Pordenone – Frosinone 0-2

This image has an empty alt attribute; its file name is pordenone-calcio.png

Nuie ce fâ. Il sium dal Pordenon di rivâ a zuiâ la finâl dai playoff di serie B e magari ancje di gafâ la promozion in serie A si sfante a Triest, là che il Frosinone al ribalte il risultât de partide di domenie, al segne doi goi e no’nt cjape nissun e vuadagne il dirit di zuiâ cuintri dal Spezia.

Il Frosinone al mostre sin dal principi di vê cussience di scugnî zuiâ une partide diferente di chê fate in cjase. Il Pordenon al è atent, ma i ospits a àn un altri pas e za dopo siet minûts de prime sivilade di Beghetto a metin Ciano in cuindizion di tirâ in puarte e di impoira Di Gregorio cuntun plat viert che al vâ a finîle là che il puartîr neri e vert nol rive a tocjâle.

Il Pordenon al è colpît e salacor inçussît. I sborfs no rivin a cumbinâ alc e ce, intant che i laziâi a van di lunc a tignî in man il control de partide e a imbastî gnovis iniziativis ofensivis. Al rive cussì il secont gol di Novakovich, che al profite inte maniere miôr di un sugjeriment di Rohden e le bute dentri in diagonâl.

La formazion di Nesta e à il control de partide almancul per dute la prime mieze ore, cuant che finalmentri si fâs viodi in atac ancje il Pordenon cuntune punizion di Almici che e sbat intor de bariere: Ciurria al recupare la bale e al tire in puarte cun decision, ma no cree problemis a Bardi par vie che cence volê e ven fermade di un so compagn. Doi minûts plui tart al è un tîr cul cjâf di De Agostini su cross di Burrai, però la conclusion no cree problemis al puartîr aversari. La scuadre di balon furlane si à dismote e il so zûc si à impiât, cundut achel il Frosdinone al ten bot e al siere il prin timp cul dopli vantaç.

Inte seconde frazion Tesser al decît di tornâ a zuiâ la cjarte Tremolada, che al jere stât decisîf intal prin incuintri, e lu mande in cjamp tal puest di Gavazzi, intant che Nesta al mande fûr i siei goleadôrs, Ciano e Novakovich, e al imbastis une strategjie difensive. Il leit motiv di dut il secont timp al è chel de scuadre furlane in atac, che e cîr di tornâ a vierzi la partide e la cuistion de cualificazion, cui doi tentatîfs falîts di Bocalon, cun chel di Pobega e cuntune conclusion di Strizzolo che e oblee Bardi a fâ un biel intervent.

Il Frosinone al ten bot, al lenç fintremai la travierse cun Paganini, e al resist fint tal ultin. E al vuadagne il biliet pe finâl.

Frosinone – Pordenone 0-1

bandieris-friuul

Cuntun gol di Tremolada a vot minûts de fin dal timp regolamentâr il Pordenon al vinç la prime des dôs semifinâls di playoff di Serie B cuintri dal Frosinone. La scuadre di balon furlane e fâs un bon pas indenant in direzion de finâl zuiant une partide atente e ecuilibrade e rivant a disblocâ il risultât al sietim tentatîf.

Vie pal prin timp Frosinone e Pordenon si studiin e si controlin. La bale e zire soredut inte zone mediane dal cjamp e nissune des dôs formazion e rive a jessi pardabon pericolose, fale che pes conclusions di Dionisi, pai parons di cjase, e di Ciurra, di Alnici e di Burrai, pai neris e verts.

Cheste ande e marche ancje il principi de seconde frazion, cuant che Frosinone e Pordenon a frachin sul pedâl dal aceleradôr. A rivin cussì i tentatîfs fûr bersai di Novakovich e di Brighenti, la conclusion di Ciurra che e ven parade fûr in corner di Bardi e chê di Bocalon, che e lenç di pôc il pâl çamp.

La rispueste dal Frosinone e à ancjemò la firme di Dionisi che si dilibere ben inte aree di rigôr e al tire in puarte, ma Di Gregorio al è tal puest just intal moment just. La formazion di Tesser e je ancjemò plui pericolose plui indenant: tîr cul cjâf di Ciurra e paradone straordenarie di Bardi, che al torne a sierâ la sô puarte.

