Al torne Babêl Europe, in spiete di Suns Europe

suns-europe-ok

E je aromai ore di Suns Europe, il Festival european des arts  tes lenghis minozadis che si fasarà a Udin, li dal Teatri gnûf Giovanni da Udine, dal prin ai 3 di Dicembar. Cussì, cuasit ae vilie di chê manifestazion, ancje la gnove pontade di Babêl Europe e sarà une trasmission plene di… Suns.

imle

L’apontament cuindisinâl che al puarte lis scoltadoris e i scoltadôrs di Radio Onde Furlane a torzeon tra grups, soliscj, lenghis, musichis, minorancis e nazions cence stât, vuê in direte a 11 a buinore e doman in repliche a une dopo di misdì, al cjalarà ancjemò une volte in direzion di chê manifestazion e dal so program, cu la scolte di cualchidun dai protagoniscj de sô sezion musicâl ma ancje cuntune voglade viers di chês altris sezions, dedicadis ae produzion audiovisive e ae leterature.

Par chel, si podarà tornâ ancje scoltâ alc dai Obrint Pas, stant che un dai protagoniscj di Suns Europe al è propit Xavi Sarrià, cjantant e ghitarist di chel grup e autôr di contis e di romançs par catalan.

xavisarria

Cun di plui si butarà un voli (e une orele) ancje in altris direzions. Par esempli viers de gnove produzion di Fermin Muguruza o ben – dopo vê savude la brute gnove – cuntun omaç al cjantautôr galizian Narf.

Babêl Europe si pues scoltâle su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e, dopo des dôs emissions di vuê e di doman, ancjemò in rêt.

fm_gnuuf

Advertisements

Suns Ladinia. And the winner is… Doro Gjat

doro_gjat

Une altre biele serade di musiche, di lenghis, di fieste e di creativitât. Îr l’altri a Moena, tal Teatri Navalge, Suns Ladinia, la manifestazion dedicade ae produzion musicâl tes lenghis minorizadis de Europe alpine e mediteranie, e à mantignût ce che si spieatavisi in cont de cualitât e de varietât des propuestis musicâls presentadis e dal nivel gjenerâl dal spetacul.

In continuitât cun chê che e je la storie de rassegne nassude in Friûl tal 2009 e che di in chê volte si à davuelte a Udin, tai Grisons tal 2011, in Ladinie – simpri a Moena – tal 2013 e in Sardegne, tal 2015, e je stade une serade plene di… Suns. Trê i elements di fonde: cjançons bielis, cjantadis e sunadis ben; teatri plen cuntun public atent e content; conduzion de manifestazion cun snait e cun passion par cure dal atôr e animadôr furlan Michele Polo e de cjantautore fassane Martina Iori.

suns_ladinia_2016

Sul palc dal Navalge il supergrup ocitan TRIP, il performer sart Arrogalla, il cjantautôr ladin Marco Mattia, il rapper cjargnel Doro Gjat, il cjantautôr de Grecìe Salentine Rocco De Santis, la cjantante rumance She, York e i rockers ladins Berdon a son stâts bulos tes lôr esibizions, che a àn marcât lis diviersis carateristichis di ognidune des propuestis musicâls.

I components de jurie (la ladine Lucia Gross, la furlane Mojra Bearzot, il rumanç Jachen Prevost, l’ocitan Stefano Degioanni, il sart Giancarlo Palermo e il grico Pantaleo Rielli) a àn vût il lôr bon ce fâ par sielzi il vincidôr, ma a àn rivât a cjatâsi in cunvigne sul non di Doro Gjat e su la sô cjançon Discolce, «pe capacitât di contâ une storie contemporanie, cuntune paronance grandonone de metriche, cuntun lengaç musicâl atuâl e lizêr e cuntune presince seniche trative».
Cun di plui a àn dât une menzion speciâl a Is di Arrogalla «pal sunôr potent e alternatîf, che al met dongje lis espressions de tradizion intune produzion di avanguardie europeane».

