Fabian Riz & Orko Trio + Ezpalak + Lhi Balòs + Ursina + Pira = Babêl Europe 16/2021

Intant che cun domenie stade Suns Europe 2021 al è rivât ae conclusion, cheste setemane su Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Inte gnove pontade, che e cjate spazi inte programazion di vuê ai 3 di Avost (h. 11), doman ai 4 (h. 13) e sabide ai 7 (h. 13.30), si fasarà une sorte di belanç de manifestazion, fevelant des proiezions dai cines Pozzis, Samarcanda di Stefano Giacomuzzi e Bogre di Fredo Valla, dai apontaments leteraris (la presentazion dal libri di Cira Crespo, Baginen, e l’incuintri su Trobadors, Dante, Ocitanie, Friûl e Europe) e dai concierts, cu la musiche di Fabian Riz e Orko Trio, dai Ezpalak, di Ursina, dai Lhi Balòs e dai Pira.

Dopo des trê emissions ancje cheste pontade di Babêl Europe si podarà tornâ a scoltâle su Spreaker, su Spotify e su Deezer

Caamaño & Ameixeiras + Land of Maybe + Liher + Daniela Pes + Brût & Madone + Trabeat = Babêl Europe 15/2021


Vuê al tache Suns Europe 2021 e su Radio Onde Furlane e torne Babêl Europe, la trasmission cuindisinâl dedicade a lenghis, musichis, minorancis e nazions cence stât.

Inte gnove pontade dal program si fevelarà in detai de gnove edizion dal festival european des arts intes lenghis minorizadis, che al va dilunc fintremai al 1n di Avost cun concierts, incuintris e proiezions di cine in nûf diviersis localitâts dal Friûl. Cun di plui al sarà spazi ancje pal festival de culture sarde Arrèxini, che si davuelç dai 24 ai 25 di Lui a Biddanoa de Forru, e di Occit’Amo, rassegne in vore intune part des Valadis Ocitanis dal Piemont.

E soredut si scoltarà la musiche di cualchidun dai protagoniscj di Suns Europe 2021 : des galizianis Caamaño & Ameixeiras ae sarde Daniela Pes, dai bascs Liher ai faeorês Land of Maybe e fintremai ai furlans TRABEAT e Brût & Madone.

L’apontament cun Babêl Europe (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion ondefurlane.eu/player) al è par vuê, martars ai 20 di Lui a 11 in direte, e po in repliche tal dopo di misdì di miercus ai 21 (h. 13) e di sabide ai 24 (h.13.30). Dopo des trê emissions de setemane ancje cheste trasmission si podarà tornâ a scoltâle su Spreaker, su Spotify e cumò ancje su Deezer.


Vôs de Basse 2020, la culture furlane e la scriture par furlan no àn pôre dai virus

La lenghe furlane, la culture furlane e la scriture par furlan no àn pôre di nussun virus: ni dal Covid-19 e nancje di chei dal prejudizi. Lu conferme la tierce edizion dal concors leterari in lenghe furlane Vôs de Basse, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane.

Sabide ai 24 di Otubar, inte sale conferencis di Vile Dora si son davueltis, in sigurece, lis dôs cerimoniis di premiazion, une intal prin dopomisdì, pai fantats, e chê altre aes 6 e mieze sot sere, pai grancj che a vevin partecipât intes sezions “Poesie” e “Narative” e framieç di une e chê altre al è stât il spetacul di musiche e peraulis “Un lenghe, un doman” cul atôr Michele Polo e il musicist Giorgio Parisi.

Ancje par chest an il concors al à stiçât centancj di lôr a scrivi par furlan.
Inte sezion “Students” a son stâts premiâts Davide Fogolini e Luca Turolo de Scuele secondarie di prin grât “Italo Svevo” di Vildivar, cu la poesie “Il mâr” (tierç premi), Giorgio Pivetta, ancje lui di Vildivar, cun “L’Autun” (secont premi) e Sofia Pinto, di Palme, cul componiment “La mê mame” (prin premi).

