La conclusion di Europa 57/17, students e esperts a domandin plui Europe e plui Friûl

La Europe e clame e il Friûl al rispuint. La sô rispueste e je chê di une comunitât teritoriâl multilengâl e multiculturâl che e à cussience di chestis sôs peculiaritâts e che su chestis fondis e marche il so jessi part de Europe: tant a dî un Friûl «unît te diversitât» che si ricognòs te Europe «unide te diversitât» e che par chel al domande ae Union Europeane di jessi plui Union e plui Europeane.

Dut chest al è saltât fûr a clâr inte suaze di Europa 57/17, iniziative metude adun de bande  dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, che e je stade screade ai 14 di Otubar, cu la prime di une serie di programs su Radio Onde Furlane, e che si à sierade vinars ai 3 di Novembar cuntune conference/taule taronde li dal centri economic e juridic dal Ateneu Furlan di Vie Tomadini 30/a.

Propit l’event conclusîf dal progjet, cu la partecipazion di cuatricent students dal convit Paolo Diacono di Cividât e dai istitûts Deganutti, Uccellis, Marinelli, Percoto e Stellini di Udin e cui intervents di une schirie di reladôrs che a àn frontât diviers aspiets de storie e de atualitât dal procès di integrazion continentâl, cuntune atenzion specifiche pontade su la «prossimitât» e su la «cuotidianitât» de dimension europeane, al à mostrât cetant che a son fuarts e positîfs, in teorie e in pratiche, i rapuarts tra Friûl e Europe e tra Europe e Friûl.

Une sensibilitât di cheste fate le a à palesade in particolâr il scritôr, insegnant e vicepresident de Cjase pe Europe  di Glemone, Angelo Floramo, che tal so intervent al à marcât cemût che di simpri il Friûl, unitari e plurâl, al sedi simpri stât part de Europe e che chestis sôs peculiaritâts, scjafoiadis tal ultin secul e mieç dal nazionalisim dominant, a resistin ancjemò in dì di vuê e ta chest gnûf contest a deventin un patrimoni e une risorse.

Par Floramo la alteritât dal Friûl plurâl, che e jere stade calcolade un probleme e salacor un pericul inte suaze dal Stât nazionâl talian, fat sù su la fonde de idee di nazion «una d’arme, di lingua e d’altare», cemût che al scriveve Alessandro Manzoni te sô poesie ‘Marzo 1821’, e devente une risorse impuartantone par metisi in relazion positive cun chei altris e duncje par jessi citadins europeans, cun cussience e cun cognossince.

Su chescj aspiets a àn tornât a bati ancje Carli Pup, president de cooperative Informazione Friulana, e Diego Navarria, president de Assemblee de Comunitât linguistiche furlane. In particolâr a àn fevelât di esperiencis di cooperazion cun altris entitâts des minorancis in Europe di caratar rivendicatîf e politic – par esempli il Protocol di Donostia pe garanzie dai dirits linguistics in Europe, fat indenant di 120 sogjets e tra chescj propit di Informazione Friulana, Radio Onde Furlane, La Patrie dal Friûl, CLAAP e Novi Matajur – o ben culturâl e promozionâl, a tacâ des colaborazions tra i media ai progjets in rêt e de realizazion dal festival Suns Europe, e di cemût che il disvilup de integrazion europeane si zovi de tutele des minorancis e al vedi zovât ae tutele des minorancis, massime tal Stât talian, là che lis «normis specifichis» proviodudis dal articul 6 de Costituzion a son rivadis dome a tacâ de fin dal secul stât.

Chest element al jere saltât fûr ancje te ultime trasmission radiofoniche di Europa 57/17, cu la testemoneance di Antonio Banchig, gjornalist dal Novi Matajur. Ta chês altris dôs pontadis de serie coordenade e condusude di Marco Stolfo, e jere stade presentade la storie dal procès di integrazion europeane e a jerin stâts frontâts diviers argoments leâts ae situazion dal dì di vuê, cui intervents dal responsabil sientific dal Centri di documentazion europeane ‘G. Comessatti’‘, Claudio Cressati, dal espert di politiche europeane e internazionâl Roberto Castaldi (Universitât eCampus e CESUE), e di Renato Damiani de Cjase pe Europe di Glemone.