berdon

Intat che la jurie e jere daûr e fâ lis sôs valutazions, il spetacul al è lât dilunc cun doi moments dedicâts ae musiche contemporanie par ladin: la proiezion dal video Zenza de te dal grup Lingue Morte e je stade in chel istès un omaç dedicât ae ativitât di chê band ironiche e pevarine e un ricuart di Valentino Croce ‘Lere’, innomenât personaç dal panorame de musiche contemporanie par ladin, za cjantant di chê formazion e di altris grups fassans; il piçul conciert di Martina Iori e Stefano Merighi al à palesât la vivarosetât de cjançon ladine.

Chê stesse carateristiche e veve cjatât une rapresentazion concrete za vie pe prime part de serade cu lis esibizions di Marco Mattia e dai Berdon.
Propit i cuatri zovins fassans, che a messedin tescj par ladin e rock ruspiôs, a àn cjapât il premi dal public. Par chel ai 3 di Dicembar a saran ancje lôr a Udin, adun cul vincidôr Doro Gjat  e cun chei altris grups e soliscj che a son stâts selezionâts tra i cincuante di lôr che a àn fat indenant la lôr candidature, pe serade finâl dal festival european des arts tes lenghis minorizadis Suns Europe.

suns-europe-ok

Suns Ladinia, a Moena lis cjançons e lis lenghis de Europe alpine e mediteranie

suns_ladinia_2016

E je rivade la zornade dai 19 di Novembar. Usgnot a Moena, tal Teatri Navalge, si fasarà Suns Ladinia, la manifestazion dedicade ae produzion musicâl tes lenghis minorizadis de Europe alpine e mediteranie.

Chel che par ladin si clame Festival dla ciantia ti lengac di mendranza al è la edizion di chest an de rassegne nassude in Friûl tal 2009 e che di in chê volte si à davuelt in maniere plui o mancul alternade a Udin e inaltrò: tai Grisons tal 2011, in Ladinie – simpri a Moena – tal 2013 e in Sardegne, tal 2015.

sheyork

A tacâ dal an passât, cun Suns Sardigna, cheste manifestazion, che e cuvierç il Stât talian, la Slovenie, la Austrie, la Svuizare e la part sud ocidentâl dal Stât francês (la Corsiche, la zone francoprovençâl e part di chê ocitane), e je la preselezion ‘live’ – par grups e soliscj di cheste part dal continent european – de sezion dedicade ae musiche di Suns Europe, il festival european des arts tes lenghis minorizadis, che si davuelzarà te capitâl dal Friûl dal 1n ai 3 di Dicembar.

doro_gjat

Par chel la serade di Moena, che e je za interessante par so cont, e domande ancjemò plui curiositât e plui atenzion. I siei protagoniscj a saran il rapper cjargnel Doro Gjat, il performer sart Arrogalla, il cjantautôr de Grecìe Salentine Rocco De Santis, la cjantante rumance She, York, i rockers ladins Berdon, il lôr paisan Marco Mattia e i ocitans TRIP.

rocco-de-santis-1

Suns Ladinia e je une manifestazion inmaneade cul coordenament de associazion La Grenz e cu la poie des istituzions di chenti. La sô direzion artistiche e je par cure di Enrico Tommasini, musicist implicât di tancj agns in diviers progjets e par chel une vore cognossût ancje fûr de Ladinie e dal Trentin. La conduzion de serade e sarà par cure dal atôr e animadôr furlan Michele Polo e de cjantautore fassane Martina Iori.

L’event al tache a 9 di gnot.

