Sassuolo – Udinese 0-1

bandieris-friuul

Buine ancje la ultime. L’Udin al siere il campionât cuntune biele vitorie cuintri di une biele scuadre. Cul Sassuolo la formazion blancje e nere e mostre la sô muse miôr – ordin daûr; velocitât, dinamisim e une cierte dose di fantasie indenant – e cussì e rive a vuadagnâ ducj i trê ponts a disposizion e a sierâ la stagjon a cuoite 45.

Il risultât finâl al è compagn di chel de partide cul Cagliari cu la diference che il Sassuolo al à zuiât cun cetante plui determinazion de scuadre sarde, stant che l’intindiment de scuadre di De Zerbi al jere chel di gafâ un puest in Europa League e di fâ fieste magari cuntune vitorie. Ae fin il Sassuolo al va in Europe, in graciis dal ko dal Verone a Gjenue, ma l’Udin no i permet di esagjerâ cul trionfalisim.

Lis dôs formazions a presentin cualchi novitât rispiet ae penultime di campionât. De Zerbi al met Peluso tal mieç de difese, tal puest di Marlon. Gotti, impen, indaûr al mande in cjamp De Maio tal puest di Becao, infortunât, inte mediane al place Stryger Larsen e Zeegelaar su lis fassis e Sema tal mieç in sostituzion di Fofana, e in atac al rilance Lasagna dongje di Okaka.

La partide e je vivarose fint dal principi. Sassuolo e Udin si frontin cu la muse vierte. I parons di cjase a impegnin Musso cun Toljan, Caputo e Traoré e la scuasdre furlane i dâ il so bon ce fâ a Consigli cun Samir, che il so tîr al va fûr di pôc il bersai, cuntune punizion di Di Paul, cun Lasagna e cun Larsen che cuntun diestri in diagonâl al sbecole la travierse.

Ancje inte seconde frazion lis conclusions e lis emozions no mancjin, ni di une bande e nancje di chê altre. Musso al fâs une paradone suntune punizion di Berardi e inte azion seguitive Lasagna al bruse peluso, al scate indenant e i da a Okaka une bale di aur, di butâ tal sac a puarte vueide.

Sot di un gol, il Sassuolo al prove a dreçâ l’incuintri. Cun chê di incressi la pression ofensive e par zontâ tecniche e fantasie De Zerbi al mande intal cjamp Haraslin e Raspadori, ma l’Udin no si spaurìs, si difint cun sintiment e al rispuint in maniere decise, lenzint fintremai il doi a zero cun Ekong.

Di chê altre bande ancje Berardi al cjape une travierse e dopo di un tentatîf di Raspadori al è ancjemò lui a impegnâ Musso cuntun biel tîr al svol. Ma nol è dome il puartîr argjentin, ancjemò atent e puntuâl su Raspadori: la difese blancje e nere si siere cun sintiment e de metât insù i blancs e neris a son svelts e pericolôs e Nestorovski, jentrât intal ultin tal puest di Okaka, si svicine ancjemò al doi a zero, ma nol rive a segnâ parcè che al cjate Consigli che i siere la puart in muse.

La stagjon 20207/2021 e je za li daûr dal cjanton. L’Udin varaial imparât la lezion e ribvaraial a fâ miôr e cun plui continuitât? Sperìn di sì.

Udinese – Lecce 1-2

This image has an empty alt attribute; its file name is udin_neri.png

Salvece concuistade e scuadre apaiade e rilassade, ancje se no sentade, che ae fin e piert. No si pues dineâ che tra Udin e Lecce, nossere, lis dôs formazions a vevin motivazions diferentis e salacor une grinte diferente. Chest si lu à viodût massime vie pal secont timp cuant che i ospits, juste tal ultim, a àn rivât a segnâ il gol de vitorie che ur da ancjemò cualchi sperance di no sbrissâ in serie B. Un sucès in cualchi maniere meretât, cundut che la scuadre di balon furlane e à mostrât ancjemò di jessi in stât, cui siei zuiadôrs, di fâ ancje al di bon e di just.

La partide e je intense e plasevule tacant dal principi. Il merit al è dal Lecce che al scugne cirî di vinci par no pierdi dauran dutis lis sperancis di restâ in serie A ancje tal 2020/2021 e dal Udin che nol reste a cjalâ i aversaris ma al fâs il so zûc e al met adun diviersis azions ofensivis.

Lis conclusions in puarte a son dutis de scuaddre furlane. Si tache cuntune combinazion Fofana-De Paul, po dopo al è un corner di De Paul che Okaka al tocje cul cjâf ma lu mande fûr bersai e plui indennat al è ancje un assist di Ter Avest par Nestorovski, che al tire e al segne, ma Orsato al sivile il fûr zûc.