Propit Damiani, adun cul president dal Comitât talian dal Moviment european, Pier Virgilio Dastoli, e cul ricercjadôr de Scuola Superiore Sant’Anna di Pisa, Giorgio Grimaldi, al è stât un dai reladôrs de prime part de buinore dai 3 di Novembar, che e jestade dedicade ai Tratâts di Rome e aes disfidis che a son denant de Europe dal dì di vuê.  Te seconde parte de zornade a son stâts ancje i intervents di Francesco Rossi di Zero Idee e di Sonia Bosaro e Jolita Ziauberyte de Universitât dal Friûl, che a àn fevelât des oportunitâts pai zovins inte suaze dai programs Europe Creative, Europe pai CitadinsZoventût e de mobilitât europeane e internazionâl dai students, a tacâ dal progjet Erasmus, che juste tal 2017 al finìs i siei prins trente agns.

La partecipazion dai students e je stade buine e vivarose e si à palesade cuntune schirie di domandis e osservazions che a àn tocjât diviers argoments: de situazion de Catalogne ai gnûfs slargjaments de UE, dal defict democratic ai dirits sociâi, de necessitât di plui competencis pes istituzions europeanis aes cuistions leadis ae sigurece e al terorisim.

Il progjet Europa 57/17 al è stât metût adun cun chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente. Su la fonde di cemût che e je lade la buinore di vinars stât e po ancje daûr dai contignûts des trasmissions su Onde Furlane, si pues dî che al à jonzût i siei obietîfs. Un pont di partence o un moment di passaç inte direzion di une Europe pardabon «unide te diversitât», cence pôris, cence prejudizis e magari ancje cence retoriche.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

 

Europa 57/17, doman ai 3 di Novembar la taule taronde finâl

La Europe e clame e il Friûl al rispuint, marcant il fat che, juste par vie des sôs peculiaritâts, al è european, al fâs part de Europe e te dimension di une Europe pardabon ‘unide te diversitât’ al pues jessi plui Friûl e duncje plui european. Dut chest al salte fûr a fuart de iniziative, metude adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, dal titul  Europa 57/17, che e je stade screade ai 14 di Otubar e che si siere doman cuntune conference/taule taronde che e viodarà la partecipazion di diviers esperts e di cuatricent students di un trop di scuelis superiôrs.

Chescj aspiets a son stâts marcâts za vie des trê trasmissions cun chel stes titul, trasmetudis di Radio Onde Furlane  tes setemanis passadis e che si pues tornâ a scoltâlis in rêt,  e a tornaran a jessi frontâts, cu la zonte di cualchi detai par esempli in cont des oportunitâts pai zovins, de citadinance europeane e de tutele des minorancis, intant dal incuintri di doman, che si davelç li de Aule 3 dal Pôl economic e juridic de Universitât dal Friûl, a tacâ di 9 a buinore. Il program complet si pues leilu ancje culì.

Europa 57/17 si insuaze intun progjet di rêt che al coinvolç ducj i centris di documentazion europeane dal Stât talian e che il so titul al è 60 anni di Unione europea: sfide e prospettive per l’Europa, e al à chê di memoreâ il 60esim inovâl dai Tratâts di Rome, di fcognossi il procès di integrazion europeane e lis istituzions de UE e di promovi cussì une citadinance europeane cussiente.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

Altris informazions in cont di dute la iniziative si cjatin achìachì, achì e achì.

 

 

In Friûl e a Turin si fevele di Europe, par radio e tes Universitâts

Altiero Spinelli al scriveve che la Europe no cole dal cîl, ma si le fâs sù ogni dì, cun fature, cun determinazion e cun snait.

Che il procès di integrazion europeane al sedi un percors dûr, faturôs e plen di problemis e dificoltâts al salte fûr une vore a clâr massime in chescj ultins timps, cuant che al è lât al mancul chel ‘euro-otimisim’ che al jere une vore pandût dome un pôcs di agns indaûr.

In chel istès si viôt a clâr che al covente fâ sù une Union Europeane che e sedi plui Union e plui Europeane e mancul dipendente dai stâts nazionâi, de lôr autoreferenzialitât ‘ontologjiche’, de lôr crisi e dal lôr nazionalisim plui o mancul fanatic e infogât.

