Udinese – Carpi 1-2

lunazzi_dinatale

L’omaç a Di Natale e di Di Natale, la maluserie dal Carpi che al va jù in serie B cun dignitât e la sconfite numar 19 che pal Udin e siere une stagjon di dismenteâ o – miôr – di tignî ben iniments par che no si ripeti plui. La ultime partide dal campionât 2015-2016 si pues leile cun diviersis cjaladuris. Cun voi blancs e neris, al pâr miôr tacâ cul pontâ la atenzion su Totò, su ce che al à fat in dodis agns a Udin, cul Udin e pal Udin e su cemût che ancje l’Udin e il Friûl i àn zovât al zuiadôr napolitan. E ancjemò su cemût che chê che e je stade presentade tant che la so ultime partide in blanc e neri e je stade segnade de fieste pal om e pal campion e dal gol de bandiere fat di Di Natale su rigôr. Cence dismenteâ ancje chei altris doi veterans blancs e neris che a saludin Udin e il Friûl, Domizzi e Pasquale.

L’incuintri al tache avonde ben pai parons di cjase. Pal Carpi la partide dal Stadi Friûl e je chê des ultimis sperancis par no lâ in serie B, intant che pal Udin e varès di jessi la ocasion par sierâ in bielece une stagjon che no je stade par nuie biele. La scuadre di balon furlane e scomence in maniere positive, cuntun pâr di iniziativis di Zapata e di Widmer e po cuntune altre conclusion di Piris, fermade di Colombi, e cuntun tîr fûr bersai di Bruno Fernandes.

udin_neri

Il Carpi al ten bot indaûr, al masane zûc tal mieç, ma nol rive a sburtâ masse indenant par jessi pericolôs des bandis di Karnezis. Lu judin in cualchi maniere un contat inte aree blancje e nere tra Felipe e Lasagna e soredut la decision di Mazzoleni di sivilâ il rigôr a pro dai ospits. Dal discut al segne Verdi e il vantaç dal Carpi nol tocje dome il risultât ma si slargje ancje al numar di zuiadôrs tal cjamp, stant che Thereau al palese a fuart di no jessi par nuie in cunvigne cu la decision dal arbitri e par chel si fâs butâ fûr cuntun cartelin ros: un brut moment finâl par un dai zuiadôrs miôr di cheste di stagjon.

Il gol fat dai undis metris al clame daurman ancje il secont gol di Verdi e il prin timp si siere cuntun dopli passîf, che al podarès fintremai deventâ un trê a zero. Tal secont timp la situazion no je alc e ce ni di une bande ni di chê altre: la reazion dal Udin e je avonde flape, intan che il Carpi al somee rindisi cont che a Palermo lis robis a van intune maniere che no je favorevule. Nol sucêt nuie fint cuant che Totò Di Natale al jeve de bancjine e al ven mandât tal cjamp al puest di Bruno Fernandes.
A passin doi minûts e Mazzoleni al sivile un penalty a pro dal Udin, Totò al tire e al è doi a un.
Di chel moment indenant e je fieste par lui e cun lui, ma ancje par Pasquale, protagonist di un bon secont timp, e par Domizzi, che De Canio lu fâs jentrâ al puest di Widmer juste in timp par ricevi un batimans ancje par lui.

Pal rest nol è nuie ce fiestezâ, a part il fat di vê sghindade la retrocession. Pluitost al covente che la societât si movi: nus covente un Udin plui competitîf e plui furlan, te rose de scuadre, ma soredut tal stîl e te comunicazion istituzionâl che, biadelore, e varès di jessi ancje in lenghe furlane, compagn de segnaletiche dal stadi, cemût che al jere stât anunziât in maniere uficiâl ancjemò ae fin di Otubar dal an passât.

keep-calm-and-fuarce-udin-2

 

Atalanta – Udinese 1-1

FuarceUdinees

Un gol fat e un cjapât e un pontut puartât a cjase. La trasfierte a Bergamo e va inte maniere miôr pussibile, un pôc par merit dal Udin e une vore di plui par merit e par demerit di chei altris. Cun di fat, la zornade di îr si siere cu la conferme matematiche de permanence in serie A de scuadre di balon furlane, soredut in graciis dal risultât finâl di Carpi-Lazio, là che emilians a pierdin 3-1 e par chel si mantegnin a cuote 35, cuntun pît in serie B.