La perle al è un colp cul tac di De Paul, che al ven parât vie di Gabriel, intant che il gol dal Udin al rive inte ultime part dal prin timp: corner di De Paul par Samir che al salte plui indalt di ducj chei altris e le bute dentri cul cjâf. Cuatri minûts plui tart, però, inte aree blancje e nere Becao al tocje la bale cul braç, Orsato al sivile il penalty e Marrocu al tire e al segne.

La seconde frazion e viôt il Lecce che al frache sul aceleradôr, ancje se no i dâ masse lavôr a Musso. La scuadre salentine e piert Mancosu, che al cole mâl dopo jessi saltât par tirâ cul cjâf, ma ancje cence il cjapitani si puarte indenant.

L’Udin al ten bot e no i permet di cumbinâ alc e ce. Cun di plui si presente des bandis di Gabriel ancjemò cuntun diagonâl di De Paul che al lenç il pâl a man drete dal puartîr zâl e ros. La pression dai ospits ae fin ju puarte a jonzi il risultât plen: si svicin al obietîf cuntun tîr fûr bersai di Lucioni e po lu cjatin, juste tal ultin, cuant che Barak e Lapadula si cjatin inte aree blancje e nere, cuntune cierte libertât si passin la bale e l’ex dal Milan al segne cence fastidis (a part il fat che si infortune ae cjavile).

Furlans cuiets e salentins plens di sperance.

Cagliari – Udinese 0-1

bandieris-friuul

La salvece matematiche ancjemò prime di scomençâ la partide cul Cagliari e une biele vitorie che e da respîr ae classifiche e che e premie la scuadre blancje e nere, che zuie cun snait e cun sintiment.

Lis buinis gnovis, pe graduatorie, che a rivin di Bologne, là che i parons di cjase a vincin cul Lecce e a garantissin daurman la permanence in serie A dal Udin ancje pal 2020/2021, no vegnin calcoladis masse de formazion blancje e nere, che – justementri – e va in cjamp cul Cagliari cun dute la concentrazion che e covente.

Pe ocasion Gotti al lassse Fofana in bancjine e al torne a recuperâ Walace intal mieç dal centricjamp, dongje di De Paul e Sema e cun Stryger Larsen e Zeeglaar esternis laterâi. In puarte al è Musso, denant di lui a son Becao, De Maio e Nuytinck e in atac si torne a viodi la cubie Lasagna-Okaka. La scuadre furlane e tache cul pît just e juste dopo un pâr di minûts e cjate il gol cun Okaka, che al controle ben il lanç di Stryger Larsen, al passe Ceppitelli e al impire Cragno.

Il Cagliari nol somee in stât di rispuindi e l’Udin al mante il control de bale e de partide al imbastìs ancjemò azions di atac cun Lasagna e soredut cun De Paul, che i da di lavorâ a Cragno. I parons di cjase a son lents, imprecîs e smamîts: a provin il tîr di lontan cun Lykogiannis, ma Musso al è ben plaçât e al fâs compagn suntune punizion avonde pericolose di João Pedro, e a riscjin al in cuintripît cul Udin ispirât di Walace e di De Paul.

Il prin timp si siere, di une bande, cu lis conclusions di De Paul e di De Maio, e di chê altre cuntun tîr di Simeone, che no mudin il risultât parziâl. La seconde frazion si vierç cuntune conclusion alte di Lykogiannis e cuntune cierte pression dai parons di cjase, che e crès in graciis de jentrade tal cjamp di Pereiro ancje se no prodûs nuie di masse significatîf, stant che l’Udin si difint cun ordin e al rispuint cu lis sôs verticalizazions.

Cragno al ven impegnât di Okaka e di Lasagna e ancjemò prime Walace al prove a tirâ di fûr, ma la bale e va alte parsore de travierse, intant che Musso al interven par ordin sui gnûfs tentatîfs di Mattiello e di Pereiro. L’Udin si svicine al secont gol cun De Paul e juste tal recupar il Cagliari al à la bale pe pate, prontade ben di Simeone par João Pedro, ma nol rive a disfrutâ la ocasion. Cussì il risultât al reste chel: un a zero pal Udin. Une vitorie meretade, che e marche il moment positîf de scuadre furlane; une gnove sconfite pal Cagliari, dopo di chê di chê altre dì cuintri de Lazio e inte suaze di un periodi segnât pal plui di partidis flapis e di delusions, là che la ultime vitorie e rimonte a un mês indaûr (4 a 2 cul Toro).