Lis ocasions par resonâi parsore e ancjemò prime par cognossi e par capî alc di plui su cheste cuistion, che no si pues frontâle su la fonde di prejudizis e di lûcs comuns (ni a pro, ni cuintri), no mancjin.
In particolâr o vin plasê di segnalâ dôs iniziativis che a somein interessantis: une a Turin, propit vuê ai 13 di Otubar, e une in Friûl, che si scree doman ai 14 di Otubar e che e larà dilunc fintremai ai 3 di Novembar.

Il prin apontament al è chel di vuê, a tacâ di 2 e mieze dopo di misdì, li de Aula Magna dal Campus Einaudi de Universitât di Turin, là che la Sezion europeane ‘G. Merlini’ de biblioteche ‘N. Bobbio’ e inmanee une cunvigne dedicade ai contignûts de Relazion finâl dal Comitât di Savints istituît de bande de presidente de Cjamare dai deputâts, Laura Boldrini, cun chê di fâ il pont su la situazion e su lis prospetivis de Union Europeane.

L’incuintri, che il so program si pues leilu culì, al ven inmaneât ancje cu la colaborazion dal IUSE e dal Centro Studi sul Federalismo di Moncalieri e cul jutori de Compagnia di San Paolo.

Doman, invezit, si scree Europa 57/17, un progjet metût adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane.

La iniziative, che si insuaze tal progjet di rêt 60 anni di Unione europea: sfide e prospettive per l’Europa, e à chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente.

Cun chescj intindiments, Europa 57/17 al met dongje une taule taronde, che si fasarà a Udin ai 3 di Novembar, e une serie di trasmissions radiofonichis, che si podarà scoltâlis su lis frecuencis analogjichis (90 Mhz pe plui part dal Friûl, 90.2 Mhz in Cjargne) e sul sît internet (www.ondefurlane.eu) di Radio Onde Furlane, la sabide a 8.30 a buinore, la domenie a 10.30 a matine e la joibe a 5 sot sere.

La prime pontade e je proviodude juste par doman.

Informazions plui in detai in cont dal program radio e di dute la iniziative si cjatin achì, achì e achì.

‘Cercare il Friuli e trovare l’Europa’, presentazion a Udin ai 31 di Març

Un libri che al presente la realtât de comunitât furlane e de sô lenghe, che al definìs la suaze teoriche e normative di riferiment pe sô tutele e che al fâs indenant une schirie di elements di riflession in cont dai risultâts, dai problemis, des oportunitâts e des prospetivis di disvilup di passe vincj agns di iniziativis metudis adun o almancul inviadis in chest setôr de bande di istituzions publichis e privadis. Si pues definî in cheste maniere Cercare il Friuli e trovare l’Europa, il gnûf libri di Marco Stolfo e Claudio Cressati, che al vignarà presentât vinars ai 31 di Març a 5 sot sere te Sale Florio de Universitât dal Friûl (v. Florio 1, Udin), cuntune relazion di Elena D’Orlando, che e insegne Dirit regjonâl talian e european li dal Ateneu furlan, cui intervents di Lorenzo Fabbro (President de ARleF) e di Diego Navarria (Sindic di Cjarlins e President de Assemblee de Comunitât linguistiche furlane) e cu la presince dai doi autôrs.

La publicazion e mostre in ce maniere che chel de comunitât furlane si pues calcolâlu un câs esemplâr, inte suaze des minorancis, tal Stât talian e plui in gjenerâl in Europe. Chest al vâl in particolâr pes modalitâts che e je stade metude in vore la sô minorizazion, pe costance che i furlans a àn mostrât tal fâ indenant lis lôr domandis di ricognossiment e di tutele e pe maniere che – ancje cun contradizions – si à scomençât a meti in vore la promozion de lenghe e dal so patrimoni culturâl e a cirî di jonzi la afermazion concrete di chei dirits che a tocjin l’ûs de lenghe stesse, cun normis, ats e azions di politiche linguistiche.

