Cagliari – Udinese 1-2

L’Udin al vinç a Cagliari e al siere il campionât intune posizion in classifiche che i fâs fâ biele figure. La partide e à une ande avonde trancuile, cu lis dôs scuadris che a àn la salvece inte sachete e che a onorin l’impegn de ultime partide cence dâsi masse fastidi.

Tal prin timp il Cagliari al fâs alc di plui, ancje parcè che Maran al sielç di presentâ la sô scuadre miôr cu la difese a cuatri formade di Srna, Lykogiannis, Pisacane e Klavan, cun Cragno tra i pâi, cu la linie mediane di Bradaric, Ionita e Barella e cun Pavoletti e Joao Pedro in prime linie, cu la poie di Castro. L’Udin al ten bot, cun Tudor che al presente une scuadre cun diviersis novitâts: in atac al mande in cjamp la cubie Pussetto-Teodorczyk, lassant Lasagna in bancjine e Okaka e De Paul a cjase, inte mediane si torne a viodi Badu al puest di Sandro, dongje di Ter Avest, Mandragora, Hallfredsson e Zeegelar, e daûr a son De Maio, Troost-Ekong e Samir, cun Musso in puarte.

Chel alc di plui che al somee che a vedin i parons di cjase si concretize, passât il prin cuart di ore, cuntune conclusion di Lykogiannis, fermade di Musso, e cuntun tîr a bersai di Pavoletti. Il gol cjapât al fâs sunâ la svearine tal Udin, che al alce il cjâf e al frache il pît sul aceleradôr. A rivin cussì un tentatîf ae pirate vie di Teodorczyk e doi intervents decisîfs di Cragno ancjemò suntun tîr dal atacant polac e po suntune conclusion di D’Alessandro.

Il prin timp si siere cul Udin al atac e ancje te secondre frazion i blancs e neris a sburtin indenant. Al rive cussì, dopo vot minûts, un gol firmât di Pussetto che però nol ven fat bon di Volpi dopo de verifiche fate cul Var che al segnale la posizion di fûr zûc. La decision dal arbirti e rimande l’apontament cu la paritât di siet minûts cuant che Hallfredsson al fâs partî un cross che al devente un tîr in puarte.

Mancul di dîs minûts plui tart l’Udin al passe in vantaç cun De Maio che al segne cul cjâf. Il Cagliari al prove a ribaltâ la situazion, ma lis conclusion plui pericolosis a son ancjemò chês de scuadre furlane cun Teodorczyk e cun Lasagna, che al cjape il puest di Pussetto. Dome tai minûts di recupar il Cagliari al rive a vê la bale pal doi a doi, ma Joao Pedro no le bute dentri e al lasse dute la sodisfazion pe partide ai blancs e neris.

Advertisements

Udinese – Spal 3-2

L’Udin al vinç e si svicine ae concuiste de permanence in serie A. Cuintri de Spal la scuadre blancje e nere e rive a segnâ daurman, dopo cinc minûts di zûc, e dentri dal prin timp al incrès il so vantaç cun altris soi goi. Tal secont timp la musiche e je diferente, cul Udin che a di un ciert pont al cale, i ospits che a cressin, a segnin e a riscjin di jonzi la paritât e di impeolâ i blancs e neris.

La scuadre di balon furlane si presente cun Musso in puarte, cun De Maio, Ekong e Samir in difese, cu la linie mediane costruide cun Mandragora e Sandro tal mieç, cun Stryger Larsen e Zeegelaar laterâi e cun De Paul a sapontâ la cubie di atac formade di Okaka e Lasagna.

La partence dai parons di cjase e je decise. Il gol al rive in curt cuntune conclusion cul cjâf di Samir suntun cross di De Paul e dopo doi minûts une altre bale pinelade dal trecuartist argjentin e e devente un “cuasi autogol” par vie dal intervent di Gomis e de deviazion di Bonifazi. L’Udin al ridûs i zîrs dal motôr e la Spal e profite par provâ a lâ dongje de paritât cuntun tîr-cross di Fares che al ven parât vie di Musso e cuntun tîr fûr bersai di Petagna.