Udinese – Juventus 2-1

udin_070419

A jerin ducj pronts par cjantâ il peana pe vitorie anticipade dal novesim scudet di file de Juve, sei inte tribune stampe dal Stadi Friûl – dulà che a àn scugnût lassâ a cjase i gjornaliscj furlans par che a fossin avonde puescj par chei che a vevin za pront il toc che al varès esaltât la scuadre di Sarri e i siei dirigjents – che inaltrò in dut il Stât talian, denant de radio o de television. E impen a àn scugnût gloti la vitorie dal Udin.

I blancs e neris furlans a strenzin i dincj vie pal prin timp denant di chei di Turin, che a segnin juste ae fin dal prin timp, e dopo de polse a fasin ancjemò alc di plui: a tegnin bot, a jonzin la paritât e juste tal recupar a mostrin di vê imparât la lezion di Napoli e di Politano e cun Fofana a cjatin il gol de vitorie, che al vâl une mieze salvece e salacor alc altri ancjemò.

La Juve e rive a Udin cul favôr dai pronostics, ma ancje cun cualchi assence impuartantone, tacant dal scualificât Bonucci e dal infortunât Chiellini, e duncje cun cualchi novitât in difese, tant che Rugani e De Ligt. L’Udin al fronte i campions di Italie di vuê e forsit di doman, che in atac a presentin Bernardeschi, Ronaldo e Dybala, cence Lasagna. In puarte al è Musso, in difese a son Becao, Ekong, Nuytinck, inte mediane si cjatin Fofana, Di Paul, Sema, cui esternis Ter Avest e Zeegelaar, e in atac a scombatin Okaka e Nestorovski.

Ronaldo al scjalde daurman lis manecis di Musso, ancje se al è l’Udin che si svicine di plui al gol cun Sema che al crosse e cul juventin Danilo che cence volê le tocje cul cjâf e al cjape il so pâl. Si passe di un pericul autogol a di un altri: Dybala al podarès tirâ ma nol controle, Nuytinck al recupare la bale e le passe in maniere insidiose a Musso, che i ven un sgrisul e le tocje cu la ponte dal pît chel tant che al covente par mandâle in corner.

Il puartîr argjentin al fâs un biel intervent plui tart suntun tîr di Dybala, intant che di une bande Sema e di chê altre Ronaldo a tirin di fûr cence sucès.
Il prin timp al somee daûr a sierâsi cuntun ritmi plui flap e cence emozions, ma nol è cussì, stant che al rive il gol de Juve: bale in aree di Rabiot, Ekong che le bute fûr cul cjâf e De Ligt che le recupare e di fûr si invente un diestri precîs e potent in diagonâl che al impire Musso.

La seconde frazion si vierç cul Udin che al mostre che nol à nissune voie di fâ di vitime sacrificâl. Nestorovski al impegne daurman Szczesny e po al torne a tirâ in puarte cinc minûts plui tart cun sucès: cross di Sema de corsie di çampe, i difensôrs de Juve a durmin e l’atacant macedon si bute e al segne cul cjâf. La Juve e patìs il colp, ducj i zuiadôrs a patissin l’umit e lis scuadris si slungjin.

La Juve e prove a tornâ in vantaç cun Dybala che le tire ben, ma al cjate Musso tal puest just, che al bloche, intant che ancje Alex Sandro al fâs un tentatîf di lontan ma al tire fûr dal spieli de puarte.
L’Udin al ten bot e al rive ancje a rispuindi, par esempli cuntun biel cross di De Paul su punizion par Okaka, che il so tîr cul cjâf al è fûr bersai. I ospits a somein un tic smamîts, salacor distudâts, cuasi che a scugnin contentâsi de paritât.

L’Udin al tire sù baricadis, si mostre ecuilibrât e compat. Al merete ad in plen la division dai ponts e salacor ancjemò alc di plui.
Al è chel alc di plui che si concretize intant dal recupar cuant che Becao al recupare un balon fûr de sô aree, al patìs ancje fal ma Irrati al ricognòs il vantaç parcè che la bale i rive a Fofana e il francoivorian le puarte indenant, al resist a un atac tal mieç dal cjamp, al continue la sô corse, al salte De Ligt e al impire Szczesny. Doi a un: pe Juve al è efiet MerDacia Arena, pal Udin al è efiet stadi Friûl!

Napoli – Udinese 2-1

This image has an empty alt attribute; its file name is udin_neri.png

L’Udin al somee in stât di rompi il tabù dal San Paolo, là che dal 2013 nol rive a fâ ponts, ma ae fin al piert in graciis di un golon di Politano. La scuadre blancje e nere e zuie une partide plui che discrete, cun ordin e cun sintiment, e riscje fintremai di vinci e po e manten la paritât fin tal penultin minût di recupar, cuant che l’atacant napolitan si cjate intes cundizions di plaçâ la bale juste sul prin pâl là che chê i sbat intor e po e finìs in rêt. Une vitorie che i da sodisfazion al Napoli, che dopo dôs patis i tignive a puartâ a cjase trê ponts; une sconfite che l’Udin nol à meretât.