Une altre carateristiche che e vene marcade di chest studi e je chê de impuartance de dimension europeane in relazion cu la tutele de minorance linguistiche furlane e de sô lenghe, cu lis rivendicazions fatis indenant di cheste comunitât e cu lis rispuestis che e à vût sul plan politic, normatîf e istituzionâl. Propit par chel il volum si clame Cercare il Friuli e trovare l’Europa.
Altris elements di interès a tocjin la individuazion di trê orientaments gjenerâi di pinsîr in cont dal Friûl e dal furlan, che si disvilupin vie pal Nûfcent e che a condizionin intun sens o in chel altri la situazion, e la descrizion dai rapuarts tra lenghe, societât e istituzions, cuntune atenzion specifiche viers de Glesie e de politiche.

La publicazion e je il risultât dal progjet di ricercje Looking for Friuli, finding Europe. Self-government, linguistic rights and development between visions, claims and policies, che al è stât disvilupât dal 2013 al 2016 dentri dal Modul Jean Monnet MuMuCEI (Multilingualism, Multicultural Citizenship and European Integration) de Universitât dal Friûl.

Brexit. Nol è un mâl che nol sedi un ben (?)

brexit

Nol è un mâl che nol sedi un ben. Chê de vitorie tal referendum dai 23 di Jugn (cul 51,8% cuintri dal 48,2% dai vôts) di chei a pro de jessude dal Ream Unît (RU) de Union Europeane (UE) no je une biele gnove, ni pe Europe ni par Londre, però si pues calcolâle tant che un moment di veretât, in cont de situazion europeane in gjenerâl e par ce che al tocje i rapuarts tra RU e UE.

Di une bande, dal sucès eletorâl dal isolazionisim britanic a trazion inglese e rive une gnove conferme de mancjance – e de dibisugne – di une vere Union Europeane. La UE che o vin cumò e je masse intergovernative, masse economiciste e masse burocratiche: par chel e je masse scjarse – a’nd è masse pocje Europe – e propit par vie di chei stes limits e ven percepide – e soredut e ven contade di un cierte retoriche nostalgjiche e nazionaliste – tant che «masse invadente».
Di chê altre, la sielte de maiorance dai eletôrs britanics che a son lâts a votâ e permet di fâ clarece in cont des relazions tra il Ream Unît e la UE, par vie che – se a Londre a decidin pardabon di lâ daûr di ce che a àn dit il 51,8% dai votants – la sô posizion in Europe no podarà jessi plui chê anfibie e ambigue, cuntun pît dentri e cuntun pît fûr, che e je stade prime dentri des Comunitâts europeanis e po dal 1992 incà dentri de Union.

UK_brexit_scotin

In cont dai rapuarts tra RU e UE, al merete ricuardât che la ambiguitât e la ecezionalitât de posizion di Londre e jere daûr a cressi ancjemò. Cun di fat, cualchi mês prime dal referendum dai 23 di Jugn, cun chê di judâ il premier Cameron a indreçâ l’eletorât par che al vincès il “Remain”, al jere stât fat bon un gnûf acuardi tra Londre e Bruxelles, cuntune schirie di gnovis concessions e deroghis. Al veve reson cui che, cul domandâsi a cui che i varès zovât chel pat, al denunciave la sô inutilitât: no dome parcè che al varès rinfuartît la ecezion britaniche e la dimension intergovernative de UE, ma ancje parcè che – cemût che o savìn cumò – nol à nancje rivât a jonzi il so risultât imediât di dâ sigurazions ae part plui isolazioniste de opinion publiche.

Il risultât dal referendum al à fat un grum di scjas, ator pe Europe e in particolâr tal Stât talian, là che tancj di lôr si son discuvierts, tal ultin minût, o ipereuropeiscj o supereurosetics. A son par sigûr diviersis resons di preocupazion, ma la reazion mediatiche, politiche e finanziarie e je stade esagjerade e salacor irazionâl, cemût che al à marcât plui di cualchidun.
Chel che al ven clamât “Brexit” al è un colp ae stabilitât de UE di cumò che però e je za clopadice par so cont, pes resons che a son stadis za ricuardadis. E je vere che il pericul al è che la operazion dal referendum, cemût che le àn gjestide Cameron, la Comission europeane e il Consei european, e deventi un model e che al sedi un efiet domino, cun altris guviers che, par finalitâts di propagande interne, a manacin la jessude de Union e a inviin une barufe cun Bruxelles. Ma cheste situazion e pues cambiâ se si rive a mudâ l’implant intergovernatîf de UE di cumò.

