Suns Europe 2019, il bant pe sezion musicâl al scjât ae fin di Jugn. E intant îr a Vençon e a S. Denêl altris doi events leâts al festival

A van dilunc i preparatîfs pe edizion di chest an di Suns Europe, il festival des arts tes lenghis minorizadis dal nestri continent, che si davuelzarà in Friûl jenfri la fin di Novembar e i prins di Dicembar. Il prin di Jugn, in particolâr, al è saltât fûr il bant dal concors de sezion musicâl di Suns Europe 2019, che si cjate sul sît uficiâl de manifestazion. L’intidiment de manifestazion al è chel di dâ visibilitât aes produzions contemporaniis intes lenghis minoritariis caraterizadis di modernitât, di origjinalitât e di inovazion e cussì di promovi la diversitât linguistiche e culturâl tant che un patrimoni, un dirit e une oportunitâts par ducj.

Cun dut che Suns Europe al trate ancje la leterature e il cine, il bant che si cjate in rêt al rivuarde in maniere esclusive il setôr musicâl, che al è ogjet di un percors specific, là che e je previodude la assegnazion di un premi, inte serade de sabide (par chest an l’apontament al è pai 30 di Novembar) che daûr de tradizion inviade intal 2015 e ven calcolade un dai events plui impuartants di dute la manifestazion. Al è pussibil presentâ lis candidaturis, lant daûr des modalitâts previodudis dal bant, dentri dai 30 di Jugn. Duncje e je ancjemò une setemeane di timp. I musiciscj partecipants a vignaran selezionâts dal comitât artistic di Suns Europe dentri de fin di Lui.

Al va dilunc ancje il percors che al puarte aes fin di Novembar, che al è segnât ancjemò di altris apontaments. Dopo dai incuintris che a son stâts inmaneâts Udin, li de Librarie Tarantola, ai 14 e ai 21 di Mai, dedicâts aes realtâts di Catalogne e Sardegne, cu lis presentazions dai libris La sfida catalana di Marco Santopadre e Idee di Sardegna di Carlo Pala, juste îr, sabide ai 22 di Jugn, in Friûl a son stâts doi events “targâts” Suns Europe.

A Sant Denêl inte suaze di Aria di Festa al è stât il conciert dai Lou Seriol, formazion che di passe vincjecinc agns e prodûs une misture esplosive di rock, folk e tescj in lenghe ocitane, intant che a Vençon, dentri dal program de Notte romantica, al è stât l’incuintri dal titul Musiche Furlane intal Borc, cui cjantautôrs  Franco Giordani e Silvia Michelotti, che a àn presentât in version acustiche diviers tocs dai lôr repertoris e a àn dialogât sul scrivi e sul cjantâ par furlan, cul coordenament di Pauli Cantarut di Radio Onde Furlane.

 

Advertisements

«Viva la Grande Squadra del Torino», une cjançon di scoltâ e un articul di lei tal 70esim inovâl di Superga

A cinc mancul doi minûts dai 4 di mai dal 1949 l’avion che al traspuartave la scuadre dal Turin che e tornave dal Portugal al lave a sbati cuintri dal cuel di Superga.
Vuê al cole il setantesim inovâl di chel incident che ur gjavà vie ai tifôs dal Turin, ma ben a dute la int di Turin e salacor a ducj i citadins dal Stât talian chê scuadre di campions, simbul di resistence, di sperance e di ricostruzion.

In ocasion di cheste ricorence cussì impuartante, che nus tocje in particolâr tant che turinês, tant che furlans e – almancul par une part di nô – ancje tant che toriniscj, o recuperìn cun plasê il video de cjançon di Franco Giordani dedicade a un di chei erois, il furlan Ruggero Grava “Revelli”.

https://www.youtube.com/watch?v=N_n1VRVIgPo&t=2s

Cun di plui, o tornìn a cjapâ sù ancje un articul, za publicât culì, che al ricuarde chê scuadre e che al conte di Turin e dal Friûl e al slargje la sô voglade in direzion de Ocitanie.

https://lidrisebutui.wordpress.com/2016/11/09/il-taur-la-acuile-e-la-cros-turin-ocitanie-e-friul/

Dôs ocasion par ricuardâ e par memoreâ.

