Massimo Silverio, musiche furlane di cualitât e di esportazion

Un altri esempli interessant di musiche furlane fuarte, di cualitât e di esportazion. Al è il gnûf progjet musicâl di Massimo Silverio, cjantautôr e polistrumentist di Çurçuvint, che di agns al cjante e al sune la ghitare e il violoncel, di bessôl o in grup, cun risultâts interessants.

Dopo vê dâr fûr, tal 2016, il so prin disc “Le Retour Du Zéphyr”, l’artist cjargnel al scree in maniere uficiâl juste in chescj dîs la sô gnove produzion. Il so titul al è “Ø” e al è disc cun cuatri tocs, che a colpissin orelis, cûr e cerviel pes lôr particolaritâts sonoris, là che si fondin folk, rock, eletroniche e une risaltât gust pe sperimentazion.

Il minialbum, tacant di “Tiere” fint ae conclusive “Jevâ”, al è une sorte di suite cun contignûts di alte intensitât emozionâl, là che si sint la influence dal garzonât di Silverio inte buteghe dal violinist e etnomusicolic Giulio Venier e chê de scolte di grups tant che i Radiohead e si palese la volontât di rompi cierts schemis tradizionâi, riferîts sei ae tradizion popolâr che ae cjançon di autôr plui o mancul rock.

I colôrs prevalents dal sunôr di “Ø” a son scûrs e opressîfs e la vôs si rimpine sù e fintremai si plate jù, jenfri ritmichis cadençadis, distorsions, cidinôrs, campionaments e inserts di tastiere.
L’efiet al è chel di une fuarce espressive poetiche, apassionade e espressive, che e piture la fuarce di une nature maraveose e teribile.

La lôr struture no je convenzionâl, ma chestis cjançons a funzionin ancje dal vîf, cemût che si veve verificât za intal conciert fat ai 22 di Novembar a Comelians, inte suaze dal festival Suns Europe.

Juste vie par chescj dîs, il gnûf repertori di Massimo Silverio al vignarà presentât dal vîf ator pe Europe. Cun di fat, la jessude di “Ø” e je compagnade di une rie di concierts, là che Silverio al cjante e al sune, compagnât dal baterist e percussionist Nicholas Remondino e dal polistrumentist Leo Virgili, che a àn vût lavorât cun lui inte regjistrazion e inte produzion dal disc.

La tournée e je tacade il prin di Fevrâr a Lubiane, e à za tocjât Viene, Brno, Praghe e Berlin e e va dilunc ancjemò in Gjermanie, tai Paîs Bas e inte Belgjiche.
Par savênt di plui: https://www.facebook.com/massimosilveriomusic/.

La Basu + Brieg Guerveno + Gruff Rhys + Dissociative TV + Blu l’Azard + Riu Mannu = Babêl Europe 02/2020

Un altri viaç a torzeon jenfri musichis, lenghis, minorancis e nazions cence stât.  Al è ce che e promet la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une e in chel di sabide a une e mieze.

Intal secont episodi dal 2020 dal program, che si pues scoltâlu doman, miercus e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ), si fevelarà ancjemò di discs e di libris, in continuitât cu la prime pontade dal an.

In particolâr e sarà la pussibilitât di scoltâ in anteprime une cerce di ‘Vel Ma Vin, l’album gnûf dal rocker breton Brieg Guerveno, che al vignarà presentât in maniere uficiâl sabide ai 25 di Zenâr cuntun conciert a Naoned/Nantes.  Al sarà spazi ancje par une gnove selezion di Gerra, il disc de rapper basche La Basu, che al è stât screât juste doi mês indaûr, pe gnove produzion dai cjargnei Dissociative TV e par scoltâ ancjemò alc di Pang!, l’album plui resint dal innomenât artist galês Gruff Rhys, e di Enfestar, il prin disc, jessût tal 2015, de formazion ocitane e francoprovençâl dai Blu l’Azard.

Intal spazi dedicât ae scriture e ae leture babelichis si fevelarà dal romanç in lenghe sarde Riu Mannu. The Lan(d)guage Grabbing di Micheli Ladu.

Ancje cheste pontade di Babêl Europe, dopo des sôs trê emissions vie pe setemane (doman in direte, miercus e sabide in repliche), si pues tornâ a scoltâle in rêt su Spreaker e su Spotify.