uk_A

Il “Brexit” al è soredut un probleme pal Ream Unît: par Cameron, che al à zuiât cul fûc de demagogjie isolazioniste, che al è restât scotât e che cumò al è passât de convinzion di vinci ancje il braç di fier cuntune part dai Conservadôrs, dal so eletorât e di chel dal UKIP ae necessitât di dimetisi de sô incarghe di prin ministri; pal Parlament britanic, che inte sô maiorance nol à nissune voie di lâ daûr dal risultât dal referendum e al è daûr a cirî une soluzion alternative; pe societât britaniche in gjenerâl, là che a saltin fûr diviers di lôr che a son pintûts di vê votât a pro dal “Leave”.

Chest pintiment si palese in diviersis manieris: declarazions publichis dai ministris britanics, iniziativis inviadis par domandâ un altri referendum o par fermâ la robe in parlament, gnovis in cont de incressite dal numar di ricercjis sul web in conte de UE, smentide de bande dai leaders dal “Leave” des promessis fatis intant de campagne eletorâl. E al à lis sôs resons: tes relazions tra il Ream Unît e la UE, che a vignaran definidis dentri di doi agns, no saran masse cambiaments, ma e sarà dome clarece, cun cualchi vincul european in mancul (pôcs, parcè che a’nd jerin za pôcs prime) e cuntune schirie di disvantaçs pe economie britaniche e tai cumierçs cun chei altris stâts dal continent. Cun di fat, il “Brexit”, se al vignarà metût in vore pardabon, al mudarà in piês la situazion dai citadins europeans imigrâts tal Ream Unît, ma soredut lis cundizions di mobilitât di marcjanziis e personis in direzion dal continent.

e-cumò

Pai sostignidôrs dal “Leave” chê dai 23 di Jugn e somee pardabon une vitorie di Pirro: par chei che a àn crodût ae demagogjie nazionaliste e aes nostalgjiis imperiâls, e par chei che a àn volût fâi cuintri aes politichis antisociâls metudis in vore tai ultins agns daûr des indicazions de cussì clamade «Europe a vuide todescje», ma in realtât inviadis ancjemò ai timps de Thatcher e puartadis indenant dal “New Labour”.

Il risultât dal referendum britanic plui che une sconfite pe Europe e pe prospetive di integrazion e di unitât e je une sconfite, a Londre e inaltrò, par chel europeisim «cjacaris e distintîf», tes sôs diviersis espressions istituzionâls, afaristis e nazionalistis, che par esempli si jemple tant la bocje di Europe ma no ten cont dai principis di fonde de integrazion europeane e dai indreçaments des istituzions continentâls a pro de tutele des minorancis, dai dirits linguistics e de diversitât culturâl.

alba_eire_uk

Al è chel stes (presumût…) europeisim, che dome doi agns indaûr al sbeleave i indipendentiscj scozês tant che «localiscj», in cuintriposizion cuntun presumût «cosmopolitisim» anglobritanic e che in cheste ocasion nol pues plui platâsi daûr dai siei prejudizis.
Cun di fat – e nol è un câs – tra i sostignidôrs plui convints dal “Remain” a jerin i partîts nazionalitariis scozês, galês e irlandês, magari ancje cun posizions critichis in cont de situazion de UE di cumò, e lis entitâts che in Gales, in Scozie, te Irlande dal Nord e te piçule Cornualie a son impegnadis te promozion dai dirits linguistics e des lenghis propriis di chês comunitâts.
Cussì propit in Scozie il “Remain” al à cjapât, dapardut, lis percentuâls di vôts plui altis in gjenerâl (plui dal 60%) e ancje tes sîs conteis nordirlandesis al à jonzût il 55%, intant che no je lade compagn in Cornualie (sù par jù al 44%) e in Gales (“Remain” in medie al 47,5%, ma cun pontis maioritariis a Cardiff e tal nordovest), là che al e stât plui dificil tirâsi fûr dal isolazionisim inglês,

Cumò il risultât scozês e chel de Irlande dal Nord a deventin la ocasion par rilançâ il percors di autodeterminazion: viers di une Scozie indipendente, in direzion de unificazion de Irlande e in ducj doi i câs inte suaze de Europe. Magari ancje inte suaze di une Union European miôr di chê di cumò: mancul intergovernative, mancul economiciste, mancul burocratiche e duncje plui Union, plui Europeane e plui «unide te diversitât».