Domenie che e ven si siere il campionât propit cun Udinese – Carpi alì dal stadi Friûl. Par intant si pues fâ za daurman une riflession su cemût che e je la de cheste stagjon, là che e je saltade fûr a fuart la diference tra il mâl e il malan, ven a dî tra une scuadre scjarse che e rive a salvâsi e une che e sbrisse in serie B.

Pal moment o podìn ancje contentâsi – al è pardabon il câs di dî “alc al è alc, nuie al è nuie”– e cussì il mâl al devente ancje alc di bon, però al covente fâ in mût che l’an che al ven lis robis a ledin intune altre maniere, cemût che si meretin i tifôs dal Udin che chest an, tra partidis smamidis, scuadre flapute e efiet Dacia Arena, a àn scugnût gloti di dut e cundut achel a àn poiât la scuadre cuntune grande passion.

La partide di Bergamo e je impuartante plui pal risultât che pal zûc, in particolâr pe scuadre di balon furlane.
Tai prins minûts l’Udin al mostre une determinazion plui fuarte dai aversaris, leade ae sante scugne di fâ ponts. Al rive cussì il gol di Duvan Zapata, che le met dentri cul cjâf suntun biel cross di Alì Adnan. Il vantaç dal Udin al dure dîs minûts, stant che Danilo al tocje la bale cu la man, Rizzoli al sivile il penalty e il cjapitani de Atalanta, Bellini, al tire dal discut e al segne, juste inte ultime partide di zuiadôr in neri e blu, e pe prime volte, dopo disevot agns di ativitât simpri cun chê scuadre, al segne tal stadi di cjase.

Dopo dal gol, la Atalanta dal alenadôr gurizan Edi Reja e cjape il control de partide, e frache un tic – no masse, ma ce che al covente par blocâ l’Udin – sul aceleradôr e si svicine al doi a un cun Cigarini. Ancje la formazion di De Canio e torne a fâ alc: il protagonist al è ancjemò Zapata, cuntun tîr di fûr che al met in crisi Sportiello, che nol rive a fermâlu e che po al riscje di fâsi segnâ di Badu.

A son il ultimis ocasions di gol, di une bande e di chê altre. Po dopo, in particolâr vie pal secont timp, la partide e va indenant slisse e cence cuintricolps, cu la fieste finâl par Bellini, pe Atalanta e ancje pal Udin, che e cjate finalmentri la salvece ma vie pe partide e piert i infortunâts Wague e Kuzmanovic.

Domenie che e ven la ultime di campionât: saraie fieste di fin cariere (dome in blanc e neri o ancje in gjenerâl?)  ancje par Di Natale?

Udinese – Torino 1-5

udin_neri

Cinc patafs che a fasin une vore mâl. Inte partide cul Toro, che e veve di jessi chê de sigurece de permanence in serie A – cuntune vitorie o almancul cuntun pont – l’Udin al mostre il piês di se e al zuie in perfet stîl Mer…Dacia Arena, cemût che al disarès cualchidun.

I blancs e neris a àn dome doi moments bogns, sul imprin de partide e te viertidure dal secont timp, intant che pe plui part dal incuintri l’unic colôr vivarôs che si viôt al è chel granât.
Il risultât finâl al è pesanton e just tes sôs dimensions e la situazion e torne a jessi avonde grivie e penze: a chest pont si à di sperâ che la Sampdoria e vinci cuintri dal Palermo, par che nol sedi masse di sgrisulâsi.

La partence e somee avonde buine. Intant che il Stadi Friûl al ricuarde i cuarante agns dal Orcolat e la schene drete dai furlans te ricostruzion, l’Udin al mostre di vê cussience de necessitât di fâ une biele partide. Denant di Karnezis, De Canio al met Heurtaux, Danilo e Felipe, te linie mezane a son Kuzmanovic e Badu, cun Fernandes che al poie lis dôs pontis Thereau e Matos e cun Edenilson e Adnan impegnâts tes corsiis laterâls: no son Wague, Zapata e Widmer e la lôr mancjance – soredut chê dal svuizar – si le sintarà a fuart.

Tai prins minûts i parons di cjase a riscjin alc suntun erôr di Heurtaux e duncje suntune iniziative di Martinez, ma a rivin ancje a meti dongje une buine ocasion cun Edenilson par Matos, che però no le siere cemût che al covente. Al è il principi de fin: l’Udin al cale cul passâ dal timp, in tiermins di zûc e di caratar, e il Toro al cjape ad in plen il control de partide.

