Cagliari – Udinese 4-3

udin_neri
L’Udin al piert ancje la ultime di campionât e al finìs la stagjon te cuintultime posizion a cuote cuaranteun ponts. Salacor lis brutis gnovis che a rivin dal incuintri di domenie alì dal stadi Sant’Elia a finissin achì. Prin di dut parcè che il campionât al è finût e cun chel l’aviliment des ultimis setemanis e parcè che al à vinçût il Cagliari, che al è une scuadre che nus plâs e che almancul al salude la serie A cuntun sucès. Cun di plui par vie dai siet goi segnâts intes dôs puartis – in cualchi maniere un spetacul – e parcè che si à viodût alc di gnûf in cjamp e fintremai – tal secont timp – doi zuiadôrs furlans, tant che il portîr Scuffet, che magari cussì nol à finût i siei disenûf agns inte maniere miôr, e l’atacant Pontisso, jentrât dopo dal interval al puest di Perica.

A pôcs dîs de fin dal campionât si sa za che Stramaccioni nol sarà plui l’alenadôr dal Udin e che il so puest lu cjaparà Colantuono. La gnove de fin dal rapuart tra il tecnic roman e l’Udin e zirave tal ambient zaromai di cualchi setemane: stant che o vin viodût une scuadre masse dispes flape, difensiviste e cence zûc, chê de conclusion de ete targade Strama no nus somee une brute gnove. Nancje la rivade a Udin dal tecnic che chest an al à vuidât la scuadre che e à finût la stagjon te cuartultime posizion – la Atalanta – no nus somee alc e ce, cundut dai coments positîfs di tancj di lôr, a tacâ dal vecjo mister Galeone e dal gjornalist Xavier Jacobelli.
Probabilmentri, in ducj i doi câs, la posizion finâl in graduatorie des scuadris e dipent soredut dai zuiadôrs. Par sigûr nus tocje ameti che tal Udin di chest an lis risorsis umanis metudis tal cjamp – la plui part di lôr – no vevin dutis lis cualitâts che a coventin  (o ben no lis àn mostradis e almancul in cualchi câs la responsabilitât di chest e va ricognossude dute al alenadôr). Sperìn che pe anade che e ven la societât e meti adun une scuadre cun plui cûr, cun plui flât, cun plui gjambis, cun plui pîts e cun plui snait.

La partide di domenie stade e tache di rive sù pai blancs e neris, par vie dal infortuni patît tal prin minût di Wiedmer. Il Cagliari al somee plui in partide e la sô prime conclusion le cjate dopo dîs minûts: tîr di Joao Pedro e parade di Scuffet. Trê minûts plui indenant al rive il gol di Sau e prime de metât dal prin timp il Cagliari al fâs il bis cuntune punizion di Joao Pedro. L’Udin al rive a smiezâ lis distancis prime dal interval cuntune biele conclusion di Aguirre su assist di Bruno Fernandes. Alc al è alc.

La seconde frazion si vierç cuntune ande avonde flapute di dutis dôs lis bandis. Tal desert gjenerâl un dai miôr al è Bruno Fernandes che al met dongje ideis e cuantitât. Il timp al passe cence masse emozions e dome tai ultins vincj minûts la partide e torne a scjaldâsi, prime par merit dai sarts, cun Cop che si cjate di bessôl denant di Scuffet ma nol rive a concludi te maniere juste e po cun Mpoku che al segne il tierç gol, e po par merit dai blancs e neris, che a cjatin il doi a trê cun Bruno Fernandes. Cualchi minût plui indenant al è ancjemò lui il protagonist, ancje se magari cussì no tant che autôr di un autogol cuntun brut intervent suntun cross cence storie di Murru.  Pal Udin al segne ancjemò, te puarte juste, Thereau, che al siere te maniere miôr une triangolazion cun Pasquale, e al firme il risultât finâl.

Advertisements

Udinese – Sassuolo 0-1

udin_neri
Mâl e vonde. La ultime partide in cjase dal Udin e je il spieli di dut il campionât di chest an, là che la salvece e je rivade par ordin ma cuasit plui par vie dai demerits di altris che par merit dai blancs e neris, là che in masse ocasions si à viodude une scuadre smamide, flape e confondude e là che dome in cualchi ocasion – masse pocjis – al è saltât fûr alc di verementri bon, almancul daûr di une cjaladure furlane.