Brût & Madone + Lou Quinse + Balt Hüttar + Shardana + Etsaiak = Babêl Europe 12/2018

Lenghis, minorancis, nazions cence stât e musiche ruspiose, robuste, penze, pesante e fuartonone. La pontade numar 12/2018 di Babêl Europe, che e je ancje la prime dal mês di Jugn intal palinsest di chest an di Radio Onde Furlane, e promet un menù une vore impegnatîf, cuinçât di novitâts discografichis e di cualchi corse indaûr tal timp, tra hard rock, heavy metal e hard core punk.

Il viaç musicâl babelic al cjaparà dentri il Friûl, la Ocitanie, i Cimbars dal Venit, la Sardegne e il Paîs Basc. E sarà la ocasion par cerçâ il prin disc uficiâl dai furlans Brût & Madone, Amîs Bire Casin, che al è stât presentât juste sabide stade a Pradaman, il gnûf album de band folk metal Lou Quinse, Lo Sabbat, jessût sù par jù un mês indaûr, e la seconde produzion dai Balt Hüttar che a rivin des bandis di Asiago, ancje chê saltade fûr che nol è tant. Cun di plui e sarà la pussibilitât di sgarfâ tal repertori de band epic metal sarde Shardana e di un grup storic basc tant che i Etsaiak, che passe trente agns dopo de lôr fondazion a son ancjemò a torzeon.

L’apontament cun Babêl Europe (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al è par doman, martars ai 12 di Jugn, a 11 a buinore in direte, e po in repliche par miercus ai 13, a une dopo di misdì e ancjemò par sabide ai 16 a une e mieze, simpri dopo di misdì. Dopo des trê emissions de setemane ancje cheste trasmission si podarà tornâ a scoltâle in podcast.

Suns Europe 2017. Lenghis vivis, comunitâts solidariis e sunôrs e visions di cualitât

La diversitât linguistiche e je alc di biel, di bon e di just. Lu à tornât a marcâ ancje chest an Suns Europe, il festival des arts tes lenghis minorizadis dal continent, che si à davuelt a Udin dai 30 di Novembar ai 2 di Dicembar.

La manifestazion, inmaneade des cooperativis Informazione Friulana e Puntozero, cu la poie de ARLeF (Agjenzie Regjonâl pe Lenghe Furlane), della Regjon Friûl-VJ, dal Comun di Udin e de Fondazione Friuli, cu la colaborazion de Fondazione Teatro Nuovo Giovanni da Udine e dal Babel Film Festival e cul patrocini dal Consei de Europe, e je stade coerente cu la sô storie e cui siei intindiments di fonde. Il festival al à metût dongje une schirie di concierts, proiezions, incuintris e events speciâi par promovi la diversitât linguistiche tant che dirit di fonde e risultive di creativitât. A son stâts trê dîs plens di sunôrs, di visions e di peraulis di cualitât. Suns Europe 2017 al à fat cjantâ, balâ, pensâ, scrivi e fevelâ cu lis lenghis ‘altris’ de Europe e in cont des lenghis ‘altris’ de Europe.

Il viaç che al è tacât vie pe buinore di joibe ai 30 di Novembar cu la prime trasmission speciâl su Radio Onde Furlane al à vût un grum di moments interessants. Tra chescj e merete ricuardade la proiezion di Missus, il cine di Massimo Garlatti Costa che al conte la bataie puartade indenant di passe cuarante agns dai predis di Glesie Furlane pe afermazion dai dirits linguistics tal cjamp de religjon e de liturgjie. Une storie particolâr che e ven contade cuntune biele combinazion di imagjins e peraulis, cuntune fotografie sflandorose che e esalte i paisaçs dal Friûl e cun snait e sensibilitât, che e à tocjât il cûr e il cerviel di chei cinccent di lôr che lu àn cjalât te sô prime proiezion in Friûl te sale dal ‘teatron’.