UK_bis

A Bruxelles, a Bilbao e a Udin: «O volìn une Europe pardabon unide te diversitât»

respecting linguistic diversity

Il 1n di Jugn stât a Bruxelles, i grups dai Verts/Aliance libare europeane (ALE-EFA) e de Çampe unitarie europeane/Çampe nordiche verde (GUE/NGL) dal Parlament european, adun cu la Rêt europeane pe paritât des lenghis (ELEN), a àn inmaneât une cunvigne dal titul Respecting linguistic diversity? Language discrimination in the EU.

E je stade la ocasion par tirâ dongje une schirie di denunziis in cont des discriminazions che a vegnin patidis de bande dai citadins europeans che a fasin part des minorancis e par sburtâ la metude in vore de normative di tutele che za e esist e il disvilup di gnovis azions a pro dal ricognossiment concret dai dirits linguistics a ducj i nivei.

Su la fonde de documentazion presentade dai rapresentants di une schirie di entitâts espression des diviersis comunitâts linguistichis in cundizion di minorance, al è stât piturât un cuadri de situazion che al mostre une vore di problemis, cun discriminazions su la fonde de lenghe che a vegnin fatis in diviersis zonis de Europe e ancje i contescj – dai Paîs catalans ae Galizie, de Irlande al Paîs Basc – là che e je une normative di tutele che, almancul su la cjarte, e je une vore indenant.

Ae cunvigne a àn cjapât part ancje eurodeputâts e rapresentants di istituzions tant che la Comission europeane, il Consei de Europe, la OSCE e lis Nazions Unidis. In conclusion dal incuintri di Bruxelles e je stade fate indenant la propueste di ricognossi ad in plen lis discriminazions su la fonde de lenghe par ce che a son, ven a dî tant che une forme di razisim. Cun di plui al è stât marcât che no pues esisti nissune unitât europeane cence il ricognossiment dai dirits linguistics e la promozion de diversitât culturâl.

npld2016

Chê stesse cuistion e jere stade frontade cualchi zornade prime, dai 25 ai 27 di Mai, ancje a Bilbao, inte suaze de Assemblee gjenerâl dal NPLD, il Network pe promozion de diversitât linguistiche, che al ten dongje istituzions teritoriâls e altris organizazions e associazions che a son espression des comunitâts linguistichis in cundizion di minorance.

Za un pôc di timp indaûr il Network al veve prontât un document di pueste, che al è stât presentât ancje al comissari european pe istruzion e pe culture, Tibor Navracsics. E je la cussi clamade Roadmap pe diversitât linguistiche in Europe, che e à chê di fâ jentrâ lis lenghis minoritariis, il lôr insegnament e il lôr ûs ad in pklen dentri de strategjie gjenerâl de Agenda 2020.

Che no puedi esisti unitât europeane cence la garanzie dai dirits linguistics, la promozion de diversitât culturâl e la tutele des minorancis al jere stât dit ancje inte suaze de taule taronde Friûl@Europe, che si à davuele a Udin ai 23 di Mai.

Tal incuintri, inmaneât inte suaze dal Modul Jean Monnet MuMuCEI (Multilingualism, Multicultural Citizenship and European Integration) dal Dipartiment di Siencis Juridichis de Universitât dal Friûl, si à memoreât il trentesim inovâl de muart di Altiero Spinelli, si à ricuardât la sô persone e la sô ativitât a pro de Europe unide e si à fat un resonament cun plui vôs propit sul rapuart tra integrazion europeane e tutele des minorancis e su cemût che dome cu la tutele dai dirits linguistics il Friûl-VJ al pues jessi pardabon une regjon europeane.