Tal minût numar 79, Tesser al fâs la sielte che cul savê di dopo e sarà decisive pe partide. Il tecnic al clame fûr Gavazzi e al mande dentri Tremolada, che juste trê minûts plui tart al tire di potence dal limit de aree e al impire Bardi: un a zero pal Pordenon.

I parons di cjase si sburtin indenant cun chê di cirî la pate, ma a van a pericul di patî la seconde rêt in cuintripît e dome Bardi al rive a evitâ il piês par lôr. Ae fin a rivin ancje segnâ, juste ae fin dal recupar, cun Salvi, che però al è in fûr zûc: Massimi si inecuarç daurman e il gol nol è bon.

La seconde semifinâl si zuiarà a Triest miercus ai 12 di Avost. Il Pordenon al partìs de vitorie di usgnot, intant che la scuadre di Nesta e varà di segnâ almancul doi goi.

Cremonese – Pordenone 2-2

This image has an empty alt attribute; its file name is pordenone-calcio.png

Cuatri goi e un pont par om. Cremonese e Pordenon a fasin fieste par vê rivât a jonzi i lôr obietîfs – la salvece pai grîs e ros e il cuart puest che al vûl dî semifinâls dai playoff pai sborfs – e a zuin une partide plasevule e scombatude. La scuadre di balon dal Friûl Ocidentâl e prove fin dal principi a vinci, intant che i parons di cjase a onorin il cjamp, tignint bot e rispuindint par dôs voltis al vantaç dai neris e verts.

La partide e ven batiade pal Pordenon di une conclusion di Strizzolo, parade cence padins di Volpe. La rispueste de Cremonese e je une iniziative di Celar che il so cross al ven deviât, la bale e rive Ciofani, ma l’atacant nol rive a gjestî la bale inte maniere miôr. La pression dai ospits e cres cul passâ dal timp e Ciurra, jentrât inte aree aversarie daûr di un sugjeriment di Strizzolo, al ven tocjât e butât jùù di Volpe in jessude. Baroni al sivile il rigôr e Tremolada al segne dal discut.

Il vantaç dal Pordenon al dure pôc, stant che la Cremonese e indovine une biele combinazion che e met Gaetano intes cundizions di ricevi la bale tal limit e di zirâle in maniere che Di Greogiro nol rivi a cjapâle e al è un a un.
Il Pordenon al torne al atac cun Ciurra, cun Tremolada e cun Strizzolo, che in particolâr si svicine al vantaç cuntun tîr che, cun Volpe fûr posizion, al ven deviât in corner di un difensôr de Cremonese. I parons di cjase si difindin e ator de fin dal prin timp a rivin ancje a puartâ plui indenant la linie dal lôr zûc.

La seconde frazion si vierç cuntune ocasionone de Cremonese – tîr cul cjâf di Celar che si stude a pene fûr di là dal pâl lontan – e cul secont gol dai neris e verts: conclusion potente e precise di Burrai, a pene jentrât, che e va a finîle dal cjanton in bande di Volpe.
I parons di cjase a rispuindin daurman, prime cuntun tîr fûr bersai di Celar, e po cun dôs cuarnadis di Ciofani e di Claiton che a vegnin paradis vie di Di Gregorio cun snait e cun mistîr.

Al rive cussì il secont gol de Cremonese: azion che si disvilupe a man çampe, fente di Ciofani che e libere Gaetano e tîr sec di diestri che al impire Di Gregorio.
Inte ultime part i parons di cjase a olsin un tic di plui, ma su la lôr strade a cjatin un Pordenon atent e soredut un Di Gregorio che al è simpri tal puest just, tal moment just e inte maniere juste, in particolâr par fermâ un tiron di Gustafson e par tignî cont di dôs iniziativis mancul pericolosis di Ciofani.
Il campionât si siere pe Cremonese ma al va ancjemò dilunc pal Pordenon, cu la code dai playoff: semifinâls proviodudis pai 9 e pai 12 di Avost.