La classifiche finâl de sezion “Poesie”, invezit, e viôt Giacomo Vit, cun “Mê mari e il mâr” (tierç
premi), Chiara Savorgnan, cun “Nono” (secont premi) e Stefano Lombardi, cun “Lagrimis” (prin premi), intant che pe “Narative” a son stâts premiâts David Ballaminut, cun “Un storie piçule” (segnalazion), Diego Navarria, cun “La crepe” (tierç premi), Astrid Virili, cun “Fueis” (secont premi) e Gianfranco Pellegrini, cun “Torse Sand Creek” (prin premi e premi dal public)

Vie pe cerimonie di premiazion la ostarie leterarie di Contecurte e à let lis contis vincidoris, biel che lis poesiis a son stadis metudis in musiche di bande di Davide Sciacchitano e Jacopo Casadio dai Luna e un Quarto.

Pe ocasion e je stade presentade ancje la antologjie cui vincidôrs di dutis lis edizions passadis, publicade de Societât Filologjiche Furlane dentri de golaine “Agâr”.

La cerimonie e je stade inmaneade inte suaze de Setemane de Culture Furlane e cu la poie de ARLeF – Agjenzie Regjonâl pe Lenghe Furlane.

Ocitanie, Friûl… e Suns Europe. Sabide ai 19/9 a Trave peraulis e musiche cun Sergio Berardo e cun Angelo Floramo

No ducj a san che il “passepuart” che i à permetût a Leonardo di jentrâ te cort di Milan e di inviâ alì la sô stagjon plui impuartante e je stade la musiche: lis dotis musicâls e un strument origjinâl fat sù di lui,

Plui in gjenerâl la musiche e pues deventâ ancje l’imprest miôr par che une comunitât – cu la sô culture, la sô storie e la sô lenghe – e cjapi cussience di se e si fasi cognossi – e ricognossi – ancje fûr dal so teritori.

Chest al vâl par tantis comunitâts minorizadis ator pe Europe e in particolâr pe Ocitanie. In dutis lis tieris “d’Oc” e massime tes Valadis Ocitanis dal Piemont, la musiche e à judât tancj di lôr a tornâ a scuvierzi la lenghe proprie e la identitât linguistiche, culturâl e teritoriâl e po a fâle cognossi e ricognossi ator, dapardut. La musiche – des melodiis patriarcjinis a Mainerio par rivâ ae gnove musiche furlane – e à zuiât une funzion identitarie impuartante ancje in Friûl.

Sabide ai 19 di Setembar l’ultin apontament cun Suns Europe 2020 al è un viaç inzirlôs par etis e tieris diferentis cu la musiche des peraulis e cu lis peraulis de musiche. Tacant des 9 di gnot, inte place di chê frazion dal Comun di Lauc, in Cjargne, il public al vignarà compagnât in chel percors di dôs vuidis di gale: l’ocitan Sergio Berardo e il furlan Angelo Floramo.

Sergio Berardo al è un innomenât polistrumentis e cjantant ocitan. Al è la vôs e la anime dai Lou Dalfin, il grup plui impuartant des Valadis Ocitanis dal Piemont, e al è cjapât dentri di cetancj progjets di ricercje, di promozion e di reinvenzion de musiche popolâr ocitane. Tra chescj al è Gran Bal Dub, crosere di folk, reggae e eletroniche, metude adun cun Madaski, tastierist dai Africa Unite.

Angelo Floramo al è nassût a Udin, al insegne storie e leterature e al colabore di consulent pe biblioteche Guarneriane di S. Denêl. Al sgarfe tai archivis, al scrîf par rivistis sei par furlan che par talian e al è autôr di cetancj libris: tra chescj a son Balkan Circus (2013), L’osteria dei passi perduti (2017) e La veglia di Ljuba (2018).

Suns Europe 2020, dai 22/8 ai 19/9 in Friûl sunôrs, visions e peraulis pal rispiet dal dirit ae lenghe e dal dirit ae diversitât

Suns Europe al torne, al mude un tic la sô muse e al manten, rinfuarçantlu ancjemò di plui, il so spirt furlan e internazionâl. La edizion di chest an dal festival european des arts intes lenghis di minorance, inmaneât de cooperative Informazione Friulana, la cjase editore di Radio Onde Furlane, cul jutori finanziari de Regjon Friûl-VJ e de ARLeF (Agjenzie Regjonâl pe Lenghe Furlane) e cu la poie dal Comun di Udin e dal Etxepare Euskal Institutua dal Paîs Basc, no si davuelç jenfri la fin di Novembar e i prins di Dicembar, ma e sarà une rassegne estive.

