Cittadella – Pordenone 0-2

Un gol par timp e une gnove vitorie. Il Pordenon al conferme la ande positive des ultimis partidis ancje in cjase dal Cittadella, là che al vinç e al convinç. La scuadre di Tesser e scuen rinunziâ a Burrai, intant che i parons di cjase si presentin sul cjamp cence dal scualificât Diaw e dai infortunâts Adorni e Ghiringhelli.

I neris e verts a tachin cul pît just. A son lôr lis primis ocasions dal incuintri: dopo dodis minûts di zûc Ciurria al impegne Paleari e cinc minûts plui tart al è Pobega che al oblee la difese de Citadele a fâ i straordenaris. La buine partence de formazion furlane si concretize in curt: il tierç tentatîf al è chel bon, cun Gavazzi che al crosse tal mieç e cun Barison che le bute dentri cence nissune pietât pal puartîr aversari.

Il Cittadella intai minûts seguitîfs si mostre ancjemò in dificoltât. Cundut achel al rive a resisti, cence vê altris displasês, e cul passâ dal timp al prove a fâsi viodi des bandis di Di Gregorio, prime cuntun tîr de distance di Mora, po cuntune conclusion sù par jù compagne di D’Urso e juste passade la prime miezore cuntun tîr cul cjâf di Rosafio che al va fûr di pôc.

Il Pordenon al siere il prin timp in vantaç e inte seconde frazion al gjestìs cun snait e cun sintiment la pression dai parons di cjase che dopo de polse a provin a fracâ il pedâl dal aceleradôr. Par chel i tentatîfs di Vita e di Luppi, jentrâts frescs tal puest di d’Urso e di Bussaglia, e chei di Stanco e di Branca no crein problemis di sorte a Di Gregorio.

I ospits a sburtin, si sbrochin ma intai ultins metris no àn la luciditât che e covente, intant che il Pordenon al va dilunc a jessi ordenât e concret e al rispuint in velocitât dilunc des liniis verticâls.
Intune di chestis azions i sborfs a rivin a vuadagnâ un penalty, sivilât par un fal di man in aree, e cussì a cjatin il gol cun Ciurra che dal discut al impire Paleari.

Il secont gol in sostance al siere la partide. Il Cittadella al piert ancje il cjâf, cun Branca che si fâs butâ fûr par un fal brut e stupit, e cuntun om di mancul nol rive a combinâ plui nuie. I va ben al Pordenon che al manten il control de partide e al puarte a cjase altris trê ponts.

Pordenone – Juve Stabia 2-1

Il Pordenon al torne a vinci ancje tal Stadi Friûl. Dopo dal sucès di domenie in cjase dal Empoli la formazion nere e verde e vuadagne ducj i ponts a disposizion ancje cuintri de Juve Stabia. Lis jespis a rivin in Friûl cun chê di recuperâ ponts pe salvece, intant che i sborfs a àn l’intindiment di mostrâ che chel di domenie nol è stât un câs e che a son jessûts ad in plen dal letarc dal imprin dal 2020.

La scuadre di Tesser si presente sul cjamp dsi Riçs cul so scheme di simpri, un ecuilibrât 4-3-1-2, intant che Casert al opte pal 4-2-3-1.
La prime miezore di zûc no ufrìs cetantis emozions. Il scuintri al è fisic, a son diviers i erôrs de bande di dutis dôs lis formazions e ancjetantis lis interuzions.

Passade la miezore e rive la prime vere ocasion di gol de partide. E je dal Pordenon, che le disfrute inte maniere miôr: Gasbarro si libere de marcadure statiche di Melara e al crosse tal mieç, là che Gavazzi al salte prime di Troest e cul cjâf al impire la puarte di Provedel.

Doi minûts plui tart i neris e verts a provin a fâ il bis: ancjemò un cross de çampe di Gavazzi che Burrai al tocje prime di ducj, ma Provedel al interven in maniere providenziâl. I ospits si fasin viodi des bandis di Di Gregorio dome ae fin dal prin timp cuntun passaç in verticâl di Calò par Melara, che le met tal mieç a vantaç di Rossi, che al prove a intervignî cul tac, però la sô conclusion e ven fermade di Bassoli.