 Layout 1

La Zornade de Europe pe Europe di ducj e di ducj i dîs

europe

Sabide stade a jerin i 9 di Mai. E je une date impuartantone, stant che e je chê dal inovâl de innomendade “Declarazion Schuman” e par chel, a tacâ dal 1985, e je memeoreade tant che “Zornade” o “Fieste” de Europe.
Cun di fat, in chê dì dal 1950 il ministri pai afârs forescj dal Stât francês di in chê volte, Robert Schuman, al fasè un discors public a Parîs che al tocjeve la pâs e la Europe e in cualchi maniere cu lis sôs peraulis al invià chel procès che, pûr cun cetantis contradizions, al è ancjemò in vore in dì di vuê: il procès de integrazion europeane.
In cont de impuartance e de atualitât de “Declarazion” us conseìn di lei doi articui: un che al è saltât fûr cualchi zornade indaûr  e un altri, publicât l’an passât, che al tocje ancje il Friûl tant che part de Europe.

Di trente agns incà cheste zornade e ven memoreade un pôc dapardut cun chê di marcâ la impuartance de prospetive de unitât europeane. Magari cussì no, al sucêt avonde dispès che l’argoment al vegni frontât cun tante retoriche e cun pocje sostance. Al sucêt ancje alc altri, par fortune, e chel inovâl al devente une ocasion par moments di aprofondiment in cont de situazion de Europe, chê che e je e chê che e mancje.

Un di chescj al è l’incuintri che si davuelç ai 12 di Mai a Turin alì dal Campus Einaudi de Universitât, in Lungo Dora Siena 100.
Inmaneade de bande de riviste Europae  e dal Centro studi sul federalismo
di Moncalieri, la zornade e à tant che titul Ucraina al bivio. Quale sovranità ai confini di quale Europa?.

La crisi ucraine e je une des tantis cuistions viertis che tai ultins agns, di une bande, a son motîf di preocupazion ator pe Europe e, di chê altre, a palesin propit i limits e lis contradizions dal  procès de integrazion europeane e a marchin la dibisugne di vê une Europe plui unide e duncje plui Europe. Sul argoment,  frontât propit cun chê di cjalâ in muse la realtât de Europe tal so complès,  si pues tornâ a lei ancje un articul saltât fûr un an e mieç indaûr.

Une altre cuistion, une vore di atualitât, che si pues calcolâle tant che un altri spieli des contradizions de Europe dai ultins agns, e je chê che si palese ogni dì tal cûr dal Mediterani, cun tancj di lôr che a scjampin des vueris e de fam, cun chei che a speculin su cheste dibisugne di scjampâ e di lâ inaltrò a cirî fortune e cun chei che no àn ancjemò capît ben ce che a àn di fâ denant di cheste situazion.
Ancje su chest argoment o zontìn un articul di lei.

Cui auguris in ritart pe Fieste de Europe. E, cence limits di datis, a pro di une Europe «plui Europe» ducj i dîs. E par ducj.

Ucraine, Russie, Europe

mont

A son trê dîs che al è in vore il fermait il fûc inte Ucraine orientâl.
In cont di cemût e di cetant che al ven rispietât a son informazions une vore diferentis.

Par sigûr la cuistion vierte tra Ucraine e Russie e je grivie e penze e in particolâr, magari cussì no, e met in evidence un dai limits sostanziâi de Union europeane, ven a dî la mancjance di une sô politiche unitarie e autonome tes relazions cul rest dal mont, che e je leade cun altris siei difiets di fonde.

Il prin di chescj difiets al è il fat che la Ue le fasin i Stâts, che a continuin a tignî ad in plen la lôr sovranitât (o a jessi convints di tignîle) ancje in chest cjamp e duncje si movin ognidun par so cont, cemût che si viôt te composizion dal Consei di sigurece de Onu e tes tratativis fatis la setemane passade cun Russie e Ucraine.
Il secont al è il rapuart, che al diven di chê stesse situazion, tra la Ue e la Nato, massime dopo de fin de Vuere frede.

Cumò la nestre atenzion e je za pontade di une altre bande, su la Libie, però nus somee il câs di no pierdi di viste la cuistion de Ucraine.
Cussì, in cont di chel câs o vin cjatât un articul di Lucio Levi, publicât une setemane indaûr sul sît dal Centro studi sul federalismo di Moncalieri, che al merete let e tornât a lei.
Si pues leilu achì.

