Dixebra + Trabeat + Fabulous Trobadors + Brieg Guerveno + Bryn Fôn + Crysbas + Suns Europe 2021= Babêl Europe 11/2021

Produzions musicâls in anteprime, festivals internazionâi e iniziativis culturâls che si fasaran plui o mancul in curt e gnovis in cont dai dirits linguistics rivendicâts e dineât, tra storie e atualitât. Al è ce che e promet la gnove pontade di Babêl Europe, il program cuindisinâl dedicât a lenghis, musichis, minorancis e nazions cence stât, in programazion su Radio Onde Furlane vie di cheste setemane. l torne Babêl Europe, il program cuindisinâl dedicât a lenghis, musichis, minorancis e nazions cence stât.

This image has an empty alt attribute; its file name is suns-europe-2020-logo.jpg

La edizion numar 11 dal 2021 de trasmission dedicade ae creativitât musicâl intes lenghis minorizadis de Europe e tocjarà lis Asturiis, la Ocitanie, la Bretagne, il Gales e il Friûl.

Si fevelarà dal progjet dal Archivi de musiche contemporanie asturiane e des gnovis iniziativis che di chês bandis a vegnin puartadins indenant a pro dal ricognossiment dal status di uficialitât de lenghe proprie, si butarà un voli in direzion de Palestine, si darà un cuc a ce che al è daûr a nassi par Suns Europe 2021, il festival des arts in lenghe minorizade che ancje par chest an si fasarà vie pal Istât in Friûl, e pal Premi Ostana – Escrituras en lenga maire, event in program in maniere virtuâl dai 3 ai 5 di Jugn, ma soredut la atenzion e vignarà pontade in direzion dal Stât francês, dulà che il Tribunâl costituzionâl al à dât fûr la sô decision in cont de leç di promozion des lenghis minorizadis, declarant incostituzionâls lis normis che a proviodin l’insegnament imersîf e l’ûs dai caratars diacritics intai ats uficiâi.

Si scoltarà la musiche dai Dixebra, che a àn tornât a sunâ dal vîf juste sabide stade, dai Fabulous Trobadors, di Brieg Guerveno, di Bryn Fôn, innomenât artist galês, e di chel che al è stât il so prin grup, i Crysbas, la prime band a cjantâ par cymraeg inte television dal Gales. Cun di plui si fasarà une cerce in anteprime di chel che al sarà il disc gnûf dai furlans Trabeat.



L’apontament di cheste setemane cun Babêl Europe al è in direte vuê, martars ai 25 di Mai a 11 a matine, e po in repliche tal dopo di misdì di miercus ai 26 (h. 13) e di sabide ai 29 (h.13.30).

Dopo des trê emissions di cheste setemane, ancje cheste pontade di Babêl Europe si podarà tornâ a scoltâle in podcast sul Spreaker e sul Spotify di Radio Onde Furlane.

This image has an empty alt attribute; its file name is logo_web.png

Massimo Silverio + Adwaith + Eneritz Furyak + Kneecap + Dr. Drer & CRC Posse + Peppa Marriti Band = Babêl Europe 05/2021

La atualitât des produzions di discs e videos e chê des iniziativis culturâls e politichis, cence dismeneteâ zornadis impuartantis, storie e inovâi. Al è ce che e promet la cuinte pontade dal 2021 di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

Il gnûf viaç ator pe Europe de diversitât linguistiche e de creativitât musicâl puartât indenant su la “radio libare dai furlans” al tocje Paîs Basc, Friûl, Gales, Irlande dal Nord, Sardegne e Arberie.

Si scoltarà une altre cerce di Emadan, il disc gnûf di Eneritz Furyak, za presentât in anteprime un mês indaûr su Onde Furlane, che al è jessût ai 18 di Fevrâr, e il risultât de colaborazion tra il cjargnel Massimo Silverio e lis rockers galesis Adwaith.

Si fevelarà dai cuarante agns dal siopar de fam dai volontaris di IRA e INLA in preson a Long Kesh, che al ven memoreât su Radio Onde Furlane cuntune gnove trasmission, dal libri di Filosofia de Logu che al fâs indenant une schirie di resonaments interessants in conte de Sardegne e al vignarà presentât ai 4 di Març, dai inzornaments in cont dal câs di Pablo Hasél e de situazion in Catalogne dopo des elezions de domenie di Sant Valantin e dal video gnûf de Peppa Marriti Band.