Tra cines, concierts e altris incuintris, tal foyer dal ‘teatron’ e je stade la pussibilitât, tra l’altri, di cjalâ une cerce de gnove serie di documentaris sui zovins creatîfs furlans e di preseâ il film di Dylan Goch e Gruff Rhys, Separado!, un diari di viaç che al partìs di une memorie di famee e al devente une sorte di documentari cuinçât di elements sureâi che al conte la emigrazion galese in Patagonie, intant che cul apontament dedicât al Premi S. Simon si à fat il pont su la leterature furlane contemporanie e sabide a buinore la sale dal ‘Giovanni da Udine’ si è jemplade di students pe seconde edizion di Scuele Europe, incuintri formatîf in cont de diversitât linguistiche tant che patrimoni, dirit e oportunitât par ducj, tra i artiscj di Suns Europe e i zovins di chenti.

Un altri moment une vore rilevant al è stât l’incuintri dal dopo di misdì di sabide, cul confront in cont di identitât, creativitât, dirits, autoguvier e Europe jenfri il gjornalist american Ariel Yerushalami, il musicist, scritôr e cineaste galês Gruff Rhys, il gjornalist e operadôr culturâl frison Onno Falkena e il poete e scritôr furlan Maurizio Mattiuzza.

E po e je rivade la serade finâl, screade cuntun omaç ae memorie dal poete trastolon Raff BB Lazzara e presentade cun snait e cun stîl di Michele Polo e Natalie Norma Fella, cui siet artiscj finaliscj, espressions dal Gales, dal Paîs Basc, de Bretagne, de Galizie, dal Cjanton dai Grisons, dal Friûl e de Basse Sassonie, e i trê ospits di gale, dai Paîs Catalans, dal Gales e de Buriazie.
Cussì a son stadis lis esibizions des Adwaith, cul lôr indierock melodic e diret, da La Basu, a scjavaç tra rap, raggamuffin e crossover, dai Ebel Elektrik, rockers granitics e ruspiôs, dai Esposa, cul lôr ‘gal-pop’ melodic e dinamic, di Tumasch è, in balance tra rock e cjançon di autôr, di Franco Giordani, cuntune biele version de sô cjançon dedicade al zuiadôr di balon clautan Ruggero Revelli Grava, e di Isa Zwart, cul so pop melodic e coreografic.  E po, intant che il public al votave e la jurie e faseve lis sôs valutazions, il palc al è stât jemplât des sugjestions musicâls des maiorchinis Joana Gomila e Laila Vallès dal grup Joana Gomila Folk Souvenir, de cjançon visionarie par galês di Gruff Rhys e dai rivocs inmagants de Buriazie dai Namgar.

Cun di plui la serade si à veirte cuntun omaç ae memorie dal poete trastlon Raff BB Lazzara e la partecipazion  dal grup Joana Gomila Folk Souvenir e je stade la ocasion par palesâ la solidarietât di Suns Europe cu la Catalogne cu la proiezion sul schermi dal messaç «No Esteu Sols» (No sês di bessôi) che e je stade compagnade dal batiman de int.

Par ce che al tocje il concors, la sintesi tra il vôt dal public, indreçât viers di Isa Zwart, di Tumasch è, dai Ebel Elektrik e da La Basu, e chel de jurie che e à mostrât di preseâ soredut il cjantautôr rumanç e i rockers bretons, e à puartât ae atribuzion dal premi finâl propit al artist dal Cjanton dai Grisons. Sul podi virtuâl di Suns Europe ancje Ebel Elektrik e La Basu.
Vie pe serade al è stâ dât ancje un premi speciâl a Gruff Rhys, «pe maniere che al à doprât e che al dopre la lenghe galese, te sô musiche visionarie e tes sôs visions musicâls, e pal snait e pe cussience che al palese tes sôs ativitâts, là che pardabon indentitât e fâs rime cun libertât».

 

La cjançon juste (massime) pai 4 di Novembar. Ancje par chest an

 

Vuê o sin ai 4 di Novembar. Ancje chest an al è miôr scoltâ une cjançon.

Cheste (ancje in cheste version achì) e je simpri la cjançon juste te zornade juste (cundut che e larès ben ancje in altris zornadis).

Al torne Babêl Europe. Discs gnûfs e resistents di Ocitanie, Sardegne e Friûl

Vuê al è martars e a 11 a buinore su Onde Furlane al torne Babêl Europe, la trasmission cuindisinâl dedicade ae produzion musicâl tes lenghis minorizadis dal continent.

