Sumé + Inadaptats + A Ricuccata + Jitiizer + Gavinu De Lunas = Babêl Europe 8/2021

Croniche, storie, gnovis produzions e classics di tornâ a discuvierzi. Al è ce che al propon la pontade numar 8 dal 2021 di Babêl Europe, la trasmission cuindisinâl dedicade a lenghis, musichis, minorancis e nazions cence stât, in programazion cheste setemane su Radio Onde Furlane.

Il percors babelic si disviluparà jenfri Groenlande, Catalogne, Corsiche, Sardegne e Frisie. Si scoltarà un toc dal repertori dai Sumé, storiche formazion che vie pai agns Setante e faseve rock cjantant inte lenghe proprie de grande isule, il kalaallisut, compagnant lis mobilitazions popolârs di in ch a pro dal autoguvier, se si fevelarà dai risultâts des elezions politichis groenlandesis, segnadis de afermazion dai indipendentiscj, ecologjiscj e progressiscj dal Inuit Ataqatigiit, dant ancje un cuc a un articul in cont dal argoment che al è jessût tal blog di Ethnos & Demos.

This image has an empty alt attribute; its file name is gavino_de_lunas1.jpg

Par ce che al tocje lis novitâts al sarà spazi pe cjançon che e segne il tornâ su la sene de storiche band catalane dai Inadaptats e par une cerce dal disc a pene screât de formazion corse A Ricuccata, Dante in Paghjella. E sarà ancje la ocasion par tornâ indaûr tal timp inte prime metât dal Nûfcent par ricuardâ il cjantant sart Gavino De Lunas, che al pierdè la vite intal maçalizi nazist des Fosse Ardeatine ai 24 di Març dal 1944, e par fâsi dâ une scjassade de musiche ruspiose de band frisone dai Jitiizer.

La trasmission si pues scoltâle martars ai 13 di Avrîl in direte a 11 a buinore e po in repliche miercus ai 14 (h. 13) e sabide ai 17 (h. 13.30) sui 90 Mhz inte plui part dal Friûl, sui 90.200 Mhz in Cjargne e in streaming

Passadis lis trê emissions di cheste setemane, ancje cheste pontade di Babêl Europe si podarà tornâ a scoltâle in podcast sul Spreaker e sul Spotify di Radio Onde Furlane.

This image has an empty alt attribute; its file name is logo_web.png

Storie e atualitât, tra Catalogne e Friûl. Vuê su Onde Furlane al torne Babêl Europe

L'immagine può contenere: 1 persona, sMS

Un gnûf apontament plen di storie e di atualitât, di poesie e di memorie, di ideis e di peraulis e soredut di musiche, tra omaçs e citazions. Vuê al è martars e a 11 a buinore, su lis frecuencis di Radio Onde Furlane, pe sô prime emission in direte, al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Te pontade di cheste setemane, che si podarà scoltâle ancje doman, miercus il 1n di Novembar, a une dopo di misdì e po sabide ai 4, a une e mieze, si scoltarà musiche cjantade par catalan, par sart, par cors e par furlan e si fevelarà di ce che al è ancjemò daûr a sucedi in Catalogne, dai inovâi de Prime Vuere Mondiâl, di leaments tra cjançons e tra gjenerazions diferentis di autôrs e musiciscj.

E sarà la ocasion par fâ un omaç incrosât a Ovidi Montllor, une des personalitâts plui innomenadis e rispeitadis de nova cançó catalana, e a Giorgio Ferigo, che cul Povolâr Ensemble al è stât par sigûr un inovatôr tal cjamp de cjançon e de musiche par furlan, e lâ a torzeon dilunc di un percors che al partìs dai Paîs Catalans, al tocje la Sardegne e la Corsiche e al rive in Friûl, cu la musiche ancje di Inadaptats, Dr. Drer & CRC Posse, L’Arcusgi e Vanilla Resident.

Dopo des emissions in direte e in repliche (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu), ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.

 

Di Gwenno a Gwennyn, su Onde Furlane une gnove pontade di Babêl Europe

Doman al è martars e a 11 a buinore su Radio Onde Furlane al torne Babêl Europe, il program cuindisinâl dedicât ae produzion musicâl contemporanie tes lenghis minorizadis dal continent.

La prime pontade avostane di chest an, che si podarà scoltâle in repliche ancje miercus ai 9 a une dopo di misdì e sabide ai 12 a une e mieze, simpri dopo di misdì, e larà daûr dai trois vierts vie pai ultins mês, ven a dî chel dal reggae e dal dub babelics, chel dal punk rock plui o mancul classic e chel des cercis dai contignûts di cualchidun dai discs che a son jessûts tra la fin dal 2016 e la prime part dal 2017. Cun di plui la trasmission e larà daûr di un altri percors tematic simpri siôr: chel des feminis babelichis fuartis.

Tal viaç musicâl proponût  di Babêl Europe in cheste ocasion si incrosaran Catalogne, Arberie, Bretagne, Gales, Cornualie e Galizie.  Cussì si scoltarà la storiche e innomenade band dai Inadaptats, cu la lôr version di chê che e je calcolade la prime cjançon punk rock par catalan (Ciutat Podrida de La Banda Trapera del Rio), il reggae cjantât par albanês de Spasulati Band,  une altre selezion di Opoñerse á extinción, il disc plui resint de cjantautore galiziane Ses (Maria Xosé Silvar), un toc par cornic dal repertori di Gwenno e un de sô cuasi omonime Gwennyn, cjantante bretone in balance tra pop, rock e folk.

Chi di cualchi dì, ancje cheste pontade di Babêl Europe, dopo de emission in direte e des replichis di miercus e di sabide, si podarà tornâ a scoltâle in rêt, compagn di chê altris, sul sît internet di Radio Onde Furlane.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu o cu la app che si pues discjamâle achìachì.