Verona – Udinese 2-2

fuarceudinees

Une partide discrete cuntun Udin che al mostre caratar e ancje cualchi idee di zûc e cussì al torne a cjase almancul cuntun pont te sachete. Il risultât finâl al è just, stant che in moments diferents de gare dutis dôs lis scuadris a someavin in stât di puartâ a cjase I trê ponts e cussì. La trasfierte a Verone e presente une scuadre furlane cun cualchi novitât interessante, a tacâ de cubie di atac Di Natale-Nico Lopez, che però e funzione dome a metât.

L’incuintri al partìs avonde ben pai blancs e neris, cuntun asset tatic a trazion anteriôr e cuntune ande positive e propositive, cemût che al salte fûr di une biele triangolazion tra Totò e Nico. Cul passâ dai minûts e cres la pression dai parons di cjase, che a rivin a vudagnâ un rigôr, segnât cun mistîr de bande di Toni. La reazion dal Udin e je scjarsute e la scuadre di Guidolin e somee patî l’efiet di une sorte di blackout, compagn che in tantis altris ocasions. I parons di cjase si puartin indenant cun costance e cun snait e Toni si svicine al doi a zero.

Tal secont timp l’Udin al torne a masanâ zûc e a cjapâ la iniziative, ma pal moment nol rive a svicinâsi ae puarte di Rafael. I veronês, al contrari, a scugnin restâ plui sierâts ma cuant che a sburtin a rivin a vuadagnâ metris di cjamp e fintremai a segnâ il doi a zero, cun Hallfredsson che al disfrute inte maniere miôr un cross e une disatenzion di Scuffet.

A passin pôcs minûts e Di Natale al ridûs lis distancis cuntune biele zirade che e lasse Rafael sbacalît. I parons di cjase a son plui decîs in atac, ma l’Udin nol mole: al ten bot, si salve – ancje su la linie de puarte, su lis conclusions di Toni e Cacciatore – e al rispuint. Cussì, a fuarce di dâi al rive il gol di Badu.

Advertisements

Udinese – Livorno 5-3

fuarceudinees

Vot goi, erôrs e spetacul. L’incuintri tra Udin e Livorno al è un biel omaç ae memorie di Piermario Morosini, al mostre i limits de scuadre amaranto e al presente une scuadre furlane plui dinamiche e plui vivarose di cemût che si le à viodude tai ultins timps (magari cussì no, al bastave pôc…), là che al torne a jessi protagonist Di Natale, autôr di doi goi e implicât ancje in altris dôs segnaduris.

La partide e tache plancuç. Dutis dôs lis scuadris a scugnin cirî di vinci: l’Udin par salvâ la muse e il Livorno par vê ancjemò cualchi sperance di salvâsi. I ospits a son i prins a puartâsi indenant in dôs ocasions e Scuffet al interven cun puntualitât. Dome dopo nûf minûts di zûc e rive ancje la prime conclusion dal Udin: acrobazie di Di Natale e bale fûr di pôc.

La sagre dal gol si vierç cuntun punizion di Paulinho: Livorno un, Udin zero e cualchi sgrisul pai tifôs furlans, che a pandin la lôr preocupazion. I blancs e neris no si pierdin pai trois e a provin daurman a tornâ a dreçâ la situazion: prime Coda al bute jù Domizzi, Rocchi al sivile ma Di Natale nol realize il rigôr, dopo al è il cjapitani a segnâ il gol dal un a un e cualchi minût plui indenant Totò i da une bale di aur a Badu che al ribalte il risultât. Ma no je finide achì: Paulinho al segne ancje une altre punizion, cul jutori di une deviazion, e al rive il doi a doi; Di Natale al servìs Badu che le met tal mieç par Pereyra che al segne cence fastidis il gnûf vantaç; il Livorno al va in crisi, Gabriel Silva al firme il poker e Di Natale al met dentri la bale dal cinc a doi, su assist di Pinzi.

Il prin timp si siere cul Udin in trionf. Il cinc a doi si manten a dilunc: il Livorno nol rive a sburtâ, l’Udin al manten il control de partide, dut il stadi al jeve in pîts cuant che Di Natale al lasse il puest a Nico Lopez e prime de ultime sivilade di Rocchi al rive ancje il tierç gol amaranto, cun Mesbah che al profite di une disatenzion di Gabriel Silva.