Intal principi dal secont timp la Juve Stabia e je pericolose cuntune combinazion che e tache dal corner batût di Ricci, tocjât di Melara in direzion di Troest che al tire fûr bersai. La rispueste dal Pordenone je une azion in velocitât che si siere cun Ciurria che al rive al tîr dal limit che al va fûr no di tant ae diestre di Provedel. Ancje Gavazzi al à une bale buine, ma la sô conclusion e cjape l’esterni de rêt.

Casert, dopo de jentrade di Canotto par Melara, al met dentri Bifulco tal pues di Ros, cun Di Mariano che al ven spostât tal mieç, poiât ancje di Mallamo, inte posizion di false ponte. L’obietîf al è chel di gjavâur i ponts di riferiment ai aversaris. L’impat des sieltis dal tecnic al è relatîf, ma positîf. Al è propit Canotto che al jentre inte aree di rigôr, obleant Gasbarro a intervignî par daûr: Illuzzi al sivile e Di Mariano al segne dal discut.

La pate e pues lâ ben pe Juve Stabia, ma par sigûr no i da sodisfazion al Pordenon, che al alce la linie dal so zûc e al mande Ciurra in zone gol. Il so tîr al è biel, ma e je ancjemò plui biele la parade di Provedel. Il gol al rive cuasit ae fin, cun Strizzolo che al ricêf la bale di Burrai dal corner e al tire cul cjâf a colp sigûr.

Il Pordenon al rive cussì a jonzi la vitorie, che i permet di considerâsi bielzà salf e di tornâ a indreçâsi viers de zone play off.

Empoli – Pordenone 0-1

Il Pordenon al torne a vinci. La scuadre di balon furlane a Empoli e zuie la partide che e veve di zuiâ e cussì e ferme i parons di cjase che a rivin di une rie di ben cuatri vitoriis une daûr di chê altre.
I neris e verts a segnin intal prin timp, intant che inte seconde frazion a tegnin bot denant de pression dai aversaris, cuntun Di Gregorio strepitôs e cuntun tic di fortune.

La partence dai sborfs e je buine. Dopo dodis minûts si fasin vîfs des bandis di Brignoli cun Pobega che al impegne il puartîr e cun Misuraca che al cjape sù la sô rispueste e al tire fûr bersai. L’Empoli al fâs avonde pôc in atac e al prodûs dome che un pâr di conclusions. Chê plui pericolose e je un biel tîr di Ricci di trente metris, che Di Gregorio al ferme cun sigurece.

Passade la prime mieze ore di zûc, al rive il gol dal Pordenon. Gasbarro si puarte indenant su la çampe e al passe la bale a Gavazzi che le met tal mieç a vantaç di Bocalon che nol mancje l’apontament cun chel cross e cul cjâf al impire la puarte.

La reazion dal Empoli, almancul prime de polse, no à nissun efiet. Tal secont timp Marino al cambie la disposizion de sô scuadre che cussì e frache sul aceleradôr cun chê di dreçâ la partide. Cundut achel, almancul sul imprin, si viôt ancjemò il Pordenon: conclusion di Gavazzi e intervent di Brignoli che si salve in corner.

I parons di cjase a rispuindin cun Antonelli, che il so tîr al passe Di Gregorio ma al ven parât vie di Bassoli. Il Pordenon si difint cun sintiment e nol permet ai aversaris di disvilupâ il lôr zûc in profonditât.

L’Empoli al à la ocasion buine al sessantesim minût de partide: corner di Ricci e zirade di cjâf di Antonelli che però e ven fermade di un miracul Di Gregorio, che al rive a tocjâ la bale e a parale vie in corner. Marino al mande dentri Mancuso tal puest di La Mantia. La sielte dal tecnic e je chê juste, stant che cul gnûf jentrât la pression ofensive e cres e al è propit Mancuso a tirâ in puarte cul cjâf, suntun biel cross di Ciciretti. A bon pro dal Pordenon, però, la bale e sbat su la travierse e il risultât nol cambie.

Tai ultins minûts a son ancje i tentatîfs di Tutino e di Bajrami che però no crein problemis pal Pordenon. Juste tal recupar, dopo vê tignût bot cuintri de formazion toscane,i neris e verts si svicinin al doi a zero cun Ciurra, che al profite di un fal laterâl batût malonon di Bandinelli e al anticipe Brignoli, ma il so tîr al va fûr.