La prime pontade dal mês di Mai di chest an, che si podarà scoltâle in repliche ancje miercus ai 3 a une dopo di misdì e sabide ai 6 a une e mieze dopo di misdì, e promet cercis di discs gnûfs che a rivin de Ocitanie, de Sardegne, de Arberie e dal Friûl.

In particolâr, in continuitât tematiche cu la trasmission di cuindis dîs indaûr dedicade ae Resistence e ae Lote di Liberazion cuintri dai fassisims in Europe, si scoltarà alc di Resistencia, il disc plui resint dai Goulamas’k, e di Cabudanni, l’album gnûf di Dr. Drer & CRC Posse, che a àn fate une lôr version par sart de innomenade cjançon antifranchiste di Lluis Llach, L’Estaca.

Cun di plui, a proposit di discs gnûfs, al sarà spazi pe Peppa Marriti Band, cuntun altri toc gjavât dal cd Ajëret, screât sù par jù doi mês indaûr. E al sarà spazi par alc altri ancjemò: pai furlans Brût & Madone, pai galizians Familia Caamagno e par un omaç ae memorie di Leo Zanier.

Chi di cualchi dì, cheste pontade di Babêl Europe, dopo de emission in direte e des replichis di doman e di sabide, si podarà tornâ a scoltâle in rêt, compagn di chê altris, sul sît internet di Radio Onde Furlane.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu.

Musiche babeliche e resistente, martars ai 18 in direte su Onde Furlane

Doman al è martars e su Onde Furlane al torne Babêl Europe, la trasmission cuindisinâl dedicade ae produzion musicâl tes lenghis minorizadis dal continent.

Si svicine la date dai 25 di Avrîl e par chel la gnove pontade dal program, che si podarà scoltâle in direte ai 18 di Avrîl a 11 a buinore (e po, in repliche, ancje miercus ai 19 a une dopo di misdì e sabide ai 22 a une e mieze dopo di misdì) e sarà dedicade ae Lote di Liberazion cuintri dai fassisims in Europe.

E sarà une trasmission plene di musiche babeliche e resistente, cuntun percors che al cjape dentri Friûl, Sardegne, Bretagne, Paîs Basc e Catalogne.

In particolâr si podarà scoltâ la version par breton e in part ancje par francês di Bella Ciao dai Ramoneurs de Menhir, lis storiis par sloven e par furlan de Resistence in Friûl contadis e cjantadis dai The Preklets e dai Rive No Tocje, l’omaç in musiche ae figure di Antonio Gramsci fat dai sarts Ratapignata, juste intant de jessude dal film Nel mondo grande e terribile di Laura Perini, Maria Grazia Perria e Daniele Maggioni, e la version dai bascs Betagarri de L’Estaca, la innomenade cjançon antifranchiste di Lluis Llach.

Chi di cualchi dì, cheste pontade Babêl Europe, dopo de emission in direte di doman e des replichis di miercus e di sabide, si podarà tornâ a scoltâle in rêt, compagn di chê altris pontadis di Babêl Europe, sul sît internet di Radio Onde Furlane.

Babêl Europe, doman in direte e miercus in repliche la ultime puntade dal 2016

Babêl Europe no si ferme nancje vie pes fiestis di Nadâl e dal ultin dal an. La trasmission cuindisinâl dedicade ae produzion musicâl tes lenghis minozadis dal continent, che di passe cuatri agns e fâs part de programazion di Radio Onde Furlane, … Continue reading

Dopli apontament ai 31 di Otubar a Udin: Trastolons + Rive No Tocje e LaipNessLess

tananai

Poesie e musiche furlane e babeliche a Udin. Ai 31 di Otubar a son doi apontaments di pierdi.

Il prin al è a 6 e mieze sot sere li dal Bar di Moroldo ‘Cjanton da Cjargno’ in vie Caccia 47. Al è un incuintri di pinsîrs, di peraulis, di sunôrs, di emozions e di visions «cence leç» (senza legge) che si palesin intune lenghe che si declare «caraibiche». I protagoniscj dal event a son i Trastolons, il grup poetic che di vincj agns incà al puarte indenant il so percors poetic e leterari cence etichetis, scalembri e iregolâr, furlan e disobedient, incostant e babelic.