Cuitri dal Napoli la formazion furlane, che e scugne fâ di mancul di Jajalo e Teodorczyk, si presente cun Musso in puarte, cun Becao, De Maio e Nuytinck in difese, cun De Paul, Walace e Fofana in mediane, adun cui esternis Stryger Larsen e Zeegelaar e cun Nestorovski e Lasagna.
I parons di cjase a provin a fâ valê daurman lis lôr dotis tecnichis, il possès de bale e la capacitât di fâsi spazi ancje tal strent di Immobile, di Ruiz e di Zielinski, ma a cjatin un Udin ben coraçât, che ur lasse zuiâ la bale fin te trê cuarts dal cjamp e po ur siere ducj i trois – o cuasit – e cussì a scugnin spudâ balins par rivâ inte aree di rigôr.

La scuadre di Gotti e tire sù lis sôs bariduris e e rispuint in cuintripît cul risultât, tai prins minûts, di fermâ cun Becao une biele conclusion di Zielinski e fintremai di segnâ cun Nestorovski, ancje se il so biel tîr cul cjâf nol ven fat bon di Chiffi, che al sivile il fûr zûc.
I napolitans a provin a bati Musso cuntun pâr di conclusions di Insigne e cuntun tîr di Zielinski, però o che la bale eje fûr bersai o ben che e je tal spieli de puarte cul puartîr argjentin simpri tal puest just intal moment just.

L’Udin, passâts i pericui, si fâs viodi indenant cuntune verticalizazion di Zeegelaar, che al met tal mieç une bale basse, che e ven tocjade di sfrîs di Mario Rui e cussì e rive tai pîts di De Paul, che al controle, al tire in diagonâl e al impire Ospina: un a zero!
Il Napoli al patìs il colp, ma al prove daurman a reagjî, prime cuntun tîr a zîr di Mario Rui, che Musso al met in corner, e po cuntune azion cu la bale che tresse dute la aree di rigôr blancje e nere, e ven tornade a butâ tal mieç di Ruiz e po e ven tocjade cu la ponte dal pît di Milik, che a pene jentrât tal puest di Mertens al segne l’un a un.

La paritât recuperade ur met lis alis tai pîts ai partenopeus, che a insisitin ancje se no rivin a cumbinâ alc e ce, stant che l’Udin si difint cun grinte e cun ordin. Il prin timp si siere cussì dome cuntune jessude di Ospina su Lasagna, ispirât di De Paul, e cuntun tîr cul cjâf di Insigne che al ven blocât di Musso.

La seconde frazion si vierç cul Napoli in atac e cul Udin che si difint. La scuadre di Gattuso e met adun ancjemò cualchi buine bale di gol cun Insigne, che al tire fûr, e cun Zielinski, che il so tîr al ven tocjât di Musso, al sbat su la travierse, nol passe dal dut la rie de puarte e al ven neutralizât.
Il cuasi gol al da fuarce ai parons di cjase che a provin ancjemò cun Mario Rui e cun Ruiz, ma Musso no si scompon, i siei compagns si sierin in difese e po a rispuindin in cuintripît cun Lasagna che al impegne Ospina e cun Nestorovski che al cjate il stop di Koulibaly.

Intai ultins dîs minûts dal timp regolamentâr e je ancjemò une buine dose di emozions, prime cui tîrs fûr bersai di Milik, di Mario Rui e di Insigne e po cuntun gnûf cuintipît dal Udin che si siere cun Di Paul che si presente denant di Ospina, lu passe cuntun colp di fin indreçât in puarte che al ven tocjât in extremis cu la tibie di Koulibaly e al va a stampâsi sul pâl. Par un pêl (e par un pâl) l’Udin nol torne in vantaç.

Si svicine la fin e Chiffi al decît che si varà di zuiâ ancjemô sîs minûts. Gotti al scugne clamâ fûr Walace, che intun contrast al cole mâl e si macole la spale, e al mande dentri Ekong che al cjape il puest di Nuytinck, spostât tant che median denant de difese. Za di vincj minûts tal Napoli al è in cjamp tal puest di Callejon Politano che al fâs un bon lavôr cence bale e juste tal ultin si cjate inte posizion juste par tirâ in puarte cu la bale che e tocje il pâl e e finìs daûr di Musso. Al è il doi a un pai parons di cjase: un mieç miracul di Sant Zenâr.