Tal ultin cuart di ore l’Udin al torne a cjapâ in man la partide. Il prin efiet di cheste situazion al è un corner di De Paul cun Okaka che nol mancje l’apontament e al segne cul cjâf. A passin trê minûts e l’ex atacant dal Watford al segne ancjemò in acrobazie. L’Udin al va dilunc a sunâ chê musiche e si fâs viodi ancjemò des bandis di Gomis cun De Paul e cun Lasagna.

La seconde frazion si vierç cu la Spal che e prove a masanâ zûc par cjatâ un troi inte direzion de puarte di Musso. L’Udin al è atent e al rispuint ae manovre dai aversaris. I minûts a passin, la partide e je plasevule e ecuilibrade e i ferarês a rivin a segnâ cun Petagna, intant che i blancs e neris a puartin al tîr Mandragora, cuntune biele manovre disvilupade di D’Alessandro, Stryger Larsen e Okaka, e Lasagna, cuntun sugjeriment di Okaka.

I blancs e neris no rivin a concretizâ lis lôr zuiadis e cussì e je la Spal a cjatâ la strade dal gol cun Valoti che le met dentri cul cjâf suntun cross di Kurtic. Il vantaç dal Udin al è dome di un gol e Tudor al prove a zuiâ la cjarte Pussetto, che al jentre in cjamp al puest di Lasagna, cun chê di dâ plui fuarce e plui profonditât aes azions di atac.

La sielte dal tecnic e je juste ancje se il so impat al è limitât. Il ritmi dal zûc al cale e l’Udin al cîr soredut di tignî la bale. A son ancjemò emozions di une bande e di chê altre. La Spal si svicine ae paritât cun Kurtic che al tire fûr bersai di un et e al fâs vignî i sgrisui ai tifôs furlans. I ospits a sburtin ancjemò, l’Udin si difint e al rispuint cun Mandragora. I minûts a passin, ancje i cuatri di recupar, e la partide si siere cul unic risultât bon pe scuadre furlane, che si cjate intune posizion di sigurece, ancje par vie de paritât jenfri Cagliari e Genoa. Condut achel al è bene al conven – soredut par se stes, stant che l’Udin cumò al varès di jessi a puest – che il Toro al fasi il so dovê cul Empoli.

Frosinone – Udinese 1-3

Une vitorie che no je dome necessarie, ma ben ancje fondamentâl. L’Udin a Frosinone al torne a vinci lontan dal Stadi Friûl dopo vot mês e al puarte a cjase trê ponts impuartantons che inte corse pe salvece i permetin di tignîsi l’Empoli dôs lungjecis indaûr e di no pierdi teren rispiet aes scuadris che a son plui indenant.

Il sucès de scuadre di balon furlane si fisse bielzà vie pal prin timp, ancje se la partide no je une spassezade par vie che i parons di cjase, cundut che la matematiche ju à za condanâts ae retrocession, a mostrin di volê fâ biele figure denant dai lôr tifôs, e vie pal prin timp a tegnin bot tal confront cui bklancs e neris e salacor in cualchi passaç a somein plui ordenâts e compats.

Tudor al mande in cjamp une scuadre cun cualchi mudament inte formazion rispiet aes partidis passadis. In difese a tornin Samir e Ekong, Stryger Larsen al recupare la posizion di laterâl di diestre inte linie mediane, là che a çampe si torne a viodi ancje D’Alessandro, e in atac dongje di Lasagna al cjate puest Okaka. Di chê altre bande il Frosinone al palese une buine propension ofensive cu la sielte dal scheme 3-4-3, là che lis pontis a son Ciofani, Pinamonti e Ciano, in difese Capuano al cjape il puest di Goldaniga e in puarte al è Bardi al puest di Sportiello.