 

 

Suns di ogni sorte e alc altri ancjemò te gnove pontade di Babêl Europe

suns_ladinia_2016

A mancjin pôcs dîs ai 19 di Novembar, cuant che a Moena, te ladine Val di Fasse/Val de Fascia, li dal Teatri Navalge si fasarà Suns Ladinia – Festival dla ciantia ti lengac di mendranza, la manifestazion dedicade ae produzion musicâl tes lenghis minoritariis de Europe alpine e mediteranie.
Cun di plui chi di mancul di trê setemanis  al sarà il prin di Dicembar cuant che a cuatri e mieze dopo di misdì si screarà in maniere uficiâl la seconde edizion di Suns Europe, il Festival european des arts  tes lenghis minoritariis che si fasarà a Udin li dal Teatri gnûf Giovanni da Udine.

familia-caamagno_foto-2

La gnove pontade di Babêl Europe, l’apontament cuindisinâl che al puarte lis scoltadoris e i scoltadôrs di Radio Onde Furlane a torzeon tra grups, soliscj, lenghis, musichis, minorancis e nazions cence stât, vuê in direte a 11 a buinore e doman in repliche a une dopo di misdì, no podarà fâ di mancul di cjalâ in direzion di chês dôs manifestazions.

suns-europe-ok

Par chel, e sarà une trasmission dedicade a Suns…  di ogni sorte. Di une bande, cu lis ultimis gnovis in cont de manifestazion che si davuelzarà cheste sabide, ancje parcè che e je une sorte di tape di svicinament ae manifestazion che e rindarà il Friûl il cûr de diversitât linguistiche e culturâl dal continent, cu lis sôs sezions dedicadis ae musiche, ae produzion audiovisive e ae leterature. Di chê altre propit cul inviament dal cont par ledrôs in direzion di Suns Europe e cu la scolte des cjançons di cualchidun dai protagoniscj de sezion musicâl di chê manifestazion.

1-moussu-t-e-lei-jovents-c-christine-cornillet-2016

Te scjalute dal program al sarà ancje alc altri, sgarfant ator tra jessudis discografichis babelichis saltadis fûr tai ultins mês, a tacâ di Navega!, il disc plui resint di Moussu T e Lei Jovents e di Lis conseguenzis dal deliri, il secont cd di Rive No Tocje.

Babêl Europe si pues scoltâle su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e, dopo des dôs emissions di vuê e di doman, ancjemò in rêt.

logo_web

Babêl Europe «in Onde» ancje il 1n di Novembar

microfono

Vuê al è il 1n di Novembar, ma Babêl Europe nol fâs fieste e al da apontament aes sôs scoltadoris e ai siei scoltadôrs a 11 a buinore in direte (e in repliche doman ai 2 a une dopo di misdì) simpri su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Il program cuindisinâl dedicât ae creativitât musicâl tes lenghis minorizadis al pontarà la sô atenzion soredut su lis gnovis che a rivin in cont di Suns Europe, il festival des arts performativis in lenghe minoritarie che si davuelzarà a Udin dal 1n ai 3 di Dicembar, e soredut su chês che a tocjin Suns Ladinia, festival de musiche tes lenghis minoritariis de Europe alpine e mediteranie, che al è une sorte di tape di svicinament ae manifestazion che e rindarà il Friûl il cûr de diversitât linguistiche e culturâl dal continent, cu lis sôs sezions dedicadis ae musiche, ae produzion audiovisive e ae leterature.

suns-europe-ok

Il viaç tra lenghis, musichis, minorancis e nazions cence stât, che con frecuence cuindisinâl al cjate spazi tal palinsest de radio libare dai furlans, al larà daûr dai nons dai grups e dai soliscj che ai 19 di Novembar a sunaran a Moena, te ladine Val di Fasse/Val de Fascia, li dal Teatri Navalge.

Cussì, dopo che dôs setemanis indaûr a jere stade fate una cerce des cjançons presentadis  dal cjantautôr de Grecìe Salentine Rocco De Santis, Discolce dal rapper cjargnel Doro Gjat e dal musicist sart Arrogalla, vie pe gnove pontade di Babêl Europe si scoltarà la musiche dai ocitanis TRIP, de rumance She, York, dai ladins Berdon e dal lôr paisan Marco Mattia.

E sarà ancje la ocasion par ricuardâ la biele esibizion de cjantante algherese Claudia Crabuzza alì dal Teatri Ariston di Sanremo pe edizion di chest an dal Premi Tenco.