Stin contents, stin calmuts.

Torino – Udinese 2-0

turin_lamoleantoneliane

Il Toro al è biel e Immobile, l’Udin al è brut e impussibil. Chê di Turin e je forsit une des partidis piês di dute la stagjon de scuadre blancje e nere e il fat che al vedi vinçût il Toro e je une piçule consolazion dome par cualchidun di chei che a àn a ce fâ cun chest blog.

La diference tra lis dôs scuadris sul cjamp e je grandonone: di une bande un grup che al masane zûc, al mostre di vê buinis cualitâts e al à ancjemò inte smicje l’obietîf di un puest in Europa League; di chê altre une formazion flape, individualitâts che no somein in stât di esprimi nancje une part dal lôr potenziâl, zuiadôrs sentâts sul obietîf minim de salvece che no rivin nancje a disfrutâ la ocasion par dreçâ cuntune biele prestazion tantis zornadis grisis, smamidis e di dismenteâ.

Il Toro al partìs al atac, fuart di motivazions grandononis, de poie di un public cuntun cûr grant cussì e di un moment, in gjenerâl, positîf. L’Udin al ten bot, no si scompon masse e si difint in maniere ordenade e ordenarie. Dopo nancje un cuart di ore al rive il gol di El Kaddouri e i ecuilibris a tachin a saltâ. Il Toro al sburte, par rinfuartî il so vantaç, e l’Udin al scuen fâ alc di plui che difindisi, ma se pai granatas la mission e je pussibile, la scuadre blancje e nere e mostre une altre volte di no vê ni gjambis, ni cûr e ni cerviel.

La manovre de scuadre di Guidolin e je lente e proviodibile e la pression ofensive e je inesistente, stant che se si gjave une punizion fûr scuare di Muriel  l’Udin nol fâs un tîr in puarte in dut il prin timp. Di chê altre bande Scuffet al à di stâ in vuaite su Cerci, Moretti e El Kaddouri e la musiche e je simpri chê ancje te seconde frazion, cuant che a rivin lis gnovis conclusions di Cerci e Immobile.

Al minût 56 Immobile,  servît ben di Maksimovic, al cjate la bale juste par meti in zenoglons Scuffet. L’Udin, che za dopo dal interval al veve tornât a mostrâ in atac polac Zielinki al puest di Bruno Fernandes, al imbastìs un alc che clamâlu reazion al è doprâ une peraule masse gruesse: cualchi passaç, cualchi tentatîf, cualchi scat e nuie plui. Intant il Toro al gjestìs cjamp e balon, al manten il control de situazion e al puarte a cjase une vitorie pesante pe classifiche e insom lizere pal sfuarç fat par concuistâle.

Par ce che al tocje l’Udin l’unic element positîf si lu cjate te cussience di un pôc ducj chei che a son stâts intervistâts che e je stade une partidate, zuiade mâl o salacor no zuiade par nuie. Se al pues coventâ par alc…

 

 

Udinese – Napoli 1-1

udin_neri
In confront cun chê cuintri de Juve, chê cul Napoli e je stade une partidone. In confront cu la partide di chest invier al San Paolo, chê di Udin e je stade une gare di sgrisulâsi. Si pues strucâ cun chestis peraulis il sens de partide dal 19 di Avrîl, là che pe scuadre furlane i elements positîfs a son trê: il fat di no vê pierdût, il pont cjapât che al conferme la posizion in classifiche e cualchi fruçon di zûc.


Tal prin timp la ande de partide e je avonde ecuilibrade, cun dôs scuadris che no somein vê nuie ce domandâ al campionât, almancul par ce che al tocje la classifiche. Ta cheste suaze il Napoli al mostre di volê fâ alc di plui e ancje di jessi in stât di fâlu e l’Udin al mostre di no vê pôre e di tignî bot denant dai aversaris. Scuffet si cjate tal puest just tal moment just suntune punizion di Insigne e une conclusion di Bruno Fernandes e un colp cul cjâf di Badu a fasin viodi che ancje l’Udin al prove a fâ alc in atac (cence concretizâ masse, cemût che i tifôs furlans a son stâts usâts vie par dut l’an). La pression un tic plui fuarte e dal Napoli e ven premiade dopo 37 minûts cun Callejon che al segne e il prin timp si siere cul vantaç dai ospits.