La partence dai parons di cjase e je chê cul pît just e la prime ocasion e je une iniziative di Pinamonti che al salte Musso ma si cjate la strade sierade de bande di De Maio. L’Udin al rispuint soredut cul dinamisim di Okaka, che dopo unids minûts di zûc al è brâf a puartâi vie la bale a Valzania, al schiribice doi aversaris e al mande cun precision la bale in puarte fasint la barbe al pâl.

Il Frosinone al mostre di no volê fâ la vitime sacrificâl pe salvece de scuadre furlane e al prove a reagjî cun grinte e cun continuitât, ancje se Musso al è atent e puntuâl e al neutralize i tentatîfs aversaris. Ben cuviert in puarte e in difese, l’Udin al sghinde i pericui puartâts di Ciano e si puarte indenant ae ricercje dal secont gol che al rive cuatri minûts prime de polse cun Samir che cuntun tîr cul cjâf al mande in puarte un biel cross su punizion prontât di De Paul.

Pai parons di cjase al è il colp dal ko, che al vierç la strade pe tierce segnature furlane, che e siere la prime frazion: assist di De Paul par Lasagna, passaç di KL15 par Okaka e conclusion a colp sigûr e a puarte vueide.

Tal secont timp l’Udin al è intes cundizions di gjestî il vantaç e fintremai di segnâ il poker cun De Paul, cun Larsen e cun Lasagna, intant che il Frosinone al prove a rispuindi cun Pinamonti e Paganini.
Dongje de fin de partide i parons di cjase a rivin a segnâ il gol de bandiere cun Ciofani, ma l’Udin no si scompon plui di tant. Al manten il control de partide e al cîr di segnâ ancjemò cun De Paul e Pussetto, jentrât al puest di Okaka.

Udinese – Inter 0-0

Un piçul pas indenant viers de salvece. Dopo de prestazion discrete di Bergamo, cuant che l’Udin al veve pierdût cuintri di une Atalanta fuarte e fortunade, i blanc e neris in cjase a rivin a fâ alc di miôr par ce che al tocje il risultât. No rivin a segnâ nancje un gol, però no’nt cjapin e duncje a puedin puartâ a cjase un pontut impuartant, che nol permet ancjemò di sierâ pardabon la cuistion de permanence in serie A ma al jude une vore massime sul plan psicologjic.

Cuintri di chê che e je la tierce fuarce dal campionât Tudor al mande in cjamp Musso in puarte, Stryger Larsen, De Maio e Nuytinck in difese, Sandro tal mieç dongje di Mandragora e di De Paul cun D’Alessandro e Zeegelaar su lis corsiis esternis e cun Pussetto e Lasagna a scombati in atac. La Inter e mostre di vê une marcje in plui, ma la scuadre di balon furlane e ten bot, e cîr di fâ pressing sui aversaris che a puartin indenant il balon, di fermâju e di rispuindi in cuintripît.

Lis ocasions di gol plui gruessis a son dutis dai ospits, che a oblein Musso a stâ in vuaite e a intervignî cun snait e cun mistîr cun Perisic e cun Nainggolan. Dopo vincjedoi minûts di zûc al è Lautaro che al fâs vignî i sgrisui prime ai tifôs furlans parcè che si cjate al apontament cu la bale pinelade par lui di D’Ambrosio e po ai supporters interiscj par vie che la sô conclusion e je fûr scuare e fûr bersai.

Cul passâ dal timp l’Udin al vuadagne teren e si fâs viodi des bandis di Handanovic cuntune biele combinazion tra De Paul e Mandragora, che il so tîr al ven fermât dal ex puartîr furlan. Prime de polse Brozovic inte aree di rigôr interiste al sburte in maniere iregolâr e vistose Mandragora, ma par Rocchi nol sucêt nuie e nol è nancje il câs di zovâsi dal jutori dal Var.

