryger Larsen in mediane e cun Pereyra daûr dal atacant basc. Il Genoa al rispuinti cul 3-5-2, recuperant tra i pâi Perin, cun Biraschi, Radovanovic e Criscito inte linie difensive, cun Zappacosta, Zajc, Badelj, Strootman e Czyborra in mediane e cu la cubie Shomurodov-Pandev indenant.

L’incuintri si invie cul Udin che al môf la bale e i parons di cjase che a cirin di fâi cuintri dun decision. Dopo dîs minûts il Genoa al cjate il gol cun Pandev: par Camplone l’atacant macedon par tirâ si jude cuntun Braç e par chel no lu fâs bon, ma dopo dal confront cul Var al scuen cambiâ idee e al sivile l’un a zero pai ros e blu. La scuadre furlane e rispuint daurman e dopo trê zîrs di orloi Pereyra al rive a impirâ Perin, ancje se l’arbitri in chest câs al viôt Llorente in fûr zûc e il risultât nol cambie.

Il prin timp al va dilunc a jessi divertent e scombatût. Ator de metât de prime frazion lis parts a cambiin: cumò al è il Genoa che al manten il possès de bale e l’Udin si ricompate par no lassâ spazi ae manovre aversarie par rispuindi in cuintripît. Di une bande, Strootman e Pandev a rivin a vierzi un troi par jentrâ inte aree blancje e nere, là che il macedon al cole dopo un contrast ma par Camplone al è dut regolâr. Di chê altre, De Paul al lance indenant Llorente però al interven Radovanovic e nol sucêt nuie. Plui indenant prime al rive un tîr masse alt di Stryger Larsen e po al è un fal net in aree di Criscito su Pereyra e il rigôr pal Udin: al tire De Paul e al segne.

Dutis dôs lis scuadris a provin a passâ in vantaç prime de polse. Chê di Gotti e à la ocasion miôr cun Llorente, che suntun cross di Stryger Larsen al salte e cul cjâf al zire ben la bale in puarte, là che Perin al rive a fermâle.

Tal secont timp la musiche e je sù par jù compagne: ecuilibri tal mieç dal cjamp e cualchi ocasion di une bande e di chê altre. De Maio cul cjâf al spaurìs Perin, Zappacosta e Stryger Larsen a son pôc fortunâts cui lôr tîrs di lontan e Perin al è ancjemò protagonist suntune iniziative pericolose di Pereyra.

Al passe il timp e i doi tecnics a sielzin di mandâ in cjamp fuarcis frescjis. In atac Ballardini al cambie Pandev cun Scamacca e plui tart Gotti al calme fûr Llorente par Nestorovski, intant che tal Genoa il puest di Strootman al ven cjapât di Behrami. Prime a son blancs e neris che a tornin a svicinâsi al doi a un cuntun biel cross di Pereyra par Nestorovski, che però nol rive a incuadrâ la puarte, e po cun De Paul che al tire di lontan une buine bale, ma Zajc le ferme e le pare vie.

Tal ultin a son i parons di cjase che a lenzin il sucès, cun Zajc, che al jentre in maniere pericolose inte aree blancje e nere ma al tire fûr, e cun Berhami che cuntun grant tîr de distance al cjape in plen il pâl. E cussì il risultât al reste chel.

Udinese – Sassuolo 2-0

bandieris-friuul

L’Udin al vinç e al convinç. Cuintri dal Sassuolo la scuadre furlane e zuie cun sintiment e e rive a segnâ un gol par timp e a puartâ a cjase ducj i trê ponts a disposizion che i permetin di rivâ juste a metât de classifiche.

Pe ocasion, compagn che pe partide cul Milan, Gotti al torne a sielzi il 3-5-1-1 tant che modul di base: Musso tra i pâi; Bonifazi, De Maio e Nuytinck in difese; Molina, De Paul, Arslan, Walace e Stryger Larsen in mediane, Llorente uniche ponte e Pereyra daûr di lui, ancje se vie pe partide si puartarà dispès ancje lui inte prime linie. Il Sassuolo al rispuint cul 4-2-3-1: in puarte al è Consigli; in difese a son Toljan, Marlon, Ferrari e Kyriakopoulos; in mediane a son Ayhan e Locatelli denant de difese e Berardi, Lopez e Traorè plui indenant a supuart de uniche ponte Raspadori.

Il prin timp al è ecuilibrât e avonde divertent. Lis dôs scuadris si difindin ben e a imbastissin ancje cualchi biele zuiade. Dopo undis minûts e je une buine cumbinazion tra De Paul e Pereyra che però no à nissun impat, stant che nol è nissun compagn inte aree di rigôr in stât di tirâ in puarte. Plui indenant il Sassuolo al rive a jessi plui pericolôs, cuntun cross sul secont pâl di Berardi par Kyriakopoulos, che al tire ma Musso le pare vire in corner, e ancjemò cuntun pâr di balons metûts tal mieç, cun Musso e De Maio che a intervegnin cence padins.

Passade la metât dal prin timp l’Udin al recupare cjamp e si fâs vîf indenant cun Stryger Larsen che al ricêf un bon sugjeriment di Walace, si sposte in posizion centrâl e al lasse partî un diestri che al impegne Consigli, che al è brâf a meti un blec e a alçâ la bale parsore de travierse. Il puartîr dal Sassuolo al è ancjemò protagonist rispuindint cuntun interven cu la man vierte a une biele zirade al svol di Llorente che al profite di un cross pinelât di De Paul. Prime de polse al rive il gol dal atacant basc, che al siere inte maniere miôr un assist di Molina e al segne il so prin gol cu la maie de scuadre furlane.