Ae vilie de partide cul Sassuolo si spietavisi dal Udin une prove di caratar e di personalitât, dopo de gare cun dôs musis zuiade a Rome la setemane stade e di chê pardabon negative fate in cjase cuintri de Sampdoria. Si à viodût dome alc: masse pôc par fâ risultât e masse par fâ cressi ancjemò l’aviliment.

L’Udin al scomence avonde ben, al cjape sù la iniziative e al rive ancje a rindisi pericolôs des bandis di Consigli. Al sucêt dopo cinc minûts di zûc cuntun lanç di Karnezis che Badu al stramude intun assist par Perica, ma la robe e va strucje par vie dal bon intervent di Acerbi. I ospits si difindin cun ordin e cun sintiment e a rispuindin in cuintripît, metint in moviment lis trê pontis dal lôr schiriament. La ocasion plui pericolose e rive ator de mieze ore cuntune verticalizazion di Biondini a pro di Zaza che al tire fûr bersai.

Doi minûts plui indenant Karnezis al scuen lassâ il cjamp, par vie dai efiets di un colp cjapât di Floro Flores. La sô sostituzion e je un moment impuartant sei pal batiman cjalt, sincîr e meretât che il public dai Riçs al fâs al portîr grêc, che al è stât par sigûr un dai miôrs dai blancs e neris vie par dute la stagjon, sei pal fat che cussì al à tornât a zuiâ Scuffet, che al è stât simpri in banchine dal principi dal campionât. Po e rive ancje la ocasion plui nete pai parons di cjase: corner di Kone e acrobazie di Danilo che e ven tocjade di Consigli e e va a sbati su la traverse. E prime dal interval al è Scuffet che al fâs il numar cuintri di un tîr a colp sigûr di Zaza.

Tal secont timp, il Sassuolo, che prime de polse al veve domandât un penalty par un contat tra Allan e Bernardi, calcolât dal diretôr di gare tant che une simulazion dal emilian, al frache sul acelerafôr, cuntun pâr di cumbinazions ofensivis che a marchin la diference di gjambis, di zûc e mentalitât tra il coletîf di Di Francesco e i zuiadôrs alenâts di Stramaccioni. Prime al è Zaza e po al è Floro Flores che si fasin vîfs in zone gol, intant che di chê altre bande l’inest di Di Natale al puest di Perica al puarte Totò dongje dal so gol numar 208, cuntune pinelade che e ven fermade su la linie de puarte de bande di Cannavaro.

La ocasion pierdude e segne un svolt tal davuelziment de partide, stant che par passe mieze ore l’Udin al disparìs – o cuasit – e il Sassuolo al à la pussibilitât di masanâ chês azions che a coventin  par cjapâ in man ad in plen la partide. Dopo di un intervent suspiet (cu la man?) di Pelusi te aree dai ospits, al setantesim al rive il gol che al decît la partide: cumbinazion tra Floro Flores e Berardi e servizi a pro di Manganelli, che al tire in puarte di prime intenzion e cu la sô bombe ben confezionade al rive a superâ Scuffet.
L’ultin cuart di ore al viôt ancjemo il Sassuolo protagonist des bandis di Scuffet, intant che pal Udin la croniche e regjistre dome la espulsion par dople amonizion di Guilherme.

Al mancje ancjemò une partide e po il campionât al finìs. Al vignarès di dî: finalmentri…

Roma – Udinese 2-1

udin_neri

L’Udin al prove a fâ la biele magjie di dâi un displasê ae «Maggica», al zuie cuntune determinazion che e je superiôr ae medie des sôs prestazions di chest an – magari cussì no, par chest nol covente nancje tant… – ma dopo vêur fat pôre a Totti e compagnie al va al mancul e al paie a un presit altonon un brut erôr di Widmer, dongje di patî a fuart il snait e la costance dai aversaris.