Par chel si scoltarà ancje un toc di cheste che e je la formazion di ponte de sene musicâl de minorance albanese in Italie, dai sarts Dr. Drer & CRC Posse e dai rappers nordirlandês Kneecap.

This image has an empty alt attribute; its file name is peppa_marriti_band.png

Il gnûf viaç babelic ator pe Europe de diversitât linguistiche e de creativitât musicâl al è in programazion vuê, martars ai 2 di Març, a 11 in direte e po in repliche doman, miercus ai 3 (h. 13), e sabide ai 6 (h. 13.30)

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Mauresca Fracas Dub + Alessio Velliscig + Claudi Martì + Adwaith + Sa Ratapignata = Babêl Europe 26/2020

Gnovis produzions discografichis, inovâi impuartants, atualitât e un piçul belanç de anade che e je daûr a finî. Al è ce che al propon la ultime pontade dal 2020 di Babêl Europe, il program cuindisinâl di Radio Onde Furlane dedicât a lenghis, musichis, minorancis e e nazions cence stât.

Intal apontament di cheste setemane – in direte vuê, martars ai 22 di Dicembar, a 11 a buinore e in repliche tal dopo di misdì di doman, miercus ai 23, a une e in chel di sabide ai 26, a une e mieze – si fasarà un viaç musicâl jenfri Ocitanie, Friûl, Gales e Sardegne.

Adwaith Interview

Si scoltarà une cerce di Bartàs Party, il gnûf disc dal vîf dai ocitans Mauresca Fracas Dub, e plui o mancul in anteprime la cjançon fate di Alessio Velliscig in ocasion dai setante agns des Lotis dal Cormôr. Cun di plui al sarà spazi pe musiche di Claudi Martì, des Adwaith e di Sa Ratapignata.

Si fevelarà ancje de edizion 2020 di Suns Europe, de risoluzion fate buine joibe stade de bande dal Parlament European a pro dai dirits linguistics, de tutele des minorancis e plui in detai dai contignûts dal Minority SafePack, dal inovâl de Cjarte di Chivasso, il storic document su autoguvier e minorancis prontât ai 19 di Dicembar dal 1943 di un grup di antifassiscj valdostans e des valadis valdesis e ocitanis de Provincie di Turin e di un articul jessût su Filosofia de Logu, segnalât ancje di Ethnos & Demos.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

Ocitanie, Friûl… e Suns Europe. Sabide ai 19/9 a Trave peraulis e musiche cun Sergio Berardo e cun Angelo Floramo

No ducj a san che il “passepuart” che i à permetût a Leonardo di jentrâ te cort di Milan e di inviâ alì la sô stagjon plui impuartante e je stade la musiche: lis dotis musicâls e un strument origjinâl fat sù di lui,

Plui in gjenerâl la musiche e pues deventâ ancje l’imprest miôr par che une comunitât – cu la sô culture, la sô storie e la sô lenghe – e cjapi cussience di se e si fasi cognossi – e ricognossi – ancje fûr dal so teritori.

Chest al vâl par tantis comunitâts minorizadis ator pe Europe e in particolâr pe Ocitanie. In dutis lis tieris “d’Oc” e massime tes Valadis Ocitanis dal Piemont, la musiche e à judât tancj di lôr a tornâ a scuvierzi la lenghe proprie e la identitât linguistiche, culturâl e teritoriâl e po a fâle cognossi e ricognossi ator, dapardut. La musiche – des melodiis patriarcjinis a Mainerio par rivâ ae gnove musiche furlane – e à zuiât une funzion identitarie impuartante ancje in Friûl.

Sabide ai 19 di Setembar l’ultin apontament cun Suns Europe 2020 al è un viaç inzirlôs par etis e tieris diferentis cu la musiche des peraulis e cu lis peraulis de musiche. Tacant des 9 di gnot, inte place di chê frazion dal Comun di Lauc, in Cjargne, il public al vignarà compagnât in chel percors di dôs vuidis di gale: l’ocitan Sergio Berardo e il furlan Angelo Floramo.

Sergio Berardo al è un innomenât polistrumentis e cjantant ocitan. Al è la vôs e la anime dai Lou Dalfin, il grup plui impuartant des Valadis Ocitanis dal Piemont, e al è cjapât dentri di cetancj progjets di ricercje, di promozion e di reinvenzion de musiche popolâr ocitane. Tra chescj al è Gran Bal Dub, crosere di folk, reggae e eletroniche, metude adun cun Madaski, tastierist dai Africa Unite.

