Su Dotori + Nicole Coceancig + Dixebra + Brieg Guerveno = Babêl Europe 14/2023

Al rive il mês di Lui e su Radio Onde Furlane, che juste pôcs dîs indaûr e à screât il so palinsest pal Istât, al torne Babêl Europe, il program cuindisinâl dedicât a lenghis, musichis, minorancis e nazions cence stât, che la sô pontade numar 14 dal 2023 e je in programazion vuê a 11 a buinore, doman a une dopo di misdì e ancjemò sabide ai 8 di Lui a une e mieze dopo di misdì sui 90 Mhz, sui 90.200 Mhz, sui 105.600 Mhz e su www.radioondefurlane.eu.

Dentri dal gnûf apontament dedicât ae produzion artistiche e soredut musicâl intes lenghis minorizadis de Europe la atenzion e vignarà pontade, ancje lant daûr des anticipazions fatis dôs setemanis indaûr, prin di dut sul disc di Su Dotori / Dr. Drer , Raju.

Cun di plui si darà une prime voglade ae liste dai protagoniscj dal Festival Interceltic, che si davuelç dal 4 i 13 di Avost a An Lorient / Lorient in Bretagne, e si fevelarà ancjemò de edizion 2023 di Suns Europe e dal festival Fevelis. Par chel, dongje di chê di Su Dotori, si scoltarà ancje la musiche di Nicole Coceancig, di Brieg Guerveno e dai Dixebra.

Dopo des trê emissions di cheste setemane si podarà scoltâ (o tornâ a scoltâ) la gnove pontade di Babêl Europe ancje in podcast sui canâi Spreaker, Deezer e Spotify di Radio Onde Furlane.