La fortune e jude chei che a son ardîts e coragjôs e cussì sù par jù ae metât dal secont timp la Rome, che ae fin de partide e varà fat in dut disevot tîrs in puarte cuntun possès di bale par doi tierçs dal timp di zûc, e cjate la strade de vitorie suntune sagre dai erôs, che a son sôs – il cross di Nainggolan nol è alc e ce – e soredut de scuadre di balon furlane, tra la buse grandonone di Herteaux e il «superliscio» di Widmer, che i lasse a Torosidis la bale di butâ dentri tal sac.
Cussì la Rome si merete il sucès e l’Udin al pues dî che al varès vût di puartâ a cjase almancul un pontut, la atenzion dai media talians e je dute sul derby roman che al deciderà il secont puest in classifiche e ai tifôs furlans ur reste il dubi se jessi braurôs pal caratar de lôr scuadre, soredut tal prin timp, o vê aviliment pai erôrs decisîfs, pal campionât flaput, pe tatiche rinunciatarie, pe posizion in graduatorie e pe pôre che l’an che al ven al sedi compagn o ancjemò piês.

Par ce che al tocje la cronache, la partide di nossere e partìs avonde ben pal Udin, stant che i romaniscj a somein imberdeâts, tra tante voie di fâ, ancjetante pôre di sbaliâ e une cierte organizazion di zûc, in clâf difensivistiche cun chê di rispuindi in cuintripît, de bande de scuadre di Stramaccioni. Denant di une Rome confondude, seneose e spauride, i blancs e neris – che a lassin Di Natale in bancjine – a rivin a segnâ dopo vincj minûts cuntune percussion di Thereau che al robe la bale a Manolas e soredut cu la corezion in puarte di Perica dal balon parât indaûr di De Sanctis.

Totti al cîr di sburtâ i siei compagns, ur dîs di no vê pôre e ur conte che a fasaran cuatri goi, ma pe plui part dal prin timp al è l’Udin a jessi plui atent e plui pericolôs: une punizion dal Pupone e cjate Karnezis tal puest just tal moment just, intant che di chê altre bande Widmer al servìs un balon golôs pal cjâf di Perica, che lu mande fûr di un et, e Allan al met la marcje juste par colpî in cuintripît. La intenzion e je buine, la realizazion dal passaç par Thereau mancul e la cuvierture su la gnove manovre romaniste e lasse masse busis viertis. Al rive cussì l’un a un: Totti al vierç par Pjanic e chel al salte Piris e al libere Nainggolan, che al cjate la strade libare par segnâ.
Ma a son ancjemò emozions, prime de polse, massime cuant che Guilherme al tire une bombe su punizion, che e lasse De Sanctis incocalît ma e sbat su la travierse.

Il secont timp si vierç sù par jù cun chê stesse ande: Udin «barricadero» daûr e pront a rispuindi di rimesse cun Thereau e Rome simpri seneose ma ancjemò un tic imbalade. Però sul plui biel che la scuadre furlane si svicine al doi a un – cun Allan che al piert il moment bon suntun assit di Thereau  – la Rome e pescje il jolly, stant che in mancul di doi minûts la bale e je inte aree dal Udin, là che e ven maltratade dal puar Widmer dut a pro di Torosidis che nol à fastidis par segnâ.

La partide si stramude e cun chê la Rome, che e cjate l’ordin e la precision che i mancjavin vie pai sù par jù sessantecinc minûts za zuiâts e che si met a costruî azions di gol bielis  e buinis, a tacâ dal colp cul tac di Nainngolan che Karnezis al mande a sbatis sul pâl e dal tiron di Holebas, che al cjape la travierse.
L’Udin si eclisse, nol rive a reagjî e al reste in zenoglon, cul displasê di vê paiât cjars doi bruts erôrs – soredut chel che al devente il secont gol romanist – e forsit cu la braùre di vêi fat pôre a chê che e je la seconde fuarce dal campionât.

Udinese – Sampdoria 1-4

udin_neri
Cuatri patafs. L’Udin in cjase al zuie pôc e mâl e i permet ae Sampdoria di jessî fûr dal Stadi Friûl cuntune vitorie meretade e preseose. Si pues strucâ cun chestis peraulis la partide di îr che e je stade biele dome par une des dôs formazions.

Di une bande e je la scuadre di Stramaccioni, che no à ni snait, ni zûc e ancjemò mancul motivazions  – cun dut che fâ une biel epartide in cjase in continuitât cu lis ultimis discretis prestazions al varès di jessi za avonde…o no? – e di chê altre si cjate chê di Mihalovic, che e à une voie mostre di saltâ fûr di un pocjis di ‘zornadis no’ e duncje di rivâ ancjemò a grampâsi a un dai vagons dal tren che al puarte te Europa League.