La scuadre furlane,  cussì, e scuen contentâsi dome di un gol di vantaç, che però al è avonde par puartâ a cjase trê ponts, par recuperâ une posizion in classifiche e soredut par rompi chê serie di risultâts negatîfs che e scomenaçave a jessi pardabon masse pesante.

Pordenone – Chievo 0-1

Il Pordenon al piert ancjemò une volte. Vuê al è tornât a sucedi a Udin cuintri dal Chievo, che tal cjamp dsl Stadi Friûl al segne un golon cun Garritano dopo nancje un cuart di ore di zûc, e po al manten il control de partide.

I ospits si fasin viodi daurman des bandis di Di Gregorio cun Meggiorini. Al secont tentatîf, cun Garritano che al siere une azion imbastide di Giaccherini e di Djordjevic e al mande la bale tal siet cuntune pinelade preseose, il Chievo al passe in vantaç.

La reazion de scuadre verde e nere no je alc e ce, almancul vie pal prin timp, cuant che e prodûs dome un tîr alt di Ciurria. E je une vore miôr dopo de polse cu lis conclusions di Pobega e di Bocalon, che però no rivin a impirâ Semper.

Passât il pericul, il Chievo al à ancje la ocasion par dopleâ il vantaç, prime cun Djordjevic e po cun Vignato, che la sô conclusion e ven fermade di Di Gregorio cu la complicitât de travierse. Juste tal ultin ancje Semper al fâs un biel intervent suntun altri tentatîf di Pobega e al ferme il risultât a pro de sô scuadre.

Tes ultimis sîs partidis il Pordenon al à fat dome doi ponts. Al covente jessî fûr di cheste situazion.

Benevento – Pordenone 2-1

Nuie ce fâ. Il Pordenon al piert ancjemò. Cundut des tantis ocasions di gol metudis dongje, la scuadre di Tesser no à rivât a fâ ponts nancje îr in cjase dal Benevento.

Cuintri de prime in classifiche i neris e verts a mostrin une buine cundizion atletiche e tatiche ma a patissin la pocje precision in atac, la sostance e l’ecuilibri dai aversaris e ancje un tic di sfortune.
La partence de formazion furlane e je buine. Dopo dîs minûts di zûc Tremolada al prove dal limit de aree e Montipò al rive a butâle in corner. La rispueste dal Benevento e je un tîr cul cjâf di Improta che al va fûr di pôc.

Vie pe part centrâl dal prin timp si viôt plui Pordenon che Benevento: tal cuader dal cronist a meretin segnâts une biele conclusion a zîr di Strizzolo ce che al lenç il pâl e une di Candellone che e à sù par jù chel stes risultât. Tal ultin cuart di ore al rive il svolt de partide: i parons di cjase a vuadagnin une punizion dal limit, Viola al tire une pinelade precise, Di Gregorio al svole ma nol rive a tocjâle e la bale finìs tal siet.

Prime de polse Tremolada al cîr daurman la pate cuntun tîr viers il pâl a drete di Montipò ma la bale e va fûr bersai. Inte seconde frazion al partìs ben il Benevento, che al cree daurman une ocasion cun Moncini, mandade indaûr di Di Gregorio, intant che di chê altre bande dal cjamp al è un tîr di Mazzocco dal limit che al lenç la puarte.

I parons di cjase, passât il pericul, a provin a infuartî il vantaç, e a rivin a jonzi la seconde segnadure cun Insigne, che al ricêf di Viola e al sglonfe la rêt dopo vê colpît la part basse de travierse.
Il Pordenon no si rint, ma al à la sfortune di cjapâ fintremai doi pâi cuntun tîr dal limit di Mazzocco e po di cjatâ un Montipò spetacolâr suntun tîr di Bocalon (che però al è in fûr zûc).

Propit Bocalon al è il protagonist dai ultins atacs dal Pordenon: prime al piert il timp just e il puartîr zâl e ros al è brâf a salvâsi e po cul cjâf le bute dentri disfrutant un biel cross e il fat che la difese aversarie e reste ferme. Magari cussì no al è za il nonantesim e chel al reste dome il gol de bandiere.