La seconde frazion si vierç cuntun ritmi plui alt e cun dutis dôs lis formazions che a provin a fâ alc par rompi la paritât. A son emozions in atac e in difese: Lautaro al impegne Musso di fûr, Brozovic al fâs un miracul par fermâ Pussetto che si svicine in maniere pericolose ae puarte di Handanovic e po al è il puartîr blanc e neri a meti un blec cul pît suntun tîr di Nainggolan tocjât cul tac di De Vrij.

La pression ofensive de Inter e aumente, poiantsi ancje su Icardi, jentrât al puest di Borja Valero, cun Lautaro che al dâ lavôr a De Maio e a Zeegelaar. La scuadre di balon furlane e scuen pensâ dome a difindisi e lu fâs cun atenzion e cun continuitât, ancje cuant che Spalletti al bute dentri Candreva e Keita par lâ al atac. Lis bariduris fatis sù dal Udin a tegnin e se ancje si vierç cualchi sfese al è simpri Musso che al tire jù la sierande.

Atalanta – Udinese 2-0

La Atalanta e je une des scuadris miôr dal campionât e lu conferme ancje cuintri dal Udin, che si presente a Bergamo cul obietîf categoric di tignî bot denant dai aversaris e di scombati par jonzi un risultât positîf.

Par une otantine di minûts la formazion di Tudor e rive a lâ daûr di chel obietîf. La Atalanta e je plui presinte in atac ma su lis conclusions di Gosens, di Zapata e di De Roon Musso al è simpri tal puest just e al fâs la robe juste che e covente. L’Udin al rispuint in cuintripît e al met adun cualchi conclusion.

Tal prin timp la plui pericolose e je une pinelade di Lasagna che si distude fûr bersai di pocjissim. Te seconde frazion, che in gjenerâl e à un ritmi plui bas, al è De Paul chel che si svicine al gol, cuntun tîr di fûr che al sbat cuintri dal pâl. Daûr de regule no scrite dal zûc dal balon che e dîs che cuant che, magari ancje dome pe sfortune, no tu rivis a fâ rindi inte maniere miôr une ocasion golose dopo a rivin a segnâ i tiei aversaris, tai ultins dîs minûts i parons di cjase a rivin a fâ valê la lôr predominance teritoriâl.

Magari cussì no la Atalanta e ven judade di une ingjenuitât di Sandro che inte aree di rigôr al fâs fal su Masiello: Giacomelli al sivile e De Room al tire e al segne. Cuatri minûts plui tart Pasalic al cjate la bale juste par bati Musso cuntune biele conclusion che si zove ancje de deviazion involontarie di Nuytinck. Al è il colp dal kappaò: l’Udin nol rive a reagjî e i parons di cjase si svicinin ancje ae tierce segnadure.
Sabide cuintri de Inter l’Udin al scugnarà jessi ancjemò plui atent e plui concret.

Udinese – Sassuolo 1-1

Miôr che cuintri de Lazio, ma ancjemò masse pôc sul plan dal zûc, dal caratar e de tignude atletiche. Cul Sassuolo l’Udin nol piert, al cjape un gol, a’nt segne un altri e al puarte a cjase un pont, che al devente pesantonon soredut in graciis dal fat che l’Empoli al piert cu la Spal e al reste indaûr. L’obietîf minim al jere chel di fermâ la gnove tindince a pierdi, tornade in vore cu lis dôs partidis di Rome, e al è stât jonzût, però al covente fat par sigûr alc di plui e alc di miôr. Tant a dî che pe vere resurezion blancje e nere si scugnarà spietâ che e passi la Pasche.