Il cambi di stagjon nol è l’unic element di novitât di Suns Europe 2020. Cun di fat inte sezion musicâl nol è previodût nissun concors: nol è stât dât fûr nissun bant, no je stade fate nissune selezion e nol vignarà dât nissun premi. Cundut achel, tra musiche, cine e leterature, ancje chest an al sarà cetant – e cetant bon – ce scoltâ, ce sintî, ce viodi, ce cjalâ e ce lei. Tacant de serade di sabide 22 di Avost fintremai al ultin apontament dai 19 di Setembar al sarà un mês di sunôrs, di visions, di peraulis, di storiis, di personis e di progjets, espressions vivis e vivarosis di une Europe unide e plurâl, che e domande a fuart il rispiet dal dirit ae lenghe e dal dirit ae diversitât.

Suns Friûl, musichis e lenghis dal Friûl diferent e plurâl
Il program al vignarà screât cun Suns Friûl, vetrine de produzion musicâl contemporanie tes lenghis “altris” dal Friûl. Sul palc di Place Venerio a Udin, tacant di nûf di sere, a saran Corte di Lunas, Alvise Nodale, Dissociative TV e Brût & Madone, che a mostrin cemût che la lenghe furlane e pues vignî doprade in maniere une vore interessante adun cui lengaçs dal epic folk, de cjançon di autôr, dal punk rock e dal metal core, e i Ostajki, formazion in balance tra folk, rock e psichedelie che e cjante par sloven. La serade e vignarà vuidade di Raffaele Serafini e di Serena Fogolini de ostarie letararie virtuâl Contecurte.

“O que arde”, il film par galizian che al à concuistât Cannes
La setemane che e ven si tornarà a tacâ cul cine, cu la proiezion, sabide ai 29 a nûf e un cuart di sere a Udin in Zardin Grant, te aree verde “Loris Fortuna” (in câs di ploie l’apontament al è li dal Visionario), di O que arde, il biel film par galizian di Oliver Laxe, che l’an passât al à vuadagnât diviers ricognossiments impuartantons, tacant dal premi de critiche inte sezion “Un certain regard” dal festival di Cannes.

Storie e leterature, memorie e atualitât
Al sarà spazi ancje pe leterature e pe storie. Sabide ai 29 a sîs e un cuart sot sere a Udin, lì de librarie Friuli, e sarà la prime presentazion in assolût intal Stât talian di Guillem, il libri de gjornaliste catalane Núria Cadenes che al conte la storie di Guillem Agulló i Salvador, zovin sportîf, militant antifassist e indipendentist, che al è stât sassinât di un trop di fassiscj ai 11 di Avrîl dal 1993 a Montanejos, tal Paîs Valenzian. Lunis ai 31 a vot e mieze di sere, a Murùs inte place dal Comun, il storic basc Joseba Asiron e il scritôr furlan Angelo Floramo a saran protagoniscj dal dialic in cuatri lenghis (furlan, basc, talian e spagnûl) dal titul “Conquista! Storiis resistentis tra Navare e Friûl”.

O ce biel cjistiel a Udin, o ce biel conciert di gale!
Par ce che al tocje la musiche, la serade che sù par jù e corispuint cun chês che vie pes edizions passadis di Suns Europe a vevin clamât dongje un public calorôs e numerôs li dal Teatri gnûf “Zuan di Udin”, si fasarà ai 30 di Avost intal plaçâl dal Cjistiel di Udin, là che si podarà gjoldi des esibizions de cjantante ladine Martina Iori cul so grup, de rapper basche La Basu, des rockers galesis Adwaith, dai sarts Bujumannu & Jumbo dal innomenât grup reggae Train To Roots e dal progjet furlan di esportazion di Laura Giavon & Drumlando. Presentadôr de serade il rapper furlan Doro Gjat.

In Setembar ancjemò musiche e leterature jenfri Friûl di Mieç, Cjargne e Gurizan
Suns Europe 2020 al larà dilunc ancje vie pal mês di Setembar cui concierts de catalane Joana Gomila a Lavarian sabide ai 5 e a Dartigne domenie ai 6 e dal basc Paxkal Irigoyen ai 12 a Puçui e ai 13 a Romans dal Lusinç e cul event speciâl dedicât ae Ocitanie, al Friûl e ae Europe che si fasarà a Trave sabide ai 19.