I turiniscj a àn il balin in man, ma a àn di metile dentri dôs voltis par rivâ a fâ la prime segnadure: il prin tentatîf lu fâs Bellotti suntun cross di Acquah, cun Fabbri e i siei colaboradôrs che a calcolin la sô tant che une posizion di fûr zûc;  il secont, chel bon, lu firme Jansson, che suntun corner tirât di Gaston Silva al salte plui indalt di ducj e al bat Karnezis.

L’Udin al stente tal meti adun une cualsisedi forme di reazion, intant che il Toro al manten la sô posizion di dominance. Cussì i ospits a rivin a dopleâ il vantaç cu Acquah prime de polse: ancje in chest câs, compagn dal un a zero, dongje dai merits dai zuiadôrs dal Turin a son i demerits di chei blancs e neris, che in difese si indurmidissin un tic masse dispès.

Il secont timp al somee prometi alc di miôr de bande de scuadre furlane. Cun di fat al rive il gol di Felipe e la formazion blancje e nere e mostre di vê plui snait e plui determinazion.
Magari cussì no, e je dome une impression: chel e chê si sfantin in curt e prime che l’Udin al cjati la strade dal doi a doi al è ancjemò il Toro chel che al segne, cun Martinez che al gjestìs te maniere miôr un balon golôs prontât di Acquah, al fâs fûr Felipe e Danilo e al firme il tierç gol de sô scuadre.
No je ancjemò finide: no par vie che i blancs e neris a rivin a dreçâ la partide te sô ultime part, ma parcè che il Turin al jemple il sac daûr di Karnezis ancjemò dôs voltis, prime cun Bellotti in cuintripît e po cun Martinez.

Dal blanc e neri al grîs e dal grîs al neri plui neri.
Mâl e vonde. Nus tocje di sperâ che no sedi ancjemò piês.

PS. O savìn ancje che almancul par cualchidun la partide e à vût alc di bon: il fat che il Toro al vedi vinçût.

Inter – Udinese 3-1

udin_neri

L’Udin al partìs benon, al va in vantaç, ma al ven cjapât dal Inter, che ae fin al vinç cuntun risultât taront. Cundut dal esit finâl, che al premie la cualitât dai parons di cjase e soredut la zornade buine di Jovetic, motôr autentic dal Inter, il belanç de partide nol è cussì negatîf. Ciert che se i blancs e neris a vessin rivât a puartâ a cjase un pontut… al sarès stât miôr.

La scuadre di balon furlane e scomence la partide inte maniere miôr, cun serenitât, cun determinazion e cun ordin. Al rive cussì il gol di Thereau, che dopo nûf minûts di zûc si fâs cjatâ al apontament cuntun biel lanç confezionât di Badu e al tire in puarte: nuie ce fâ par Handanovic.

Il gol al conferme i ecuilibris tal cjamp, l’Udin al rinfuartìs il so ategjament tatic e l’Inter sul imprin al stente a imbastî une vere reazion, fale che cun cualchi scat di Kondogbia, ma cul passâ dal timp la situazion e cambie, cu la scuadre di Mancini che e vuadagne ritmi e cjamp, e fâs zirâ la bale plui svelte e e cjape sùù la iniziative.

L’Udin al patìs la pression aversarie, i interiscj si movin ben in dutis lis zonis dal cjamp e a rivin a segnâ in graciis di une iniziative di Icardi che al manten il control de bale te aree blancje e nere, al scjavace Wague e al servìs Jovetic, autôr dal un a un che si manten fintremai ae fin dal prin timp.

Dopo dal interval la partide e torne a tacâ in maniere dinamiche e ecuilibrade. L’Inter al continue la pression de ultime part dal prin timp, ma l’Udin al rispuint cun Widmer e Bruno Fernandes. Intune ocasion al è decisîf l’intervent di Juan Jesus e ta chê altre la bale e sbat su la travierse, cussì lis iniziativis de scuadre di balon furlane no rivin a mudâ il risultât.

Di chê altre bande dal cjamp al è Karnezis che i dîs di no a Brozovic, intant che la coraçade interiste e torne al atac cuntune determinazion plui fuarte e cul efiet di sierâi  la strade aes manovris dal Udin, che al è constrenzût a sierâsi indaûr cun chê di tignî bot ai sugjeriments di Icardi e ai inseriments dai atacants interiscj.

Karnezis al pare dut, o cuasi:al rive a meti in blec ancje suntun tîr di Perisic, ma nol pues fâ compagn suntune deviazion di Jovetic suntun cros di Biabainy. L’Inter al passe in vantaç e lu manten cun cualchi patiment. Tal cuart minût di recupar Zapata al impegne Handanovic, che al salve la puarte e il risultât. Te azion seguitive al rive il gol di Eder.