Ancje cheste pontade di Babêl Europe, dopo des dôs emissions di vuê e di doman, si podarà tornâ a scoltâle in rêt.

logo_web

 

‘Com un soldat’, l’album di Claudia Crabuzza al vinç la Targhe Tenco

crabuzza_coM-Un_soldat

Vuê vie pe buinore, juste cuant che e jere finude la gnove pontade di Babêl Europe là che si veve fevelât ancje dai finaliscj dal Premi Tenco, e je saltade fûr la biele gnove.
Te sezion dedicade aes produzions fatis tai dialets talians e tes lenghis minoritariis, che però a continuin a clamâle – a disin: «per praticità» (???) – dome «album in dialetto» (???!!!), la Targhe Tenco e vignarà dade a Claudia Crabuzza pal so disc par catalan algherês Com un soldat, ex aequo cun O sanghe, il biel disc di James Senese & Napoli Centrale.

Al è un ricognossiment pardabon meretât, parcè che Com un soldat al è un disc bielon no dome di scoltâ, ma ancje di lei (l’ûs «normâl» de lenghe catalane al è pardabon preseabil) e di cjalâ (par vie de cure de vieste grafiche).

Claudia Crabuzza, che za di un pôcs di agns e met dongje personalitât, vôs, musiche e peraulis par talian, par sart e soredut par catalan algherês, cun risultâts simpri une vore interessants, e pant inte maniere miôr lis sôs cualitâts e il rivoc des sôs esperiencis tal cjamp de composizion, de interpretazion e de produzion.

Implicade a tacâ dal 2000 tal progjet Chichimeca e vincidore, in cubie cun Claudio Gabriel Sanna, de edizion 2012 dal festival de cjançon tes lenghis minoritariis de Europe alpine e mediteranie, Suns, vie par chescj agns e à colaborât cun diviers musiciscj, in Sardegne, in Italie e inaltrò.

Tal so album solist, dât fûr te Vierte dal 2016, si pierdisi cun plasê dentri di dîs tocs plens di sostance e di caratar, cun sugjestions pop, lidrîs rock, influencis folk e tension poetiche.

Chel che al tache cun ‘Repic’ e che si siere cun ‘Arena i sal marí’ al è un viaç inmagant e scalembri, che al tocje il cûr, lis orelis e il cerviel cu la intensitât di cjançons tant che ‘Mare antiga’ e là che si cjatin ancje un omaç a Frida Kahlo, un ricuart di Lhasa de Sela e un adatament di un toc di Bianca d’Aponte.

Doi agns indaûr chel stes ricognossiment lu cjapave il furlan Loris Vescovo cul so disc Penisolâti.

Une recension di Com un soldat si pue leile ancje sul numar di Avost di chest an de La Patrie dal Friûl.

Al torne Suns Europe. La creativitât tes lenghis ‘altris’ si da adun in Friûl

logo-suns-europe-2

Chi di sù par jù doi mês Udin e il Friûl a tornaran a jessi il cûr de Europe de diversitât linguistiche e des sôs espressions creativis plui vivarosis. Dai 29 di Novembar ai 3 di Dicembar si davuelzarà la seconde edizion di Suns Europe, il Festival european des arts performativis tes lenghis minoritariis, nassût in Friûl tal Sorinvier dal an passât.

Ancje chest an la manifestazion, metude adun cul jutori de ARLeF, cul coordenament de cooperative Informazione Friulana/Radio Onde Furlane  e cu la colaborazion di une schirie di sogjets e istituzions dal Friûl e dal rest de Europe, e vûl jessi une ocasion di incuintri e di confront tra individuis, grups, lenghis, teritoris e comunitâts. Minorancis e nazionalitâts di dute la Europe che a tirin fûr la lenghe e si contin lôr e a contin il mont daûr de lôr cjaladure specifiche e cu la lôr lenghe, cun braùre e cence pôre o prejudizis. Sunôrs, visions, peraulis, ideis, espressions di identitâts che a esistin e che a resistin, che si cognossin, si ricognossin e si fasin cognossi e ricognossi cun snait e cun sintiment.