Che la situazion e sedi cheste si lu viôt a clâr za tal prin timp. In principi dutis dôs lis contendentis a àn une ande calme se no flape, po cul passâ dal timp i ospits a cressin chel pôc che al covente par cjatâ scuasit par câs il gol che al vierç la liste des segnaduris: Guilherme al pastroce e la iniziative di Wzosek e devente un gol par Soriano.
Ben sierade daûr e vivarose ce che al covente denant, la Samp no si scompon denant dei tentatîfs une vore limitâts dal Udin di imbastì un straç di azion – Nuie Allan… nuie zûc, compagn di chel innomenât aperitîf che, cence di chel, no jere fieste! – e la uniche conclusion de scuadre di balon furlane e je chê di Kone.

Tal secont timp si spietisi une reazion blancje e nere. Impen a son i ospits chei che a cjapin sù la iniziative: Muriel al cor intune maniere che no lu vevin mai viodût cuant che al jere tal Udin, Soriano al fâs ancjemò miôr e Duncan si svicine al doi a zero cuntune conclusion che finìs sul pâl.
L’Udin, che si salve cun Domizzi suntune altre conclusion di Muriel, si fâs viodi un pôc plui indenant, finalmentri: Thereau, che al à cjapât il puest de fantasime di non Geijo, al segne un gol – anulât par vie di un fûr zûc une vore discutibil di Aguirre – e Widmer al cjape un pâl.

Alc al è alc e nuie  al è nuie, ma chel alc che al fâs l’Udin al è masse pôc rispiet a ce che e cumbine la Samp, che si zove ancje de energjie gnove che e rive de jentrade tal cjamp di Djordjevic, e cjate daurman la strade pal secont gol di Soriano e po pal tierç, firmât di Acquah.

L’onôr blanc e neri al ven salvât de bande di Di Natale – protagonist de fieste fate prime de partide pai siei 206 goi in Serie A – che al alce ancjemò la aste dal so record personâl, rivant a cuote 207,  cuntun tîr dai undis metris ben plaçât daûr di Viviano.

Magari cussì no, al è masse pôc. Prime de fin de partide lu conferme ancjemò la Samp, che cuntune conclusion di Duncan e fâs il so poker.

 

Verona – Udinese 0-1

fuarceudinees

L’Udin al vinç, al vinç cuintri dal Verone e al vinç a Verone, pe prime volte te sô storie in Serie A. Al bastarès chest par jessi contents, ma la partide di îr e regale ancjemò altris sodisfazions, a tacâ dal gol di tac di Di Natale, che al è biel, al è decisîf e al certifiche il superament di Roberto Baggio te classifiche dai realizadôrs di simpri tal campionât talian plui impuartant, e de prestazion positive de scuadre, che e somee vê intivât finalmentri la strade juste par zuiâ in maniere dignitose e rivâ a fâ risultât. Al reste dome un motîf di aviliment: a son ancjemò chei che a fevelin di cheste partide tant che «derby triveneto» o dal so andament tant che afermazion dal «dominio territoriale in area triveneta», cemût che o leìn cun maluserie achì.

Il print timp si vierç cu lis dôs scuadris disponudis ben sul plan tatic e cuntune buine determinazion agonistiche. Sul imprin l’Udin al somee plui decîs, stant che tal zîr di pôcs minûts al rive a fâsi viodi des bandis di Benussi e fintremai al segne un gol – anulât par offside – cun Thereau, che te prime linie si cjate in compagnie di Perica, intant che Di Natale al ven tignût in bancjine.
Cul passâ dal timp il Verone al vuadagne teren e si puarte al atac e si sivicine al gol: al cjape la travierse cun Tachtsidis al prin cuart di ore di zûc e plui indenant al buris fûr une biele conclusion di Jankovic.
L’Udin al ten bot, al rispuint dilunc des fassis laterâls cence rivâ a jessi masse pericolôs, fale che cuntune conclusion di Perica, e tal cont des ocasions dal prin timp al jentre ancjemò un tîr di Lopez che al finìs te bande esterne de rêt.