Domenie l’Udin al zuiarà cul Turin: al à di mostrâ il bon fat viodi cuintri dal Napoli, de Fiorentina e, almancul in part, ancje dal Inter e al à ancje di cjapâ chi ponts che a coventin  par no vê altris patiments in classifiche. Rivarial?

Udinese – Fiorentina 2-1

fuarceudinees

Doi goi fats, dôs traviersis, un gol cjapât e trê ponts pesantonons che a puartin aiar bon in classifiche e a svicinin la scuadre al obietîf salvece. L’Udin cuintri de Fiorentina al zuie, al cor, al spude balins e al mostre caratar e personalitât. I blancs e neris a frontin la scuadre di Florence cence sudizion e a fasin chel che cualchidun in curve i domande suntun strisson: «Mangjin chê fiorentine. O sin furlans, migo vegans!».

Cun Danilo, Heurteaux e Wague in difese, cun Widmer e Adnan a sburtâ e a cuvierzi su lis corsiis laterâls, cun Badu, Kuzamanovic e Bruno Fernandes tal mieç e cu la cubie di atac Zapata/Thereau in zornade sì, la scuadre di De Canio e palese di vê cussience de necessitât di fâ cuintri de Fiorentina une partide almancul compagne di chê cuintri dal Napoli. I ospits a mostrin di vê cualitât, ma ancje di jessi un tic masse supierbeôs e cun pocje atenzion in difese e cence ordin de metât dal cjamp insù.

L’Udin al cjate il gol daurman, tal zîr di doi minûts: corner di Bruno Fernandes e conclusion a bersai di Zapata. La Fiorentina e patìs il colp, intant che i blancs e neris a cjapin cussience de lôr supremazie e del disorientament dai aversaris, che ur mancje a fuart la bussule di Borja Valero, che al è stât lassât fûr de bande di Paulo Sousa. Par sùù par jùù vincj minûts si viôt dome l’Udin, stant che i ospits a jessin fûr de eclissi dome cuntune iniziative di Tello, cuntun contrast te aree blancje e nere tra Danilo e Alonso e cuntune dople conclusion di Zarate, che al secont tentatîf al rive a passâ Karnezis.

La paritât parziâl e da un svolt ae partide: lis dôs scuadris si sliungjin e l’incuintri al devente plui vivarôs. L’Udin al sburte cun Zapata e cun Thereau, al ten bot denant dal dinamisim di Zarate e al met dongje un pâr di ocasions par sierâ il prin timp in vantaç, ma sei la conclusion di Badu che chê di Thereau a sbatin cuintri de travierse. Cussì il prin timp si siere sul un a un.

keep-calm-and-fuarce-udin-2

Dopo de polse, l’Udin al torne daurman al atac e intun cuart di ore al see lis gjambis ai aversaris. Bernardeschi al piert la bale tal mieç dal cjamp, Badu le concuiste e le zire a Widmer, che le met tal mieç a pro di Thereau: il francês al è puntuâl tal gjoldi dal sugjeriment, al tire di prime intenzion e al sglonfe la rêt daûr di Tatarusanu.

La Fiorentina e je in zenoglon e Zapata si svicine al tierç gol in almancul dôs ocasions. Paulo Sousa, par dâur une scjassade ai siei, al prove a zuiâ la cjarte Ilicic, che al zonte energjie ma al fâs ancje confusion, intant che l’Udin no si scompon denant des iniziativis dal zuiadôr sloven e di chês di Zarate. I minûts a passin e il risultât nol cambie. Une vitorie meretade, une vitorie che e coventave.

Udinese – Chievo 0-0

udin_neri

Nissun gol, doi cartelins ros, un pontut par om, cualchi sgrisul e diviersis sossedadis. L’Udin cul Chievo al prove a vinci, ma nol rive, stant che al mostre di no vê chel minim di morbin che al covente par cjapâ i trê ponts che a domandin la classifiche e il morâl, massime dopo de partide smamide di domenie passade cuintri de Sampdoria.

ll risultât al premie il Chievo, rivât a Udin cun chê di no lâ a cirî fastidis e cuntune struture tatiche e atletiche solide e oneste, e soredut il so puartîr, Bizzarri, che al è stât simpri tal puest just tal moment just, in ocasion des pocjis veris conclusions blancjis e neris.