Suns Europe 2015 - foto Andrea Tomasin-1

Za cualchi setemane indaûr al è stât screât il sît gnûf de manifestazion (www.sunseurope.com), là che si cjatin informazions, documentazion di archivi e inzornaments in cont di ce che al sucedarà tai prossims mês.

Suns Europe al darà un premi aes produzions artistichis miôr in lenghe minoritarie, tai cjamps de musiche, dal audiovisîf e de leterature

In rêt si cjate ancje l’avîs pe partecipazion e il stes sît al permet ancje di notâsi e di cjariâ la domande di partecipazion e ducj i materiâi testuâi, musicâi e audiovisîfs che a coventin.

La presentazion des candidaturis si à di fâle dentri dentri dal 1n di Otubar.

La sezion dedicade ae musiche e cjape dentri ancje chest an une sorte di preselezion “live” pai artiscj de Europe alpine e mediteranie: chê tal 2015 e jere Suns Sardigna, cumò e sarà Suns Ladinia, stant che si davuelzarà in Novembar te Val di Fasse, là che e jere stade fate za la edizion de rassegne Suns tal 2013.

Suns Europe 2015 - foto Andrea Tomasin-1-2

Il Friûl alì dal Salon di Turin. Un câs par ‘Chi l’ha visto?’

salondallibri

Dôs setemanis indaûr, in ocasion de scree de edizion numar XXIX dal Salon internazionâl dal libri di Turin, o vevin scrit alc in cont di chê manifestazion che e je zaromai di tant timp une des plui impuartantis de nestre citât, massime pe partecipazion de int e pe atenzion mediatiche.
In particolâr si domandavin se tai paveons dal Lingotto o varessin cjatât alc – e trop – di furlan e magari ancje par furlan.

Se sul argoment, ancje su la fonde di cualchi informazion tirade dongje, za ae vilie dal Salon, za in chê volte no vevin pandût masse otimisim, cumò che la kermesse si à sierade di passe dîs dîs e dopo che o vin fat une biele passude dal Salon tra joibe ai 13 e lunis ai 16 di Mai, o podìn dî, cuntune cierte maluserie, che salacor la realtât e je stade piês di cemût che se spietavin.

Cun di fat chel de presince dal Friûl alì dal Salon si pues calcolâlu tant che un câs par Chi l’ha visto?. No lu scrivìn par vie che a tacâ dal an passât la presidente de Fondazione per il libro, la musica e la cultura, che e inmanee il Salon, e je propit Giovanna Milella, gjornaliste che par uns pôcs di agns e je stade la condutore di chê innomenade trasmission televisive, ma propit par vie che cirî e cjatâ il Friûl al Lingotto nus à someât la ricercje di une persone disparide, se di no piês.

Salone_del_Libro

Cul ferâl di Diogjen o vin cjatât alc – pocjissim… – alì des postazions di cualchi espositôr e di cualchi cjase editore furlane (Biblioteca dell’Immagine, LEG, Forum…) o tra i finaliscj dal concors leterari InediTO-Colline di Torino, intant che o vin fat ancjemò plui di fature – in proporzion – a fâ compagn tal stand uficiâl de Regjon Friûl-VJ, là che in teorie al varès vût di jessi alc di plui.

E je vere che ancje tes edizions passadis dal Salon, daûr di ce che nus sugjerìs la memorie, no nus à mai someât di viodi e di cjatâ cuissà cetant Friûl, però chest an o vin vût la impression che al fos ancjemò di mancul e soredut che e fos pardabon smamide la presince dal Friûl tal stand de Regjon e che e fos compagn – e salacor ancje puare, vueide e anonime, in gjenerâl – la stesse vitrine dal Friuli-VG.