Te seconde frazion la ande e je sù par jù compagne: ritmi discret e un pâr di ocasions par om, a tacâ di une iniziative di Thereau fermade di Benussi e di un tîr di Toni fûr bersai di pôc. Passât un cuart di ore di zûc dopo dal interval al rive il (dopli) svolt de partide: Stramaccioni al mande in cjamp Di Natale al puest di Perica e l’arbtri Cervellera al bute fûr cuntun cartelin ros il veronês Sala.
L’Udin al à Totò in plui e il Verone un zuiadôr di mancul. Al rive cussì il gol dai blancs e neris: Thereau al libere su la corsie a man drete Widmer, il svuizar al cor decîs e le met tal mieç de aree par Di Natale e cul tac al mande la bale dongje dal pâl plui lontan. Nuie ce fâ par Benussi.

Il Verone al patìs il colp ma al prove daurman a risupindi. La sô e je une reazion di sostance, che e domande atenzion de bande de scuadre furlane, cun Karnezis suntun tîr plaçât di Marquez cun Piris che al salve su la linie suntune conclusion di Toni.
L’Udin no si limite a cirî di no vê dams, ma al rispuint cun chê di disfrutâ inte maniere miôr la superioritât numeriche. Thereau al è il protagonist principâl con trê conclusions – une di chês e cjape il pâl – ma si fasin viodi in zone Benussi ancje Widmer, Allan, Bruno Fernandes e ancjemò Di Natale, che però no rivin a fâ il gol de sigurece, intant che il Verone al cale, par vie de inferioritât numeriche che tal ultin e devente di doi oms, cu la espulsion di Marquez par dople amonizion.

La prossime partide in cjase cu la Sampdoria e je la ocasion  pal Udin di mostrâ pardabon che alc al è cambiât tal cjâf, tes gjambis e tal cûr dai siei zuiadôrs.  Par intant si gjoldìn il superament de cuote 40 e dut il rest, di bon, che nus à dât la partide dal Bentegodi.

Udinese – Inter 1-2

udin_neri

Trê goi fats ma ancje siet amonizions, dôs espulsion, diviersis ocasions di gol e un grum di emozions. Chê di nossere a Udin e je stade une biele partide, soredut parcè che la scuadre di balon furlane e à zuiât cun snait, cun voie e cun energjie, salacor miôr che cul Milan, e che di chê altre bande e à cjatât une scuadre in cundizions miôr – ma no i coventave tant… – di chê di Inzaghi. Magari cussì no, al jere ancje l’arbitri Rocchi, che un  pôc al à stiçât il gnervôs dai blancs e neris e un   pôc ju à punîts in cualchi câs cun masse severitât, cussì di lassâ la formazion di Stramaccioni cuntun om di mancul za tal prin timp e par passe mieze ore zûc fintremai in nûf. In chestis cundizions l’Inter, che al è rivât a Udin cun chê di provâ a vinci, stant che e jere la uniche maniere par no pierdi dal dut la strade de Europa League, al à rivât a fâ il risultât plen, ancje se al à scugnût spudâ balins.

Il prin timp si vierç cui ospits che a somein vê voie di atacâ e cul Udin, cu la tierce linie a cuatri, che al ten bot, cence fastidis e anzit che al rispuint cun plui energjie. Il merit al è des iluminazions di Allan e di ciert dinamisim di Thereau e Di Natale che a fasin un tic di pôre ai difensôrs interiscj.
La scuadre di Mancini e cres te fase centrâl dal prin timp, soredut cun Hernanes che al cjante e al puarte la crôs e cun Guarin che al sburte inte zone difindude di Piris. Cinc minûts prin de fin de prime frazion al rive il prin svolt de partide, cun Domizzi – che al veve za cjapât une amonizion par vê protestât cuintri di un corner inesistent – che al bute jù Hernanes e al ven butât fûr de bande di Rocchi. Stramaccioni al scuen inventâsi alc par zuiâ cuntun om in mancul: fûr Guilherme, dentri Pasquale e Piris spostât tal mieç di tierce linie.