Il zero a zero al marche un altri viaç la inconsistence struturâl de scuadre di balon furlane, cundut des prestazions buinis di Widmer, di Thereau e di Pasquale, che al torne in cjamp dal prin minût e al zuie in maniere plui che oneste. No fasin compagn Bruno Fernandes, plui che altri gnervôs e confusionari, e Zapata, che la sô mancjance concrete indenant si le viôt une vore, in misure sù par jù compagne de sô fuarce tes zornadis buinis.

Tal prin timp l’Udin al mostre di volê fâ alc di plui dai aversaris e di fâ valê la sô supremazie teritoriâl, però nol rive a fâ alc e ce, par merit dai aversaris – e di Bizzarri in particolâr – e par demerit so. Tal secont timp la situazion e je sù par jù compagne, cuntun pâr di conclusions di Zapata e Bruno Fernandes, cun Bizzarri simpri atent. Viers de fin il zûc al cale 8ancjemò) e il gnervôs al cres, cun Felipe che si fâs butâ fûr a mone vie, stant che propit sot dai voi di Gavillucci i da un pataf a Radovanovic, che al zonte dal so cuntune enfasi teatrâl il colp, e cun Meggiorini che al cjape il cartelin ros parcè che al fâs une jentrade brute su Bruno Fernandes.

La vitorie dal Milan su la Sampdoria e la sconfite dal Palermo a rindin il pont cjapât avonde bon. Cundut achel, i sucès di Carpi e Frosinone a mostrin che la lote pe salvece no je ancjemò finude e che par chel a coventin il snait e il caratar mostrâts cuintri dal Napoli.

De Canio e i siei zuiadôrs a varan di preparâsi par ordin. Alc altri al varès di fâlu ancje la societât, che e podarès fâ compagn dai 3 di Avrîl e tornâ a convocâ, prime de partide cu la Fiorentina, DJ Tubet e magari ancje Dek Ill Ceesa.

I fats a mostrin che se al è plui Stadi Friûl e mancul Dacia Arena, ancje l’Udin al fâs miôr.

Sampdoria – Udinese 2-0

udin_neri
‘Tertium non datur’. Dopo doi risultâts positîfs, la tierce partide cun Di Canio in bancjine si siere cuntune sconfite. A Gjenue cuintri de Sampdoria, intun scuintri fondamentâl pe lote pe salvece, l’Udin al piert: al zuie dome tal prin timp, tal secont al patìs la pression dai parons di cjase e dome tal ultin al prove a fâ alc, ma al è masse pôc e masse tart.

I blancs e neris a àn sù par jù chê stesse fisionomie tatiche de partide cul Napoli, ma la formazion e je diferente: daûr al è Piris al puest di Felipe, te fasse mezane al è Halfredsson al puest di Badu e si torne a viodi ancje Lodi dongje di Kuzmanovic e denant al mancje un dai protagoniscj de vitorie cul Napoli, Bruno Fernandes.
La Sampdoria e à une disposizion tal cjamp sù par jù compagne di chê dal Udin, ma e mostre di vê une marcje in plui – il supuart dal public – e… un Fernandes cuintri di mancul.

Cundut de motorizazion plui potente de Sampdoria, la prime frazion de partide e va indenant in maniere avonde ecuilibrade. Lis dôs scuadris a tegnin bot une cun chê altre e a metin adun cualchi biele ocasion sei des bandis di Karnezis che di chês di Viviano. I prins tîrs in puarte a son dal Udin, cun dôs conclusions cul cjâf di Hertaux e di Zapata che a van fûr bersai di pôc. Di chê altre bande si fasin viodi i ex Quagliarella e Muriel. Soredut il prin al mostre di jessi in grande forme, cuntune acrobazie che e ven blocade di Karnezis, cuntune travierse cjapade cuntun biel tîr di prime intenzion  di vincjecinc metris di distance e cuntun altri tîr, che al finìs fûr de puarte, ator de mieze ore di zûc. Muriel si lu viôt ae fin dal prin timp: suntun cross golôs di Soriano, il colombian al tocje cul cjâf ma le tire masse alte.

Muriel al rive a segnâ, cul jutori involontari di Armero, dome tal minût 12 dal secont timp. Propit Armero, juste sul imprin de seconde frazion al veve fat un golon, che però nol è stât convalidât di Russo par vie di un fal di Thereau su Ranocchia. La Sampdoria, in vantaç, e cjape il svol su lis alis di Quagliarella e Soriano, inta che l’Udin al patìs la pression aversarie, che te ultime part de gare si zove ancje dal contribût di Cassano, metût dentri di Montella al puest di Muriel.