Cun di fat, se di une bande il stand de Regjon al veve une aparence particolâr dal pont di viste architetonic, cuntune struture di len che e colpive il voli e che cualchidun al à vût preseât ancje su la stampe e in rêt, di chê altre, cundut de origjinalitât architetoniche, si stentave fintremai a capî di cui (e di ce) che al jere pardabon: Regione autonoma Friuli-VG, Librerie Coop o Angolo della poesia? O ce? Boh!

Spazio del Friuli Venezia Giulia alla ventinovesima edizione del Salone del Libro - Torino 15/05/2016

Parsore des listis di len de struture dal stand si podeve lei il non di puescj tant che Villa Manin o ben di cualchidune des manifestazions plui impuartantis che si davuelzin tal teritori regjonâl e che a varessin di vê un atrat sei culturâl sei turistic. A jerin i nons di Pordenonelegge, di èStoria, di Vicino/Lontano, di Mittelfest e forsit di un pâr di altris ancjemò, ma a’ndi mancjavin altris, a tacâ des manifestazions cinematografichis – cundut che propit Visioni e fos, cui siei diviers significâts, la peraule clâf dal Salon di chest an – e di events tant che PostajaTopolove/Stazione di Topolò o Suns Europe, che te sô prime edizion l’an passât al à mostrât cemût che lis specificitâts linguistichis e culturâls plurâls de regjon che e ten dongje la plui part dal Friûl cun Triest a son une clâf strategjiche par metisi in relazions positivis cul mont e par fâsi cognossi e ricognossi ator.

Di chê altre bande dal stand a jerin un pâr di scansiis di libris, ma no jere une rapresentazion ni dai autôrs dal Friûl e di Triest, ni de produzion de editorie regjonâl. Tai dîs passâts nus àn contât che diviers editôrs dal Friûl a jerin avonde inrabiâts parcè che cui che al à gjestît il stand no ju à ni calcolâts e ni coinvolzûts, intant che un rapresentant di une clape di culture nus à fat savê che a lôr ur vevin domandât alc, ma al jere masse tart par podê rispuindi e dâur un pôcs di libris e di rivistis.

Ancje i materiâi promozionâi nus àn someât avonde scjarsuts: lis solitis mapis di TurismoFVG (che dut câs a van simpri ben), cualchi depliant ca e là, une brochure de Fondazion Aquilee, copiis di un libri sui sîts archeologjics dal Alt Adriatic e uns pocjis di penis vançadis dal IntenetDay…

Spazio del Friuli Venezia Giulia alla ventinovesima edizione del Salone del Libro - Torino 15/05/2016

Il cjanton là che si fasevin i incuintris al jere ancje ninin. Però, cun dut che al jere ancje insiorât di une postazion dal Scriptorium Foroiuliense, al veve pardabon pôc atrat.
Cun di plui, la prime volte che o sin passâts di chês bandis o vin notât la espression stufadice di Gloria De Antoni (ma forsit e jere cussì dome par vie di un tweet di un assessôr regjonâl che le veve nomenade «Degli Antoni»… Cuissà?) e intune altre ocasion che o vin dât un cuc al program dai events, nus à someât pardabon une mission impussibile sielzi cuâl che, tra une presentazion dal libri di un poete piemontês par cure di Giovanni Tesio e un incuintri tra il diretôr artistic di Mittelfest e Simone Cristicchi, al sarès stât l’apontament plui rapresentatîf dal Friûl e de regjon…

Al mancjave il Friûl, si viodeve avonde pôc la regjon e soredut no si rivave a vualmâ la carateristiche di fonde des tieris a est dal nordest, ven a dî la esistence des lenghis ‘altris’ – il furlan, il sloven e il todesc – che cun dut de lôr storiche minorizazion a son ancjemò (avonde) vivarosis e a vegnin dopradis ancje par fâ alc di bon, di moderni e di interessant te scriture, te editorie, te comunicazion, te musiche, tal cine e plui in gjenerâl te produzion culturâl.