Zornade de Europe 2014

unida_en_la_diversidad

Chê di vuê e je une zornade impuartante: e je la Zornade de Europe, clamade ancje ‘Zornade europeane’ o ‘Fieste de Europe’.
Ai 9 di Mai al cole l’inovâl de innomenade ‘Declarazion Schuman’, dade fûr a Paris tal 1950, che e je calcolade tant che il prin pas in cualchi maniere formâl dal procès di integrazion europeane, e cheste date e je deventade une ocasion par fâ fieste pe Europe e par pensâi parsore, cjalant al avignî.

Chi di pocjis setemanis a saran ancje lis elezions europeanis e un moment di riflession e aprofondiment su la situazion de Europe e des istituzions de Union europeane al devente ancjemò plui necessari.

Par chest us segnalìn doi articui, che si cjatin tal sît dal Centro studi sul federalismo di Moncalieri:
L’Europa necessaria di Umberto Morelli
Le ragioni dell’euro di Roberto Palea e Flavio Brugnoli

Us segnalìn ancje il progjet HOPEurope di Gjenue e trê articui par furlan su chescj argoments, che si pues leiju achì , achì  e achì.

Cence dismenteâ un articul che si cjate tal nestri blog e une trasmission speciâl di Radio Onde Furlane  che si pues tornâ a scoltâle ancje in rêt.

bandeu

Trente agns dal ‘Progjet Spinelli’. Storie e atualitât

 spinelli

Trente agns indaûr il Parlament european al faseve bon il Progjet di Tratât che al istituìs la Union europeane, fat indenant di Altiero Spinelli.
Ai 14 di Fevr
âr dal 1984, ae fin de legjislature là che pe prime volte i eurodeputâts a jerin stâts elets diretamentri dai citadins dai Stâts membris des Comunitâts europeanis, chê risoluzion e vignive fate buine di une maiorance largjonone. Cun chel document il Parlament european al faseve indenant une propueste articolade di riforme e di riorganizazion dal asset istituzionâl des
Comunitâts europeanis di in chê volte.

 L’intindiment di chel che al ven clamât ‘Progjet Spinelli’, propit par marcâ l’impegn te sô elaborazion de bande di chel che al è stât un dai promotôrs plui atîfs e plui convints de unitât de Europe, a tacâ dal cussì clamât ‘Manifesto di Ventotene’, al jere chel di definî a clâr la distribuzion di competencis tra i Stâts membris e il nivel comunitari. In cheste suaze, là che a vignivin fats indenant ancje il concet di citadinance europeane e la denominazion di Union europeane, si definivin ancje il principi di fonde dal primât dal dirit de Union su chel dai Stâts, chel de partecipazion ative e democratiche dai citadins e chel de sussidiarietât, ven a dî la adozion di dutis lis decisions al nivel istituzionâl plui dongje dai citadins.

Chê propueste di riforme profonde des istituzions comunitariis intune prospetive federâl e jere une vore inovative e salacor rivoluzionarie. Propit par chest, dome pocjis des propuestis operativis e dai indreçaments che si cjatin tal ‘Progjet Spinelli’ a àn rivât adore – e dome in timps plui resints – a jentrâ dentri dai tratâts europeans.

Memoreâ chê iniziative, fate indenant di chel stes Parlament european che pe prime volte a nivel comunitari al veve cjapât sù ancje une iniziative a pro de tutele des minorancis cu lis risoluzions Arfè dal 1981 e dal 1983, nol à dome une valence storiche, par marcâ la impuartance di chel document e de influence, parziâl ma significative, che al à vût intal disvilup dal procès di integrazion continentâl.
L’inovâl de aprovazion dal ‘Progjet Spinelli’ al è ancje une ocasion di riflession su la Europe dal dì di vuê: chê che e je e chê che e mancje e che e covente fate sù.Une Europe dai popui, dai citadins europeans e dai dirits di ducj: plui solidarie, plui juste, plui sane, plui democratiche e pardabon “unide inte diversitât”. Une Europe divierse di chê fate indenant sei di chei che, sglonfs di nazionalisim, populisim e demagogjie. a son cuintri de integrazion europeane, sei di chei che si platin daûr di un europeisim di façade, minimalist, economicistic e intergovernatîf. Une Europe plui Europe,
pardabon ‘unide inte diversitât’.