L’Udin si spresente sul cjamp dal Stadi Friûl cun Musso in puarte, cu la difese a trê cun De Maio, Ekong e Samir, cun Mandragora tal mieç dongje di Fofana, dai laterâi D’Alessandro e Larsen e di De Paul, proietât indenant a sapontâ la cubie di atac formade di Pussetto e Okaka. La partide si vierç cence grandis emozions: lis primis conclusions di Okaka, De Maio e Berardi a son fûr bersai.

Cul passâ dal timp il Sassuolo al incres la fuarce des sôs verticalizazions in velocitât e juste passade la prime mieze ore di zûc i emilians a imbastissin une azion di cuintripît che e met Sensi, su assist di Berardi, tes cundizions di sbusâ la puarte difindude di Musso. La reazion dal Udin e je avonde flape e Consigli nol à nuie ce fâ fint aei fin de prime frazion.

Dopo de polse l’Udin al somee un tic plui decîs in atac e il sburt su lis corsiis esternis di D’Alessandro e Larsen al tache a rindi alc, ancje se des bands di Consigli nol rive ancjemò nissune bale pericolose. Dopo une conclusion pôc precise di Berardi, Tudor al cambie De Maio cun Lasagna cul intindiment di incressi la pression ofensive. L’atacant di San Benedetto Po al impegne Consigli e al fâs bogns moviments cu la bale e cence. A provin a tirâ in puarte, ma cence ni precision ni fortune, ancje Pussetto e De Paul.

La azion plui pericolose dai parons di cjase e rive juste prime dal ultin cuart di ore de partide cuntune combinazion tra Okaka, Pussetto e De Paul, che e ven neutralizade dal intervent di Demiral . Il gol de paritât al rive cinc minûts plui tart cuntun corner che al cree confusion te aree dal Sassuolo e une conclusion di Okaka che si zove ancje de deviazion di Lirola. La intensitât e cres tal finâl cul Sassuolo che al prove a cirî di tornâ in vantaç in particolâr cuntun cross di Duncan par Berardi che però nol rive a sierâle inte maniere miôr. L’Udin si difint e la paritât e ven garantide fint insom.

Lazio – Udinese 2-0

L’Udin al torne a Rome pal recupar di campionât cuintri de Lazio, ma si dismentee di zuiâ. La formazion metude in cjamp di Tudor cuintri dai blancs e celescj e somee une fantasime in confront cun chê che e veve zuiât sabide cuintri de “maggica”. Chê furlane e je une scuadre flape, smamide e salacor rassegnade e par chel destinade a pierdi.
La Lazio e fâs il so e dopo vincj minûts al rive il gol di Caicedo al 21′. Cun di plui, almancul dal pont di vite dl Udin, e je ancje un tic di sfighe, stant che trê minûts plui tart i parons di cjase si zovin ancje dal autogol di Sandro.
Tal secont timp la formazion furlane e prove a fâ alc di plui, ma cence grancj risultâts. La ocasion miôr par tornâ a vierzi la partide le à De Paul che però si fâs parâ il rigôr causât di un fal di Lulic su Lasagna.
Sierade malamentri la gnove trasfierte romane, cumò l’Udin nol pues permetisidi fâ pas fals, a partî dal scuintri diret in program sabide cul Sassuolo.

Roma – Udinese 1-0

Par latin si disarès “quartum non datur”. La serie positive dal Udin screade cu la gnove rivade di Tudor tant che alenadôr si ferme a Rome, almancul par ce che al tocje i risultâts. Cuintri de “maggica” i blancs e neris a zuin une partide discrete, massime vie pal prin timp e po ancje sul imprin de seconde frazion. Pe plui part de partide l’Udin al somee plui ordenât e concret dai parons di cjase che salacor ancjemò plui de scuadre furlane ur covente fâ ponts e soredut cirî di vinci ma a palesin cualchi dificoltât di struture che a rivin a comedâ dopo de polse. Ae fin la scuadre di Ranieri e cjate la strade dal gol cun Dzeko e si puarte a cjase ducj i trê ponts a disposizion che i coventin par tornâ a sperâ di gafâ une des posizions in graduatorie che a van ben par lâ in Champions League. Al Udin a restin il marum par no vê rivât a cjapâ almancul un pont e la cussience che miercus ancjemò a Rome cuintri de Lazio al varà di fâ alc di plui e di miôr.