Guido Carrara, Stiefin Morat, Lussia di Uanis e Fabian Riz cu la complicitât dai Rive No Tocje a presentaran pe prime volte i siet Cjants di acompagnament al tierç mileni, une performance leterarie-musicâl che e va daûr de ispirazion che e à marcât tantis altris azions ‘trastolonis’, des publicazions Tons Trastolons (dal 1998) e Tananai (dal 2001) ai diviers events publics di chescj agns.

rive_no_tocje

Une ocasion par ricuardâ che di Alap a Kabul nol è dome savalon e par tornâ a saludâ Raff BB Lazzara, cuntun gnûf omaç ae memorie dal trastolon che nol è plui.

Il secont apontament al è a 9 di gnot alì dal Quinto Recinto Enofficina, in splaç dai Pecile 3.

E sarà une gnove ocasion par viodi e scoltâ dal vîf i LaipNessLess, innomenade formazion de Basse Furlane, che di un pâr di agns incà e met dongje cun efiets simpri interessants une turbostaiare ironiche, visionarie e plene di rock e di blues.

Di Muçane e Ziline lis Bestiis Forestis si preparin a invadi la capitâl dal Friûl.

laiplessness4

Rive No Tocje, al rive il disc gnûf e si presente a S. Zuan ai 30 di Setembar

rive_no_tocje

Il Povolâr Ensemble al cjantave «O vin fat 30 e o fasarìn 31». Par Musiche Furlane Furlane (MFF), la etichete discografiche nassude tal 1999 de esperience di Radio Onde Furlane e dal Premi Friûl, si podarès mudâ chel ritornel in cheste maniere: «O vin fat 50 e ancje 51».
Cun di fat, doman ai 30 di Setembar, si fasarà la presentazion uficiâl dal disc numar 51 dal catalic di MFF, cuntun event che al somee une vore interessant.

Il cd, che il so titul al è Lis conseguenzis dal deliri, al è il secont album dai Rive No Tocje, la cubie formade dal ‘Citòs’ e dal ‘Polente’ – ven a dî: Fabrizio Citossi e Franco Polentarutti – che te Basse Furlane al è za di cualchi an che a metin adun ispirazion poetiche e rock blues fûr dai schemis.

Dopo di Svuaze, il prin disc autoprodusût, saltât fûr sù par jù doi agns indaûr, che al jere minimalist te confezion e scalembri tai contignûts, i Rive No Tocje a son tornâts in studi e cumò a dan fûr une altre racuelte che e conferme il lôr stîl no covenzionâl, cun sunôrs e visions là che si incrosin il delta dal Mississippi e i rapârs e lis bocjis dal Ausse-Cuar, de Ziline e dal Cormôr e cun peraulis sfolmenadis che a van daûr dal cd di esordi e de linie poetiche dai Trastolons, che passe cuindis agns indaûr a vevin salvoltât e tornât a inventâ la scriture furlane in sens babelic e caraibic.

In dut a son cutuardis tocs, cun divagazions psichelichis e sgrasais sonics e cun tescj che a son ironics, sureâi o ben atents viers di argoments di caratar storic o sociâl, cemût che a sclarissin titui tant che Polente against the machine, Manzin stomp, Vuere artesiane e Lis brigadis rosè.

Par meti dongje il disc, il ‘Citòs’ e il ‘Polente’ si son zovâts de colaborazion di une schirie di amîs musiciscj, che juste doman a sunaran dal vîf pe presentazion dal ‘prodot finâl’. L’apontament al è a tacâ di nûf di gnot alì de sede de associazion Rozaleo (Vie Rome 61), a Sant Zuan dal Nadison.

Cussì, te serade, inmaneade di Radio Onde Furlane, Rozaleo e Blues Club 356, i Rive No Tocje a vignaran compagnâts di Claudio Cojaniz, Fabian Riz, Jvan Moda, Mauro Raddi e di une rapresentance dai Trastolons.

Tra chei che a vevin lavorât tal disc dai Rive No Tocje al jere ancje Raff BB Lazzara, che nus à lassât cualchi mês indaûr. La fieste-conciert dai 30 di Setembar e sarò ancje un ricuart e un omaç ae sô memorie.