Pordenone – Salernitana 1-1

This image has an empty alt attribute; its file name is pordenone-calcio.png

Un rigôr par om, un gol par om e un pont par om. Al è il struc de partide di nossere jenfri Pordenon e Salernitana, che a scombatin, a spudin balins e ae fin a jonzin un risultât che al va ben soredut pe scuadre di balon dal Friûl Ocidentâl, che si conferme al cuart puest, simpri a un pont di mancul dal Spezia, intant che la formazion di Ventura e varà di cirî di vinci cun chê scuadre ligure inte ultime di campionât par gafâ un puest in zone playoff.

Il Pordenon al partìs cul pît just, compat, ecuilibrât e dinamic. I ospits si presentin cun diviersis novitâts in cjamp – Vannucchi par Micai, Heurtaux par Migliorini, Capezzi par Akpa Akpro e Giannetti tal puest di Djuric – ma almacul in principi no cumbinin alc e ce, tacant di Dziczek che si fâs notâ par doi erôrs in atac. Ancje Pobega e Ciurra, di chê altre bande dal cjamp, a son pôc produtîfs intes primis dôs ocasions. Inte tierce, però, i sborfs no perdonin: Pobega al jentre ben inte aree de Salernitana e al oblee Aya a intervignî in maniere iregolâr cuintri dal neri e vert, Pezzuto al sivile e dal discut Burrai al segne.

Il gol cjapât al sune la svearine pe Salernitana, che al prove a fâ alc di plui e alc di miôr. Le jude, magari cussì no, l’arbitri che al viôt un fal (che nol esist) di Burrai su Di Tacchio e i da il penalty che al ven segnât propit dal atacant. Il gol fat i da ancjemò plui fuarce ae scuadre di Ventura, che e prove a passâ in vantaç cun Giannetti, che il so tîr cul cjâf al ve mandât in corner di Di Gregorio.

Vie pal secont timp il ritmi al è plui bas, ma si va dilunc a scombati. Gondo al cjape la travierse e Capezzi al prove cuntune conclusion centrâl di fûr. Il Pordenon al ten bot e juste intai ultins minûts al va dongje dal sucès, cun Semenzato che dal limit de aree di rigôr al oblee Vannucchi a salvâsi in corner cuntun bile gjest atletic. Plui tart ancjemò al è Di Gregorio a metis in mostre suntun tîr di Giannetti, intant che Dziczek al conferme di jessi in “zornade no” straçant une buine bale, che e finìs in curve.

Ascoli – Pordenone 2-2

This image has an empty alt attribute; its file name is pordenone-calcio.png

Il Pordenon cuintri dal Ascoli al prove a rompi la rie des ultimis sconfitis par tignîsi inte part plui alte de classifiche cun chê di passâ tai playoff inte maniere miôr. Vie pal prin timp i sborfs a imponin il lôr zûc e a passin in vantaç, prime de polse i parons di cjase a smiezin lis distancis e po tal secont timp a segnin ancjemò e ae fin lis dôs scuadris si spartissin un pont par om.

La scuadre di balon dal Friûl Ocidentâl e partìs cul pît just e e rive a segnâ daurman tal prin minût di zûc cun Bocalon, che al ven servît in verticâl inte aree di rigôr e al impire Leali. Sù par jù vincj minûts plui tart, dopo di un tentatîf fûr bersai dal blanc e neri Padoin, al rive il doi a zero firmât di Pobega, che al recupare un biel cross di Bocalon, al controle e al tire in puarte cun sucès.

L’Ascoli no si piert pai trois e al prove a reagjî cun Ninkovic, che al pinele un bon diestri a zirâ, che al ven tocjât in corner di Vogliacco. Il Pordenon al rispuint ancjemò
cun Pobega che al tire cul cjâf, ma nol cjate il spieli de puarte e i parons di cjase a rivin a segnâ juste ae fin de prime frazion: cross di Cavion e tîr cul cjâf di Ninkovic.