Angelo Floramo al è nassût a Udin, al insegne storie e leterature e al colabore di consulent pe biblioteche Guarneriane di S. Denêl. Al sgarfe tai archivis, al scrîf par rivistis sei par furlan che par talian e al è autôr di cetancj libris: tra chescj a son Balkan Circus (2013), L’osteria dei passi perduti (2017) e La veglia di Ljuba (2018).

Kenze Neke + Lalli + Fermin Muguruza + Chalart 58 + Joana Gomila + Paxkal Irigoyen + Gran Bal Dub + Canta U Populu Corsu = Babêl Europe 18/2020

Vuê al è martars e tal palinsest di Radio Onde Furlane al torne Babêl Europe, il program cuindisinâl dedicât ae produzion musicâl intes lenghis minorizadis. Dopo dal prin apontament, a undis a buinore, chê stesse pontade si podarà tornâ a scoltâle tal dopodimisdì di doman, miercus ai 2 di Setembar, a une, e in chel di sabide ai 5 di Setembar, a une e mieze.

Il gnûf viaç a torzeon jenfri musichis, lenghis, minorancis e nazions cence stât al tocjarà ancjemò la edizion 2020 di Suns Europe, il festival european des arts intes lenghis minorizadis, cu la scolte di une cerce dal repertori de artiste dai Paîs Catalans, Joana Gomila, e dal cjantautôr basc Paxkal Irigoyen, che a saran protagoniscj, la prime, dai concierts dai 5 di Setembar a Lavarian e dai 6 di Setembar a Dartigne e il secont dai apontaments dai 12 di Setembar a Puçui e dai 13 di Setembar  a Romans dal Lusinç.

Cun di plui si fasarà un salt indaûr tal timp, inte storie de Corsiche, par memoreâ il 45esim inovâl di chei che ju clamin i fats di Aleria, scoltant une cjançon “classiche” di Canta U Populu Corsu.

Lant daûr dal program di edizion 2020 di Suns Europe, che pai 19 di Setembar al previôt a Trave di Lauc un incuintri su Ocitanie, Friûl e Europe, si scoltarà ancje alc dai Gran Bal Dub, intant che, cul intindiment di segnalâ une riedizion digjitâl e une gnove produzion, si scoltaran ancje i sarts Kenze Neke, adun cu la cjantate turinese Lalli, e il prodot de gnove colaborazion jenfri il basc Fermin Muguruza e i catalans Chalart 58.

This image has an empty alt attribute; its file name is suns-europe-2020-logo.jpg

Ancje cheste pontade di Babêl Europe, dopo des trê emissions di cheste setemane, i podarà tornâ a scoltâle in rêt, compagn di chê altris, sul Spreaker e sul Spotify di Radio Onde Furlane.

La radio libare dai furlans si scolte sui 90 Mhz inte plui part dal Friûl, sui 90.200 in Cjargne e in rêt, par dut il mont, in streaming o in direte.

Suns Europe 2020, dai 22/8 ai 19/9 in Friûl sunôrs, visions e peraulis pal rispiet dal dirit ae lenghe e dal dirit ae diversitât

Suns Europe al torne, al mude un tic la sô muse e al manten, rinfuarçantlu ancjemò di plui, il so spirt furlan e internazionâl. La edizion di chest an dal festival european des arts intes lenghis di minorance, inmaneât de cooperative Informazione Friulana, la cjase editore di Radio Onde Furlane, cul jutori finanziari de Regjon Friûl-VJ e de ARLeF (Agjenzie Regjonâl pe Lenghe Furlane) e cu la poie dal Comun di Udin e dal Etxepare Euskal Institutua dal Paîs Basc, no si davuelç jenfri la fin di Novembar e i prins di Dicembar, ma e sarà une rassegne estive.

Il cambi di stagjon nol è l’unic element di novitât di Suns Europe 2020. Cun di fat inte sezion musicâl nol è previodût nissun concors: nol è stât dât fûr nissun bant, no je stade fate nissune selezion e nol vignarà dât nissun premi. Cundut achel, tra musiche, cine e leterature, ancje chest an al sarà cetant – e cetant bon – ce scoltâ, ce sintî, ce viodi, ce cjalâ e ce lei. Tacant de serade di sabide 22 di Avost fintremai al ultin apontament dai 19 di Setembar al sarà un mês di sunôrs, di visions, di peraulis, di storiis, di personis e di progjets, espressions vivis e vivarosis di une Europe unide e plurâl, che e domande a fuart il rispiet dal dirit ae lenghe e dal dirit ae diversitât.