Al rive cussì il doi a zero, segnât di Fernando che al siere une biele iniziative imbastide di Cassano e Quagliarella. Finalmentri l’Udin al à un scat di caratar e di braùre e al prove l’assalt finâl par dreçâ la partide, ma nol rive a cambiâ ni il risultât ni i ecuilibris, stant che la Sampdoria e rispuint in cuintripît e tal ultin Quagliarella al mangje une ocasion di aur.

Si sperave che la tierce partide cu la vuide tecniche di De Canio e les miôr, pal zûc e pa risultât. Alc nol à funzionât tal centricjamp, sei in cuvierzidure che in impostazion. Tal secont timp la scuadre e je someade un tic smamide, ancje se in cundizions miôr di tantis partidis de ete Colantuono.

L’incuintri di Gjenue al podeve lâ miôr, ma al podeve lâ ancje piês, se chei altris risultâts des scuadris che si cjatin in code a fossin stâts diferents. La prossime partide in cjase cul Chievo e sarà determinante, no dome pe trancuilitât in classifiche ma ancje par viodi se  e je stade parade vie pardabon chê maledizion clamade Dacia Arena.

Udinese – Napoli 3-1

keep-calm-and-fuarce-udin-2

La robe juste te zornade juste. Ai 3 di Avrîl, Fieste de Patrie dal Friûl, e cuintri de seconde fuarce dal campionât, il Napoli, l’Udin finalmentri al zuie, al scombat e al vinç. E al va indenant inte so lote par no sbrissâ in serie B.
La maledizion clamade Dacia Arena e ven esorcizade des rimis par furlan di DJ Tubet prime de partide e po de scuadre blancje e nere che, vie par dut il timp regolamentâr,  comprendûts i minûts di recupar, e mostre di vê cûr, gjambis e sintiment.

Chê di vuê le calcolìn dome che une cerce. O sperìn propit che la animazion par furlan e deventi normâl alì dal Stadi Friûl e che l’Udin al spessei tal indotâ l’implant di chê segnaletiche plurilngâl prometude ancjemò ae fin di Otubar e tal doprâ la lenghe furlane te sô comunicazion istituzionâl parcè che dut chest al è ben, al conven e al puarte bon. In chestis cundizions, cence montâsi il cjâf, l’Udin al pues zuiâ, jonzi bogns risultâts e vê un rapuart plui strent e plui cjalt cul teritori e cu la sô int.

FuarceUdinees

De Canio al mande in cjamp une scuadre ecuilibrade, cu la difese a trê di Danilo, Felipe e Heurtau, cu la linie mezane cun Kuzmanovic, Badu, Widmer e Armero, cun Bruno Fernandes daûr des pontis e cu la cubie di atac formade di Thereau e Zapata. Denant daI Napoli di Higuain, Callejon e Insigne i blancs e neris a tegnin bot: si sierin ben indaûr, cun Kuzmanovic che al fâs di baridure e che al rispuint cu la impostazion dal zûc de scuadre furlane, cun Badu e Widmer che a sburtin e cul dinamisim di Bruno Fernandes e Zapata.
A rivin cussì l’intervent iregolâr in aree di Koulibaly su Badu e il rigôr tirât dal portughês dai blancs e neris: gol, un a zero.

Il vantaç al è meretât e l’Udin al à une altre ocasion ancjemò cun Bruno Fernandes, che al tire fûr bersai. Il Napoli al reagjìs, ma al fâs fature a rivâ des bandis di Karnezis.

A fuarce di dâi, però, Higuain al à la bale buine e al segne: nuie ce fâ pal puartîr grêc. Il Napoli nol à nancje il timp par fâ fieste che si cjate un altri viaç in pericul, cun Widmer che al jentre te aree e al ven butât jù: Irrati al sivile un altri penalty, Fernandes al tire e Gabriel al pare, intant che Sarri al cjape un cartelin ros par vie des sôs protestis.

bandieris-friuul

Il prin timp al viôt ancjemò l’Udin dongje dal vantaç: un biel cross di Badu par Zapata, une biele conclusion dal colombian suntun cross di Thereau e po, prime de polse, un cross di Zapata par Fernandes, che in acrobazie al mande il balon in puarte, cussì i blancs e neris a sierin il prin timp in vantaç.