Il secont timp si vierç cul Ascoli che al torne a sburtâ indenant e al segne ancjemò cul so atacant serp, che al jentre inte aree e al tire in diagonâl: nuie ce fâ par Di Gregorio.
I parons di cjase a provin a segnâ ancje il tierç, almancul intun pâr di ocasions ancjemò cun Ninkovic e po cun Eramo. Il Pordenon al à mancul iniziative, al ten bot e al rispuint in cuintripît. Juste tal ultin dutis dôs lis scuadris a àn la bale buine par puartâsi a cjase i trê ponts, ma di une bande la conclusion di Zammarini, a pene jentrât tal puest di Pobega, e finìs disore de travierse e di chê altre il corne di Petrucci al ven deviât ben cul cjâf di Scamacca ma Di Gregorio al pare. E cussì la partide e finìs doi a doi e il Pordenon al reste tal cuart puest in classifiche, in spiete di zuiâ in cjase cuintri de Salernitana.

Pordenone – Cosenza 1-2

Il Pordenon al à voie di vinci par scancelâ l’impat de sconfite cul Crotone e il Cosenza al à une dibisugne mostre di vinci par jonzi la salvece. Ae fin e je plui fuarte la fam di ponts de scuadre calabrese, che e vinç in graciis dal fat di vê rivât a segnâ doi goi un daûr di chel altri jueste a metât dal prin timp. I sborfs, che a scomencin cul pît just, a patissin il colp dopli dai ospits e cundut che a tegnin di plui la bale (58%) e a tirin di plui in puarte (16 tentatîfs cuintri 7) a rivin a segnâ dome un gol: masse pôc par no lassâ il sucès ai cosentins.

I sborfs a scomencin cun chê di fâ valê la lôr supremazie teritoriâl e a imbastissin cualchi azion ofensive, ancje s no crein problemis a Saracco. Il Cosenza al ten bot e al rispuint. Dopo disevot minûts di zûc Rivière al jentre in aree e al rive a vuadagnâ un rigôr, lu tire e lu segne. In curt al rive ancje il gol di Bittante che al met dentri un biel cross che i rive de fasse diestre. Il Pordenon si cjate cuntun dopli disvantaç e al reste in chê cundizion fin ae polse.

Inte seconde frazion la scuadre di balon furlane e prove in plui ocasions a cirî di impirâ Saracco e al rive a jonzi l’obietîf cuntune deviazion di Candellone cul cjâf di un tîr cross di Tremolada. I verts e neris a van di lunc a atacâ, ma il Cosenza si difint cun snait e cun continuitât, si svicine fintremai al tierç gol cun Bahlouli in cuintripît e al puarte a cjase trê ponts impuartantons che i dan ancjemò la sperance di restâ in serie B.
Il Pordenon al reste tal cuart puest, in zone playoff.

Il Pordenon al à voie di vinc al pâr scancelâ il impat di sconfite cul Crotone e il Cosenza al à un dibisugne mostris di ponts pe salvece. Ae fin e je plui fuarte la fam di ponts di scuadre calabrese, che e vinç in graciis dal fat di vê rivât a segnâ cun Bahlouli in cuintripît.

Crotone – Pordenone 1-0

Il big match de zornade 34e dal campionât talian di balon masculin di Serie B si siere cu la vitorie dal Crotone, che al rinfuartìs il so secont puest in classifiche. Il Pordenon al piert e al sbrisse inte cuarte posizion, scjavalgjât dal Spezia, che al vinç cuintri dal Livorno.

In Calabrie la scuadre verde e nere e zuie une partide discrete, e lenç il vantaç almancul intun pâr di ocasions ma prime de polse e cjape il gol. Inte seconde frazion e prove a jonzi la paritât cun determinazion, ma i parons di cjase a fasin valê la lôr superioritât teritoriâl, atents indaûr e ancjemò pericolôs indenant, e a puartin a cjase il sucès e i trê ponts.

Inte prime part dal prin timp lis dôs scuadris si tegnin di voli une cun chê altre. Il Crotone al ten plui la bale e si fâs viodi in plui ocasions des bandis di Bindi, cun Simy e cun Benali cul cjâf e po cuntun diestri a fîl di pâl di Zanellato e cuntun tîr di lontan di Messias che al ven controlât de bande dal puartîr pordenonês.