Suns Friûl, musichis e lenghis dal Friûl diferent e plurâl
Il program al vignarà screât cun Suns Friûl, vetrine de produzion musicâl contemporanie tes lenghis “altris” dal Friûl. Sul palc di Place Venerio a Udin, tacant di nûf di sere, a saran Corte di Lunas, Alvise Nodale, Dissociative TV e Brût & Madone, che a mostrin cemût che la lenghe furlane e pues vignî doprade in maniere une vore interessante adun cui lengaçs dal epic folk, de cjançon di autôr, dal punk rock e dal metal core, e i Ostajki, formazion in balance tra folk, rock e psichedelie che e cjante par sloven. La serade e vignarà vuidade di Raffaele Serafini e di Serena Fogolini de ostarie letararie virtuâl Contecurte.

“O que arde”, il film par galizian che al à concuistât Cannes
La setemane che e ven si tornarà a tacâ cul cine, cu la proiezion, sabide ai 29 a nûf e un cuart di sere a Udin in Zardin Grant, te aree verde “Loris Fortuna” (in câs di ploie l’apontament al è li dal Visionario), di O que arde, il biel film par galizian di Oliver Laxe, che l’an passât al à vuadagnât diviers ricognossiments impuartantons, tacant dal premi de critiche inte sezion “Un certain regard” dal festival di Cannes.

Storie e leterature, memorie e atualitât
Al sarà spazi ancje pe leterature e pe storie. Sabide ai 29 a sîs e un cuart sot sere a Udin, lì de librarie Friuli, e sarà la prime presentazion in assolût intal Stât talian di Guillem, il libri de gjornaliste catalane Núria Cadenes che al conte la storie di Guillem Agulló i Salvador, zovin sportîf, militant antifassist e indipendentist, che al è stât sassinât di un trop di fassiscj ai 11 di Avrîl dal 1993 a Montanejos, tal Paîs Valenzian. Lunis ai 31 a vot e mieze di sere, a Murùs inte place dal Comun, il storic basc Joseba Asiron e il scritôr furlan Angelo Floramo a saran protagoniscj dal dialic in cuatri lenghis (furlan, basc, talian e spagnûl) dal titul “Conquista! Storiis resistentis tra Navare e Friûl”.

O ce biel cjistiel a Udin, o ce biel conciert di gale!
Par ce che al tocje la musiche, la serade che sù par jù e corispuint cun chês che vie pes edizions passadis di Suns Europe a vevin clamât dongje un public calorôs e numerôs li dal Teatri gnûf “Zuan di Udin”, si fasarà ai 30 di Avost intal plaçâl dal Cjistiel di Udin, là che si podarà gjoldi des esibizions de cjantante ladine Martina Iori cul so grup, de rapper basche La Basu, des rockers galesis Adwaith, dai sarts Bujumannu & Jumbo dal innomenât grup reggae Train To Roots e dal progjet furlan di esportazion di Laura Giavon & Drumlando. Presentadôr de serade il rapper furlan Doro Gjat.

In Setembar ancjemò musiche e leterature jenfri Friûl di Mieç, Cjargne e Gurizan
Suns Europe 2020 al larà dilunc ancje vie pal mês di Setembar cui concierts de catalane Joana Gomila a Lavarian sabide ai 5 e a Dartigne domenie ai 6 e dal basc Paxkal Irigoyen ai 12 a Puçui e ai 13 a Romans dal Lusinç e cul event speciâl dedicât ae Ocitanie, al Friûl e ae Europe che si fasarà a Trave sabide ai 19.

Informazions di servizi
Ducj i apontaments a son a jentrade libare e sore nuie, cu la ecezion de proiezion di O que arde, che e je a paiament. Pe serade di Suns Friûl, e pal conciert dai 30 di Avost in Cjistiel, par vê garantît il puest in sigurece e in salût, e covente fate la prenotazion midiant dal sît www.sunseurope.com, là che si cjatin ancjemò altris informazions in cont dal festival e dai siei protagoniscj, compagn che su Facebook.