Pordenone – Livorno 2-2

Il Pordenon al torne a fâ ponts, ma al fâs doi pas indaûr in classifiche. A Udin cuintri dal Livorno la scuadre nere e verde e scombat e e spude balins. I ospits, ultins in classifiche, a son un brut client e a metin in dificoltât la formazion di Tesser, che e passe in vantaç tal prin timp ma inte seconde frazion si cjate sot di un gol e e rive a jonzi la pate dome intal ultin.

Il Livorno, tornât sot de vuide di Roberto Breda, si presente tal cjamp dal stadi Friûl cun chê di fâ ponts e cence dai infortunâts Marsura e Viviani e dal scualificât Di Gennaro al ponte su la cubie di atac Marras-Braken. Ancje il Pordenon al à chê di rompi la rie di sconfitis che e à segnât la fin di Zenâr e il principi di Fevrâr e cun Tremolada daûr di Ciurra e di Strizzolo al mostre di scomençâ la partide cul pît just.

Strizzolo al è il protagonist de prime conclusion dai parons di cjase: dopo nancje un cuart di ore al tire di potence di fûr ma nol rive a cjatâ il spieli de puarte. Il Livorno al rispuint cuntune conclusion debile di Marras, che no i da nissun fastidi a De Gregorio. La predominance teritoriâl de scuadre furlane e rive a produsi alc dome ator de fin dal prin timp, cuant che al rive il gol di Gavazzi, che si zove di une buine spuinde di Strizzolo.

La seconde frazion si vierç ancjemò cul Pordenon al atac. Pal Livorno e somee grivie, in particolâr cuant che Tremolada al sburte su la corsie centrâl e al fâs vignî i sgrisui ae retrovuardie amarant.
Passât il pericul, però, i ospits a metin la marcje juste e prime a cjatin il gol in curt cuntune conclusion cul cjâf di Bogdan e cualchi minût plui indenant si svicinin al vangtaç cuntun tîr di Luci che al cjape il pâl.

Il ritmi al cres e si torne a viodi ancje il Pordenon, cun Ciurria che al oblee Plizzari a fâ un mieç miracul. Il Livorno no si spaurìs e al rispuint cun plui precision e cun plui fortune: Braken al scjampe vie su la corsie di çampe e al regale une biele bale par Marras che le bute dentri.
Se in chê ocasion De Gregorio nol pues fâ nuie altri che viodi la bale jentrâ in puarte, cualchi minût plui tart il puartîr neri e vert al rispuint ben a une altre conclusion dal ex atacant dal Pescara.

Intai ultins vincj minûts il Pordenon al torne a cjapâ la iniziative cun chê di dreçâ la partide. Il Livorno al ten bot, ma a siet minûts de fin dal timp regolamentâr al è Chiaretti, jentrât che nol è tant tal puest di Tremolada, che al tire dal limit de aree e al segne. Il risultât finâl nol dipent dome dal gol di Chiaretti ma ancje di une altre parade di De Gregorio, che al salve suntune conclusion di Silvestri.

Spezia – Pordenone 1-0

Il Pordenon al torne a pierdi. Ancje cul Spezia i sborfs no rivin a fâ un risultât che ur permeti di puartâ a cjase almancul un pont. La scuadre di Tesser e mostre sù par jù la solite sgrimie: si cuvierç ben daûr e e mande a scombati Ciurra e Strizzolo, cu la poie di Gavazzi daûr di lôr. I parons di cjase a rispuindin cun chê stesse formazion che une setemane indaûr e veve vinçût a Crotone, fale che cun Mastinu tal puest di Mora, scualificât.

Il prin timp al è avonde ecuilibrât. Il prin tîr dal incuintri al è di Ragusa che cul pît çamp al impegne Di Gregorio juste dopo trê minûts di zûc. I parons di cjase a son ancjemò pericolôs une desene di minûts plui tart cun Matteo Ricci, che la so conclusion e va a finîle fûr di pôc.
Il Pordenon si viôt des bandis di Scuffet dome trê minûts plui tart, cun Strizzolo che i da la bale buine a Ciurra che però al tire masse lontan de puarte blancje e nere. I parons di cjase a tegnin lis brenis dal zûc, intant che la formazion furlane e cîr la vie de velocitât in cuintripît, ancje se cussì i siei atacants a finissin in offside.