segamentu-de-ancas

Il stand de Regjon Sardegne, che al jere pôcs metris plui innà, cu la denominazion uficiâl par sart e par talian, cun scansiis plenis di libris di diviers editôrs, cun tancj libris e altris materiâi ancje par sart o par catalan algherês, cun incuintris tant che un omaç a Sergio Atzeni, une leture musicade par cure di Giacomo Casti e Frantziscu Medda Arrogalla e la presentazion di Segamentu de ancas, la version par sart di une ricueltis di contis par arap dal scritôr sirian Zakaria Tamer, in confront al someave cuasit chel de Catalogne dal 2002…

Plui in gjenerâl, denant de evidence dade al riferiment a ‘visionaris sarts’ tant che Antonio Gramsci  o Grazia Deledda o de ricjece de rapresentazion editoriâl, culturâl, teritoriâl, turistiche e enogastronomiche de Regjon Pulie, chel de Regjon Friûl-VJ al someave pardabon un stand cence anime e cence un straç di…vision.

Nus à someade une sorte di ‘version 2.0’ de situazion de promozion turistiche regjonâl di un pôcs di agns indaûr: in chê volte daûr dal sproc ‘Ospiti di gente unica’ si stentave a capî che la unicitât de int dal Friûl e di Triest e jere la pluralitât linguistiche e culturâl (che si spiele te ricjece dai paisaçs, de enogastronomie, de architeture, de art, des storiis e des identitâts); cumò – almancul cussì al è stât a Turin – si viôt che in chê regjon a son ‘unics’ pe capacitât di no jessi in stât di fâsi viodi, di fâsi cognossi, di fâsi ricognossi e di fâsi preseâ…

Tai dîs passâts o vin let cun interès che tal 2017 la regjon ospit dal Salon di Turin e varès di jessi propit chê dal Friûl-VJ. Sperìn che par chê volte al sedi cambiât alc e che chi di un an e rivi finalmentri a mostrâ la sô muse reâl e plurâl.

Suns Europe e alc altri ancjemò a Babêl Europe, su Onde Furlane e ancje in rêt

sume

Martars ai 15 di Dicembar, in direte a 11 a buinore su lis frecuencis di Radio Onde Furlane (90 Mhz te plui part dal Friûl,  90.2 Mhz in Cjargne e www.ondefurlane.eu in dut il mont), al è tornât Babêl Europe, il program cuindisinâl dedicât a lenghis, musichis e nazions cence stât.

Pieter_Bruegel_the_Elder_-_The_Tower_of_Babel_Rotterdam

La trasmission, che e je lade in onde in repliche ancje miercus ai 16 di Dicembar a une dopo di misdì, no podeve fâ di mancul di contâ (e di fâ scoltâ) ancjemò alc di Suns Europe, dai vincidôrs Me+Marie al grup groenlandês dai Sumé, protagonist de musiche e de politiche de Groenlande dai agns Setante e di un dai cines presentâts a Udin dentri de Mostre dal Cine passe vincj dîs indaûr.

corsiche

Cun chê di meti dongje i contignûts dal incuintri dai 4 di Dicembar stâts cun Patrizia Gattaceca – inte suaze di Sunsûrs, la sezion leterarie di Suns Europe – e il risultât des elezions regjonâls in Corsiche, dentri di Babêl Europe e je stade la pussibilitât di scoltâ ancje Canta U Populu Corsu.

nola

La trasmission si à sierade cuntune cerce dal gnûf progjet musicâl e audiovisîf di Fermin Muguruza, Nola? Irun meets New Orleans, un puint di sunôrs e di visions tra il Paîs Basc e la Luisiane.

Par cui che al à voie di scoltâlu, il program si cjate ancje in rêt.

Suns Europe, une serade musicâl bielonone di no dismenteâ

suns_vert

Une altre seradone plene di ‘Suns’. Dopo Suns Sardigna, dôs setemanis indaûr a Casteddu/Cagliari, nossere a Udin e je stade la serade finâl dal concors musicâl di Suns Europe, che e à presentât inte maniere miôr il spirt e i intindiments dal Festival european des arts  performativis tes lenghis minoritariis, che si siere vuê cul conciert di Marco Brosolo a Manià.

