Mandi, Pierluigi Cappello

Al è muart Pierluigi Cappello, om zentîl e poete fin.

Si distude la sô vôs, ma nus restin lis sôs peraulis, par furlan e par talian. Peraulis «puaris», vivis e vivarosis.

Lu ricuardìn cun chest articul di Maurizio Crosetti e cuntun so intervent gjavât fûr dal documentari di Marco D’Agostini, I Volti spirituali del Friuli.

Lu ricuardìn cu la «maravee dal frut che al dîs che al à svolât».

Di Bagnarie a Tarcint e a Cividât, une Onde… furlane, lungje e vivarose

vivaondefurlane

Tra vinars ai 17, sabide ai 18 e domenie ai 19 di Lui, in Friûl o vin vivût un fin di setemane lunc e soredut siôr di apontaments e iniziativis. No si podeve rivâ dapardut e o vin scugnût sielzi. Cussì o vin scugnût fâ di mancul di lâ a Postaja Topolove/Stazione Popolò, che ancje chest an al veve un biel program, e lassâ in bande i doi concierts plui impuartants di domenie – chel di Passarian, cun Gilberto Gil e Caetano Veloso, stant che a jerin za stâts a Chieri une setemane indaûr, e chel dal gaitero asturian Hevia a Tumieç –  e si vin dedicâts a Tarcento Jazz, a Viva Onde Furlane e a Mittelfest. Ogni an la rassegne di Cividât e messede mainstream e sperimentazion, inovazion e alc di za sintût e za viodût. Nus somee che e fasi compagn ancje chest an. Cun di plui, si cjatìn avonde in cunvigne cun cui che al pense (e che al volarès) che sei tes propuestis da so cartelon che te sô comunicazion istituzionâls si viodessin di plui lis lenghis ‘ altris’ dal Friûl. Cun dut che al è ancjemò tant ce fâ, o vin viodût cun plasê che, magari dome tal ultin, te edizion di chest an al è saltât fûr alc di plui in chest sens: cualchi messaç plurilengâl, il spazi dedicât ae poesie furlane contemporanie, cui viers di Tavan, Cappello, Giacomini, Moratto e Mattiuzza dedicâts ae aghe e un pâr di spetacui.

color_aghe

Domenie stade al jere in program un di chescj, ven a dî Colonie, spetacul teatrâl par furlan e par talian di leturis, musiche, bal e bodypainting metût adun di Loris Vescovo e di Giorgio Olmoti, cu lis atoris e cjantantis Saba Anglana e Claudia Grimaz, la balarine Cora Steinsleger, lis proiezions di Cosimo Morelli e i musiciscj Leo Virgili e Ermes Ghirardini. Lu vin viodût e nus à plasût un grum. No lu scrivìn parcè che o vin stime par plui di cualchidun di lôr, che a son coinvolzût tal progjet, e che ju calcolìn tant che amîs, a tacâ di Loris Vescovo, Giorgio Olmoti e Leo Virgili, ma cun obietivitât: la idee di partence e je biele e al è une vore bon ancje l’impat emotîf e senic. O sperìn che Colonie al puedi vignî tornât a fâ, parcè che al merete. Cun di plui, in cheste maniere al podarà inmò rinfuarcî la sô fuarce narative e seniche e magari ancje rifinì cualchi passaç. Colonie al met dongje dôs storiis di colonizazion, di vuere e di emigrazion che si incrosin, scjavaçant lûcs e timps.  Lis protagonistis de rapresentazion a son dôs feminis che a àn memorie vive, in graciis des contis des lôr nonis, di doi fats di violence: un che al è stât patît dai furlans ae fin de Seconde vuere mondiâl, a Clauian il 1n di Mai dal 1945, e un là che i talians a jerin stâts i sassins, intant de colonizazion de Afriche orientâl, li de glesie cristiane-copte di Debre Libanos in Etiopie. Lis dôs – Claudia, furlane che e lavore a Berlin, e Abeba, etiope imigrade tal Stât talian – si cjatin propit devant de glesie di Clauian là che al jere stât metût in vore il svindic de bande dal esercit todesc…

colonie

Il nestri fin de setemane furlan al jere tacât za vinars a Tarcint cui prins concierts de gnove edizion di Tarcento Jazz, la rassegne inmaneade di Hybrida alì di Palaç Frangipane. E je stade la ocasion di viodi dal vîf il biel progejt di vocalês folk jazz di Vocinconsuete, il jazz-core cuinçât di eletroniche dai Martello e la potence policromatiche dal cuartet dai Roots Magic. La sabide di sere no vevin dubits su ce fâ: o sin lâts a Bagnarie a Viva Onde Furlane. Un biel puest, tal mieç dai cjamps e in bande e de autostrade, une biele atmosfere di fieste e une lungje gnotolade di musiche, vierte di Vocinconsuete (simpri lôr: bravis e vonde) e puartade indenant dai Carnicats in version lizere – cence grup, come une volte – che a àn confermât di jessi bulos e professionâi, dai Daisy Chain, pe ocasion cence mascare ma simpri cuntun biel tîr, e dai Volvodrivers, zovins de Basse tirâts sù a dosis fuartis di grunge a hard rock, e sierât dai LaipLessNess, protagoniscj di une performance potente e divertente, visionarie e sfolmenade.

laiplessness4

Vie pe buinore di sabide o vin stât ancje li de Universitât, a Udin, pe cunvigne su Autonomie speciâl e Statût regjonâl dal Friûl-VJ, ma di chel o scrivarìn un altri viaç.

Doi dîs dopo di cheste overdose di Friûl furlan e babelic nus ven sù ancjemò une osservazion. Cul cjalâ in nons di tancj di lôr coinvolzûts ancje in altris events e situazions, al somee pardabon che chê di Onde Furlane e sedi une onde lungje, poliedriche e vivarose.

Al à propit reson Pierluigi Cappello.

Cualchi domande, cualchi buine gnove e cualchi sperance

repital

Passe une setemane indaûr e je stade memoreade la Fieste de Republiche Taliane.
E je une date impuartante che e merete memoreade ben.
O vin la impression che però al sedi alc che nol funzione tes celebrazions e si cjatìn in cunvigne cun cui che su chest argoment, par esempli in Friûl, al fâs indenant cualchi domande.

Salacor i problemis no son dome tes celebrazions. Te Republiche «fondata sul lavoro» e cres la disocupazion, te Republiche che e tutele lis minorancis linguistichis «con apposite norme», dopo vê spietât mieç secul par che a rivassin, chês stessis normis a stentin ancjemò a vignî metudis in vore… par no fevelâ dai gnûfs (???) câs di coruzion che a vegnin indenant.

03-12-013_Cappello

Cun dut achel dal Friûl a rivin ancje un pâr di bielis gnovis.
Di une bande il Guvier talian al à decidût di dâi il vitalizi previodût de cussì clamade Leç Bacchelli ancje al poete furlan Pierluigi Cappello, che sal merete e che par sigûr i covente.
Di chê altre il Consei regjonâl dal Friûl-VJ al à dât la sô adesion ae Rêt europeane pe promozion de diversitât linguistiche (NPLD), tant a dî che al è cualchidun che al à cussience che la diversitât linguistiche de regjon che e ten dongje il Friûl e Triest e je la strade miôr par vê a ce fâ cu la Europe.

Che al sedi rivât il moment che finalmentri si cambie musiche, dopo un pôcs di agns che si à fat di dut par fâi cuintri aes lenghis, ai dirits, ae tutele, ae autonomie speciâl de Regjon, che lis sôs fondis e lis sôs finalitâts a son propit chês?

lengate1