Udinese – Lazio 0-0

Nissun gol e un pont par om. Si siere cussì la partide tra Udin e Lazio, dopo che dutis dôs lis scuadris a àn provât a vinci. La Lazio e veve chê di rompi la serie negative dai ultins trê incuintris e di no pierdi ancjemò teren de part plui alte de graduatorie, intant che al Udin i coventavin ponts par tignîsi a distance di sigurece de code de classifiche, massime dopo de ocasion pierdude di domenie stade cuintri de Sampdoria. I ospits a provin a jonzi l’obietîf soredut vie pal prin timp e i blancs e neris si svicin al sucès soredut vie pe seconde frazion. La scuadre di balon furlane e mostre di no vê pôre dai aversaris e se chel tîr di De Paul che tal ultin minût di recupar al à sbatût tal esterni dal pâl a man drete di Strakosha al fos jentrât in puarte… e sarès finide cuntun gol e cun trê ponts pai blancs e neris.

Pe ocasion Gotti al mande in cjamp Musso in puarte, De Maio e Nuytinck in difese, De Paul, Jajalo, Fofana a centricjamp, cun Stryger Larsen e Sema esternis, e Okaka e Lasagna in atac. L’intindiment al è clâr: difindisi cuintri des iniziativis dai avesaris e rispuindi in cuintripît. La formazion vuidade di Simone Inzaghi e zuie daurman lis sôs cjartis e vie pai prins vincj minûts al prove a tirâ in puarte, ma cence sucès, cun Immobile, cun Luis Alberto e cun Parolo. La rispueste dal Udin e à la muse des conclusions masse altis di Lasagna e di De Paul.

Il prin timp al va dilunc cuntun ritmi no masse alt ma cun diviersis emozions: Musso si fâs viodi par trê bogns intervents suntun corner che al podeve deventâ pericolôs, suntun tîr di Lazzari e suntune zirade di Immobile e i cuintripîts de scuadre furlane a produsin un diagonâl debil di Stryger Larsen e un tîr di Becao che al ven parât in corner di Strakosha.

La prime frazion si siere cul cambi Jajalo-Walace pal Udin e la seconde e ven screade di un corner pe Lazio e po di un cross di di Luis Alberto che però nol cjate il cjâf di Acerbi pe conclusion. Cul passâ dai minûts e cres la iniziative dal Udin: prime Luis Felipe al met un blec suntun tîr di Lasagna e po KL15 in cuintripît si cjate denant di Strakosha, no si vise che al podarès zirâ la bale a Okaka che al è di bessôl e al podarès segnâ e si fâs ipnotizâ dal puartîr laziâl, che plui tart al torne protagonist suntune bombe di De Paul, tocjantle chel che al covente par butâ la bale in corner.

La supremazie blancje e nere e ven fermade par cualchi minût de Lazio che e torne a fâsi viodi des bandis di Musso cui tîrs fûr bersai di Bastos e di Milinkovic Savic. Gotti al bute dentri Teodorczyk tal puest di Okaka, Ter Avest in chel di Sema e un pôc plui indenant ancje Samir par Nuytinck par dâ ancjemò plui dinamisim ae so scuadre. Lis scuadris si slungjin, si scombat, cun agagns, apneis e imperfezions ogni trê passaçs, e a rivin il tîr di Adekanye che al ven fermât di De Paul in cuvierzidure e doi tentatîfs fats ancjemò dal argjentin dal Udin. L’ultin, juste tal ultin, al è chel che al va a finîle intor dal pâl. Magari cussì no.

Udinese – Sampdoria 1-3

E veve di jessi la partide des confermis di dut il bon fat dal Udin vie pes ultimis zornadis. Magari cussì no e je stade la partide de conferme di chê sorte di maledizion che si sin usâts a clamâle efiet Mer…Dacia Arena , che in part si veve viodude za domenie stade intai ultins minûts de partide cul Genoa. L’Udin nol mostre di vê avonde convinzion, nol è masse atent indaûr e dopo jessi passât in vantaç si fâs recuperâ de Sampdoria, che cun plui snait e cun plui cualitât ae fin e siere la partide cuntune vitorie taronde, che i permet di jonzi i blancs e neris in graduatorie a cuote 35. Cussì i sampdorians a vuadagnin sperancis di salvece, intant che l’Udin al piert la pussibilitât, cuntun risultât diferent, di cjatâ pardabon un bon nivel di tranculitât.

Cuintri de scuadre blucerclade Gotti al mande in cjamp Musso in puarte, Ekong, Nuytinck e Samir in difese, De Paul, Jajalo e Walace in mediane, adun cui esternis Stryger Larsen e Sema e Nestorovski e Lasagna in atac. Ranieri – scualificât e rapresentât in bancjine di Benetti – al imposte il so 4-4-2 su la cubie di atac Ramirez-Quagliarella.