Ancje la scuadre dal Friûl Ocidentâl e met adun cualchi bale pericolose, prime cun Candellone e po cun Ciurria, che i rispuint benon Cordaz, e cun Pobega che però la sô conclusion e je fûr bersai. Daûr de regule no scrite dal “gol straçât = gol cjapât” juste ae fin dal prin timp Molina al va vie dilunc de corsie di çampe e al pinele tal mieç de aree par Simy, che al fâs valê la sô altece e al impire Bindi cul cjâf.

Il secont timp si invie ben pai sborfs cuntune buine iniziative Ciurria in verticâl, che al taie la difese aversarie ma il so tîr nol è alc e ce. La rispueste dal Crotone e rive daurman cuntune zirade splendide di Messias, suntune altre bale golose metude tal mieç di Molina, ma Bindi al svole e al rive a parâ la bale in corner.

Cul passâ dai minûts la scuadre di Stroppa e cîr soredut di gjestî il vantaç, intant che il Pordenon al prove a dreçâ la gare cul gnûf jentrât Gavazzi, ma il so biel diagonâl al va fûr bersai. No àn fortune miôr i ultins tentatîfs dai parons di cjase, che dut câs a mantegnin il risultât favorevul e si gjoldin la vitorie.

Pordenone – Pisa 1-0

bandieris-friuul

Il Pordenon al scombat cun snait e cun cûr, al à ancje un tic di fortune e cussì al rive a vinci cuintri di un Pisa biel, che però al paie cualchi ingjenuitât e la serade sì di Bindi.
Nossere a Triest lis dôs scuadris a zuin une biele partide. I neris e verts a jessin dal cjamp cuntun gol fat, cence goi cjapâts e cun altris trê ponts in classifiche che ju sburtin adalt. Pai ospits l’incuintri al segne la interuzion di une serie di ben cinc risultâts positîfs e al è segnât dal displasê di no vê rivât a fâ rindi pardabon la lôr pression ofensive.

L’incuintri si vierç cuntune iniziative de scuadre di balon dal Friûl Ocidentâl che e rive daurman a vuadagnâ un penalty: Ciurria al ven tocjât di Lisi inte aree di rigôr toscane, Sozza al sivile, Burrai al tire e Gori al pare.
Passât il pericul, il Pisa al cjape il control de gare e i neris e verts a scuegnin difindisi. Dopo un pâr di tentatîfs di Pisano e di Lisi che no i dan nissune preocupazion, il protagonist principâl de formazion furlane al è Bindi, degn sostitût di Di Gregorio, che si met in mostre in particolâr cuant che al siere la puarte denant di un tîr di Vido e di une bombe di Gucher su punizion.

Il prin timp si siere ancjemò cuntune conclusion di Vido, che e conferme la superioritât ofensive dai ospits, e la musiche e je sù par jù compagne tal imprin de seconde frazion, ancje se contune variazion che e sarà determinante. Cun di fat Lisi i da une bale golose a Marconi, che al tire un balon centrâl che nol cree nissun fastidi a Bindi, intant che inte azion seguitive dal Pordenon Tremolada al vuadagne spazi e al zire la sfere a Ciurria, che al segne, juste nûf minûts dopo de polse.

I pisans a reagjissin al vantaç dai sborfs, però almancul in principi no rivin a cumbinâ alc e ce e anzit a riscjin di cjapânt un altri, stant che Candellone e Mazzocco a àn dôs bielis ocasions ma ur mancje la precision.
Cul passâ dal timp, a fuarce di dâi, il Pisa al torne a jessi pericolôs des bandis di Bindi, massime intune azion che e nas di un corner cun Varnier che al torne a butâle tal mieç e Birindelli che le tocje cuntune cuesse ma la bale e sbat su la travierse.

A son ancjemò passe dîs minûts di zûc e lis emozions no mancjin ni di une bande ni di chê altre, cun Mazzocco che al pecje di egoisim intune azion di cuintripît e Marconi che cul cjâf nol cjate la puarte suntun biel cross di Soddimo. Cussì il risultât al reste chel: un a zero pal Pordenon che al rive a cuote 55 e al sint aiar di promozion.