L’event che si à davuelt tal teatri gnûf Giovanni da Udine al à mantignût ce che si spietavisi sei pe cualitât dal spetacul che pe partecipazion dal public, cul Teatron plen di int e tancj di lôr a scoltâ la direte par radio su lis frecuencis di Onde Furlane e vie internet in formât audio e video sui sîts www.sunscontest.com e www.ondefurlane.eu: une serade che no si pues dismenteâ, che e à palesât sei la vivarosetât des espressions musicâls e plui in gjenerâl culturâls des minorancis e des nazionalitâts de Europe sei la impuartance des lôr rivendicazions e de lôr tutele.

Suns Europe 2015 - foto Andrea Tomasin-1

Sul palc dal ‘Teatron’ si à viodût ancje une rapresentazion concrete dai resonaments fats vie pe buinore dentri de taule taronde Friûl@Europe. Lenghis, dirits, creativitât e promozion dal teritori, che si à davuelte alì de Universitât dal Friûl. La diversitât linguistiche e je un valôr, un dirit e une oportunitât par ducj e l’investiment di risorsis fat a pro des lenghis minoritariis, de lôr tutele e de lôr promozion al è alc che al zove ancje al disvilup, sei in tiermins di coesion sociâl e di cualitât de vite, sei in tiermins economics, cemût che al à mostrât in particolâr il rapresentant dal guvier de Comunitât autonome basche (C.A.B.), Jorge Gimenez Bech, che te sô relazion al à presentât i dâts dal impat des politichis pal euskera su la economie (pal basc si investìs l’1% dal belanç de C.A.B., ma chest al prodûs il 5% dal prodot interni  sporc regjonâl).

Friuul@EuropeIMG

Cu la conduzion dal atôr e regjist furlan Michele Polo e de atore e cjantante sarde Claudia Aru, si àn tignût dongje il trip hop inmagant dai Ilmu de Carelie, il folk scalembri dai galizians Caxade, il crossover hip hop dai bretons Rhapsoldya, la fusion tra cjant tradizionâl sami e blues des Ozas, il folk punk dai bascs Kasernarat, lis sugjestions esotichis des Baschirie dai Zaman, il rock shoegaze dal irlandês Tuath, il pop di autôr emozionant de cubie rumance-ladine Me+Marie, il cjantautôr furlan Loris Vescovo e il pop soul dai frisons Marit & Nigel.

Te ultime part de serade, intant che si tiravin dongje i vôts dal public in sale e ator pal mont e la jurie tecniche e prontave il so judizi finâl, e je stade la performance di  Marco Brosolo, che cu la sô band e cu la complicitât dal rapper sart Alessio Mura e dal cjargnel Dek Ill Ceesa, al à presentât cinc tocs dal so disc Cadremo Feroci, dât fûr pôcs mês indaûr de bande de etichete britaniche Rought Trade, là che al vistìs di musiche e al interprete in plui lenghis nûf poesiis di Federico Tavan.

Tra i dîs finaliscj, il premi dal public al è lât ai Ilmu, intant che la jurie i à ricognssût la vitorie a Me+Marie, marcant lis carateristichis de lôr cjançon: semplice, intense e une vore trative.

E je stade une vitorie ancje par cui che al à volût Suns Europe e al à spudìat balins par metilu adun.

Suns Europe 2015 - foto Andrea Tomasin-1-2

Suns Europe al è un progjet metût adun cul jutori de ARLeF (Agjenzie Regjonâl pe Lenghe Furlane) e di Turismo FVG, cul coordenament de cooperative Informazione Friulana e cu la colaborazion dal CEC – Centro espressioni cinematografiche di Udine, des associazions Bottega Errante e Il Laboratorio, de cooperative Punto Zero, dal Comun di Udin e dal Teatri Gnûf ‘Giovanni da Udine’.