I ospits a partissin daurman cun decision e un tîr di Linetty al oblee Musso a intervegni in doi timps.
La rispueste dal Udin e je discrete: i blancs e neris a sierin ben i spazis e lis liniis di passaç dai atacants aversaris. La Sampdoria e manten il control des operazions e si rint pericolose cuntun tîr cul cjâf di Ramirez e cuntune conclusion di Quagliarella, ma Musso al è simpri tal puest just tal moment just e inte maniere juste. Ancje Audero al à alc ce fâ suntun tentatîf di Sema e po al cjale une conclusion di Walace finî di pôc fûr.

Passade la prime mieze ore di zûc l’Udin al somee in stât no dome di tignî bot ma ancje di fâ alc di plui in atac. Al rive cussì il gol di Lasagna: lanç di Stryger Larsen par KL15, che cun mistîr al sbelance Yoshida intal moment che al è daûr a intervignî cul cjâf, al controle la bale e po al tire cun precision e cun sigurece, impirant la puarte di Audero.
La Sampdoria e cîr di cuvierzi il disvantaç, ma i parons di cjase no si scomponin, almancul fin tal unic minût di recupar prime de polse, cuant che une cumbinazion di Thorsby cun Ekdal e met Quagliarella intes cundizions di tirâ cul diestri al svol e di segnâ l’un a un.

La seconde frazion si vierç cul possès de bale de bande dal Udin, che al vuadagne un pâr di corners e cuntune conclusion di Lasagna. al impegne Audero, che al salve la puarte.  La repliche de Sampdoria si concretize intun prin tîr di Bonazzoli, deviât, intant che l’Udin al incrès la intensitât des sôs azions, ancje in graciis de jentrade intal cjamp di Fofana e Okaka tal puest di Walace e Nestorovski, ma no rive a produsi alc e ce, fale che un tîr di lontan di De Paul, che al segne il passaç de partide a une gnove fase cence grandis emozions.

La ande de partide e devente flape e strache. Cheste clime e chest ecuilibri a vegnin rots di un biel tîr di Gabbiadini, che su chel Musso al met la man. I ospits a tornin a mostrâ plui grinte e plui convinzion, prime cuntune gnove iniziative di Gabbiadini e po, sîs minûts prime dal novantesim, cuntune acrobazie di Bonizzoli, che al segne il doi a un.

L’Udin al patìs il colp ma al prove a rispuindi e trê minûts al rive a butâle dentri cun Nuytinck, però Valeri al consulte il Var e al decît che il difensôr blanc e neri le à tocjade cu la man e par chel nol ven convalidât il doi a doi. In plen recupar l’olandês dal Udin al torne a jessi protagonist, ma in negatîf: nol interven in anticip su Gabbiadini, al lasse colâ la bale par tiere e i permet al atacant sampdorian di controlâ e segnâ il trê a un definitîf.

Spal – Udinese 0-3

bandieris-friuul

L’Udin a Ferrara al mostre di vê imparade la lezion de partide in cjase cul Genoa. Cuintri de Spal la scuadre di Gotti e zuie cun atenzion e cun sintiment dal principi ae fin e cussì e vinç cuntun risultât taront: trê goi e trê ponts che a segnin un altri bon pas indenant viers de salvece.

La scuadre di balon furlane si presente tal cjamp dal Mazza cun Musso tra i pâi, cun Becao, De Maio e Nuytinck in difese, cun De Paul, Wallace e Fofana in mediane, adun cun Larsen e Zegelaar su lis corsiis esternis, e cun Lasagna e Okaka in atac. I blancs e neris a partissin cul pît just e dopo trê minûts al rive il prin tîr di Wallace che però al è fûr bersai. A àn chel stes destin ancje il tîr cul cjâf di Lasagna su cross di De Paul e la prime conclusion dai parons di cjase, che si fasin vîfs des bandis di Musso in maniere cuasi casuâl cun Murgia, che al profite di chel che al sarà l’unic erôr de difese blancje e nere cuntun diagonâl avonde pericolôs.

Un minût plui tart l’Udin al passe in vantaç, cun De Paul che al tire in puarte dal limit de aree e al impire Letica. La Spal e prove a rispuindi ancjemò cun Murgia, che al smire masse adalt e cun chê iniziative al conferme che i parons di cjase a somein blocâts e no rivin a meti adun pardabon un zûc che al vedi continuitât.

L’Udin al mostre un bon potenziâl: Wallace al distribuìs balons, De Paul e Fofana a garantissin dinamisim e profonditât, Okaka e Lasagna a fasin i moviments juscj, intant che daûr la difese e ten bot e Musso al fâs il so cuant che al covente.

La cronache e regjistre une ocasion straçade di Lasagna e une parade dal puartîr argjentin su Petagna, prime dal gol dal doi a zero. Lu segne Okaka, che al profite di une deviazion di Bonifazi suntun tîr di Di Paul e le bute dentri, sierant di fat il prin timp, che al viôt la Spal rispuindi cuntun tentatîf di Sala fermât di Musso, e metint une sorte di ipoteche su la partide interie.