La seconde frazion di zûc e je chê dal spetacul, des emozions, des sodisfazions e, pal Udin, ancje dal marum. Dopo doi minûts, suntun contat tra Danilo e Kovacic, l’Inter al vuadagne un rigôr, che al somee discutibil e al discjadene lis protestis furlanis: Icardi al tire dal discut e al segne l’un a zero.
L’Udin nol mole e i bastin dome doi minûts par tornâ a cjapâ il vantaç dai aversaris: assist di Allan par Di Natale che al salte Vidic e al segne il so gol numar 205 in serie A, compagn di Roberto Baggio.
L’Inter al patìs il colp, ma al prove di istes a masanâ zûc, intant che l’Udin si cjate a scombati cun Rocchi, che prime al amonìs Badu e po i da ancje il cartelin ros.
In undis cuintri nûf, pai ospits e devente di rive jù: Stramaccioni al gjavee Di Natale e al met dentri Kone, intant che l’Inter al costruìs cualchi biele ocasion ma no rive a disfrutâle ad in plen, ancje par merit di Karnezis. Mancini al pescje il jolly cuant che al cambie Guarin cun Podolski, stant che al è propit il todesc chel che al cjate daurman la ocasion juste par segnâ.
L’Udin, sot di un gol e cun doi zuiadôrs in mancul, nol mole: al ten dûr indaûr cun Karnezis e al sburte anejmò indenant, par cirî chel doi a doi che al podarès rivâ ae fin cun Perica, ma D’Ambrosio al met un blec.

Pecjât pal risultât finâl. Al reste il batimans meretât pai blancs e neris e ancje chel pai siei tifôs, che a sivilin cuant che al covente – e magari cussì no chest an lis ocasions no son mancjadis – ma a  mostrin ancjemò di savê cuant che la scuadre e zuie e e reagjìs. Cence dismenteâ la sodisfazion pal gon numar 205 di Totò.

Udinese – Milan 2-1

fuarceudinees

Une biele Fieste de Liberazion ancje alì dal Stadi Friûl. Dongje des gnovis interessantis che a tocjin lis celebrazions dai 25 di Avrîl di chest an in Friûl, che a saran argoment di un articul specific tal nestri blog, chê di sabide stade e je stade une zornade di fieste ancje par vie di ce che e à fat la scuadre di balon furlane, che in cjase e à zuiât avonde ben e e à vinçût ancjemò miôr cuintri dal Milan.

Dopo des ultimis prestazions fatis, che a clamâlis flapis si ur fâs un compliment, l’Udin al torne a mostrâ chel caratar e chê cualitât che masse voltis vie pal campionât al à dismenteât tai camarins. La scuadre di Stramaccioni e à zuiât cun snait e cun personalitât dal principi ae fin de gare e no i à lassât nissun spazi di espression a di un aversari che, tra lis altris, un pôc ae maniere dal Udin des partidis cuintri dal Parma e dal Palermo, al à mostrât di jessi cence cûr, cence gjambis e cence cerviel. E je finide 2 a 1 pai parons di cjase, ma il botin pai blancs e neris al podeve jessi ancjemò plui corpôs, daûr de cualitât e de cuantitât dal zûc produsût.

L’Udin al partìs ben e il Milan si sfante daurman, sot de pression de formazion furlane, che  si svicine des bandis di Diego Lopez in plui ocasions. Il puartîr milanist – il miôr de sô scuadre – al interven in plui ocasions, a tacâ di une biele conclusion dal limit di Di Natale. Plui indenant a rivin  i tîrs di Geijo, di Badu e di Widmer e diviers corners vuadagnâts cul meti adun azions corâls coordenadis di Allan che a oblein i difensôrs dal Milan a salvâsi cul butâ fûr la bale.

Propit di un cross de bandierine, dentri dal prin cuart di ore dal secont timp, e rive la bale juste par Pinzi che al segne cence fastidis e al bute in zenoglon la scuadre aversarie, che prime dal interval e veve metude la bale in rêt cun Antonelli, ma il gol nol jere stât fat bon par vie di un sburt iregolâr cuintri di Widmer.

L’Udin no si sente sul vantaç e al continue a zuiâ, intant che il Milan nol rive a imbastî nissune reazion che si puedi clamâle cun chest non. Al rive cussì il gol di Badu su assist di Guilherme, dopo che Di Natale al veve impegnât Diego Lopez cuntun biel tîr, e la partide si siere in maniere definitive, stant chela rêt di Pazzini a doi minûts de fin al rive cuasit par câs e nol va a tocjâ i ecuilibris di fonde de partide, là che si à viodût un Udin bon e un Milan inesistent.

Doman si torne a zuiâ in cjase cuintri dal Inter: e je la ocasion buine par viodi se il compuartament de scuadre e dal so alenadôr di sabide al è stât un câs o ben se al è alc che al pues permeti di finî in maniere dignitose une stagjon masse grise e pôc blancje e nere e salacor ancje di pensâ in maniere positive pal avignî e duncje pe prossime stagjon.

