Musiche babeliche e resistente, martars ai 18 in direte su Onde Furlane

Doman al è martars e su Onde Furlane e torne Babêl Europe, la trasmission cuindisinâl dedicade ae produzion musicâl tes lenghis minorizadis dal continent.

Si svicine la date dai 25 di Avrîl e par chel la gnove pontade dal program, che si podarà scoltâle in direte ai 18 di Avrîl a 11 a buinore (e po, in repliche, ancje miercus ai 19 a une dopo di misdì e sabide ai 22 a une e mieze dopo di misdì) e sarà dedicade ae Lote di Liberazion cuintri dai fassisims in Europe.

E sarà une trasmission plene di musiche babeliche e resistente, cuntun percors che al cjape dentri Friûl, Sardegne, Bretagne, Paîs Basc e Catalogne.

In particolâr si podarà scoltâ la version par breton e in part ancje par francês di Bella Ciao dai Ramoneurs de Menhirs, lis storiis par sloven e par furlan de Resistence in Friûl contadis e cjantadis dai The Preklets e dai Rive No Tocje, l’omaç in musiche ae figure di Antonio Gramsci fat dai sarts Ratapignata, juste intant de jessude dal film Nel mondo grande e terribile di Laura Perini, Maria Grazia Perria e Daniele Maggioni, e la version dai bascs Betagarri da L’Estaca, la innomenade cjançon antifranchiste di Lluis Llach.

Chi di cualchi dì, cheste pontade Babêl Europe, dopo de emission in direte di doman e des replichis di miercus e di sabide, si podarà tornâ a scoltâle in rêt, compagn di chê altris pontadis di Babêl Europe, sul sît internet di Radio Onde Furlane.

E rive la Vierte e al torne Babêl Europe, cuntun viaç de Arberie al Kurdistan

Vuê al è martars e al è une altre volte timp di Babêl Europe. La trasmission cuindisinâl dedicade ae produzion musicâl tes lenghis minorizadis dal continent e torne te programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) juste vuê, ai 21 di Març, in direte a 11 a buinore, e po ancje doman, miercus ai 22, in repliche a une dopo di misdì.

   

Stant che e je rivade la Vierte, il program al cjaparà sù une ande aviertane, cun ritmis tirâts, gnovis jessudis discografichis, curiositâts e ricorencis.
Inte mieze ore scjarse a sô disposizion, Babêl Europe al presentarà une altre cerce di Ajëret, il disc gnûf de Peppa Marriti Band, e al proponarà un viaç che nol cjaparà dentri dome la Arberie, ma ancje la Bretagne, lis Asturiis, il Kurdistan e la Arpitanie, cu lis musichis dai Ramoneurs de Menhirs, dai Soncai System, di Silbûs û Tarî e dai Blu L’Azard.

E sarà la ocasion par memoreâ il Newroz, la fieste nazionâl dai curdis che e cole juste tal ecuinozi de Vierte, e par fevelâ di Lou Soun Amìs, il documentari su la musiche popolâr francoprovençâl che al è stât proietât a Turin ai 10 di Març inte suaze dal festival Piemonte Movie.

A tacâ di passant doman, chê stesse trasmission si podarà tornâ a scoltâle in rêt, sul sît internet di Radio Onde Furlane, compagn di chê altris pontadis di Babêl Europe.


.