Prime de polse il Spezia al tire in puarte ancjemò un pâr di voltis, cun Nzola e po cun Matteo Ricci su punizion, ma Di Gregorio no à nissun fastidi.
In principi dal secont timp il Pordenon al prove a colpî cun De Agostini cul cjâf su corner di Burrai. Po dopo i blancs e neris a rispuindin cun Nzola, su assist di Gyasi. Ma ni chel e nancje chel altri a cjatin il spieli de puarte.

I doi alenadôrs a provin a mandâ in cjamp zuiadôrs plui frescs, a tacâ di Gambellone tal puest di Ciurra e di Acampora par Mastinu, e passade di pôc la metât dal secont timp al rive il gol dai aprons di cjase, cun Matteo Ricci che al racuei une rispueste curte de difese di cjase, sul cross deviât de diestre di Ferrer, al controle e cul diestri al impire Di Gregorio in diagonâl.

Il Pordenon al prove a reagjî, ma il Spezia al ten bot, si siere ben e al rispuint a neri e vert vie, in cuintripît, e juste tal ultin si svice al secont gol cuntune iniziative di Gyasi che al passe Di Gregorio e al fâs un assist par Federico Ricci, che però al ven anticipât de difese. Ma no je ancjemò finude: juste ae fin dai minûts di recupar, Migliore al ven butât fûr par un brut fal tal mieç dal cjamp, che nol à efiets direts a dam de sô scuadre, stant che e rive daurman la triple sivilade di Fourneau, che cussì al siere la partide e al fâs bon il risultât di un a zero.

il Pordenon al reste ancjemò di bessôl tal secont puest in classifiche a cuote 35, però cumò Crotone e Frosinone a son juste li daûr, cuntun pont di mancul, e ancje il Cittadella si fâs dongje cun 33 ponts. Al coventarà dâsi une dreçade.

Pordenone – Pescara 0-2

Partide stuarte pal Pordenon, che dopo vot vitoriis e dôs patis al piert pe prime volte in cjase cuintri dal Pescara. Ancje a Udin e va a finîle compagn che in Abruç ai 2 di Setembar stâts: i aversaris dai neris e verts a puartin a cjase ducj i trê ponts.

Il risultât al è mancul taront de partide di in chê volte tal stadi Adriatico, ma no mancjin lis emozions ancje in cheste ocasion, massime vie pal secont timp. I ospits a fasin plui zûc, a metin dongje plui ocasions e a fasin plui tîrs in puarte (tredis cuintri cinc) de scuadre furlane e par chel a rivin a vinci.

Il prin timp si siere cence goi, ma cun Galano che i da di lavorâ a Di Gregorio almancul intun pâr di ocasions intant che il Pordenon al prove a impirâ Fiorillo cun Bocalon e cun Zammartini. Il Pescara, che inte prime frazion al veve fat di plui dai neris e verts al rive a disblocâ il risultât sîs minûts dopo de polse cun Zappa, che al siere inte maniere miôr un atac in verticâl.
Il Pordenon al patìs il colp, nol rive a rispuindi, i aversaris si tegnin alts e prime a cjapin un pâl cun Galano e pôc plui indenant a segnin il doi a zero, simpri cun lui, cuntun tîr cul cjâf su corner.

Tesser al prove a cambiâ alc in atac – fûr Gavazzi, Strizzolo e Zammarini e dentri Chiaretti, Candellone e Misuraca – ma il massim che il Pordenon al rive a fâ a son dôs conclusions di Barison: la prime, cul cjâf, e je fûr bersai e la seconde e va sbati su la travierse.

Tal Pescara l’esordi di Legrottaglie tant che mister al è positîf. Il Pordenon al pues consolâsi cul fat che, almancul par cumò, al reste ancjemò tal secont puest de classifiche.

Frosinone – Pordenone 2-2

Al torne a tacâ il campionât di serie B e il Pordenon al torne a jessi protagonist di une biele partide.
Nossere a Frosinone la scuadre nere e verde e à mostrât une altre volte la sô muse miôr, fate di atenzion, snait e valôr tecnics bogns.