Il secont timp si vierç cul Napoli indenant. I ospits a sburtin e a masanin zûc, ma no rivin a jessi pericolôs, intant che l’Udin si difint ma nol è par nuie passîf o in dificoltât. Al rive cussì il gol dal trê a un: slalom di Widmer su la corsie di diestre e cross tal mieç par Thereau che al è tal puest just tal moment just e al segne.

udin_neri

I blancs e neris a metin il sucès in cassefuart. Il Napoli al prove ancjemò a puartâsi al atac, ma nol rive a produsi alc e ce. De Canio prime al cambie Zapata cun Matos par dâ gnovis energjiis ae prime linie e no lassâur cjamp ai aversaris, po al rinfuartìs la difese cun Piris al puest di Armero e tai ultins dîs minûts al met dentri ancje Perica par fâi cjapâ flât a Thereau.

Il Napoli al prove ancjemò a fâsi viodi des bandis di Karnezis, ma i mancjin la luciditât e la precision che a coventin e lis ocasions di gol a son dome dôs: un tîr cul cjâf di Hamsik e une conclusion di Insigne. Che lis robis no ledin ben pai ospits lu conferme la rabie di Higuain che al cjape il secont cartelin zâl e al reagjìs in maniere pesante. Di chê altre bande, il timp al passe e si slungje – sîs minûts di recupar – ma i blancs e neris no pierdin il cjâf. E a vincin la partide.

Il risultât just te zornade juste.

Sassuolo – Udinese 1-1

udin_neri

Alc al è alc e nuie al è nuie. La prime partide dal Udin vuidât di Gigi Di Canio si siere miôr des ultimis de ete Colantuono. A Reggio Emilia i blancs e neris no pierdin, a riscjin di vinci e ae fin a puartin a cjase un pontut che nol zove masse, cjalant la classifiche, ma almancul, ancje in graciis dai risultâts di Sampdoria e Palermo, i permet ae scuadre di balon furlane di no impantanâsi ancjemò di plui e di sintîsi un tic plui “vive” e un tic plui “scuadre”.

Vie pal incuintri l’Udin al à mostrât alc di plui e di miôr rispiet ae tendince dai ultins mês soredut tal prin timp, cuant che la formazion blancje e nere e je stade ordenade e dinamiche e dopo jessi passade in vantaç e à mantignût il control de partide, cui aversaris in dificoltât. Tal secont timp il Sassuolo al à fracât il pedâl dal aceleradôr, al à vuadagnât teren e al à costruît plui zûc e plui ocasions, cui blancs e neri che a àn patît la incressite de pression ofensive dai parons di cjase.

L’Udin al partìs cuntune linie difensive a trê, cun Danilo, Felipe e Heurtaux, une linie mezane a cuatri Widmer, Kuzmanovic, Hallfredsson e Armero, e cun Bruno Fernandes daûr des dôs pontis Thereau e Zapata. Il Sassuolo al mostre di jessi une scuadre ecuilibrade, ma e reste un tic sturnît denant de convinzion palesade dai ospits. Dopo vot minûts di zûc Felipe al siere ben suntune conclusion di Defrel, intant che la azion seguitive dal Udin si siere inte maniere miôr: cross di Thereau e tîr di prime intenzion di Zapata che al sbude la puarte difindude di Consigli.

A passin i minûts e la scuadre furlane e justifiche il so vantaç: si difint ben denant dai tentatîfs di atac metûts dongje dal Sassuolo e al rispuint ben, sburtât di Widmer, cun Kuzmanovic e Hallfredsson che a sierin ben tal mieç dal cjamp e a inviin cualchi buine combinazion ofensive. Prime de fin dal prin timp Felipe cul cjâf al impegne in maniere impegnative Consigli, che al rive a meti un blec e po al è Widmer a cjatâsi une altre biele ocasion par dopleâ il vantaç, ma un pôc al è brâf il puartîr vert e neri e un pôc i mancje fredece al zuiadôr svuizar.

Tal secont timp il Sassuolo al partìs cun plui decision, ma l’Udin al ten bot e al rispuint in cuintripît cun cualchi biele combinazion. Dopo di un cuart di ore Widmer al fâs un cross par Zapata che però nol rive a profitâ.
Di Francesco al zuie la cjarte Falcinelli, che al jentre al puest di Pellegrini e al cjape puest dongje di Defrel. Al rive cussì il gol di Politano che, suntun cross precîs di Vrsaljko, al segne l’un a un, zovantsi di une mieze durmide de difese.

Il Sassuolo al sburte par ribaltâ il risultât e si fâs ancjemò pericolôs des bandis di Karnezis cun Politano, intant che De Canio al cambie Zapata cun Di Natale, Thereau al à une bale buine par tornâ a vierzi la partide, ma al tire fûr, e i parons di cjase si puartin ancjemò al atac.
Cussì la partide si siere sul un a un. Un gol e un pont par om che a son masse pôc rispiet a ce che al covente – al Udin pe salvece, al Sassuolo pe Europe  – ma a son il risultât plui just. Alc al è alc e nuie al è nuie.