I blancs e neris si presentin cun Musso in puarte, cu la difese a trê componude di De Maio, Ekong e Samir, cun Fofana e Mandragora tal mieç, compagnâts tes corsiis laterâls di Larsen e di D’Alessandro e plui indenant di De Paul, in jutori des dôs pontis Okaka e Lasagna. Ranieri al mande a scombati Schick e Dzeko, cu la sperance di viodi l’atacant bosgnac che al torni a segnâ dopo un an a dizun, cul El Sharaawy mieze ponte laterâl a çampe, cun De Rossi a dâi cûr a dute le scuadre, poiât inte mediane dal furlan Cristante, e cuntune tierce linie inedite fate sùù ator di Jesus e Marcano.

L’Udin al partìs cul pît just e al profite dal fat che la Rome e je involuçade e clopadice. I blancs e neris si fasin vîfs daurman des bandis di Mirante cun De Paul che al tire fûr bersai, cun Mandragora che al impegne il puartîr romanist e cun Lasagna che nol cjate la puarte. La formazion furlane e fâs un bon pressing sui zuiadôrs che a varessin di inviâ lis azions aversariis e par passe vincj minûts la Rome no rive a cumbinâ alc e ce, intant che une combinazion tra De Paul e Lasagna e ven neutralizade di Manolas.
Il ritmi nol è masse alt, la ploie e aumente e al devente simpri plui dificil zuiâ di fin. I parons di cjase a rivin a fâ alc di plui sù par jù ator de prime mieze ore di zûc cuntun scat di Zaniolo, cuntun cross di Dezeko par El Shaarawy, che al tocje cul cjâf ma nol cjate la puarte, ancjemò cuntune conclusion dal zuiadôr di divignince egjiziane fermade di Musso, che al torne a jessi protagonist suntun tentatîf di Marcano, e cun Schick prime de polse.

La seconde frazion si vierç cu la fisionomie tatiche de Rome che e ven mudade di plante fûr, cu lis sostituzions di Schick e di Jesus cu la jentrade tal cjamp di Pellegrini e di Florenzi e cul passaç dal 4-4-2 al 4-2-3-1. L’Udin al manten la sô muse e il so ategjament positîf cul efiet di impegnâ Mirante cun Okaka, cuntun tîr cross di D’Alessandro e cuntune conclusion cul cjâf di De Maio che , magari cussì no, si distude sul pâl.
La Rome e prove a rispuindi, prime cuntune iniziative di Cristante che no cree problemis a di nissun e po cuntun pâr di conclusions, une fermade di Musso e chê altre salvade di Fofana. Al rive cussì il gol di Dzeko che si cjate tal puest just tal moment just e sul fîl dal fûr zûc al profite inte maniere miôr di un biel assist di El Shaarawy, intant che la difese furlane si foerme forsit par un ecès di fairplay denant dal infortuni di De Rossi.

La Rome e difint il vantaç, e piert De Rossi che al scuen lâ fûr e si siere indaûr. L’Udin al prove a dreçâ la partide cun Tudor che al met dentri daurman Pussetto al puest di D’Alessandro e po ancje Teodorczyk par De Maio. La reazion dai blancs neris e je buine in tiermins di cerviel e di cûr, ma Mirante nol à masse fastidis e cussì e rivin lis trê siviladis di Di Bello e a fasin fieste dome i tifôs dai zâi e ros.