I parons di cjase a àn chê di vinci, ma il Pordenon nol à chê di pierdi: la risulte e je une partide plasevule e siore di emozions. I parons di cjase a partissin cul pît just e dopo doi minûts a rivin a segnâ cuntune punizion di Dionisi. I ospits no i stan e a tirin sù daurman la linie dal lôr zûc e a cirin la pate prime cuntune conclusion di Pobega fûr bersai e po cuntune iniziative di Strizzolo che al oblee Bardi a fâ une jessude preseose par salvâ la sô puarte.

L’un a un al rive juste ae fine de prime mieze ore di zûc, cun Candellone che al bute dentri un balon za parât vie une volte di Bardi su conclusion di Gavazzi. Il gol cjapât al fâs sunâ la svearine pal Frosinone che prime de polse al prove a tornâ a cjapâ in man il control de partide, ma cence grancj risultâts.

Il secont timp si vierç intune situazion di eculibiri relatîf, cui parons di cjase che a cirin ancjemò di fâ valê il lôr domini teritoriâl e cu la scuadre furlane che e rispuint cul dinamisim dai siei atacants. Al rive cussì il secont gol neri e vert: cross di Gavazzi e inseriment di Pobega, che al anticipe Brighenti e al impire Bardi Tu cuntun biel tîr di esterni a svol.

Il Frosinone al cjate il doi a doi in graciis di un rigôr une vore discutibil, cun Brighenti che al cole te aree nere e verde ma pardabon si stente a capî cemût che al puedi jessi stât tocjât di Gavazzi. Ciano al tire, Di Gregorio al rispuint ma il rigorist zâl e blu al rive a tornâ a tirâ e le bute dentri.

Tesser si inrabie pe decision di Pezzuto e al è dificil dâi tuart, massime cuant che un pôc plui indenant, inte stesse azion. l’arbitri nol viôt e nol sivile un fal di man di Tabanelli e un fal su Candellone.

Inte ultime part de gare il ritmi al cale e dutis dôs lis scuadris a somein contentâsi dal risultât, che cundut dal marum pal rigôr che nol jere e pal mancjât penalty che al jere al va ben soredut al Pordenon, che si conferme tal secont puest inte classifiche.

Pordenone – Cremonese 1-0

Il Pordenon al torne in Friûl e tal Stadi Friûl, vistût di fieste pai neris e verts, al torne a vinci dopo dai cuatri patafons cjapâts a Sant Stiefin cuintri de Salernitana.

A Udin la formazion vuidade di Attilio Tesser e torne a mostrâ la sô muse biele, concrete e salacor ancje ciniche e fortunade. La Cremonese e ten di plui la bale e si fâs vive in plui ocasions des bandis de puarte di Di Gregorio, ma ae fin il risultât al è bon dome pe scuadre di balon furlane.

E je determinante, in chest sens, la canonade tirade di Ciurra juste dopo dîs minûts di zûc che e finìs inte puarte di Agazzi. Impuartantons ancje i intervents di Di Gregorio e il sintiment e l’ordin che i sborfs a àn intal difindisi dai atacs dai aversaris.

Vie pal prin timp la Cremonese e masane zûc e e imbastìs ancje azions di gol, ma e cjate simpri o il puartîr neri e vert o ben i siei compagns de tierce linie, che a sierin ducj i trois e a fasin ripartî il cuintripît in direzion di Ciurra e di Strizzolo.

Intal secont timp lis scuadris si slungjin. La Cremonese e prove a tacâ ancjemò cun plui grinte, ma ae fin Di Gregorio nol à nancje masse lavôr ce fâ.
Il Pordenon al prove a incressi il vantaç in velocitât e dilunc des liniis verticâls e arivin cussì lis conclusions di Gavazzi (che però probabilmentri al varès fat miôr a dâi la bale a Ciurra di bessôl denant de puarte) e di Mazzocco. Nol rive a segnâ il secont, ma al rive a tignî bot denant dai atacs dai ospits fintremai intal ultin cuant che Di Gregorio al siere la puarte suntun tentatîf di Terranova.

La vitorie e conferme la seconde posizion in graduatorie dal Pordenon e e je une biele ocasion di fieste par chei sietmil di lôr che pe ultime partide dal 2019 si son dâts dongje li dal Stadi Friûl par gjoldi ancjemò de promozion de stagjon passade e magari ancje par insumiâsi une altre promozionae fin di chest campionât.