Tal imprin de seconde frazion la scuadre di Di Biagio e prove a sburtâ cun plui cunvinzion e cussì a rivin lis conclusions pericolosis di Petagna, di Sala e di Strefezza, a pene jentrât tal puest di Murgia. L’Udin al lasse che i parons di cjase si sbrochin cence pierdi la concentrazion e rispuindint in cuintripît.

Propit di une azion di cheste fate, disvilupade dilunc de linie Fofana-Lasagna, al salte fûr il tierç gol furlan che al puarte la firme di KL15, brâf a ricevi la bale, a gjestîle inte maniere miôr, a schiribiçâ Letica e a segnâ di une posizion par sigûr  no masse comude. La Spal e prove a fâ pressing vie pai ultins minûts, ma no rive a creâ problemis a Musso, che di une bande al è simpri là che al covente e di chê altre nol à masse ce fâ, stant che i tîrs di Sala e di Dabo a son fûr bersai. Dut ben pal Udin, che cussì al puarte a cjase ducj i ponts a disposizion.

Udinese – Genoa 2-2

L’Udin al fâs une altre buine partide e dal prin minût di zûc al cuart dai cinc minûts di recupar finâi (che a deventaran siet) al mostre di jessi plui fuart dal Genoa. Tal minût seguitîf un intervent di Zeegelaar su Biraschi al oblee Orsato a consultâ il Var e a decidi di dâ il rigôr: si rive al 97esim, Pinamonti al tire, Musso al pare fûr ma il ros e blu al recupare la bale e le bute dentri.
Fin a un moment prime l’Udin al vinceve doi a un – e si veve svicinât in plui ocasion ancje ae tierrce segnature –di chel moment ae fin il risultât al è doi a doi. La spartizion dai ponts e va strente ai blancs e neris e ur gjave la sigurece tendenziâl de salvece, intant che i regale al Genoa ancjemò la sperance di no sbrissâ jù in serie B.

Gotti al mande in cjamp Musso in puarte tra i pâi, Ekong, Nuytinck e Samir in difese, Jajalo, Fofana e Di Paul in mediane, adun cun Stryger Larsen e Sema, e i autôrs dai doi goi cunintri de Rome, Lasagna e Nestorovski. Il tecnic dal Genoa, l’ex blanc e neri Nicola, al presente une formazion avonde diferente de ultime partide: al zuie la cjarte Goldaniga in difese, ma al conferme la sielte di Behrami tal mieç dal cjamp, cun Biraschi e Depenade tant che esternis e cun Iago Falque e Sanabria.

La prime ocasion e je dai ospits: punizion tirade ben di Iago Falque e intervent puntuâl di Musso che le bute in corner. Il Genoa al fâs zirâ la bale, ma la sô manovre e je sterpe, stant che l’Udin al reste in spiete, le ferme e al ripartìs in cuintripît. La scuadre di balon furlane e manten une buine pression sui puartadôrs di bale rossoblu e cul passâ dai minûts e vuadagne cjamp. A rivin cussì un tîr alt di De Paul e po, un minût prin de prime mieze ore di zûc, une conclusion di Lasagna, su sugjeriment di Fofana in percussion verticâl, parade in corner di Perin. Juste ae fin de prime frazion al rive ancje il gol: cross di De Paul e tîr cul cjâf di Fofana che al va a bersai.

Dopo de polse Nicola al prove a rinfuartî il potenziâl ofensîf de sô scuadre cun Soumaro e Pinamonti tal puest di Romero e di Behrami. Tal imprin i ospits a sburtin cun plui convinzion e a vuadagnin doi corners, rivant al tîr cun Iago Falque, ma la bale e va fûr. Passât il pericul l’Udin al recupare il control de partide e al imbastìs diviersis ocasions: Stryger Larsen al tire fûr bersai suntun biel cross di Sema, De Paul al tire une bombe in diagonâl che e finìs in bande de puarte e po Lasagna al siere in gol une triangolazion cun Fofana.

Il dopli vantaç al è plui che meretât. L’Udin si svicine fintremai al tierç gol, ancjemò cun Lasagna, che al siere un bon cross di Zegelaar, che di pôcs minûts al è jentrât tal puest di Sema, ma Perin al pare. Cussì, daûr di chê regule no scrite che e vûl che dopo une ocasion che va sù pai stecs si puedi cjapâ un gol, e rive une combinazion Pandev-Pinamonti che, cu la complicitât di une mieze durmide de difese, e ven sierade in puarte dal atacant macedon e al è doi a un.

