Doi goi, trê ponts e une bocjade di aiar bon. L’Udin a Lecce al rive a vinci e salacor fintremai a convinci. E soredut al rive a fâ chel scat indenant che al coventave par saltâ fûr de posizion piês in classifiche. Cumò i blancs e neris si cjatin a cuote 33, scjavaçant Empoli e Frosinone e cun chei stes ponts dal Cagliari, ma cuntune diference tra goi cjapâts che e je miôr di chê de scuadre sarde. A son ancjemò dôs partidis di zuiâ e cumò la salvece e somee par sigûr mancul lontane (o magari ancjemò miôr).
Cuintri de formazion zale e rosse, che e je za sigure di restâ in serie A e che si presente in cjamp cence zuiadôrs impuartants tant che Banda, Sansone e Piccoli, la scuadre di balon furlane e zuie une partide discrete, palesant daurman il so intindiment di concuistâ ducj i ponts a disposizion. Cundut achel a son i parons di cjase i prins a jessi pericolôs in atac cun Krstovic che al oblee Perez a fâ un salvament. I blancs e neris si fasin viodi des bandis di Falcone plui indenant, prime cuntune conclusion cul cjâf di Kristensen fûr bersai e po cun Success che al ricêf une buine bale di Samardzic, le controle ben e le tire dal limit lenzint la crosere tra secont pâl e travierse.
A fuarce di dâi, l’Udin al rive a segnâ tal ultin cuart di ore dal prin timp: cross di Payero, tîr cul cjâf di Lucca e bale tal sac, daûr di Falcone, e al è un a zero pai blancs e neris. La prime frazion si siere cul Udin in vanytaç, intant che il secont timp al è segnât, almancul in principi, dal Udin che al manten il control de situazion, cul Lecce che nol rive pardabon a provâ a dreçâ la partide, palesant limits fuarts in fase di costruzion.
La situazion e cambie inte part mediane de seconde frazion, dopo che Gotti al decît di clamâ fûr Blin e Dorgu e di meti tal lôr puest Berisha e Pierotti. Al è propit l’ex zuiadôr dal Colon chel che al rive a jessi produtîf e pericolôs in atac: il so tîr al è fuart e precîs, ma Okoye al sta in vuaite e si vuadagne il pagnut cuntun intervent perfet.
I parons di cjase a vevin provât a impirâ il puartîr blanc e neri za cun Pongracic, che al inviave e po al sierave une azion dilunc vie de corsie centrâl, ma cuntun tîr fûr bersai. Plui tart al rive un tîr cul cjâf di Baschirotto e ancjemò une volte Okoye al siere la puarte blancje e nere.
I intervents dal puartîr adun cuntun ciert dinamisim ofensîf, ispirât di un Samardzic in cundizions miôr che vie pal prin timp, i permetin al Udin di mantignî il vantaç e fintremai di dopleâlu.
Al è ce che al sucêt juste tai ultins minûts de partide, cuant che Davis al tire in puarte cul cjâf, Falcone al pare vie la bale cu la man drete, Samardzic le recupare e cun precision le met dentri. E al è doi a zero.