Udinese – Roma 1-2

udin_neri

La maledizion clamade Dacia Arena e va indenant, ancje in cjase. Dopo vê pierdût la setemane stade cuintri dal Frosinone, l’Udin di Colantuono al piert ancje cuintri de Roma, che cussì e segne la otave vitorie consecutive intal campionât.
Tal prin timp l’Udin al subìs ad in plen la supremazie dai ospit; tal secont al fâs alc di plui, ma ancjemò masse pôc par mostrâ di vê il cûr, il cerviel, lis gjambis e il snait che a coventin par zuiâ di balon in gjenerâl e ancjemò di plui par scombati par no sbrissâ in serie B, intune domenie là che la vitorie dal Carpi cul Frosinone e alce la cuote salvece e e fâs svicinâ inmò la zone retrocession.

I blancs e neris si presentin tal cjamp dal Stadi Friûl (e vonde: ancje se i media talians e la stesse societât Udinese a van indenant doprant une altre denominazion) cuntun 4-3-3 fals, stant che di pontis efetivis a’nd è dome une, Thereau. Cun di fat ni Bruno Fernandes, che al è vonde atîf tal meti in conession la prime cu la seconde linie, ni Edenilson, che al zuie une partide che e va daûr dal so standard piês, no son atacants vêrs. La linie mezane e viôt Lodi a direzi e Badu e Halfredsson in fase di interdizion, intant che daûr Widmer al è l’esterni di diestre, cun licence di sburtâ indenant, tal mieç a son Danilo e Felipe e a çampe al è Ali Adnan.

In teorie e varès di jessi une scuadre eculibrade, in stât di fâi cuintri a une siore Roma, no dome cun chê di ridusi l’impat dal atac zâl e ros, ma ancje par provâ a jessi pericolose des bandis di Szczesny. In pratiche tal cjamp si viodin dome i romaniscj, che a van dongje dal gol za dopo trê minûts cun Dzeko, che cul cjâf al disfrute un cross di El Shataawy (ma Karnezis al pare), e che a disvilupin un zûc ordenât, concret e dinamic, che ju puarte a vierzi lis segnaduris al cuart di ore dal prin timp propit cun Dzeko, dopo di un tentatîf di Perotti mandât in corner dal puartîr blanc e neri e prime di une altre conclusion di Salah.

L’Udin al reagjìs cemût che al rive: al fâs pôc o nuie, a part cualchi iniziative individuâl di Bruno Fernandes, che al veve provât a tirâ in puarte, ma cence precision, ancjemò prime dal gol di Dzeko. La Roma no si scompon e e continue a fâ il so zûc, che al prodûs altris conclusions di Dzeko e di Perotti, intant che l’Udin si fâs viodi des bandis di Szczesny dome cuntun tîr di Lodi.

Tal secont timp i blancs e neris a partissin cuntune marcje in plui, stant che cun Zapata a vuadagnin pês in atac. Dopo trê minûts Bruno Fernandes i da la bale buine a Thereau pe prime vere ocasion dal Udin di dute la partide: il francês al tire in puarte e Szczesny si salve in corner. Te azion seguitive al è Zapata che al tire cul cjâf, ma al cjape il pâl, intant che i blancs e neris a mantegnin almancul par un pôc une tension ofensive preseabile, cul sburt di Widmer e Ali Adnan che a partissin di lontan su lis corsiis esternis, cu la interdizion di Badu e Halfredsson e cu lis conclusions di Thereau e Bruno Fernandes.
La Rome si difint e si organize te fasse mezane, cun chê di no pierdi il control de partide, di alçâ la sô linie di zûc e di tornâ al atac, cul risultât – dopo di une ocasion mancjade di Badu – di fâsi vive des bandis di Karnezis cun El Sharaawy e cun Perotti.

Al somee che la cundizion de Roma e ledi al mancul e che i  ospits a e sintidin il pês de partide cul Real Madrid, ma l’Udin nol rive a profitâ dal moment e cussì e rive la seconde segnadure romaniste cun Florenzi. Pai blancs e neris la situazion si fâs grivie e penze e il public di cjase al sivile smonât e avilît. Al rive il gol Bruno Fernandes e si impie une flamute di sperance, che però si distude cuntun tîr fûr bersai di Matos e cu la conclusion de partide.