PS. Pe plui part di nô la 32esime zornade di campionât e je stade par sigûr positive no dome par vie de vitorie dal Udin ma ancje par un altri motîf: Forza Toro!!

Chievo – Udinese 1-1

udin_neri

Alc al è alc e nuie al è nuie. L’Udin al torne a cjase di Verone cence vê pierdût e cuntun pont  in plui in classifiche. Ae fin di une partide avonde flape e smamide, là che la scuadre di balon furlane e je lade ancje dongje de sconfite, no si pues pretindi di plui e duncje si scugne contentâsi.

Ae fin dal incuintri la paritât e je il risultât just e chel che ur va ben a dutis dôs lis scuadris, che a vuadagnin ancjemo une cuote di trancuilitât plui par demerit di altris formazions che a son za condanadis a lâ in serie B che par merit lôr e chest al vâl soredut pal Udin.

Cun Di Natale in bancjine, Thereau ponte uniche e i doi trecuartiscj Kone e Bruno Fernandes, sul imprin l’Udin al somee plui determinât a zuiâ al atac. Al è un nivel di determinazion une vore relatîf, stant che in principi il Chievo al reste sierât indaûr in spiete dai erôrs eventuâi dai aversaris, che in concret al prodûs un pâr di conclusions: une punizion di lontan tirade di Kone in maniere avonde pericolose par Bizzarri, ancje se e va fûr bersai, e un tîr di Allan parât de bande dal puartîr zâl e blu.
Il Chievo al rispuint cuntune iniziative di Radavanovic e po cuntune azion puartade indenant di Maggiorini dilunc de corsie di diestre: cross tal mieç de aree di rigôr, là che Pelissier si cjate tal puest just tal moment just e cun dut che nol tire masse ben – o forsit propit par chel – al rive a meti la bale tal sac cence che Karnezis al puedi fâ nuie.

Tal secont timp Stramaccioni al prove a cambiâ alc: al tire fûr Bruno Fernandes e al met dentri Geijo. La modifiche tatiche – dôs pontis e un trecuartist – no prodûs alc e ce stant che il Chievo al reste ben cuviert e alore l’Udin al zuie ancje la cjarte Di Natale, che al jentre tal cjamp e dopo pôcs  minûts al cjape un pâl cuntune bile conclusion. I minûts a passin cence cambiaments di sorte fintremai cuant che Cesar al interven malamentri suntun cross di Thereau e le bute dentri de sô puarte: un a un.
La partide si siere achì, ancje se tal recupar il Chievo al cjape un pâl cun Zukanovic. Un pont par om, un gol par om e un pâl par om.

O speravin miôr, e podeve lâ (ancjemò…) piês.

Udinese – Palermo 1-3

udin_neri

Mâl e vonde. L’Udin al somee fâ di dut par dâi reson a cui che al diseve che il piês nol à limits e cussì dopo vê pierdût cence zuiâ cuintri dal Parma al fâs sù par jù compagn ancje cuintri dal Palermo.
Nus plasarès pensâ che e sedi dome colpe di un fantomatic ‘fatôr P’, ma magari cussì no o vin viodût chel stes cine ancje in altris contescj…alfabetics. Cun dut achel, stant che magari dome une volte ogni tant la scuadre blancje e nere e à mostrât une muse miôr, o sperìn che rivi a dâsi une dreçade tes ultimis zornadis di campionât.

La partide di îr cuintri de scuadre siciliane, par dî la veretât, e veve tacât ancje avonde ben.
Cun di fat cun Di Natale e e Thereau te prime linie, cu la tornade in cjamp di Allan te fasse mezane, cu la propension ofensive tes corsiis laterâl di Widmer e Gabriel Silva e cu la difese a trê di Wague, Danilo e Piris, l’Udin al someave in stât di confermâsi tant che la ‘bestie nere’ dal Palermo. Dopo doi minûts di zûc e rivave ancje la conclusion blancje e nere: un tîr di Di Natale fûr bersai, che al sierave un cross di Allan.