Gruff Rhys + Perynn + Peppa Marriti Band + Alvise Nodale + Corte di Lunas + Ostajki = Babêl Europe 17/2020

Vuê, doman e sabide tal palinsest di Radio Onde Furlane al torne Babêl Europe, il program cuindisinâl dedicât ae produzion musicâl intes lenghis minorizadis. Il prin apontament, in direte, al è chel dal martars a undis a buinore, intant che chê stesse pontade si podarà tornâ a scoltâle tal dopodimisdì di miercus ai 19 di Avost, a une, e in chel dai 22 di Avost, a une e mieze.

Il gnûf viaç a torzeon jenfri musichis, lenghis, minorancis e nazions cence stât si disviluparà in continuitât cun chel di cuindis dîs indaûr, stant che si fevelarà ancjemò de edizion 2020 di Suns Europe, il festival european des arts intes lenghis minorizadis che chest an si fasarà jenfri i mês di Avost e di Setembar, e soredut di Suns Friûl, la vitrine de produzion musicâl contemporanie intes lenghis “altris” dal Friûl, che e scree dute la rassegne juste inte serade di cheste sabide, ai 22 di Avost, a Udin, in Place Venerio.

This image has an empty alt attribute; its file name is suns-europe-2020-logo.jpg

Propit par chel si scoltarà une cerce dal repertori di Alvise Nodale, dai Corte di Lunas e dai Ostajki, che adun cui Brût & Madone e cui Dissociative TV a saran i protagoniscj di chel apontament.

Cun di plui, dentri di cheste gnove pontade Babêl Europe al sarà spazi ancje pal artist galês Gruff Rhys, pal grup arbereshe Peppa Marriti Band e pe cjantante bretone Perynn e si fevelarà ancjemò dal conciert di Manu Chao dai 7 di Avost stâts.

Ancje cheste pontade di Babêl Europe, dopo des trê emissions di cheste setemane, i podarà tornâ a scoltâle in rêt, compagn di chê altris, sul Spreaker e sul Spotify di Radio Onde Furlane.

La radio libare dai furlans si scolte sui 90 Mhz inte plui part dal Friûl, sui 90.200 in Cjargne e in rêt, par dut il mont, in streaming o in direte Facebook.

This image has an empty alt attribute; its file name is logo_web.png

Manu Chao + Fermin Muguruza +Askra + Lou Dalfin + Brût & Madone + Dissociative TV = Babêl Europe 16/2020

Vuê al è martars e a 11 a buinore su Radio Onde Furlane al torne Babêl Europe, il program cuindisinâl dedicât a musichis, lenghis, minorancis e nazions cence stât.

Chê che e larà in onde vie par cheste setemane (dopo de prime emission a son previodudis lis replichis di doman, miercus ai 4 di Avost a une dopo di misdì, e di sabide ai 8 a une e mieze dopo di misdì) e je la prime pontade fate in direte, juste dopo cinc mês di confinament e di riproposizion di pontadis gjavadis fûr dal archivi de trasmission.

Pe ocasion, dentri di Babêl Europe si fevelarà di gnovis produzions, di events, di festivals e di concierts. La atenzion e sarà pontade in particolâr in direzion de edizion 2020 di Suns Europe, il festival european des arts intes lenghis minorizadis che chest an si fasarà jenfri i mês di Avost e di Setembar, e di Suns Friûl, la vitrine de produzion musicâl contemporanie intes lenghis “altris” dal Friûl, une serade che e je stade programade a Udin, in Place Venerio, sabide ai 22 di Avost.

Cun di plui si darà un cuc al program di Occit’amo, il festival multisensoriâl des Valadis Ocitanis dal Piemont, che al è in plen davuelziment in chescj dîs, e al vignarà ricuardât l’apontament dai 7 di Avost a 2 dopo di misdì inte suaze di No Borders: il conciert di Manu Chao a Nevee tal plan dal Montâs.

Par chel si scoltarà une cerce des gnovis produzions dai Brût & Madone e dai Dissociative TV, si tornaran a tirâ fûr un pâr di classics dai Lou Dalfin e dai Askra e dôs cercis dal repertori plui babelic di Manu Chao, di bessôl e in cubie cun Fermin Muguruza.

La gnove pontade di Babêl Europe e promet une buine rate di musiche furlane fuarte e potente e cetantis conessions jenfri Friûl e Europe, in gjenerâl e cun riferiment specific ae Sardegne, ae Galizie e al Paîs Basc.

