Sant Zuan si svicine, fieste grande a Turin

sangiovanni13

A son tacadis Sabide stade lis fiestis par Sant Zuan, il patron di Turin. Par une desene di dîs un pôc par dute la citât – tal centri storic, ma ancje a Mirafiori, in Vie San Donato e in Cors France – a son events e iniziativis.

Salacor in timps di crisi al covente ancjemò di plui dâsi dongje e sintîsi comunitât.

Il grant finâl al è par Lunis ai 24 a 10 e mieze di gnot cui fûcs artificiâi dongje dal Po.

Dut il program si lu cjate achì.

Turin, un cjanton di Friûl

turin_lamoleantoneliane

I furlans a son dapardut… A Turin e dulintor, par esempli, al sucêt avonde dispès di cjatâ cualchidun che al fevele par furlan o che al spice lis orelis se al sint che al è cualchidun che al dopre la nestre lenghe. Sul autobus, tai centris comerciâi, pe strade, in cualchi ufici.

Inte plui part dai câs no son turiscj, ma a son turinês o piemontês di divignince furlane: int che di plui o mancul timp e je a stâ chenti. A son chei, che vuê a son in pension, che a jerin vignûts a Turin e in Piemont dopo de fin de Seconde Vuere Mondiâl e soredut tai agns Cincuante e Sessante dal secul stât. A son chei, che a àn sù par jù chê stesse etât, che a son fîs di imigrâts rivâts achì ancjemò di prime, magari dopo jessi stâts inaltrò, par esempli intal Stât francês. A son chei, plui o mancul zovins, tra i trente e i cincuante agns, che a son nassûts in Piemont, a vivin chenti o magari di ca si son trasferîts in altris puescj: a Parîs, a Londre, a Milan o fintremai in Friûl. E a son chei, ancjemò plui zovins, che dal Friûl a vegnin a Turin par studiâ li dal Politecnic o par lavorâ tai setôrs plui diviers.

Une fotografie di cheste situazion le vin viodude – o, miôr, le vin vivude – juste chê altre dì, la vilie di Nadâl, intun ufici de Pueste di Mirafiori, là che si sin cjatâts par câs in cuatri di nô, dute int che e vîf inte zone. Al someave di jessi intun paîs dal Friûl.

O jerin a Mirafiori, Turin: un cjanton dal Friûl pal mont, un cjanton di Friûl cence confins.

PS. Par completâ il cuadri al è ancje cui che, tornât a cjase, al à impiât l’ordenadôr par scoltâ in direte “streaming” la Fieste de Vilie di Nadâl di Radio Onde Furlane.

“Alloggi-a-mi”, une biele iniziative a Mirafiori

Un jutori pai students forescj e pes fameis di chenti. Al è chel che al rive di “Alloggi-a-mi”,
un biel progjet metût adun a Mirafiori de bande de Associazione ARIS.

La iniziative e met dongje ospitalitât e socialitât cun chê di cjatâ une sistemazion ai zovins di fûr che a studiin a Turin, di dâ une man aes fameis dal cuartîr e di fâ rindi, daûr di une logjiche solidarie, chei apartaments che a son vueits, in part o ad in plen.

Il progjet al è stât presentât intun articul saltât fûr a pagjine 7 dal numar di Otubar dal periodic “Mirafiori Sud”: http://www.mirafiorisud.org/numeri/201210/6-7-8.pdf.

Par savênt di plui: alloggiami@gmail.com.