 

Perugia – Pordenone 1-2

bandieris-friuul

La sodisfazion pe vitorie, concuistade cun fuarce e salacor cun cinisim, che i vâl il salt adalt fintremai tal tierç puest in classifiche e lis preocupazions pal infortuni di Di Gregorio, che per fortune vie pe bunore di vuê al è stât dimetût dal ospedâl. A son lis dôs musis de partide di nossere dal Pordenon cuintri dal Perugia.

I sborfs a segnin juste tal prin minût de partide cuntun tîr cul cjâf di Mazzocco. I parons di cjase a rispuindin daurman e a cjatin l’un a un cuntun biel tîr di Falzerano e provin a fâ valê la lôr predominance teritoriâl, ma il Pordenon al ten bot, cun atenzion e cun sintiment.

Vie pe partide il Perugia al proteste, domandant il rigôr prime par un intervent su Buonaiuto e juste tal ultin par contat suspiet cun Rajkovic, che però a vegnin calcolât regolârs di Camplone, e al cjape une travierse cun Nicolussi Caviglia tal prin timp e un pâl inte seconde frazion.

Cun di plui la scuadre di Cosmi e reste cuntun om di mancul dopo che l’autôr dal gol al ven parât fûr cul cartelin ros. I variûi perusins a tegnin di plui la bale, ma la lôr pericolositât ofensive e je limitade e, calcolant l’efiet des lôr ocasions miôr, a puedin ancje lamentâsi par une cierte dose di sfortune.

Il Pordenon si difint cun ordin e al rispuint cun cualchi buine manovre in cuintripît, ancje se nol rive a costruî cetantis balis di gol. Lis ocasions pardabon golosis che a vegnin metudis adun dai neris e verts a son dome trê, ma dôs di chês a van a bersai: dopo dal gol di Mazzocco in vierzidure al rive ancje chel decisîf di Ciurria. Tal mieç al è ancje il scuintri di zûc tra Di Gregorio e Melchiorri cul puartîr dal Pordenon che al bat in cjâf, al reste par tiere e al ven puartât tal ospedâl.
Cumò pe scuadre di Tesser al è il moment di jessi contents no dome pal risultât e pe classifiche.

Pordenone – Entella 2-0

bandieris-friuul

Il Pordenon al torne a vinci. Inte partide di nossere la scuadre di balon dal Friûl Ocidentâl si sfrancje de brute sconfite patide sabide stade a Trapani, e rive a segnâ doi goi tal secont timp e cussì si puarte a cjase trê ponts che a zovin al spirt e ancje ae classifiche. Intant che il Benevento al fâs za fieste pe vitorie dal campionât e pe promozion in serie A, i sborfs a recuperin la cuinte posizion e cence masse sunsûr a tornin ancje a pensâ ae pussibilitât di rivâ a fâ il salt di categorie.

L’incuintri di Triest si disvilupe vie pe prime frazion dilunc di une linie di ecuilibri sostanziâl, cul Entella che al mostre di jessi une scuadre ben struturade, in stât di tignî bot e di rispuindi denant di un Pordenon che al prove daurman a cjapâ in man lis brenis de partide. Lis primis conclusions a son un tîr di Vogliacco su assist di Candellone e, di chê altre bande dal cjamp, une iniziative imbastide di Settembrini e Dezi. Cun scuadris curtis e pocje precision in zone tîr, sei cun Candellone e Pobega che cun Settembrini, i sborfs e i diaui a sierin il prin timp cence goi.

La partide si disbloche dome siet minûts dopo de polse, cun Gavazzi che al cuince une bale golose par Mazzocco, che al è brâf tal controlâle e tal tirâle in puarte. L’Entella al va sot di un gol, ma al prove daurman a tornâ a dreçâ la gare ancje se nol rive pardabon a imbastî conclusions pericolosis par Di Gregorio, fale che cuntun tîr di Morra e cuntun tentatîf di Schenetti, che a son ducj i doi fûr bersai.

Il timp al passe, il Pordenon al manten il vantaç e al cîr di colpî la scuadre di Chiavari in cuintripît, cundut achel ni Ciurra ni Tremolada a rivin a segnâ e il doi a zero al rive intal prin dai sîs minûts di recupar: punizion di Tremolada che e sbat su la travierse e tap-in di Barison, che al impire Borra.