Gotti al clame fûr i autôrs dai doi goi, Fofana e Lasagna, e al mande in cjamp Teodorczyk e Wallace cul intindiment di difindi i trê ponts. L’Udin al ten bot e il Genoa nol rive a cumbinâ alc e ce. Orsato al comande un recupar lunc e pai blancs e neris dut al somee lâ inte maniere juste, fin che no rive la ingjenuitât di Zegelaar, che e ven rilevade de bande dal arbitri, dopo de verifiche cul Var. Musso al pare il penalty ma nol rive a fâ nuie sul secont tîr di Pinamonti. E al è doi a doi.

Roma – Udinese 0-2

bandieris-friuul

Une vitorie biele, buine e juste. L’Udin al zuie ben, dal principi ae fin, al cjape daurman lis misuris a une Rome flapute, al rive a segnâ tal imprin dal prin timp, no si scompon denant de reazion dai parons di cjase e al siere cuntun altri gol, che al marche la sô supremazie tatiche, tecniche, atletiche e emotive.

Gotti al mande in cjamp Musso tra i pâi, Becao, De Maio e Nuytinck in difese, Jajalo, Wallace e Di Paul in mediane, cun Stryger Larsen e Zegelaar su lis corsiis esternis, e la cubie di atac Lasagna-Okaka. Fonseca al presente une scuadre cun ancjemò plui novitâts rispiet a partide di domenie stade, stant che al sielç di fâ di mancul, tra chei altris, di Dzeko, di Mkhitaryan, di Mancini e di Kluivert.

La scuadre di balon furlane e partìs cul pît just cul possès de bale e cuntun bon ecuilibri tra i diviers reparts. I blancs e neris a mostri di vê lis ideis claris za tal prin minût cuntun cross di Stryger Larsen, che pôc timp dopo al met tal mieç un altri bon balon a pro di Lasagna e al oblee Mirante a anticipâlu. L’Udin al cjate il gol dopo dîs minûts di zûc cuntune biele verticalizazion di Lasagna, che al crosse par De Paul, cul argjentin che al tire malamentri ma i torne la bale a KL15, che al impire Mirante cence padins.

Il vantaç dai ospits al è plui che meretât. La Rome e prove a rispuindi ma e rive dome a vuadagnâ cualchi corner. L’Udin si difint cence problemis e al rispuint in cuintripît, ancjemò cuntun pâr di atacs di Lasagna e di De Paul che a vegnin neutralizâts de difese zale e rosse, intant che pai parons di cjase Perez al cuince al è un tîr insidiôs che al va fûr di pôc e inte azion seguitive Perotti al fâs un brut fal di atac a dam di Becao, che al ven punît di Guida cul cartelin ros.

In dîs cuintri undis, i parons di cjase a provin a reagjî cun Under che al oblee Musso a fâ un bon intervent e cun Cristante che al prove di lontan: il so tîr al ven deviât e si distude su la part esterne de travierse. Il prin timp si siere cuntune gnove iniziative di De Paul, che però nol rive a servî Lasagna, e l’argjentin al è protagonist ancje dal inviament de seconde frazion cuntune conclusion fûr bersai, intant che si torne a viodi in dôs ocasions il duel jenfri Perez e Musso, cul atacant romanist che al tire e il puartîr dal Udin che si fâs cjatâ simpri pront.

Teodorczyk, mandât di Gotti tal puest di Lasagna, al à une buine bale par segnâ il secont, ma nol rive a profitâ, e plui indenant al fâs sù par jù compagn ancje De Paul. L’Udin al gjestìs la partide cun sintiment e cun calme, la Rome no rive a jessi periculose des bandis di Musso e i blancs e neris si cjatin ancjemò intes cundizions di incressi il vantaç. Nestorovski, jentrât tal puest di Okaka, al prove une prime volte cence fortune, ma inte seconde ocasion al fâs gol: Fofana, in cjamp tal puest di Wallace, al scate su la corsie di çampe e al crosse di chê altre bande par De Paul, che al strenç e le met tal mieç a vantaç dal atacant macedon, che nol piert l’apontament.

Il doi a zero al piture ancjemò miôr la ande de partide. Le Rome e prove a cumbinâ alc cun Zappacosta e cun Dzeko, sostitût di Kalinic, ma no rive a mudâ la muse de partide, che si siere ancjemò cul Udin in zone tîr cun De Paul e cun Fofana, che però no son masse precîs.

Dopo dôs sconfitis l’Udin al rive finalmentri a vinci e a cjapâ chei trê ponts che i permetin di rivâ a cuote 31 cul Toro e cu la Fiorentina. Al è ben e al conven che ancje inte prossime partide, in cjase cuintri de Sampdoria, i blancs e neris a ripetin la performance e il risultât di cheste serade romane.