Tal secont timp la reazion dal Udin e je avonde smavide. E cjape sostance dome dopo dal gol dal un a un: bale robade di Pinzi che le mande indenant in direzion di Bruno Fernandes e conclusion a segn dal zovin portughês. Di chel moment l’Udin al cres e il Napoli al cale e a un cuart di ore de fin al rive ancje un gol di Muriel, che però al ven anulât justementri parcè che si cjate in fûr zûc.

Finude la partide, i esperts de moviole a disaran che ancje il gol di Bruno Fernandes nol veve di jessi convalidât. Forsit chest al è just cul voli eletronic e cui replays: cuntun voli uman al jere dificil inacuarzisi di cheste eventuâl iregolaritât, che insom no i regale nuie al Udin e no i gjave nuie al Napoli. Un pont par on par dôs scuadris che vie pal an a àn fat viodi ancje alc di miôr e magari cussì no, in particolâr pal Udin, ancje alc di piês.

Udinese – Juventus 0-2

udin_neri

 

In tancj si spietavin une prove di caratar dal Udin cuintri di une Juve che te partide di Turin, te prime part dal campionât, i blancs e neris furlans a vevin rivât fintremai a fâi un tic di pôre.
La scuadre di Guidolin no veve nuie ce pierdi e dut ce vuadagnâ, presentantsi denant dai gobos cuntune muse vierte e cun energjie e snait.
Pal Udin al sarès stât dificil vinci, ma al sarès stât biel almancul mostrâ di provâi, no dome par meti ancjemò un pôc di pevar al campionât, ma ancje – e soredut – par dâur une sodisfazion inmediade ai siei tifôs e par lassâ a ducj un tic di sperance pal avignî. Invecit, la scuadre di balon furlane e à mostrât la sô muse piês: flape, lente, cence snait e cence gjambis, cûr e cjâf.
I blancs e neris a àn fat la vitime sacrificâl de Juve, cence nancje imbastî cualchi forme di oposizion, di resistence e di reazion, fale che il pâl cjapât di Muriel tal recupar finâl.

Il scheme al è simpri chel, 3-5-1-1, cun Di Natale prime e uniche ponte, dibessôl e impegnât plui che altri a porconâ e a lamentâsi, cemût che al sucedeve un pôcs di mês indaûr. Ta chei altri reparts, nuie in particolâr che al mereti marcât: la difese no se gjave nancje masse mâl, ancje se e patìs il dinamisim di Giovinco, intant che la mediane e ven metude in zenoglons dal strapodê dai varis Pirlo, Pogba e Marchisio, che a cjatin ancjemò plui spazis par vie de zornade no di Pereyra e Gabriel Silva.

Par cuindis minûts nol sucêt cuasit nuie, dopo al rive il gol di Giovinco, che al met fûr cause Scuffet cuntune biele parabule e zovantsi ancje de posizion di diviers zuiadôrs che i taponin la viste al puartîr furlan. Di chel moment, la Juve e devente parone de partide, e segne il secont gol cun Llorente e si met te sachete incuintri e risultât.
Ce che al mostre l’Udin, par mudâ la situazion, al è masse pôc e masse scjars, ancje ator de fin dal prin timp, cuant che al vuadagne cualchi metri di cjamp e si svicine des bandis di Buffon.

Tal secont timp la musiche e reste chê, ancje cuant che Guidolin al decît di butâ dentri Muriel, par dâi une trazion ofensive plui marcade ae sô scuadre. Nuie ce fâ e no dome par merit de Juve.
E podeve jessi une serade memorabile, e je stade une serade di dismenteâ. O, miôr, une serade di visâsi par che no’nt sedin plui altris compagnis.

Fiorentina – Udinese 2-1

 

udin_neri

L’Udin al piert doi a un a Florence. La scuadre furlane e fâs une partide a corint alternade, cun moments di dinamisim indenant, durmidis in ducj i setôrs e soredut in difese e scjarse capacitât di tirâ in puarte. Cence Di Natale, Guidolin al manten il solit 3-5-1-1, cun Muriel prime ponte, intant che la Fiorentina e fâs valê la sô buine cundizion tecniche e tatiche e soredut si zove de potence di Cuadrado, dai erôrs difensîfs dal Udin e di un regâl dal diretôr di gare che al sivile un rigôr che clamâlu discutibil al è fâi un compliment.