La seconde frazion si vierç cul Sassuolo al atac, sburtât des energjiis frescjis di Caputo e Djuricic, jentrâts tal puest di Traorè e Raspadori. La pression dai ospits no prodûs alc e ce: tai prins dîs minûts a son dome un cross fûr misure di Locatelli e un tîr di Berardi che al ven parât vie di Nuytinck. Al è plui insidiôs l’Udin cuntune azion di Stryger Larsen e po cuntune conclusion di De Paul che al cjape la crosere dai pâi cun Consigli batût, intant che Maggioni al sivile il fûr zûc.

La pression dal Sassuolo si manten cul passâ dai minûts ma e va dilunc a no dâi di lavorâ a Musso, intant che l’Udin al siere ducj i spazis e al rispuint in cuintripît, creant ancjemò cualchi probleme ai ospits, cemût che al mostre ancje il fal di man in aree di Locatelli a pôcs minûts de fin: Maggioni al sivile, De Paul al è pront par tirâ, ma dut al ven anulât daûr de indicazion dal Var, che al ricognòs un fûr zûc di Molina, autôr dal cross che al ven tocjât dal difensôr emilian.

L’Udin al lenç ancjemò il doi a zero cuntun tîr di Stryger Larsen, che al cjate su la sô strade un altri bon intervent di Consigli, po al ferme cun Musso une canonade di Djuricic e ae fin, al tierç minût di recupar, al incrès il vantaç cun Pereyra, che su assist di De Paul al met ancje la sô firme sot dal risultât finâl.

Milan – Udinese 1-1

This image has an empty alt attribute; its file name is udin_neri.png

L’Udin al lenç la vitorie, ma al scuen contentâsi dal un a un. Al ten bot denant dal Milan e fintremai ur fâs pôre ai ros e neris, massime vie pal secont timp cuant che al passe in vantaç cun Becao. La partide e somee inviade inte direzion miôr pe scuadre furlane, ma juste tal ultin, ae fin dal recupar, inte aree di rigôr blancje e nere, Stryger Larsen al fâs un fal di man clamorôs, Massa al sivile e Kessie al segne dal discut.

I blancs e neris si presentin a San Siro cun chê di puartâ a cjase almancul un pônt: ben sierâts indaûr e pronts a colpî in cuintripît, cuntun 3-5-1-1, là che tal mieç a son Makengo, Arslan e De Paul, cun Molina e Zeegelas tes corsiis laterâls, in difese, denant di Musso, si viodin Becao, Bonifazi e Nuytinck, Nestorovski al è la uniche ponte e daûr di lui lu saponte Pereyra. Il Milan al rispuint cul 4-2-3-1: Donnarumma in puarte; Kalulu, Kjaer, Romagnûi e Hernandez in difese; tal mieç a son Tonali e Kessie e plui indenant Castillejo, Diaz e Rebic, cun Leao di ponte.

Il prin timp al è blocât, ruspi e puntît cuntune vore di fai. I blancs e neris a son ben organizâts, si sierin cun sintiment e a pontin a imbastî verticalizazions sveltis, che però a saltin fûr di râr, stant che il Milan al fâs sù par jù compagn, une vore atent e sierât daûr e in mediane. Ator de metât de prime frazion a rivin lis primis ocasions: pal Milan al è un tîr di Diaz parât di Musso, pe scuadre furlane un tentatîf di Nestorovski fûr bersai. Plui indenant, tra fai e cartelins zâi a rivin une zirade di Pereyra che e sbat intor di Zeeglaar e un slalom cun tîr di Castillejo, che al ven neutralizât cu la ponte dal pît di Musso.

Il prin timp si siere sul zero a zero cul Udin che al fâs rindi la sô concretece inte fase difensive e il dinamisim di Pereyra in atac. Dopo de polse la scuadre furlane e à daurman une buine ocasion: bale indaûr di Hernandez e scat di Pereyra, che al recupare la bale, al passe Donnarumma e al met la bale tal mieç par Nestorovski, che al tire cul cjâf e la bale e larès a finîle in puarte se nol rivàs Tomagnoli a salvâ su la linie. Il Milan al rispuint cuntune conclusion alte di Meitè e cuntun tîr cul cjâf di Kessie che al ven parât di Musso.

Gotti al clame fûr Makengo e al mande in cjamp Llorente, cun chê di zuiâ cun plui pês ofensîf e cun plui fisicitât. E rive une gnove biele ocasion di De Paul, che al robe la bale a Hernandez e al tire in puarte ma nol incuadre il bersai. E je une sorte di anticipazion di ce che al nas trê minûts plui tart: corner e Becao che al salte plui indalt di ducj e al segne, zovantsi ancje di un moviment di Nestorovski che al ingjane Donnarumma.

Il Milan al prove a dreçâ la partide, ma nol rive a cumbinâ alc e ce, almancul in principi. Anzit, al è Pereyra che cuntun cross al cîr la conclusion cul cjâf di Llorente, che però al fâs fal su Romagnoli e nol siere la azion. A passin i minûts, i ros e neris a provin a concludi cun Leao che al tire fûr e l’Udin al à pardabon la pussibilitât di puartâ a cjase i trê ponts.
I blancs e neris a protestin par un contat in aree tra Kjaer e Llorente, che par Massa al è regolâr. In plen recupar a rivin ne conclusion di Hernandez fûr dal spieli de puarte e po, juste tal ultin, un intervent difensîf inte aree blancje e nere di Stryger Larsen che al tocje la bale cu la man. Magari cussì no, no son dubis, al è rigôr: Kessie al va sul discut e al segne l’un a un finâl.