Informazions di servizi
Ducj i apontaments a son a jentrade libare e sore nuie, cu la ecezion de proiezion di O que arde, che e je a paiament. Pe serade di Suns Friûl, e pal conciert dai 30 di Avost in Cjistiel, par vê garantît il puest in sigurece e in salût, e covente fate la prenotazion midiant dal sît www.sunseurope.com, là che si cjatin ancjemò altris informazions in cont dal festival e dai siei protagoniscj, compagn che su Facebook.

“La Patrie Sot dal Tei”. Ai 23 di Lui a Cormons un altri incuintri public cul “gjornâl dai furlans che no si rindin”

Ocasions interessantis di incuintri e di confront tra il mensîl La Patrie dal Friûl e la sô int: sei cun cui che al è za usât a lei il gjornâl dai furlans che no si rindin che cun chei che magari pe prime volte si svicinin al sfuei che al continue la storie de testade fondade tal 1946 di Felix Marchi e pre Josef Marchet. Si pues presentaju cusssì i diviers apontaments dal titul La Patrie Sot dal Tei, che a viodin diviersis firmis de Patrie presentâ al public il gjornâl, i siei contignûts e la sô maniere di “lei” e di “contâ” il Friûl e il Mont.

La schirie di events di cheste fate e je stade screade Joibe stade, ai 16 di Lui, a Cjarlins. L’apontament, che al à screât ancje il cartelon di events e spetacui pal Istât, #CarlinoEstate2020, al è stât une vore interessant e cuntune partecipazion vivarose.

Al è stât un incuintri segnât di une buine dose di furlanetât “sane e cussiente”, la che si à fevelât dal Friûl e dal rest dal mont, di storie, di culture e di atualitât. Tal Parc dai Marinârs dal paîs de Basse il confront di ideis al è stât inviât cuntune riflession interessante in cont di lenghe e identitât fate dal sindic di Cjarlins, Loris Bazzo, e si à disvilupât cui intervents dal diretôr de Patrie, Walter Tomada, e dal president de Clape di culture Patrie dal Friûl, che e je la editore dal gjornâl, Andrea Valcic.

Si à po discorût plui in detai di media e di storie: l’ex diretôr Andree Venier al à pontât la sô atenzion sul ûs de lenghe furlane in internet e in particolâr intes rêts sociâls, intant che Diego Navarria, ex sindic di Cjarlins e ex president de Assemblee de Comunitât linguistiche furlane, che al sta daûr di une rubriche dedicade ae storie dal Friûl e dai patriarcjis, al à tocjât il teme de cognossince e de meorie storiche. Cun di plui a àn zontât alc di interessant ancje diviers di lôr, tacant di Ivan Petrucco e Andrea Dri, sindics un di Cjasteons di Strade e chel altri di Porpêt, e dal sindicalist Roberto Muradore.

Dopo dal incuintri di Cjarlins, il program di La Patrie Sot dal Tei al va dilunc cuntune schirie di altris apontament, tacant di chel di cheste Joibe, ai 23 di Lui a Cormons, inmaneât adun cu la Enoteche in place XXIV di Mai a siet sot sere, cu la partecipazion di Andrea Valcic, di Diego Navarria e di Marco Stolfo.

La setemane che e ven, ai 31 di Lui, simpri a siet sot sere, il tierç apontament cu La Patrie Sot dal Tei al sarà a Plasencis cu la partecipazione di Walter Tomada, di Andrea Valcic, di Diego Navarria e di Roberto Muradore.

Informazions in cont dai diviers events di La Patrie Sot dal Tei si cjatin su la pagjine Facebook da La Patrie dal Friûl.

Loris Vescovo Quartet, trê concierts ator pal Friûl e un progjet gnûf in anteprime

Trê apontaments di no pierdi par cui che al è a stâ in Friûl e une biele gnove in cont de produzion musicâl par furlan che e vâl par ducj e in ogni dontri. Vinars ai 3 di Lui a Puçui, sabide ai 4 a Vierse di Romans dal Lusinç e domenie ai 5 al Cuel di Sant Martin di Dartigne, dopo un pôc di timp di cidin, si podarà tornâ a viodi e scoltâ dal vîf Loris Vescovo, che di aromai vincj agns al è un dai cjantautôrs furlans plui ispirâts e interessants.