Udinese – Empoli 3-2

Soference e sodisfazion. Dopo de vitorie cul Genoa e de paritât cul Milan, l’Udin al torne al Stadi Friûl, al scombat, al spude balins e al vinç ancje cul Empoli. Grancj protagoniscj De Paul, che al firme doi goi e al fâs assists e moviment, e Okaka, che in cualchi maniere al met la sô çate in ducj i goi, intune scuadre che in gjenerâl e mostre di vê cûr e cerviel. Bielonone ancje la atmosfere dal Stadi: ancjemò cun tantis bandieris dal Friûl dapardut e cuntune curve nord che e memoree la Fieste de Patrie. Une sorte di esorcisim coletîf cuintri dal diaul dal efiet Mer…Dacia Arena che al sburte inte maniere miôr la scuadre a vuadagnâ altris trê ponts di aur su la strade viers de salvece.

Chê di vuê e je une disfide tra dôs scuadris che a scugnin fâ ponts e par chel a scugnin zuiâ. Si lu viôt fint dal imprin: i blancs e neris a son atents, dinamics e vivarôs e al mostre une muse compagne e salacor ancjemò miôr ancje l’Empoli. Dutis dôs lis formazions si presentin cul 3-5-2. La scuadre furlane e viôt Musso in puarte, Opoku, Ekong e Samir in difese, Mandragora tal mieç denant de tierce linie, dongje di Fofana e De Paul, che al sta daûr de cubie di atac formade di Okaka e Lasagna, cun Stryger Larsen e Zeegelaar cursôrs laterâi. L’Empoli al rispuint cun Farias e Caputo a scombati, sapontâts di Bennacer, di Krunic e di Pajac.

Il ritmi al è decîs, la partide e je daurman divertente e emozionante. I ospits a somein in stât di meti adun un zûc corâl che al è biel di viodi e ancje produtîf. L’Udin si môf dilunc des liniis verticâls, poiantsi, almancul in principi, plui su iniziativis individuâls che su manovris coletivis. L’Empoli al segne dopo undis minûts – e dopo un prin tentatîf in vierzidure di Farias fermât di Musso – cuntun scheme inviât di Bennacer su punizion e perfezionât di Krunic par Caputo che al sbuse la puarte dal Udin. Trê minûts plui indenant i parons di cjase a drecin la situazion cun Okaka che al fâs cuarante metris di cjamp cu la bale tai pîts e al libere De Paul che al disegne la parabule juste par superâ Dragowski.

La paritât riconcuistade e sburte l’Udin in direzion dal vantaç, cui tentatîfs di Lasagna – cun Dragowski che al pare – e di Stryger Larsen, ispirât di De Paul, che al tire fûr bersai, ma il sorpàs lu fâs l’Empoli cun Krunic che al siere inte maniere miôr une triangolazion imbastide cun Caputo.
I blancs e neris no molin e a provin daurman a tornâ a meti i numars in paritât ancjemò cun Lasagna, che però la sô conclusion no cjate il spieli de puarte, intant che l’Empoli nol cambie ategjament tatic e ju oblee a stâ in vuaite ancje indaûr.

Te ultime part dal prin timp De Paul e Lasagna a tornin al atac de puarte di Dragowski, ma no rivin a metile dentri. Cundut achel a rivin a meti in agjitazion la difese dal Empoli, cun Maietta che tal mieç te aree di rigôr al colaude la elasticitât dal tessût de maie di Lasagna, Orsato al sivile e dal discut De Paul nol perdone. Prime de polse al rive ancje il vantaç de scuadre furlane: punzion di De Paul, bariere che e pare indaûr il balon e Mandragora che lu recupare e lu tire là che Dragowski nol rive a tocjâlu.

La seconde frazion e va dilunc cun chel stes ritmi. L’Empoli al à voie di recuperâ, l’Udin no si sente e al prove a jessi ancjemò pericolôs. A rivin cussì i tîrs fûr bersai di De Paul e di Krunic, la iniziative di Opoku e il salvament di Stryger Larsen suntune azion di corner e la biele paradone cul pît fate di Musso su Antonelli, che inte contabilitât de fin de partide e varà un valôr speciâl.