This image has an empty alt attribute; its file name is bruut-madone-2ok.jpg

La radio libare dai furlans si scolte sui 90 Mhz inte plui part dal Friûl, sui 90.200 in Cjargne e in rêt, par dut il mont, in streaming, cumò ancje cu la plataforme web Radio Garden.

Ancje cheste pontade di Babêl Europe, dopo des trê emissions di cheste setemane, i podarà tornâ a scoltâle in rêt, compagn di chê altris, sul Spreaker e sul Spotify di Radio Onde Furlane.

Massimo Silverio, musiche furlane di cualitât e di esportazion

Un altri esempli interessant di musiche furlane fuarte, di cualitât e di esportazion. Al è il gnûf progjet musicâl di Massimo Silverio, cjantautôr e polistrumentist di Çurçuvint, che di agns al cjante e al sune la ghitare e il violoncel, di bessôl o in grup, cun risultâts interessants.

Dopo vê dâr fûr, tal 2016, il so prin disc “Le Retour Du Zéphyr”, l’artist cjargnel al scree in maniere uficiâl juste in chescj dîs la sô gnove produzion. Il so titul al è “Ø” e al è disc cun cuatri tocs, che a colpissin orelis, cûr e cerviel pes lôr particolaritâts sonoris, là che si fondin folk, rock, eletroniche e une risaltât gust pe sperimentazion.

Il minialbum, tacant di “Tiere” fint ae conclusive “Jevâ”, al è une sorte di suite cun contignûts di alte intensitât emozionâl, là che si sint la influence dal garzonât di Silverio inte buteghe dal violinist e etnomusicolic Giulio Venier e chê de scolte di grups tant che i Radiohead e si palese la volontât di rompi cierts schemis tradizionâi, riferîts sei ae tradizion popolâr che ae cjançon di autôr plui o mancul rock.

I colôrs prevalents dal sunôr di “Ø” a son scûrs e opressîfs e la vôs si rimpine sù e fintremai si plate jù, jenfri ritmichis cadençadis, distorsions, cidinôrs, campionaments e inserts di tastiere.
L’efiet al è chel di une fuarce espressive poetiche, apassionade e espressive, che e piture la fuarce di une nature maraveose e teribile.

La lôr struture no je convenzionâl, ma chestis cjançons a funzionin ancje dal vîf, cemût che si veve verificât za intal conciert fat ai 22 di Novembar a Comelians, inte suaze dal festival Suns Europe.

Juste vie par chescj dîs, il gnûf repertori di Massimo Silverio al vignarà presentât dal vîf ator pe Europe. Cun di fat, la jessude di “Ø” e je compagnade di une rie di concierts, là che Silverio al cjante e al sune, compagnât dal baterist e percussionist Nicholas Remondino e dal polistrumentist Leo Virgili, che a àn vût lavorât cun lui inte regjistrazion e inte produzion dal disc.

La tournée e je tacade il prin di Fevrâr a Lubiane, e à za tocjât Viene, Brno, Praghe e Berlin e e va dilunc ancjemò in Gjermanie, tai Paîs Bas e inte Belgjiche.
Par savênt di plui: https://www.facebook.com/massimosilveriomusic/.

LaipNessLess + Paolo Fresu + Magalì Sare + Mocker’s + Y Sybs = Babêl Europe 24/2019

Vuê, doman e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ) al torne Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

In chê che e podarès jessi la ultime pontade dal 2019 si tornarà a fevelâ de ultime edizion di Suns Europe e in particolâr de serade finâl dai 30 di Novembar stâts. E sarà la ocasion par tornâ a scoltâ la vincidore dal concors musicâl, la cjantante catalane, Magalì Sare, e chei altris doi grups segnalâts de jurie internazionâl, i bascs Mocker’s e i galês Y Sybs.

E sarà ancje la ocasion par scoltâ i LaipNessLess, che juste sabide stade a àn screât il lôr disc gnûf, Cormôrra, e l’innomenât trombetist e flicornist Paolo Fresu, che domenie stade al jere in Friûl, a Pordenon, adun cun Daniele Di Bonaventura par une serade inmaneade de Accademia Naonis.

Ancje cheste pontade di Babêl Europe, dopo des sôs trê emissions vie pe setemane (vuê in direte a 11 a buinore, doman in repliche a une dopo di misdì e ancjemò sabide in repliche a une e mieze dopo di misdì),  si podarà tornâ a scoltâle in rêt su Spreaker e su Spotify.