In cheste ocasion l’om di Trivignan al incrose il so snait cun chel di altris musiciscj di grande personalitât tant che il produtôr e polistrumentist Leo Virgili, altri non di ponte de sene furlane plui vivarose, plui inovative e plui cognossude ancje tal forest, il bassist e viloncelist Massimo Silverio, e il baterist e percussionist Nicholas Remondino.

Si presentin adun cul non di Loris Vescovo Quartet par une schirie di spetacui che si fondin soredut su lis gnovis cjançons, scritis di Vescovo vie pai ultins mês, che dentri de Sierade a vignaran publicadis suntun gnûf album.

Une di chês, che il so titul al è “Sotans”, e ven programade za di cualchi dì cuntune cierte frecuence su Radio Onde Furlane e e somee pardabon interessante. Une anticipazion golose dai concierts di chescj dîs e soredut dal disc che al vignarà e che si clamarà “Adalt”, parcè che, cemût che al sclarìs Vescovo tal articul chi da pît, al tignarà dongje «cjançons che a àn in comun il teme de altece, de verticalitât, de gravitât, de distance tra alt e bas e tra “sorestants” e “sotans”, de sclavitût e de liberazion e de spiritualitât leade ae tiere»

1950-2020, i 70 agns des Lotis dal Cormôr. Storie e memorie vive, tiere, lavôr e identitât

Vuê al cole il setantesim inovâl dal inviament des Lotis dal Cormôr, il grant siopar par ledrôs che al inflamà la Vierte e l’Istât dal 1950 inte Basse Furlane.

In ocasion di cheste ricorence, di vuê fint a domenie, al è disponibil su AdessoCinema, la plateforme streaming curade di Visionario, Cinemazero e Cineteca del Friuli in colaborazion cu la Tucker Film, il documentari Lis Lotis dal Cormôr, che al conte chei fats e al met dongje lis vôs di diviers di lôr che a jerin implicâts in chê proteste: zornadis interiis di lavôr a gratis inte canalizazion dal Cormôr, propit cun chê di sburtâ il guvier talian a finanziâ chês oparis di bonifiche, a pro de ocupazion e de incressite de produtivitât agricule des tieris de Basse Furlane, e cul pericul continui di cjapalis de Celere.

La metude in rêt dal documentari e je dome che la prime di une schirie di iniziativis che a vignaran metudis adun vie pe seconde part dal 2020 propit cun chê di memoreâ chest aniversari “taront”. Un program di apontaments, jenfri art, musiche, comunicazion e aprofondiment storic e sociâl, coordenât de associazion Artetica e de Sezion ANPI Premoli, metût adun cu la colaborazion di diviers sogjets: ANPI Udin; CGIL Udin; cooperative Informazione Friulana / Radio Onde Furlane; Istitût Furlan pe Storie dal Moviment di Liberazion; CIRF e DIUM de Universitât dal Friûl; associazion KLARIS di Udin; Auser; Primacassa F-VG; Comuns di Cjarlins, Cjasteons di Strade, Çarvignan, Muçane, Palaçûl, Prissinins, Roncjis e San Zorç di Noiâr.

Al è une vore impuartant mantignî vive e cussiente la memorie di chê mobilitazion popolâr pal lavôr e pe dignitât, determinade e pacifiche, cundut de repression violente des autoritâts. Chê des Lotis dal Cormôr e je une des pagjinis plui interessantis e magari cussì no ancjetant pôc cognossudis de storie dal Nûfcent in Friûl.

Di une bande chê esperience, che e veve cjapât dentri su par jù vincjmil di lôr, e manten ancjemò in dì di vuê un puest impuartant inte memorie coletive e inte identitât de int de Basse Furlane. Di chê altre, però, chel ricuart e chê cussience a son lâts al mancul, un pôc par vie dal passâ dal timp e dal fat che tancj di lôr, implicâts personalmentri in chê mobilitazion, magari cussì no no son plui su cheste tiere, e un pôc par chê tindince ae dismentie che in Friûl e tocje cetantis vicendis e personis, che – cemût che o scrivevin cualchi an indaûr – a deventin “memorie platade” par vie di une operazion di rimozion coletive, dulà che no si pues fâ di mancul di vualmâ une vere strategjie di caratar ideologjic, stant che a son fats e sogjets che a mostrin un Friûl vêr, che al è diviers e alternatîf rispiet a cierts lûcs comuns.

