Zornadis impuartantis di memoreâ, tra storie e atualitât. La pontade numar 4 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, e rive juste inte setemane dai 21 di Fevrâr, che ae fin dal 1999 e je stade proclamade de bande de Conference Gjenerâl de UNESCO tant che Zornade internazionâl de lenghe mari, cun chê di promovi il valôr de diversitât linguistiche e il dirit di doprâ la lenghe proprie.
La date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl, cun diviers manifestants che a forin copâts de bande des fuarcis di polizie dal Pakistan, e conferme propit la rilevance inte Zornade de dimension dai dirits linguistics.
La Zornade internazionâl de lenghe mari no je la uniche Zornade di interès ‘babelic’ che si cjate tal lunari vie pal mês di Fevrâr. A’nd è almancul altris dôs che a vegnin ricuardadis inte trasmission che e va in onde in direte vuê, martars ai 19 di Fevrâr a 11 a buinore, e po in repliche ancje doman, miercus ai 20 a une dopo di misdì, e sabide ai 23, ancjemò a une e mieze.
Lis datis segnadis tal lunari (cence dismenteâ la Zornade furlane dai dirits che e cole la setemane che e ven, miercus ai 27) a son chês dai 8 di Fevrâr, Zornade de musiche in lenghe galese, e dai 15 di Fevrâr, vinars stât, cuant che a Caerdydd/Cardiff si à davuelt il conciert a pro de indipendence dal Gales Gellir Gwell! / Yes Is More!.
Juste par chel inte scjalute de gnove pontade di Babêl Europe al sarà spazi par une formazion storiche dal rock galês, i Gorky’s Zygotic Mynci, e par Gruff Rhys, altre innomenade personalitât dal panorame de creativitât (te musiche e te produzion audivisive) in Gales e par galês e tra i protagoniscj de manifestazion di vinars stât. Cun di plui si podaran scoltâ lis vôs de cjantante sarde Elena Ledda, che e sarà in conciert a Tresesin ai 26 di Fevrâr e a Turin ai 28, dal cjantautôr furlan Franco Giordani, che di resint al à zontât al so repertori ancje un toc par sloven, e dal ‘supergrup’ asturian Músicos pola Oficialidá, metût adun cun chê di promovi lis mobilitazions a pro de uficialitât de lenghe asturiane e dal galego-asturian.
Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.
Dopo des trê emissions de setemane ancje cheste trasmission si podarà tornâ a scoltâle in podcast cun Spreaker e cun Spotify.
LIDRÎS E BUTUI 
https://www.spreaker.com/user/ondefurlane/babel-europe-19-02-2019
Reblogged this on LIDRÎS E BUTUI (tal web) and commented:
Ae fin de Zornade Internazionâl de Lenghe Mari 2023 ve chi ancjemò une trasmission tirade fûr dal archivi virtuâl di BabêlEurope, il program dedicât a lenghis, musichis, minorancis e nazions cence stât in programazion une setemane sì e une no su Radio Onde Furlane.
E je la pontade de setemane dai 19 di Fevrâr dal 2019, che e jere dedicade juste ae Zornade proclamade de UNESCO