Ancjemò prime de metât dal timp Zeeglaar al cjape la seconde amonizion e al ven parât fûr di Orsato. Cuntun om di mancul Tudor al scugne clamâ fûr Okaka e fâ jentrâ dentri De Maio par tirâ sùù lis baricadis. A passin i minûts, la difese blancje e nere e ten bot e l’Udin si svicine al cuart gol, cuntune bale di aur di Samir par Fofana che l’ivorian nol rive a butâle dentri. L’Empoli al va ae ricercje dal gol dal trê a trê cun Di Lorenzo e cun Farias, che però, par fortune, no son masse precîs e cuant che lu son a cjatin Musso tal puest just tal moment just.
Si zuin ancjemò cinc minûts di recupar cui blancs e neris che a strenzin i dincj e che a mantegnin il vantaç fin ae fin: trê goi fats, trê ponts cjapâts, tantis emozions, tante soference e tante sodisfazion.

Milan – Udinese 1-1

L’Udin al torne di Milan cuntun pont pesant e cu la sodisfazion di vê rivât adore a tignî bot denant di une scuadre dal nivel tecnic plui alt cence pôre e cence sudizion. Che e sedi par merit de “cure Tudor” o che al sedi dome rivât il moment che i zuiadôrs a àn capît che a scugnivin sveâsi, ce che al è sigûr al è che sul plan atletic e agonistic tes ultimis dôs partidis la scuadre di balon furlane e à mostrât une muse miôr che intal passât.

A San Siro i blancs e neris si presentin cuntune fisionomie tatiche diferente di chê di Sabide stade cuintri dal Genoa. Cence i scualificâts Stryger Larsen e Sandro, Tudor al sielç di organizâ la difese cun Opoku, De Maio,Ter Avest e Samir, al lasse fûr Mandragora e al recupere tal mieç dal cjamp Behrami, dongje di Fofana, Zeegelaar e De Paul, che a sapontin la cubie di atac formade di Pussetto e Lasagna. Ancje tal Milan a son novitâts: al puest di Calabria, Rodriguez, Kessié e Suso si viodin Abate, Laxalt, Biglia e Paquetá che al sta daûr di Cutrone e Piatek.

L’Udin al scomence ben, cuviert e ordenât. Il Milan al cîr di fâsi valê tant che paron di cjase ma nol cumbine alc e ce. Ae prime iniziative di Piatek par Cutrone i blancs e neris a rispuindin cuntun coss di Zeeglaar e cuntun tîr di Fofana fermât di Donnarumma. Cul passâ dal timp il Milan si fâs plui pericolôs cun Paquetá, che al tire fûr, e cun Cutrone che i da di lavorâ a Musso, intant che l’Udin al prove cun De Paul su punizion.

Il Milan al piert Donnarumma e Paquetá, infortunâts, ma juste ae fin dal prin timp al cjate il gol cun Piatek. Te seconde frazion Tudor al cambie daurman Samir cun Wilmot e po al mande in cjamp Okaka al puest di Ter Avest. Lis sieltis di Tudor a son chês justis: massime Okaka al zonte dinamisim e fuarce al zûc dai blancs e neris, che a mostrin di jessi in stât di dreçâ la partide.

Il gol de paritât al rive sùù par jùù ae metât dal secont timp, cun Fofana che al invie une azion di cuintripît e Lasagna che le siere inte maniere miôr. Il Milan al reste inçussît e al rive a fâ pôc o nuie par tornâ in vantaç, intant che l’Udin al sta atent e al prove ancje a gafâ la vitorie cuntun colp cul cjâf di De Maio, cuntun tîr fûr bersai di Lasagna e, dopo dal pericul passât cence padins cuntune conclusion di Castillejo fermade di Musso, ancjemò cun Fofana e De Paul.

Une buine vilie de Fieste de Patrie dal Friûl…