La scuadre di Montella e cîr di imponi za sul imprin la sô predominance, ma l’Udin al mostre di no vê pôre de Fiorentine. Si viôt daurman che Cuadrado al sarà un dai protagoniscj dal incuintri, ma ancje Bruno Fernandes al mostre che al è in zornade sì.
La “viola” e masane zûc ma no rive masse dispès a dâi di lavorâ a Scuffet. Tal prin cuart di ore al sucêt dome une volte, cun Matos, ma il puartîr furlan al è tal puest just e al fâs la robe juste. L’Udin al rispuint in cuintripît, ma sot puarte nol è avonde pericolôs.

Il gol de Fiorentina al rive dopo vincjecinc minûts: Cuadrado al tire di fûr, Danilo cence volê al tocje la bale di ce che al convente par ingjanâ Scuffet e i parons di cjase a van in vantaç. Dopo un pôcs di minûts si viôt un altri viaç Muriel, ma la situazion no cambie, ni di une bande ni di chê altre.

Il secont timp si vierç cuntune cierte pression dal Udin, sburtât di Widmer e Bruno Fernandes, che al cjape sù une biele iniziative dopo trê minûts. Muriel al è masse di bessôl e nol rive a fâ alc e ce, te fasse mediane i blancs e neris a fasin zirâ la bale pal plui in orizontâl. Nol rive l’un a un e al rive il doi a zero: ancjemò Cuadrado protagonist, in aree di rigôr, che si inçopede di bessôl, denant di Danilo, e al ven premiât di Celi: penalty di Rodriguez e nuie ce fâ par Scuffet.

Il gol ur da fuarce ai parons di cjase, ma nol see lis gjambis ai blancs e neris, che a scurtin lis distancis cuntun biel tîr di Bruno Fernandes. In atac l’Udin al prove ancjemò a sburtâ, ma si vierç daûr e al met Cuadrado in cundizions di tirâ in puarte e cjapâ la travierse.
Par sù par jù dîs minûts l’Udin al zuie cun dôs pontis – al jentre Nico Lopez al puest di Badu – e cun Heurteaux al prove a cjapâ un pontut tal finâl, ma nol è nuie ce fâ: il balon si piert pôc plui innà dal pâl a man drete di Neto.

 

Udinese – Catania 1-0

fuarceudinees

Une altre partide brutute che e finìs ben pal Udin. Salacor, pe scuadre furlane, chê cul Catania e je une gare ancjemò piês di chê cul Sassuolo, e propit par chest il sucès finâl al è ancjemò plui impuartant. Il gol di Di Natale, a metât dal secont timp, al permet ae formazion di Guidolin di puartâ a cjase i trê ponts che a coventin par rivâ a cuote 38, intune posizion che si pues calcolâle tant che une ipoteche su la permanence inte serie A.
Dongje dal risultât, chei altris elements positîfs dal posticip di nossere a tocjin i pôcs salustris di biel zûc in atac, la buine tignude de difese e la gnove prestazion positive di Simone Scuffet.

Il prin timp al mostre un Catania ben metût tal cjamp cun trê pontis, la difese a cuatri e la linie mediane a trê, che al scugne sburtâ indenant par cirî di vierzi la partide a so bon pro. L’Udin al à il solit 3-5-1-1, cun Di Natale e Nico Lopez in atac, e rispiet ae scuadre aversarie al palese un nivel di vivarositât plui bas. Tai prins dîs minûts nol sucêt nuie, dopo a rivin trê conclusions dai sicilians: un prin tîr di Plasil cun Scuffet che al mande la bale in corner, un secont tentatîf ancjemò di Plasil cuntune gnove rispueste ancjemò di Scuffet e tai disvilups dal intervent dal puartîr furlan il tîr di Bergessio cun Allan che al salve la puarte dal Udin.

Il prin tîr in puarte dal Udin, cun Basta, al rive sù par jù dopo mieze ore di zûc, ma nol è alc e ce. Il Catania al continue a jessi il potagonist de partide, intant che la scuadre furlane si limite a zuiâ in difese. Cun dut achel, par vie di un erôr di Gyombar, i blancs e neris a àn ancje une biele oportunitât par lâ in gol, ma Di Natale nol rive a profitâ cemût che al covente, e prime de fin dal prin timp al fâs compagn Nico Lopez.