Magari cussì no, al è dome un fûc di paie. La supremazie teritoriâl no je produtive e si sfante tal zîr di pôcs minûts, intant che il Palermo al scjalde a plen il so motôr, cul dinamisim  di Rispoli e Lazaar, cul ecuilibri di Rigoni, Jajalo e Chochev e cu la cubie di atac formade di  Dybala e Vazquez. Al rive cussì il gol dal un a zero: conclusion bielissime di Lazaar che no i permet a Karnezis di rivâ a fâ un et.
La reazion de scuadre furlane e rive daurman, cun Thereau che le bute dentri suntun sugjeriment di Di Natale, ma al è in fûr zûr e duncje nuie ce fâ, ma ancje daurman e disparìs, stant che i blancs e neris a somein indurmidîsi cuant che Dybala si slargje e le met tal mieç par Rigoni che al segne il doi a zero.

La partide pal Udin si fâs pardabon di rive sù e si viôt a fuart il contrast tra la concretece e la personalitât dai ospits e cetant che a son smamîts e flaps i parons di cjase, che a rivin dome a butâ cualchi balon indenant, là che Di Natale al va in offside, e a pierdi balis impuartantis te linie mezane, riscjant di cjapâ il tierç pataf di Dybala, che però il so tîr al sbat sul pâl.

Il secont timp dal Udin si vierç cun Perica al puest di Piris e duncje cun trê pontis in atac e cun chês altris liniis a cuatri. Il Palermo no si scompon, a part un erorat di Gonzalez suntun cross di Guilherme e un pâr di tîrs fûr scuare. La scuadre di Iachini e ten bot e e rispuint, cun calme e cun inteligjence, cussì Chochev al firme il tierç gol de zornade.

Il public dal Stadi Friûl al è avilît e lu fâs viodi e lu fâs sintî a fuart. Il Palermo al va dongje de cuarte segnadure, ma il tîr di Lazaar al sbat sul pâl, l’Udin si console – si fâs par mût di dî – cul gol numar 204 in serie A di Di Natale e l’unic furlan che al fâs fieste al è il paron dai ‘rosaneri’ Zamparini.

La setemane che e ven al covente sveâsi cuintri dal Chievo.

Parma – Udinese 1-0

udin_neri

La sconfite sbaliade, tal moment sbaliât, cul aversari sbaliât e intune maniere vergognose.
L’Udin al recupere la partide cul Parma e in cjase dai emilians si dismentee di zuiâ di balon. Cussì e vinç la scuadre di Donadoni, che e mostre di vê chel cûr e chel snait che i coventin soredut inte sô situazion di cumò e che in masse ocasions i mancjin ae scuadre di balon furlane.

Dopo cuatri risultâts positîfs un daûr di chel altri e dopo almancul dôs bielis prestazions – chês cuintri dal Toro e de Fiorentina – nossere alì dal Tardini i blancs e neris cu la maie blu no àn rivât a fâ nancje un tîr in puarte, a part chel pâl cjapât di Bubnjic cuasit par câs. La iniziative le àn cjapade sù, sin dal principi de gare, i parons di cjase, atents daûr e dinamics denant. L’Udin al à imbastît cualchi cuintripît cence mai rivâ a jessi pericolôs.

L’unic zuiadôr dal Udin in evidence tai prins 45 minûts al è Karnezis, che al è atent suntune conclusion di Coda e al ten sot voli ducj i balons che a rivin des sôs bandis. Tra i emilians i plui in viste a son Ghezzal, Coda, Mauri e Varela, che a provin in plui ocasions a cjatâ la vie dal gol.
Di chê altre bande l’Udin al riscje di fâ un ‘gollonzo’ cun Bubnjic tal disvilup di une azion inviade di une punizion di Di Natale, ma il balon al sbat sul pâl. Pal rest al è simpri il Parma che al mene la danze.

La musiche e reste chê ancje tal secont timp, cundut che Stramaccioni al prove a sunâ la svearine pai siei zuiadôrs, che però no le sintin masse. Al rive cussì il cross di Varela par Belfodil che al devente un tîr in puarte che al ingjane Karnezis e al marche il vantaç dal Parma. L’Udin al rispuint pôc o nuie: e merete segnalade dome une biele zuiade di Bruno Fernandes par Widmer. Pal rest, nancje te ultime part de gare, cun trê pontis, cun Thereau, Geijo e Wague, la scuadre furlane e rive a fâ alc, plui par demerit so che par merit di Mirante.

Al è dificil no vê une buine dose di aviliment, dopo di une partide di cheste fate.

Cumò la scuadre e je in ritîr par preparâ l’incuintri cul Palermo. Al covente dâsi une sveade.