Nus fâs plasê che in ocasion di chest inovâl si torni a fâ memorie vive des Lotis dal Cormôr. Par no dismenteâ e par tornâ a meti in comun chel patrimoni preseôs di valôrs, di solidarietât e di identitât che chês personis e chei fats nus àn lassât in ereditât e che nus coventin une vore ancje in dì di vuê.

LaipNessLess + Paolo Fresu + Magalì Sare + Mocker’s + Y Sybs = Babêl Europe 24/2019

Vuê, doman e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ) al torne Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

In chê che e podarès jessi la ultime pontade dal 2019 si tornarà a fevelâ de ultime edizion di Suns Europe e in particolâr de serade finâl dai 30 di Novembar stâts. E sarà la ocasion par tornâ a scoltâ la vincidore dal concors musicâl, la cjantante catalane, Magalì Sare, e chei altris doi grups segnalâts de jurie internazionâl, i bascs Mocker’s e i galês Y Sybs.

E sarà ancje la ocasion par scoltâ i LaipNessLess, che juste sabide stade a àn screât il lôr disc gnûf, Cormôrra, e l’innomenât trombetist e flicornist Paolo Fresu, che domenie stade al jere in Friûl, a Pordenon, adun cun Daniele Di Bonaventura par une serade inmaneade de Accademia Naonis.

Ancje cheste pontade di Babêl Europe, dopo des sôs trê emissions vie pe setemane (vuê in direte a 11 a buinore, doman in repliche a une dopo di misdì e ancjemò sabide in repliche a une e mieze dopo di misdì),  si podarà tornâ a scoltâle in rêt su Spreaker e su Spotify.

Suns Europe 2019 + Magalì Sare + Mattiu Dafuns + Eneritz Furyak + Tumasch è + La Basu = Babêl Europe 22/2019

Un altri viaç a torzeon jenfri musichis, lenghis, minorancis e nazions cence stât e soredut un altri pas indenant inte direzion de edizion 2019 di Suns Europe, che e je daûr a tacâ. Al è ce che e promet la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une e in chel di sabide a une e mieze.

Ancje in cheste trasmission si vierzarà un barcon in anteprime su Suns Europe 2019, il festival des arts tes lenghis minorizadis dal nestri continent che si davuelzarà in Friûl dai 15 ai 30 di Novembar. In particolâr si larà dilunc a scoltâ une cerce dal repertori dai artiscj protagoniscj de serade finâl che si davuelzarà li dal Teatri gnûf Giovanni da Udine. Cussì al vignarà dât spazi ai ultins doi nons de liste di chei che si presentaran intal conciert-concors che al siere la kermesse furlane e europeane: il cjantautôr dai Grisons, Mattiu Defuns, e la cjantante catalane, Magalì Sare.

Simpri cun riferiment ai contignûts de sezion musicâl di Suns Europe 2019, si scoltaran ancje Eneritz Furyak, che e ven dal Paîs Basc, e Tumasch è, musicist e autôr rumanç, che al veve vinçût il concors dal festival intal 2017. i doi a saran tra i protagoniscj, dongje di Silvia Michelotti, di Michela Franceschina e di Massimo Silverio dai cuatri concierts che a screin la manifestazion,  a Romans dal Lusinç ai 15 di Novembar, a Lavarian ai 16, a Comelians ai 23 e a Pagnà ai 24.

Cun di plui, stant che Suns Europe nol è dome un festival di musiche, ma al cuvierç ancje altris espressions artistichis che a van dal cine ae leterature, si sgarfarà tal program de rassegne, ricuardant alamancul cualchidun di chei altris apontaments che a son tal cartelon dal festival.

Inte scjalute de trasmission al sarà ancje un pôc di spazi par une gnove produzion discografiche, che e je stade presentade juste sabide passade a Bilbao: il disc gnûf de rapper basche La Basu, che il so titul al è Gerra.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.