Tal secont timp il Catania al è mancul agressîf, ma l’Udin almancul sul imprin nol cambie il so ategjament avonde smamît in cont de partide. L’efiet positîf de jentrade di Bruno Fernandes al puest di Nico Lopez si lu viôt plui indenant, cuant che ancje Andujar al scugne mostrâ di jessi atent.

La incressite relative de pression ofensive dal Udin e puarte al gol di Di Natale: Fernandes al mande in profonditât Pereyra che le met tal mieç par Totò che al segne cul cjâf.
Il gol i da fuarce al Udin e al mande in crisi il Catania, che al torne a fâsi viodi des bandis di Scuffet dome te ultime part de partide, ma nol è nuie ce fâ ni par Monzon ni par Bergessio ni par Barrientos: Sant Simon di Remanzâs al è simpri tal puest just al moment just e al da la sô benedizion ae vitorie finâl.

Inter – Udinese 0-0

simonescuffet

L’Udin al torne di Milan cuntun pont e nissun gol, ni fat e ni cjapât. Par chest an, massime in chest moment, o scugnìn contentâsi dal fat che l’Udin nol piert e al fâs un altri piçul pas in direzion de salvece. La vitorie dal an passât cul Inter e je lontanone che mai e ancje chê di Cope Italie di cheste stagjon e somee chê di une altre scuadre e duncje si à di sfuarçâsi cetant par cjatâ alc di bon, che però al è. Cun difat, se la partide no je stade alc e ce, dongje dal fat che almancul un pontut al è stât cjapât a son almancul altris doi elements che a meretin marcâts: il fat che la difese e à tignût bot e soredut che Sant Simon di Remanzâs al mostre pardabon di vê snait, cemût che si à viodût soredut te part finâl de gare.

I blancs e neri si presentin a Milan cul scheme solit, cuntune ponte sole e cun cualchi cambiament di formazion. In atac al è Muriel, al puest di Di Natale, e talmieç dal cjamp al è Badu al puest di Pinzi. La partide si vierò cu lis dôs scuadris che si studìin: l’Inter al mostre une propension ofensive plui fuarte intant che l’Udin al palese di no vê pôre e di fâ zirâ la bale cun ritmi e continuitât.

Dopo cinc minût Scuffet si fâs viodi cuntune biele jessude cui pugns. Par il rest la pression dai zuiadôrs di Mazzarri no rive a crevâ la roste difensive de scuadre furlane.Ator de mieze ore invecit al è l’Udin a jessi in cualchi maniere pericolôs, cun Muriel, fermât dai interiscj. Prime de fin dal prin timp la formazion di Guidolin e rive a fâ ancje di miôr cun Bruno Fernandes che al oblee Handanovic a un bon intervent che però al met badu tes condizions di tirâ. In cualchi maniere, ma la bale e vâ fûr.

La ande de seconde frazion e va daûr di chê dal prin: Inter che al sburte indenant ma al stente tal cjatâ spazis, Udin che si difint e che al prove a rispuindi in cuintripît. I interiscj, a fuarce di dâi, a rivin a vê ancje cualchi ocasion, ma là che no rivin i difensôrs in blanc e neri al rive il difensôr estrem cu la maie par so cont. Il puartîr dal Udin al pare dut ce che al rive des sôs bandis, massime a tacâ dal tîr di lontan di Alvarez, che al marche la incressite de pression dai parons di cjase.
L’Inter al prove, al tire, al sburte e al confezione ancje cualchi ocasion ma il puartîf furlan al è simpri presint e se nol è lui al rive Domizzi a meti un blec.

Udinese – Sassuolo 1-0

fuarceudinees

Une partide brutute e une biele vitorie. L’incuintri cul Sassuolo al finìs inte maniere miôr pal Udin, che al fâs valê la sô supremazie teritoriâl e tecniche e par fortune al mostre i siei limits plui in atac che in difese. E finìs un a zero, a jentrin in cjase trê ponts e si tache a respirâ aiar di salvece.