E par tornâ a dî, compagn dal protagonist dal film I nostri anni di Daniele Gaglianone:
«Viva la Grande Squadra del Torino».

Zornade internazionâl de lenghe mari + Músicos pola Oficialidá + Gruff Rhys + Elena Ledda + Gorky’s Zygotic Mynci + Franco Giordani = Babêl Europe 4/2019

Zornadis impuartantis di memoreâ, tra storie e atualitât. La pontade numar 4 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, e rive juste inte setemane dai 21 di Fevrâr, che ae fin dal 1999 e je stade proclamade de bande de Conference Gjenerâl de UNESCO tant che Zornade internazionâl de lenghe mari, cun chê di promovi il valôr de diversitât linguistiche e il dirit di doprâ la lenghe proprie.
La date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl, cun diviers manifestants che a forin copâts de bande des fuarcis di polizie dal Pakistan, e conferme propit la rilevance inte Zornade de dimension dai dirits linguistics.

La Zornade internazionâl de lenghe mari no je la uniche Zornade di interès ‘babelic’ che si cjate tal lunari vie pal mês di Fevrâr. A’nd è almancul altris dôs che a vegnin ricuardadis inte trasmission che e va in onde in direte vuê, martars ai 19 di Fevrâr a 11 a buinore, e po in repliche ancje doman, miercus ai 20 a une dopo di misdì, e sabide ai 23, ancjemò a une e mieze.
Lis datis segnadis tal lunari (cence dismenteâ la Zornade furlane dai dirits che e cole la setemane che e ven, miercus ai 27) a son chês dai 8 di Fevrâr, Zornade de musiche in lenghe galese, e dai 15 di Fevrâr, vinars stât, cuant che a Caerdydd/Cardiff si à davuelt il conciert a pro de indipendence dal Gales Gellir Gwell! / Yes Is More!.

Juste par chel inte scjalute de gnove pontade di Babêl Europe al sarà spazi par une formazion storiche dal rock galês, i Gorky’s Zygotic Mynci, e par Gruff Rhys, altre innomenade personalitât dal panorame de creativitât (te musiche e te produzion audivisive) in Gales e par galês e tra i protagoniscj de manifestazion di vinars stât. Cun di plui si podaran scoltâ lis vôs de cjantante sarde Elena Ledda, che e sarà in conciert a Tresesin ai 26 di Fevrâr e a Turin ai 28, dal cjantautôr furlan Franco Giordani, che di resint al à zontât al so repertori ancje un toc pr sloven, e dal ‘supergrup’ asturian Músicos pola Oficialidá, metût adun cun chê di promovi lis mobilitazions a pro de uficialitât de lenghe asturiane e dal galego-asturian.

Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.
Dopo des trê emissions de setemane ancje cheste trasmission si podarà tornâ a scoltâle in podcast cun Spreaker e cun Spotify.

Babêl Europe 04/2018 al memoree la Zornade Internazionâl de Lenghe Mari

imld17

Vuê al è martars e o sin ai 2o di Fevrâr e tal palinsest di Radio Onde Furlane a 11 a buinore in direte, al torne in direte Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât.
La trasmission e sarà dedicade pe plui part ae Zornade Internazionâl de Lenghe Mari, che e cole doman ai 21. Al è l’inovâl de coparie de bande fuarcis di polizie dal Pakistan di diviers students de Universitât di Dhaka che in chê dì dal 1952 a manifestavin a pro dal ricognossiment de lenghe bengalese (‘bangla’) tant che lenghe uficiâl, e par chel al è stât sielzût de UNESCO cun chê di promovi la diversitât linguistiche tant che patrimoni, dirit e risorse par ducj.

