A Kontra Korrent + Roba Estesa + Brams + Cesk Freixas + Su Dotori + Suns Europe + Franco Giordani + Lontras + Ziztada & Rlantz = Babêl Europe 15/2023

Ancje par cheste setemane tal palinsest di Radio Onde Furlane al cjate spazi Babêl Europe, il program cuindisinâl dedicât a lenghis, musichis, minorancis e nazions cence stât. La sô pontade numar 15 dal 2023 e je in programazion vuê a 11 a buinore, doman a une dopo di misdì e ancjemò sabide ai 22 di Lui a une e mieze dopo di misdì sui 90 Mhz, sui 90.200 Mhz, sui 105.600 Mhz e su www.radioondefurlane.eu.

Dentri dal gnûf apontament dedicât ae produzion artistiche e soredut musicâl intes lenghis minorizadis de Europe la atenzion e vignarà pontade ancjemò su lis novitâts discografichis e su festivals e events di tai “babelic” che si davuelzin in Friûl vie pal Istât.
Si fevelarà de continuazion de gnove edizion di Suns Europe, cui concierts previodûts vie par cheste setemane e par chê che e ven, dal inviament de rassegne Inniò – Art dai Lûcs di Mont, che si davuelç in Cjargne dai 29 di Lui ai 20 di Avost, e di almancul cualchidun dai spetacui di Musiche dal Mondo/Glasbe Sveta, inmaneât vie par chescj dîs tal Friûl gurizan.
Cun di plui a vignaran ricuardadis la jessude di Trente, il disc dal vîf dai FLK, che al vignarà presentât ator cuntune schirie di concierts, e la tornade su lis senis de storiche band sarde dai Askra ai 5 di Avost in Sardegne.

Par ce che al tocje la musiche di scoltâ, il percors babelic al tignarà dongje Sardegne, Paîs Catalans, Friûl, Galizie e Paîs, ancjemò ae discuvierte dai contignûts dal disc gnûf di Su Dotori / Dr. Drer , Raju, e cu li selezions dai repertoris di A Kontra Korrent, di Franco Giordani, di Lontras e di Ziztada & Rlantz.

Dopo des trê emissions di cheste setemane si podarà scoltâ (o tornâ a scoltâ) la gnove pontade di Babêl Europe ancje in podcast sui canâi Spreaker, Deezer e Spotify dedicâts.