Il prin timp si vierç cuntun Udin che al mostre la voie di cjapâ daurman il control des operazions. Il Sassuolo al tire sù bariduris e muraiis di ogni sorte cul intindiment di rispuindi in cuintripît. Tai prins dîs minûts nol sucêt nuie ni di une bande ni di chê altre. Dopo l’emilian Zaza al cjape sù une iniziative personâl e al rive ae conclusion: Scuffet si cjate tal puest just tal moment just e al rive a fâ la robe juste.

I ospits a tornin a sbassâ la lôr linie di zûc, l’Udin al alce la sô, si svicine des bandis di Pegolo e suntune biele azion in verticâl la bale e rive sul cjâf di Di Natale che le met dentri. Il Sassuolo al prove a rispuindi ma al mostre di no rivâi, intant che l’Udin al fâs zirâ la bale miôr, cun dut che nol rive pardabon a conclusions pardabon pericolosis. Al rive il rigôr, lu tire Totò, ma la çope maladete i fâs mandâ il balon fûr bersai e la pussibilitât di sierâ la partide e va sù pai stecs.

Nol sucêt nuie altri tal prin timp e nol è alc e ce nancje il secont timp, che al va indenant cence padins ni emozions, fale che tal câs di un rigôr di Floccari che al cjape il pâl (benedete che çope tal dischet…). La ocasion pierdude e il timp che al passe a dan un tic di energjie in plui al Sassuolo che al cîr di sburtâ indenant, ma la situazion no cambie, no dome pe inconsistence ofensive dai emilians e par une cierte atenzion garantide de difese dal Udin ma ancje par vie che une biele cumbinazion tra Badu e Muriel, jentrâts al puest di Pinzi e Di Natale, no si siere inte maniere juste e cussì si sfante un altri viaç la pussibilitât di sierâ la partide cuntun dopli vantaç.

L’incuintri al finìs un a zero. Cumò l’Udin al varà il so ce fâ cul Inter. Sperìn che e ledi compagn che in Cope Italie.

 

Roma – Udinese 3-2

udin_neri

L’Udin al torne a cjase di Rome cence ponts, cun trê goi cjapâts, doi fats e plui di cualchi ocasion straçade. Cu la scuadre di Garcia i blancs e neris a podevin ancje pierdi, stant che chê e je une des miôr dal campionât, ma a vevin di mostrâ un almancul tic di snait e di personalitât.

A àn mostrât chel e chê, ma àn palesât ancje – e soredut – i lôr difiets di simpri, almancul par cheste stagjon: une fature mostre par rivâ a meti une bale tal sac e une cierte capacitât tal clopâ in difese e fâsi cjastiâ par chest de bande dai aversaris.

La scuadre furlane si presente a Rome cul so classic 3-5-1-1. L’intindiment al è clâr: fâ sù une roste cuintri de potence di atac romaniste e provâ a rispuindi in cuintripît.

La Rome e cjape sù il control des operazions, ma la prime iniziative ofensive e je di marcje blancje e nere: tîr di Badu mandât in corner. La rispueste e rive di Destro, che al impegne Scuffet. Po e cres la pression romaniste e dopo vincjeun minûts al rive il gol di Totti.

La reazion dal Udin si le viôt daurman, cuntune biele conclusion di Badu fermade di De Sanctis, però la Rome e manten la sô supremazie teritoriâl e ator de mieze ore al rive a fâ ancje il secont gol, cun Destro, su passaç di Gervinho. Al torne a provâ a fâ alc Di Natale ma il puartîr romanist al rive a mandâle fûr e sùù par jù pal ultin cuart di ore dal prin timp nol sucêt nuie altri.

Il secont timp si vierç cuntun Udin plui decîs, che cun Pinzi al smieze lis distancis dopo sîs minûts cunDi Natale si svicine ae paritât, se nol fos par De Sanctis.

I romaniscj si rindin cont che l’Udin al à masse iniziative e duncje a tornin a cjapâ il control de situazion, cuntune pression ofensive che e cres, in graciis des iniziativis di Gervinho e Torosidis, che al firme il tierç gol de sô scuadre.

L’Udin al prove ancjemò a ridusi lis distancis e al rive a fâlu cun Basta. Ma nol rive a fâ di plui.

Te prossime partide l’Udin al zuiarà cul Sassuolo in cjase. A coventin snait, personalitât e soredut atenzion.