Lant daûr des sugjestions dal lunari e cuntune cierte atenzion ancje pes novitâts discografichis e pe cronache, il viaç babelic di Onde Furlane al tocjarà la Ocitanie, lis Asturiis, i Paîs Catalans, la Bretagne e il Friûl furlan e sloven.
E sarà la ocasion par fâ une altre cerce di Eyjafjalljökull, il disc gnûf dal rocker breton  Gweltaz Adeux, e di Amb l’esperança entre les dents, il prin album solist di Xavi Sarrià, e par scoltâ i asturians Soncai System, i slovens Sons of a Gun, i ocitans Aire de Prima e il furlan Franco Giordani.

Dopo de direte di vuê, cheste pontade di Babêl Europe e torne ‘in Onde’, in repliche, ancje doman a une dopo di misdì e po sabide a une e mieze su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

Al torne Babêl Europe, un viaç de Corsiche al Gales e un ricuart de ‘Cjarte di Strasburc’

Vuê al è martars e su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Dopo dal speciâl di cuindis dîs indaûr, dedicât dut ae Catalogne, cheste gnove pontade e presentarà un percors une vore svariât tra lenghis. musichis, minorancis e nazions cence stât, che al partìs de Corsiche, al tocje la Estonie, la Ongjarie e il Friûl e al rive in Gales.

Si podarà scoltâ musiche par cors, par votian (antighe lenghe ugro finiche de regjon baltiche che e je pardabon in vie di estinzion), par romanes, par furlan e par galês, cun Cantelli, Raud Ants, Karavan Familia, Franco Giordani e Gruff Rhys.

Si fevelarà ancje di storie, di istituzions europeanis, di dirits linguistics e di tutele des minorancis, in ocasion dal inovâl a pene passât de aprovazion de bande dal Parlament European (ai 16 di Otubar dal 1981) de cussì clamade Carte di Strasburc, la prime cjolte di posizion di un orghin comunitari a pro de diversitât linguistiche e culturâl e de protezion des minorancis e dai lôr dirits, cognossude ancje cul non dal so reladôr, Gaetano Arfè.

Dopo de prime emission in direte, cheste gnove pontade di Babêl Europe e torne te programazion di Radio Onde Furlane in repliche: doman, miercus ai 18 di Otubar, a une dopo di misdì, e ancjemò sabide ai 21 a une e mieze.

Cun di plui si podarà tornâle a scoltâ tal sît internet de radio libare dai furlans.

 

Eletroniche, rock e festivals. Il gnûf apontament cun Babêl Europe

Al è une altre volte timp di Babêl Europe, la trasmission cuindisinâl dedicade ae produzion musicâl tes lenghis minorizadis dal continent, che si pues scoltâle in direte il martars a 11 a buinore su Radio Onde Furlane.

Tal apontament di vuê – che al larà in onde in repliche ancje doman a une dopo di misdì e sabide ai 17 di Jugn a une e mieze dopo di misdì –  si sintarà ancjemò il rivoc de serade di vinars stât a Udin, cuant che cul dopli conciert di Gwenno e di Elsa Martin e Marco Bianchi e je stade une cerce di chê e sarà la gnove edizion di Suns Europe, il festival european des arts tes lenghis minorizadis.

Si fevelarà ancje di altris manifestazions che a àn almancul alc di ‘babelic’, a tacâ di Folkest, che si scree sabide ai 17 a Glemone, e di Occit’Amo, che il so program al è stât presentât tai dîs passâts e che al tache ai 7 di Lui.

No mancjaran ancje riferiments ae atualitât, tra gnovis de Europe e jessudis discografichis.

Il percors musicâl de ultime pontade de Vierte di chest an al cjaparà dentri eletroniche, sperimentazions, pop, cjançon di autôr e rock plui o mancul ruspiôs, dal Gales ae Sardegne, de Ladinie ae Catalogne, de Corsiche al Friûl, cun Gwenno, Arrogalla, Martina Iori, Brams, Vindetta e Franco Giordani.

Chest numar di Babêl Europe, dopo de direte di vuê e des repliche di doman e di sabide, si podarà tornâ a scoltâlu in rêt, compagn di chei altris, sul sît internet di Radio Onde Furlane.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu.